18122005

http://www.shekulli.com.al/ 23 Dhjetor 2005

Nga 121 ndërtues që u paraqitën në Ambasadën Franceze, vetëm 40 prej tyre u pajisën me vizë franceze

Ambasada Franceze u refuzon vizat 80 biznesmenëve ndërtues

Ndërtuesit ishin drejtuar për në panairin “Batimat” në Paris, por vetëm 2/3 mbërritën atje

Ervin Qafmolla

TIRANË – Ambasada Franceze në Tiranë ka penguar 80 biznesmenë nga sektori i ndërtimit, që të marrin pjesë në panairin “Batimat 2005” në Paris, duke mos i pajisur me vizë. Nga 121 sipërmarrës që u paraqitën në ambasadë, vetëm 40 prej tyre kanë arritur të marrin vizë, ndërkohë që për pjesën tjetër ambasada nuk ka dhënë asnjë shpjegim. Udhëtimi, i cili si çdo dy vjet në nëntor organizohet nga Agjencia Maxim’s de Paris, në bashkëpunim me Fondin Kombëtar të Zhvillimit (FDSH) dhe me Shoqatën e Ndërtuesve, gati dështoi, pasi në panair arritën të mbërrinin vetëm dy të tretat e të ftuarve. Ndërkaq, herët e tjera të pjesëmarrjes së sipërmarrësve shqiptarë të ndërtimit në këtë aktivitet, është garantuar 100% e pjesëmarrjes. “Shekulli” u lidh me përfaqësuesin e marrëdhënieve me medien në Ambasadën Franceze, por përgjigjja ishte “no comment”.

Incidenti
Adrian Doga, administrator i Pierre Cardin Albania dhe i agjencisë Maxim’s de Paris, tregon se udhëtimi i ndërtuesve shqiptarë drejt Parisit, është pjesë e një tradite, pasi çdo dy vjet në nëntor zhvillohet panairi ndërkombëtar “Batimat” në Paris. “Nga 121 vetë që u paraqitën për të marrë vizë, 81 u refuzuan, pra rreth dy të tretat, ndërsa ndaj 40 personave që morën vizë, ndiqet një politikë diabolike. Për shembull, i jepet vizë bashkëshortit dhe nuk i jepet bashkëshortes apo anasjelltas, ndaj personi tjetër normalisht refuzon ta marrë vizën”, - thotë Doga. Sipas administratorit të Pierre Cardin Albania, Ambasadës Franceze iu bë apel nga Maxim’s de Paris dhe Shoqata e Ndërtuesve për të rishikuar dosjet. “Përgjigjja e ambasadores, Francoise Bourolleau, ishte një përgjigje stereotipe: “Ne nuk japim shpjegime për arsyet e refuzimit të vizave dhe për çdo ankesë duhet t’i drejtoheni Zyrës për Lëvizjen e Lirë të Qytetarëve në Nantes së Francës”, - thotë Doga. Ai tregon se pas kësaj përgjigjeje të ambasadores franceze, kryetari i Shoqatës së Ndërtuesve, Bumçi, i dërgon një letër me shkrim Ministrisë së Jashtme shqiptare, ku i kërkon t’i bëjë presion Ambasadës Franceze për këtë ngjarje të paparë. Ministri ngarkon pikërisht drejtorin, z. Barbullushi, që të interpelojë ambasadën, duke ngarkuar znj. Teuta Keçi. Pas kontaktimit, zv.konsulli është përgjigjur, duke thënë se nuk ishte në dijeni të këtij refuzimi masiv vizash. “Paradoksi është që personat e refuzuar janë biznesmenë ndërtimi që kanë marrë pjesë në këtë panair më parë. Janë persona që kanë qenë në Francë për aktivitete të ndryshme”, - thotë administratori i Maxim’s de Paris dhe Pierre Cardin Albania. Ai tregon se shumë nga këta biznesmenë realizojnë një xhiro vjetore mbi 1 milion dollarë dhe kanë në zotërim pasuri të konsiderueshme, të tundshme e të patundshme, e gjithashtu, kanë një moshë mesatare mbi 40 vjeç, shumë larg kritereve të emigracionit.
Përgjegjësit
“Fakti që ky incident ndodh në 2005-ën, shpjegohet me ardhjen e një konsulleje ksenofobe, raciste dhe diskriminuese ndaj shqiptarëve, Eliane Tullon. Ky person është dëbuar me ceremoni nga Bullgaria në vitin 2003, për të njëjtat arsye; refuzim vizash dhe qëndrim ksenofob. Ndaj e përplasën këtu”, - tregon Doga. Sipas tij, angazhimi për ta larguar këtë diplomate nga Bullgaria u ndërmor në vazhdën e heqjes së barrierave për qarkullimin e lirë të qytetarëve. Doga tregon se firma Pierre Cardin Albania dhe agjencia Maxim’s de Paris është duke e ndjekur këtë çështje në Ministrinë e Jashtme franceze, ku është kontaktuar drejtori i kabinetit të ministrit francez, Philipe Douste Blazy, i cili i ka kërkuar llogari ambasadës franceze për këtë veprim frenues për biznesin shqiptar. “Përgjigjja që Ambasada Franceze i jep superiorit të saj në Paris, është një gënjeshtër e madhe, pasi në këtë përgjigje thuhej se “personat nuk plotësojnë kriteret për t’u kthyer në Shqipëri”, ndërkohë që një pjesë e biznesmenëve që u refuzuan shkuan në ambasadat italiane dhe greke, morën viza dhe në bazë të marrëveshjeve Shengen, shkuan në Francë, ku morën pjesë në aktivitet dhe u kthyen më pas në Shqipëri”, - tregon administratori i Pierre Cardin Albania. Gjithashtu, një justifikim tjetër i ambasadës ishte që “personat që u paraqitën nuk kishin lidhje me sektorin e ndërtimit”. “Është fakt që të gjithë personat që u paraqitën ishin anëtarë të Shoqatës së Ndërtimit dhe ishin të pajisur me licencë ndërtimi dhe licencë që vërteton ekzistencën si firmë nga tatim-taksat”, - tha Doga.
Ndërkombëtarizimi i skandalit
Ndërkohë, çështja është sensibilizuar edhe pranë dy organeve të shtypit në Francë, “Le Monde”, ku nga firma Pierre Cardin është kontaktuar drejtori për Evropën, Henry de Bressor dhe Radio France Internacional, ku është kontaktuar shefja e seksionit të gjuhës shqipe, Barkel Mozer, të cilët janë angazhuar të sensibilizojnë çështjen në opinionin publik francez. “Synimi është të largohet nga Shqipëria personeli aktual i Ambasadës Franceze, i përbërë kryesisht nga koalicioni konsulle-ambasadore, i cili jo vetëm dëmton imazhin e Francës si një vend tolerant ndaj të drejtave të njeriut, por shkakton edhe vështirësi të mëdha në qarkullimin e biznesmenëve shqiptarë”, - theksoi Doga. “Është në nderin e qeverisë shqiptare që të bëjë maksimumin për mbrojtjen e biznesit të vendit të vet, deri në shpalljen “persona non grata” të përgjegjësve për këtë bllokim të marrëdhënieve ekonomike franko-shqiptare”, - vijoi ai. Mësohet se për këtë incident është njoftuar edhe komisari i parë i të drejtave të njeriut në Strazburg, Alain Gil-Robles, si edhe presidenti i Senatit Francez, Francois Poncelet, i cili ka ngarkuar drejtorin e departamentit të marrëdhënieve diplomatike për zgjidhjen e kësaj çështjeje. “Në rast se qeveria shqiptare nuk do bëjë maksimumin për largimin e këtij personi nga Shqipëria, ftoj të gjithë qytetarët shqiptarë që u është refuzuar viza pa të drejtë, t’i adresohen direkt ministrit të Jashtëm francez”, - u shpreh Doga. Ai shtoi se firma Pierre Cardin, merr përsipër përkthimin e ankesës në frëngjisht gratis, ndërsa për personat që zotërojnë frëngjishten, adresa është: “37 Quai D’orsay 75007, Paris, Francë, Philipe Douste-Blazy”. “Duhet të zgjohet qeveria dhe kryeministri që të mbrojë interesat dhe dinjitetin shqiptar, që kjo nismë të merret nga institucionet dhe jo nga një njeri privat”, - përfundoi administratori i Pierre Cardin Albania dhe Maxim’s de Paris.

