30062005

http://www.kohajone.com/

E Enjte, 30 Qershor 2005

PS-LZHK, ALEANCA E PAMORALSHME NE DURRES

I ndodhur ne pozite te veshtire, si pasoje e prirjes se djathte qe ka zona 28, kryetari i Partise Socialiste per Durresin dhe njeherazi kandidati i PS-se per zonen 28 ka joshur dhe vene ne sherbim te tij kandidatin e Levizjes per Zhvillim Kombetar ne zonen 28, Pellumb Berishen. Pellumb Berisha ka qene deputet i Partise Demokratike gjate kesaj legjislature dhe Partia Demokratike nuk e kandido per arsye te heshtjes se tij katervjecare ne Kuvend si edhe per mosmarrje pjese ne votim ne Kuvend ne momente kritike kur vihej ne diskutim rrezimi i qeverise se Fatos Nanos.

Mbasi jane takuar disa here se bashku, Bizhga ka rene dakord qe te mbeshtesi financiarisht Pellumb Berishen dhe t"i jape atij vota ne proporcional ne shkembim te votave ne maxhoritar qe do synoje te marre Pellumb Berisha. Me parate e Bizhges, Pellumb Berisha po perpiqet te bleje vota ne Porto Romane dhe Shkozet. Ne disa takime te zhvilluara ne Durres lideri i opozites Sali Berisha i ka bere thirrje elektoratit te djathte se votat per LZHK-ne dhe Pellumbin Berishen jane vota per Bizhgen dhe Fatos Nanon.

Fushata e PDR-se ne Shkoder

Ne vijim te turit elektoral "Besoni, Shqiperia Ndryshohet", kryetari i Partise Demokrate te Re, Genc Pollo u ndal ne Shkoder per te prezantuar kandidatet e PDR-se per qytetin e Shkodres, Agim Mata, Xhevat Hoxha, Lilian Idrizi, Antoneta Luli, Nikolin Naraci, Eduard Grisha dhe Nard Ndoka. Pollo tha se ndryshimi i madh vjen vetem me rotacionin politik ne 3 Korrik dhe ftoi te gjithe elektoratin te mbeshtesin ne maxhoritar kandidatet e PD-se dhe ne propocional kandidatet e PDR-se. Me tej ne fjalen e tij Pollo vijoi: "Partite politike ne thelbin e tyre kane dhe kauza te medha, dhe nje kauz e madhe per te gjithe shqiptaret, jo thjeshte per dy apo shtate parti politike eshte nje vendim i madhe i rendesishem qe te gjithe shqiptaret duhet ta marrin me 3 Korrik. Nje mandate i trete socialist do te ishte nje fatkeqesi e madhe kombetare, nje mandat i trete socialist do te ishte nje degradim i metejshem i shoqerise se vendit ne varferi, ne padije, ne izolim, ne neglizhence per qytetaret nga ana e shqiperise dhe kesaj i duhet dhene fund me 3 Korrik."

http://www.balkanweb.com/gazeta/gazeta.htm

Faqja 8 - POLITIKE

Qershor 30, 2005

Mbështetje për kandidantin e LZHK, Arjan Boriçi. Shqiptaro-amerikani: PD s'më ka bërë ftesë

Dioguardi mbështet kandidatët e LZHK

Kongresmeni në takimet elektorale në Shkodër

Ka mbërritur dje në Shkodër Joseph Dioguardi si mbështetës i kandidatit të LZHK-së për Shkodrën Arjan Boriçi. Boriçi është larguar nga Shqipëria që në vitet 80-të dhe është biznesmen në Amerikë. Në mbështetje të kandidimit të tij në Kuvend, Dioguardi ka bërë një takim në orën 19 e 30 minuta në Kinema Millenium, me simpatizantë të LZHK-së dhe kandidatët e saj për deputet në Shkodër.

Jemi mësuar t´ju shohim krah Berishës, sidomos në situata të nxehta zgjedhore. Pse këtë herë ju jeni në mbështetje të një kandidati të LZHK-së?
"Para së gjithash këtu nuk jam i ftuar nga Berisha. Jam këtu për të mbështetur kandidatin e LZHK-së Arjan Boriçi i cili është një shqiptaro-amerikan shumë i mirë që përfaqëson vërtet vlera. Nuk jam këtu për të mbështetur ndonjë parti në veçanti apo ndonjë drejtues partie. Unë përkrah thjesht ato persona që i njoh që janë pozitv dhe të zotë. Nuk kam dashur që të përfshihem në politikën shqiptare, por e shoh që është e nevojshmë që në këtë moment të përkrahen njerëzit e mirë. Kam ardhur për të përkrahur Arjan Boriçin në Shkodër, Henri Perollin në Tiranë të Partisë Bashkimi i Kombit Shqiptar, Ekrem Spahinë në Kukës dhe Ardi Kaloçin për PD në Vlorë. Nuk ka rëndësi se cila është partia, rëndësi ka njeriu. Përjashtoj nga kjo mbështetje kandidatët e PS të Fatos Nanos. Ne shpresojmë që në Shqipëri të krijohet një qeveri koalicioni ku të përfshihen dhe partitë e vogla, shpresojnë që asnjë prej partive të mos marrë 50% pasi kështu do të ketë qeverisje më të mirë.

Nga njëra anë thoni se mbështet të gjithë kandidaturat e mira pavarësisht partisë që përfaqësojnë, ndërkohë që përjashtoni kandidatët e PS. Ju përjashtoni faktin se në PS ka njerëz pozitiv?
Është e vërtetë që e kam pohuar një gjë të tillë. Dhe kjo lidhet me faktin se ka qenë vetë PS ajo që na e ka krijuar një bindje të tillë. Nuk kemi parë nga vetë partia njerëz që plotësojnë standartet demokratike.

Sikur t´ju kishte ftuar Berisha këtë fushatë do të ishit pranë tij?
Në fakt ftesa duhej të bëhej muaj më parë, por ai nuk e ka bërë këtë ftesë. 4 vite më parë ne kemi sjellë këshilltarët më të mirë. Zgjedhjet e kaluara u shoqëruan me shumë probleme, katër raunde në 5 muaj dhe shumë parregullsi. OSBE-ja i konsideroi minimalisht të pranueshme. Për mua ato zgjedhje nuk duhej të pranoheshin. I uroj Berishës më të mirat. PD-ja përfaqëson standarte shumë më të mira se PS-ja. Por shpresojmë që partitë e vogla të përfaqësohen në parlamet dhe qeveria të jetë rezultat i koalicioneve me partitë e vogla.

Pse erdhët pikërisht tani në fund të fushatës?
Kam ardhur pikërisht një ditë para se të mbyllet fushta që tu kërkoj votuesve që të shkojnë në kutitë e votimit, pasi kështu tregojnë një respekt për veten e tyre, vetëm kështu arrihet demokracia e vërtetë. Shqipëria ka probleme, korrupsioni, inflacioni grek në ekonomi është shqetësues, gjykatësit zgjidhen politikisht dhe jo në mënyrë të pavarur. Fatos Nano ka lejuar të gjitha këto dhe këto ndikojnë shumë keq jo vetëm për Shqipërinë por edhe për Kosovën.

Sipas ligjit zgjedhor shqiptar ndalohet përfshirja e të huajve në fushatë. Mendoni se po shkelni ligjin me vizitën tuaj për të përkrahuar kandidatë?
Nuk jam duke bërë asnjë shkelje të ligjit. Këtu janë duke kandiduar për deputetë të Parlamentit shqiptar, shqiptaro-amerikan, njerëz të nderuar dhe me vizion të qartë. Në këtë pikë unë nuk shoh ndonjë gjë që nuk shkon në ardhjen time pasi edhe unë jam shqiptaro-amerikan, babai im ishte arbëresh. Unë jam krenar për origjinën time.

