26102005

çeshtja e pronave

qeveria

Bllokohen privatizimet dhe dhëniet e pronës me qira. Shkak, ligji për kthimin dhe kompensimin e pronës

Qeveria: Jo shitje të pronës së shtetit

Genc Ruli: Nuk mund të bëhen veprime për tjetërsimin e pronës

Anila Basha

Qeveria shqiptare ka marrë vendim që në zbatim të ligjit për kthimin dhe kompensimin e pronës, të mos ndërmerret asnjë veprim me pronën shtetërore.

Vendimi konfirmohet edhe nga ministri i Ekonomisë, Energjetikës dhe Industrisë, Genc Ruli. Shkak për marrjen e një vendimi të tillë, përveç detyrimit obligues të ligjit, është edhe gjetja e mundësive për kompensimin, qoftë në terren apo edhe në para të ish-pronarëve që presin kompensimin.
Por për ministrin Ruli, një gjë e tillë nuk është e thjeshtë. “Po është e vërtetë. Eshtë lëshuar një urdhër për të mos dhënë në asnjë lloj forme pasurinë shtetërore deri në zgjidhjen e këtyre problemeve”, thotë ministri i Ekonomisë. Por problemi qëndron diku gjetkë: pavarësisht se vitin e kaluar është marrë vendimi për të mos bërë asnjë privatizim apo dhënie me qira të pronës shtetërore, ka një kontradiktë mes ligjit të pronës dhe ligjeve të tjera që kanë të bëjnë me përdorimin e kësaj prone.
“Eshtë marrë vendim për të mos bërë tjetërsim të pronës shtetërore deri në marrjen e një vendimi përfundimtar sesi do të rregullohet kjo çështje. Ligji për pronën e ndalon një gjë të tillë. Por ka edhe ligje të tjera me të cilat ky ligj bie ndesh”, thotë Ruli.

Kontradikta
Ligji për pronën shkon në kundërshtim me angazhimet qeveritare për mosndalim të procesit të privatizimit në vend për pasurinë shtetërore, një detyrim ndaj organizatave ndërkombëtare financiare. Problemi qëndron në rregullimin ligjor që duhet të ndodhë mes këtij ligji dhe gjithë veprimeve të tjera. Për ministrin Ruli ende nuk ka një koordinim për këtë problem, pavarësisht se çështja është marrë seriozisht nga qeveria shqiptare, edhe në angazhimet e saj me Bashkimin Evropian.

Hetimi
“Nuk është dhënë asnjë urdhër për të hetuar mënyrën sesi është dhënë prona shtetërore pas daljes së këtij ligji nga qeveria socialiste”, thotë Genc Ruli për “Panoramën”. Por ndërkohë, Ilir Rusmajli, në negociatat që janë bërë mes Shqipërisë dhe BE në fillim të këtij muaji ka deklaruar se do të hetohet për dhënien e pronës shtetërore. Negociatorët evropianë janë interesuar më shumë lidhur me mënyrën sesi do të procedohet me investitorët e huaj që kanë hedhur paratë e tyre, duke qenë se këto kanë qenë veprime të ligjshme të qeverive të mëparshme. “Unë nuk them se nuk do të ketë kontroll. Gjithçka do të shikohet rast pas rasti, por nuk ka ndonjë grup pune që po punon për këtë çështje”, shprehet Ruli për “Panoramën”.

Kundërshtimi
Shoqata Pronësi me Drejtësi ka ngritur shpeshherë zërin lidhur me vendimet e qeverisë dhe kërkon një angazhim të plotë të qeverisë për zbardhjen e dhënies së pronës shtetërore në kundërshtim me ligjin e pronave. Për këtë, ata kanë vënë në lëvizje edhe Komitetin Shtetëror për Kthimin dhe Kompensimin e Pronës, i cili e ka dërguar shqetësimin e tij pranë qeverisë gjatë dorëzimit të programit 100 ditor të punës. E pavarësisht këtij fakti, deri tani, nuk do të ketë asnjë ndërmarrje të tillë. Qeveria demokrate nuk do të “anulojë” asnjë vendim të qeverisë së mëparshme që ka të bëjë me këtë çështje.

VKM 18.03.05
Komiteti i Pronave thotë se qeveria ka shkelur ligjin e pronave me vendimin, sipas të cilit “pasuritë e ndërmarrjeve të dhëna me kontratë emfiteoze i shiten në mënyrë të drejtpërdrejtë emfiteozemarrësit kur ai ka realizuar investimin”.
VKM 31.05.05
Komiteti i Pronave thotë se qeveria “Nano” ka shkelur ligjin me vendimin numër 373 për dhënie toke në përdorim 577 familjeve fshatarë, banorë të ish-ndërmarrjes bujqësore Ksamil, si në kundërshtim me ligjin e pronave.
Shitjet
Komiteti i Pronave pretendon se shitjet që ka bërë AKP apo edhe Ministria e Ekonomisë dhe Privatizimit janë bërë pa respektuar të drejtën e parablerjes për subjektet e shpronësuara etj. Këtu parashikohen edhe dhënia me koncesion apo qira.

Zv.kryeministri: Nuk ka asnjë urdhër për të parë pronën shtetërore

Rusmajli: Nuk merrem unë me pronat në qeveri
“S’ka vendim për hetim të pronës shtetërore”