Republika Franceze, 23.11.2005
Ministria e Punëve të Jashtme

Drejtori i kabinetit

Zoti Drejtor,

Keni kërkuar vëmendjen time në lidhje me kërkesat për viza nga krerët e biznesit shqiptar që duan të marrin pjesë në sallonin “Batimat”, i cili është mbajtur në Paris nga 7 deri më 12 nëntor. Nga të dhënat e mbledhura rezulton që nga 121 dosjet e depozituara pranë ambasadës së Francës në Shqipëri, 40 prej tyre kanë marrë miratimin e shërbimeve kompetente. Fatkeqësisht, për 81 kërkesat e tjera nuk ka pasur një përgjigje të favorshme, pasi të interesuarit nuk përmbushnin kushtet e kërkuara për dhënien e vizave të kërkuara. Për informacionin tuaj ngushtësisht personal, ju saktësoj që ata nuk kanë mundur të justifikojnë situatën e tyre profesionale ose të të ardhurave të mjaftueshme personale për të mbuluar shpenzimet e lidhura me qëndrimin në Francë dhe garantimin e kthimit të tyre në Shqipëri. Nga ana tjetër, disa prej tyre ushtrojnë një aktivitet profesional pa lidhje me punët publike ose ndërtimet. Duke shprehur keqardhjen që nuk kemi mundur të plotësojnë kërkesën tuaj, ju lutem të besoni, zoti Drejtor, në sigurimin e konsideratës sime të lartë.
Pierre Vimont

http://www.panorama.com.al/ 23 Dhjetor 2005

Faqe 6 - Politikë

takimet e berishes

vizita

Vizitë e papritur e kryeministrit shqiptar në Athinë, në kthim nga Iraku. A është diskutuar çështja çame?!

Berisha-Karamanlis, dyshime për “çamët”

Berisha: Kjo çështje do zgjidhet. Moliviatis: Nuk u prek fare

Marko Caka /Athinë

Kreu i qeverisë, Sali Berisha, menjëherë në kthim nga Iraku qëndroi në Athinë, ku për 30 minuta u takua me homologun e tij grek, Kostas Karamalis.

Ky është takimi i parë i lartë mes dy personalitetesh pas incidentit të ndodhur mes dy presidentëve Moisiu dhe Papulias pak kohë më parë, kur ky i fundit refuzoi të takonte Moisiun në Sarandë, për shkak të protestës së çamëve. Kryeministri shqiptar Berisha deklaroi në Rinas përpara mediave se do të zbatohet neni 15 i Traktatit të Miqësisë të nënshkruar mes dy vendeve. “Në lidhje me çështjen e pronave, ne jemi dakord me kryeministrin Karamalis që në përputhje me nenin 15 të Traktatit të Miqësisë dhe Bashkëpunimit, çështja e pronave të qytetarëve shqiptarë në Greqi dhe qytetarëve grekë në Shqipëri të zgjidhet si një çështje tekniko juridike”, deklaroi kryeministri Berisha përpara mediave në Shqipëri.
Por krejt i ndryshëm ka qenë reagimi i kryediplomatit grek, Petro Moliviatis, për të njëjtën çështje. “Jo, në asnjë mënyrë, nuk e kemi diskutuar çështjen çame”, ishte deklarata e bërë nga kryediplomati i Athinës pas takimit Karamalis-Berisha, i pyetur nga gazetarët grekë në Athinë për të njëjtin qëllim. Çështja çame është e mbyllur dhe nuk ka pse të diskutohet, ishte nënkuptimi i deklaratës së ministrit të Jashtëm grek.
Berisha u shoqërua në takimin e tij te kryeministri grek nga ambasadori shqiptar në Athinë, Bashkim Zeneli, dhe takimi u zhvillua në godinën e kryeministrisë greke “Megaro Maksimu”. Sipas deklaratave pas takimit, mes dy kryeministrave një vend të rëndësishëm zuri edhe problemi i energjisë elektrike dhe vështirësive që kaloi Shqipëria për shkak të situatës së rënduar energjetike në vend. Kryeministri grek, Kostas Karamalis, ra dakord që Greqia të gjendet në krah të fqinjës së saj për këtë situatë. Por nga ana tjetër, Kostas Karamalis ka kërkuar nga qeveria shqiptare zgjidhjen sa më të shpejtë të situatës me varrezat e ushtarëve grekë në Shqipëri. “Unë e garantova zotin Karamalis se jemi të vendosur për ta zgjidhur këtë problem pa ndonjë kompleks dhe çështjet teknike do të zgjidhen mes dy komisioneve”, tha Berisha.
Çështja e emigrantëve shqiptarë që jetojnë e punojnë në Athinë ishte një tjetër temë bisede mes dy kryeministrave. Kreu i ekzekutivit shqiptar falënderoi kryeministrin grek për masat e marra sidomos në ndryshimin e ligjit për emigracionin si dhe ndihmën e shtetit grek për emigrantët shqiptarë. Berisha falënderoi homologun grek Karamalis për lehtësitë e krijuara nga pala greke që emigrantët shqiptarë për festat e fundvitit të kalojnë pushimet në Shqipëri, pas një vendimi të marrë nga ministri grek i Rendit, Vulgaraqis. Çështja e bashkëpunimit Shqipëri-Greqi në luftën kundër trafiqeve të paligjshme u cilësua si një prioritet nga ana e të dy kryeministrave gjatë takimit.
Problemet rajonale nuk mbetën jashtë axhendës së diskutimeve të përbashkëta. Kryeministri Berisha hodhi poshtë idenë e një Shqipërie të madhe. “Çështja e Kosovës nuk duhet të cënojë aspak ndryshimin e kufijve”, i deklaroi Berisha kryeministrit grek.
Kjo është vizita e parë zyrtare e kryeministrit Berisha në Athinë gjatë të 15 vjetëve të pluralizmit shqiptar. Marrëdhëniet e tij personale me shtetin fqinj nuk kanë qenë shumë të mira, që në vitin 1994, në kohën kur Berisha mbante postin e presidentit të vendit. Edhe pse takimi ishte jashtë axhendës së kryeministrit grek, mediat greke kanë qenë shumë të interesuara për vizitën e papritur të Berishës në Athinë.

