Armando Meta
a.meta@gazetashqiptare.com

Kryeministri Berisha takon Presidentin Moisiu, për ambasadorët dhe për reformën elektorale. Ngrica e krijuar mes Kryeministrit Sali Berisha dhe Presidentit të Republikës, Alfred Moisiu, rreth problematikës së krijuar për dekretimin e ambasadorëve, duket se ka filluar të shkrijë. Mes kreut të shtetit dhe Kryeministrit, ishte krijuar një perde komunikimi pas refuzimit të Moisiut për të dekretuar dy ambasadorë të emëruar nga Berisha, përkatësisht Edit Harxhi në SHBA dhe Tatjana Kongoli në Vjenë. Por, takimi i djeshëm për çështjen e ambasadorëve mes dy drejtuesve të lartë të shtetit, duket se e ka futur në normalitet institucional këtë proces. Berisha ka vendosur t’i paraqesë vetë kandidatët për ambasadorë përpara Moisiut. Kryefjala e këtij takimi, mësohet se ka qenë zgjidhja e “fjalëkryqit” për caktimi e ambasadorit të Shqipërisë në SHBA.

Ambasadorët
Ndonëse qeveria e ka shpallur SHBA-në aleat strategjik, ka disa muaj që përfaqësimi i Shqipërisë në këtë vend nuk është në nivel ambasadori. Problemi i përfaqësimit u bë i koklavitur, pas refuzimit të Moisiut për të dekretuar Harxhin si ambasadore në “tokën e premtuar”. Këtë radhë, Berisha duket se ka hequr dorë nga taktika “e pranimit pa kushte” të të përzgjedhurve të tij. Shenjë reflektimi e kësaj, është edhe prezantimi prej tij përpara Moisiut si kandidatë për ambasadorë në Ëashington i Aleksandër Sallabandës. Për momentin, ky i fundit mban postin e zëvendësministrit të Shëndetësisë. Paralelisht me Sallabandën, Kryeministri ka prezantuar edhe kandidaturën e Arjan Neritanit si ambasadorë në OKB, ndërsa Çlirim Sejdini, do të jetë ambasador në Gjenevë (OKB). Diplomati Besnik Konçit, do të jetë kandidat për ambasador në Kanada, ndërsa Lisien Bashkshkurti, është kandidatura për postin e ambasadorit në Maqedoni. Edhe Rumania do të ketë ambasadorin e ri. Kandidat për këtë, është Dashnor Dervishi, një ndër diplomatët më të vjetër të shërbimit. Për ambasadorët do të merret edhe mendimi i shteteve ku do të shkojnë, si dhe do të kërkohet informacion zyrtar për figurën e tyre.

Reforma
Në takimin mes Presidentit dhe Kryeministrit, mësohet se është trajtuar edhe çështja e reformës elektorale. Moisiu mësohet të ketë kërkuar respektimin e vendimeve të tryezës për reformën elektorale, duke iu referuar edhe rekomandimeve të OSBE/ODIHR-it. Ai ka nënvizuar që të mos ketë vendime politike, por të arrihen standardet. Marrëveshja PD- PS për formësimin e komisionit për reformën elektorale, në thelb cenon marrëveshjen e firmosur mes forcave politike parlamentare përpara Presidentit. Në këtë marrëveshje, vihej theksi tek parimi i barazisë që duhet të kishin forcat politike parlamentare të cilat do të ishin në përbërje të këtij komisioni. Partitë e vogla parlamentare, kanë akuzuar PS-në dhe PD-në se me komisionin që kanë formuar, kanë shkelur marrëveshjen e firmosur para presidentit për barazi të subjekteve politike në këtë komision.

Kandidatët e rinj për
ambasadorë
Aleksandër Sallabanda, në Uashington.
Adrian Neritani, në OKB.
Besnik Konçi, në Kanada.
Lisien Bashkurti, në Maqedoni.
Dashnor Dervishi, në Rumani.

