http://gazetametropol.com/

 

20 kandidatë konkurojnë për 10 poste

BRAHIM SHIMA

23 Gusht  Nënkryetari i Partisë Demokratike Bamir Topi pritet të marrë postin e kryetarit të Kuvendit Kreu i demokratëve do të shpallë brenda javës 14 emrat e qeverisë së re Kryetari i PD, Sali Berisha, ka filluar përzgjedhjen e emrave të kabinetit qeverisës me të cilin do të drejtojë përgjatë katër viteve të ardhshme. Burime në PD shprehen se prezantimi i emrave tashmë mbetet vetëm çështje kohe, ndërkohë që Berishës i duhet të zgjedhë mes kandidaturave që konkurrojnë për postet ministrore. Vetë kryetari i PD, tha dje, se emrat e kabinetit qeveritar do të jenë një gërshetim i dy linjave. E para, lidhet me linjën politike dhe parlamentare, ndërsa linja e dytë është ajo e linjës joparlamentare, duke lënë të kuptohet se në kabinetin e ardhshëm do të bëjnë pjesë dhe persona që nuk fituan mandatin apo që janë anëtarë të KOP. Kabineti Duket se pas përfundimit të zgjedhjeve dhe sigurimit të kabinetit, kryetarit të PD, njëkohësisht dhe kryeministrit të ardhshëm, i duhet të përzgjedhë mes morisë së emrave të deputetëve dhe ekspertëve që ka afruar në Komitetin e Orientimit të Politikave pak muaj më parë. Surpriza duket se do të jetë vendosja e nënkryetarit të PD, Bamir Topi, në krye të Kuvendit të Shqipërisë. Burimet kanë bërë të ditur se ky është një post i preferuar dhe prej Topit. Reduktimi i kabinetit qeveritar në 14 ministri, dhe dhënia e 4 prej tyre aleatëve, duket se nuk lë shumë hapësira për kryeministrin e ardhshëm. Gara mes kandidaturave ka filluar dhe pas përfundimit të zgjedhjeve të 3 korrikut. Dërgimi i emrave në Presidencë për dekretim mbetet vetëm çështje ditësh. Pavarësisht se Berisha, nuk ka ndërmend t’i bëjë publik emrat përpara dërgimit të tyre në Presidencë, në tavolinën e Berishës, janë rreth 20 konkurrentë që pretendojnë postet e kabinetit qeveritar. Sipas burimeve në PD, për Ministrinë e Brendshme emri më i mundshëm është i Sokol Olldashit. Në Ministrinë e Integrimit, përfliten emrat e Majlinda Bregut, Gjergj Lekës, apo dhe Aldo Bumçit. Në Ministrinë e Drejtësisë, në krye të listës është emri i nënkryetares Jozefina Topallit, por alterantive janë dhe emrat e Lulëzim Bashës apo dhe Spartak Ngjelës. Në postin e zëvendëskryeministrit duket se do të vendoset emri i Ilir Rusmalit. Në Ministrinë e Shëndetësisë kandidaturë është Maksim Cikuli, ish-ministër gjatë viteve '92–'96, por një alternativë e mundshme është dhe emri i Aleksandër Sallabandës, një ndër hartuesit e strategjisë së shëndetësisë. Në Ministrinë e Rregullimt të Territorit dhe Transporteve, janë në garë emrat e Besnik Aliajt, Bujar Leskaj dhe Lindita Latit. Në Ministrinë e Ekonomisë dhe Energjetikës duket se është vendosur për emrin e Genc Rulit, premtim të cilin Berisha e ripërsëriti edhe gjatë fushatës së 21 gushtit. Ministria e Bujqësisë është në diskutim emri i Genc Jukës. Në Ministrinë e Turizmit dhe Kulturës diskutohet për emrin e Edmond Spaho dhe Precc Zogajt, në Ministrinë e Jashtme emri i Besnik Mustafajt dhe Jozefina Topallit, ndërsa Ministria e Financave duket se do të drejtohet