Shteti shqiptar i jep garancinë presidentit kosovar, Sejdiu, se nuk do të tërhiqet nga kërkesa për një Kosovë të pavarur.

Ky ishte mesazhi i dhënë dje nga drejtuesit më të lartë të shtetit shqiptar, Moisiu, kryeministri Berisha gjatë takimit që zhvilluan dje në Tiranë me presidentin Sejdiu. Prezenca e tij në Tiranë përbënte njëkohësisht edhe vizitën e tij të parë zyrtare në Shqipëri, që kur ai është zgjedhur në postin e presidentit. Takimin e parë, Sejdiu e nisi në Pallatin e Brigadave me kreun e shtetit shqiptar, Alfred Moisiu. Moisiu dhe Sejdiu i dhanë një rëndësi të veçantë afirmimit të faktorit shqiptar si një faktor paqeje, stabiliteti e prosperiteti në Ballkan e më gjerë. Presidenti Moisiu garantoi dhe një herë mbështetjen e Shqipërisë për pavarësinë e Kosovës, mbështetjen e plotë institucionale dhe trajnimin dhe përgatitjen e specialistëve të rinj. “Të gjitha përpjekjet dhe aspiratat e Kosovës do të shpërblehen ashtu siç e do populli i Kosovës, sepse kjo është në të mirë të paqes dhe stabilitetit të rajonit. Mendimi ynë ka qenë, është dhe mbetet: Kosova e pavarur. Kjo synon zhvillimin paqësor të rajonit tonë dhe të gjithë së bashku të përgatitemi për t’u integruar në BE”, tha Moisiu pas takimit. Më pas, rreth mesditës presidenti kosovar është takuar me kreun e qeverisë shqiptare, Sali Berisha. “Përparimi i Kosovës është meritë e udhëheqjes politike dhe qytetarëve të saj që kanë shkrirë në një ëndrrën e pavarësisë dhe të integrimit”, tha Berisha gjatë takimit me Sejdiun. Në konferencën për shtyp të përbashkët mes dy presidentëve, Sejdiu foli edhe për mënyrën e zgjidhjes së çështjes së pakicave serbe. “Ne duhet të investojmë vërtet shumë me dëshmi të plota në procesin e integrimit të pakicave, në këtë rast dhe të serbëve dhe dëshira jonë është që njerëzit të kthehen në shtëpitë e veta dhe ajo pjesë e pakicës serbe që është e koncentruar në veri të Kosovës të kthehet në shtëpitë e veta, sikurse dhe pjesa tjetër shqiptare, apo boshnjake që ka lëvizur nga pjesa veriore e qytetit të kthehet në shtëpitë e veta”, theksoi presidenti kosovar. Sipas tij, “në bisedimet e Vjenës kemi dhënë një vizion se si do të jetë mundësia më e mirë e zgjedhjes në këtë kohë të qytetit të Mitrovicës, që të jetë një qytet i integruar me një proces decentralizues në dy komuna në një këshill qeverisës të përbashkët dhe në fazë tranzicioni natyrisht i udhëhequr nga një ndërkombëtar, një tranzicion normal, dhe më vonë vetëqeverisjen vendore dhe po ashtu bëjmë apel që ndërhyrjet e jashtme që mund të jenë, apo çaste që kanë nxitjen e tyre, apo nevojën e tyre të krijojnë destabilitet, të ndërpriten”.
Vizita e Koshtunicës
Por nuk mund të mungonte ngacmimi i gazetarëve për vizitën e Koshtunicës në Kosovë, e cila me gjithë kundërshtimin e institucioneve kosovare, do të realizohet sot. Sejdiu u shpreh absolutisht kundër kësaj vizite, nëse qëllimet e saj do të ishin politike, por sa për festën fetare, ai u shpreh se çdokush ka të drejtë të pelegrinojë për festat e besimit të tij. Presidenti Moisiu nuk e ka kundërshtuar mendimin e homologut të tij kosovar, edhe pse ka mbrojtur pozicionin për ruajtjen e një fqinjësie të mirë.