“Nuk ka asnjë vendim qeverie që të merret me hetimin e dhënies së pronës shtetërore me qira, apo shitjen e objekteve që kanë qenë në proces privatizimi”. Kjo ka qenë përgjigjia e prerë ditën e djeshme e zëvendëskryeministrit Ilir Rusmajli për “Panoramën”. Vetë Rusmajli thotë se nuk është angazhuar me këtë problem. “Nuk merrem unë me këtë çështje. Janë institucione të tjera ato që janë kompetente dhe kanë kompetencë privatizimin e pronës publike”, tha Rusmajli, duke referuar për Agjencinë Kombëtare të Privatizimit. Por ka qenë një tjetër reagim i zv.kryeministrit Ilir Rusmajli kur çështja e pronës është diskutuar me negociatorët e Bashkimit Evropian. Vetë zv.kryeministri ka raportuar për situatën për pronën në vendin tonë. Gjatë atyre negociatave Rusmajli ka deklaruar se “toka shtetërore është shitur në masë” duke akuzuar socialistët. Por pavarësisht nga kjo deklaratë e Rusmajlit, përfaqësuesit e BE-së kanë qenë më shumë të interesuar se cilat janë hapat që do të ndërmarrë qeveria e re. Dhe vetë Rusmajli ka garantuar se ky proces do të bllokohet, derisa të gjendet një zgjidhje. Për numrin dy të qeverisë shqiptare, kjo çështje do të shikohet me përparësi edhe nga ana e qeverisë së drejtuar nga Berisha. Ndërkaq, negociatorët evropianë, duke u nisur nga deklaratat e zyrtarëve shqiptarë për verifikimin rast pas rasti dhe marrjen në konsideratë edhe të masave, kanë kërkuar të dinë se cilat janë planet e qeverisë lidhur me investimet që janë kryer në zonat ku janë bërë privatizime apo dhënie të pronës me qira, dhe sidomos kur si investitorë janë prezantuar edhe organizata apo banka të huaja shumë prestigjioze. Një gjë e tillë ka mbetur pa përgjigje nga ana e qeverisë aktuale.

Shoqata e Ndërtuesve ankohet te kryeministri për problematikën në fushën e ndërtimit

Ndërtuesit: Këtë javë takojmë Berishën
Shkëlqim Bumçi: Shtesat pa leje, do të kërkojmë tarifat tona

Shoqata e Ndërtuesve do të takohet këtë javë me kryetarin e qeverisë, Sali Berisha, për të diskutuar problemet në fushën e ndërtimit.

Këtë e pohon për “Panoramën”, drejtori Ekzekutiv i Shoqatës së Ndërtuesve, Shkëlqim Bumçi. Ai tha dje se këtë javë, ende nuk është përcaktuar dita, do të takohet me kryeministrin për të diskutuar lidhur me problematikën në fushën e ndërtimit, ku një nga çështjet që do të diskutohen ka të bëjë edhe me legalizimin e shtesave pa leje në ndërtime.
“Eshtë planifikuar një takim dhe ne do të ngremë aty problemet tona. Një nga këto probleme është edhe ai që ka të bëjë me legalizimin e shtesave pa leje në ndërtime”, tha dje për “Panoramën” Bumçi. Të gjitha detajet e kërkesave të tyre, ndërtuesit i kanë shprehur në letrën që së bashku me Avokatin e Popullit kanë dërguar në disa institucione, duke përfshirë ministrin e Financave, Ritvan Bode, ministrin e Punëve Publike, Transportit e Telekomunikacionit, Lulzim Basha, ministrit të Drejtësisë, Aldo Bumçi, dhe për dijeni, vetë kryeministrit Sali Berisha. Sipas sqarimeve të dhëna në këtë rekomandim bëhet fjalë edhe për ndryshimin e tarifave në ligj.

Kërkesat
Ndërtuesit të mbështetur edhe nga Avokati i Popullit kërkojnë që të ndryshojë ligji për “Legalizimin e shtesave në ndërtime”. Sipas tyre, ligji, afati i të cilit ka skaduar që në gushtin e vitit të kaluar, në variantin e paraqitur nuk dha rezultat. Ndaj për këtë, ndërtuesit u janë kthyer tarifave të tyre të mëparshme. Sipas tyre, për sipërfaqet e banimit shtesë të paguhet 4 për qind e vlerës së investimit të sipërfaqes tej lejes së miratuar të ndërtimit. Për sipërfaqet e ndërtimit për qëllime jo banimi (dyqane, bare, restorante etj) të paguhet 10 për qind e vlerës së investimit të sipërfaqes tej lejes së miratuar të ndërtimit. Dhe për sipërfaqet e miratuara si për vend parkimi, 20 për qind të vlerës së ndërtimit të kësaj sipërfaqeje, nëse përdoret për qëllime të tjera. Një tjetër kërkesë e tyre ka të bëjë me faktin se nëse zyrat urbanistike nuk japin asnjë përgjigje brenda 90 ditëve, legalizimi të quhet i kryer automatikisht.

Mbështetja
Ndërtuesit presin mbështetje nga kryeministri Berisha, sepse një gjë të tillë e kanë marrë kur Berisha ishte në opozitë. Gjatë miratimit të ligjit të kaluar në Kuvend, ish-lideri i opozitës në atë kohë doli në krah të ndërtuesve, duke mbrojtur tarifat e dhëna prej tyre dhe duke mos e votuar ligjin e socialistëve. a.b

kërkesat

4%- Tarifa për t’u paguar për shtesat e përdorura për banim, pa lejen e bashkisë
10%- Tarifa për t’u paguar për shtesat e përdorura për dyqane, pa lejen e bashkisë
20%- Tarifa për t’u paguar për shtesat e përdorura për garazhe, kur këto kanë ndryshuar destinacion

Projekti paraprak i Bashës u kundërshtua nga këshilltari i Berishës

Legalizimet, qeveria harron ligjin
Mungesë koordinimi mes ministrisë dhe Kryeministrisë

Ligji për legalizimin e zonave informale ka mbetur në “sirtarin” e qeverisë. Edhe pse rreth dy javë më parë ministri i Punëve Publike, Transportit dhe Telekomunikacionit deklaroi se ligji ka përfunduar dhe është në zyrën e kryeministrit, menjëherë fakti u përgënjeshtrua nga këshilltari i kryeministrit për Urbanistikën, Besnik Aliaj. Gjithçka ka kaluar në konfuzion, por duket se nuk ka asgjë të vërtetë në legalizimin e zonave informale. Projekti i hartuar vetëm sa ndryshonte tarifat që duhet të paguheshin për legalizimin duke i variuar ato nga 100 mijë lekë të reja në 400 mijë. Askush nga qeveria nuk jep ndonjë argument të saktë se kur pritet të përfundojë ligji dhe cilat janë ndryshimet e tjera që do të duhet të bëhen në të përpos ndryshimit të tarifave. Në projektin e ekspozuar nga ministri Basha, ishte vendosur që zonat informale të “shtetëzoheshin” dhe nuk do të merrej në konsideratë ajo kategori që e kishte zgjidhur problemin e pronësisë me pronarin e vërtetë. Kjo u evidentua nga socialistët që bënë menjëherë oponencën, duke shkaktuar edhe reagimin e këshilltarit Aliaj: ligji nuk ka marrë formën e tij të plotë, tha ai. Kanë kaluar tashmë dy muaj dhe ende projektligji endet sa në zyrat e Ministrisë së Punëve Publike e Kryeministri, pa mbërritur ende në qeveri e Parlament. Ndërkohë që pritet që në Kuvend të bëhet edhe oponenca. Legalizimi i zonave informale ishte një ndër premtimet e 100 ditëve që mori përsipër të bëjë qeveria “Berisha”. Madje për këtë, më parë ishte përgatitur edhe një platformë e Komitetit të Orientimit të Politikave. E pavarësisht nga ky fakt, deri tani, nuk ka asnjë plotësim apo ndryshim në këtë ligj.