nga Ritvan Bode. Struktura Kreu i PD, Berisha, u shpreh se në reformimin e strukturës së qeverisë do të bëjë pjesë dhe kalimi i posteve të rëndësishme që varen nga kryeministri në varësi të ministrive përkatëse. “Akoma jemi duke diskutuar për disa ndryshime që duhen bërë, sepse aktualisht po të vështrosh Këshillin e Ministrave, aty dikton dy qeveri. Një nga parlamenti dhe një tjetër, pra janë 15 të tjerë të barazuar, ose jo me ministra që varen nga kryeministri. Koncepti im është që varësitë do të jenë ministrore dhe jo kryeministrore. Qeveria e dytë është një strukturë që duhet të përshtatet me strukturën e kabineteve të anëtarëve të Bashkimit Evropian. Këtu ka disa probleme ligjore për t'i zgjidhur, sepse janë përcaktime ligjore këto varësi, për të cilat unë nuk jam i bindur se ato duhet të varen nga kryeministri”, tha Berisha. Demokratët ftojnë në bashkëpunim Cekën dhe Milon PD: Koalicioni i djathtë ka siguruar dhe vota të tjera në Kuvend Kryetari i Partisë Demokratike, Sali Berisha, tha dje koalicioni i djathtë i ka votat e mjaftueshme për të gjitha vendimet e rëndësishme që mund të merren në parlament. Berisha la të kuptohet se veç mandateve të PD me aleatët, dhe atyre që ka përfituar në bazë të marrëveshjes, ekzistojnë dhe vota të tjera në parlament, që do të votojnë për qeverinë e demokratëve. “Nuk janë vetëm mandatet e djeshme ka edhe parlamentarë të tjerë, të cilët kanë shprehur vullnetin e tyre të bëhen promotorë të ndryshimit. Mendoj se është krijuar një shumicë e mjaftueshme për të gjitha vendimet e rëndësishme”, tha Berisha. Ndërkohë lidhur me thirrjen e parlamentit, Berisha u shpreh, se tashmë janë të gjitha kushtet që Presidenti i Republikës të kryejë detyrimet e tij kushtetuese. Sipas Berishës, parlamenti tashmë duhej të ishte mbledhur. “Pas përfundimit të çështjeve në KQZ, Presidenti duhet të kishte thirrur parlamentin, sepse KQZ dhe gjykata janë tërësisht të pavarura. Gjykatat mund të vazhdojnë punën e tyre për javë ose më gjatë, parlamenti ka patur të gjitha atributet që të mblidhej. Natyrisht, kjo kërkonte edhe një lloj konsensusi politik në mënyrë që parlamenti të mblidhej i plotë, sepse nuk do të ishte në të mirën e vendit me disa brenda dhe disa jashtë. Edhe këtu ka qëndruar një vështirësi morale e Presidentit“, tha Berisha. Deklarata e kreut të PD, se ka më shumë se 81 mandate, vjen vetëm disa ditë pas deklaratës së kryetarit të PAD, Neritan Ceka, për shkëputje nga koalicioni i majtë. Ndërkohë, votën pro vendimeve të rëndësishme në parlament e ka deklaruar përpara disa kohësh edhe kryetari i PDS, Paskal Milo. Kryeministri Sali Berisha Zv/Kryeministri Ilir Rusmali Ministër i Brendshëm Sokol Olldashi Minsitër i Jashtëm Besnik Mustafaj, Jozefina Topalli Ministër i Drejtësisë Jozefina Topalli, Lulzim Basha, Spartak Ngjela Ministër i Financave Ritvan Bode Ministër i Ekonomisë dhe Energjetikës Genc Ruli Ministër i Turizmit dhe Kulturës Edmond Spaho, Precc Zogaj, Majlinda Bregu Ministër i Shëndetësisë Aleksandër Sallabanda, Maks Cikuli Ministër i Punës Thoma Miço Ministër i Mbrojtjes Fatmir Mediu Ministër i Ambientit