29 June 2005 http://www.panorama.com.al/

Faqe 3 - Aktualitet

listat e votuesve

rregjistrimet

Katër ditë para votimit arrin në 120 numri i atyre që kërkojnë të regjistrohen

Listat, ja dokumentet që duhen për të bërë ankim

Ka arritur në 1 200 numri i qytetarëvë, të cilët kanë dorëzuar në sekretarinë e Gjykatës së Tiranës kërkesa për përfshirjen e tyre në listat zgjedhore.

Lajmi u bë i ditur për gazetën “Panorama” nga burime zyrtare të Gjykatës së Shkallës së Parë të Tiranës, sipas të cilave ky numër pritet të rritet edhe në ditët në vazhdim deri në 1 korrik, ku është edhe afati i fundit i regjistrimit të tyre. Regjistrimi i kërkesave në gjykatë ka rreth një javë që ka nisur, por burimet saktësojnë se në ditët e para fluksi i tyre ka qenë i pakët, ndërkohë që ai ka ardhur duke u rritur.

Ankesat
Vetëm ditën e djeshme janë dorëzuar në sekretarinë e kësaj gjykate rreth 400 kërkesa nga banorë të zonës zgjedhore, numër 33 në Tiranë, të cilët kishin verifikuar se nuk rezultonin të regjistruar në listat zgjedhore. Banorët e kësaj zone kanë qenë të shoqëruar dje në gjykatë edhe nga kandidati i Partisë Demokratike për këtë zonë, Lulzim Basha. Rreth 540 kërkesa nga numri total i dorëzuar në gjykatë u përkasin studentëve, të cilët i janë drejtuar sërish gjykatës në mënyrë individuale pas refuzimit të kërkesës së parë për regjistrimin e tyre në grup. Burime zyrtare nga Gjykata e Tiranës kanë bërë të ditur se, kërkesat pasi dorëzohen në sekretarinë e gjykatës hidhen menjeherë në short ku përcaktohen, gjyqtarët, të cilët i gjykojnë në mënyrë të përshpjetuar brenda një seance. Gjatë ditës së djeshme janë gjykuar disa kërkesa, por vetëm për 20 qytetarë gjykata ka vendosur pranimin e kërkesës për regjistrim.

Dokumentacioni
Një pjesë e mirë e qytetarëve, të cilët kanë kërkuar të regjistrohen janë refuzuar, pasi nuk kanë paraqitur para gjykatës dokumentacionin e nevojshëm, i cili do të vërtetonte pretendimet e tyre. Në bazë të ligjit, qytetarët, të cilët kanë vërejtur se nuk janë regjistruar në listën përfundimtare të zgjedhësve, krahas kërkesës për t’u regjistruar duhet t’i paraqesin gjykatës një certifikatë personale lindjeje, vërtetim nga njësia bashkiake, bashkia apo komuna, për të vërtetuar vendbanimin. Për t’u marrë parasysh ankesa duhet edhe një vërtetim nga Komisioni Zonal Zgjedhor, i cili vërteton se emri i personit ankues nuk gjedet në listën përfundimtare të zgjedhësve dhe në numrin e qendrës së votimit ku ai duhet të votojë. Në rast se mungon ndonjë nga dokumentet e mësipërme, gjykata e refuzon kërkesën e drejtuar nga qytetari për t’u regjistruar deri në plotësimin e plotë të dokumentacionit të kërkuar. Me një vendim të veçantë afati i fundit i pranimit të kërkesave është përcaktuar data 1 korrik 2005, ora 24:00.

Vetëm një Fatos Nano
Asnjë shqiptar tjetër me të drejtë vote nuk e ka emrin Fatos Nano. Sipas listave të Ministrisë së Pushtetit Vendor, në të gjithë Shqipërinë ka vetëm një Fatos Nano që do të shkojë të votojë dhe ky është kryeministri dhe kreu i PS. Asnjë shqiptar tjetër mbi 18 vjeç nuk rezulton me këtë emër dhe mbiemër
Votojnë 5 Sali Berisha
Janë pesë njerëz që kanë emrin e ish-presidentit, Sali Berisha. Sipas listave të Pushtetit Vendor, 2 nga Sali Berishat do të votojnë në Durrës, dy në Tiranë, ku është edhe kreu i PD dhe një do të votojë në Lezhë. Sipas të dhënave asnjë shqiptar tjetër mbi 18 vjeç dhe me të drejtë vote nuk ka emrin Sali Berisha.
Kreu i LSI, voton Ilir Metaj
Ish-kryeministri do të votojë në zonën 33, bashkë me Monika Kryemadhin. Në listat e votimit të kryeqytet ai është regjistruar me emrin Ilir Metaj. Qendra e votimit në zonën 33 të kryeqytetit është e vendosur në një ambient publik. Mbiemri i ish-kryeministrit është bërë publik si Metaj, gjatë zgjedhjeve të vitit 2003.
Leka Zogu s’është në listë
Leka Zogu nuk ka të drejtën të votojë në këto zgjedhje. Kërkimi në listat e publikuara në internet nga Ministria e Pushtetit Vendos tregoi zero votues me këtë emër. Kjo do të thotë se Leka Zogu nuk ka mundësi të votojë as për partinë e tij. Partia Lëvizja e Legalitetit që udhëhiqet nga Leka Zogu është më e vjetra në Shqipëri.

Faqe 7

Kreu i LZHK-së prezanton Leknikën në Postribë
Leka Zogu: Postriba ka qenë gjithnjë djathtas

Lëvizja për Zhvillim Kombëtar ka prezantuar dje në takimet e saj elektorale, këtë herë në Postribë të Shkodrës, kandidatin për deputet në zonën zgjedhore nr. 2, Dorian Leknikaj. Në takimet e zhvilluara ishte i pranishëm vetë Leka Zogu I, i cili u shpreh se “Postriba ka përvetësuar në historinë e saj moralin më të lartë të patriotizmit, duke mbështetur që në fillimet e saj aspiratat evropiane të qeverisjes së mbretit Zog”, duke theksuar se Postriba ka qenë gjithnjë djathtas, ai u shpreh i sigurt se do të zgjidhen në këtë zonë të djathtë me aspiratat e një të djathte të konsoliduar. Nga ana tjetër, mbreti Leka Zogu I ftoi gjithë banorët e zonës që të votojnë për LZHK-në dhe kandidatët e saj, pasi sipas tij, shqiptarët duhet të ndahen nga e kaluara dhe rrotacionet, apo rikthimet në domosdoshmërinë për të pasur një ndryshim të vërtetë në këto zgjedhje. Gjithashtu Leka Zogu I ka shprehur bindjen se elektorati e ka kuptuar çoroditjen elektorale që kanë sjellë dy forcat e mëdha. “Ne vijmë me bindje dhe ju kërkojmë të votoni bindjet tona”, përfundoi Zogu ndërsa vetë kandidati Leknikaj shprehu besimin, se elektorati do ta përkrahë, pasi ai do të angazhohet seriozisht për zonën dhe banorët e saj. “Ju do të gjeni një zë të fortë për problemet tuaja në Parlament”, tha ai.

