terheqja nga politika

leka I

Leka I Zogu deklaroi dje tërheqjen nga jeta politike: LZHK do të vazhdojë misionin për të cilin u themelua

Pretendenti për fron kthehet në Oborr

Shehi: Leka I largohet edhe për arsye shëndetësore nga politika

Aristir Lumezi

Pretendenti për fronin mbretëror, Leka I Zogu, tërhiqet nga skena politike. Këtë vendim oborri mbretëror e bëri të ditur nëpërmjet një deklarate zyrtare, ku thekson se kjo tërheqje erdhi pas vlerësimit të situatës aktuale politike.

Oborri mbretëror deklaron se “Leka I ZOGU, në shërbim të interesave më të larta të atdheut dhe të kombit shqiptar, si dhe në shërbim të traditës shtetërore shqiptare, tërhiqet nga jeta politike partiake, për t’u kthyer në qëndrimin e natyrshëm të familjes mbretërore shqiptare, e cila qëndron jashtë palëve dhe partive politike”. “Qëndrimin jashtë palëve dhe partive politike, oborri mbretëror e konsideron si shërbesë për të mbrojtur gjithmonë interesat e të gjithë shqiptarëve, pavarësisht bindjeve të tyre politike”.
Kjo përbën dhe traditën e familjeve mbretërore evropiane. “Lëvizja për Zhvillim Kombëtar do të vazhdojë misionin e saj për të cilin u themelua dhe do të drejtohet politikisht nga organet e zgjedhura prej asamblesë kombëtare të LZHK-së”, theksohet në deklaratën zyrtare të oborrit mbretëror. Drejtuesi i LZHK, Dashamir Shehi, e konsideroi dje këtë tërheqje të Leka I Zogu “si zgjidhje të një problemi që po zvarritej, për arsye shëndetësore, politike për pozicionin që ka mbreti”. Tërheqja e pretendentit për fronin mbretëror ishte një marrëveshje me dashamirësi, e mirëkuptuar e cila e pozicionon atë në krah të LZHK-së dhe pranë LZHK-së”, u shpreh Shehi.

Mund të krijohen probleme të unitetit brenda LZHK-së pas tërheqjes së pretendentit të fronit mbretëror?
Nuk mendoj se do të kemi probleme të unitetit brenda lëvizjes sonë, pasi ka rreth 6-7 muaj që angazhimet e përditshme i kryenin të tjerë persona. Kështu që LZHK ka funksionuar normalisht me strategjinë e saj.

Mund të ketë rrjedhje dhe largime të simpatizantëve tuaj?
Mund të ketë njerëz që i lidhte familja, apo dhe tradita me familjen mbretërore. Ne si LZHK nuk kemi qenë shumë të zjarrtë për monarkinë, kjo ka të bëjë me një situatë praktike. Mund të largohen persona fanatikë për monarkinë, por ka dhe shumë të tjerë që nuk pëlqenin të afroheshin për shkak të këtij fanatizmi. Ne ia dimë për faleminderit familjes mbretërore për inspirimin e LZHK-së.

Me largimin e Leka I Zogu, mund të ketë ndryshime dhe në strategjitë tuaja të bashkëpunimit me partitë e tjera?
Ne i përkasim grupimit të djathtë të partive politike, por nuk do heqim dorë nga kritikat tona dhe për qeverisjen e djathtë. Aleancat e ardhshme janë çështje praktike dhe do të zhvillohen në bazë të dialektikës politike. Ne po përgatitemi të hyjmë vetëm në zgjedhjet vendore, por nuk përjashtohet dhe bashkëpunimi me PD si parti e krahut të djathtë.

