Begeja: Kompensimi financiar mashtrim, duhen 6 miliardë euro

A. Rama

TIRANË - Deputeti Maksim Begeja deklaroi dje në Kuvend se për të kompensuar financiarisht trojet dhe tokën bujqësore të ish-pronarëve, sipas çmimeve të tregut, nevojiten gati 6 miliardë euro. Begeja gjatë diskutimit për metodikën e vlerësimit të çmimeve të tokës, u shpreh se kjo shifër ishte e papërballueshme nga çdo qeveri, pasi do të duheshin 3 000 vjet për të përfunduar këtë proces. “Kompensimi financiar i premtuar dhe i parashikuar në ligjin “Për kthimin dhe kompensimin e pronave”, është një mashtrim i madh, pasi duhen 2 miliardë euro për tokën bujqësore dhe 4 miliardë euro për trojet. Por kompensimi fizik dhe ai financiar janë dy aspektet kyçe të këtij procesi. Nëse do të ktheheshin 6 000 hektarë tokë në zonat bregdetare, dhe mundësitë janë për këtë, ky proces do të merrte zgjidhje”,- tha Begaja. Sipas tij, duhet të marrë fund abuzimi me tjetërsimin e trojeve turistike shtetërore dhe të ish-pronarëve në bregdet, që po vazhdon edhe sot e kësaj dite, pavarësisht se në ligjin përkatës është përcaktuar se ky proces duhet të ndërpritet, tashmë që ka filluar zbatimi i ligjit të pronave. Begeja tha që duhet të hartojë sa më shpejt hartën shtetërore për zonat turistike dhe subturistike. Sipas tij, Ministria e Rregullimit të Territorit dhe Turizimit duhet të përcaktonte vlerat e aksioneve të pronarëve në zonat turistike.

 

Faqja 7 - POLITIKE

Prill 29, 2005

Kuvendi miraton Metodikën e vlerësimit të tokës në të gjitha zonat

Çmimi i tokës, nga 40 në 600 euro

Begeja: Duhen 3000 vjet që shteti të kompesojë pronarët

Artemida Çollaku Më në fund toka do të vlerësohet në bazë të metodikës së hartuar nga Komisioni shtetëror i kthimit dhe kompesimit të pronës dhe i miratuar në seancën e djeshme parlamentare me 57 vota pro, 6 kundër dhe 7 abstenime. Metodika përcakton që çmimi për një metër tokë bujqësore të variojë nga 1 euro deri në 5 euro, ndërsa e çmimi i truallit të variojë nga 75 euro deri në 606 euro. LAJMI Çmimi për një metër tokë bujqësore do të variojë nga 1 euro deri në 5 euro, ndërsa e çmimi i truallit do të variojë nga 75 euro deri në 606 euro. Kjo është një nga vlerësimet e bëra në metodikën për vlerën e trojeve, e miratuar dje në seancën plenare. Në metodikën e cila mori formën e plotë ligjore, parashikohet që vlera e zonave turistike të variojë nga 40 deri në 208 euro. Llogaritjet për secilën prej llojeve të tokave janë bërë mbi bazën e koeficientëve që i shtohen vlerës së tokës duke nisur që nga distanca nga qendrat urbane, koeficienti i ujitjes, i zhvillimit si dhe koeficienti i shfrytëzimit. Çmimi më i ulët do të jetë për tokat bujqësore që nuk i kanë këto koeficientë. Me ndryshimet e bëra nga Komisioni parlamentar i Bujqësisë, metodika përcakton edhe vlerën që do të ketë një metër katror tokë që i përket zonave liqenore. Sipas përllogaritjeve të bëra në metodika parashikohet që një m2 tokë liqenore të kushtojë deri në 20 euro. Debatet Megjithë vlerësimet e larta për hartimin e një metodike që do të përcaktojë çmimin e një sipërfaqe toke, deputetë të majtë dhe të djathtë sërisht kanë paraqitur rezervat e tyre. Vërejtjet themelore u shfaqën nga deputeti i PD-së Fatos Beja dhe ai i LZHK-së, Maksim Begeja. Beja kërkoi që metodika të zbatohet aty ku nuk ka treg toke dhe po ashtu saktësoi se në ligjin për kthim-kompensimin e pronës përcaktohet vlera e tregut, ndërsa në metodikë jo. Ai u shpreh se tregu i tokës ekziston, përderisa jepet nëpër agjenci të ndryshme imobilare. Ndërsa sipas Begesë, me fondin prej 2 milionë dollarë në vit që buxheti i shtetit akordon për procesin e kompensimit, ish-pronarët do të kompensohen pas 3 mijë vjetësh. Ai nënvizoi se pronarët pretendojnë se duhet të marrin nga kompesimi 60 mijë hektarë tokë bujqësore dhe 4 mijë hektarë troje. Mbështetur në metodikë, vlera që duhet të paguhet nga shteti, llogaritet në 6 miliardë euro. Ndërkohë që nënkryeyari i komisionit të ekonomisë Ritvan Bode kërkoi heqjen e rrjetit të koeficientëve pasi sipas tij numri i shumtë i tyre e largon shumë çmimin që del nga vlera reale e tokës që do të komensohet. Megjithatë kërkesa e tij u rrëzua. Kundra Ndër deputetët që votuan kundër miratimit të Metodikës kishte edhe socialistë dhe republikanë. Zyhdi Pepa e Ejup Tabaku iu bashkuan votës kundër të republikanëve Fatmir Mediu, Neritan Alibali, Aleksandër Garuli e Luan Malltezi. Ndërsa abstenuan shtatë deputetët e grupit parlamentar të Lëvizjes Socialiste për Integrim.