18012005

Faqja 5 - POLITIKE

Janar 18, 2005

Kuvendi nis punimet. Debat për krjimin e grupeve parlamentare

PS-PD ndëshkojnë të vegjlit

Nga 12 grupe parlamentare ngelen vetëm 6

Partitë e vogla parlamentare janë ndier dje sërish të tradhtuara nga dy partitë e mëdha, të cilat kanë vendosur që grupet parlamentare të përbëhen nga 7 deputetë. Në këtë mënyrë, PS-ja dhe PD-ja kanë shmangur totalisht mundësinë që partitë e vogla të kenë grupet e tyre parlamentare. Seanca e parë e parlamentit për sesionin e ri parlamentar ka përfunduar në sherre dhe debate të forta mes përfaqësuesve të partive të vogla dhe dy grupeve të mëdha parlamentare. Megjithëse ishte premtuar në sesionin e kaluar që rregullorja e re e parlamentit nuk do të hynte në fuqi që në këtë sesion, dje Kuvendi me shumicë vendosi për të kundërtën. Premtimi i bërë nga PS-ja dhe PD-ja para vitit të ri nuk ishte hedhur në letër, kështu që fjalët i mori era, duke vënë në pikëpyetje ekzistencën e 8 grupeve parlamentare. Kryetari i Kuvendit Servet Pëllumbi deklaroi dje se "tek unë s'ka ardhur asnjë gjë e shkruar që vërteton këtë vendim". Ai kërkoi që më datë 19 në zyrën e tij të jenë paraqitur konfigurimet e grupeve. Pëllumbi pranoi se për të formuar një grup me 7 deputetë mund të bashkoheshin dy grupe aktuale, por një gjë e tillë nuk pranohet nga "të vegjlit". Deputeti socialdemokrat Gaqo Apostoli dhe kreu i PAD-së Neritan Ceka thanë se nuk mund të bashkoheshin parti të ndryshme në një grup duke humbur identitetin. Edhe partitë e opozitës, si PR-ja dhe PDR-ja, nuk janë dakord që të bëjnë grupe të kësaj natyre.

Debati
Kreu i grupit socialdemokrat Gaqo Apostoli kundërshtoi fort zbatimin e rregullores në këtë pikë, duke kërkuar që ajo të zbatohet për legjislacionin tjetër. Partitë e vogla thanë se do të paraqitnin një amendament për këtë çështje. Në seancën e djeshme, të gjithë krerët e grupeve që janë në rrezik firmosën një amendament, ku kërkonin që pika 15 e rregullores për numrin e përbërjes së grupeve të mos zbatohej në këtë sesion. Vetëm katër grupe janë konfirmuar pa problem që ditën e parë të fillimit të parlamentit dhe ato janë grupi i Partisë Socialiste, i Partisë Demokratike, I Lëvizjes Socialiste për Integrim dhe i Lëvizjes për Zhvillim Kombëtar. Deri të mërkurën deputetëve të mbetur në orbitë u duhet të deklarojnë përkatësinë e tyre në një grup, ose të krijojnë një grup të përzier. Pritet që këtë sesion të mos ketë më shumë se gjashtë grupe, kështu që nga të majtët dhe të djathtët pritet që të ketë bashkime të deputetëve të partive të ndryshme. Nga 12 grupe që ekzistojnë, 8 prej tyre nuk mund të qëndrojnë më siç janë. Disa prej tyre janë ai i Partisë Republikane, Partisë Demokrate e Re, Partisë Socialdemokrate, Grupi i të Gjelbërve, Partia Aleanca Demokratike dhe Grupi i Liberal Demokratëve. E vetmja mundësi mbijetese e këtyre grupeve do të jetë marrja e deputetëve nga partitë e mëdha.

Komisionet parlametare PS-PD, negociata për përbërjen

Duket se partitë e vogla parlamentare do të mbeten të zhgënjyera dhe nga krijimi i komisioneve parlamentare të përhershme. Partia Socialiste dhe ajo Demokratike kanë nisur negociatat mes tyre për përbërjen e këtyre komisioneve, të cilat do të jenë vetëm 8, ndryshe nga sesionet e mëparshme. Negociatat sapo kanë nisur dhe pritet që të ngjallin sërish zemërimin e partitë të vogla, të cilat nuk kanë më mundësi për të krijuar grupet e tyre parlamentare. Në përbërjen e tyre pritet që të ketë shumë pak pjesëmarrës nga partitë e vogla parlamentare, pasi numrin e tyre e plotësojnë shumë mirë dy partitë e mëdha. Në nenin e posaçëm të rregullores thuhet që "përcaktimi i përbërjes së kryesive të komisioneve dhe nënkomisioneve bëhet duke pasur parasysh në këto kryesi të grupeve parlamentare, sipas përpjestimit që zënë në Kuvend". Regullorja e re parashikon që një deputet mund të jetë anëtar vetëm në një komision, duke e ndërprerë kështu atë praktikë që është ndjekur deri më tani, që deputetët figuronin në dy deri në tre komisione. Por rregullorja ka parashikuar një pikë, ku u jepet e drejta grupeve të vogla që do të përfaqësohen në komisione që një deputet mund ta bëjnë anëtar të dy komisione.

