24032005

http://pages.albaniaonline.net/rd/

Legalistët përshëndesin qëndrimin e Komisionit të Helsinkit pranë Kongresit Amerikan

Spahia: Zgjedhjet të afrohen në qershor

Partia "Lëvizja e Legalitetit" përshëndeti dje qëndrimin e Komisionit të Helsinkit pranë Kongresit Amerikan, që zgjedhjet parlamentare të kësaj vere në Shqipëri të krahasohen me standartet ndërkombëtare. "Eshtë detyrim i qeverisë për të përgatitur infrastrukturën e duhur zgjedhore dhe zhvilluar zgjedhje të lira e të ndershme. Shqipëria, me zgjedhjet e ardhshme parlamentare, duhet të dalë nga lista e vendeve që nuk zhvillojnë zgjedhje të lira dhe të ndershme", tha Spahia.

Partia "Lëvizja e Legalitetit" dënon represionin më të fundit të klikës socialiste në pushtet, të materializuar përmes vendimit të KKRT për heqjen e liçensës së "Shijak" TV. "Ne gjykojmë se një vendim i tillë nuk drejtohet vetëm kundër "Shijak" TV dhe stafit të tij, por është një atentat i mirëfilltë ndaj fjalës së lirë dhe mendimit opozitar në tërësi. PLL mbështet protestën e stafit të "Shijak" TV, ashtu siç ka denoncuar e dënuar më parë vendimin e KKRT për heqjen e liçencës së këtij televizioni, i cili është i pari televizion privat në Shqipëri.

Në këto momente të vështira për mediat opozitare në përgjithësi, por në veçanti për "Shijak" TV, PLL ndjehet pranë stafit të "Shijak" TV dhe u bën apel organizatave ndërkombëtare që të ngrenë zërin e tyre në mbrojtje të të drejtës së ligjshme të "Shijak" TV, i cili po lufton edhe për lirinë e mediave në Shqipëri", tha Spahia.

Spahia tha se "PLL përmbylli me sukses të plotë një nga fazat e rëndësishme të procesit zgjedhor sikurse është përzgjedhja e kandidaturave. Ky proces ka kaluar nëpërmjet një procedure demokratike dhe mund t'ju themi se kandidatët tanë janë figurat më të kompletuara dhe të spikatura për të konkuruar në mënyrë dinjitoze". PLL-ja i ka vënë në dispozicion LZHK-së kandidaturat e saj për deputetë, duke mbuluar hartën elektorale në të 100 zonat zgjedhore. Sigurisht që këtë të drejtë e kanë të gjitha subjektet e tjera elektorale dhe aktorët brenda LZHK-së, çka do të thotë se Lëvizja për Zhvillim Kombëtar, në vlerësim të vlerave dhe kontributeve, do të kandidojë 100 kandidatët më të përzgjedhur për ta përfaqësuar atë në zgjedhjet e verës 2005.

PLL-ja vazhdon të insistojë, duke iu kërkuar gjithë partive politike, institucioneve që lidhen drejtpërdrejt me procesin zgjedhor, por në mënyrë të veçantë kreut të shtetit, zotit Alfred Moisiu, për dy çështje shumë të rëndësishme për zgjedhjet.

E para, që zgjedhjet parlamentare të zhvillohen brenda muajit qershor dhe e dyta, të ligjërohet e drejta e diasporës dhe emigrantëve shqiptarë për të votuar, në mënyrë që ata të shprehin vullnetin e tyre në mbështetje të forcës politike që parapëlqejnë.