Autori i Lajmit: Anxhela Tato
Pretendenti për fronin mbretëror në Shqipëri, Leka Zogu I, ndodhet ende në spital, por konfirmohet se gjendja e tij shëndetësore është stabilizuar. Oborri mbretëror, në një njoftim shtypi, thekson se, pavarësisht përmirësimit të gjendjes shëndetësore, Leka nuk ka dalë ende nga gjendja kritike. Familja mbretërore thekson se gjatë kësaj kohe të shtrimit të tij në spital Leka Zogu I ka komunikuar vazhdimisht me djalin e tij, princin Leka. “Gjendja e Mbretit Leka I është disi më e stabilizuar. Ka një frymëmarrje të asistuar, është i vetëdijshëm dhe ka komunikuar me princin Leka II. Megjithatë, gjendja shëndetësore e tij vazhdon të mbetet kritike”,- deklaroi zëdhënësi për shtyp i oborrit mbretëror. Oborri, gjithashtu vë në dukje punën e mirë dhe profesionale që po bëjnë mjekët në drejtim të pretendentit për fronin mbretëror. Prej datës 17 nëntor, Leka Zogu ndodhet i shtruar në reanimacionin e spitalit nr.5 në Qendrën Spitalore Universitare në Tiranë (QSUT). Mësohet se 73-vjeçari vuan prej kohësh nga vështirësi në rrugët e frymëmarrjes dhe nga anoreksia e theksuar. Pas shtrimit në spital, doktor Mentor Petrela bëri të ditur sëmundjen e Leka Zogu I. “Mbreti Leka I po mjekohet për vuajtje multisistemike ku mbizotëron vuajtja e zemrës dhe e mushkërive dhe gjendja e tij është relativisht e rëndë, por nën kontroll dhe po merr terapinë e nevojshme”,- u shpreh ditë më parë shefi i këtij spitali, profesor Petrela. Sipas zëdhënësit të oborrit mbretëror, thuhet se Leka I është në gjendje më të mirë shëndetësore dhe ai ka pasur komunikim me vizitorët e mjekët, ndërsa mohojnë faktin e një gjendjeje kome. Fibrilacioni trial është kur rrahjet e zemrës bëhen të çrregullta dhe kemi një lodhje, që nuk është e shpjegueshme me arsye të tjera të njohura. Fibrilacioni atrial shprehet me një ndryshim të ritmit të zemrës. Përpara se ta konsiderojmë si sëmundje, duhet ta interpretojmë si një simptomë ose shenjë.