Dervishi i LZHK voton për Kokën

Këshilltari i LZHK në Bashkinë e Durrësit, Muhamed Dervishi, ka mbrojtur hapur administratën e Lefter Kokës në seancën e miratimit të buxhetit, duke dëshmuar përfundimisht mercenarizimin që ky individ i ka bërë vetes për interesa të ngushta. Megjithë voton pro socialistëve, Dervishi, ka sulmuar hapur median e djathtë për faktin e vetëm se ka bërë publik marrëveshjet banale me socialistët në Këshillin Bashkiak. Ai i ka quajtur shkrimet në mediat e djathta si shkrime të Haxhi Qamilëve, emër i përdorur nga Nano në Shijak vetëm një ditë para se ta shqiptonte Dervishi. Në fakt duket se më shumë se ndikimi i Nanos për të gjetur krahasimin, Dervishi është ndikuar nga fshati i lindjes, i cili ka qenë një fushë e betejës së Haxhi Qamilit. Rreshtimi i Dervishit në krah të socialistëve duket se nuk ka shkaktuar as edhe një çudi, pasi në shtatë vitet e fundit ai ka provuar edhe reformim, edhe promovim, kandidim, por edhe ndryshime rrënjësore të bindjeve nga republikan në monarkist. Dervishi vendosi të gjejë fole në LZHK. Çerdhja e zënë nga Dervishi në këtë lëvizje është hapi i fundit i kulturës haxhijane, pasi edhe këtu në fakt u kundërshtua hapur nga të gjithë monarkistët e Durrësit, duke mbetur në këtë lëvizje, përsëri njeriu më i pavotuar. Fjalori fyes i Dervishit për të vërteta të botuara në median e djathtë dhe për modele dhe formate të tij, tregojnë se formati i vetë Dervishit është katandisur tek urdhërat e një fatorino autobuzi që kryeson këshilltarët socialistë dhe që aktualisht i jep edhe urdhërat zotit Dervishi. Gjithsesi, kriza e formatit të tij është më e rrezikshme për vetë atë. Një format që kushton vetëm dy vende pune është domethënia e njeriut që ka marrë përsipër të emancipojë politikën, duke shfryrë mllef për median e djathtë. Frika se ka gazetarë, të cilët nuk flasin gjuhën shqipe mirë, është më pak e frikshme kur për këtë flet ish-përgjegjësi i vatrës së kulturës. Të shitesh lirë, duke folur mirë shqip, ka të vetmen vlerë anën gjuhësore, por të mercenarizohesh me gjuhë letrare tek njerëz, të cilët e kanë ndërprerë shkollimin e detyrueshëm, është e rrezikshme dhe jo vetëm nuk i shërben qytetit, mision të cilin e ka vjedhur me siglën e PD, por as vetë Dervishit me emrin Muhamed që flet për Haxhi.