Presidenti kosovar flet përpara deputetëve shqiptarë
Sejdiu rikthen Nanon dhe Malajn në Kuvend

Presidenti Sejdiu rikthen Nanon në seancat parlamentare. Prania e presidentit të Kosovës në Kuvend ka risjellë ish-kreun ne PS-së, Fatos Nano, i cili mungonte prej kohësh në Parlament. Ashtu siç pritej, në seancën e sotme është vënë re një mungesë e konsiderueshme e deputetëve në sallë. Në sallë kanë qenë prezent vetëm 100 deputetë, 40 të tjerë si nga kampi i pozitës, ashtu edhe opozitës kanë munguar. Nga kampi i majtë kanë qenë të pranishëm vetëm 28 deputetë të PS-së nga 42 që ka gjithsej kjo parti politike. Në sallë është vënë re edhe prezenca e deputetit të PS-së, Arben Malaj, që është kthyer nga SHBA për të marrë pjesë në këtë seancë të veçantë parlamentare. Pas përfundimit të fjalës nga ana e presidentit të Kosovës, Sejdiu, Nano ka dalë me një nga salla. Ai së bashku me një grup deputetësh të PS-së kanë pirë një kafe në ambientet e brendshme të godinës së Parlamentit. Për herë të fundit që Nano ishte prezent në seancë lidhej pikërisht me seancën që Kuvendi zhvilloi në përkujtim të presidentit të Kosovës, Ibrahim Rugova. Sejdiu në fjalën e tij u shpreh se “me pavarësinë e Kosovës, por edhe me përparimet demokratike që ka bërë Shqipëria bëhet e mundshme që Kosova dhe Shqipëria të konvergojnë me sukses drejt familjes evropiane. Ëndrrat e parealizuara do të bëhen realitet në proceset integruese euroatlantike”. Pas fjalimit të mbajtur në seancë nga Sejdiu, deputetët vijuan me rendin e ditës. Opozita në këtë seancë ka protestuar ndaj bllokimit të procesit të reformës zgjedhore, duke e fajësuar maxhorancën. Deputetët e opozitës braktisën seancën më pas në shenjë proteste, për mosarritjen e konsensusit politik për reformën zgjedhore. Deputetët e maxhorancës fajësuan opozitën për qëndrimin bllokues që ata po mbajnë në realizimin e procesit të reformës zgjedhore.

• Fatmir Sejdiu
  “Për vizitën, që mund të bëjë kryeministri serb mund të them se çdo njeri mund të vijë për një vizitë private, për një pelegrinazh në manastir, por vizita të karakterit politik dhe të ndonjë vokacioni tjetër që ai mund të shfrytëzojë janë absolutisht të papranueshme”.
• Agim Çeku
  “Kosova ruan dhe respekton liritë fetare dhe ardhja e Koshtunicës në Kosovë e dëshmon këtë. Vendimin e ka marrë UNMIK. Besojmë se nuk do të jetë asgjë më shumë se një shërbim fetar dhe në qoftë se Koshtunica me ardhjen e tij ka pas për qëllim që ta provokojë popullin e Kosovës, ne nuk do të biem pre e provokimeve”.
• Hashim Thaçi
  “Vendimi për ardhjen e Koshtunicës është marrë nga UNMIK-u. Kosova është e interesuar të ketë marrëdhënie të mira fqinjësore me Serbinë. Kosova është vend demokratik me shoqëri të civilizuar, që ka pritur dhe përcjellë shumë zyrtarë të lartë shtetërorë”.
• UNMIK
  “Koshtunica nuk duhet të keqpërdorë vizitën për qëllime politike. Kjo është një vizitë private, për qëllime fetare dhe ne presim që ajo të jetë në këtë linjë dhe të mos politizohet. Vizita nuk është zyrtare, UNMIK nuk ka planifikuar asnjë takim me kryeministrin serb”.
• Pio Sabeta, KFOR
  “Policia dhe trupat e KFOR-it kanë shtuar masat e sigurisë në mbarë Kosovën për të parandaluar çfarëdo incidenti në pikat kontrolluese të policisë. Situata e sigurisë nuk ka ndryshuar. UNMIK-u dhe policia janë përgjegjëse për këtë, ne vetëm po i ndihmojmë ata”.

