Partia Demokratike ka shpallur dje programin e saj qeverisës për 100 ditët e para, që nga momenti që ajo do të krijojë kabinetin e ri bashkë me aleatët e saj.

Pas premtimeve të shumta në takimet elektorale të zhvilluara gjatë fushatës, Berisha ka zbardhur dje pikat kyçe të objektivave kryesore të qeverisjes së tij, ndryshe nga qeverisja paraardhëse e socialistëve. Në një takim me përfaqësues të KOP-it, Berisha ka paraqitur tashmë platformën e tij qeverisëse, duke tërhequr vëmendjen te çështjet kryesore dhe ato që janë më emergjente për t’u zgjidhur brenda 100 ditëve.
Ky program parashikon ndërhyrje në fusha të rëndësishme si ekonomia, energjetika, arsimi, shëndetësia, drejtësia si dhe angazhime serioze në luftën kundër korrupsionit dhe krimit. Duke iu referuar programit në fjalë, lideri demokrat ka thënë se ai do të synojë një tranzicion të butë, duke e krahasuar me atë në të cilin ndodhet aktualisht vendi ynë. Premtimet e PD-së në këtë program të përmbledhur, i cili është posaçërisht për 100 ditët e para të qeverisjes, nuk kanë ndryshuar nga ato që janë bërë gjatë fushatës elektorale, por veçse janë detajuar më shumë. Për demokratët, gjendja e rëndë e problematike e vendit kërkon një qeverisje eficente që në ditët e para të saj. Ndaj ata premtojnë se do të rivendosin ritmin e përshpejtuar të punës në të gjithë administratën qendrore të ekzekutivit, si dhe do i kërkojnë çdo institucioni të pavarur bashkëpunimin ligjor, por të përkushtuar për të mundësuar futjen e vendit sa më shpejt në rrugën e integrimit e të zhvillimit.

Antikorrupsioni
Lufta kundër korrupsionit dhe krimit të organizuar, të cilat janë diskutuar shumë nga PD-ja në tryezat që ajo ka zhvilluar me shoqërinë civile dhe KOP-in do të jenë synimet më kryesore të qeverisjes së djathtë. Për këtë qeveria e ardhshme premton se do të ngrejë organizma të specializuara nën drejtimin e kryeministrit, siç është ai i Task-Forcë antikorrupsion, si dhe rishikimi i rolit të njësisë antikorrupsion. Një pikë e rëndësishme e programit për këtë çështje është dhe zbatimi i ligjit për konfliktin e interesave si dhe amendimi i tij, sipas PD-së, në pikat e dobëta

Pronat dhe legalizimi
Pronat dhe legalizimi i pronave informale janë dy ligje mjaft të rëndësishme, të kontestuara nga PD-ja në kohën kur janë miratuar në Parlament, do të rishihen në 100 ditët e para të qeverisë së djathtë. Ato pas ndryshimit do të zbatohen menjëherë. Për vitin 2005, qeveria e re që do të krijohet premton kryerjen e më shumë se gjysmës së legalizimeve. Për sa i përket ligjit “Për kthimin dhe kompensimin e pronave”, në programin 100-ditor, përveç rishikimit të tij mbi bazën e programit të PD-së dhe të aleatëve të saj, premtohet dhe llogaritja e saktë e kostos si dhe hartimi i programit të kompensimit. “Llogaritje e saktë e transparente e kostos dhe hartimi i programit të kompensimit në bashkëpunim me shoqatat e ish-të përndjekurve politikë”, një tjetër synim i PD-së brenda vitit 2005

Reforma buxhetore
Një vend të rëndësishëm zënë në programin e PD-së edhe objektivat fiskale e buxhetore të programuar për vitin 2005 nga qeverisja socialiste. Në këtë kuadër premtohet tejkalimi i të ardhurave buxhetore të qeverisjes socialiste për vitin 2005, ristrukturim të organeve tatimore e doganore dhe largim të punonjësve të korruptuar mbi bazën e provave. Ashtu si ka deklaruar dhe në intervista të shumta lideri demokrat, Berisha, në programin 100 ditët e qeverisjes së re premtohet reduktimi i menjëhershëm i shpenzimeve të tepruara qeveritare dhe rialokimi i tyre në prioritetet e zhvillimit. Premtohet rritja e pagave dhe e pensioneve deri në fund të vitit 2005 në programin qeverisës të tyre, duke konsideruar si minimale nivelin e përcaktuar nga programi buxhetor i qeverisjes socialiste