100 mije
Kaq do të jetë tarifa që do të paguajnë në bazë të ligjit të ri të gjithë ata që kanë zaptuar rreth 300 metra katror tokë për të ndërtuar shtëpitë e tyre në zonat informale
200 mije
Kaq do të paguajnë të gjithë ata që kanë zaptuar nga 400 metra tokë në zonat informale për legalizimin e shtëpive të tyre dhe marrjen e një pronësie mbi godinën e truallin
400 mije
Kjo është shifra maksimale që do të paguhet nga të gjithë ata që kanë marrë rreth 500 metra truall për legalizimin e banesës. Ata që kanë marrë më shumë, do të paguajnë me çmimet e tregut

Sinaj: Parate me short
Sokrat Sinaj deklaroi se në fund të nëntorit dhe në fillim të dhjetorit do të hidhet shorti publik për shpërndarjen e 2 milionë dollarëve që qeveria ka vënë në dispozicion për të gjithë ish-pronarët në vlerë monetare. Dje në mbrëmje ai tha për “Panoramën” se fillimisht do të duhet të bëhet harta për Tiranën dhe pas kësaj do të fillojë procesi i kthimit të parave. Këto para duhet detyrimisht të kthehen brenda këtij viti, sepse në të kundërt, nuk do të ketë asnjë mundësi për fondet, të cilat digjen dhe kalojnë sërish në buxhetin e shtetit. Komiteti Shtetëror për Kthimin dhe Kompensimin e Pronës ka deklaruar se procedura e hedhjes së shortit do të jetë transparente dhe
në qendër të Tiranës.

Ndertuesit: Ne te Berisha
Ndërtuesit kërkojnë që Berisha të mbajë fjalën për të legalizuar të gjitha shtesat pa leje në ndërtime në bazë të tarifave që ata kanë propozuar dhe që janë marrë në konsideratë nga lideri demokrat përpara se të zhvilloheshin zgjedhjet e përgjithshme parlamentare. Në kohën kur ligji diskutohej në Kuvend, Berisha zhvilloi një takim me ndërtuesit dhe u premtoi atyre se do t’i mbështeste, dhe do të thoshte fjalën e tij në Parlament. Berisha e tregoi një gjë të tillë kur në Kuvend foli me fjalët e ndërtuesve dhe kërkoi të vendoseshin përqindjet e propozuara prej tyre. Tani me ardhjen e tij në pushtet, ndërtuesit kërkojnë që Berisha
të mbajë fjalën e dhënë.

Legalizimet, “skadojnë” afatet
Po përfundojnë 100 ditët e para të qeverisjes “Berisha” dhe një ndër premtimet kryesore që ai bëri, legalizimi i zonave informale, po mbetet pa u zbatuar. Një projekt është hartuar nga Ministria e Punëve Publike, Transportit dhe Telekomunikacionit, por ende nuk ka marrë viston e shefit të qeverisë. Ka qenë vetë këshilltari i Berishës, Besnik Aliaj, që ka kundërshtuar projektin e bërë publik nga Lulzim Basha, duke e shtuar e plotësuar edhe me disa nga vërejtjet kryesore të bëra nga opozita. Por këto mbetën në kuadrin e deklaratave dhe deri tani nuk është hedhur asgjë në letër, që më pas projekti të kthehet në ligj. Të gjithë ata që banojnë në zonat informale, do të duhet të presin edhe shumë muaj, për të paguar vetëm 100-400 mijë lekë për shtëpitë e tyre.

LE MINISTRE MUSTAFAJ CONFIRME LA VOLONTE DU GOUVERNEMENT ALBANAIS POUR LA REALISATION DES OBLIGATIONS POUR L'INTEGRATION A L'UE

     TIRANE, 11 octobre /ATA/.- Le ministre des Affaires Etrangères, Besnik Mustafaj, a participé aujourd'hui à l'entretien des ministres des Affaires Etrangères du Partnership régional et des Balkans ouest , tenu à Budapest (Hongrie), fait état le bureau de presse de ce ministère.
     Dans son discours M. Mustafaj a confirmé la volonté politique et institutionnelle du gouvernement albanais "pour réaliser les obligations découlant du nouveau stade des relations avec l'Union Européenne et l'accord de la stabilisation et de l'association ".
     Le ministre Mustafaj a demandé aux pays participant à l'entretien et aux pays membres de l'UE "de contribuer pour la conclusion des négociations pour l'accord de la stabilisation et de l'association et le début des procédures de sa signature ". "Nous demandons ce soutien en la considérant comme un acte nous aidons d'entamer l'application de l'accord, ce qui est un motif de plus pour la réalisation des réformes réussies"  , a-t-il ajouté .
     Quant au statut de la Kosove il a dit que "la meilleure solution serait une indépendance conditionnée selon les actes et les pratiques internationales, observée par la communauté internationale, pour garantir l'édification d'un Etat de droit, démocratique "./m.d/klod/rimi/LS/

11/10/2005 http://www.shekulli.com.al/

Ministri i Jashtëm shprehet se duhet ndryshuar ligji ”Për shërbimin e jashtëm”

Mustafaj: Reformë strukturore në MPJ

“Qeveria e re nuk kërkon ngushtimin e statusit të pranisë së OSBE-së në Tiranë”

