Ish-kryetari socialist, Fatos Nano, vendosi dje të dalë publikisht kundër Edi Ramës. Në një deklaratë jo vizuale në “Vizion Plus” ai deklaroi: “Nuk mund të shërbej në asnjë moment dhe për asnjë shkak si vasal i Edvin Ramës”.

Kjo deklaratë e tij e cituar vetëm nga gazetari nuk është shoqëruar me pamje të Nanos, por është mbështetur nga deputetët shumë pranë tij, Harasani, Idrizi dhe Balla.

Aksioni
Në ditët e ardhshme, burime shumë pranë ish-kreut socialist, pohojnë se Nano do të dalë me një platformë, në të cilën do të motivojë të gjithë lëvizjen e tij brenda PS-së për një opozitë ndryshe. Të njëjtat burime thonë se Nano do të nis takimet me bazën. Ish shefi i socialistëve, nuk duroi dot më gjatë për këtë çështje, duke dashur të fillojë të ashtuquajturin “Katarsis 2”. Por këtë herë, me shumë më pak mbështetës sesa kur bëri të parin në vitin 1999. Ndërsa ka më shumë se një vit që nuk ka dalë asnjëherë në krah të lëvizjeve të PS, Nano sipas burimeve, do t’i sqarojë bazës se pse nuk e ka bërë këtë gjë. Ai dy herë ka shkuar në parlament, dhe asnjëherë në mbledhjet e forumeve partiake. Lëvizja e Nanos në këtë moment, mund të shërbejë edhe për Berishën, i cili, ka deklaruar kohë më parë se do të sigurojë votat për presidentin. Eshtë folur që herët që Nano mund të ishte një nga kandidaturat. Me votat që i janë bashkuar nga grupi i PS, ai ndoshta do të synojë postin e kreut të shtetit, por duke mos pasur votat e deputetëve të tjerë të PS. Ndër njerëzit që e kanë mbështetur, janë pikërisht ata që i ka përfshirë vetë Nano si deputetë, madje tre njerëzit me të cilët mban kontakte: ish drejtori i KESH Andis Harasani, ish drejtori i Doganave Shpëtim Idrizi, dhe ish shefi i tij i protokollit Taulant Balla.

Grupi
Ish-kreu i selisë rozë do të dalë jashtë grupit parlamentar socialist, duke lënë të hapur kështu mundësinë që atij t’i bashkohen edhe deputetë të tjerë socialistë, por dhe nga parti të tjera të majta, të cilët nuk janë dakord me mënyrën e të bërit opozitë nga Edi Rama. Nano, do të kërkojë të bëjë një opozitë ndryshe, duke dhënë alternativa për çështjet specifike që maxhoranca do të çojë në Parlament. Burime pranë ish-kreut socialist pohojnë se ky veprim i Nanos nuk ka të bëjë me daljen e tij nga Partia Socialiste, të cilën e ka themeluar vetë dhe e ka drejtuar prej 15 vjetësh, por për një luftë politike të tij me alternativa brenda PS-së. Deputetët pranë tij, Balla, Harasani, Idrizi, Lamaj pohojnë se mënyra se si Edi Rama ka drejtuar PS dhe ka organizuar bërjen e opozitës nuk ishin ato që ata kishin shpresuar kur ai erdhi dhe u mbështet nga të gjithë në krye të PS.

Çfarë thonë deputetët që janë skicuar në listën “Nano”
Pro nismës “Nano” vetëm pesë deputetë, të tjerët: Jemi me PS

Deputetët shumë pranë ish-kreut socialist pohuan dje për gazetën “Panorama” se janë rreth 14 deputetë socialistë, të cilët kanë përkrahur nismën e ish-kreut socialist për një katarsis në PS. Lista e deputetëve ka brenda saj jo vetëm deputetët shumë pranë Nanos, të cilët kanë deklaruar publikisht dje përqafimin e nismës së ish-kreut socialist, por dhe deputetë të tjerë, të cilët nuk kanë shfaqur deri më sot pakënaqësi ndaj drejtimit të Partisë Socialiste nga Edi Rama. Lista, përveç emrave të Idrizit, Ballës, Harasanit dhe Lamaj përmban dhe emrat e Arben Malajt, Paulin sterkajt, Besnik Dervishit, Luan Memushit etj. Gazeta “Panorama” kontaktoi me të gjithë deputetët që figuronin në listë dhe rezultoi se shumica e tyre nuk kanë dhënë asnjë pozicionim pro Nanos për shkëputje të tij nga grupi parlamentar. Shumë të tjerë e kanë kundërshtuar nismën.

Arben Malaj
Unë kam bërë kontratë me PS-në, as me Fatos Nanon dhe as me Edi Ramën. Nuk kam ndërmend të largohem nga grupi parlamentar socialist.

Paulin Sterkaj
Unë nuk e tradhtoj PS-në dhe kryetarin legjitim të saj Rama. Nano duhet të vijë tek unë, të rrahim mendimet me njëri-tjetrin, se ai është deputet i thjeshtë si dhe unë, dhe pastaj të na thotë se çfarë do të bëjë. Unë mendoj se loja e madhe qëndron tek vizita e Berishës në Turqi, i cili po futet në vorbullën e shitjes së Telekomit, të cilit i duhet kjo zhurmë mediatike.