27 June 2005 http://www.panorama.com.al/

Faqe 2 - Politikë

zgjedhjet parlamentare

sondazhi

“Mjaft” e “Gallup International” publikojnë sondazhin e dytë elektoral

Sondazhi: PD fiton 35%, PS 34% LSI 10% e LZHK 3%

marko caka/ ATHINE

Sondazhi i dytë i “Mjaft” dhe Gallup International nxjerr fituese të zgjedhjeve të tre korrikut PD-në, me 35% kundrejt PS-së me 34%, e ndjekur nga LSI-ja me 10 %, LZHK dhe PR me nga 3%.

Në rezultatet e sondazhit të parë të “Mjaft”-it dhe Gallup International, PS-ja dhe PD-ja ndanin të njëjtën përqindje me nga 34%, të ndjekura nga LSI-ja me të njëjtën përqindje si në sondazhin e dytë, 10%. Krerët e lëvizjes “Mjaft” dhe Marchela Abrasheva, drejtore ekzekutive e BBSS-së, anëtare e Gallup International, kanë shpallur dje rezultatet dhe detajet e zhvillimit të këtij sondazhi.

Sondazhi
Sondazhi i “Mjaft” dhe Gallup International për zgjedhjet e tre korrikut në Shqipëri, është zhvilluar në harkun kohor mes 13 dhe 20 qershorit 2005. Rezultatet e mësipërme janë nxjerrë nga sondazhi, duke iu përgjigjur pyetjes “nëse zgjedhjet do të zhvilloheshin tani, për cilën parti do të votonit”. Ndërsa pyetjes se “cila parti do t’i fitonte zgjedhjet e tre korrikut” të anketuarit i janë përgjigjur, duke renditur sërish PD-në në krye me 40%, të ndjekur nga PS-ja me 37%, më pas LSI—ja me 9% dhe LZHK-ja me 1%. Në pyetësorin e sondazhit të dytë të “Mjaft-it” dhe Gallup International pyetja për preferencat për politikanë të ndryshëm është hequr. Pas polemikave të shumta në ambientet politike dhe mediatike pas renditjes së politikanëve në sondazhin dytë, duket se drejtuesit e lëvizjes “Mjaft” dhe realizuesit e sondazhit kanë menduar ta shmangin këtë pyetje, duke u përpjekur të shmangin edhe kontestimet ndaj sondazhit.

Çështja “Gallup”
Drejtoresha ekzekutive e BBSS-së, Gallup International, Marchela Abrasheva, ka reaguar lidhur me kontestimet që iu bënë sondazhit të parë të zhvilluar prej tyre në Shqipëri. Për reagimet e Gallup Organization, Abrasheva tha dje, se ka dy organizata me të njëjtin emër, “Gallup” por ato janë të ndryshme. Abrasheva tha se kjo nuk është një arsye për të kontestuar rezultatet e sondazhit të zhvilluar në Shqipëri. “E kuptoj se emri është i njëjtë, por janë dy shoqëri krejt të ndryshme. Nuk kemi të bëjmë me keqpërdorim të emrit Gallup. BBSS operon ligjërisht në territorin e Bullgarisë dhe nuk ka të bëjë më organizatën Gallup. Nëse Gallup Organization kërkon të zhvillojë aktivitete në Shqipëri, kjo është e lejueshme në bazë të ligjit shqiptar, natyrisht që mund ta bëjë”, tha dje Abrasheva. Por ajo ka pohuar gjithashtu se ekziston një çështje ligjore e hapur midis Gallup International dhe Gallup Organization, duke shtuar se ky konflikt ligjor mes dy organizatave nuk përfshin vendet e rajonit.
“Ka një çështje ligjore midis këtyre dy organizatave. Nuk mund të komentoj për këtë, por mund të garantoj se janë dy organizata krejtësisht të ndryshme, për këtë arsye nuk ka ndonjë problem për sondazhin se është përdorur emri. Nuk mund të bëhet një vendim ligjor se anëtarët e organizatës janë në vende të ndryshme. Nuk ka asnjë çështje ligjore për rajonin apo për Shqipërinë në veçanti”, tha dje Abrasheva. Ajo tha gjithashtu se nuk ka asnjë arsye që puna organizmit në të cilin bën pjesë, të vihet në dyshim për arsye ligjore apo morale në Shqipëri, Bullgari apo në një vend tjetër.

Presionet e politikës
Drejtuesit e Lëvizjes “Mjaft”, kanë rikonfirmuar dje se kanë pasur presione nga politika para publikimit të sondazhit, duke deklaruar se këto presione nuk kanë pasur asnjë ndikim në rezultatet e këtij sondazhi. Ndërsa titullarja e BBSS Gallup International, pyetjes se a përbën problem për manipulim të sondazhit politizimi i lëvizjes “Mjaft”, i është përgjigjur duke deklaruar se çdo njeri është i lirë të ketë pozicionin e tij politik, duke mohuar në mënyrë të prerë se ka pasur ndikim në manipulimin e sondazhit për arsye bindjesh politike. “Të dhënat janë të përfaqësuara dhe mbajnë të gjitha standardet e duhura. Ato janë vënë në shërbim të publikut. Siç mund ta shikoni, asnjëri nga ne nuk po bën komente politike lidhur me këtë sondazh. Edhe në Londër patëm reagime për pëlqime dhe mospëlqime për sondazhin dhe kjo është normale”, tha Abrasheva.

26 June 2005 http://www.panorama.com.al/

Faqe 6 - Politikë

zgjedhjet parlamentare

sondazhi

Albanian Research Group shpall rezultatet e sondazhit të parë për 3 korrikun

ARG: Në Tiranë kryeson PD me 39%

Në koalicion PS dhe LSI me 39 për qind, LZHK 4 për qind

Luljeta Progini

Shpallen rezultatet e sondazhit të parë për zgjedhjet e 3 korrikut në kryeqytet.

Sondazhi i kryer nga ARG (Albanian Research Group) ka nxjerrë fituese të zgjedhjeve të tre korrikut në Tiranë PD-në me 39% e ndjekur nga PS-ja me 34%, LSI me 9% dhe LZHK me 4%. Nga përgjigjet e të anketuarve mbi pyetjen se për cilën parti (proporcional) do të votojnë, renditet sërish e para PD-ja me 33%, e ndjekur nga PS-ja me 30%, LSI-ja me 14 % dhe LZHK-ja me 7%. Kufiri i gabimit i parashikuar në rezultatet e këtij sondazhi, sipas ARG-së, është +/- 3 për qind. Pyetjes nëse duhet të japë ose jo dorëheqjen kryetari i partisë që humbet zgjedhjet, 61% e të intervistuarve i thanë me “po”, ndërsa 22% e tyre i thanë “jo”. Sondazhi i ARG-së për zgjedhjet e 3 korrikut është i treti pas sondazhit të kryer nga NDI-ja më shumë se një muaj më parë dhe ai i lëvizjes “Mjaft”, rezultatet e të cilit u publikuan rreth dy javë më parë.

Sondazhi
Në njoftimin zyrtar të ARG-së, në sondazhin e kryer prej tyre, janë intervistuar 379 persona në kryeqytet. Sipas njoftimit për shtyp sondazhi është bazuar në një vrojtim me zgjedhje kampionesh të rastësishme dhe rezultatet e tij janë përmbledhje statistikore e opinioneve të publikut të kryeqytetit. Në njoftimin për shtyp të ARG-së thuhet se ky sondazh nuk duhet të shihet si një parashikim i rezultatit të zgjedhjeve parlamentare të 3 korrikut 2005, pasi përfaqëson vetëm opinionin e qytetarëve të Tiranës. Në pyetësorin e sondazhit të ARG-së është përfshirë edhe pyetja, se për cilin koalicion qeveritar pas këtyre zgjedhjeve do të votojnë, dhe sipas përgjigjeve është renditur i pari koalicioni midis PS-së dhe LSI-së me 39% i ndjekur nga koalicioni midis PD-së dhe LZHK-së me 30%. Koalicioni midis PD-së dhe LSI-së me 14% dhe koalicioni midis PS-së dhe LZHK-së me 2%.