Kosova
Kryeministri Karamalis dhe kryeministri Berisha, gjatë diskutimeve të tyre folën dhe për situatën në rajon. Greqia e ka shprehur qëndrimin e saj pro serb me një deklaratë të vetë Karamalisit në Athinë, pas bisedës së zhvilluar me Koshtunicën. Por nga kryeministri shqiptar ka marrë garancinë se Shqipëria nuk mbështet një “Shqipëri të Madhe”. “Mendojmë se kuadri i përcaktuar nga BE për respektimin e kufijve aktualë ndërkombëtarë dhe mosbashkimi i Kosovës me ndonjë vend tjetër përbëjnë bazën solide për zgjidhjen. Sikundër unë parashtrova pikëpamjen e qeverisë se respektimi i pakicave dhe dialogu mes Prishtinës e Beogradit, kthimi i të zhvendosurve, decentralizimi dhe Pavarësia e Kosovës janë zgjidhja e vetme për paqe e stabilitet”, tha Berisha.
Çamet
Çështja çame, sipas deklarimit të kryeministrit shqiptar në Rinas, është diskutuar mes palëve. Berisha tha se, për çështjen e pronave të shqiptarëve në Greqi dhe qytetarëve grekë në Shqipëri do të merren komisionet teknike dhe se do të zgjidhen në bazë të nenit 15 të Traktatit të Miqësisë dhe Bashkëpunimit të firmosur mes dy vendeve. Por nga ana tjetër, vetë ministri i Jashtëm i Greqisë, i cili ka marrë pjesë në takim, u deklaroi gazetarëve grekë pas këtij takimi se çështja çame nuk është prekur fare në takim, duke deklaruar kështu të kundërtën e asaj sa tha vetë Berisha në Tiranë. Ndërkaq, sipas një vendimi të Gjykatës greke, të gjithë ata që deri në datën 29 nëntor të këtij viti nuk do të mund t’i regjistronin pronat në shtetin helen, prona do t’u sekuestrohej.
Emigrantet
Lidhur me çështjen e emigrantëve, Berisha ka qenë në pozita më inferiore. Më shumë se 750 mijë qytetarë shqiptarë jetojnë e punojnë në Greqi, një pjesë e konsiderueshme e tyre edhe pa dokumente. Berisha ka falënderuar Karamalisin lidhur me ndryshimet e bëra në ligjin për emigracionin, që favorizon deri diku edhe qytetarët shqiptarë që jetojnë e punojnë në Greqi. Por gjithashtu, ai ka falënderuar kryeministrin grek dhe ministrin e Rendit Vulgaraqis lidhur me vendimin e marrë nga qeveria greke për lejimin e emigrantëve shqiptarë që festat e fundvitit t’i kalojnë në vendin e tyre, edhe pse ndoshta nuk kanë rinovuar dokumentet. Në këmbim të emigrantëve, kërkesa greke ishte për varrezat e ushtarëve grekë
në Shqipëri që Berisha premtoi se do të zgjidhet pa asnjë lloj kompleksi.
Energjia
Temë jo pak e rëndësishme në bisedat mes dy kryeministrave është ajo e ndihmës që mund të japë Greqia për çështjen e energjisë. Kështu, kryeministri Berisha deklaroi se ka marrë garanci për ndihmë për këtë çështje nga kryeministri grek. Vullneti politik i të dy qeverive për bashkëpunim në këtë fushë është shprehur dhe mbetet vetëm realizimi i modaliteteve teknike. Greqia ishte një ndër bllokuesit kryesorë të transportimit në Shqipëri të energjisë së blerë në tregjet bullgare e ukrainase, thjesht dhe vetëm për shkak të mungesës së një linje të lirë të tranzitimit të energjisë për në Shqipëri. Sepse kohë më parë linja e transmetimit të energjisë ishte marrë nga Maqedonia dhe Greqia tranzitonte vetëm drejt Maqedonisë. Edhe pse ekspertët e të dy vendeve shkëmbyen ide për zgjidhjen e situatës për një farë kohe ajo nuk u arrit.

Kryeministri dhe ministri i Mbrojtjes mes 120 komandove
Berisha: Në Irak, derisa irakenët të kërkojnë ndryshe

Kreu i ekzekutivit, Sali Berisha, i deklaroi dy ditë më parë kryeministrit iraken në Bagdat se, 120 trupat komando shqiptare do të qëndrojnë në misionin paqeruajtës, derisa një gjë e tillë të kërkohet nga vetë irakenët. Deklarata u bë gjatë konferencës për shtyp të zhvilluar në Bagdat të kryeministrit Berisha dhe kryeministrit irakian, Brahim Xhafari. “Qëndrimi i palëkundur i Shqipërisë është për të qëndruar në Irak, përkrah aleatëve të tjerë, derisa vetë zyrtarët irakenë ta kërkojnë atë”, tha Berisha. Kryeministri irakian falënderoi kryeministrin shqiptar për kontributin e Shqipërisë në paqen dhe sigurinë në Irak. Para këtij takimi, Berisha, i shoqëruar nga ministri i Mbrojtjes, Mediu, dhe shefi i shtabit, gjeneral Pëllumb Qazimi, qëndruan me 120 trupat komando në Mosul, ku edhe ata janë vendosur me mision. “Komandot shqiptare në Irak janë duke kryer detyra jo pak të vështira. Disa nga detyrat janë ruajtja e një pjese të bazës ushtarake të Aeroportit të Mosulit si dhe patrullime dhe kontrolle në qytet. Deri tani nuk është regjistruar asnjë incident me trupat shqiptare edhe pse rreziku i grupeve guerile vazhdon të jetë i lartë”, raportoi major Besnik Sokoli. Shefi i Shtabit të Forcave Aleate për Irakun Verior e Perëndimor, gjeneral Kevin Bergner, e cilësoi tepër të lartë e profesionale punën e bërë nga ushtarët shqiptarë. “Ju duhet të jeni krenarë për këta ushtarë. Ata janë pjesë e barabartë e koalicionit këtu në Irak qoftë në vlera, ashtu edhe në kontribut”, iu drejtua ai kryeministrit Berisha dhe ministrit Mediu. “Më vjen mirë që dëgjoj fjalë të mira për punën tuaj. Ne do të qëndrojmë në Irak për të vazhduar detyrën tonë. Ata popuj që kanë kaluar një diktaturë i kuptojnë më mirë irakenët se kushdo tjetër. Sadami, ashtu sikurse Milosheviçi, është një diktator, por fatmirësisht ata tashmë i janë nënshtruar gjykimit për krimet e bëra”, tha Berisha. “Ardhja këtu ishte një detyrë që duhej kryer. Ndihem mirë për punën e bërë nga ju në Irak në emër të lirisë e demokracisë”, tha Mediu. Berisha nuk ngurroi që 120 ushtarëve në Irak t’u shpjegonte edhe punën e 100 ditëve. “Jam i lumtur që ndodhem mes jush sot, për t’ju shpjeguar punën e bërë brenda 100 ditëve të qeverisjes sonë”, tha Berisha që më pas, së bashku me ushtarët, drekuan në mencë.

http://www.shekulli.com.al/ 23 Dhjetor 2005

Kryeministri Sali Berisha dje në Athinë gjatë takimit me homologun e tij, Kosta Karamanlis

Berisha: Me Karamanlis, dakord që çështja e pronave të zgjidhet sipas Traktatit të Miqësisë

Berisha: Me Karamanlis, dakord për pronat

Kryeministri, takim jozyrtar me homologun grek. Karamanlis fton zyrtarisht Berishën. “Në përputhje me Traktatin e Miqësisë, çështja e pronave të zgjidhet si një çështje tekniko-juridike”

