http://www.gazeta55.net/home.jsp 

 

Data: 19/05/2005, ora   LZHK ndryshon emrin, për efekt të fushatës

LZHK do të kthehet në Lëvizjen për Zhvillim Kombëtar të Lekës së Parë, për efekt elektoral, që kjo parti të mos ngatërrohet me sigla të tjera

Mbikqyrësi i fushatës zgjedhore së LZHK-së, Dashamir Shehi, bëri dje të ditur ndryshimin e emrit të kësaj partie, nga LZHK në LZHK, Zogu i Parë, duke e justifikuar këtë ndryshim të emrit si një manovër që ndërmerr kjo parti, në kuadër të fushatës elektorale. Shehi i bëri thirrje kryetarit të Partisë Demokratike, Sali Berisha, për ndërprerjen e akuzave që i ka bërë kësaj partie, pasi këto akuza mund të kushtëzojnë aleancat paszgjedhore, sipas tij. Kjo është kundërpërgjigje e akuzave të një dite më parë nga lideri demokrat Sali Berisha, sipas të cilave, kryeministri Nano ka ndërhyrë për lista e kandidatëve për deputetë të LZHK-së. "Ne e ftojmë të largojë nga grupi i ashtuquajtur opozitar, të cilët kanë bashkëpunuar me qeverinë komuniste, me Partinë Socialiste, me Sigurimin e Shtetit, janë të sharë e të pështyrë më se njëherë nga zoti Berisha. Nëse do bashkëpunim, duhet t'i largojë këta aleatë që nuk kanë, absolutisht, asnjë lloj vlere."

Habion HASANI

 

 

 

http://www.shekulli.com.al/ 19/05/2005

Berisha: LZHK-ja fraksion i furrikut të Dukës. Shehi: PD-ja të pastrohet nga ish-sigurismat dhe shërbëtorët e Nanos

PD-LZHK, akuza për përdorje nga qeveria

 

N.Perndoj

Partia Demokratike dhe ajo e Lëvizjes për Zhvillim Kombëtar akuzojnë njëra-tjetrën për përfshirje të kandidatëve të inkriminuar në secilën prej partive, duke rrezikuar në këtë mënyrë edhe mundësinë e një aleance pazgjedhore me njëra-tjetrën. Kryetari i Partisë Demokratike, Sali Berisha, ka deklaruar dje se LZHK-ja po bashkëpunon me ministrin e Bujqësisë, Agron Duka. “Ne i kemi ofruar këtë mundësi edhe disa përfaqësuesve të tjerë, mirëpo aty fraksioni i furrikut (Agron Dukës) është i vendosur që të bashkëpunojë me Fatos Nanon dhe unë shpreh keqardhjen e madhe”, - tha dje Berisha. Edhe dy ditë më parë, kryetari i demokratëve deklaroi se kishte konstatuar se në emërtesën e kandidatëve të kësaj lëvizje i ishte lënë dorë e lirë kryeministrit Fatos Nano për të realizuar formulën e Dushkut. Me të njëjtën monedhë është përgjigjur dje kryetari i Këshillit Ekzekutiv i Lëvizjes për Zhvillim Kombëtar, Dashamir Shehi. “Deklaratën e PD-së se Nano po zgjedh kandidatët e LZHK-së e shoh si një shaka të madhe, si një marri dashakeqe ndaj të vetmes forcë të qendrës së djathtë në Shqipëri, LZHK-së. Lëvizja për Zhvillim Kombëtar fton opozitën shqiptare të nxjerrrë jashtë përbërjes së saj pjesët e diktaturës, bashkëpunëtorët e sigurimit dhe shërbëtorët e Nanos, të cilët PD-ja i kandidon nën siglën e saj. LZHK-ja deklaron se të gjitha kandidaturat e saj janë nga njerëzit më të pastër të jetës politike dhe shoqërore shqiptare. Janë njerëz të spektrit opozitar që synojnë në misonin e tyre, nën kryesinë e mbretit Leka Zogu I, gjithëpërfshirjen e popullit shqiptar në fatet e kombit dhe atdheut. LZHK-ja synon t’u kthejë të gjithë shqiptarëve të drejtën për të vendosur me votë fatin e qeverisjes për një Shqipëri më të fortë dhe të ndershme”, - tha dje Shehi, duke paralajmëruar edhe rrezikun e një mosbashkëpunumi mes dy partive pas zgjedhjeve. “Lëvizja për Zhvillim Kombëtar, Leka Zogu I, i bën thirrje PD-së të ndalë diversionin dhe shpifjet ndaj kësaj lëvizjeje, sepse kjo gjë mund të bëhet shkak për vështirësimin e aleancave paszgjedhore”, - tha ai. Për efekt elektoral, në fletët e votimit LZHK-ja do të shënohet: LZHK-ja, Leka I Zogu. Nën të njëjtin emërtim, nga sot e tutje kjo lëvizje do të njihet si Lëvizja për Zhvillim Kombëtar Leka I Zogu.

