Partia “Lëvizja e Legalitetit”
Bulevardi “Zog I”, Tiranë.
www.legaliteti.org
Tel&Fax: +355 4 2230076

Tiranë më 18 nëntor 2010

 

NMT Mbreti Leka I i Shqiptarëve priti dje në audiencë Lartësinë e Saj Mbretërore, Princeshën Lea e Belgjikës që shoqërohej nga Ministri i Shtetit belg, Shkëlqesia e Tij, Z. Jaak Gabriels si dhe nga Shkëlqesia e Tij, Z. Gunnar Riebs, historian dhe Konsull nderi i Sllovakisë në qytetin belg të Antwerpen-it.
 
Gjatë bisedave LSM Princesha Lea e Belgjikës solli në kujtesë me emocion të madh takimet e shumta të Mbretit Leka me familjen mbretërore belge dhe veçanërisht me bashkëshortin e Saj, LSM të ndjerin Princ Aleksandër i Belgjikës dhe me NMT Mbretin Baudouin dhe deklaroi për mediat se është tepër e kënaqur që pas një kohe të gjatë të mund të takojë përsëri Sovranin shqiptar.  Ministri i Shtetit belg, Z. Jaak Gabriels e siguroi Mbretin Leka se autoritetet më të larta belge kanë shpreh gjithnjë një miqësi të sinqertë me popullin shqiptar për shkak të lidhjeve të ngushta të familjeve mbretërore të të dy vendeve dhe se është i lumtur që Shqipëria dhe shqiptarët po përjetojnë momente të rëndësishme për zhvillimin dhe afrimin e tyre drejt familjes europiane nën presidencën belge të Këshillit të Bashkimit Europian.
 
LSM Princesha Lea e Belgjikës i raportoi Mbretit Leka për takimet e shumta që kishte pasë me autoritetet e larta shqiptare gjatë qëndrimit të saj një ditor në Tiranë dhe që, përveç pjesmarrjes në një koktej të organizuar nga publicisti dhe shkrimtari i mirënjohur Z. Fahri Balliu, përfshiu edhe një darkë me Ministrin e Punëve të Brendshme Z. Lulzim Basha dhe një takim me Kryeparlamentaren Zj. Jozefina Topalli.  Princesha Lea deklaroi se ishte e kënaqur për dinjitetin me të cilin institucionet shqiptare përfaqësohen nga personalitete të spikatura dhe intelektualë e politikanë të nivelit më të lartë europian dhe shtoi se ishte po ashtu e lumtur që të gjejë në Shqipëri një harmoni ndërmjet institucionet e Republikës dhe atë të Mbretërisë dhe se kjo bashkëjetesë mund të sjellë rezultate të frytshme për Shqipërinë.
 
NMT Mbreti Leka u bëri mysafirëve të Tij një paraqitje të shkurtër të arritjeve pozitive të qeverisë aktuale gjatë 5 viteve të fundit duke vënë theksin në zhvillimin ekonomik, rritjen e mirëqënjes për popullin, zhvillimin e infrastrukturës rrugore dhe luftën kundër korrupsionin e kriminalitetin por theksoi se rruga është akoma e gjatë në të gjitha drejtimet për arsye të trashëgimit të rëndë të qeverive të mëparshme si dhe të diktaturës komuniste.  Mbreti Leka shtoi se pavarësisht sfidave që po kalon Shqipëria, vendi ynë ka të gjitha potencialet për zhvillim të mëtejshëm dhe më të shpejtë kur ekziston vullneti politik.
 
Në fund të takimit, LSM Princesha Lea e Belgjikës ftoi Mbretin Leka I për një vizitë në familjen mbretërore belge ndërsa çiftin e ri princor shqiptar, LT Princin Leka me të fejuaren Znj. Elia Zaharia, për një ballo mbretëror që do të mbahet në Belgjikë në fillim të vitit 2011.

Gjatë qëndrimit të Saj në Shqipëri, LSM Princesha Lea e Belgjikës pati rastin të dalë për një shetitje në qendër të Tiranës, e shoqëruar nga e fejuara e Princit Leka, Znj Elia Zaharia, ku shfrytëzoi rastin për të zbuluar vlerat artistike dhe kulturore të artizanatit shqiptar dhe të blejë disa dhurata dhe kujtime nga Shqipëria për anëtarët e familjes mbretërore belge.
 
Zyra e shtypit e Oborrit Mbretëror

 
*****

Zja Gabriels, Gunnar Riebs, Ministri Jaak Gabriels, Sulejman Gjana, LSM Princesha Lea e Belgjikës, Julinda Batusha.

Elia Zaharia, LSM Princesha Lea, NMT Mbreti Leka.

LSM Lea e Belgjikës, Elia Zaharia.