Altin Metaj

Athinë - Kryeministri shqiptar, Sali Berisha, është takuar dje në Athinë me homologun e tij grek, Kostas Karamanlis. Berisha, i cili kthehej në Tiranë nga vizita pranë trupave shqiptarë në Irak, gjatë ndalesës në Athinë ka zhvilluar edhe takimin në fjalë. Megjithëse takimi ishte jozyrtar, të dy kryeministrat diskutuan për çështje të cilat prekin fusha të ndryshme të marrëdhënive dypalëshe. Në takim merrnin pjesë ministri i Jashtëm grekë Petros Moliviati si dhe ambasadori i Shqipërisë në Athinë, Bashkim Zeneli. Karamanlis dhe Berisha vlerësuan si shumë të mira marrëdhëniet dypalëshe. Tema kryesore e bisedës ishte nxitja e investitorëve grekë për të investuar në Shqipëri. Nga ana e tij Kryeministri Berisha theksoi garancitë që jep shteti shqiptar për nxitjen dhe përkrahjen e investimeve të huaja në Shqipëri. Më tej të dy kryeministrat u ndalën tek përpjekja e përbashkët që kanë bërë dhe po bëjnë të dy vendet tona, për të luftuar krimin e organizuar si dhe trafiqet e ndryshme. Është rënë dakord gjithashtu që të dy vendet të vazhdojnë bashkëpunimin në fushën e energjetikës dhe u theksua që të dy vendet duhet të aktivizojnë më shumë Traktatin e Miqësisë dhe Bashkëpunim firmosur më 1996 nga Berisha në postin e Presidentit. Rajoni ishte një pikë tjetër e bisedës ndërmjet dy kryeministrave, ku një vend të rëndësishme zuri shkëmbimi i pikëpamjeve për çështjen e Kosovës. Kryeministri shqiptar Sali Berisha falënderoi Karamanlis dhe qeverinë e tij për ligjin e ri të emigracionit si dhe ministrin e Rendit Publik, Vulgaraqis, për mundësinë që u dha emigrantëve, me anë të lejes së firmosur, që të kalojnë festat në Shqipëri.
Pronat
Menjëherë pas takimit të zhvilluar, ministri i Jashtëm, Molivati, ka deklaruar se gjatë takimit nuk është diskutuar për çështjen e pronave të çamëve. Ndërsa Berisha pas mbërritjes së tij në Rinas, ka konfirmuar të kundërtën. “Në lidhje me çështjen e pronave, Berisha është shprehur se, “ne jemi dakord me kryeministrin Karamanlis që në përputhje me nenin 15 të Traktatit të Miqësisë dhe Bashkëpunimit, çështja e pronave të qytetarëve shqiptarë në Greqi dhe qytetarëve grekë në Shqipëri të zgjidhet, si një çështje tekniko-juridike”.
“I kemi prekur të gjitha temat kryesore ... problemet e parashikuara në Traktatin e Miqësisë midis të dy vendeve, problemin e rajonit," - tha Berisha. Mirëpo në anën tjetër çamët pretendojnë se çështja e pronave të tyre nuk përfshihet aspak në këtë traktat dhe se e gjitha kjo është një demagogji.
Vizita
Kryeministri grek ftoi Berishën për një vizitë zyrtare në Athinë, e cila do të realizohet shumë shpejt. I pyetur dje nga përfaqësues të medies, nëse vizita e djeshme e zëvendësonte më së miri takimin e tij të planifikuar në Athine, Berisha u përgjigj: “Mund t’u them se kjo nuk e zëvendëson vizitën që unë do të bëj në Greqi”. Takimi i djeshëm, shënoi vizitën e parë jozyrtare të kryeministrit shqiptar Sali Berisha në Athinë që nga viti 1992, vit kur ai u zgjodh në krye të shtetit shqiptar. Gjatë kohës së qeverisjes së Berishës marrëdhëniet dypalëshe patën oshilacione. Pika kulmore ishte Prilli i 1994 kur në Shqipëri u arrestuan pesë veprimtarë të Omonias. Në një intervistë dhënë gazetës greke “Esspreso” në shkurt të këtij viti, i pyetur për çështjen, Berisha ka thënë se ka pranuar se arrestimi i pesë veprimtarëve të Omonias në 1994-ën ishte një akt i cili nuk duhet të kishte ndodhur.

Kryeministrat, OK për varrezën e ushtarëve grekë në Shqipëri

TIRANË- Në takimin e zhvilluar dje mes kryeministrit shqiptare dhe atij grek është diskutuar gjerësisht edhe çështja e varrezave të ushtarëve grekë në Shqipëri. Kryeministri Sali Berisha ka siguruar gjatë takimit se qeveria e tij ka vullnetin e mirë për ngritjen e varrezave të ushtarëve grekë të vrarë në Shqipëri gjatë Luftës së Dytë Botërore. Ndërsa pas mbërritjes së tij në Rinas, kryeministri Berisha e ka përforcuar objektin e bisedës, duke shtuar se çështja në fjalë do të zgjidhet mes dy komisioneve. “Në takim u diskutua edhe çështja e varrezave të ushtarëve grekë, për të cilën unë e sigurova se qeveria është tërësisht e vendosur për ta zgjidhur këtë problem pa asnjë lloj kompleksi dhe se çështjet teknike do të zgjidhen mes dy komisioneve”,- tha dje Berisha.

Kryeministri falënderon qeverinë greke për ligjin e ri të emigracionit
Berisha: Në Greqi ka klasa ku mësohet shqipja
TIRANË- Kryeministri Sali Berisha ka përgëzuar gjithashtu ligjin e miratuar nga Kuvendi grek për emigrantët, edhe pse ky i fundit është kundërshtuar mjaft nga shoqatat e emigracionit ne Greqi. “Ishte kënaqësi për mua, së pari t’i shprehja mikut tim dhe të kombit shqiptar, urimet më të mira për Krishtlindjet dhe Vitin e Ri, ta falënderoja shumë përzemërsisht për ligjin e ri që ka bërë për emigracionin dhe të gjitha hapat e rëndësishme që qeveria e tij ka bërë në drejtim të normalizimit të jetës së emigrantëve shqiptarë, për vendimin e ministrit Vulgaraqis për të lejuar kthimin e tyre për festat në Shqipëri edhe në rast se ata nuk kanë dokumentet ligjore. Diskutuam gjerësisht në këtë takim të hapur, të sinqertë, miqësor, mbi intensifikimin e marrëdhënieve midis dy vendeve tona, si dhe për normalizimin e mëtejshëm të jetës së emigrantëve’’,- tha Berisha. Kryeministri shqiptar shtoi se në Athinë dhe në shumë qytete të tjera funksionojnë një numër mjaft i madh klasash në gjuhën shqipe, ku emigrantët shqiptarë kanë të drejtë të çojnë fëmijët e tyre për të mësuar gjuhën mëmë.

