Të gjithë fëmijët që do të lindin këtu u bëfshin mbretër në pozicionet e tyre. Me këtë urim, ministri i Shëndetësisë, Leonard Solis e mbylli fjalën e tij, dje gjatë ceremonisë së em-ërimit të maternitetit të vjetër “Mbretëresha Geraldinë”.

60 vjet më parë është ndërtuar godina e këtij materniteti, por fytyrën e “vjetëruar” ai e ndërroi vetëm pas investimeve të viteve të fundit. Duke bërë një miniekspozitë të punës së bërë për këtë qëllim, drejtori i Spitalit Universitar Obstetrik Gjine-kologjik, Halim Kosova premtoi akoma më shumë. “Me mbështetjen e Ministrisë së Shëndetësisë, ne do ta çojmë më tej nderimin për figurën e Mbretëreshës Geraldinë, duke ndërtuar edhe një godinë tjetër që do t’i japër tamam fizionominë këtij spitali”, tha Kosova.

CEREMONIA
Vetëm gjashtë muaj pas urdhrit të ministrit Solis u arrit që të vihej në jetë dëshira për të rikujtuar me anën e emrit të Mbretëreshës Geraldinë, një prej nismave të saj në jetë. “Ajo ishte nismëtare dhe mbështetëse e hapjes së maternitetit të parë publik në vendin tonë. Si një grua e lartë, që nisi dhe mbaroi në vendin tonë një simbol të veçantë për kombin shqiptar, si shenja e dallueshme e një ure lidhëse midis Shqipërisë dhe Perëndimit të qytetëruar, Mbretëresha Geraldinë e lartëson dhe e bën më human spitalin tonë të nënës dhe fëmijës. Eshtë një kënaqësi e përgjithshme që materniteti ynë do të mbajë emrin e një njeriu të nderuar që i qëndroi aq pranë Mbretit Zog, themeluesit të një shteti, të mbretërisë shqiptare në brigjet e Adriatikut”, tha gjatë ceremonisë drejtori i sptalit Halim Kosova. Më tej përshëndetën edhe ministri Solis, i cili përmendi investimet që janë bërë së fundi jo vetëm në këtë maternitet, por edhe në spitalin e ri, që katër ditë më parë mori emrin e babait të gjinekologjisë shqiptare, Koço Gliozhenit. “Me propozim të një grupi intelektualësh përveç qindra e qindra njerëzish të tjerë mbështetës, Mentor Petrela, Maksim Cikuli, Ismail Kadare dhe Monsinjor Rrok Mirdita, por edhe qindra njerëz të tjerë, ne me shumë kënaqësi e emërtuam këtë maternitet ”Mbretëresha Geraldinë”. Investimet e bëra në të dy maternitetet synojnë rritjen e shërbimeve dhe cilësisë, por edhe mbylljen e ciklit të ekzaminimeve për këto lloj shërbimesh për vendin tonë”, tha Leonard Solis. Vetë pretendenti për fronin mbretëror, Leka Zogu i I, i pranishëm në ceremoni, shprehu mirënjohjen dhe falënderimet për nderin që iu bë nënës së tij, duke i vënë emrin e saj këtij materniteti.

INVESTIMET
Tashmë fytyra e këtij materniteti po ndryshon dita-ditës. Ndërtesat e vjetërura, laboratorët dhe ambientet e brendshme kanë marrë një tjetër pamje, atë të një spitali evropian. Lulet që janë vendosur së fundi dhe shtrimi i rrugicave të brendshme me asfalt i kanë dhënë një tjetër hijeshi oborrit të brendshëm. Këto investime sipas drejtorit të Spitalit Obstetrik Gjinekologjik janë mundësuar falë investimit të kompanisë AMC. Ndërkaq, personeli është duke u rindarë ndërmjet dy materniteteve. “Jemi duke bërë ndarjen e stafeve ndërmjet dy materniteteve. Ky maternitet do të kenë përfundimisht pas rikonstruksionit 340 vetë”, tha Kosova. Sipas tij, sallat e operacionit të përqendruara, krahas shfrytëzimit të mirë të aparaturave dhe menaxhimit të materialeve, personelit mjekësor dhe të sëmurëve u vijnë më mirë në ndihmë për problemet që kanë. “Eshtë ndryshe kur ka tri salla opeacionesh të shpërndara dhe nuk mund të lëvizësh pajisjet, dhe ndryshe kur ato janë të përqendruara në një vend ku mjetet dhe aparaturat mund të lëvizin lehtësisht. Mua do të më pëlqente të fillonte para mbarimit të fushatës elektorale, por mendoj që çdo njeri që do të jetë në pushtet do të dojë që shërbimi i nënave dhe fëmijëve të ketë kushte sa më të mira”, tha Halim Kosova.

Godina e re do të kushtojë 1.2 miliardë euro

Një godinë ku të përfshihen të gjitha sallat e operacioneve. Ky do të jetë projekti më i ri që pret të realizohet. Një projekt që do ta bëjë maternitetin një spital modern, ku të gjithë të ndjejnë shërbim dhe cilësi bashkëkohore. Ky është edhe një prej premtimeve të drejtuesve të shëndetësisë shqiptare. Ende nuk dihet se kur do të fillojë ndërtimi i godinës, që do të pozicionohet atje ku sot ndodhet kaldaja e maternitetit. “Godina e re do të jetë te kaldaja aktuale dhe do të bëjë lidhjen funksionale të të gjithë ndërtesave duke përqendruar sallat e operacionit në një të vetme”, tha Halim Kosova. Nga një mendim i përafërt është llogaritur që së bashku me parkingun e nëndheshëm, do të shkojë afërsisht në 1.2 milionë euro. “Do të ketë lulishte dhe shatërvane, parkim të nëndheshëm që do t’i shtojnë bukurinë edhe pamjes së brendshme të maternitetit, duke shmangur edhe rrëmujën që bëhet nga makinat. Ky investim është në pritje, mund të financohet nga buxheti i shtetit dhe donatorë të ndryshëm. Mendohet që të fillojë së shpejti. Dëshira ime është që të fillojmë që nesër nga puna, po të na vijnë financimet, se çdo vonesë apo kohë e humbur është minus për shërbimin”, tha drejtori.

Faksimile e letrës së motrës së Mbretëreshës Geraldinë, e cila në pamundësi për të marrë pjesë në ceremoninë e djeshme kishte dërguar përshëndetjet e saj të përzemërta. Me anën e kësaj letre, të cilën vetë drejtori i maternitetit Halim Kosova e lexoi në përmbushje të dëshirës së saj, Sylviane Muselier shprehet se “dashuria e Geraldinës për njerëzit dhe toleranca e saj ishin të bazuara te Zoti. Këto e ndihmuan atë që t’u mbijetonte vuajtjeve që hasi në jetë. Geraldina ishte një model për mua në jetë dhe e deshi shumë popullin shqiptar, që prej ditës kur u largua me bashkëshortin e saj, Mbretin Ahmet Zogu i I”, thuhet në letrën e saj.