Flamur Hoxha
Unë nuk di gjë, nuk kam folur dhe nuk kam futur veten time në ndonjë listë. Nuk di se mund të ndodhë në të ardhmen.

Luan Memushi
(nuk është përgjigjur në telefon)

Andis Harasani
Deklarata e zotit Nano për mënyrën se si PS është drejtuar deri tani nga kryetari aktual ,Edi Rama, për zhvendosjen e disa figurave të PS dhe afrimin e disa figurave të tjera në PS-së dhe për një mungesë të demokracisë së brendshme në PS.
Çdo lëvizje e zotit Nano besoj se do sjellë një rikompozim të forcave në Parlament dhe detyrimisht do të sjellë një riformatim të të gjithë krahut të majtë. Unë jam i sigurt se në çdo nismë të ndërmarrë nga zoti Nano atij i janë bashkuar vlerat më të mira të PS-së edhe besoj se dhe këtë radhë do të ndodhë kështu.

Stefan Çipa
(nuk është përgjigjur në telefon)

Shpëtim Idrizi
Ne duhet të bënim një opozitë krejt ndryshe, një opozitë me alternativa. Në këtë kuptim e gjej me vend deklaratën e zotit Nano, i cili të mos harrojmë është lideri historik i PS-së, është personi që ka vendosur shumë standarde në politikën shqiptare, është njeriu që shumë herë me vizionin e tij liberalizues dhe moderator ka arritur të vendosë dhe të bëjë akorde shumë të mëdha në shërbim të vendit. Në këtë kuptim unë e mbështes nismën e zotit Nano dhe mendoj se kjo nismë është brenda PS-së, sepse vjen pikërisht nga lideri shpirtëror i saj dhe nga lideri historik.
Mendoj se këtë nismë do ta përshëndesim dhe do ta përkrahin edhe shumë deputetë të tjerë të PS-së.

Elmaz Sherifi
(nuk është përgjigjur)

Rajmonda Stefa
Nuk kam kontaktuar me Nanon, por e shoh nismën e tij si një lëvizje brenda Partisë Socialiste që ai ka themeluar dhe brenda grupit parlamentar socialist. Nuk besoj se Nano do të dalë jashtë grupit të PS, por do të punojë brenda tij.

Vangjel Tavo
(nuk është përgjigjur në telefon)

Durim Hushi
Jam kontaktuar nga njerëzit shumë pranë Nanos. Nuk i kam kthyer asnjë përgjigje. Nuk ka një ide të qartë se çfarë do të bëjë. Por sidoqoftë, si ideja për parti të re ashtu dhe ideja e grupit parlamentar, nuk do të përkrahen nga unë. Unë e kam partine time. Nano është i mirëpritur të konkurrojë brenda PS-së.

Taulant Balla
Tashmë është e qartë që Nano ka nisur një lëvizje të tij, që është një katalizator i shëndoshjes së gjendjes në PS, i cili është ndikuar nga zoti Rama dhe prandaj mendoj se të gjithë socialistët duhet ta mbështesin këtë lëvizje, që për mua është një lloj katarsis. Ne duhet të tregojmë një opozitë më të fortë me Berishën dhe për këtë edhe lëvizja e zotit Nano është për një opozitë më efektive. Nano, si lideri historik i kësaj partie, në asnjë moment nuk mund të kuptohej jashtë PS-së.

Besnik Dervishi
Nuk kam dijeni për këtë iniciativë dhe nuk dua të përgjigjem.

Durim Lamaj
Kjo është një nismë në të cilën janë bashkuar disa deputetë që mendojnë për një opozitë ndryshe në PS. Lista është me 15 emra, deputetë me kontribute në PS. a.l

Lista e deputetëve

Shpëtim Idrizi pro nismës
Andis Harasani pro nismës
Durim Lamaj pro nismës
Flamur Hoxha kundër nismës
Durim Hushi kundër nismës
Arben Malaj kundër nismës
Rajmonda Stefa pro nismës
Paulin Sterkaj kundër nismës
Luan Memushi nuk gjendet
Besnik Dervishi kundër nismës
Elmaz Sherifi nuk gjendet
Stefan Çipa nuk gjendet
Vangjel Tavo nuk gjendet
Taulant Balla pro nismës

Kreu i PS mbledh kryesinë, paradite i përgjigjet Berishës
Rama: Armiku ynë është Sali Berisha, jo Fatos Nano

Kreu socialist, Edi Rama, iu përgjigj dje lëvizjes së iniciuar nga Fatos Nano pas një mbledhjeje kryesie ku u kërkoi të gjithë anëtarëve të kryesisë që të mos merren me çështje që nuk shkojnë në funksion të forcimit të PS për zgjedhjet.