Kryeministri maqedonas telefonon homologun kosovar, Çeku dhe liderin e opozitës, Thaçi për incidentet

Buçkovski kërkon ndihmë nga kosovarët
Deklarata: Incidentet në Maqedoni kërcënojnë statusin e Kosovës

Kryeministri Buçkovski i ka telefonuar dje homologut të tij kosovar, kryeministrit Agim Çeku dhe liderit të opozitës, Hashim Thaçi, për të kërkuar ndihmën e tyre me anë të një apeli drejtuar partive politike shqiptare në Maqedoni.

Buçkovski u ka telefonuar politikanëve shqiptarë në Kosovë në një përpjekje për të ulur tensionin në vend përpara zgjedhjeve të afërta të Maqedonisë. Këtë lajm e raportoi televizioni maqedonas “Kanal 5”, i cili ka cituar burimet zyrtare. Vllado Buçkovski i ka kërkuar Agim Çekut dhe Hashim Thaçit që të dënojnë dhunën në Maqedoni, duke i paralajmëruar liderët kosovarë se kjo që po ndodh vështirëson edhe procesin e përcaktimit të statusit të Kosovës. Nëse zgjedhjet do të vazhdonin me incidente, atëherë në Maqedoni do të krijoheshin trazira dhe dhunë dhe vëmendja e ndërkombëtarëve për Ballkanin do të zhvendosej nga Kosova në Maqedoni. Zgjedhjet në vendin fqinj startojnë më 5 korrik dhe mënyra se si do të zgjidhet Parlamenti i ri maqedonas është quajtur shumë e rëndësishme nga ndërkombëtarët, sepse ajo duhej patjetër të zhvillohej në një rrugë të qetë e demokratike. Sipas përfaqësuesit të BE në Maqedoni, Fuere: “Vendi kandidat për në BE duhet të ketë zgjedhje perfekte”. Ndërkohë, politikanët kosovarë i janë përgjigjur menjëherë kërkesës së kryeministrit Buçkovski. Partia Demokratike e Kosovës dhe Aleanca për Ardhmërinë e Kosovës, u kanë bërë thirrje subjekteve politike shqiptare në Maqedoni, që të zhvillojnë një fushatë të qetë zgjedhore. Udhëheqësit politikë kosovarë kanë deklaruar dje se vetëm suksesi i zgjedhjeve të lira garanton stabilitetin politik në Maqedoni dhe integrimin e saj në strukturat euroatlantike. Buçkovski ka kërkuar nga Thaçi që ai të përdorë ndikimin e tij te partitë shqiptare maqedonase për një fushatë të qetë dhe e ka marrë. Edhe partia në koalicionin qeverisës, AAK, u ka bërë thirrje partive shqiptare në Maqedoni që të zhvillojnë një fushatë të qetë zgjedhore. Dy partitë politike të Kosovës, PDK dhe AAK janë shprehur se “vlerësimi i demokracisë, stabiliteti demokratik, sundimi i ligjit, rendi, siguria dhe reformat demokratike duhet të jenë përkushtim i të gjitha forcave politike në rajon”.

Moisiu: Të mos njollosim faktorin “shqiptar” në rajon

“Dua t’u bëj thirrje forcave politike shqiptare në Maqedoni, në emër të respektimit të faktorit shqiptar në rajon, që të dinë të mirëkuptohen me njëra-tjetrën, të zbatojnë rregullat e lojës dhe të demokracisë. Rezultati se kush do ta marrë postin mund të tregohet vetëm nëpërmjet votës, është populli ai që vendos. Të gjitha këto veprime të dhunshme nuk janë të pranueshme dhe shpresoj që drejtuesit politikë shqiptarë në Maqedoni do të arrijnë që vërtet të stabilizojnë gjendjen dhe t’u presin rrugën dëshirave të strukturave të tyre, të cilat po kërkojnë të njollosin dashje pa dashje rolin e faktorit shqiptar në rajon. Ky është një problem me shumë përgjegjësi që shtrihet jo vetëm nga pikëpamja e impaktit për Maqedoninë, por dhe në Kosovë e Shqipëri. Shpresoj që vërtet drejtuesit politikë shqiptarë në Maqedoni ta kuptojnë drejt situatën dhe të vendosin rregullin e duhur demokratik me forcat e tyre politike”.