Reforma
Moisiu mësohet të ketë kërkuar respektimin e vendimeve të tryezës për reformën elektorale, duke iu referuar edhe rekomandimeve të OSBE/ODIHR-it.

http://www.panorama.com.al/ 

viti V, Nr:1193

E Shtunë 21 Janar 2006

Zgjedhjet dhe ambasadorët, kryeministri Berisha mbi një orë “kokë më kokë” me presidentin

Zgjedhjet, Moisiu mbron të vegjlit
Berisha i kërkon edhe dekretimin e shpejtë të ambasadorëve

Presidenti Moisiu dhe kryeministri Berisha u takuan dje në selinë e Presidencës për më shumë se një orë për të diskutuar lidhur me zhvillimet më të fundit në vend.

Asnjëra palë nuk pranon të japë detaje rreth takimit, por kërkesa vjen në fakt vetëm një ditë pasi partitë e vogla parlamentare kërcënuan me bojkotim të komisionit të reformës zgjedhore.
Presidenti Moisiu është interesuar pranë kreut të qeverisë për qëndrimin që do të mbajë maxhoranca për kërkesat e partive të vogla. Kreu i shtetit është për përfshirjen e sa më shumë aktorëve në zhvillimet për kodin e ardhshëm dhe fatin e zgjedhjeve. Madje Presidenti i Republikës ka qenë iniciuesi kryesor i tryezës për zgjedhjet, ku të gjitha partitë shprehën vullnetin për të ndryshuar kodin apo reformën zgjedhore. Por pyetjet që ka shtruar presidenti përpara partive politike, shkonin deri aty sa diskutohej edhe sistemi zgjedhor dhe ndryshimi i kushtetutës. Berisha, sikurse e ka shprehur publikisht, i ka bërë të qartë presidentit se mund të garantohet vetëm një veto për të gjitha partitë e vogla, bazuar edhe në numrin e deputetëve që të gjitha këto parti kanë. Gjithashtu, Berisha ka thënë, se nuk mund të heq të drejtën e vetos të kërkuar nga opozita. Presidenti ka kërkuar gjetjen e një zgjidhjeje të përshtatshme për të mos acaruar më tej bisedën.

Ambasadorët
Një tjetër çështje diskutimi mes Berishës dhe Moisiut ka qenë çështja e ambasadorëve. Ndryshe nga takimi i parë, takimi i djeshëm u shoqërua me tone optimiste dhe tone të zbutura ndaj njëri-tjetrit. Sipas burimeve pranë Presidencës, Berisha i ka paraqitur disa emra Moisiut, ndër të cilat përfshihet edhe ai i zv.ministrit të Shëndetësisë, Aleksandër Sallabanda si ambasador në SHBA. Përveç tij, kryeministri ka konsultuar edhe emra të tjerë, të cilët më parë duhet të paraqiten në komisionin parlamentar të politikës së jashtme si Adrian Neritani përfaqësues në OKB, Besnik Konçi, ambasador në Kanada, Lisien Bashkurti ambasador në Maqedoni, Dashnor Dervishi, si ambasador në Rumani. Mësohet se Berisha i ka kërkuar Moisiut që të mos bëhet pengesë për emrat e paraqitur, për t’i dekretuar sa më parë ato.

 

Faqe 8 - Politikë

ambasadori i ri ne greqi

intervista

Dje ambasadori i dekretuar për në Greqi, Vili Minarolli, u takua me presidentin dhe kryeministrin

“Nuk jam politik, kam qenë diplomat”

“Do të punoj për të rritur shkëmbimet tregtare mes vendeve”

