Tiranë, më 24 dhjetor 2005

Komunikatë për mediat

Partia "Lëvizja e Legalitetit", Dega Durrës, organizoi në sallën e Pallatit të Kulturës "Aleksandër Moisiu", një tubim me rastin e 81 vjetorit të "Triumfit të Legalitetit".

Në këtë tubim morën pjesë Naltësia e Tij Princ Leka, drejtuesit më të lartë të PLL  zotërinjtë Ekrem Spahiu, Murat Basha, Artan Tujani, Neritan Kolgjini etj., drejtori i Muzeut Historik Kombëtar historiani i shquar z.Beqir Meta, si dhe legalistë dhe qytetarë të nderuar të qytetit të Durrësit.

Referuesit, z. Beqir Meta, Ekrem Spahiu, Murat Basha, Gjergji Thanasi, evidentuan fakte historike të panjohura më parë, si dhe shtjelluan refleksione politike aktuale të këtij evenimenti të shënuar historik, që shërbeu si gur themelor për ndërtimin e shtetit shqiptar, në një nga periudhat më kritike të ekzitencës së tij.

Pjesëmarrësit i përshëndeti edhe Naltësia e Tij Princi Leka, i cili falenderoi organizatorët, referuesit dhe të pranishmit në këtë tubim, që risolli në kujtesën e shqiptarëve këtë datë historike që mbart dhe përfaqëson vlera të mëdha.

Durrës, më 24 dhjetor 2005

            Fjala e z.Ekrem Spahiu në Durrës, me rastin e 81 vjetorit të Triumfit të   Legalitetit, me temë: Triumfi i Legalitetit - gur themelor në ndërtimin         e shtetit modern shqiptar

        Me lejen Tuaj Princ Leka!

        Të nderuar pjesëmarrës!

        24 Dhjetori i vitit 1924, i pagëzuar me emrin Triumfi i Legalitetit, nuk u përket vetëm legalistëve për ta festuar, por i përket të gjithë shqiptarëve.

        Duke qenë i tillë, këtë tubim duhej ta organizonte një institucion shtetëror, për arsyen se 24 Dhjetori është gur themelor në historinë e shtetit shqiptar.

        Atë që nuk e bëjnë institucionet shtetërore, vazhdojnë ta bëjnë legalistët, jo thjesht se kjo është edhe datë e Legalitetit, por sepse me Triumfin e Legalitetit, filloi edhe epoka zogiste.

        Parafolësit, me faktet dhe argumentat e qarta e të pakundërshtueshme, ndriçuan jo vetëm këtë datë të shënuar, por edhe një periudhë të ndritur historike, e cila fatkeqësisht, për arsye ideologjike të regjimit të kaluar, ka qenë e manipuluar.

Por më shqetësues është fakti që, edhe mbas 15 vjetësh të ndërrimit të sistemit, brezi i ri vazhdon të mësojë, por edhe shqiptarët vazhdojnë të dëgjojnë trillime e fallsifikime flagrante në librat e historisë dhe media.

Një pjesë e autorëve të këtyre teksteve, duke mbetur skllavë të klisheve të kaluara, vazhdojnë edhe sot e kësaj dite të shtrembërojnë të vërtetat historike, por prania e Prof. Dr. Beqir Metës, fjala e tij sot dhe ndryshimi i qeverisjes, na japin shpresë se historia e Shqipërisë do të rishkruhet mbi bazën e të vërtetave dhe fakteve shkencore.

Procesi i rishkrimit përfundimtar të historisë së shqiptarëve, duhet të fillojë, së pari, me hartimin e teksteve të reja shkollore, për të vazhduar më tej me reforma të thella në institucionet e tjera, deri tek Akademia e shkencave.

        Ndonëse kanë kaluar 81 vjet nga 24 Dhjetori i vitit 1924, bazat kushtetuese të institucioneve shtetërore dhe në tërësi ndërtesa institucionale e shtetit të drejtuar nga Ahmet Zogu, fillimisht si kryeministër, më pas si president dhe nga 1 shtatori 1928 si Mbret i Shqiptarëve, edhe sot i qëndrojnë kohës.

        Po rendisim disa momente të rëndësishme dhe konkretisht:

        - Asambleja legjislative ishte me dy dhoma; ajo e deputetëve dhe dhoma e Senatit, model ky që aplikohet sot në vendet me demokracinë më të zhvilluar në botë, si Amerika, Anglia, Italia etj..

        - Legjislacioni i mbështetur mbi përvojat më moderne dhe më të përshtatshme për Shqipërinë, që mundësoi projektimin dhe realizimin e zhvillimit.

Aktualisht, kuadri ligjor i kohës së Mbretërisë mbahet i fshehur nga publiku dhe vidhet paturpësisht nga pseudohartuesit e ligjeve.

        - Përbërja e qeverisë dhe e administratës, bazohej mbi tre kritere: ndershmërinë, aftësinë, përkushtimin, dhe nëpunësit ishin shkolluar në unversitetet më në zë të Perëndimit, si Itali, Francë, Austri, Gjermani etj.. Ky model i kualifikimit dhe rekrutimit të specialistëve të administratës, po synohet të adoptohet sot.

        - Kodi Penal (janar 1928), u hartua sipas modelit italian, që ishte më i miri i asaj kohe në mbarë Europën, dhe u zbatua me sukses nga gjyqtarët e aftë dhe të ndershëm, ndërsa sot, po ky kuadër ligjor, është dëshmuar i dështuar, për shkak të nivelit të lartë të korrupsionit në drejtësi, me suport të qartë politik.