Pengesa për huazimin e deputetëve

Rregullorja e re e Kuvendit, e miratuar në fund të vitit 2004, parashikon krijimin e grupeve parlamentare me 7 deputetë dhe jo me 5, si ka qenë më parë. Sipas nenit përkatës të rregullores, deputetët që nuk bëjnë deklarimin në asnjë grup parlamentar, mund të formojnë një grup të përzier. Kështu u lihet një mundësi deputetëve që mbeten jashtë grupeve që të krijojnë grupe të përziera, p.sh. mes dy ose tre partive të ndryshme. Deputetët e kanë të detyrueshme që të bëjnë deklarimin e tyre për pjesëmarrjen në grupet parlamentare 3 ditë pas fillimit të sesionit parlamentar. Por rregullorja ndalon dhe huazimin e deputetëve. Sipas saj, largimi i një deputeti nga subjekti politik për të cilin është votuar nuk i jep atij të drejtën t'i bashkëngjitet një subjekti tjetër parlamentar brenda së njëjtës legjislaturë. Pasi të largohet ai deklarohet i pavarur.

Faqe 7 - Politikë

grupet parlamentare

ndryshimi

PS e PD trondisin të vegjlit. Në fuqi rregullorja për krijimin e grupeve me shtatë deputetë

Kuvendi “shkrin” partitë e vogla

Në dyshim grupimet për PSD, PAA, PBDNJ, PDR, PR e PBL

Bledar Hoti

Kryebashkiaku i Korçës, Robert Damo, akuzoi dje zyrtarë të lartë socialistë se po ndërhyjnë në punën e institucionit që ai drejton.

Grupet parlamentare do të krijohen me nga shtatë deputetë dhe jo me nga pesë deputetë në Kuvendin e Shqipërisë. Një kusht i tillë është në fuqi që në këtë sesion të tetë të Parlamentit, duke bërë që partitë e vogla të mos kenë më grupe parlamentare. Një sanksionim i tillë ka sjellë irritimin e deputetëve të partive të vogla, të cilat e kanë cilësuar si një pabesi të PS-së dhe PD-së, ndalimin e krijimit të grupit parlamentar me pesë deputetë për këtë sesion të fundit të Kuvendit. Deputetët e partive të vogla kanë aluduar për marrëveshje mes dy forcave kryesore politike, të cilat në seancë kanë votuar që grupet me nga 7 deputetë të krijohen që tani dhe jo ashtu siç ishte parashikuar fillimisht pas zgjedhjeve parlamentare të këtij viti. Ndërkohë që një gjë e tillë vë në vështirësi PSD-në, PAA-në, PBDNJ-në, PR-në, PBL-në, të cilave do t’u duhet që t’u kërkojnë edhe dy deputetë shtesë partive më të mëdha të koaliconit, për të arritur numrin 7, me qëllim formimin e një grupi parlamentar.

Debati
Deputeti i PSD-së, Gaqo Apostoli, deklaroi dje se “nuk ka kuptim që grupet parlamentare të krijohen me nga shtatë deputetë në një kohë, kur është vendosur bashkarisht se me pesë deputetë do jenë për këtë sesion”. “Ky është një provokacion politik, ndryshe kemi vendosur dhe ndryshe është votuar e pasqyruar në rregulloren e Kuvendit. Kërkoj që një gjë e tillë të ndryshojë sa më shpejt dhe të rregullohet ashtu siç e kemi vendosur, që grupet të formohen me nga pesë deputetë”, deklaroi Apostoli. Por kryeparlamentari Pëllumbi ka deklaruar se “nuk ka asnjë provokacion politik, pasi kështu ka vendosur seanca e Kuvendit dhe se nuk ka pasur asnjë propozim apo amendim me shkrim që grupet të jenë me pesë deputetë në këtë session të fundit parlamentar”. Gjatë këtij qëndrimi kanë reaguar edhe deputetët e tjerë të opozitës, si Nard Ndoka dhe Qazim Tepshi, të PDr-së, Ndue Preka i PAA-së, e Kristo Goçi. “Ka pasur edhe herë të tjera që ndryshe është vendour në seancë e ndryshe është botuar në ligj apo në rregullore. Ne në komision kemi rënë dakord dhe është arritur me konsensus për një gjë të tillë, nuk e kuptoj se është ndryshuar”, deklaroi Ndoka. Pëllumbi ka bërë të ditur se, nëse ka ndonjë vërejtje, mund të bëhen amendimet, por deputetët deri të mërkurën duhet të deklarojnë se se në ç’grup bëjnë pjesë, grupe këto që do të ndërtohen sipas nenit 15 të rregullores. Ndërkohë që Apostoli dhe Ndoka kanë depozituar menjëehrë amendamentin për të ndryshuar nenin 15 të të njëjtit dokument.