Sejdiu: Roli i shqiptarëve në Maqedoni të jetë konstruktiv

“Ne dëshirojmë një fqinjësi të mirë dhe të vazhdueshme me Maqedoninë dhe një stabilitet të saj të përgjithshëm dhe po ashtu një rol të rëndësishëm konstruktiv brenda vetë strukturës shtetërore dhe politike të Maqedonisë të shqiptarëve, të cilët janë një faktor i rëndësishëm në këtë vend. Unë pajtohem plotësisht me atë që tha presidenti Moisiu se është përgjegjësi e posaçme e partive dhe subjekteve politike në Maqedoni, që të luftojnë për votën e lirë të qytetarëve. Lufta për votën e lirë është luftë e bindjes, është pjesë e rrezatimit të kulturës politike dhe mendoj se kanë energjinë e mjaftueshme që ta bëjnë këtë dhe kujtoj se është një shans i mirë në këtë proces zgjedhor që secila elitë politike, secili subjekt politik të dëshmohet në këtë plan dhe çdo manifestim tjetër, apo qasje tjetër që mund të ketë karakterin e një konkurrence, që e kalon pjesën konvencionale të rrugëtimit politik nuk është normale”.

 http://www.gazeta55.net/home.jsp

Sejdiu takon Moisiun dhe Berishën
  Moisiu dhe Berisha kanë premtuar mbështetje të plotë për pavarësinë e Kosovës dhe integrimin e saj në BE