Dje ka qenë dita e fundit, që Vili Minarolli i dekretuar ambasador në Athinë nga presidenti Moisiu, ka qëndruar në Tiranë. Ai është nisur drejt Athinës për të paraqitur letrat kredenciale te presidenti i vendit fqinj. Minarolli shkon në detyrë pas kthimit në Shqipëri të ish-ambasadorit, Bashkim Zeneli. Ju jeni një ndër ambasadorët që jeni miratuar pa asnjë problem edhe në komisionin parlamentar, por edhe dekretimi nga presidenti. Kjo për shkak të së shkuarës suaj iplomatike, apo për shkak të formatit politik? Përgjigjja e kësaj pyetjeje nuk më përket mua. Unë rikthehem në shërbimin diplomatik, pasi përfundova tre mandate si deputet i Kuvendit të Shqipërisë, por nuk mund të them se kam qenë i shkëputur nga diplomacia. Gjatë tetë viteve në opozitë të PD, një pjesë e drejtuesve më të lartë të saj, kanë qenë, veç të tjerash edhe diplomatët e PDSH, kuptohet të padrekretuar nga kreu i shtetit. Po ashtu, qenia ime për 6 vjet si përfaqësues i Parlamentit Shqiptar në Asamblenë Parlamentare të KE dhe për katër vjet në Asamblenë Parlamentare të PABSEC-ut, më bënte të ndjehesha në vazhdimësi të karrierës sime diplomatike. Unë nuk e fillova karrierën diplomatike si politikan, por u angazhova në politikë, duke ardhur nga diplomacia. Marrëdhëniet me Greqinë kanë pasur ulje ngritje gjatë gjithë këtyre viteve. Ka raste që ato kanë qenë të shkëlqyera, por në raste të tjera kanë qenë jo shumë të mira. Si mendoni se do të zhvilloni më tej këto marrëdhënie? Do të kisha një mendim të ndryshëm nga ju. Marrëdhëniet shtetërore dhe politike me Greqinë kanë pasur vetëm ngritje. Ato janë karakterizuar nga vullnete politike dhe dëshira të përbashkëta për fqinjësi të mirë, për mirëkuptim, bashkëpunim dhe miqësi. Unë kam po ashtu vullnetin dhe dëshirën e palëkundur të shtetit dhe qeverisë që përfaqësoj, që të kontribuoj në zhvillimin e mëtejshëm të këtyre marrëdhënieve, në përputhje me interesat reciproke të të dy vendeve dhe popujve tanë, në proceset bashkëpunuese dhe integruese dypalëshe, rajonale dhe evropiane. Programi i qeverisë e përcakton qartë vazhdimësinë dhe thellimin e mëtejshëm të procesit të integrimit të Shqipërisë në familjen evropiane dhe në këtë kuadër, zgjerimi i marrëdhënieve me Greqinë, në të gjitha fushat, përbën prioritet të politikës sonë të jashtme. Cilat janë idetë dhe projektet kryesore për ecurinë e punës së ambasadës sonë në Athinë? Ajo është ambasada me personelin më të madh. Do ta ruajë këtë performancë, apo do të ketë ridimensionim të punës së sektorëve? Këto i kam shprehur me kryeministrin Berisha, kur pata kënaqësinë dhe vlerësimin e tij, për t’u propozuar në këtë detyrë, në seancën dëgjimore në Komisionin e Jashtëm të Kuvendit dhe në bisedë me presidentin Moisiu, pas dekretimit nga ana e tij. Për sa i përket performancës së ambasadës, ajo do t’i shërbejë sa më mirë plotësimit të detyrave, që padyshim janë në përputhje me programin e qeverisë, si në drejtim të forcimit dhe thellimit të marrëdhënieve politike, ekonomike, tregtare, kulturore, etj, ashtu dhe të shërbimit sa më të mirë ndaj qytetarëve shqiptarë që jetojnë e punojnë në Greqi. Për këto kam marrë porosi të qarta nga ana e ministrit të Punëve të Jashtme, zotit Mustafaj, dhe më konkretisht mund të flas pasi të jem njohur nga afër qoftë me personelin e ambasadës, ashtu edhe me detyrat që duhet të kryejë ajo. Cila do të jetë politika që ju