Arsimi dhe Shëndetësia
Gjatë fushatës elektorale për zgjedhjet e 2005, kreu i PD-së, Berisha, ka premtuar se do të liberalizohen universitetet për të gjithë ata që duan t’i frekuentojnë ato, dhe një gjë e tillë parashikohet në programin e 100 ditëve të para të qeverisë. “Universitetet publike do të hapin plotësisht dyert për të gjithë të rinjtë shqiptarë që duan të studiojnë në arsimin e lartë”
Gjithashtu premtohet se do të rishihen mundësitë për rritjen e fondeve publike për arsimin nga buxheti i shtetit për periudhën e mbetur. Për sa i përket fushës së shëndetësisë, në këtë program thuhet se do të rishihet reforma në këtë sektor në përputhje me vizionin dhe programin e PD-së

Albtelekom në shënjestër të korrigjimeve
PD do të anulojë shitjen e bujshme te turqit

Bllokimi dhe anulimi i kontratës së shitjes së kompanisë Albtelekom do të jetë një nga prioritetet e qeverisjes së demokratëve, të cilat premtohen se do të realizohen në 100 ditët e para kur ajo të nisë nga puna. Demokratët pretendojnë të realizojnë vendosjen, sipas tyre, të disiplinës financiare në Telekom, anulimin e të gjitha kontratave korruptive e në konflikt interesi si dhe eliminimin e trajtimeve diskriminuese të operatorëve dhe të shërbimeve të informacionit. Nga ana tjetër, pasi të kenë bërë këtë gjë, PD-ja në programin e saj 100 ditor premton se do të kryejë të gjitha përgatitjet për privatizim të hapur e të ndershëm të Albtetelekom brenda vitit 2006. “Hapje e tenderit ndërkombëtar për këtë qëllim mundësish brenda vitit 2005”, thuhet në programin e 100 ditëve të para të qeverisjes së re. Partia Demokratike e ka kundërshtuar herë pas herë privatizimin e Albtelekomit nga ana e qeverisë aktuale. Në mënyrë të vazhdueshme ata kanë deklaruar se firma që është paraqitur për blerjen e tij është fantazmë. Në mbledhjen e Parlamentit të ri, PD-ja, premton se do të shqyrtohet privatizimi i kësaj ndërmarrjeje dhe do të anulohet kontrata e shitjes, e cila është lidhur nga qeveria aktuale me një firmë turke.

programi

Gjendja e rëndë dhe problematike e vendit, përkundrejt sfidave të mëdha që na presin, kërkojnë një qeverisje efektive që në ditët e para të saj. Qeverisja demokratike do të rivendosë ritmin e përshpejtuar të punës në të gjithë administratën qendrore të ekzekutivit si dhe t’i kërkojë çdo institucioni të pavarur bashkëpunim ligjor, por të përkushtuar për të mundësuar futjen e vendit sa më shpejt në rrugën e zhvillimit të integrimit.

Korrupsioni

1. Krijimin e Task-Force antikorrupsion nën drejtimin e kryeministrit. Rishikimin e rolit të njësisë antikorrupsion. Adoptimin e planit të detajuar të masave antokorrupsion
2. Aktivizimin e menjëhershëm të kontrollit të brendshëm.
3. Aktivizimin e një linje konfidenciale të ankimit për rastet e korrupsionit
4.Lidhjen e një marrëveshjeje bashkëpunimi me shoqërinë civile
5. Ngritjen e qendrave të informimit të publikut. Aplikimi i teknologjisë së informacionit për një komunikim aktiv me publikun në institucionet qendrore të ekzekutivit.
6. Zbatimin e ligjit për konfliktin e interesave. Amendimi i tij në pikat e dobëta
7. Kryerjen e transparencës për financimet e zgjedhjeve të vitit 2005, për aq sa i takon qeverisjes së PD
8. Lehtësimin e imunitetit të zyrtarëve sipas rekomandime dhe modeleve më të avancuara evropiane
9. Rishikimin e ligjit të prokurimeve dhe adoptim i institucionit të ombudsmanit të prokurimeve në procesin e prokurimeve publike

Trafiqet

1. Ristrukturimi i institucioneve kryesore me rol në këtë fushë dhe largimi, i bazuar në prova, i punonjësve të inkriminuar
2. Goditja e shpejtë të grupeve të njohur kriminale
3. Vendosja e menjëhershme e një bashkëpunimi kapilar me institucionet e specializuara ndërkombëtare në luftën kundër krimit të organizuar dhe trafiqeve
4. Ulja e ndjeshme për të paktën e krimit ordiner
5. Vendosja e disiplinës në qarkullimin rrugor dhe ulja e aksidenteve