Autori i Lajmit: H.H. Porsa ka mbërritur në Shqipëri, Presidenti kosovar, Fatmir Sejdiu, ka zhvilluar një takim me homologun e tij shqiptar, Alfred Moisiu. "Shqipëria ka qenë, është dhe do të jetë për pavarësinë e Kosovës",- ka deklaruar Presidenti shqiptar pas takimit me Sejdiun. Duke u ndalur në marrëdhëniet mes Shqipërisë dhe Kosovës, Presidenti Moisiu, vlerësoi se këto marrëdhënie do të marrin një hov të ri pas ndërtimit të rrugës Durrës-Morinë-Prishtinë. Në këtë drejtim, Kreu i shtetit shqiptar theksoi se "marrëdhëniet mes Shqipërisë dhe Kosovës, veçanërisht në fushën ekonomike duhet të fuqizohen edhe më shumë, dhe se ndërtimi i rrugës Durrës-Morinë-Prishtinë, përveçse do të shtojë bashkëpunimin midis dy vendeve, do të afrojë Kosovën me detin. Takimi me Berishën Ndalesa e dytë e Presidentit kosovar në kryeqytetin shqiptar ishte Kryeministria. Pas takimit të zhvilluar në selinë qeveritare mes Sejdiut dhe Berishës, ky i fundit u shpreh se vizita e Presidentit Sejdiu, vjen në një moment shumë të rëndësishëm për Kosovën, por edhe për Shqipërinë dhe rajonin në tërësi. “Kjo vizitë zhvillohet vetëm pak ditë pas një vizite shumë të suksesshme që Presidenti dhe Kryeministri i Kosovës patën në Uashington”,- deklaroi kryeministri Berisha. Kryeministri u shpreh se është në meritën më të madhe të udhëheqjes politike dhe qytetarëve të Kosovës, që kanë shkrirë në një, ëndrrën e pavarësisë dhe ëndrrën e integrimit. Gjatë takimit që kryeministri Berisha zhvilloi me Presidentin e Kosovës është diskutuar për intensifikimin e bashkëpunimin në të gjitha fushat, nga kultura dhe arsimi në fushën ekonomike si dhe në bashkërendimin e luftës kundër krimit të organizuar. Çështja maqedonase Gjatë daljes se tij për mediat, presidenti Sejdiu është shprehur se Kosova ka një qëndrim shumë të qartë dhe dëshiron një fqinjësi të mirë e të qëndrueshme me shtetin e Maqedonisë, si dhe një stabilitet të përgjithshëm. “Lufta për votën e lirë është luftë e bindjes, është pjesë e rrezatimit të kulturës politike dhe mendoj se Maqedonia ka energji të mjaftueshme që ta bëjë këtë”,- deklaroi Sejdiu, i cili ka shtuar se është një shans i mirë që, në këtë proces zgjedhor, secili subjekt politik të dëshmohet i gatshëm për të dhënë më të mirën gjatë konkurrimit. Berisha: “Diskutuam me shqetësim edhe mbi disa incidente të papëlqyeshme në fushatën zgjedhore në Maqedoni, duke u bashkuar në thirrjen tonë për të respektuar të gjitha normat dhe standardet e një fushate të qytetëruar në këtë vend mik me të cilin Shqipëria dhe Kosova kanë marrëdhënie të shkëlqyera. Unë e shfrytëzova rastin për ta falënderuar edhe njëherë me shumë mirënjohje për atë pritje shumë vëllazërore që më rezervuan, por, para së gjithash, për përparimin e madh e të gjithanshëm, që unë e quaj të jashtëzakonshëm në një hark kohor pakvjeçar. Sejdiu: “Kosova ka një qëndrim shumë të qartë dhe dëshiron një fqinjësi të mirë e të qëndrueshme me shtetin e Maqedonisë, si dhe një stabilitet të përgjithshëm". Në këtë drejtim ai u shpreh për një "rol të rëndësishëm konstruktiv të shqiptarëve, brenda strukturave politike dhe shtetërore të Maqedoni. Lufta për votën e lirë është luftë e bindjes, është pjesë e rrezatimit të kulturës politike dhe mendoj se Maqedonia ka energji të mjaftueshme që ta bëjë këtë”. Moisiu: “Një Kosovë e pavarur siguron një zhvillim paqësor në rajonin tonë dhe të gjithë së bashku të përgatitemi për integrimin në Bashkimin Evropian. Një Kosovë e pavarur siguron një zhvillim paqësor në rajonin tonë dhe të gjithë së bashku të përgatitemi për integrimin në Bashkimin Evropian. Shqiptarët janë një popull që dinë të falin, por jo të harrojnë, dinë të falin për arsye të idealeve më të mëdha që kanë përpara siç është pavarësia e Kosovës”. Integriteti Shtetet e Bashkuara të Amerikës mbështesin qëndrimet e shprehura në Grupin e Kontaktit se tërësia territoriale e Kosovës është e plotë dhe është e pandashme, deklaroi Presidenti Sejdiu duke konfirmuar se "edhe Kosova do të vazhdojë të jetë faktor serioz në të gjitha këto procese. Kam marrë përkushtimin e plotë të SHBA-së për angazhim të mëtejshëm si një faktor i pazëvendësueshëm në të gjithë proceset në Kosovë”. Nga ana e tij, zoti Sejdiu falënderoi Shqipërinë për angazhimin e saj të sinqertë e të rëndësishëm duke u kthyer kështu në një faktor ndihmës në një kohë që pritet të përcaktohet statusi përfundimtar i Kosovës. Presidenti kosovar u shpreh më tej se ashtu si dhe Shqipëria, synimi i Kosovës është që pas fitimit të pavarësisë të integrohet në strukturat euro-atlantike. Sejdiu tha se në fazën e zhvillimive në të cilat ndodhet Kosova, por edhe më tej, autoritetet kosovare do t’u kushtojnë pakicave etnike një përkushtim të veçantë. Presidenti shqiptar, Moisiu, theksoi gjithashtu se autoritet kosovare duhet të reagojnë me gjakftohtësi dhe maturi ndaj ngjarjeve që mund të tensionojnë situatën dhe që vijnë si pasojë e zgjatjes së procesit për përcaktimin e statusit përfundimtar. Ky lajm është publikuar: 28/06/2006