Lufter Xhuveli Ministër i Arsimit Genc Pollo Ministër i Integrimit Aldo Bumçi, Majlinda Bregu, Edmond Leka, Ministër i Rregullimit të Territorit dhe Transporteve Besnik Aliaj, Bujar Leskaj, Lindita Lati Ministër i Bujqësisë Genc Juka Kryetar i Parlamentit Bamir Topi Të gjenden autorët e rrahjes së Bazes dhe Patozit Partia Demokratike deklaron se dhunimi i gazetarit Mero Baze dhe i deputetit Astrit Patozi ka prapavijë politike. Sipas kryetarit të PD, Berisha, Ministria e Rendit po përpiqet të lehtësojë rrethanat për agresorin e Bazes, Gjolekë Malaj. “Unë kam dënuar me ashpërsinë më të madhe aktin e bandës kriminale që sulmoi egërsisht dy gazetarët, Baze dhe Patozi, por sërish dua të denoncoj përpjekjet që po bëhen për të liruar Gjolekë Malajn. Trillimi dhe mashtrimi i institucioneve, të cilat gjoja e arrestuan në flagrancë, synojnë për ta lehtësuar në këtë mënyrë. Lirimi i dy anëtarëve të kësaj bande nga forcat e rendit janë për qeverinë e ardhshme bashkëlidhje me krimin. Edhe njëherë u kërkoj institucioneve të zbatimit të ligjit të gjejnë dy autorët e tjerë të këtij krimi të shëmtuar, t'i ndalojnë, të gjejnë autorin që donte të hidhte granatën kundër drejtorit të gazetës "Tema", Mero Baze dhe deputetit Patozi, të lënë mënjanë, të mos sillen si segmente të inkriminuara të PS”, tha Berisha. Kryetari i PD u shpreh se qeveria e ardhshme do i konsiderojë bashkëfajtorë në krim të gjithë ato segmente që bënë të mundur lirimin e pjesëtarëve të tjerë të bandës që sulmoi gazetarët, si dhe të gjithë ata që po përpiqen të mundësojnë lirimin nga burgu të Gjolekë Malaj. Demokratët kërkojnë bashkëpunim për luftën kundër korrupsionit Berisha paralajmëron reforma në Prokurori Reforma në sistemin e drejtësisë do të vazhdojë të mbetet prioritare në programin e qeverisë së ardhshme të demokratëve. Kryetari i PD, Berisha, sulmoi dje organin hetues, duke thënë se prokuroria po fle mbi dosjet e krimit, dhe mandati i dhënë nga populli në zgjedhjet e 3 korrikut është pikërisht lufta kundër korrupsionit. “Unë, lidhur me reformën në drejtësi, jam i mendimit se ajo është një nga detyrat më kryesore të kësaj qeverie, por natyrisht kërkon edhe pjesëmarrjen e opozitës dhe Presidentit të Republikës, i cili është njeriu që duhet ta drejtojë këtë reformë, sepse gjyqësori është, duhet të jetë dhe do të vazhdojë të jetë i pavarur nga ekzekutivi. Ne do ta plotësojmë këtë kusht. Nga ana tjetër, ju siguroj se do të përdorim të gjitha mandatet tona, ftoj edhe opozitën që të angazhohet në reformë, të rrisë pavarësinë, por të bëjë përgjegjëse para ligjit këto institucione. Në Shqipëri çështja civile është katastrofale, nuk mund të lejojmë që një çështje civile ta shikojmë si biznes dhe jo si të drejtë. Unë kam besim se do të ketë seriozitet nga të gjitha forcat politike për të bërë këtë reformë. Tani është fakt i njohur që prokuroria ka fjetur dhe fle mbi dosjet e krimit. Reforma në këtë institucion është e domosdoshme. Ka raste shumë flagrante. Mandati ynë është lufta kundër korrupsionit. Ky është leximi që unë i bëj, unë këtë lexoj dhe kësaj do t'i përmbahem në të gjithë mundësitë