“Tërheqja, zgjidhja e problemit që po zvarritej”

Drejtuesi i LZHK-së, Dashamir Shehu, vlerëson si inspirues të kësaj lëvizje pretendentin e fronit mbretëror, Leka I Zogu, i cili sapo u tërhoq nga jeta aktive politike. Sipas tij, kjo ka ardhur pas një marrëveshjeje me dashamirësi, e cila e vendos Leka I Zogu në krah të LZHK-së dhe pranë saj. largimi i Lekës mund të sjellë në gjirin e LZHK-së dhe mjaft njerëz, të cilët nuk kanë aspirata monarkiste, por që mbajnë dhe një qëndrim kritik ndaj së djathtës qeverisëse. “LZHK do të jetë shtëpia e tyre, u shpreh Shehi, e cila do të luajë rolin e saj kritik edhe ndaj të djathtës”. Largimi i Lekës, sipas Shehit, erdhi si zgjidhje e një problemi që po zvarritej prej kohësh, për shkaqe kryesisht shëndetësore”.

Kthimi i familjes mbretërore
Leka I, marrëdhëniet e tij me politikën

Deklaron se do të lërë jetën politike, por Lëvizja për Zhvillim Kombëtar do të vazhdojë. Leka I, është djali i ish Mbretit Zog dhe u largua nga Shqipëria vetëm kur kishte dy ditë që kishte lindur. Në vitet e diktaturës komuniste qëndroi jashtë vendit dhe për herë të parë u kthye në Shqipëri në nëntor të 1993. Kthehej në këtë kohë pas 54 vitesh emigrimi. Berisha nuk e lejoi të qëndronte as 24 orë në vendin e tij. Hyri në Shqipëri me një avion Carter, bëri të gjitha dokumentet në Aeroport, pati një deklaratë mirëserardhje për të nga ministria e jashtme, por më pas, menjëherë me vendosjen e tij në Hotel Dajt, u kërkua largimi i tij nga Shqipëria. Rikthimi i tij në Shqipëri u bë vetëm në vitin 1997, kur protestat e njerëzve për firmat piramidale rrëzuan Berishën nga pushteti, pavarësisht se ai qëndronte ende në detyrën e kreut të shtetit. Në 11 prill të 1997 ai shkeli sërish në Rinas, por më parë Guri Durollari, i PLL u kishte marrë leje të gjitha forcave politike. Pas një takimi që pati me kryeministrin e asaj kohe Fino, ky i fundit e garantoi pretendentin për Fron se do të bëhej edhe një referendum ku populli të shprehej për sistemin e qeverisjes, republikë parlamentare, apo monarki. Pas shpalljes së rezultatit të referendumit, ku monarkia nuk arriti të merrte votat e nevojshme një protestë e dhunshme e njerëzve që e shoqëronin, që degjeneroi deri në gjakderdhje, ndodhi në rrugët e Tiranës. Kur pa se situata u acarua shumë, pretendenti për fronin Leka I deklaroi: pavarësisht nga fitorja apo humbja e referendumit më e rëndësishme se gjithçka është Shqipëria”. Ai u largua nga vendi në korrik të ’97, por ndaj tij nisi një proces penal i cili më vonë u pushua. Pasi largohet për herë të dytë, ai rikthehet familjarisht në Shqipëri në fund të qershorit të vitit 2002, ku u prit me popullaritet të madh në rrugët e Tiranës.

PS akuzon Olldashin për punën e policisë, ministri e hedh poshtë

Dade: Policët ushtruan dhunë mbi banorët
Ministri: Nuk është e vërtetë, ne po i shpëtojmë ata