Koha e zhvillimit të sondazhit
Procesi i intervistimit të 379 individëve në kryeqytet, të cilët janë pyetur se për kë do të votojnë në zgjedhjet e 3 korrikut është realizuar në periudhën kohore 13-19 qershor 2005. Sipas ARG-së ky sondazh tregon “një fotografi” të opinioneve të qytetarëve gjate periudhës 13 –19 qershor 2005, në qytetin e Tiranës. Ndërkohë që, sipas njoftimit, për shtyp të intervistuarit u përzgjodhën në mënyrë të rastësisshme dhe janë të shpërndarë sipas ndarjes gjeografike të zonave elektorale të qytetit.

Misioni ARG
E krijuar brenda këtij viti, ARG është një OJF, e cila ka si objekt të saj studime dhe anketime në fusha të ndryshme për probleme të mprehta të shoqërisë shqiptare. Në njoftimin për shtyp të kësaj OJF, thuhet se pranë këtij misioni kërkimesh janë mbledhur së bashku ekspertë të disiplinave të ndryshme, që me njohuritë dhe eksperiencën e tyre dëshirojnë të zgjerojnë gamën, por edhe të avancojnë nivelin e studimeve dhe kërkimeve për probleme që prekin shoqërinë. Sidoqoftë aktiviteti i ARG, thuhet në deklaratë, do të ketë dy drejtime kryesore: studimet dhe anketimet. Studimet do të fokusohen në problemet sociale dhe ekonomike që prekin shoqërinë shqiptare si politikat sociale, tregu i punës, analiza e strategjive të ndryshme dhe implemetimi i tyre, politikat ekonomike. Ndërsa anketat do të ofrojnë një njohje më të mirë për aspekte më speficikë dhe do të mbulojnë fusha të ndryshme si, analizat e tregut, situatat zgjedhore, do të vlerësojnë opinionin e publikut për çështje të mprehta. Ndërkohë, ARG-ja ka kryer sondazhe elektronike për monitorimin e mediave për fushatën elektorale.

sondazhi

sipas kandidateve
PD 39%
PS 34%
LSI 9%
LZHK 4%
Të tjera 4%

sondazhi sipas partive

PD 33%
PS 30%
LSI 14%
LZHK 7%
Të tjera 7%

sondazhi preferenca per kryeministrin
Sali Berisha 32% Fatos Nano 23% Ilir Meta 14% Leka Zogu 4% Edi Rama 9% Bamir Topi 2% Dashamir Shehi 1% Të tjerë 5%

sondazhi preferenca per koalicionet

PS - LSI 39%
PD - LZHK 30%
PD - LSI 14%
PS - LZHK 2%
PS - PD 5%
Tjetër 10%

sondazhi zevendesimi i nanos e berishes
Edi Rama 64%
Ermelinda Meksi 15%
Gramoz Ruçi 4%
Kastriot Islami 3%
Të tjerë 14%
Bamir Topi 51% Jozefina Topalli 18% Lulzim Basha 13% Ridvan Bode 5% Të tjerë 12%

Faqe 8 - Politikë

Flet Skënder Zogu, nipi i mbretit, kryesues i grupit nga diaspora

“LZHK është rruga e tretë politike”

Zogu: Turp që birit të mbretit nuk i dhanë një shtëpi të vogël

Blerina Sinani

Skënder Zogu, një nga pinjollët e familjes mbretërore shqiptare, ish-drejtor shtypi i oborrit mbretëror ka ardhur nga Parisi në Shqipëri për t’u gjendur pranë njeriut të tij më të afërt, Leka Zogut, i cili kryeson formacionin e ri politik, LZHK.

Skënder Zogu gjithashtu kryeson grupin e mbështetësve të LZHK-së që kanë ardhur nga diaspora. Në një intervistë për “Panorama” Skënder Zogu shprehet se, nga 3 korriku shpreson një thyerje të bipolaritetit politik PD-PS, të cilët, sipas tij vijnë nga e njëjta bazë komuniste dhe se LZHK e LSI do të jenë dy forca të reja që do të krijojnë një hapësirë reale demokratike. Lidhur me çështjen kombëtare, Zogu thekson se as PD dhe as PS nuk e kanë shpallur qëndrimin e tyre pro pavarësisë së Kosovës.

Cilat janë motivet që ju kanë risjellë në Shqipëri?
Unë jam kushëriri i mbretit Leka, jam nipi i mbretit Ahmet Zog. Kam ardhur nga Franca për të marrë pjesë në fushatën e LZHK-së, si dhe për të takuar familjen e gjithë miqtë në Shqipëri. Me këtë rast kam pasur dëshirë të takoj sa më shumë bashkatdhetarë, për të biseduar me ta për çështjen kombëtare. Në këtë fushatë unë personalisht si dhe disa të tjerë që kanë ardhur nga SHBA-ja, Belgjika dhe Franca për të përkrahur Lekën, dëshirojmë të japim kontributin tonë moral, për të shprehur dëshirën dhe shpresën tonë se ka për të ndodhur një ndryshim i madh në Shqipëri pas zgjedhjeve.

Cili do të jetë kontributi juaj konkret në fushatën e LZHK-së?
Kontributi im do të jetë në faktin se do t’i tregoj popullit shqiptar se ne jemi për ndryshim, shqiptarët që jetojnë dhe punojnë jashtë atdheut kanë dëshirë për ndryshim, se jemi bashkë me ata që mendojnë se shteti ka nevojë për ndryshim. Kjo është fjala jonë.

Si e keni vlerësuar krijimin e LZHK-së?
Unë e kam vlerësuar krijimin e LZHK-së si një rrugë të tretë politike, ose si një mundësi e re për popullin shqiptar, si një shpresë të re, sepse deri tani politikanë të këtij shteti, të atdheut tonë, kanë dështuar dhe nuk kanë punuar për interesat e popullit shqiptar, por për interesat e tyre personale. Për shembull, për çështjen e pronave, ligji i pronave ende nuk është zbatuar, padrejtësitë kanë vazhduar, shteti shqiptar kritikohet dhe nga ndërkombëtarët sepse në 15 vite reformat nuk janë bërë si duhet. Në këtë situatë LZHK-ja është një lëvizje e re.
Mbreti Leka ka vepruar gjithmonë për të mirën e popullit shqiptar dhe ai është një figurë në politikë. Nuk ka pasur probleme në Shqipëri apo dhe jashtë atdheut. Ka bërë gjithmonë sakrifica për të mirën e popullit tonë dhe ka mbrojtur interesat kombëtare për Kosovën apo shqiptarët e Maqedonisë. Kam dëgjuar në fushatë që dy partitë e mëdha sot në Shqipëri, PS dhe PD nuk e kanë përmendur asnjëherë pavarësinë e Kosovës dhe as e kanë në program. LZHK-ja këtë pikë e ka në programin e saj dhe ka marrë parasysh se do të veprohet për pavarësinë e Kosovës, dhe është detyra e çdo shqiptari ta mbështesë këtë formulë. Mbreti Leka këtu është në atdheun e tij, por nuk ka i kanë dhënë një shtëpi. E kanë lënë të paguajë qira dhe nuk ia kanë dhënë të gjithë pasurinë e babait të tij. Eshtë turp që sot të mos i japin të birit të Ahmet Zogut, që krijoi shtetin shqiptar, asnjë një shtëpi të vogël në të cilën të mund të jetojë me dinjitet. Kjo tregon se politikanët e sotëm kanë qëllime të tjera, duan ta fusin në një situatë të tillë ku mbreti Leka të mos ketë mundësi të veprojë gjerësisht dhe të ketë një jetë familjare normale. Por, jashtë atdheut shqiptarët nga diaspora besojnë se do të bëhet ndryshimi në Shqipëri. Edhe ne kemi shumë shpresë se populli shqiptar këtë herë ka për të votuar në një drejtim tjetër. Unë u bëj thirrje të gjithëve të mos abstenojnë.