A.Rama

TIRANË - Institucioni qendror i diplomacisë shqiptare do t’i nënshtrohet një reforme strukturore në të gjitha drejtoritë e saj. Ministri i Punëve të Jashtme, Besnik Mustafaj, tha dje gjatë konferencës “Politika e jashtme e Shqipërisë në vizionin e qeverisë re”, se kjo reformë nuk ka të bëjë me largimin e njerëzve nga puna, por me ristrukturimin e të gjitha strukturave ekzistuese të kësaj minstrie. Ai shtoi se ky proces reforimi në MPJ është i domosdoshëm në kushtet, kur duhet të forcohet diplomacia ekonomike me qëllim që të tërhiqen sa më shumë investime të huaja drejt vendi. “Për t’ia arritur këtij qëllimi, në drejtimin e ekipit diplomatik të Shqipërisë paraqitet nevoja e një reforme të madhe strukturore brenda MPJ-së dhe trupit diplomatik, në mënyrë që trupi diplomatik me veprimin e tij të mund t’i përshtatet këtij qëllimi që ka qeveria dhe kësaj nevoje që ka Shqipëria për thithjen e investimeve të huaja. Reforma strukturore që unë synoj të kryej brenda MPJ-së do të jetë një reformë që nuk ka të bëjë më largime njerëzish, por ka të bëjë më rikompozim të strukturave ekzistuese të kësaj ministrie, për t’ja përshtatur këto struktura sa më mirë qëllimeve që ka qeveria në politikën e jashtme dhe në politikën e brendshme njëkohësisht”,- tha Mustafaj. Nga ana tjetër, ai u shpreh qartë se ishte i nevojshëm amendimi i ligjit “Për shërbimin e jashtëm”, me qëllim që aty të përcaktohet se punonjësit që do të punojnë në drejtoritë e marrëdhënieve me jashtë në të gjitha ministritë, duhet të kenë status diplomati. Sipas shefit të diplomacisë, kjo nismë ligjore duhej ndërmarrë me qëllim që këto drejtori Ministria e Punëve të Jashtme dhe qeveria të kenë një veprim diplomatik unik. “Të gjitha ministritë kanë marrëdhënie me jashtë, të gjitha ministritë kanë projekte qoftë me vendet mike, qoftë me organizatat ndërkombëtare, por mungon një kohezion i këtij veprimi, mungon shkëmbimi i informacionit në mënyrë të vazhdueshme dhe profesionale. Për këtë gjë kam siguruar mirëkuptimin e kryeministrit dhe të qeverisë, që të bëjmë një amendim të ligjit për Shërbimin e Jashtëm, në mënyrë që shumë shpejt në konkursin e afërt që do kryejë Ministria e Jashtme për rekrutim për vendet bosh, të gjitha departamentet e jashtme te ministrive të kenë diplomatë”,- vërejti Mustafaj. Ministri Mustafaj tha se puna e qeverisë do të jetë e hapur për monitorim të ngushtë nga komuniteti ndërkombëtar, duke shtuar se qeveria e re nuk kërkon ngushtimin e statusit të pranisë së OSBE-së në Tiranë. Një ndër çështjet që Mustafaj trajtoi dje në fjalën e tij ishte edhe ajo për të realizuar sa më shpejt regjistrimin e të gjithë emigrantëve shqiptarë të ligjshëm në vendet ku ata jetojnë.

http://www.panorama.com.al/ 11/10/2005

Kryeministri Berisha prezanton gjithë zëvendësministrat. Mungojnë dy prej tyre

Diplomacia pa 2 zëvendësministra
Sot Suzana Turku merr detyrën e zëvendëses së Bujar Leskajt

Dy zëvendësit e Besnik Mustafajt nuk janë emëruar akoma në detyrë. Madje, ata nuk janë përzgjedhur ende nga kryeministri Sali Berisha.

Kjo u bë e qartë edhe gjatë prezantimit të djeshëm që kryeministri Berisha u bëri zëvendësministrave të të gjitha dikastereve. Ka shumë kandidatura që janë ofruar tek kryeministri për postin e zv.ministrit të Jashtëm, por edhe vetë Berisha po tregohet i kujdesshëm për përzgjedhjen e tyre. Në mbledhjen e sotme të qeverisë pritet që kryeministri Berisha të emërojë në postin e zv.ministrit të Turizmit dhe Kulturës Suzana Turkun. Ish-dirigjentja e korit Pax Day me një aktivitet shumë të ngjeshur koncertual brenda vendit dhe jashtë, tashmë do të ngjitet në një detyrë ekzekutive politike, si zëvendësministre e Kulturës, në Ministrinë e Turizmit dhe Kulturës. Me emërimin e Zana Turkut në këtë detyrë, Berishës do t’i mbeten vetëm zëvendësministrat e Jashtëm. Dhe pas kësaj, shefi i qeverisë do të duhet të emërojë prefektët, për të filluar emërimin e drejtorëve të rinj të përgjithshëm. Pas lirimit nga detyra të ish-drejtorit të Doganave, Tatimeve, Rrugëve, Policisë Ndërtimore, drejtorit të Hipotekave, Arkivave etj, dje u lirua nga detyra edhe drejtori i përgjithshëm i Burgjeve. Po bëhen kështu ndryshimet e drejtorëve të përgjithshëm në administratë. An.Ba