http://www.sot.com.al/ 23 Dhjetor 2005

Berisha refuzon Ismail Kadarenë

Kryeministri Sali Berisha dhe kabineti i tij qeveritar, janë kundër pagëzimit të Bibliotekës Kombëtare me emrin e Ismail Kadaresë. Sipas burimeve të sigurta, bëhet e ditur se Ministrisë së Kulturës i është kërkuar nga idhtarët e shkrimtarit, vendimi zyrtar i vendosjes së emrit të Kadaresë në derën kryesore të Bibliotekës Kombëtare, por nga instancat e larta të qeverisjes ka ardhur refuzimi. Pagëzimi i kësaj biblioteke, me emrin e shkrimtarit të madh ishte parashikuar të bëhej më 30 janar, pikërisht atëherë kur gjeniu i letrave shqipe mbushi 70-vjetorin e lindjes. Tanimë, duket qartë se ky refuzim bëhet për shkak të acarimit të marrëdhënieve të shkrimtarit me përfaqësuesit kryesor të kabinetit qeveritar.Në disa raste të veçanta, deklaratat e Kadaresë kanë atakuar jo vetëm ministra të ndryshëm, por edhe vetë kryeministrin Berisha. Dhe duket se për deklaratat e tij kundërshtuese, gjeniut të letrave do t’i duhet të paguajë një taksë të posaçme ndaj qeverisë.
Deklaratat
Deklaratat e para kundërshtuese të Kadaresë janë publikuar që në ditët e para, kur kanë dalë emrat e ministrave të Berishës. Në ato ditë, Kadareja, ka sulmuar ashpër ministrin e Jashtëm Besnik Mustafaj, duke kundërshtuar me forcë emërimin e tij, në krye të diplomacisë shqiptare. Ndër të tjera Kadareja e ka quajtur Mustafajn, “një shkrimtar të zakonshëm”, dhe “Shqipëria shkrimtarë të tillë ka me shumicë”. Gjithashtu Kadareja, ka anatemuar direkt kryeministrin Berisha, për emërimet ministrore në bazë të krahinarizmave. Një deklaratë tjetër e Kadaresë, ka qenë ajo kur shkrimtari i ka kërkuar kryeministrit të largojë kazinotë nga qendra e kryeqytetit, duke mbështetur kështu edhe një OJQ. Përveç kësaj, në një përurim të librit të tij, Kadare është shprehur kundër indiferencës së shtetit për lënien e vendit në errësirë. “Sot vendi ynë, është përfshirë nga errësira dhe ne të gjithë e dimë se në terr lexohet gjithmonë e më pak, ka thënë ndër të tjera shkrimtari. Përveç kësaj, bëhet e ditur se nëpër biseda të zakonshme Kadare, ka kundërshtuar shumë veprime konfuze të qeverisë, të cilat padyshim në shumicën e rasteve i kanë shkuar në vesh Berishës. Pra, duket hapur se marrëdhëniet midis Kadaresë dhe qeverisë shqiptare janë ftohur ndjeshëm. Lajmi i fundit, për mundësinë e prishjes së banesës së Kadaresë në Durrës, konfirmon edhe njëherë se prishja dypalëshe, tanimë është një fakt. Ndërsa, kundërshtimi i fundit për pagëzimin e Bibliotekës Kombëtare me emrin e Ismail Kadaresë, tregon se marrëdhëniet midis tyre tanimë duan kohë të rregullohen.

Berisha refuses Ismail Kadare

The Albanian Prime Minister and his governing cabinet oppose the baptising of National Library after the name of Ismail Kadare.According to sources, it was informed the followings of the Writer plead to the Ministry of Tourism, Culture, Youth and Sports to name the National Library after the name of Kadare, but the high governing bodies refused have refused it. Baptising of this library after the name of the prominent writer was foreseen to be carried out on January 30, which corresponds with his 70 birthday. Now, it is obvious the refusal emerged because of the relations’ aggravation between the Writer with the governing cabinet’s main representatives. In certain cases, Kadare’s declarations have been directed not only to different ministers, but also toward Premier Berisha himself. The first opposing Kadare’s declarations have been published since the disclosure of Berisha cabinet’s names. Back then, Kadare attacked the actual Foreign Minister Besnik Mustafaj, strongly opposing his appointment as Albanian diplomacy’s chief. Among other things, Kadare called Mustafaj “an ordinary writer” and that “Albania has abundant writers like him”. Kadare opposed directly the Prime Minister Berisha for the ministerial appointments based on nepotism and regionalisms. Another opposing declaration from Kadare was the one against opening of the casino in the centre of Tirana, supporting this way the promoting NGO. In addition, Kadare was expressed during a book-fair inauguration against the state’s indifference for leaving the country in darkness. “Today, our country is plunged into darkness and we all know people read less and less in darkness”, the Writer said among other things. Despite these, it was informed Kadare through usual discussions has opposed many government’s confuse actions, which reached Berisha as well. So, it appears obviously the relations between Kadare and the Albanian government are in crisis. The last news about the possibility of breaking down Kadare’s house in Durres confirms one more time the mutual disruption is already a fact, while the recent rejection to name the National Library after Kadare shows their relations need time to be repaired.

http://www.panorama.com.al/

E Martë 20 Dhjetor 2005

Faqe 4/5 - Politikë

procesi i legalizimit

projektligji

Dy lloje kategorish. Çmimet nga 1 milion lekë të vjetra në 4 milionë

Legalizimet, zbardhen ndryshimet e projektligjit

Vlera maksimale që banorët e zonave informale do të paguajnë për legalizimin e shtëpive të tyre do të jetë 400 mijë lekë të reja.

Në projektligjin e miratuar në parim “Për legalizimin, urbanizimin dhe integrimin e ndërtimeve pa leje”, në nenin 11, nga ana e qeverisë është parashikuar në detaje shuma, që banorët e zonave informale do të paguajnë në bazë të sipërfaqes që ata kanë në ndërtesat e tyre. Deri në 100m2, banorët, vetëdeklaruesit do të paguajnë 100.000 mijë lekë, më pas ata që kanë 200m2 do të paguajnë 150 mijë lekë, ndërsa ata banorë që kanë ndërtuar deri në 300m2 do të paguajnë 200mijë lekë. Banorët që kanë një ndërtesë me një sipërfaqe 400m2 do të paguajnë 300mijë lekë dhe ata me 500 mijë metër katrorë do të paguajnë 400 mijë lekë. Në këtë projektligj parashikohet që, për ata persona që kanë banesë me mbi 500 metër katrorë, duhet të paguajnë sipas vlerës së tregut në momentin e kalimit të pronësisë. Këto shifra janë të cilësuar si parcela ndërtimore në “zonat informale”. Qeveria ka parashikuar dy kategori për procesin e legalizimit, për zonat informale dhe për zonat ku banesat janë ndërtuar në zonat formale.

Banesat nën 100m2
Në këtë projektligj, personat që kanë ndërtuar me mbi 100m2 në trojet e ndërtuara në mënyrë informale në vendbanimet formale do të paguajnë tokën mbi bazën e vlerës së tregut. Për banesa deri në 50m2 vetëdeklaruesi paguan 100 mijë lekë, ata që kanë 75m2 dhe 100m2, vetëdeklaruesit paguajnë respektivisht 200 mijë lekë dhe 400 mijë lekë. Mbi 100 m2 vetëdeklaruesi e paguan banesën me vlerën e tregut. Parashikohet që ndërtimet informale pas hyrjes në fuqi të këtij ligji do të shemben, ndërsa subjektet që dhunojnë ligjin, penalizohen me heqje licence dhe gjoba: “a. për shtesat apartamente: 100% e vlerës së tregut; b. për shtesa me aktivitet ekonomik: 150% e vlerës së tregut; c. ndryshim destinacioni nga parkim në dyqane:200% e vlerës së tregut”. Në këtë rast vlera e tregut të parcelës ndërtimore përcaktohet në përputhje me metodologjinë e miratuar me Vendimin e Kuvendit nr. 183, datë 28.04.2005 “Për miratimin e metodikës për vlerësimin e pronës së paluajtshme që kompensohet dhe asaj që do të shërbejë për kompensim”.