Ka akuza ndaj LZHK-së për orientimin e saj politik?
Unë e shoh LZHK-në si një forcë të djathtë të vërtetë dhe akuzat, sipas së cilave, kjo parti bën lojën e Fatos Nanos ose të ndonjë tjetri janë akuza të pavend. Po të shihet dhe lista e kandidatëve të LZHK, 50 për qind e tyre vijnë nga shoqëria civile, gjë që nuk ka ndodhur asnjëherë deri më sot në Shqipëri. 25% janë të Partisë së Legalitetit dhe një përqindje tjetër nga parti të tjera. Kjo argumenton se LZHK-ja është një forcë e djathtë e vërtetë, ndaj ta akuzosh është një gjë e pavend. Kur krijohet një lëvizje si Lëvizja për Zhvillim Kombëtar, një lëvizje e pavarur dhe pa ndihmë nga shteti, nuk bëhen traktate parazgjedhore. Pas nxjerrjes së rezultatit të zgjedhjeve, LZHK-ja do të ulet në tavolinë dhe do të vendosë për një koalicion paszgjedhor për interesin e kombit.

Mendoni se LZHK-ja do të marrë vota aq sa për t’u bërë një faktor pas zgjedhjeve?
Unë mendoj se si një forcë e re ka për të hyrë në Parlament. Ky është hapi i parë dhe s’mund të them më tepër pasi nuk kam jetuar këtu kohët e fundit, por jam i bindur se LZHK-ja është një forcë që do t’i japë një drejtim të ri qeverisjes shqiptare në këtë shtet me mbretin Leka I në krye. LZHK-ja do të sjellë një ndryshim të vërtetë politik, por ardhjen e saj në pushtet e kanë në dorë vetëm votuesit. Ne u bindemi atyre dhe kemi shpresë se një rezultat pozitiv do të dalë në këto zgjedhje.

Si e vlerësoni ju situatën politike, duke pasur parasysh krijimin e LZHK-së dhe LSI-së si forca të reja politike?
Unë mendoj se të dyja partitë kryesore politike sot në vend, PD dhe PS kanë dalë nga një vend, nga komunizmi. E djathta dhe e majta në Shqipëri, që kanë qenë në pushtet, nuk kanë bërë reformat që duheshin për popullin, i cili është lënë në mjerim dhe shumë politikanë janë pasuruar në mënyrë të menjëhershme. Kjo tregon se ka pasur korrupsion dhe padrejtësi ndaj popullit. Ne na vjen shumë keq që të rinjve sot u duhet të largohen nga Shqipëria për të sigurur të ardhmen e tyre. Besoj se dy partitë kanë përgjegjësi të mëdha ndaj popullit. Ndoshta një ditë ato mund ta ndryshojnë sjelljen e tyre, por unë nuk kam aspak besim te PS-ja dhe më vjen keq që ajo nuk ka mbrojtur interesat kombëtare, qoftë për Kosovën, qoftë për Çamërinë. Edhe PD-ja heshti kur u shtrua çështja e Çamërisë në Parlament.

Mendoni se këto forca politike mund ta çojnë vendin drejt integrimit?
Që ta çojnë vendin drejt integrimit këto forca duhet të plotësojnë kushtet që ka vënë Evropa. Mos harroni se deri më sot Evropa e ka kritikuar qeverinë shqiptare për mosplotësimin e standardeve të kërkuara. Vetëm kur të plotësohen këto standarde mund të integrohemi në Evropë. Tani është koha që të bëhen reformat dhe të plotësohen kushtet për të hyrë në Evropë.

Si i vlerësoni zhvillimet politike në 15 vite demokraci?
Unë nuk besoj se vendi ka hyrë në rrugën e demokracisë së vërtetë. Pse? Sepse drejtësia nuk ka ecur mirë, çështja e pronave është ende e pazgjidhur. Zgjedhjet janë manipuluar. Çështja e referendumit që u bë në vitin 1997, fitoi monarkia dhe e kanë manipuluar nën presionin e të huajve më duket. Unë besoj se në këta 15 vjet është humbur shumë kohë dhe tranzicioni ka vazhduar shumë gjatë, janë bërë shumë padrejtësira.

Dashamir Shehi hedh poshtë akuzat e Berishës
“Nuk jemi paterica të Nanos”

LZHK-ja ka shprehur dje shqetësimin e saj në lidhje me problemin ku, sipas saj, në shumë zona elektorale kandidatëve për deputetë të kësaj lëvizjeje nuk iu ofrohen listat e zgjedhësve nga autoritetet lokale. Për këtë çështje, përfaqësues të kësaj lëvizjeje janë ankuar pranë KQZ-së. Nga ana tjetër, drejtori ekzekutiv i fushatës elektorale të LZHK-së, Dashamir Shehi, u është përgjigjur akuzave të kreut demokrat, Berisha dhe të disa aventurierëve dhe të korruptuarve, sipas tij, se LZHK-ja nuk tërhiqet nga aspiratat e saj politike për të ndërtuar një të djathtë të vërtetë në vend, një shtet serioz dhe me dinjitet për shqiptarët. “Reagimet e Berishës nuk janë gjë tjetër veç se shenja nervozizmi se LZHK-ja është një realitet i madh politik dhe se kundërshtarët e Fatos Nanos janë drejtuesit e LZHK-së, ndërsa aleatët dhe bashkëpunëtorët e Nanos, ndodhen brenda listave të PD-së”, tha dje Shehi. Gjithashtu ai theksoi se elektorati i djathtë shqiptar po e kupton gjithnjë e më shumë se qeverinë socialiste e rrëzojnë vetëm votat e LZHK-së dhe se votat për aleatët e PD-së janë vetëm vota për të futur në Parlament persona, të cilët, sipas tij, Berisha i ka konsideruar si trafikantë, paterica të Nanos dhe kriminelë politikë. Nga ana tjetër Shehu, duke iu drejtuar rivalit të tij në zonën zgjedhore 40, kandidatit të PD-së, Gëzim Karapici, i kërkoi të mbajë qëndrim korrekt politik, të mos ofendojë ndërgjegjen dhe dinjitetin e qytetarëve të Tiranës, në shërbim të njerëzve që nuk kanë asnjë lidhje dhe respekt për komunitetin tiranas.