Faqe 16 - Koment

Diplomacia përballë reformave

Besnik Mustafaj

Koalicioni qeverisës i fitoi zgjedhjet, duke u mbështetur në tri premtimet e mëdha që u bëri shqiptarëve; lufta kundër korrupsionit, lufta kundër krimit të organizuar si dhe kryerja e reformave të nevojshme për afrimin e Shqipërisë me Brukselin, qoftë në kuptimin e Bashkimit Evropian, qoftë edhe në kuptimin e NATO-s. E përmend këtë fakt, për të theksuar se në konceptin tim gjatë kohës që do të jem në krye të diplomacisë, politika e jashtme do të shihet tërësisht e varur nga politika e brendshme dhe do të jetë plotësisht në shërbim të politikës së brendshme. Pra, unë jam i bindur se imazhi i Shqipërisë jashtë dhe çështjet që lidhen me këtë imazh, nuk janë çështje retorike, nuk janë çështje stili paraqitjeje, por në thelb janë refleks i atyre problemeve që ka realiteti brenda.
Gjuha me partnerët ndërkombëtarë
Transparenca e plotë me partnerët tanë ndërkombëtarë, vendet mike, apo edhe organizatat ndërkombëtare. Gjuha e komunikimit tonë me partnerët ndërkombëtarë do të jetë gjuha e sinqeritetit, një gjuhë e hapur, e cila presupozon mirëbesimin paraprak që ne kemi me të gjitha vendet për të cilat po flasim. Eshtë një fat i madh për diplomacinë shqiptare që në këtë moment nuk kemi asnjë vend armik, pra, nisja mbi një bazë të tillë kur nuk ke vende armike do të thotë që gjithë veprimi pozitivohet më lehtë dhe evitohen tensionet që nënkupton ekzistenca e armiqve.
Monitorimi
Ne do të jemi tërësisht të hapur për monitorim të afërt, të ngushtë nga komuniteti ndërkombëtar, nga vendet mike, nga organizatat në të cilat ne bëjmë pjesë. Shembullin e parë e kemi dhënë që në ditët e para të krijimit të qeverisë, kur i dhamë garanci OSBE-së se nuk kërkojmë ngushtimin e statusit dhe mandatit të saj në Shqipëri dhe as devijimin e këtij mandati, gjë për të cilën kishte filluar të flitej vitet e fundit nga qeveritë para-ardhëse.
Ne mendojmë se monitorimi nga OSBE, nga Bashkimi Evropian (natyrisht për arsye të pashmangshme të vetë procesit në të cilin gjendet Shqipëria), nga NATO dhe të gjitha organizatat e tjera ku Shqipëria bën pjesë, po ashtu monitorimi nga vendet mike nëpërmjet prezencës së misioneve diplomatike në Shqipëri është vetëm në dobi të Shqipërisë.
Reforma për diplomacinë ekonomike
Në veprimtarinë tonë diplomatike, ne do të nisemi vazhdimisht nga kërkesa pa komplekse e ndihmës teknike, që do të thotë se ne kërkojmë nga miqtë një dialog intensiv për angazhimet tona në planin e brendshëm. Kjo ndihmë nga miqtë tanë euroatlantikë konsiston në dy aspekte; qoftë në identifikimin sa më të saktë të të gjitha problemeve që ka vendi, po ashtu edhe në gjetjen e përbashkët të zgjidhjeve për këto probleme. Aspekti tjetër, që unë do të doja të vija në dukje ka të bëjë me atë çka u theksua edhe në programin e qeverisë tonë, pra me diplomacinë ekonomike. Unë jam i bindur se Shqipëria ka nevojë urgjente për investime të huaja. Në të njëjtën kohë Shqipëria ka resurset e nevojshme për të thithur investime të huaja si dhe kapacitetet njerëzore për administrimin dhe rentabilizimin e këtyre investimeve. Për t’ia arritur këtij qëllimi, në drejtimin e ekipit diplomatik të Shqipërisë më paraqitet nevoja e një reforme të madhe strukturore brenda MPJ dhe Trupit Diplomatik, në mënyrë që Trupi Diplomatik me veprimin e tij të mund t’i përshtatet këtij qëllimi që ka qeveria shqiptare dhe kësaj nevoje që ka vendi ynë për thithjen e investimeve të huaja.
Sot, për shembull, në Ministrinë e Jashtme është një drejtori ekonomike, e cila ka vetëm dy punonjës, dy diplomatë. Eshtë krejtësisht jorealiste që të pritet nga kjo strukturë përmbushja e një objektivi të tillë, që ne e synojmë.
Pra, reforma strukturore, që unë synoj të kryej brenda Ministrisë së Jashtme do të jetë një reformë që nuk ka të bëjë me largime njerëzish, por ka të bëjë më rikompozimin e strukturave ekzistuese të kësaj ministrie, për t’ua përshtatur ato sa më mirë qëllimeve që ka qeveria në politikën e jashtme dhe në politikën e brendshme njëkohësisht.
Unifikimi i marrëdhënieve me jashtë
Në të njëjtën kohë shoh nevojën e një veprimi unik të qeverisë në diplomaci. Aktualisht konstatimi im është se qeveria nuk vepron në mënyrë unike, kjo më tepër për arsye teknike dhe jo për arsye koncepti. Kështu, në departamentet e jashtme që kanë ministritë e ndryshme punojnë njerëz që nuk janë në profesionin e tyre. Këto zyra nuk janë konceptuar si zyra diplomatike, që duhet të veprojnë me profesionalizmin që kanë diplomatët e vërtetë, por në shumë raste departamentet e jashtme të ministrive janë katandisur në zyra ku bëhen nota për viza dhe asgjë më shumë. Qëllimi im, në këtë rast është që me ekipin e Ministrisë së Jashtme të vihemi në shërbim të kryeministrit dhe të qeverisë, në mënyrë që e gjithë qeveria të zhvillojë një veprim diplomatik unik. Të gjitha ministritë kanë marrëdhënie me jashtë, të gjitha ministritë kanë projekte qoftë me vendet mike, qoftë me organizatat ndërkombëtare, por mungon një kohezion i këtij veprimi, mungon shkëmbimi i informacionit në mënyrë të vazhdueshme dhe profesionale. Për këtë gjë kam siguruar mirëkuptimin e kryeministrit dhe të qeverisë, që të bëjmë një amendim të ligjit për shërbimin e jashtëm, në mënyrë që shumë shpejt, në konkursin e afërt që do kryejë Ministria e Jashtme për rekrutimin e vendeve bosh, të gjitha departamentet e jashtme të ministrive të kenë diplomatë. Kjo praktikë që do të ndiqet nuk është një shpikje e jona. Shumica e vendeve e kanë një praktikë të tillë, kur diplomatët dhe punonjësit e sektorëve të jashtëm të ministrive janë diplomatë, të cilët u nënshtrohen tërësisht ligjeve të karrierës dhe rritjeve në grada, por për një periudhë dy deri në tre vjet detashohen, shkëputen nga Ministria e Jashtme për të punuar në një ministri tjetër dhe pas një periudhe rikthehen përsëri në shërbimin diplomatik.