Pagesa me këste
Në projektligjin e qeverisë parashikohen që pagesat e mësipërme të legalizimit për kategoritë I dhe 2 mund të ndahen në 2-3 këste, sipas një afati të përcaktuar nga qeverisja vendore, por jo më vonë se 1 vit e gjysmë nga dita kur hyn në fuqi ky ligj. Në këtë rast dokumenti i legalizimit lëshohet vetëm pasi të jenë shlyer të gjitha detyrimet që ka vetëdeklaruesi. Nga ky proces i legalizimit qeveria ka parashikuar që një pjesë e fondeve të kalojë në buxhetin e pushtetit vendor.
Qeveria “Berisha” ka miratuar në parim dje, projektligjin “Për legalizimin, urbanizimin dhe integrimin e ndërtimeve pa leje”, duke lënë që vendimi përfundimtar të merret në ditën e sotme. Shkak i shtyrjes së votimit të këtij ligji mësohet se janë bërë disa propozime nga ana e zv.kryeministrit, Ilir Rusmajli, në mbledhjen e djeshme. Numri dy i qeverisë ka propozuar në relacionin e tij disa ndryshime teknike, të cilat kanë të bëjnë me faktin, se cilat objekte do të përfshihen në procesin e legalizimit.

Opozita
PS kundër: Nuk zgjidh konfliktet

Socialistët e kanë kundërshtuar prej kohësh projektin e bërë nga qeveria për legalizimin e zonave informale. Sipas tyre ligji i bërë nga PD realizon vetëm premtimin elektoral të kësaj të fundit por në fakt nuk zgjidh absolutisht absurditetin që ndodh në zonat ku të gjithë të ardhurit, kanë zaptuar prona të cilat kanë qenë të disa pronarëve. Janë hedhur poshtë edhe shifrat e lëna nga PS në ligjin që është aktualisht në fuqi për rreth 300 metra katrorë që duhet të kishte çdo familje për të banuar. Projektligji i PD ka marrë përsipër që t’u japë nga 500 metra katrorë secilit nëse kanë marrë kaq tokë në dispozicion. Për socialistët projekti që në fillim do të ishte i dështuar sepse ai nuk merr parasysh as urbanizimin dhe koston e urbanizimit.

LZHK
Shehi: Legalizimi antikushtetues

Lëvizja për Zhvillim Kombëtar është shprehur dje kundër projektligjit të qeverisë së djathtë të drejtuar nga ana e PD-së. Kreu i LZHK-së, Dashamir Shehi, pas takimit me shoqatën e pronarëve, u shpreh se “të mos realizohet legalizimi me këtë projektligj, pasi ai është antikushtetues, diskriminon pronarët dhe favorizon një grup të caktuar”. LZHK-ja ka propozuar rishikimin e projektit të qeverisë, duke marrë në konsideratë interesat e pronarëve, të cilat projektligji i qeverisë i dhunon në të gjitha aspektet. Lëvizja e prentendentit të Fronit Mbretëror ka një skemë të sajën për procesin e legalizimit, duke realizuar më parë një urbanizim të zonës, zgjidhje pronësie dhe legalizim, sipas planeve urbanistike me çmimin e tregut.

Projekti për legalizimin

Projekt për legalizimin dhe urbanizimin e vendbanimeve dhe zonave informale

Neni 1 Objekti i ligjit
Ky ligj ka për objekt:
a. legalizimin e banesave dhe objekteve me karakter ekonomik të ndërtuara pa leje në
“vendbanimet formale “ dhe në “zonat informale”;
b. kalimin e pronësisë së parcelës ndërtimore brenda territorit të “zonës informale” ose të truallit brenda “vendbanimit formal”, sipas përcaktimit të bërë në nenin 11 të këtij ligji;
c. urbanizimin e “zonave informale”, për integrimin e tyre në zhvillimin territorial dhe infrastrukturor të vendit dhe përmirësimin e kushteve të jetesës të këtyre zonave;
d. procedurat për realizimin e legalizimit të ndërtimeve pa leje (për qëllime strehimi dhe aktiviteteti ekonomik) dhe ngritjen e funksionimin e strukturave përgjegjëse për realizimin e tyre;
Ligji synon të krijojë një sistem të përbashkët vlerësimi dhe legalizimi për “asetet ekstraligjore” në tërësi, për qëllime strehimi dhe aktivitet ekonomik, të cilat unifikohen në një ligj të vetëm, përfshi:
a. “ndërtimet informale” jashtëe vijave kufizuese (të verdha) të vendbanimeve formale, në zona që klasifikohen sipas këtij ligji si “zona informale “;
b. “ndërtimet informale “ dhe “shtesal informale “ (të objekteve formale, të cilat janë ndërtuar deri në vitin 1990 brenda vijave kufizuese të verdha të vendbanimeve formale) të ndërtuara deri ditën e hyrjes në fuqi të këtij ligji;
c. “lejekalimet informale” të lejeve për objektet formale të ndërtuara pas vitit 1990 deri ditën e hyrjes në fuqi të këtij ligji, të parashikuara në ligjin nr. 9209, dt. 23.03.2004. me kusht që të jenë brenda vijave kufizuese të verdha të vendbanimeve formale.
Kjo iniciativë ligjore synon rikthimin e rregullit për administrimin e qëndrueshëm të territorit dhe respektin për ligjin, duke mobilizuar:
(i) vlera kuruese dhe integruese - për informalitetin e ndodhur deri në ditën e hyrjes në fuqi të këtij ligji
(ft) vlera parandaluese dhe penalizuese - për çdo formë informaliteti pas hyrjes në fuqi të këtij ligji.
(in)Krijimin e kushteve bazë për sqarimin e situatave urbanistiko-jurudike në funksion të mundësimit të procesit të kthimit dhe kompensimit të pronave
Në funksion të kësaj kategorie (a) dhe (b) të informalitetit do të trajtohen si pjesë e një politike sociale në luftë kundër varfërisë përmes ringjalljes dhe integrimit të “kapitaleve të ngurtësuara” jashtë skeletit ligjor. Kurse trajtimi i kategorisë (c) synon mbrojtjen e interesit publik dhe rikthimm e besimit tek ligji dhe shteti, duke siguruar krahas alternativës së legalizimit, edhe masa që dekurajojnë dhe penalizojnë vazhdimin e abuzimit më tej. Kategoritë e shtesave (tejkalimeve) të ndërtimeve të parashikuara në ligjin nr. 9209, dt.23.03.2Q04 dhe që janë ndërtuar deri ditën e hyrjes në fuqi të atij ligji, do të vazhdojnë të trajtohen në bazë të ligjit 9209. Më tej do të operohet me këtë ligj. Nuk do të tolerohet dhe legalizohet me asnjë objekt informal i ndërtuar pas hyrjes në fuqi të këtij ligji.
Shteti merr përsipër, sipas ligjit respektiv, kompensimin me vlerën e tregut të (ish-) pronarëve privatë për ato sipërfaqe toke, të cilat përfshihen në procesin e legalizimit dhe e tjetërsojnë pronësinë në funksion të këtij ligji.
Neni2 Fusha e zbatimit
Ky ligj zbatohet për të gjitha objektet e ndërtuara pa leje nga subjektet, personat fizikë dhe juridikë privatë vendas, brenda territorit të vendbanimeve dhe zonave informale për funksione strehimi dhe /ose aktiviteteti ekonomik.