25 June 2005 http://www.panorama.com.al/

Faqe 6/7 - Politikë

forum

zgjedhje 2005

Profili i kandidatëve Mustafaj, Rama, Halebi dhe Borova

Zona 32, sfida e diplomatit me gazetarin

Blerina Sinani

Në zonën 32 kandidojnë figura të njohura të politikës dhe artit shqiptar. Besnik Mustafaj, një nga themeluesit e PD-së dhe drejtues i politikave ndërkombëtare të kësaj partie është gjithashtu edhe një nga shkrimtarët më të përkthyer të viteve të fundit. Larg profilit të politikanit militant, Mustafaj hyn në garë me një motiv të fortë politik dhe personal. Në sloganin e tij, vendosur në posterat e shumtë të rrugicave të zonës ku kandidon shkruhet “Koha për ndershmëri”. Nisur nga filozofia humane e politikës, Mustafaj kërkon të jetë sa më pranë realitetit shoqëror dhe nevojave të tij. I bindur se koha për ndryshim, pikë së pari kërkon rikthimin e besimit te zyrtarët dhe institucionet, ai premton pikërisht ndershmërinë. Mustafaj nuk është thjesht një emër i njohur në Tiranë, por edhe ish-kandidati për kryetar bashkie, i cili u mund nga Edi Rama me një rezultat të kontestuar nga opozita. Nga ana tjetër, përballë tij kandidon sërish një figurë e re politike e PS-së, i cili ka mbajtur edhe poste në kabinetin Nano e Meta. Posti i ministrit të Rendit e konsumoi shumë imazhin e gazetarit Luan Rama, duke i dhënë nga ana tjetër më shumë aksione politike në gjirin e militantëve. Rama është gjithashtu një gazetar i njohur. Borova dhe Halebi janë gjithashtu dy figura interesante që garojnë në zonën 32 në Tiranë. Përveç një incidenti gara në këtë zonë ka shkuar mirë, duke dëshmuar njëherësh nivelin qytetar të kandidatëve.

Zona 32 përfshin disa nga lagjet e vjetra të kryeqytetit. Ajo përmbledh “Rrugën e Dibrës”, rrugën “Qemal Stafa”, “4 Dëshmorët”, Luigj Gurakuqi dhe “Riza Cerova”.

Në pjesën më të madhe të saj ajo popullohet nga banorë autoktonë dhe vetëm një pjesë e vogël nga të ardhur. Infrastruktura është një nga problemet më emergjente, ku premtohet ndërhyrje nga kandidatët, gjithashtu dhe papunësia e lidhur kjo ngushtë me varfërinë.

1-Cilët mendoni se do të jenë zgjedhësit që do të votojnë për ju?
Besnik Mustafaj (PD). Zgjedhësit që do të votojnë për mua janë zgjedhës të dy kategorive; janë pjesa e djathtë tradicionale, që nuk është e vogël në këtë zonë dhe që kanë besuar gjithmonë se alternativa më e mirë në këtë vend është PD-ja dhe këtë e kanë besuar që në vitin 1991. Grupi tjetër janë ata që janë lodhur nga ky regjim korrupsioni dhe shkatërrimi ekonomik dhe moral i shoqërisë, dhe që shohin ndryshimin jo vetëm si domosdoshmëri vetëm për zonën e tyre, por për mbarë vendin.
Luan Rama (PS). Një pyetje jo vetëm intriguese por edhe interesante, pasi më jep mundësinë të konfirmoj paraprakisht besimin se për mua do të votojë një pjesë e madhe e banorëve të zonës, pasi kjo zonë në kuptimin e vërtetë është Tirana e Tiranës. Besoj shumë edhe në votën e banorëve të rinj, që janë bërë pjesë e zonës. Në mënyrë të veçantë dua të them që shumica e votuesve janë të rinj, nga ata që përgjithësisht kanë qëndruar indiferentë, por edhe që kanë votuar më parë kundër PS-së, sepse edhe ata shohin tek unë një përfaqësues dinjitoz, zëdhënës real të problemeve, jo deputetin që kërkon një vend në Parlament, por një mik.
Armond Halebi (LSI). Pjesa më e madhe e banorëve të zonës është tiranase, ndërsa të ardhurit përbëjnë një përqindje të vogël. Ky elektorat në zgjedhjet e kaluara ka votuar djathtas, por duhet thënë se një pjesë e madhe nuk kanë marrë pjesë në votime. Unë jam tiranas i lindur dhe rritur në këtë zonë, kam njerëzit e mi, miqtë dhe të afërmit, si i thonë fjalës, më njohin dhe gurët. Nga ana tjetër, LSI-ja këtu ka mbi 400 anëtarë të saj me një shtrirje shumë të mirë organizative në të gjithë zonën dhe qindra simpatizantë të tjerë, pjesa më e madhe e të cilëve janë “indiferentët” e politikës së djeshme. E bëra këtë panoramë për të shpjeguar më mirë elektoratin që do të votojë për mua: tiranasit, të lëkundurit dhe të gjithë të ardhurit që për vite me radhë janë ndjerë krejtësisht të harruar nga politika.
Faruk Borova (LZHK). Së pari do të jenë ata që kanë votuar për PD-në, të cilët me programin e saj dhe me zbatimin e tij të cunguar dolën të zhgënjyer. Pra mendoj se LZHK-ja është forca politike që u ka munguar tyre, me të cilën e ndiejnë veten komod dhe ndiejnë se mund të jetë ajo që do të zbatojë programin e saj, i cili natyrisht nuk është i cunguar.

2-Pikat kryesore ku bazohet platforma juaj elektorale?
Besnik Mustafaj (PD). Platforma ime është pjesë e platformës së PD-së dhe e të djathtës shqiptare, që do të thotë se një nga pikat e saj më të forta është ndërtimi i shtetit social. Po kështu, zona ka dhe dy probleme të tjera të mëdha; një pjesë e banorëve kërkojnë legalizim sepse banojnë në zonë informale. PD-ja me programin e saj brenda gjashtë muajve do të mbyllë procesin e legalizimit me tarifa nga 100 deri 400 mijë lekë të reja, të cilat janë krejtësisht të pranueshme nga kjo qytetari, dhe nga pjesa tjetër që janë ish-pronarë, tiranas të lindur dhe që kanë probleme me pronësinë, dhe që në programin e PD-së parashikohet kompensimi 100 për qind i pronave të tyre.
Luan Rama (PS). Drejtimet themelore ku është mbështetur veprimi im politik dhe elektoral kanë në fokus krijimin e një klime besimi se fitorja është në anën time, që do të thotë dhe në anën e tyre, dhe mbështetja mbi një projekt real të integrimit të zonës në projektet e zhvillimit, në të cilat ka hyrë Tirana. Projekte për të zgjidhur përfundimisht problemet e mbartura të infrastrukturës, punësimit, sepse është zona më pranë qendrës së Tiranës në aspektin gjeografik, por më larg saj në aspektin e zhvillimit, sepse deputeti që ka qenë dhe përfaqësuesit e opozitës në minibashki në mënyrë të qëllimshme nuk kanë gjetur vullnetin për të bashkëpunuar me Bashkinë e Tiranës dhe qeverinë që rrugët, lulishtet, apo pallatet e reja të ishin ndërtuar dhe në këtë zonë. Platforma ime është zgjidhja reale e problemeve dhe jo premtim hipotetike për të mos pasur më kurajën të ballafaqohen sërish me votuesit.
Armond Halebi (LSI). Duket si paradoksale, por platforma ime elektorale ka një bosht; pronësinë, por të parë në dy pamje, nga njëra anë kthimin e pronave dhe të drejtave të pronarëve që në këtë zonë janë shumë dhe nga ana tjetër legalizim dhe kthimin në pronarë të banorëve në zonën informale.
Faruk Borova (LZHK). Ne nuk kopjojmë programe të forcave të tjera që kanë bërë koalicione dhe unë do të përmend dy momente kryesore. Së pari, slogani ynë “Në bëjmë shtet”, që do të thotë se ne bëjmë shtet për të gjithë sepse deri më sot shteti është për një pjesë të vogël të popullsisë, të cilët i mbron me fanatizmin më të madh, kurse pjesa tjetër është e zbuluar. Pra do të bëjmë shtet për të gjithë. Së dyti, është çështja e pronave ku dallojmë nga të gjitha forcat e tjera, pasi kanë të njëjtin mentalitet.