Pika e tretë e mënyrës se si ne mendojmë të zhvillojmë diplomacinë ekonomike qëndron te mobilizimi dhe angazhimi i organizatave të tjera joqeveritare ose profesionale si Dhoma e Tregtisë, Dhoma e Avokatëve, Dhoma e Noterëve etj. Shqipëria ka një Trup Diplomatik shumë të vogël, (sa për një krahasim ne kemi një trup diplomatik 8 herë numerikisht më të vogël se Kroacia, ndërsa diferenca e popullsisë ose e përmasave të vendit nuk është shumë e madhe). E bëj këtë krahasim për të theksuar se kjo trupë e vogël diplomatike, pavarësisht angazhimit të saj dhe profesionalizmit, nuk do të mund ta përmbushë e vetme misionin që i kërkohet në programin e qeverisë, në qoftë se nuk mobilizon edhe resurset e tjera të të gjitha strukturave qeveritare dhe joqeveritare, të cilat, e theksoj, kanë kontakte me jashtë dhe që kanë karakter ekonomik.
Aksioni diplomatik në organizatat ndërkombëtare
Një aspekt tjetër ku do të përqendrohet veprimi diplomatik i Shqipërisë në ketë periudhë ka të bëjë me rritjen e rolit të Shqipërisë në organizatat ndërkombëtare. Ne jemi një vend anëtar me të drejta të plota në një numër të madh organizatash ndërkombëtare, që nga Organizata e Kombeve të bashkuara deri tek Këshilli i Evropës. Ky është fryt i një punë të kryer gjatë gjithë shekullit XX, pavarësisht nga regjimet dhe qeveritë që kanë kaluar, por tashmë ne gjendemi para nevojës që Shqipëria ta shfrytëzojë realisht hapësirën që ka si anëtare me të drejta të plota në këto organizata, në mënyrë që të dalë nga pasiviteti me të cilin sillet në shumicën e këtyre organizatave.
Së pari, Shqipëria nuk është vetëm për të votuar. Shqipëria duhet të tregojë seriozitetin e vet si shtet, duke marrë pjesë edhe në debatin e përgjithshëm që preokupon planetin tonë, debat që ka të bëjë qoftë me reformat e këtyre strukturave, qoftë me luftën kundër terrorizmit, qoftë edhe me qarkullimin global të vlerave dhe mallrave në nivel planetar.
Së dyti, Shqipëria duhet të dalë nga qëndrimi ankues dhe vetëm për të qarë hallin e vet në këto organizata të mëdha duke ndërthurur problematikën e vet kombëtare dhe paraqitjen e kësaj problematike në këto organizata me vetëdhënien e mendimeve për të gjitha problemet, për të cilat Shqipëria do të votojë.
Së treti, ka me qindra konventa, ku Shqipëria është anëtare me të drejta të plota, të cilat kanë mundësi që t‘i sigurojnë Shqipërisë pjesëmarrjen në projekte shumëpalëshe, pra t’i sigurojnë vendit tonë mundësinë e bashkëpunimit në terren me vende të tjera.
Objektivat integruese
Objektivat tanë kryesorë në politikën e jashtme kanë të bëjnë me avancimin e negociatave për afrimin e mëtejshëm me Bashkimin Evropian në kryerjen e reformave të nevojshme për anëtarësim në NATO, si dhe në ruajtjen e prezencës në koalicionin antiterror, duke parë edhe mundësinë e rritjes së kësaj prezence në këtë koalicion. Pak ditë pas krijimit të qeverisë u krye një raund tjetër bisedimesh me Komisionin Evropian për Marrëveshjen e Asocim Stabilizimit. Konstatoj se, në përgjithësi, negociatat kanë ecur mirë dhe tashmë mbetet që qeveria jonë të përfundojë negocimin e neneve të marrëveshjes si dhe të tregojë në praktikë vullnetin politik për të kryer reformat e nevojshme. Ato janë reformat për të cilat koalicioni i djathtë është angazhuar në fushatën e saj elektorale dhe që janë pjesë e programit të qeverisë miratuar në Parlament.
Ka një monitorim të afërt, që do të kryhet nga ana e Komisionit Evropian dhe ne jemi plotësisht të hapur e bashkëpunues në këtë monitorim. Siç dhe është njoftuar, raundi i fundit i bisedimeve ishte i suksesshëm dhe me sa tregon klima e përgjithshme, mendoj se mbyllja e negociatave do të jetë gjatë gjysmës së parë të vitit të ardhshëm, nën presidencën austriake. Kjo është shpresa jonë.
Unë përfitoj nga rasti të theksoj dy gjëra për miqtë e mi diplomatë.
Së pari, që ne jemi plotësisht të vendosur si qeveri për përmbushjen e të gjitha standardeve, që nënkupton ky negocim. Pas përfundimit të negocimeve vjen momenti i nënshkrimit të Marrëveshjes për Asocim Stabilizimin, që është një moment tjetër i rëndësishëm dhe ku kërkohet tashmë jo vetëm gjykimi i Komisionit Evropian, por edhe miratimi i të gjitha vendeve anëtare të BE-së për nënshkrimin e kësaj marrëveshjeje, dhe unë konsideroj se të gjithë diplomatët e akredituar në Tiranë janë miq të Shqipërisë dhe besoj se ata që përfaqësojnë vendet anëtare të BE-së, në këtë moment do të jenë avokatë të zellshëm, që qeveritë e tyre të japin miratimin për nënshkrimin e kësaj marrëveshjeje. NATO është një objektiv i dytë shumë serioz i qeverisë sonë. Siç e dini, para pak javësh u njoftua se ka një shtyrje të kalendarit të parashikuar për ftesën për zgjerim të NATO-s. Kur isha në Nju Jork në Asamblenë e Përgjithshme të OKB-së, mora pjesë në një takim të organizuar nga administrata amerikane, në kuadër të Kartës së Adriatikut, ku ishte Ministria e Jashtme e Kroacisë, Maqedonisë dhe unë si përfaqësues i qeverisë shqiptare. Dy gjëra u theksuan në këtë takim.
E para, që shtyrja e këtij kalendari nuk shpreh mungesë vullneti nga ana e NATO-s për zgjerimin e saj dhe, për mua ishte e rëndësishme ta dëgjoja nga Nicolas Burns këtë deklarim, dhe së dyti, që 3 vendet tona kanë nevojë për reforma të mëtejshme për të merituar realisht statusin e anëtarit të plotë në NATO.
Ne jemi të bindur se kryerja e reformave për të plotësuar standardet për anëtarësim në NATO është në dobi të Shqipërisë dhe ne do të përpiqemi për rritjen e prezencës sonë në veprimet e NATO-s, për shtimin e reformave të nevojshme dhe plotësimin e të gjitha kushteve. Gjatë kësaj periudhe do të përpiqemi të theksojmë më qartë dhe në praktikë faktin se, integrimi në NATO nuk është një integrim i ushtrisë shqiptare, por është një integrim i Shqipërisë. Kjo nënkupton, së pari një rol shumë më evident të MPJ-së në dialog me NATO-n dhe së dyti një rol më aktiv të Parlamentit për të miratuar ligjet e nevojshme, që nga rritja e buxhetit që kërkohet për ushtrinë nga kushtet e NATO-s e deri te reformat të tjera institucionale për të plotësuar ato kushte që na nevojiten. E gjithë kjo do të shoqërohet edhe me një numër veprimtarish në rritje për sqarimin e opinionit publik për të siguruar një mbështetje sa më të gjerë të këtij opinioni për këtë proces. Unë konstatoj se përqendrimi me tepër i paraqitjes së procesit si reformë në ushtri ka krijuar një farë indiference në opinionin publik, ndaj nëpërmjet projekteve të ndryshme ne do të përpiqemi të sensibilizojmë opinionin publik dhe të sigurojmë mbështetjen e tij për këtë proces, që në thelbin e tij është një proces politiko-diplomatik e ushtarak.