KREUIII PROCEDURAT DHE AFATET
Neni7
Vetëdeklarimi
Për ndërtimet pa leje, subjektet detyrohen që brenda një periudhe 4-mujore nga hyrja në fuqi e këtij ligji, të bëjnë pranë njësisë së urbanistikës të njësisë së qeverisjes vendore përkatëse vetëdeklarimin e ndërtimit pa leje dhe sipërfaqes së zënë, sipas formularit që i bashkëlidhet këtij ligji. Afatet e vetëdeklarimit të ndërtimeve pa leje në “zonal informale” shoqërohen me këto detyrime: a. brenda muajit të parë pas hyrjes në fuqi të ligjit, falas; b. brenda muajit të dytë, gjobë 100 lekë/m2 parcelë;
c. brenda muajit të tretë, gjobë 200 lekë/m2 parcelë; d. brenda muajit të katërt, gjobë 300 lekë/m2 parcelë; e. pas muajit të katërt, humbet e drejta e legalizimit.
Afatet e vetëdeklarimit të ndërtimeve pa leje brenda “vendbanimeve formale” janë të njëjta si në rastin e ‘’zonave informale”, me ndryshimin se në vend të parcelës, gjobat i referohen sipërfaqes së ndërtuar (m2 ndërtim).
Neni 8 Procedura e përcaktimit të Zonës Informale
Procedura që ndiqet për përcaktimin e zonës informale është:
a. Vetëdekiarimi nga ana e subjekteve që kanë ndërtuar banesa pa leje dhe të parcelës ndërtimore.
b. Paralel me këtë, evidentimi i zonës së zënë nga ndërtimi i banesave pa leje, për përfshirjen e tyre në procesin e legalizimit.
c. Në mënyrë që të kursehet koha dhe të ulen kostot, në zona informale dhe vendbanimi masive që janë prioritare për legalizim, autoritetet do të ndërmarrin strategji pro-akfive për identifikiëin e situatave topografike në terren dhe përcaktimin e zonave informale.
d. Depozitimi në Këshillin e Qarkut përkates i gjendjes faktike së bashku me argumentimin teknik e ligjor, nga njësia e qeverisjes vendore, brenda 30 ditëve nga mbarimi i afatit të përcaktuar në nenin 7.
e. Shqyrtimi dhe miratimi i zonave informale në Këshillin e Qarkut brenda 30 ditëve. Për zonat dhe ndërtimet pa leje brenda vendbanimeve formale shqyrtimi dhe miratimi bëhet në Këshillin e Bashkisë brenda të njëjtit afat.
f. Depozitimi pranë Agjencisë së Legalizimit dhe Urbanizimit të Zonave Informale (ALUZI),të dokumentacionit tekniko-ligjor nga Këshilli i Bashkisë/Qarkut për zonal informale në territorin e tyre. Dokumentacioni tekniko-ligjor përcaktohet me udhëzim të ministrit që mbulon veprimtarinë e planifikimit të territorit.
g. ALUZI paraqet dokumentacion e përpunuar së bashku me oponencën e tij, brenda 15 ditëve, në Këshillin e Rregullimit të Territorit të Republikës së Shqipërisë (KRRTRSH), i cili shqyrtohet dhe miratohet në mbledhjen më të afërt të saj.
h. KRRTRSH përcakton me vendim emërtimin e zonës informale dhe kufirin e saj.
Neni9 Efektet juridike të vendimmarrjes së KRRTRSH
Vendimi i KRRTRSH-së, sipas pikës “e”, nenit 8, bën sipas rastit:
a. Ndryshimin e regjimit të tokës në tokë truall.
b, Ndryshimin e destinacionit të përdorimit në zone banimi/ekonomike.
Neni 10 Regjistrimi i zonës informale
Territori i “zonës informale” (dhe i vendbanimit formal kur është e nevojshme) regjistrohet në regjistrin e pronave të paluajtshme në përputhje me ligjin nr.7843, datë 13.07.1994 “Për regjistrimin e pasurive të paluajtshme”, në pronësi të njësisë përkatëse të qeverisjes vendore.
Njësia e qeverisjes vendore, në bashkëpunim me ZRPP, publikon brenda 10 ditëve listën e pronarëve të regjistruar në regjistrat e pasurive të paluajtshme brenda kufirit të ‘’Zonës informale” dhe/ose “vendbanimit formal”, të cilat hyjnë në procesin e parashikuar nga ky ligj.
Mënyrat dhe procedurat e kompensimit përcaktohen me Vendim të Këshillit të Ministrave.
Neni 11
Kalimi i pronësisë së parcelës ndërtimore
Kalimi i pronësisë së parcelës ndërtimore nga njësia e qeverisjes vendore përkatëse tek vetëdeklaruesi bëhet sipas dispozitave të Kodit Civil. Ky ligj veçon tri situata:
i). Për parcela ndërtimore në “zonat informale “ me sipërfaqe:
a. deri në 100 m2 vetëdeklaruesi paguan 100,000 lekë
b. deri në 200 m2 vetëdeklaruesi paguan 150,000 lekë
c. deri në 300 m2 vetëdeklaruesi paguan 200 mijë lekë
d. deri në 400 m2 vetëdeklaruesi paguan 300 mijë lekë
e. deri ne 500 m2 vetedeklaruesi paguan 400 mije lekë
f. mbi 500 m2 vetëdeklaruesi paguan sipas vlerës së tregut në momentin e kalimit të pronësisë.
ii). Për sipërfaqet e trojeve të ndërtuara në mënyrë informale në “vendbanimet formale”:
a. deri në 50 m2 vetëdeklaruesi paguan 100,000 lekë
b. deri në 75 m2 vetëdeklaruesi paguan 200,000 lekë
c. deri në 100 m2 vetëdeklaruesi paguan 400,000 lekë
d mbi 100 m2 vetëdeklaruesi paguan me vlerën e tregut.
iii). Ndërtimet informale pas hyrjes në fuqi të këtij ligji do të shemben, ndërsa subjektet që dhunojnë ligjin, penalizohen me heqje licence dhe gjoba:
a. për shtesat apartamente: 100% e vlerës së tregut
b. për shtesa aktivitet ekonomik: 150% e vlerës së tregut
c. ndryshim destinacioni nga parkim në dyqane: 200% e vlerës së tregut
Në këtë rast vlera e tregut të parcelës ndërtimore përcaktohet në përputhje me metodologjinë e miratuar me Vendimin e Kuvendit nr 183, datë 28.04.2005 “Për mirtimin e metodikës për vlerësimin e pronës së paluajtshme që kompensohet dhe asaj që do të shërbejë për kompensim.
Pagesat e mësiperme të legalizimit për kategoritë I dhe 2 mund të ndahen në 2-3 këste, sipas një afati të përcaktuar nga qeverisja vendore, por jo më vonë se 1 vit e gjysmë nga dita kur hyn në fuqi ky ligj. Në këtë rast dokumenti i legalizimit lëshohet vetëm pasi te jenë shlyer të gjitha detyrimet.
Neni 12
Kushtet paraprake për kalimin e pronësisë
Vetëdeklaruesi përpara lidhjes së kontratës për kalimin e pronësisë, depoziton në njësinë e qeverisjes vendore përkatëse:
a. Kontratë me KESH.
b. Kontratë me Drejtorinë e Ujësjellës Kanalizimeve.
c. Kontratë me njësinë e qeverisjes vendore, për kontributin në urbanizimin e zonës.
d. Deklaratën e përgjegjësisë personale për qëndrueshmërinë teknike/sizmike të objektit në të ardhmen.
Neni 13
Urbanizimi i zonave informale
Urbanizimi i zonave informale do të bëhet në bazë të studimeve urbanistike dhe jo domosdoshmërisht para legalizimit.
a. Hartimi i studimeve urbanistike për zonat informale porositet nga njësitë e qeverisjes vendore sipas dispozitave ligjore në fuqi. Hartimi i planeve do të jetë i shpejtë dhe fleksibël pa vonuar procesin e legalizimit. Njësitë e qeverisjes vendore duhet t’i përgatisin këto plane brenda afatit të deklarimit të ndërtimeve pa leje, dhe në çdo rast duhet të operojnë të paktën në bazë të një “plani të hapësirave dhe shesheve publike” për investime në rrugë, infrastrukturë dhe objekte social-kulturore që miaratohen nga Këshilli i Bashkisë/Qarkut.
b. Këshilli i Qarkut miraton me vendim studimin urbanistik për territorin e zonave informale në tërësi, për qarkun të tij. Këshilli i Bashkisë operon për rastet brenda vijave të verdha,
c. Miratimi i studimeve urbanistike nga KRRTRSH-ja bëhet brenda katër muajve nga miratimi i tyre nga Këshilli i Bashkisë/Qarkut përkatës.
d. Në rastin e zonave dhe ndërtimeve informale të merren në konsideratë norma dhe standarte urbanistike minimale. Ngarkohet Instituti i Studimeve dhe Projektimeve Urbanistike per rishikimin dhe hartimin e këtyre normave/standarteve brenda 2 muajve nga miratimi i këtij ligji.
Neni 14 Zbatimi i studimit
Njësia e qeverisjes vendore, në zbatim të studimit të miratuar, në bashkëpunim me Policinë e Ndërtimit, liron hapësirat e nevojshme për funksione publike dhe i vë në dispozicion të realiziinit të infrastrukturës dhe shërbimeve të parashikuara në studim.
Neni 15
Për efekt legalizimi dhe urbanizimi, brenda territorit të zonës informale, ndërtimet pa leje kategorizohen në ndërtime:
a. që legalizohen në përputhje të plotë me studimin urbanistik të zonës informale të miratuar;
b. që legalizohen pasi ridimensionohen për t’u përshtatur me studimin urbanistik të zonës informale.
Neni 16
Subjektit, objekti i të cilit prishet nga zbatimi i studimit urbanistik, i vihet në dispozicion, nga njësia e qeverisjes vendore, parcela ndëtimore me të njëjtën sipërfaqe, në territor të parashikuar për këtë qëllim nga studimi urbanistik.
Neni 17
Dokumentacioni teknoko-ligjor për legalizimin e banesës
Subjekti kërkues i interesuar duhet të paraqesë:
a. Certifikatën e pronësisë së parcelës ndërtimore nga ZRRPP përkatëse.
b. gen-plan i objektit në shkallën 1:500 të lëshuar nga njësia vendore
c. planimetria e çdo kati të objektit që do të legalizohet në shkalle 1:100
d. vërtetim për pagesën e taksës për legalizimin e banesës në vlerën 5% të vlerës së objektit
Vlera e objektit llogaritet bazuar në koston mesatare e ndertimin të Entit Kombëtar të Banesave.
e. Deklaratë personale që merr përsipër përgjegjësinë për çdo pasojë që mund të rrjedhë nga përdorimi i banesës.
Neni 18 Dhënia e lejes së legalizimit
Njësia e qeverisjes vendore përkatëse, me plotësimin e dokumentacionit të përcaktuar në nenin 17, brenda 30 ditëve nga paraqitja e kërkesës, pajis subjektin me lejen e legalizimit.
Kriteret, procedurat dhe formulari i lejes së legalizimit përcaktohen me vendim të Këshillit të Ministrave.
Neni 19 Dokumentacioni për regjistrimin e objektit në ZRPP
Leja e legalizimit së bashku me dokumentacionin e përcaktuar në nenin 17 të këtij ligji, të konfirmuar nga njësia e qeverisjes vendore përkatese, paraqitet në ZRPP për regjistrimin e objektit në regjistrat e pasurive të paluajtshme.
Neni 20 Ndarja e të ardhurave
Ndarja e të ardhurave të përftuara nga nenet 11, 17 të këtij ligji bëhet si më poshtë:
a. 70% në buxhetin e njësisë së qeverisjes vendore që përdoret për përditësimin e planvendosjes së zonës informale dhe hartimin e studimeve urbanistike për të.
b. 30% në buxhetin e shtetit që përdoret për procesin e urbanizimit.
Neni 21 Dispozitë detyruese
Mosdeklarimi brenda afatit kohor, deklarimi i rremë i ndërtimit dhe i sipërfaqes së zënë, si dhe mosparaqitja e dokumentacionit të plotë tekniko-ligjor, sjell përjashtimin nga procesi i legalizimit dhe urbanizimit të zonave informale.
Neni22
Për ndërtimet pa leje që kanë përfituar nga procesi i legalizimit sipas banesave të tarifave sociale (100-400 mijë lekë) në rast shitjeje tek palët e treta, duhet të paguhet tek njësitë e qeverisjes vendore diferenca që krijohet midis tarifës sociale të paguar dhe vlerës së tregut të parcelës/truallit të legalizuar në momentin e shitblerjes.