Financat

1.Masa të menjëhershme për rivendosjen e disiplinës fiskale, ristrukturimi i organeve tatimore e doganore dhe largimi i punonjësve të korruptuar mbi bazën e provave. Tejkalimi i programit të të ardhurave buxhetore të qeverisjes socialiste për vitin 2005
2.Përshpejtimi i programeve të kryerjes së investimeve publike në sektorët prioritare, ndjekja me përparësi e realizimit të tyre
3.Reduktimi i menjëhershëm i shpenzimeve të tepruara qeveritare dhe rialokimi i tyre në prioritetet e zhvillimit
4.Rritja e pagave dhe pensioneve duke konsideruar si minimale nivelin e përcaktuar nga programi buxhetor i qeverisjes socialiste

Buxheti

1.Brenda muajit shtator do të rishikohet programi buxhetor 2006-2008 dhe plani afatmesëm i Zbatimit të Strategjisë Kombëtare të Zhvillimit Ekonomik e Social për ta përputhur me objektivat ambicioze të programit elektoral të PD-së
2.Çdo ministri do të rishikojë dokumentet bazë të strategjive sektoriale, duke adoptuar objektiva ambicioze ose duke bërë strategji të reja në përputhje me programin e PD-së për të gjitha fushat dhe sektorët prioritare të këtij programi
3.Procesi do të jetë tërësisht i hapur për përfshirje në konsultime të shoqërisë civile dhe të komunitetit të biznesit. Kuvendi do të jenë gjithashtu plotësisht i përfshirë në këtë proces

Paketa fiskale ‘06

1.Programi buxhetor dhe fiskal 2006 do të jetë gati brenda muajit tetor 2005. Projektbuxheti do të bazohet në prioritetet qeverisëse të programit të PD-së dhe do të bëhet në konsultim të hapur si asnjëherë më parë me institucionet publike, qeverisjen vendore, shoqërinë civile, komunitetin e biznesit, sindikatat dhe grupet e tjera të interesit. Mbledhjet e qeverisë për projektbuxhetin do të jenë të hapura për publikun
2.Diskutimi i programit buxhetor dhe fiskal 2006 do të fillojë më herët se kurrë në Kuvend, në mënyrë që t’u jepet mundësi të gjithë aktorëve të interesit të përfshihen edhe në këtë stad të dytë

Organizimi qeverisës

1.Sipas kompozimit të qeverisë me më pak kabinete, do të bëhet dhe ristrukturimi i ministrive dhe institucioneve qendrore të ekzekutivit
2.Do të mbyllen ose do të shkurtohen një rrjet i tërë institucionesh parazitare rreth Këshillit të Ministrave dhe ministrive të ndryshme.

KESH

1.Ndryshimi i stafit të lartë drejtues të korporatës
2.Largimi i punonjësve të korruptuar
3.Kryerja e një kontrolli të thellë financiar në këtë kompani
4.Reduktimi i faturimit afrofe në më shumë se 30% të matësve elektrikë të konsumit
5.Sigurimi i furnizimit me energji elektrike për dimrin 2005-2006 në të gjithë vendin
6.Eliminimi i diskriminimeve rajonale në furnizim
7.Rritja e arkëtimeve dhe ulja e ndjeshme e abuzimeve me energjinë elektrike të konsumatorëve të pandërgjegjshëm

Telekomunikacioni

1.Bllokimi dhe anulimi i kontratës së shitjes së Albtelekom
2.Vendosja e disiplinës financiare në këtë shoqëri
3.Anulimi i të gjitha kontratave korruptive e në konflikt interesi. Eliminimi i trajtimeve diskriminuese të operatorëve dhe të shërbimeve të informacionit
4.Përgatitja e plotë për hapjen e tregut të vitit 2006 Rritje e kërkesës për funksionim efektiv të entit rregullator nëpërmjet monitorimit parlamentar
5.Kryerja e të gjitha përgatitjeve për privatizim të hapur e të ndershëm të Albtetelekom brenda vitit 2006. Hapje e tenderit ndërkombëtar për këtë qëllim mundësish brenda vitit 2005
Procedurat administrative. Ulje e barrierave administrative dhe përgjysmimi i ditëve të regjistrimit të një biznesi