Marrëdhëniet bilaterale
Shqipëria, siç e thashë nuk ka vende armike, ka vende me të cilat ka një volum më të madh apo më të vogël shkëmbimesh, por shumë e rëndësishme është atmosfera në të cilën zhvillohet politika e jashtme e Shqipërisë, e cila është një atmosferë miqësore. Dua të siguroj se, ashtu siç i përmendi edhe kryeministri në paraqitjen e programit të qeverisë në Parlament, ashtu siç janë thënë edhe herë pas here në intervista të ndryshme nga drejtues të qeverisë, gjithë vullneti ynë është që, në nivel bilateral, ne të intensifikojmë më tej marrëdhëniet, t’i shtrijmë në të gjitha fushat, me të gjithë këta vende. Si shenjë të këtij vullneti në rritje, ne shumë shpejt do të konkretizojmë atë projekt të vjetër, që kanë pasur qeveritë paraardhëse për çeljen e ambasadës sonë në Tokio. Pra, po punohet konkretisht për ambientin dhe për njerëzit që do të shkojnë, dhe brenda pak javësh unë jam i bindur që ambasada jonë në Japoni do të hapet. Po ashtu ne po shqyrtojmë shumë seriozisht mundësinë e hapjes së një ambasade apo të një misioni diplomatik në Indi, sepse mendojmë se është një rajon i madh, i cili praktikisht mbulohet me vështirësi nga ambasadat tona të deritanishme.
Ambasadorët
“at large”
Ne do të fillojmë të praktikojmë shumë shpejt ambasadorët “at large”, në mënyrë që ambasadorët e akredituar në Shqipëri (siç e kanë shumë shtete si praktikë), në pamundësi për të pasur misione diplomatike në të gjitha vendet, do të mund t’i mbulojnë e të merren drejtpërsëdrejti me vende të caktuara ku nuk kemi përfaqësi diplomatike. Unë jam i mendimit se ambasadorët e drejtpërdrejtë nga Tirana do të mund ta rrisin volumin e dialogut politik, të dialogut diplomatik, si dhe nxitjen e realizimit të programit të qeverisë duke qenë në Shqipëri, më mirë se sa duke qenë në një vend tjetër.
Pavarësia e kushtëzuar për Kosovën
E kam thënë edhe në fjalën time në Asamblenë e Përgjithshme të Kombeve të Bashkuara, se mendimi im dhe mendimi i qeverisë shqiptare për Kosovën ka qenë dhe mbetet që “status quo”-ja e tanishme nuk mund të prodhojë stabilitet për një kohë më të gjatë, prandaj përfitoj nga rasti të shpreh kënaqësinë time për konkluzionet në të cilat arriti raporti i ambasadorit, Kai Aide, dhe ku sugjerohet çelja e këtyre negociatave. Shpreh njëkohësisht konsideratën dhe mirënjohjen time edhe për mbështetjen që i dha sekretari i përgjithshëm i Kombeve të Bashkuara, Kofi Anan, pikërisht këtij opsioni, që ka të bëjë me çeljen e negociatave për statusin final të Kosovës.
Duke dhënë gjykimin tonë për opsionin që prodhon më shumë stabilitet në Kosovë, pavarësinë e kushtëzuar, ne mendojmë se duke parë dritën e tunelit, forcat relevante politike dhe institucionale në Kosovë do të ndjehen më të motivuara të bëjnë kompromise. Së dyti i sigurohet për një kohë të caktuar një prani e rëndësishme e komunitetit ndërkombëtar, duke përbërë kështu garanci për të drejtat e minoritetit serb dhe të minoriteteve të tjera. Prania e komunitetit ndërkombëtar për një kohë të caktuar i shërben ngritjes në mënyrë më të shëndoshë të institucioneve të shtetit të së drejtës. Ky ka qenë dhe mbetet koncepti ynë, duke theksuar se ne nuk pretendojmë të jemi aktorë në tryezën e bisedimeve për negociatat, por ne do të përdorim të gjithë ndikimin tonë, që faktorët shqiptarë në Kosovë të bashkëpunojnë ngushtë me komunitetin ndërkombëtar. Gjithashtu, faktori shqiptar në Kosovë duhet të vendosë një dialog intensiv me Beogradin për të gjitha problemet që ata kanë për të diskutuar. Në këtë këndvështrim, rishpreh pikëpamjen time se rruga e vetme serioze dhe e sigurt për komunitetin serb për të marrë pjesë në përcaktimin e së ardhmes së Kosovës që është dhe do të jetë vendi i tyre, qëndron vetëm në pjesëmarrjen e tyre në grupin negociator, si pjesëtarë të grupit negociator të Kosovës. Çdo tentativë për t’i përfshirë ata në grupin negociator të Beogradit do të jetë joproduktive dhe nuk do t’i shërbejë frymës së krijimit të besimit në këtë proces të negocimit. Unë kam pasur rastin t’ia them këtë gjë edhe kolegut tim, Drashkoviç, dhe t’i bëj thirrje që Beogradi të ndikojë me të gjitha mënyrat që komuniteti serb të përfaqësohet brenda institucioneve të Kosovës në këtë proces shumë të rëndësishëm.
Unë dua të ritheksoj se marrëdhëniet tona me Unionin Serbi-Mal i Zi nuk përcaktohen nga qëndrimi që do mbajë Beogradi ndaj Kosovës. Ne mendojmë se dialogu dhe shkëmbimet Tiranë-Beograd duhet të zhvillohen pavarësisht evolucionit që do të kenë ngjarjet në Kosovë. Pata një replikë në Asamblenë e Përgjithshme të Kombeve të Bashkuara me delegacionin e Unionit Serbi-Mal i Zi, të cilët u shprehën se përcaktimi i Tiranës për pavarësinë e Kosovës do të thotë ftohje dhe dëmtim serioz i marrëdhënieve midis Tiranës dhe Beogradit. Unë e quaj këtë një gjuhë të vjetëruar, një gjuhë shantazhi. Ajo është një gjuhë, që normalisht duhet të ketë perënduar në Ballkan dhe ritheksoj se ne jemi gati të punojmë me Beogradin për vënien edhe më mirë në eficencë të marrëveshjeve dypalëshe që tashmë ekzistojnë. Njëherësh të punojmë për hartimin e një numri të caktuar marrëveshjesh të karakterit politik, diplomatik, konsullor dhe kulturor në mënyrë që këto marrëdhënie midis Tiranës dhe Beogradit të pasurohen pa reshtur.
Kemi përpara eventualitetin e një ngjarjeje tjetër shumë të rëndësishme dhe që është referendumi në Mal të Zi, që është paralajmëruar për vitin tjetër. Do të zhvillohet apo nuk do të zhvillohet ky referendum, ende nuk duket një perspektivë e qartë, por unë dua të theksoj se në konceptin e qeverisë tonë, qenia e Malit të Zi brenda Unionit Serbi–Mal i Zi, apo shtet i pavarur nuk është kryesor. Kryesore për ne është që në Mal të Zi gjithçka të zhvillohet në mënyrë demokratike, transparente dhe në përputhje me standardet që prodhojnë stabilitet dhe paqe. Ne jemi të mendimit se Mali i Zi duhet ta zhvillojë historinë e tij në standardet që sigurojnë paqe dhe stabilitet. Për këtë qëllim ne do t’i bëjmë thirrje në mënyrë të vazhdueshme komunitetit shqiptar në Mal të Zi, i cili është një minoritet, që të tregojë pjekuri. Komuniteti shqiptar në Mal të Zi ka nevojë për më shumë të drejta kulturore dhe politike dhe këto të drejta ai do t’i sigurojë vetëm brenda institucioneve demokratike.