“Ne jemi në kulmin e një përgatitjeje për të mundur armikun e madh të demokracisë, të votës së lirë dhe të zhvillimit, i cili për ne ka vetëm një emër dhe quhet Sali Berisha. Ne nuk kemi asnjë minutë kohë për të humbur duke u marrë me çështje të cilat praktikisht nuk na mundësojnë që frytet e kësaj beteje të jenë maksimale” tha dje pas mbledhjes së kryesisë, kryetari aktual i PS, Edi Rama.
Ndërkohë nënkryetari i grupit parlamentar të PS, Petro Koçi, reagoi menjëherë për lëvizjen e Nanos duke e konsideruar vendin e Nanos në PS dhe jo jashtë saj. “Pa dashur të ndërhyj në zgjedhjet dhe gjykimet politike të zotit Nano, mund të them se vendi i tij, jo vetëm si ish kryetar i PSSH, por edhe si qytetari Fatos Nano është PS. Nëse ai ka vërejtje thelbësore për Edi Ramën, nuk duhet të harrojë se edhe ai vetë ka luajtur një rol në ardhjen e Ramës në krye të PS-së apo më parë në krye të bashkisë së Tiranës. Në fund të fundit Rama është kryetari legjitim. Se sa legjitimist do të jetë, mbetet për t’u provuar duke llogaritur peshën, vlerat politike si dhe kontributet historike të zotit Nano. PS duhet të shmangë çdo reagim emocional dhe të vazhdojë rrugën e dialogut integrues” tha Petro Koçi dje për mediat.

Paradite
Edi Rama paraditen e djeshme i është përgjigjur “provokimeve” sipas tij, të kryeministrit Sali Berisha lidhur me kryetarët de facto e de jure të Partisë Socialiste. “Unë i konsideroj të shëmtuar dhe të një niveli etik të ulët edhe për vetë Sali Berishën, për diversionet e tij të vijueshme, që kanë mbetur shpresa e vetme për të zbarazuar Partinë Socialiste. Nuk ka asnjë shpresë tjetër”, tha Rama në takimin e zgjeruar me të zgjedhurit vendorë të PS. “Për Berishën diversioni është shpresa e ditës, ndërsa shpresa e natës është regjistri i përkohshëm i zgjedhësve për të cilin socialistët duhet të jenë shumë të vëmendshëm” tha Rama. Një ditë më parë, në mbledhjen e grupit parlamentar të PD, Berisha aludoi se PS drejtohet nga dy kryetarë, Rama dhe Nano.

Ka ndryshuar rregullorja e Parlamentit për grupet
Nano dhe mbështetësit duhet të kalojnë patjetër 6 muaj “stazh”

Ish kryetari i PS Fatos Nano do ta ketë të vështirë të legjitimojë mbështetësit e asaj që ai e konsideron si grup të vetin. Rregullorja e Kuvendit të Shqipërisë, ndryshe nga herët e tjera, parashikon procedura të tjera për largimin e deputetëve nga një grup në një grup tjetër parlamentar. Edhe pse “de fakto” deputetët mund të bashkohen me një grup tjetër parlamentar, ose mund të ndryshojnë parti, duke kaluar nga e majta tek e djathta, ose anasjelltas, “de jure” (ligjërisht) një lëvizje e tillë nuk ka vlerë pa u plotësuar një afat kohor prej 6 muajsh. Në bazë të nenit 15 të rregullores, largimet e deputetëve nga njëri grup në tjetrin nuk mund të bëhen më si përpara, por ka klauzola që mund të frenojnë të zgjedhurit e popullit. Nëse një deputet ikën nga një grup parlamentar, duhet më parë të njoftojë më shkrim kryesinë e grupit parlamentar dhe Byronë e Kuvendit. Më pas ai, mund të cilësohet për 6 muaj si i pavarur. Deputeti vetëm pas kësaj periudhe “stazhi” mund t’i bashkohet forcës politike, që preferon. Kjo klauzolë e tillë është e detyrueshme për t’u zbatuar nga ana e çdo deputeti. “Për krijimin e një grupi parlamentar kërkohet një minimum prej 7 deputetësh. Çdo deputet mund të jetë anëtar vetëm i një grupi parlamentar. Një deputet që largohet nga grupi parlamentar mund t’i bashkohet një grupi tjetër parlamentar, vetëm pas gjashtë muajve nga data e largimit”, thuhet në pikën dy të nenit 15 të rregullores. Në bazë të këtij neni, nëse një deputet zgjidhet brenda një legjislature, atëherë ai brenda tri ditëve duhet të njoftojë kryetaren e Kuvendit se në cilën grup parlamentar do të marrë pjesë. “Kur numri i deputetëve të një grupi parlamentar bie nën numrin e parashikuar nga pika 2 e këtij neni, grupi pushon së ekzistuari. Brenda 3 ditëve nga data e zgjedhjes së kryetarit të Kuvendit, çdo deputet deklaron me shkrim se në cilin grup parlamentar bën pjesë. Vetëm deputetët që nuk bëjnë deklarimin e mësipërm, ose që nuk i përkasin asnjë grupi parlamentar mund të formojnë grup të përzier”, thuhet në pikën 3 dhe 4 të nenit 15 të rregullores. Përpara miratimit të kësaj, rregullorja më parë kishte një rregull të veçantë.