Arsimi

1.Ministria e Arsimit në bashkëpunim me qeverisjen vendore do të angazhohen me një prioritet të lartë për të finalizuar të gjitha përgatitjet e duhura për vitin shkollor 2005-2006. Do të rishihen mundësitë për rritjen e fondeve publike për arsimin nga buxheti i shtetit për periudhën e mbetur të vitit
2.Universitetet publike do të hapin plotësisht dyert për të gjithë të rinjtë shqiptarë që duan të studiojnë në arsimin e lartë

Shëndetësia

Rishikimi i reformës në sektorin e shëndetësisë në përputhje me vizionin dhe programin e PD-së. Garantimi i kryerjes së investimeve dhe furnizimit me mjete, duke flokuar (thithur) më shumë fonde nga buxheti pas rishikimit të tij për periudhën e mbetur të vitit

Turizmi në ‘06

1.Si asnjëherë tjetër, përgatitjet për vitin turistik për vitin 2006 do të fillojnë në 2005
2.Me prioritet do të konsiderohet programimi i ndërhyrjeve kryesore në infrastrukturë dhe në shërbimet bazë
3.Prishja e ndërtimeve pa leje dhe largimi i mbeturinave të prishjeve
4.Përgatitja e programit të punës për zhvillimin e turizmit
5.Rishikimi i paketës ligjore për turizmin
6.Hartimi dhe zbatimi i planit të punës për furnizimin me ujë në 24 orë për qytetet turistike për sezonin e verës së vitit 2006.

Legalizimi

1.Rishikimi i ligjit për legalizimet e banesave dhe rifillimi i procesit në përputhje me ndryshimet ligjore Kryerja e më shumë se gjysmës së legalizimeve brenda vitit 2005
2. Vendosja e disiplinës në sektorin e ndërtimeve dhe cilësinë e karburanteve për të ulur ndjeshëm ndotjen e ajrit në qytetet kryesore të vendit

Pronat

1.Rishikimi i ligjit “Për kthimin dhe kompensimin e pronave në përputhje me programin e PD-së dhe të aleatëve të saj. Llogaritje e saktë dhe transparente e kostos dhe hartimi i programit të kompensimit
2. Llogaritje e saktë e transparente e kostos dhe hartimi i programit të kompensimit me bashkëpunim me shoqatat e ish-të përndjekurve politikë

Pakicat

Hartimi i një programi të veçantë të mbështetjes dhe përkrahjes së komunitetit rom dhe egjiptian në bashkëpunim me shoqatat e tyre dhe me organizmat ndërkombëtarë.
Hartimi i një programi emergjent për shkollim për “fëmijët që punojnë në rrugë” dhe mbështetje e familjeve të tyre

Zgjedhjet lokale

Nisja e procesit përgatitor për zgjedhjet vendore të vitit 2006, sipas një procesi të hapur e konsultues me të gjitha forcat politike, qeverisjen vendore, partnerët ndërkombëtarë. Diskutimin dhe gjetjen e rrugëve më të përshtatshme për përfshirjen e emigrantëve në votim.

Integrimi në BE

Ndërsa procesi zgjedhor pritet të mbyllet me sukses, nëpërmjet fillimit të zbatimit të programit të saj 100 ditor, qeveria e PD-së do të fillojë të fitojë besimin e BE-së se nënshkrimi i marrëveshjes së stabilizim-asocimit me BE-në nuk do të kërcënohet nga një mungesë vullneti apo kapaciteti për zbatimin e plotë të saj, vlerësim ky i dhënë nga BE-ja për qeverisjen socialiste të deritanishme. PD-ja beson se brenda vitit 2005 do të nënshkruhet kjo marrëveshje. Nënshkrimi i marrëveshjes do të bëhet duke kërkuar njëkohësisht një rritje më ambicioze të objektivave të projektmarrëveshjes së hartuar gjatë qeverisjes socialiste, objektiva këto që janë aktualisht pesimiste për shkak të mosbesimit që BE-ja ushqeu ndaj kësaj qeverisjeje. Në lidhje me këtë marrëveshje do të kryhet:
1.Rivlerësimi i projektmarrëveshjes e në veçanti i objektivave, afateve dhe angazhimeve të shtetit shqiptar me synim rritjen e nivelit të ambicionit për këto objektiva dhe uljen e afateve
2.Zbatimi i menjëhershëm i rekomandimeve kyçe dhe afatshkurtra të BE-së për një qeverisje demokratike dhe shtet ligjor
3.Forcimi i kapaciteteve të brendshme monitoruese të zbatimit të marrëveshjes. Hapje e procesit monitorues nga shoqëri civile, media dhe publiku në tërësi