Partia “Lëvizja e Legalitetit”
Bulevardi “Zog I”, Tiranë.
www.legaliteti.org
Tel&Fax: +355 4 2230076

20/12/2011

Sot paradite, n/kryetari i PLL z. Sulejman Gjana dha nje konference per shtyp.
Me poshte po ju percjellim te plote tekstin e deklarates.

Zyra e shtypit e PLL

Deklaratë për shtyp

Në kuadër të diskutimeve dhe propozimeve për reformën zgjedhore, Partia Lëvizja e Legalitetit i ka paraqitur dje Komisionit të Posaçëm Parlamentar propozimet e mëposhtme:

• Verifikimi i listave të zgjedhësve të bëhet në përputhje me realitetin: Regjistri Kombëtar të freskohet në mënyrë sistematike të paktën 2 herë në vit, për të evidentuar të gjithë shtetasit që jetojnë jashtë vendit (d.m.th. që nuk banojnë në territorin shqiptar prej jo më pak se 6 muaj) dhe të krijohet një listë zgjedhësish e veçantë për shtetasit që jetojnë jashtë vendit.

• Krijimi i mundësisë së votimit në vendin ku jetojnë për shtetasit që jetojnë jashtë vendit: si hap i parë në këtë drejtim të bëhet një test në 3 shtete te huaj.

• Krijimi i një zone të veçantë elektorale për shtetasit që jetojnë jashtë vendit: ekskluziviteti i kandidimit dhe përfaqësimit për këtë zonë elektorale të rezervohet vetëm për shtetasit që jetojnë jashtë vendit.

• Krijimi i mundësisë së pjesëmarrjes në votim për të gjithë shtetasit që jetojnë jashtë vendit dhe pasardhësit e tyre: në respekt të parimeve kushtetuese, të korrigjohet ligji për shtetësinë.

• Ndryshimi i sistemit në sistem të pastër proporcional kombëtar pa prag ose ndryshimi i sistemit aktual të mbyllur në qark për 100 vende në Kuvend me korrektim kombëtar pa prag për 40 vende në kuvend.

• Krijimi i kushteve për votim elektronik ose së paku numërim elektronik të fletëve të votimit.

• Komisionet të jenë jo partiake ose te qarkullohen komisionerët: anëtarët e komisioneve në qendrat e votimit dhe në qendrat e numërimit të mos jenë banues të qarkut ku emërohen si komisionerë.

• Të garantohet që të gjitha subjektet e regjistruara në votim të kenë barazi në financa dhe në kohe televizive në proporcion me numrin e zonave të kandidimit.

• Të krijohet mundësia për regjistrim pa kushte për subjektet që konkurrojnë në jo më pak se 80% te territorit.

• Të përjashtohet mundësia e trafikimit të mandateve: duke marrë parasysh se gjendemi në një sistem proporcional ku të zgjedhurit dalin nga listat e partive, çdo deputet që largohet nga grupi i vet parlamentar, humbet mandatin.

• Të garantohet ndarja e pushteteve dhe të përjashtohen konfliktet e interesit: deputetët të mos mund të jenë edhe ministra dhe anasjelltas.
 
P.L.L. shpreson që Komisioni i Posaçëm për Reformën Zgjedhore do të marrë në konsideratë vetëm interesin e qytetarëve dhe se do të hartojë amendamentet e nevojshme për kuadrin ligjor zgjedhor, kështu që zgjedhjet e radhës në Shqipëri të zhvillohen pa debate sterile dhe që rezultati i tyre të përfaqësojë vullnetin real të zgjedhësve.