Deputetët e opozitës kanë fajësuar ministrin e Brendshëm, Sokol Olldashin, se ka urdhëruar ushtrimin e dhunës ndaj banorëve të Divjakës. Deputetja e PS-së, Arta Dade, ka deklaruar dje se “forcat e komisariatit të policisë kanë ushtruar dhunë në familjet e Divjakës, duke i terrorizuar banorët e zonës”. “Këto akte janë shumë të dhunshme, jo vetëm për opinionin publik shqiptar, por edhe për atë ndërkombëtar. Akte të tilla janë kryer vetëm gjatë viteve 1992-1997. I kërkojmë kryeministrit që të marrë masa për këtë situatë”, deklaroi Dade në seancën e djeshme parlamentare. Për përdorimin e dhunës policore ka diskutuar edhe deputeti i PS-së, Erion Braçe, duke përmendur një rast në zonën e Kuçovës. “Ministri i Brendshëm duhet të jetë i bindur se forcat policore nuk duhet të veprojnë pa asnjë urdhër, që do të thotë një mandat nga ana e Prokurorisë për të ushtruar kontroll në familjet e qytetarëve”, deklaroi Braçe. Në lidhje me këto akuza, ministri Olldashi u shpreh, se “nuk është e vërtetë që forcat policore po terrorizojnë familjet e qytetit të Lushnjës”. “Në të vërtetë duhet thënë e kundërta për këtë çështje. Familjet e qytetit të Lushnjës dhe të Divjakës e dinë mirë se kanë qenë të terrorizuar. Nuk ka asnjë ankesë nga ana e familjeve të qytetit të Lushnjës. Unë dua të falënderoj ata qytetarë për mirëkuptimin që kanë treguar”, theksoi Olldashi. Por qëndrimi i tij ka sjellë reagimin e socialistes Dade, e cila ka deklaruar se “policia ka ushtruar dhunë dhe ka terrorizuar njerëzit dhe për këtë duhet nxjerrë përgjegjësia”.

Deklarata: Do ndjekim traditën e familjes mbretërore. Shehi i LZHK: Ai do të qëndrojë mbi palët

Leka I Zogu mbyllet në Oborr

Pretendenti i Fronit Mbretëror heq dorë nga Partitë

Altin Kreka
krekas@gazetashqiptare.com

Leka I Zogu largohet nga veprimtaria politike partiake. Me anë të një deklarate në emër të oborrit mbretëror, kryetari i zyrës, Fluturak Gërmenj ka njoftuar dje se “NMT LEKA I ZOGU duke vlerësuar situatën aktuale politike, deklaron se në shërbim të interesave më të larta të Atdheut dhe të Kombit Shqiptar, si dhe në shërbim të traditës shqiptare, tërhiqet nga jeta politike partiake”. Gërmenji në deklaratën e tij shkruan se qëllimi i këtij largimi është për t’u kthyer në qëndrimin e natyrshëm të Familjes Mbretërore Shqiptare, e cila qëndron jashtë palëve dhe partive politike. “Kjo ka shërbyer edhe do të shërbejë gjithmonë për të mbrojtur interesat e të gjithë shqiptarëve, pavarësisht bindjeve të tyre politike”, thuhet në deklaratë.

Fati i LZHK
Në deklaratën e Oborrit Mbretëror thuhet se pas këtij vendimi “Lëvizja për Zhvillim Kombëtar, do të vazhdojë misionin e saj për të cilin u themelua dhe do të drejtohet politikisht nga organet e zgjedhura prej Asamblesë Kombëtare të LZHK-së”. Leka I Zogu ishte zgjedhur në krye të lëvizjes dhe gjatë zgjedhjeve kjo forcë politike u paraqit me siglën LZHK Leka I Zogu. Kryetari ekzekutiv i kësaj lëvizje politike dashamir Shehi, i cili mbetet i zgjedhuri më i lartë nga Asambleja e LZHK gjatë një interviste dhënë NEËS 24, ka shpjeguar situatën që krijohet pas këtij largimi të Leka I Zogu. Sipas tij, ky formalizim i këtij pozicioni është bërë për shumë arsye por më shumë të natyrës së etikës politike. “Familja mbretëore nuk duhet të jetë pjesë e politikës shqiptare por duhet të ndjekë tarditata e saj. Mbreti nuk ëshët më në krye të lëvizjes por në krah të saj”, tha Shehi dje. “Një gjë e tillë është konceptuar me mendimin e marrë edhe nga të gjitha struktuart politike të LZHK dhe me dashamirësinë e mbretit Leka për besimin që ka ndaj nesh”, tha kreu i LZHK dje. Lëvizja që u krijua përreth pretendentit për fronin mbretëror të Shqipërisë dështoi në zgjedhjet e fundit parlamentare duke marrë një numër votash tërësisht të pamjaftueshëm për të hyrë në Parlament. Kjo bëri që LZHK të përfshihet nga kriza dhe si rrjedhim një nga partitë përbërëse të saj PLL u shkëput për shkak se ishte shumë më afër PD-së dhe nuk miratonte qëndrimin e drejtuesëve të LZHK të cilët akuzonin PD dhe Berishën, veçanërisht për manovrat elektorale dhe zbatimin e sistemit të Dushkut.