        - Kodi Civil (1 prill 1929), ishte shumë i rëndësishëm, sepse ne vinim nga një shoqëri e prapambetur, ndonëse raportet shoqërore ishin të rregulluara edhe me Kanunin, si kulmi i sendërtimit të së Drejtës zakonore të shqiptarëve në shekuj.

Sot, çëshjet civile kanë mbetur në mëshirën e vullnetit dhe qeses së matrapazëve që shesin drejtësinë, çka ka shkaktuar kaos dhe padrejtësi të panumërta, me pasoja fatale, madje deri në vetgjygjësi.

        - Ligji për Avokatinë (15.qeshor 1931), shënoi për herë të parë mbrojtjen e të drejtave të qytetarëve në raport me ligjin.

Sot, avokatët janë shndërruar në sekserë mes pëfaqësuesve të ligjit dhe qytetarëve që i drejtohen drejtësisë për të zgjidhur hallet.

        - Kodi tregtar (1 prill 1932), rregulloi shkëlqyeshëm raportet midis shtetit dhe subjekteve të tatueshme, duke konsoliduar kapitalizmin, si sistemi më i përkryer i zhvillimit ekonomiko-shoqëor, e që u ngrit mbi rrënojat e feudalizmit të trashëguar.

Sot, Kodi tregtar është mburoja më e mirë e evazionit dhe parajsës fiskale, drejt krijimit të monopoleve me ngjyra politike, çka ka shkatërruar konkurrencën dhe tregun e lirë.

        - Ligji për ndalimin e mbulimit të fytyrës, ishte masa kryesore për emancipimin e femrave dhe integrimin dinjitoz të tyre në shoqëri, drejt zhdukjes së pabarazisë midis gjinive.

Ndërsa sot, morali shoqëror është tronditur thellë për shkak të abuzimit me lirinë, duke shkuar drejt rrënimit. (Heqjen  ferexhesë, Franca dhe Italia po kërkojnë ta bëjnë sot).

        - Kuadri ligjor për Urbanistikën dhe rregullimin e territorit, ishte i bazuar në përvojat më të mira ndërkombëtare dhe në studime afatgjata. Ai model dhe ato përvoja, edhe sot mbeten të paarritshme, sikurse janë masterplanet e asaj kohe, ndërtimet madhështore si godinat e Ministrive, Bulevardet e Tiranës, Shkodrës dhe objekte të tjera, me të cilat krenohemi.

Sot kemi një masakër urbane, që i paraprin kaosit urbanistik dhe shpërfytyrimit të territorit, me pasoja që po i vuajmë të gjithë dhe që po thellohen dita-ditës. Në atë kohë, edhe një fasadë të avllisë nuk mund ta lyeje pa lejen dhe ngyrën e miratuar nga bashkitë dhe komunat, e jo më të ndodhnin përplasje të qeverisë me pushtetin vendor sikundër sot, e për zgjidhjen e të cilave angazhohet deri edhe komuniteti ndërkombëtar.

        - Përveç lidhjes së qendrave të banuara me rrugë, që sot përbëjnë 90 % të fondit të përgjithshëm të rrugëve - zhvillim të shpejtë mori edhe komunikacioni ajror civil, me aeroporte në Tiranë, Shkodër, Korçë, Vlorë, Gjirokastër, Kuçovë, Kukës dhe Peshkopi.

Ndërsa sot, në vitin 2005, transporti ajror civil brenda territorit të vendit, as që ekziston.

        - E drejta e pronësisë ishte e garantuar jo vetëm me ligj, por edhe në praktikë. Hipoteka dhe kadastra ishin të përkryera në funksionimin e tyre dhe saktësinë e pasqyrimit të kufijve të pronësisë.

Sot, shqiptarët nuk dinë ku i kanë pronat dhe kufijtë, dhe dokumentacioni i pronësisë është shumë difektoz.

Saktësinë e atij sistemi regjistrimi, e konfirmoi para pak ditëve edhe kryeministri aktual z.Berisha, i cili deklaroi se pikë referimi për qartësimin e pronësisë, do të mbetet dokumentacioni i kohës së Mbretërisë.

        - Rendi, siguria e jetës dhe e pronës, mbroheshin nga shteti nëpërmjet armës së Xhandarmërisë.

Ndërsa sot, gjëja më e pavlerë është jeta, e cila ndihet e kërcënuar në çdo moment nga krimi ordiner dhe ai i organizuar.

- Arritjet e sipërshënuara të epokës së Mbretërisë,nën drejtimin e Mbretit Zog I, janë shtyllat monumentale të qytetërimit dhe shtet-formimit shqiptar, por ajo epokë është skalitur në kujtesën e shqiptarëve për Kushtetutën, pashaportën dhe monedhën, me të cilat shqiptarët e asaj kohe ishin realisht të integruar në Europë, si qytetarë dinjitozë.

Ndërsa sot, jo vetëm që vazhdojmë të mbetemi të izoluar e jashtë Europës, por integrimi është shndërruar në demagogji të plotë dhe objektivin më të vështirë të klasës politike.

   Të nderuar pjesëmarrës,

Kremtimi i Triumfit të Legalitetit dhe i epokës që pasoi, shërben si pikë referimi dhe model zhvillimi me vlera të pakrahasueshme e të denja për t'u ndjekur, nëse duam të realizojmë ëndrrat dhe vizionin tonë të zhvillimit, bashkimit kombëtar dhe integrimit euro-atlantik.

JU FALEMINDERIT!