	Faqja 2 - FAQE E PARE
	Ministri i jashtëm: 2/3 e dokumentave janë jashtë afateve ligjore

	Kokaina, stuhi mbi pasaportat diplomatike
	Mustafaj: Regjim i rreptë i përdorimit
	Armando Meta Ministria e Jashtme Shqiptare, do të marrë masa shtrënguese, sa i përket mbajtjes së pasaportave diplomatike. Incidenti i ndodhur disa ditë më parë në aeroportin e Romës, ku një qytetar shqiptarë, mbajtës i një pasaporte diplomatike, është kapur me një sasi të konsiderueshme droge, ka detyruar dje ministrin e Jashtëm, Besnik Mustafaj, të njoftojë se do të merren disa masa të menjëhershme me karakter ligjor, sa i përket përdorimit dhe mbajtjes së pasaportave diplomatike. Mustafaj informon se sot në qarkullim ka afro 2500 pasaporta diplomatike të lëshuara gjatë 8 viteve të fundit, dhe afër 2/3 e tyre janë jashtë afateve ligjore të përdorimit apo jashtë kritereve ligjore të përdorimit të tyre. “MPJ, nëpërmjet Drejtorisë Konsullore, ka bërë lajmerimet e saj, por MPJ nuk ka instrumentat e nevojshme për të mbledhur pasaportat që dalin jashtë afateve kohore në përdorim”, ka deklaruar Mustafaj, duke bërë të dukshme pafuqinë e këtij institucioni për të mbledhur pasaportat diplomatike që janë në zotërim të personave të cilëve, sipas ligjit, nuk u takojnë ta mbajnë. RISHIKIMI Sipas Mustafajt, do të rishikohet me urgjencë ligji dhe krejt legjislacioni që rregullon mbajtjen e pasaportës diplomatike, në mënyrë që të ngushtohen kriteret, të ngushtohet numri i atyre që kanë të drejtë të mbajnë pasaportë diplomatike. “Këto kritere do të përputhen me vendet e zhvilluara që kanë eksperincën e tyre dhe që kanë natyrisht edhe kriteret më të sakta për të drejtën e përdoruesve të pasaportës diplomatike”, ka informuar Mustafaj. KUFIZIMET Ministri i Jashtëm bën të ditur se regjimi i përdorimit të pasaportës diplomatike, është krejtësisht i parregulluar. Sipas tij, nga një shqyrtim i praktikave të vendeve të tjera, diplomatët, nuk kanë të drejtë t’i përdorin pasaportat diplomatike, kur shkojnë për pushime apo për udhëtime private. Mustafaj nënvizon se kur kjo përjashton diplomatët, nuk bëhet fjalë që nga ky rregull të bëjnë përjashtim familjarët e tyre. “Ne do të vendosim një regjim të rreptë të përdorimit të pasaportave diplomatike. Këto masa që do të marrim ne, që janë të karakterit administrativ dhe të karakterit ligjor, do t’i shërbejnë pikërisht realizimit të atij detyrimi që ka Shqipëria për forcimin e regjimit të kontrollit të kufijve, gjë që do të lehtësojë procesin e lehtësimit në përgjithësi të rregjimit të vizave të qytetarëve shqiptarë me Bashkimin Evropian”, ka nënvizuar Mustafaj. DETYRIMET Ministri qartësoi në fjalën e tij se një nga detyrimet madhore që ka Shqipëria për t’u afruar me Brukselin dhe që nuk e ka realizuar akoma, qëndron në forcimin e rregjimit të kontrollit të kufirit. Sipas tij, pjesë thelbësore e forcimit të rregjimit të kontrollit të kufijve, janë dokumentat e identifikimit, saktësia e dokumentave, si dhe përputhshmëria me ligjin për mbajtësit e tyre. “Brenda kësaj hapësire, dokumentat e identifikimit, pasaportat diplomatike, si dokumenti më serioz, natyrisht janë pika me delikate dhe më e rregulluar me ligj.