Dy rivalët kryesorë të politikës shqiptare, Nano dhe Berisha do jenë të pranishëm sot në Presidencë, këtë herë jo për të akuzuar njëri-tjetrin, por për të nënshkruar një Kod Etik për mbarëvajtjen e zgjedhjeve parlamentare.

Sipas burimeve pranë Presidencës mësohet se Kodi i Sjelljes do të nënshkruhet në zyrën e presidentit Moisiu, do të jenë të pranishëm përfaqësuesit e partive parlamentare, ku do të ketë një përballje mes dy liderëve kryesorë të politikës, Fatos Nano dhe Sali Berisha. Për herë të parë, të dy së bashku do të jenë përballë njëri-tjetrit disa muaj përpara nisjes së fushatës elektorale të zgjedhjeve parlamentare, të cilat do të zhvillohen më datën 3 korrik. Të pranishëm pritet të jenë edhe përfaqësues të trupit diplomatik që veprojnë në Shqipëri.

Firmat
Kodi i Etikës për zgjedhjet parlamentare, i propozuar nga ana e presidentit të Republikës, Alfred Moisiu do të nënshkruhet sot nga kryetarët e 16 partive parlamentare. Firmosja e Kodit do të bëhet sot në orën 11:00 në Presidencë, ku të pranishëm pritet të jenë edhe krerët e partive të tjera parlamentare si Gjinushi për PSD-në, Xhuveli për PAA-në, Meta për LSI-në, Ceka për PAD-në, Dule për PBDNJ-në, Lesi për PDK-në, Mediu për PR-në, Karamelo për PLDNJ-në, Starova për PBL-në, Pollo për PDR-në, Milo për PDS-në, Shehi për PDR-në, Spahia i PLL-së, Alimehmeti për PBK-në.

Pikat e Kodit
Kodi i Sjelljes i propozuar nga ana e presidentit parashikon që partitë politike, si të pozitës dhe të opozitës të realizojnë një fushatë të qetë, pa sharje edhe fyerje mes njëra-tjetrës, si dhe palët të pranojnë rezultatin e zgjedhjeve. Gjithashtu në këtë Kod synohet që partitë politike të japin kontributin e tyre për të realizuar zgjedhje të lira dhe të drejta, sipas standardeve që kërkon faktori ndërkombëtar. Për miratimin e Kodit të Sjelljes, presidenti Moisiu ka zhvilluar disa takime me përfaqësues politikë të pozitës dhe opozitës, derisa ka gjetur gjuhën e përbashkët mes palëve që do të konkurrojnë në këto zgjedhje parlamentare. “Nuk do të pranojmë financime nga burime të dyshimta dhe se do të jemi përgjegjës për zbatimin e parimit të transparencës në financimin e fushatës elektorale. Subjekti ynë politik, kandidatët, përfaqësuesit ose mbështetësit tanë nuk do të kërcënojnë votuesit, komisionerët ose pjesëmarrësit e tjerë në zgjedhje me hakmarrje apo masa administrative, nuk do të ofrojnë dhurata, ryshfete apo shpërblime me qëllim bindjen e një personi tjetër që të kandidojë ose jo, të detyrojë votuesit të veprojnë në kundërshtim me vullnetin e tyre apo të nxisë komisionerët të veprojnë në kundërshtim me ligjin”, thuhet në tekstin e Kodit të Sjelljes. Në këtë material theksohet se “Subjekti politik, kandidatët, përfaqësuesit dhe mbështetësit tanë të pranojnë rezultatet e procesit zgjedhor dhe të respektojnë legjitimitetin e institucioneve të dala prej tij. Kodi i Sjelljes dhe fryma e angazhimet që ai përçon, do të respektohen nga subjekti ynë politik, kandidatët, përfaqësuesit, aktivistët e fushatës dhe mbështetësit tanë aktivë”. Partitë politike angazhohen për mirinformimin e mbështetësve të tyre me përmbajtjen e Kodit dhe rëndësinë e zbatimit të tij.