KREUIV DISPOZITA KALIMTARE DHE TE FUNDIT
Neni 23 Dispozita kalimtare
a. Deklarimet e bëra në bazë të ligjit 9304, datë 23.10.2004 “Për legalizimin dhe urbanizimin e zonave informale”, konsiderohen të mirëqena.
b. Për “zonat informale” të miratuara me vendim të KRRTRSH, bazuar në ligjin 9304, datë 23.10.2004 “Për legalizimin dhe urbanizimin e zonave informale”, strukturat e ngarkuara nga ky ligj të veprojnë sipas përcaktimeve të bëra në nenet 7, 9, 10,11,12 e vijues të këtij ligji.
c. Për vijmësinë e procesit të vetëdeklarimit dhe të përcaktimit të “zonës informale” të zbatohen procedurat e përcaktuara në udhëzimin nr.l, datë 06.01.2005 “Për procedurat e mbledhjes dhe përpunimit të të dhënave për ndërtimet e banesave në “zonat informale”, udhëzimi i Këshillit të Ministrave nr.3, datë 13.05.2005 “Për procedurat e miratimit të “zonës informale”.
d. Subjektet që janë parashikuara të mbulohen nga ligji nr. 9209, dt.23,03.2004, për shtesat pa leje në ndërtime, do të vazhdojnë të trajtohen nga ky ligj.
Neni 24
Keshilli i Ministrave, brenda 90 ditëve nga hyrja në fuqi e këtij ligji, përcakton mënyrën e administrimit të territorit të “zonës informale”, fondin e nevojshëm dhe prioritetet në trajtimin e këtyre zonave.
Neni 25
Ngarkohet Keshilli i Ministrave të nxjerre aktet nënligjore, sipas përcaktimeve të neneve 4, 10, 18 23 të këtij ligji.
Ngarkohet ministri që mbulon fushën e planifikimit të territorit të nxjerrë udhëzimin, sipas përcaktimit të nenit 4 të këtij ligji.
Neni 26 Shfuqizime
Ligji 9304, datë 23.10.2004 “Për legalizimin dhe urbanizimin e zonave informale”, shfuqizohet
Neni 27 Hyrja në fuqi
Ky ligj hyn në fuqi 15 ditë pas botimit në Fletoren Zyrtare.

http://www.shekulli.com.al/ 18/12/2005