do të ndiqni në drejtim të ndihmës për komunitetin shqiptar dhe integrimin e tyre në jetën greke? E ritheksoj, ambasada do të jetë në shërbim të interesave të komunitetit shqiptar, që jeton e punon në Greqi. Gjatë këtyre 15 viteve, ky komunitet, që është më i madhi në numër nga të gjithë komunitetet e huaja në këtë vend dhe të shpërndarë në të gjithë vendin, ka demonstruar respekt dhe mirënjohje ndaj popullit mikpritës grek, respekt ndaj ligjeve dhe normave ligjore të shtetit mikpritës, dëshirë për punë dhe për kushte më të mira jetese dhe dashuri për vendin e tyre dhe njerëzit që kanë këtu. Mbi këtë bazë, Parlamenti dhe qeveria greke kanë miratuar ligje dhe akte ligjore për lehtësimin dhe përmirësimin e vazhdueshëm të kushteve dhe kërkesave të drejta të tyre, duke ndihmuar në procesin e integrimit të tyre në shoqërinë greke. Padyshim të dy qeveritë tona do ta zgjerojnë më tej për të ardhmen këtë rrugë. Po lidhur me shkëmbimet tregtare mes dy vendeve? Në programin e qeverisë i është kushtuar prioritet diplomacisë ekonomike dhe kulturore dhe konkretizimin më të qartë e më të plotë ky koncept e gjen në marrëdhëniet tona me Greqinë dhe te dëshira e vullneti për ta thelluar më tej në të ardhmen. Në vendin tonë kryejnë veprimtari 4 banka greke, që në vazhdimësi e kanë zgjeruar aktivitetin dhe fushën e veprimit. Po ashtu, në Greqi ka filluar aktivitetin e saj Banka Amerikane e Shqipërisë. E solla këtë shembull për të ilustruar se janë marrëdhëniet në rritje tregtare midis dy vendeve, që mundësojnë shtimin e institucioneve financiare në Greqi dhe në Shqipëri. Biznese greke dhe shqiptare kanë sipërmarrje të fuqishme në të dy vendet dhe ato e kanë jo vetëm vullnetin politik të të dy qeverive, por tashmë edhe kuadrin e plotë ligjor për t’u zhvilluar më tej pa pengesa. A do të punoni politikisht për të sjellë në Tiranë kryeministrin Karamanlis? Padyshim që vizitat reciproke të krerëve të shteteve dhe qeverive të të dy vendeve u japin shtytje të fuqishme marrëdhënieve dhe nxisin për veprime të tjera në interes reciprok. Marrëdhëniet politike janë të shkëlqyera dhe pavarësisht nga kjo, nuk është objekt i punës së ambasadës të punojë politikisht. Nga të dy kryeministrat është shprehur dëshira për vizita reciproke dhe ajo që i mbetet ambasadës shqiptare në Athinë dhe ambasadës greke në Tiranë është komunikimi me autoritetet përkatëse për të gjetur kohën e përshtatshme në përputhje me angazhimet dhe axhendat e të dy krerëve të qeverive. re.po   Zeneli, dekorata nga Athina Bashkim Zeneli, ambasadori i Shqipërisë në Athinë, përpara largimit nga vendi fqinj është dekoruar nga ministri i Rendit, Vulgaraqis, dhe gjithashtu nga kryebashkiakja, Dora Bakojanis. Ambasadori Zeneli u vlerësua për punën e bërë, sidomos për integrimin e komunitetit shqiptar në jetën greke, një traditë që pritet të vazhdojë edhe më tej. Zeneli ka ndërhyrë në shumë raste edhe në zgjidhjen e problemeve konfliktuale, apo edhe në ndjekjen e proceseve gjyqësore për shqiptarët. Ndërkohë, që edhe këtë vit, pavarësisht se do të linte detyrën, për të katërtin vit radhazi, Zeneli mundësoi lejen për emigrantët shqiptarë, që jetojnë e punojnë në Greqi, të mund të kalonin festat e fundvitit në Shqipëri, edhe pse nuk ishin të pajisur me dokumentet e duhura, apo nuk kishin rinovimin e tyre. Ky urdhër është në fuqi deri në fund të janarit.

© 2003 Gazeta Panorama