Pretendenti i fronit mbretëror, Leka I Zogu, i cili drejton Lëvizjen për Zhvillim Kombëtar, ka denoncuar dje publikisht vjedhjen e votave që iu bë kësaj lëvizjeje në zgjedhjet e 3 korrikut.

Leka Zogu e ka dënuar këtë akt, duke theksuar se dëmton stabilitetin e qeverisë. Kurse kryetari i Këshillit Ekzekutiv, Dashamir Shehi, është shprehur se LZHK-ja nuk do të marrë pjesë në përsëritjen e zgjedhjeve në zonat nr. 2 dhe 64 dhe se do të rishikohet mundësia e një riorganizimi të kësaj lëvizjeje.

Pretendenti për fron
Të 100 kandidatët për deputetë të Lëvizjes për Zhvillim Kombëtar janë takuar dje me drejtuesin e kësaj lëvizjeje, Leka I Zogu. Gjatë takimit është bërë një analizë e situatës paszgjedhore, ku është theksuar fakti se kësaj lëvizjeje i janë vjedhur votat gjatë numërimit, për shkak se nuk ka pasur komisionerët e saj në grupet e numërimit të fletëve të votimit. Gjithashtu, Leka Zogu është shprehur se vjedhja e votave që u bë në zgjedhjet e 3 korrikut është një akt që dëmton stabilitetin e qeverisë së re. “Kjo vjedhje votash do ta dëmtojnë stabilitetin e qeverisë dhe të shtetit shqiptar. Do të ketë një përgjegjësi më të madhe kombëtare”, është shprehur Leka Zogu. LZHK-ja humbi në zgjedhjet e 3 korrikut, duke mos arritur të kalonte 4% për të hyrë në Parlament, pasi mori vetëm 3.8%. Pretendenti për fronin mbretëror, Leka Zogu, nuk i ka fajësuar kandidatët për deputetë të Lëvizjes për Zhvillim Kombëtar, duke u shprehur se “ju ka mbështetur populli, por problemi ishte te numërimi i votave që u vodhën nga komisionerët e dy partive të mëdha”. Ndërsa kryetari i Këshillit Ekzekutiv, Dashamir Shehi, është shprehur se LZHK-ja nuk ka marrë votat e duhura për të hyrë në Parlament dhe sipas tij në sistemin e proporcionalit është abuzuar në mënyrë masive. “Këtu funksionoi një mega-Dushk, i cili dëmtoi në radhë të parë ato parti që nuk kishin komisionerë dhe ato parti, të cilat hynë ballë hapur në zgjedhje dhe jo në rreshtat e dy partive të mëdha”, është shprehur Dashamir Shehi. Më tej Shehi ka theksuar se, megjithëse LZHK-ja ka humbur në zgjedhjet e 3 korrikut, ajo nuk do të shihet si formacion politik, por përkundrazi, tha ai, do të punohet që të shtohet edhe më tej formacioni politik. Shehi i ka bërë ftesë Partisë së Lëvizjes së Legalitetit, duke u shprehur se, “megjithëse kjo forcë politike është larguar nga koalicioni i LZHK-së, ajo mund të kthehet kur të dojë pranë tyre, pasi është një forcë e rëndësishme politike brenda kësaj lëvizjeje”. Gjithashtu, kryetari i Këshillit Ekzekutiv të LZHK-së është shprehur se kjo lëvizje do të vazhdojë punën e saj për riorganizimin e punës në disa struktura, ku drejtuesit e LZHK-së mendojnë se kanë pasur mangësi, të cilat janë vënë re edhe gjatë fushatës së zgjedhjeve të 3 korrikut.

