redaksia
redaksia@gazetashqiptare.com

Refuzimi nga ana e Presidentit të Republikës i kandidaturës së Edit Harxhit për kreun e misionit tonë diplomatik në Shtetet e Bashkuara, ishte akti i fundit i zhurmshëm në procesin e ndërrimit të titullarëve diplomatikë të vendit tonë. Zonja Harxhi gjeti një ‘sistemim’ tjetër, kurse për fatin e listës pritëse të kandidaturave të tjera tashmë në duart e Presidentit, apo ecurinë e ndryshimeve në trupin tonë diplomatik, dihet pak ose aspak. Duke tërhequr pas vetes gjithë vëmendjen mediatike, rasti Harxhi ka shërbyer si një koperturë e përkohshme për pjesën tjetër të problemit, i cili, sic mëson Gazeta, vazhdon të mbetet i pazgjidhur nga ana institucionale, e pse jo, edhe personale.
Qëkurse Kuvendi dhe qeveria e re kanë filluar punën në shtator 2005, Komisioni i Politikës së Jashtme, në bazë të propozimit të Ministrisë së Punëve të Jashtme, ka nisur drejt Presidencës për dekretim, kandidaturat e nëntë ambasadorëve (lidhur me shefat e misioneve, sic eshte rasti i Kosovës ‘pengesa’ Moisiu nuk egziston, sepse ata emërohen nga kryeministri). Prej tyre, deri tani kanë marrë dekretin e presidentit vetëm tre kandidatë, Vili Minarolli në Greqi, Mehmet Elezi në Zvicër dhe Maxhun Peka në Kinë. Pjesa tjetër e listës vazhdon të mbetet, për arsye të ndryshme, e paekzekutuar.
Në fakt, në themel të motiveve që e kanë frenuar presidentin Moisiu në dekretimin e të gjithë kandidatëve të Berishës dhe Mustafait, duket se qëndron një problem komunikimi. Pra, në fjalë të tjera, kreu i shtetit, i cili i emëron juridikisht ambasadorët si përfaqësues të tij pranë vendeve ku akreditohen, nuk është konsultuar paraprakisht për emrat që ka përpara në tavolinën e punës. Qysh në fillimet e krizës diplomatike, Presidenca pati lënë të kuptohet se është mbajtur në periferi nga qeveria, në procesin e identifikimit të titullarëve diplomatikë. Cka bie ndesh me rolin kushtetues që presidenti ka në konceptimin dhe zbatimin e politikës së jashtme të Shqipërisë.
Gazeta ka mësuar se Presidenti e ka bërë të qartë shkresërisht para pak kohësh, se do të japë dekretimin për kandidatët që i paraqiten nga qeveria, vetëm pasi kjo e fundit dhe Kuvendi, t’i dërgojnë atij një dosje të plotë informuese dhe orientuese për cdo person të propozuar. Në dritën e fakteve kompromentuese që dolën për një pjesë të kdnaidatëve (rastet Harxhi e Dilja), kjo kërkesë tingëllon mjaft e qartë dhe e arsyeshme. Moisiu ka sqaruar në këtë komunikim që ka pasur me qeverinë, se nëse atij nuk do t’i frohet informacion i mjaftueshëm për të gjykuar për të shkuarën, kapacitetin dhe formimin e kandidatëve, ai do të refuzojë të firmosë dekrete të tjera. Cka provohet indirekt nga fakti i lënies pa firmë të mjaft dekreteve që ka aktualisht ‘në shqyrtim’ kreu i shtetit. Cka e thellon edhe më tej krizën e ambasadorëve, të filluar qëkurse qeveria Nano ngeci në rrjetën e emrave të rinj dhe atyre të vjetër, duke e lënë vendin tonë pa përfaqësues diplomatik në SHBA dhe vende të tjera ku tashmë janë shkarkuar titullarët.

Procedura deri në dekretimin
Kandidaturat për ambasadorë propozohen nga kryeministri kryesisht, por edhe nga Ministri i Jashtëm. Pasi propozohen emrat sëbashku me CV i dorëzohen Komisionit të Politikës së Jashtme. Ky komision zhvillon një seancë dëgjimore, ku dëgjon pretendimet e kandidatëve për ambasadorë dhe ccfarë synojnë të realizojnë ata në këtë detyre. Pas dëgjimit, komisioni përgatit një raport të cilin ja dorëzon Presidentit të Republikës për dekretim. Raporti përmban mendimin e anëtarëve të komisionit për kandidaturat

Edith Harxhi
Emri i saj hapi serinë e ndryshimeve në diplomaci. Ajo u propozua si ambasadore në SHBA por Moisiu nuk u përgjigj për dekretimin, pas kësaj Harxhi është emëruar zv/ministre e Jashtme

Maxhun Peka
Ish-sekretari i Përgjithshëm i Këshillit të Ministrave Maxhun Peka është derkretuar nga Presidenti Moisiu si Ambasador i Shqipërisë në Republikën Popullore të Kinës

Vili Minaroli
Ish-kryetar i PD së Tiranës Vili Minarolli është dekretuar tashmë ambasador në Greqi duke zëvendësuar atje ish-ambasadorin Bashkim Zeneli i cili u lirua nga detyra.

Mehmet Elezi
Mehmet Elezi u dekretua ambasador në Zvicër nga ana e Presidentit Moisiut pa vonesë ndryshe nga kandidatët e tjerë që presin ende që të dekretohen nga Presidenti.

AMBASADORET
Emrat e kandidatëve për ambasadorë dorëzuar presidentit Alfred Moisiu

Vili Minaroli, Ambasador në Greqi, i dekretuar
Maxhun Peka propozuar për ambasador në Kinë, dekretuar
Mehmet Elezi, ambasador në Zvicër, dekretuar

Edith harxhi, ambasadore në SHBA, nuk u dekretua
Lulblin Dilja, ambasador në OKB, u tërhoq

Tatjana Kongoli, ambasadore në Austri, pa përgjigje
Bujar Skëndo ambasador në Bullgari, pa përgjigje
Admirin Banaj ambasador në Mbretërinë e Arabisë Saudite, pa përgjigje
Sejdi Qerimaj, ambasador pranë zyrës së Kombeve të Bashkuara dhe organizatave të tjera në Gjenevë, pa përgjigje