17/03/2005 http://www.shekulli.com.al/

Në kryeqytet pritet të konkurrojnë politikanë por edhe ish-themeluesit Imami, Pashko e Ruli

PD, lista e kandidatëve të Tiranës

Ekipi i demokratëve në Tiranë do të ketë një barazpeshë mes zyrtarëve të lartë dhe anëtarëve të KOP

Nevila Perndoj

TIRANE- Show i kryeministrit Fatos Nano me paraqitjen e kandidaturave të PS-së për Tiranën, nuk ka shërbyer aspak si nxitje për kampin tjetër opozitar. Kandidaturat e selisë blu për Tiranën ka shumë kohë që përfliten. Aq kohë sa edhe vetë lideri i opozitës, Sali Berisha, ditën e parë të shpalljes së përbërjes së Komitetit të Orientimit të Politikave, deklaroi se, disa prej tyre janë futur për të dhënë eksperiencën e tyre, ndërsa disa të tjerë për t’u angazhuar politikisht. Dhe anëtarët e KOP-it do të kandidojnë fort dhe jo pak, por 50% e tyre me 50% nga përfaqësues të selisë blu do të përbëjnë ekipin e kandidatëve të PD për Tiranën.
Edhe pse asgjë nuk është konkrete dhe përfundimtare, në zyrat e Partisë Demokratike, janë evidentuar tashmë kandidatët e mundshëm për deputetë. Burime zyrtare nga PD deklaruan dje se i parti në listën e kandidatëve, që do të garojë në kryeqytet, është nënkryetari Bamir Topi, i cili pritet të ndryshojë zonë. Sekretari i Marrëdhënieve me Jashtë, Besnik Mustafaj, është një tjetër kandidaturë, që e ka të sigurtë garimin. Edhe pse emri i tij nuk ka kaluar në strukturat e Partisë Demokratike për të marrë viston përfundimtare, Mustafaj është zyrtari i dytë i lartë në parti, që ka filluar garën. Sekretari i Marrëdhënieve me Publikun, Spartak Ngjela, është një tjetër zyrtar i lartë, që duket se do të garojë kësaj here në zonën e ish-Bllokut në Tiranë. Edi Paloka nuk do të përballet këtë radhë në zonën e tij me Andis Harasanin, i cili është shprehur se ka të sigurtë fitoren. Nuk dihet ende zona që do të garojë, por kandidimi i tij nuk vihet në dyshim. Edhe kryetari i PD, Vili Minarolli, është një tjetër kandidaturë, që pretendon të fitojë zonën e Laprakës, por ende nuk ka marrë viston nga strukurat e partisë. Shaban Memia i cili ka fituar bindshëm para katër viteve në zonën e Bathores, kësaj here duket se do të angazhohet në një tjetër zonë po aq të rëndësishme, ndoshta përballë drejtorit të KESH Andis Harasani.
KOP
Edhe nga KOP-it duket se do të ketë kandidatura potenciale dhe të spikatura përballë emrave të PS-së. Edhe dje kryetari Berisha, u shpreh se PD-ja do të ofrojë eksponentë të shquar të shoqërisë civile dhe të botës akademike. “Ne do të përpiqemi që të bëjmë më të shumtën për të pasur një maxhorancë parlamentare shumë të mirë, të bazuar në vlera dhe dije”. Në listën e kandidaturave për Tiranën, Lulëzim Basha, anëtari i KOP-it që ka ndërprerë një kontratë të rëndësishme me UNMIK-un në Kosovë e ka të sigurtë kandidimin në një nga zonat e Tiranës. Besnik Aliaj është një tjetër emër jo më pak i fortë, që qarkullon bindshëm në zyrat e selisë blu se do t’i propozohet një zonë e sigurtë për të fituar. Aliaj nuk është shprehur ende lidhur me këtë ofertë, që nuk është zyrtare, ashtu si edhe për çdo kandidat tjetër. Pak kohë më parë, Aliaj është shprehur se KOP do të shërbejë si testi thelbësor i ndryshimit dhe reformimit të kësaj partie. Me pas vijnë emra të tjerë, si Florian Mima, Edmond Leka apo Elida Reçi. Në listën e kandidaturave është edhe emri i Majlinda Bregut, e cila pak kohë më parë ishte shprehur se përfshirja e saj në KOP nuk lidhej domosdoshmërisht me ndonjë ambicje politike. Bregu është menduar të jetë kandidatura femër përballë një kandidature po femër nga PS, që mund të jetë Majlinda Keta ose Mimi Kodheli. Në listën e kandidaturave po lakohet edhe emri i Aldo Bumçit, ndërkohë që nuk dihet ende nëse do të garojë në Tiranë apo Shkodër.
Ish-dhjetoristët
Në listën paraprake të kandidaturave që duhet theksuar se nuk është zyrtare dhe përfundimtare po lakohet edhe emri i ish-dhjetoristit Arben Imami. Një tjetër kandidaturë është edhe Genc Ruli. Edhe Gramoz Pashko është emri i tretë që përflitet për të kandiduar edhe pse ky i fundit nuk është shprehur në asnjë deklarim të tij lidhur me qëndrimin që ai do të mbante, nëse do t’i ofrohej një ofertë e tillë nga PD.

Lista e kandidaturave të Tiranës për deputet:
Bamir Topi
Besnik Mustafaj
Spartak Ngjela
Edi Paloka
Shaban Memia
Vili Minarolli

Lista e kandidaturave të Tiranës nga KOP:
Lulëzim Basha
Besnik Aliaj
Florian Mima
Edmond Leka
Elida Reçi
Aldo Bumçi
Majlinda Bregu

Lista e ish-funksionarëve të lartë të PD-së për deputet:
Genc Ruli
Gramoz Pashko
Arben Imami

Lista e kandidaturave të PS-së për Tiranën:
Shpëtim Idrizi
Andis Harasani
Majlinda Keta
Mimi Kodheli
Arben Ahmetaj
Igli Toska
Ermelinda Meksi
Musa Ulqini
Spartak Poçi
Anastas Angjeli