3-Çfarë parashikohet në platformën tuaj për infrastrukturën?
Besnik Mustafaj (PD). Zona 32 ku unë kandidoj është një zonë me shumë probleme, ku më kryesoret janë papunësia, por edhe infrastruktura sociale. Mungojnë çerdhet, kopshtet, qendra shëndetësore dhe shkolla. Ndaj unë theksoj se prioritet do të jenë shkollat dhe punësimi. Eshtë një zonë, e cila ka probleme të mëdha në infrastrukturë, pasi ka rrugë të shkatërruara dhe PD-ja do të ketë një program shumë serioz për rindërtimin e rrugëve.
Luan Rama (PS). Ka një projekt tërësor të zhvillimit të kësaj zone dhe ajo çfarë ofron ai është një mjedis qytetar më modern se qendra e Tiranës. Problemet e mëdha në infrastrukturë kanë filluar të hyjnë në rrugën e zgjedhjes sepse për shumicën e rrugëve janë gjetur fondet, ka filluar puna në rrugën “Hoxha Tasin”, “Siri Kodra”, për rikonstruksionin si dhe për një kolektor të madh për të zgjidhur përmbytjen në zonën informale, ashtu si shumë shpejt do të fillojë puna për zgjerimin e unazës nga stacioni i trenit te Farmacia.10 dhe pastaj te Bërryli. Këto janë punë që do të nisin pas zgjedhjeve, ashtu sikur ka projekte të tjera që fillojnë këtë vit dhe mbarojnë në fund të vitit 2006, si zgjerimi i “Rrugës së Dibrës”, “Qemal Stafa”, “4 Dëshmorët”, “Luigj Gurakuqi”, “Riza Cerova”, etj, që janë arterie të rëndësishme.
Armond Halebi (LSI). Shikoj që në përgjithësi kandidatët e bazojnë platformën e tyre elektorale në problemet e infrastrukturës, duke parë gjendjen vërtet të mjeruar në të cilën ajo ndodhet. Madje gjatë fushatës ka njerëz që përfitojnë nga “bujaria” e kandidatit për të kërkuar shtrimin e një rruge apo vënien e një pompe uji. Në zonën ku kandidoj, infrastruktura, jo vetëm ajo rrugore, është në një gjendje skandaloze dhe pse kjo zonë ka pasur një deputet, i cili ka premtuar 4 vjet më parë që do ta ndryshonte gjendjen. Unë kam bërë vetëm një premtim; në katër vitet e ardhshme kjo zonë do të jetë pa asnjë dyshim zona me infrastrukturën më të plotë e më bashkëkohore e Tiranës.
Faruk Borova (LZHK). Ne kemi një program politik dhe nëse unë do të zgjidhem deputet do të luftoj në maksimum për zbatimin e tij. Kjo zonë në zemër të Tiranës ku 85% e popullsisë janë autoktonë, dhe infrastruktura është në gjendje më të keqe se zonat e tjera, si rrugët e para e dytësore, sistemi i ujit të pijshëm dhe energjisë elektrike, kanalizimet që kanë vite që janë bërë. Ka nevojë për ndërhyrje, por unë nuk u kam thënë asnjëherë zgjedhësve, që sapo të bëhem deputet do t’i zgjidh këto probleme, sepse s’e kam në natyrë të gënjej. Unë kam thënë se i kam evidentuar problemet e zonës dhe pas zgjedhjeve do bëj të pamundurën që këto probleme të gjejnë zgjidhje.

4-Si e shihni ju problemin e papunësisë dhe varfërisë?
Besnik Mustafaj (PD). Unë jam parlamentar i vjetër pasi kam bërë pjesë edhe në Parlamentin e parë pluralist, që në 1991 dhe unë e di shumë mirë se çfarë është deputeti. Pra, unë nuk vij këtu si kryetar komune, por vij si deputet. Unë vij me një program të përgjithshëm dhe brenda këtij programi të përgjithshëm të PD-së, unë do të kem ndikimin tim që kjo zonë të përfshihet në prioritet e programeve të punësimit, në programet kundër luftës së varfërisë të së djathtës shqiptare.
Luan Rama (PS). Ajo çfarë thashë më sipër nënkupton se zona do të shndërrohen në një kantier të madh ndërtimi, që do të thotë më shumë hapësira për punësim, për biznese që do të lindin për shkak të zhvillimit, që do të thotë më shumë vende pune për shumicën e banorëve të zonës. Pa dyshim unë dhe Bashkia e Tiranës kemi projekte reale të integrimit të të rinjve që kanë ardhur kohët e fundit në zonën informale për projekteve që i bëjnë ata konkurrentë në tregun e punës dhe krijimit të mundësive që bizneset private të ofrojnë punë, sipas kritereve ligjore, duke nisur që nga sigurimi i punës së tyre sepse konstatoj që shumica e punëtorëve, sidomos në firmat e ndërtimit janë edhe banorë të kësaj zone. Pra, rrugët, ndërtimet, parqet e lulishtet, bizneset që do të vijnë paralel me to do të krijojnë hapësira punësimi. Kjo vlen edhe për infrastrukturën dhe unë dua t’ju siguroj për një gjë, që zgjedhësit në këtë zonë do të mbajnë parasysh personalitetin e deputetit që do të votojnë. Pra, unë mendoj se i përmbush disa kritere që këta qytetarë të Tiranës kanë për deputetin e tyre.
Armond Halebi (LSI). Platforma ime elektorale në këtë pikë është e mbështetur në platformën elektorale të partisë që unë përfaqësoj. LSI-ja ka një program të tërë që synon uljen e varfërisë dhe nxitjen e punësimit. Për shembull, për çdo vend pune që do të hapin bizneset private, do t’u zbritet nga baza e tatueshme shuma prej 100 000 lekësh. Nga ana tjetër, do të ndihmojmë kreditimin e bizneseve të vogla dhe do të mbështesim fuqishëm biznesin vendas duke mos lejuar në asnjë rast monopole e korrupsion.
Faruk Borova (LZHK). Nëse jemi në vende me shkallë korrupsioni më të lartë, tregon që paratë e popullit i ka vjedhur dikush dhe i ka futur në thasë. Nëse do të vijmë në pushtet ne do të bëjmë maksimumin që të ulim korrupsionin. Nëse arrijmë të ulim 50% shkallën e korrupsionit do të thotë që 50% e parave do të futen në investime. Këto do t’i bëjmë investime dhe kështu do të zgjidhet pjesërisht problemi i papunësisë dhe varfërisë. Këtë zgjidhje nuk e shoh vetëm në zonën time. Një aspekt tjetër ka të bëjë me pronat, pasi tokat shqiptare sot nuk punohen. Ne do të ndjekim një strategji për sa u përket emigrantëve, në mënyrë që ata të kthehen në vend dhe të punojnë në tokat shqiptare. Po të zgjidhen këto probleme nuk do të ketë papunësi.