Pallati i vjetër mbretëror
Deklarata e Oborrit Mbretëror është vulosur me një vulë në fërngjisht ku shkruhet “Cour Royale D’Albanie”, mban si adresë Pallatin e Vjetër Mbretëror Rr. M. Toptani, Tiranë. Kjo është pikërisht adresa e rezidencës së re të familjes mbretërore, e cila që pas kthimit nga mërgimi i gjatë që prej vitit 1939 ka jetuar në shumë rezidenca të ndryshme edhe pas kthimit në atdhe. Së fundmi me vendim të qeverisë së kryeministrit Berisha kësaj familje i është dhënë pronësia mbi një nga ndërtesat për të cilat ajo pretendon se është trashëgimi e familjes. Ish-pallati i pionerëve, institutit të monumenteve të kulturës, ngjitur me Kinema Millenium II në Tiranë është tashmë rezidenca e kësaj familje. Prej ditrësh aty po punohet për ta përgatitur ndërtesën për familjen mbretërore. Ai njihet edhe si Pallati i Vjetër Mbretëror ose si Pallati i Princeshave. Familjes mbretërore i ishte premtuar prej kohësh kthimi i disa prej ish-pronave të saj. Menjëherë pas kthimit në atdhe, ish-qeveria socialiste morri vendim për ti pajisur ata me pashaporta diplomatike si dhe premtoi se do të kthente disa nga pronat e saj. Lista e tyre ishte shumë e gjatë por asnjë nga pronat nuk ju kthye, ashtu siç nuk u kthye as koleksioni i madh i armëve të zjarrit që kishte me vete Leka I Zogu. Vetëm pas ardhjes në pushtet të së djathtës u mor një vendim për të dhënë në pronësi të kësaj familje një ndërtesë në qendër të Tiranës ndërsa flitet se ajo do të marrë edhe prona të tjera.

Leka I Zogu në krye të LZHK
Pas krijimit të kësaj lëvizje Leka Zogu deklaroi se ai ishte në krye të LZHK dhe nisi edhe fushatën elektorale në disa zona të vendit.

Largimi i PLL
Debatet brenda LZHK bënë që PLL e drejtuar nga Ekrem Spahia të largohej nga kjo lëvizje duke shpallur koalicion me PD por sërish mbeti jashtë Kuvendit.

Deklaratë e Oborrit Mbretëror Shqiptar
NMT LEKA I ZOGU, duke vlerësuar situatën aktuale politike, deklaron se në shërbim të interesave më të larta të Atdheut dhe të Kombit shqiptar, si dhe në shërbim të traditës shtetërore shqiptare, tërhiqet nga jeta politike partiake, për t’u kthyer në qëndrimin e natyrshëm të familjes mbretërore shqiptare, e cila qëndron jashtë palëve dhe partive politike.
Kjo ka shërbyer edhe do të shërbejë gjithmonë për të mbrojtur interesat e të gjithë shqiptarëve, pavarësisht bindjeve të tyre politike.
Ky qëndrim është në të njëjtën traditë edhe me familjet mbretërore europiane.
Lëvizja për Zhvillim Kombëtar, do të vazhdojë misionin e saj për të cilin u themelua dhe do të drejtohet politikisht nga organet e zgjedhura prej asamblesë kombëtare të LZHK-së.

Rezidenca e re
Familja e re mbretërore pas vendimit të qeverisë pritet që të zhvendoset shumë shpejt në rezidencën e re në pallatin e vjetër mbretëror pranë kinema Millenium II në Tiranë