Faqe 2 - Politikë

zgjedhjet parlamentare

marreveshja

Mekanizmi që do të përdoret për të fituar më shumë se një deputet në një zonë

Proporcionali, emrat e PD e PS në listat e aleatëve

Luljeta Progni & Eva Gjura

Socialistët dhe demokratët hartojnë strategjinë për praktikimin e “Dushkut” të madh në zgjedhjet e tre korrikut. Sipas kësaj skeme në listën proporcionale të partive aleate të PS-së dhe PD-së, do të renditen të dytët pas kryetarëve, tri emra të propozuar nga secila prej dy partive të mëdha. Pas emrit të kryetarit të secilës parti të vogël aleate me PS-në do të rreshtohen tri prej emrave që do të propozojë PS-ja dhe e njëjta procedurë pritet të ndiqet nga PD-ja me aleatët e saj. Në zonat ku mendohet të praktikohet skema e “Dushkut”, partitë e mëdha do të kërkojnë nga elektorati të votojnë për kandidatin e tyre, dhe për partinë aleate, ndërkohë që të njëjtën gjë do të bëjnë aleatët në zona të tjera, ku votën do t’ia japin kandidatit të PS-së, dhe partisë së tyre. Sipas kësaj praktike, me votat që arrin të marrë në një zonë të caktuar, ajo parti e vogël me të cilën arrihet marrëveshja, garantohet më shumë se një deputet bashkë me kandidatin e partisë së madhe, i cili merr votat në maxhoritar. Praktika e krijimit të “Dushkut” të madh, do të zbatohet në ato zona ku secila nga partitë pretendon se ka influencë më të madhe. Zyrtarë të lartë të PD-së e kanë pranuar publikisht se po zbatojnë skemën e “Dushkut”, ndërsa socialistët po e praktikojnë në mënyrë të fshehtë marrëveshjen me tre aleatët e saj. Kreu i maxhorancës socialiste ka pohuar në takimet elektorale të kohëve të fundit, në zona të njohura si bastione të PS-së: “Në këtë zonë duhet të fitojmë më shumë se një deputet”. Sipas marrëveshjes, nga skema e PS-së me aleatët pritet të përfitohen 10 vende në Parlament. Marrëveshja e PS-së me aleatët Marrëveshja e PS-së me aleatët e saj, PSD, PAD dhe PAA parashikon që në listat proporcionale të tri partive të zënë vendin e dytë, të tretë dhe të katërt, emra të propozuar nga PS-ja. Në kontigjentin e socialistëve të projektuar për të hyrë në listën proporcionale të partive të vogla aleate me PS-së, përfshihen deputetë aktualë që nuk rikandidojnë, ish-deputetë të kësaj partie apo edhe zyrtarë të administratës shtetërore. Krerët e partive të vogla nuk kanë mohuar idenë se maxhoranca ka propozuar një skemë të tillë, por nuk kanë pranuar të japin detaje në lidhje me marrëveshjen e pashkruar të tyre me PS-në. Burime bëjnë të ditur se në bisedimet mes sekretarit të përgjithshëm të PS-së dhe krerëve të tri partive aleate me PS-në në “Koalicionin për integrim”, është kundërshtuar nga të vegjlit skema e PS-së, pasi kërcënimi i socialistëve se nuk do t’i mbështesë për të qenë sërish parti parlamentare, ka bërë të mundur realizimin e marrëveshjes. Marrëveshja e PD-së me aleatët 20 përfaqësues të PD-së, ndër të cilët deputetë aktualë, që nuk përfshihen në listën e PD-së do të kandidojnë për partitë aleate, me të cilat kjo forcë politike ka nënshkruar marrëveshje bashkëpunimi. PD-ja u ka lënë 16 zona të lira aleatëve dhe këta të fundit në listën e tyre proporcionale pas kryetarit të partisë do të rendisin një nga kandidatët e PD-së, të cilët