Blerja e votës

Kandidatët, përfaqësuesit ose mbështetësit e partive nuk do të kërcënojnë votuesit, komisionerët ose pjesëmarrësit e tjerë në zgjedhje me hakmarrje apo masa administrative, nuk do të ofrojnë dhurata, ryshfete apo shpërblim me qëllim që të bindin një person tjetër të kandidojë ose jo.

Betimi i partive

Garantojmë se në veprimtarinë elektorale, për një fushatë demokratike, civile dhe paqësore, subjekti ynë politik dhe kandidatët tanë nuk do të nxisin dhunën, ndarjen krahinore e fetare, nuk do të krijojnë urrejtje reciproke dhe nuk do të shkaktojnë tension midis grupeve të ndryshme ose komuniteteve.
Të gjitha partitë, por në veçanti anëtarët e partive qeverisëse nuk duhet të përdorin burimet, strukturat administrative, mjediset publike, mjetet e transportit, personelin e administratës publike, që financohen përmes parave të taksapaguesve, disa prej të cilave u jepen mbajtësve të tyre për shkak të postit, qoftë në nivel kombëtar, qarku apo bashkie, për qëllim fushate politike ose për thellimin e interesave të tyre zgjedhore. Nuk do të pranojmë financime nga burime të dyshimta dhe se do të jemi përgjegjës për zbatimin e parimit të transparencës në financimin e fushatës elektorale.
Subjekti ynë politik, kandidatët, përfaqësuesit ose mbështetësit tanë nuk do të kërcënojnë votuesit, komisionerët ose pjesëmarrësit e tjerë në zgjedhje me hakmarrje apo masa administrative, nuk do të ofrojnë dhurata, ryshfete apo shpërblim me qëllim që të bindin një person tjetër të kandidojë ose jo, të detyrojnë votuesit të veprojnë në kundërshtim me vullnetin e tyre apo të nxisin komisionerët të veprojnë në kundërshtim me ligjin. Do të nxisim dhe mbështesim konkretisht pjesëmarrjen e plotë të grave, si kandidate ashtu edhe si komisionere në procesin zgjedhor. Subjekti ynë politik, kandidatët, përfaqësuesit dhe mbështetësit tanë të pranojnë rezultatet e procesit zgjedhor dhe të respektojnë legjitimitetin e institucioneve të dala prej tij.

OSBE aparaturë për dublimet
Vaçek: Listat e sakta, kushti ynë

OSBE-ja i dhuron një kompjuter të veçantë Ministrisë së Pushtetit Vendor, për verifikimin e dublimeve të listave të zgjedhësve. Ambasadori i OSBE-së në Tiranë, Pavel Vaçek, së bashku me kreun e KE-së, Lutz Salzman kanë dhuruar për Qendrën e Dublimeve një aparaturë speciale për procesin e hartimit të listave të zgjedhësve. Vlera e aparaturës shkon në 53 mijë euro dhe do të shërbejë për heqjen e emrave që rezultojnë në dy vende të ndryshme të listave të zgjedhësve. Në këtë takim ambasadori i OSBE-së, Pavel Vaçek e ka cilësuar si mjaft të rëndësishëm instalimin e një aparature të tillë. “Një listë zgjedhësish e përmirësuar përbën një nga kushtet kryesore për zgjedhje më të mira”, tha ambasadori Vaçek. Ambasadori i delegacionit të KE-së, Salzman tha se kjo përpjekje e OSBE-së dhe Ministrisë së Pushtetit Vendor do të ndihmojë, duke patur një impakt pozitiv në besueshmërinë e zgjedhjeve të ardhshme. Ndërsa ministri Blushi tha se “i ka kërkuar Parlamentit dhe komisionit të posaçëm për Listat të shtyjë afatin për verifikimin e listës së zgjedhësve”.