Tiranë, më 18.04.2007

Deklaratë për mediat

Duke marrë shkas nga kërkesa e MASH drejtuar Gjykatës së Lartë, lidhur me diskutimin e kthimit ose jo të Muzeut të Shkencave të Natyrës, pronarëve legjitimë, PLL shpreh shqetësimin e saj se, në të paktat raste që jepen për respektimin e të drejtës së shenjtë të pronësisë, sërish gabohet. Madje i kundërvihet edhe zotimit të kryeministrit për respektimin e pronarëve dhe kthimin e pronave aty ku janë të gjitha mundësitë, si rasti në fjalë.

PLL shpreh bindjen se nuk kishte rast më të mirë që z.Pollo të dëshmonte vlerat dhe bindjet e tij të njohura liberale e ato të filozofisë politike të partisë që ai drejton, sesa rasti i krijuar pas këtij konflikti absurd, ku çuditërisht bëhet sikur nuk kuptohet angazhimi i pronarëve për të mos e prekur fondin e Muzeut dhe për ta lënë atë aty ku është, me shpenzimet e tyre. Ndërkohë që, ata të cilët i janë drejtuar Gjykatës së Lartë në dëm të pronarëve, e kanë lënë në gjendje të mjeruar Muzeun e Shkencave të Natyrës.

Me bindjen dhe shqetësimin se pronarëve legjitimë koalicioni i djathtë u detyrohet shumë, për çfarë ka dhe nuk ka bërë, PLL ka lexuar me kujdes edhe rezultatin e 18 shkurtit, që, pavarësisht nga fitorja e së djathtës në mbarë vendin, kumtoi se prishja e interesave dhe aleancave të natyrshme me pronarët dhe tw Pwrndjekurit, i mundësoi socialistëve fitoren në disa qytete kryesore, ku edhe cënimi i pronës, por edhe vlera e saj, janë shumë të mëdha.

Të bindur se të majtët janë shumë të sinqertë kur pohojnë se nuk u detyrohen për asgjë pronarëve legjitimë, ne legalistët dhe të djathtët, jemi shprehur dhe duhet që, rast pas rasti, të dëshmojmë kujdesin dhe respektin për ta, e të drejtën e tyre të shenjtë.

PLL i garanton pronarët se do të vazhdojë të jetë, si gjithmonë, një mbrojtëse e fuqishme e të drejtave të tyre. Ndaj i fton ata për një bashkëpunim të hapur e të sinqertë, që politikisht do të rekuperonte gabimet dhe do të shmangte firot e votave të djathta në të ardhmen, për çka qeverisja e djathtë ka shumë nevojë për të vazhduar rrugën e reformave tërësore, duke fituar zgjedhjet e vitit 2009.

 
--
Partia "Lëvizja e Legalitetit"
Bulevardi "Zog I", Tiranë.
legaliteti@gmail.com
Tel&Fax: +355 4 230076

Tiranë, më 31 mars 2007

Rezolutë : E Këshillit Kombëtar të Partisë "Lëvizja e Legalitetit"

Sot, më datë 31 mars 2007 u zhvilloi punimet Këshilli Kombëtar i Partisë Lëvizja e Legalitetit ku morën pjesë anëtarë të tij nga vendi dhe diaspora. 

1.  Këshilli Kombëtar i PLL përshëndeti propozimin  që i dërguari special i Kombeve të Bashkuara z.Marti Ahtisari i paraqiti Këshillit të Sigurimit, ku parashikohet pavarësia e Kosovës dhe shprehu bindjen se kjo pavarësi do t'i shërbejë stabilitetit dhe sigurisë në rajon dhe do të ndikojë pozitivisht në proceset integruese të shteteve që aspirojnë anëtarësimin në strukturat euroatlantike.

2.  Këshilli Kombëtar i PLL vlerësoi përparimin  e dukshëm që u shënua në realizimin e standardeve gjatë zgjedhjeve te 18 shkurtit 2007 dhe e konsideroi këtë si një meritë të elektoratit shqiptar e të maxhorancës qeverisëse që triumfuan  ndaj përkushtimit të opozitës për t'i sabotuar ato zgjedhje. 

3.  Këshilli Kombëtar i PLL vuri në dukje faktin se fitorja e zgjedhjeve të 18 shkurtit prej "Aleancës së Madhe" i dedikohet më së shumti frymës së re qeverisëse dhe rezultateve konkrete të kabinetit Berisha dhe shprehu nevojën e vazhdimit dhe thellimit të reformave të nisura prej saj. 