Grupet që rrezikohen

Grupi Parlamentar i PDR-së me 5 deputetë
Grupi Parlamentar i Qendrës Liberaldemokrate, me katër deputetë
Grupi Parlamentar “Të Gjelbrit”. Lufter Xhuveli
Grupi Parlamentar i Partisë Socialdemokrate, 3 deputetë të PSD-së plus dy të PS-së
Grupi Parlamentar i Partisë Republikane, 3 deputetë të PR-së plus dy deputetë nga PD-ja
Grupi Parlamentar Liberaldemokrat, dy deputetë PBL plus tre nga PD-ja
Grupi Parlamentar Aleanca për Demokraci, i krijuar me ndihmën e dy deputetëve të PD-së

Nard Ndoka, PDR
Ka pasur edhe herë të tjera që ndryshe është vendour në seancë e ndryshe është botuar në ligj apo në rregullore. Ne në komision kemi rënë dakord dhe është arritur me konsensus për një gjë të tillë, nuk e kuptoj se pse është ndryshuar. Në Komisionin e Ligjeve ne kemi rënë në konsensus në parim që grupet parlamentare të formohen me nga 5 deputetë, ndërsa kushti për me shtatë deputetë të vihet në fuqi pas zgjedhjeve të ardhshme parlamentare.

Gaqo Apostoli, PSD
Nuk ka kuptim që grupet parlamentare të krijohen me nga shtatë deputetë në një kohë, kur është vendosur bashkarisht se me pesë deputetë do jenë për këtë sesion. Ky është një provokacion politik, ndryshe kemi vendosur dhe ndryshe është votuar e pasqyruar në Rregulloren e Kuvendit. Kërkoj që një gjë e tillë të ndryshojë sa më shpejt dhe të rregullohet ashtu siç e kemi vendosur, që grupet të formohen me nga pesë deputetë. Nuk ka kuptim që ato të ndryshohen tani në përfundim të këtij sesioni.

Kuvendi miraton kalendarin
Brenda 3 muajve, raportimi i të gjitha institucioneve

Kuvendi i Shqipërisë ka miratuar dje programin tremujor të punës së tij, duke përfshirë brenda një periudhe të shkurtër raportimin e institucioneve më kryesore që varen nga legjislativi. Raportimi i parë do të nisë në datën 7 shkurt nga ana e Komisionit të Shërbimit Civil. Në ditën e shën Valentinit do të raportojë kreu i sapozgjedhur i KKRT-së, Halil Lalaj. Një javë më pas pritet që të raportojë edhe kreu i KQZ-së, Celibashi. Ndërsa në datën 28 shkurt do të raportojë përpara deputetëve prokurori i përgjithshëm, Theodhori Sollaku. Me datën 7 mars pritet të raportojë në seancë plenare, Avokati i Popullit, Ermir Dobjani, dhe një javë më pas kreu i KLSH-së, Robert Çeku. Brenda një periudhe tremujore do të raportojnë të gjithë krerët e institucioneve që varen nga Kuvendi, duke pasqyruar punën e tyre. Me interes të madh do të priten raportet e Kontrollit të Lartë të Shtetit, ai i kreut të Komitetit Shtetëror të Kthimit të Pronave, si dhe ai i Inspektoriatit të Lartë të Kontrollit të Pasurive. Në seancën e pasdites së djeshme u debatua edhe për çështjen e projektligjit të konfliktit të interesave. Një projekt i tillë është paraqitur nga ana e grupit parlamentar të LSI-së, ku deputeti Spartak Braho kërkoi të sillet në mënyrë urgjente drafti i qeverisë për këtë projektligj. Ndërkohë që kryetari i Kuvendit, Servet Pëllumbi ka bërë të ditur se gjatë kësaj nuk do të ketë punime në komisionet parlamentare, deri në rregullimin e ambienteve të reja. Seanca e radhës pritet të zhvillohet të hënën e ardhshme, ndërsa gjatë këtyre ditëve do të kërkohet që të krijohen sekretariati, si dhe konferenca e kryetarëve të grupeve parlamentare. Gjithashtu, gjatë kësaj periudhe kohore gati njëjavore pritet të bëhen edhe propozimet për anëtarët e 8 komisioneve parlamentare. Kryeparlamentari bëri të ditur se “deputetët e Kuvendit do të kenë të drejtën që të jenë anëtar të vetëm një komisioni parlamentar”. “Deputetët që mungojnë do të kenë një zëvendësues të grupit të vet parlamentar”, theksoi Pëllumbi. b.hoti

Kuvendi, legjislatura nis me ndryshim imazhi

Godina ku zhvillohen punimet parlamentare pëson ndryshime. Ambientet e brendshme të sallës ka sjellë një ndryshim në imazh, duke ndryshuar ngjyrën e sfondit, nga të kuqe në të argjentë. Ndryshime kishte pësuar edhe stema e Kuvendit, e cila ishte në ngjyrë të argjendtë. Kundër këtij ndryshimi ka qenë vetëm deputeti i LZHK-së, Shpëtim Rroqi, i cili kërkoi ndryshimin e stemës, pasi, sipas tij është në kundërshtim me ligjet në fuqi.