Kryetar i Bordit të Ekspertëve të LZHK-së ka reaguar ndaj mbështetjes së FMN-së në privatizimin e Albtelekomit

LZHK-ja: FMN-ja po lejon monopolet

Florian Papadhimitri

TIRANË- Lëvizja për Zhvillim Kombëtar ka reaguar dje ndaj deklaratës së fundit të Fondit Monetar Ndërkombëtar lidhur me privatizimin e “Albtelecom”. Përfaqësuesi i LZHK-së, eksperti për çështjet ekonomike, Gjergj Buxhuku, tha në një konferencë për shtyp tha se nuk do të pranojë shitjet e kompanive shqiptare private. “Ne nuk mund të shesim kompanitë tona dhe të krijojmë monopole private vetëm se FMN-ja synon të mbyllë me sukses marrëveshjen e vet me qeverinë shqiptare”, - tha Buxhuku në një konferencë për shtyp, duke akuzuar ashpër Fondin Monetar Ndërkombëtar se po ndihmon krijimin e monopoleve në tregun shqiptar të telefonisë. Buxhuku deklaroi gjithashtu se nuk mund të ketë ndërprerje të marrëdhënieve mes Shqipërisë dhe FMN-së për këtë shkak. Përfaqësuesi i FMN-së, duke e trajtuar privatizimin e “Albtelecom”, vetëm si çështje të çmimit të ofruar, në mënyrë të qartë u shpreh se përkrah procesin qeveritar, që, sipas LZHK-së, është në kundërshtim të hapur me moralin qeverisës, interesat ekonomike dhe financiare si dhe interesat kombëtare të Shqipërisë dhe shqiptarëve, duke i kthyer ata në shërbëtorë të përjetshëm edhe në vendin e tyre. Po dje Buxhuku ka vënë në dukje se “LZHK-ja dëshiron të theksojë edhe një herë tjetër se ajo nuk mund të pranojë kurrë të preken parimet bazë të ekonomisë së tregut të lirë. “Për më shumë, privatizimi monopolist i telefonisë fikse do të thotë që njëkohësisht i gjithë sektori strategjik i telekomunikacioneve të kthehet plotësisht në një monopol të pastër. Heshtja, dhe për më shumë nxitja nga ana e institucioneve ndërkombëtare ndaj politikave të tilla monopoliste, rrezikon drejtpërdrejt edhe programin e konsolidimit fiskal, thellimin e deficitit korrent dhe të gjithë treguesve makroekonomikë më afatgjatë të vendit, për të cilat aq shumë pretendon me të drejtë vetë FMN-ja”, - deklaroi Gjergj Buxhuku. LZHK-ja në programin e saj elektoral e ka të shpallur qartë se do të këshillohet në vazhdimësi me FMN-në dhe institucionet ndërkombëtare të specializuara, por në asnjë mënyrë nuk do t’u bindet atyre në mënyrë të verbër.