Kolegji Zgjedhor rrëzon kërkesat e 4 socialistëve

Kolegji Zgjedhor pranë Gjykatës së Apelit ka rrëzuar dje katër kërkesat e kandidatëve të Partisë Socialiste, për pavlefshmëri të zgjedhjeve në zonat elektorale nr. 5, 86, 81, 96, përkatësisht në Shkodër, Korçë dhe Vlorë. Kolegji Zgjedhor e ka shpallur vendimin pasi ka marrë në shqyrtim kërkesat për pavlefshmëri të zgjedhjeve nga ana e subjektit të Partisë Socialiste për zonat ku kandidonin për deputetë Ramadan Hasanaj, ish-drejtor i përgjithshëm i Burgjeve dhe Maqo Lakrori, ish-ministër në kabinetin e majtë qeveritar, Ahmet Hoxhallari dhe kandidati socialist i zonës nr. 96 në qytetin e Vlorës. Kolegji Zgjedhor pranë Gjykatës së Apelit argumentoi se në zonën elektorale nr. 5 në Shkodër nuk ka pasur shkelje të atilla që të realizohet anulimi i rezultatit të votimit dhe zgjedhje të reja për kandidatin e PS-së, Ramadan Hasanaj, ish-prefekt i Shkodrës, ndaj kandidates së PD-së, Arenca Trashani, i cila mori mandatin e deputetit. Ndërkohë që vetë kandidati socialist ka pretenduar para gjyqtarëve të Kolegjit Zgjedhor se, në zonën ku ai kandidonte ishin gjetur më shumë fletë votimi sesa zgjedhës. Por ky pretendim u hodh poshtë nga Kolegji, i cili e cilësoi si të paargumentuar me prova dhe rrjedhimisht kërkesën për pavlefshmëri të zgjedhjeve si të pambështetur në ligj. I njëjti argument është dhënë edhe për zonën elektorale nr. 86 të qytetit të Korçës, ku kandidati i PS-së Maqo Lakrori ishte përballë atij të PD-së, Besnik Jaceli, i cili u shpall nga KQZ fitues i zgjedhjeve në këtë zonë. Kurse kërkesa e kandidatit socialist të zonës nr. 81 në Korçë, Ahmet Hoxhallari, u shqyrtua në orët e pasdites. Hoxhallari kërkonte pavlefshmëri të rezultatit të zgjedhjeve në zonën e tij, ku nga KQZ-ja ishte shpallur fitues kandidati i Partisë Demokratike, Ridvan Bode. Edhe ky pretendim është rrëzuar nga Kolegji Zgjedhor. I njëjti vendim i formës së prerë është marrë edhe për kontestimin e Partisë Socialiste në proporcional në zonën nr. 96, ku kandidonin Bashkim Habibaj për PS dhe Ardian Kollozi për PD. Sot dhe nesër pritet që Kolegji të shqyrtojë kërkesëpaditë e kandidatit Spartak Poçi, Arben Ahmetaj, Anastas Angjeli, Dritan Prifti dhe Luan Rama.

Ekrem Spahiu
“Do të jemi vetëm si forcë politike”

Partia Lëvizja e Legalitetit ka reaguar dje duke theksuar se PLL-ja do të jetë parti jashtë koalicionit politik të Lëvizjes për Zhvillim Kombëtar. Një vendim i tillë është marrë disa ditë më parë nga strukturat e kësaj partie politike, e cila kërkoi shkëputje nga “strofulla mbretërore”, duke kër-kuar njëkohësisht edhe bashkëpunimin me PD-në, e cila tashmë ka fituar më shumë mandate në zgjedhjet e 3 korrikut. Drejtues të PLL-së e kanë cilësuar të kotë ftesën e bërë dje nga ana e Shehit të LZHK-së, pasi një vendim për shkëputje është marrë tashmë nga forumet e kësaj partie. Shehi, në takimin e djeshëm tha që “PLL të mos shkëputet nga ky koalicion, edhe pse është jashtë Parlamentit, por të punojnë së bashku në rritjen e peshës politike e elektorale”. Shehi u bëri thirrje edhe partive të tjera politike që të bashkohen me këtë formacion politik.