do të kërkojnë vota për partinë ku do të kandidojnë. Skemën e “Dushkut” PD-ja do të vërë në zbatim në ato zona ku ajo mendon se ka influencë. PD-ja në zonat e lira që u ka lënë partive aleate do të kërkojë votat për kandidatin e saj në maxhoritar, duke kërkuar që si subjekt të votohet për një nga partitë aleate. Kjo strategji do të ndiqet në zonën 15 dhe 69, ku kandidatët e PD-së si subjekt do të kërkojnë të votohet për PDK-në. Në zonën 52 dhe 65 si subjekt do të votohet për PBL-në. Në zonën 20 në Bulqizë si subjekt do të votohet për PBD-në. Në zonën 54 dhe 87 si subjekt do të votohet për BK-në. Në zonën 100 si subjekt të votohet për PDLN-në. Nga tri zona të lira PD-ja u ka lënë republikanëve të Mediut dhe reformatorëve të Pollos, të cilët do të konkurrojnë në këto zgjedhje me kandidatët e tyre.   Reagimi i LSI-së për marrëveshjen Braho: PS-PD, marrëveshje për “Dushkun” e madh Fenomeni “Dushk” është i njëjtë si për PD-në edhe për PS-në, është e njëjta linjë deformimi dhe matrapazlliku elektoral, e njëjta psikologji e devijimit të ligjit. Mesa duket dy forcat politike kanë rënë në marrëveshje për ta përdorur secila për llogari të saj respektivisht atje ku kanë më shumë influenca. Problemi i zbatimit të kësaj praktike ka të bëjë jo thjesht me dëmtimin e LSI-së, por me dëmtimin e krejt imazhit të zgjedhjeve dhe që në fund secila palë do të marrë përgjegjësinë e saj. Por kjo kërkon që LSI-ja dhe LZHK-ja t’i bëjnë thirrje elektoratit shqiptar që t’i përgjigjet me bojkot kësaj praktike antiligjore.   Reagimi i LZHK-së për marrëveshjen Shehi: PD, PS hartuan Dushkun për të na dëmtuar Skema e “Dushkut” që po zbatohet nga PD-ja dhe PS-ja ka shqetësuar LZHK-në të drejtuar nga Leka Zogu. Drejtuesi i LZHK-së, Dashamir Shehi është shprehur se kjo skemë po ndiqet me qëllim nga PD-ja dhe PS-ja për të dëmtuar LZHK-në dhe LSI-në, dy parti të cilat nuk kanë pranuar të nënshkruajnë marrëveshje parazgjedhore me PD-në e PS-së. “Skema e “Dushkut” u bë e njohur që në hartimin e Kodit Zgjedhor,- tha Shehi, - ndaj ne si lëvizje e kemi kundërshtuar gjithmonë. Në lidhje me pyetjen se çdo të bëjë LZHK-ja për ta shmangur këtë fenomen dhe për të mos u dëmtuar, Shehi tha se: “Nuk kemi çfarë të bëjmë, por do të dalim të mbledhim sa më shumë vota”.   Miratohet edhe kërkesa për vëzhguesit e huaj KQZ: 45 parti në zgjedhjet e 3 korrikut Komisioni Qendror i Zgjedhjeve regjistroi 13 parti që do të marrin pjesë në zgjedhjet e përgjithshme, duke çuar numrin e tyre gjithsej në 45. Në të bie në sy regjistrimi i Partisë Demokratike, Partisë Republikane, por dhe Partisë Komuniste. Numri i përgjithshëm i partive të regjistruara është 38, ndërsa afati i regjistrimit përfundon në 24 maj. Gjithashtu KQZ-ja akreditoi edhe 34 vëzhgues të ODIHR-it. Ndërkohë ODIHR ka kërkuar nga shtetet pjesëmarrëse në OSBE të dërgojnë 400 vëzhgues afatshkurtër, të cilët do të shpërndahen në të gjithë Shqipërinë. Ata do të vëzhgojnë në skuadra prej 2 personash hapjen e qendrave të votimit, votimin, numërimin e votave dhe pasqyrimin e rezultateve në të gjitha nivelet. Të 15 shtetet pjesëmarrëse në OSBE janë prezente me përfaqësues në këtë mision që drejtohet nga Jorge Grunet.

© 2003 Gazeta Panorama