Blerina Gjoka

Shumica e kandidatëve për deputetë të PS-së rrezikojnë futjen në zgjedhje, pasi kanë harruar të regjistrohen në zonat e tyre elektorale. Megjithëse janë prezantuar nga kryeministri dhe kanë nisur që prej 2 muajsh punën në zonat e tyre për të fituar zgjedhjet, kanë harruar një detaj shumë të rëndësishëm, dorëzimin e dokumenteve në KZZ. Vetëm në këtë mënyrë ata do të quhen zyrtarisht kandidatë për deputetë dhe afati i fundit për ta bërë këtë veprim është data 1 qershor. Nga të dhënat në selitë e partive dhe në KZZ del se problemi i neglizhencës së kandidatëve për deputetë nuk ka ngjyrë politike, pasi probleme ka nga të gjitha partitë. Lëvizja për Zhvillim Kombëtar ka dhënë dje porosi të 100 kandidatëve të saj që të regjistrohen pranë KZZ-ve. Drejtues të kësaj force politikë bënë të ditur dje se e kanë nisur këtë proces në mënyrë të përshpejtuar për të bërë të mundur përfundimin e tij brenda afateve ligjore.

Regjistrimi
Ndërkaq në selinë e PS-së problemi ka marrë përmasa shqetësuese, pasi strukturat organizative të partisë, përveç punës së përditshme për organizimin e fushatës, marrin në telefon dhe kandidatët për t'u kujtuar se duhet të regjistrohen para datës 1 qershor dhe të paraqesin në KZZ-të përkatëse dokumentet. Burime në këtë seli pohojnë se disa kandidatë e kanë bërë tashmë regjistrimin, por mbetet një pjesë e madhe e tyre që duhet të vrapojë për t'u regjistruar brenda këtyre dy-tre ditëve të fundit të afatit. Çuditërisht neglizhenca nuk vjen vetëm nga kandidatët që futen për herë të parë në zgjedhje, por dhe nga ata që kanë një ose dy mandate deputetësh dhe e kanë zbatuar këtë praktikë më parë. Kandidatët janë porositur nga partia që të mos harrojnë dokumentet zyrtare, siç është lista me emrat e 300 zgjedhësve që e mbështesin apo deklarata e partisë që e kandidon. Partia nuk mund të bëjë asgjë për t'ua hequr këtë barrë kandidatëve, sepse çdonjëri prej tyre duhet të jetë personalisht për të bërë procesin e votimit.

Afati
Komisioni Qendror i Zgjedhjeve nuk ka akoma një statistikë për numrin e kandidatëve të regjistruar deri më tani, pasi ky proces monitorohet nga ana e KZZ-ve. Por, zyrtarisht KQZ njofton se më datë 1 qershor mbyllet regjistrimi dhe më datë 3 qershor të gjitha KZZ-së janë të detyruara të sjellin në KQZ listën me emrat e kandidatëve të regjistruar. Kush mbetet jashtë listave të kandidatëve deri në këtë datë, rrezikon seriozisht të mbetet jashtë zgjedhjeve të 3 korrikut. Fundjava do të jetë mundësia e fundit që ata të regjistrohen, kështu që të gjithë janë nisur nëpër zonat e tyre në rrethe për të bërë regjistrimin. Duket se përballja me ligjin nuk është një çështje parësore për kandidatët, pasi kujtohen në momentin e fundit për të zbatuar dhe një procedurë të thjeshtë ligjore.

Dokumentet

a) emrin, atësinë, mbiemrin, datëlindjen dhe adresën e kandidatit;

b) deklarimin e kandidatit që ai gëzon të drejtën e votës dhe të drejtën për të kandiduar për në organin për të cilin konkurron;

c) emrin dhe adresën e një personi të emëruar si përfaqësuesi zyrtar i tij, i cili duhet të gëzojë të drejtën e votës;

ç) një listë të nënshkruar nga 300 zgjedhës që banojnë në atë zonë, emrat e të cilëve janë në listat paraprake të zgjedhësve, që mbështesin kandidaturën e tij

d) një deklaratë nga partia dhe/ose koalicioni që mbështet kandidatin, të nënshkruar nga kryetari i partisë,

Kryeministria: Mos përdoren institucionet për fushatë

Udhëzimi, ministrat jo fushatë me stafet dhe fondet publike
Administrata shtetërore vazhdon punën e saj të përditshme, pavarësisht se kryeministri, ministrat dhe disa zyrtarë të tjerë të lartë janë futur në fushatën elektorale për zgjedhjet e 3 korrikut. Qeveria shqiptare ka bërë të ditur dje se administrata shtetërore nuk po përdoret dhe nuk do të përdoret për efekt të fushatës zgjedhore, por do të jetë në funksionim të vazhdueshëm si më parë. Në këtë mënyrë zëdhënësi i qeverisë ka hedhur poshtë dhe akuzat e opozitës për përdorim të punonjësve për fushatën elektorale të partisë në pushtet. Ndërkaq, nga qeveria bëhet e ditur se vazhdon të jetë në fuqi udhëzimi i dalë në zgjedhjet e vitin 2003, ku u kërkohet ministrave të mos abuzojnë me stafet e punës dhe me fondet publike. Për këtë qëllim ministrat kanë ngritur stafet e tyre politike që merren me fushatën. Ky udhëzim është nxjerrë nga kryeministri Fatos Nano në zbatim të Kodit Zgjedhor. Një nga pikat kryesore të Kodit të Etikës, nënshkruar para Presidentit të Republikës Alfred Moisiu është është angazhimi i kandidatëve për të mos përdorur mjetet e institucioneve në favor të fushatës së partive. Akuzat më të shumta janë bërë nga ana e opozitës në drejtim të kandidatëve të PD. Kjo situatë çoi në dorëheqje të njëpasnjëshme të kandidatëve socialistë në postet e tyre publike, kryesisht prefektët të cilët e lanë detyrën ose u liruan nga Këshilli i Ministrave.