5- Cilat janë epërsitë tuaja ndaj rivalëve?
Besnik Mustafaj (PD). Kjo është fushata e 6 që bëj dhe asnjëherë nuk i kam ndërtuar fushatat e mia mbi dobësitë e rivalit tim. Epërsitë e mia qëndrojnë te programi që ofron e djathta, personaliteti im, te bilanci negativ që ka maxhoranca, pjesë e së cilës është rivali im kryesor. Ka pasur vetëm një ngjarje të shëmtuar, të cilën unë e kam denoncuar, ku një grup huliganësh që rrinë rreth rivalit tim kanë goditur një aktivist të statit tim elektoral. Pjesa tjetër ka kaluar përgjithësisht në mënyrë korrekte.
Luan Rama (PS). Avantazhet e mia janë në gjykimin e qytetarëve dhe janë në mendjen e tyre. Nuk dua të numëroj gjithçka që më bën të ndjehem optimist sepse iu ofroj qytetarëve një emër dhe një personalitet të papërlyer në asnjë rast në 15 vite karrierë politike, një emër me përvojë të spikatur qeverisëse të pakontestuar qoftë dhe nga opozita, një qytetar që di ti dëgjojë me zemër, t’i shohë në sy dhe të kuptojë problemet e tyre.
Armond Halebi (LSI). I vlerësoj të gjithë kandidatët, por epërsitë e mia janë të dukshme: jam përfaqësues i një force të re politike që për herë të parë e ktheu politikën shqiptare në tripolare dhe së dyti jam një tiranas i ndershëm dhe i sinqertë, që hyj për herë të parë në politikë e që nuk mbart mbi vete as mëkate të mia personale e as të partisë që kam pas.
Faruk Borova (LZHK).
E kam në karakter të mos flas për veten dhe të tjerët. Në jetën time jam munduar t’i jap vetes vlerat që më takojnë dhe të mos merrem me palën tjetër. Kjo është një garë ku secili do të fitojë, megjithëse nuk i shoh rrethanat të barabarta. Por, theksoj se programi i forcës që përfaqësoj është shumë më dinjitoz dhe më i moralshëm sesa i forcave të tjera.

Rezultatet e zgjedhjeve të 2001

Besnik Mustafaj PD+BF 7592 vota ose 51.4%
Edlira Haxhiymeri PS 7979 vota ose 40.5%
Petrit Kalakulla PDR 675 vota ose 4.57%
Gjete Ndoi AD 153 vota ose 1.03%
Artan Shytaj PSD 120 vota ose 0.81%
Adeta Bylyku PBDNJ 63 vota ose 0.42%
Ilir Jorgo PDK 43 vota ose 0.29%
Enver Heti PPK 41 vota ose 0.27%
Sami Kënga PKSH 33 vota ose 0.22%

PD+BF 7710 vota ose 51.9%
PS 554 vota ose 38.0%
PDR 710 vota ose 4.78%
PSD 170 vota ose 1.14%
PAD 158 vota ose 1.06%
PSKSH 71 vota ose 0.47%
PKSH 48 vota ose 0.32%
PAA 42 vota ose 0.28%
PBDNJ 41 vota ose 0.27%

Besnik Mustafaj
Shkrimtari diplomat në politikë

Besnik Mustafaj është një nga figurat e kryesore në PD dhe deputet që nga viti 1991. Ka lindur në vitin 1958 në Tropojë, është i martuar dhe ka dy fëmijë. Studimet e larta i ka ndjekur në fakultetin e Histori-Gjeografisë në degën Frëngjisht. Ai ka punuar fillimisht si pedagog në Universitetin e Tiranës si dhe gazetar te “Zëri i Popullit”. Mustafaj ka kandiduar për kreun e Bashkisë së Tiranës. Ai ka qenë ambasador në Francë dhe i dërguar i përhershëm pranë UNESCO-s në vitet 1992-1997. Që nga viti 1999 ai është sekretar për marrëdhëniet ndërkombëtare në PD. Mustafaj ka botuar një sërë veprash letrare, shumica prej të cilave janë botuar edhe në gjuhë të huaja. Disa veprat e para të tij janë “Motive të gëzuara” (1978), “Pragu i verës” (1985), “Fytyrë burri” (1987), “Bregu i lumit të kthjellët” (1986), “Vera pa kthim” (1989), “Fletorja rezervat”, “Daullja prej letre”, “Boshi” etj.

Luan Rama
Gazetari kërkon mandatin III

Luan Rama kandidon për herë të tretë si përfaqësues i PS-së. Ka lindur në vitin 1966 në Peshkopi, është i martuar dhe ka një fëmijë. Studimet e larta i ka ndjekur në Shkodër për degën Gjuhë-Letërsi. Karrierën profesionale e ka nisur si gazetar te gazeta “Zëri i Popullit” në vitet ’90 dhe më pas si kryeredaktor po këtu në vitet 1996-1998. Më pas për rreth një vit Rama ka qenë drejtor i përgjithshëm i gazetës “Zëri i Popullit”. Që nga viti 1991 ai është anëtar i KPD-së së PS-së dhe që nga viti 1997 anëtar i kryesisë së saj. Luan Rama ka qenë sekretar i marrëdhënieve publike të PS-së në vitet 1999-2002, anëtar i Këshillit Bashkiak të Tiranës si dhe anëtar i komisionit për Politikën e Jashtme dhe Marrëdhëniet Ndërkombëtare. Rama ka qenë gjithashtu ministër i Kulturës, Rinisë dhe Sporteve dhe ministër i Mbrojtjes në vitin 2002. Luan Rama ka qenë edhe ministër i Rendit në vitin 2003.

Armond Halebi
Inxhinieri me shpresë te politika e re

Armond Halebi kandidon për herë të parë në zgjedhjet e 3 korrikut si përfaqësues i LSI-së. Ka lindur në vitin 1967 nga një familje e vjetër tiranase. Eshtë i martuar dhe ka dy fëmijë. Studimet e larta i ka ndjekur në universitetin Bujqësor të Tiranës në vitin 1993, ku është diplomuar në degën Inxhinier Përpunim Druri. Aktualisht vazhdon studimet pasuniversitare në këtë profil. Armond Halebi ka punuar në kinostudion “Shqipëria e Re” si dhe në fabrikën e mobilierisë “Bestin”. Vitet e fundit ka ngritur një biznes privat, studion me emërtimin “FOTOMONDO” pranë fakultetit të Shkencave. Armond Halebi nuk është angazhuar më parë në asnjë parti politike, por ka qenë i vëmendshëm në vazhdimësinë e zhvillimeve ekonomike e politike të vendit. Angazhimi i tij i vërtetë për një forcë politike ka lindur vetëm në vitin 2004, atëherë kur është krijuar dhe LSI-ja.

Faruk Borova
Kimisti që garon për LZHK-në

Faruk Borova kandidon për herë të parë si përfaqësues i LZHK-së në këto zgjedhje. Ai ka lindur në Tiranë në vitin 1946 dhe është banor i zonës ku kandidon. Studimet e larta i ka ndjekur në universitetin e Tiranës në degën Kimi Industriale. Për një kohë të gjatë ai është angazhuar si basketbollist në klubin “17 Nëntori” të Tiranës. Në vitet 1969-1991 ka punuar si kimist në rrethin e Mirditës dhe më pas në Institutin e Kërkimeve Gjeologji-Minierë dhe në Institutin e Teknologjisë Kimike. Në vitet ’90 ka punuar si drejtor i Ndërmarrjes së Tregtisë së Jashtme “Industrial-Impeks”. Për rreth pesë vjet ai ka mbajtur postin e ambasadorit për Lindjen e Mesme, me rezidencë në Kajro të Egjiptit. Që nga viti 1997 është menaxher në një firmë ndërtimi dhe ka lidhje me drejtuesin e LZHK-së, Leka Zogu I.

23 June 2005 http://www.panorama.com.al/