ar.ço.

Programi ekonomik i Lëvizjes për Zhvillim Kombëtar premton rritjen e të ardhurave me 8 për qind për çdo vit në rast se ajo do të jetë në krye të qeverisë së ardhshme. Gjatë paraqitjes së këtij programi drejtuesi ekzekutiv i LZHK-së Dashamir Shehi u shpreh se brenda katër viteve të qeverisjes së saj LZHK-ja do të sigurojë për qytetarët shqiptarë që në vitin 2008 të ardhurat për frymë të bëhen 2 500 dollarë. "Rritja e rrogave do të shkojë në proporcion të drejtë me rritjen e pensioneve. Për të arritur këtë synim, LZHK-ja do të ndërmarrë një sërë reformash, në mënyrë që të ruhet rritja e lartë e prodhimit kombëtar", tha Shehi. Në kuadrin e përmirësimit të jetesës së qytetarëve, LZHK-ja premton zvogëlimin gjithnjë e më shumë të tatimit dhe të taksave, gjë që do të shtojë numrin e aktiviteteve private dhe shtimin e vendeve të punës.

Taksat e tatimet
Për biznesin privat do të aplikohen dy shkallë tatimesh mbi të ardhurat: e ulëta dhe e larta. Shkalla e ulët e tatimeve do të aplikohet për bizneset e vogla. "Tatimi për këtë kategori biznesesh do të shkojë drejt zeros. Ndërsa për bizneset e mëdha do të mbetet në nivelin aktual 23 për qind", tha kryetari i Komisionit të Ekonomisë në LZHK Gjergj Buxhuku. Ndërkohë që do të përjashtohen nga taksimi dhe tatimi prodhimet e fshatit deri në vitin 2009. Për këtë kategori të biznesit LZHK-ja premton ndihmën e fshatit me specialistë të shtetit. "LZHK pretendon të ulë nivelin e evazionit fiskal, duke sjellë kështu rritjen e të ardhurave në buxhetin e shtetit. E njëjta praktikë do të ndiqet edhe për nivelin e TVSH-së", tha Buxhuku. Në programin ekonomik të LZHK-së premtohet rishikimi i sistemit të akcizave, për t'i kthyer ato në vlera fikse dhe jo të shprehura në përqindje të çmimit të mallit. Taksat dhe tatimet nuk do të paguhen në perioda të shkurtra, por në perioda njëvjeçare. Në programin ekonomik të LZHK-së parashikohet vendosja e çmimeve monopol vetëm për mallrat dhe shërbimet ku nuk ka konkurrencë të mjaftueshme, deri në vendosjen e kësaj konkurrence.