4.  Këshilli Kombëtar i PLL kërkoi që qeveria që të marrë masa të qarta për dëmshpërblimin e plotë dhe integrimin e ish të burgosurve politikë,  kryerjen e shpejtë e të thellë të reformës në administratën shtetërore dhe të konsiderojë se i çështja  pronës mbetet akoma një realitet i pazgjidhur që duhet rregulluar mbi bazën e filozofisë së djathë dhe së drejtës së pronarëve të ligjshëm. 

5.  Këshilli Kombëtar i PLL theksoi nevojën që Reforma zgjedhore të synojë mënjanimin e shkaqeve që çojnë në deformimin e rezultatit,  krijimin e frymës së konfliktualitetit dhe zgjatjen e procesit zgjedhor

6.  Këshilli Kombëtar i PLL vlerësoi fitoren në një bashki dhe 19 komuna nga 26 gjithsej ku Partia Lëvizja e Legalitetit konkurroi me kandidatët e saj. Ai vlerësoi gjithashtu numrin e votave të marra prej PLL në shkallë vendi,  numrin e këshilltarëve të fituar prej saj dhe theksoi faktin se shumë prej tyre, gjatë konstituimit të këshillave vendore,  janë zgjedhur edhe në krye të këtyre këshillave. 

7.  Këshilli Kombëtar i PLL  e cilësoi rezultatit e arritur prej "Partisë Lëvizja e Legalitetit"  në zgjedhjet e 18 shkurt si rezultatin më të mirë historik të saj që u arrit pavarësisht vështirësive objektive si mospasja e komisionerëve, mungesa e financave,  mosqenia parti parlamentare dhe qeverisëse, etj. 

8.  Këshilli Kombëtar i PLL,  pasi u njoh me përshëndetjen që Familja Mbretërore Shqiptare i ka dërguar këtij forumi, e falënderoi atë për përkrahjen që Ajo i ka dhënë PLL, për vlerësimin  dhe besimin e shprehur prej Saj ndaj PLL "si një parti kombëtare  që punon për të mirën e Kombin e që vazhdon të mbetet një faktor i rëndësishëm politik". 

9.  Këshilli Kombëtar porositë të zgjedhurit vendorë të PLL që të në veprimtarinë e tyre të kenë parasysh programin  politik të PLL, interesat e zgjedhësve dhe angazhimet tona si pjesë e koalicionit Aleanca e Madhe.

10.  Këshilli Kombëtar i PLL shtroi nevojën e fillimit të përgatitjeve për zgjedhjet e ardhshme parlamentare dhe caktoi për organet e tjera detyra konkrete për organizimin e partisë, plotësimin e strukturave drejtuese në të gjitha nivelet, funksionimin më të mirë të forumeve, etj. 

Tiranë, më 28 mars 2007

Deklaratë për mediat

Partia "Lëvizja e Legalitetit" përshëndet propozimin  që i dërguari special i Kombeve të Bashkuara z.Marti Ahtisari i paqiti Këshillit të Sigurimit, ku në dokumentin e tij parashikohet pavarësia e Kosovës.

Partia "Lëvizja e Legalitetit" ka si prioritet programor të saj  zgjidhjen e çështjes kombëtare, për të cilën ajo në mënyrë të vazhdueshme ka sakrifikuar e kontribuar si brenda ashtu edhe jashtë vendit që nga krijimi i saj.

Dorëzimi i dokumentit në Këshillin e Sigurimit shënon hapin e parë drejt pavarësisë së sigurt të Kosovës. Ne ndjejmë kënaqësi se çështja shqiptare ka fituar mbështetjen e kancelarive më të fuqishme të planetit dhe shprehim mirënjohje të thellë për përkrahjen e tyre.

Ky zhvillim pozitiv e i shumëpritur në dobi të Kosovës duhet vlerësuar me objektivitet nga të gjithë shqiptarët si një përgjegjësi e re drejt krijimit të shtetit të pavarur të Kosovës.

Politika dhe institucionet e Kosovës dhe të Shqipërisë duhet të jenë më shumë se asnjë herë tjetër të unifikuar në qëndrimet e tyre për të ndikuar pozitivisht në finalizimin e këtij procesi historik për mbarë Kombin.

Ne shprehim bindjen e plotë se pavarësia e Kosovës do t'i shërbejë stabilitetit dhe sigurisë në rajon dhe do të ndikojë pozitivisht në proceset integruese të shteteve që aspirojnë antarësimin në strukturat euroatlantike.

--
Partia "Lëvizja e Legalitetit"
Bulevardi "Zog I", Tiranë.
legaliteti@gmail.com
Tel&Fax: +355 4 230076