Princi Leka merr në zotërim pasuritë e familjes

» Dërguar më: 27/01/2012 - 16:07

Kush e zbuloi planin e sapastrimit etnik të Çamërisë ?

HYQMET ZANE

26/01/2012 Në rrjedhën e punëve mediatike dhe me interesimin për çështjen kombëtare, rastësisht lexova një ditë në një faqe interneti (www.indeksonline.net) se është Bullgaria që zbuloi planin për pastrimin etnik të Kosovës. Ishin pak fjalë, por që brenda atyre rreshtave kuptova se në këtë Ballkan të trazuar, ku fqinji ia di të gjithë të fshehtat fqinjit, nuk ka se si të kërkohen të vërtetat te kushërinjtë e largët. Për një kontinent të vjetër si Evropa, nuk ka dhe nuk mund të ketë pasur ndonjëherë armiqësi fqinjësore mes shtetesh e popujsh, se sa ajo e shfaqur hapur edhe zyrtarisht e Greqisë dhe e Serbisë ndaj Shqipërisë e kombit shqiptar në të gjitha trojet etnike. Nga këtu buron edhe gjithçka tjetër, edhe spastrimet etnike, edhe masakrat greko-serbe ndaj shqiptarëve në shekuj, burojnë edhe politikat nacionaliste dhe raciste të rretheve ultranacionaliste ndaj faktorit shqiptar. Ajo çfarë thuhej në ato pak rreshta në web ishte se “Qeveria e Bullgarisë ia dorëzoi Gjermanisë dhe NATO-s informatat e inteligjencës së saj për operacionin “Patkoji” të diktatorit serb Millosheviç që e kishte për qëllim spastrimin etnik të shqiptarëve në Kosovë. Kjo është zbuluar nga ish-ministrja e jashtme e Bullgarisë Nadezhda Neynski në dokumentarin...”.

Bashkë me mirënjohjen ndaj një ministreje të jashtme të një shteti bullgar, gjej rastin të them se në çdo shtet të këtij ballkani, po edhe në çdo shtet të Evropës kanë ekzistuar informacionet e shërbimeve të inteligjencës se çfarë gatuhej në Athinë dhe në Beograd ndaj Shqipërisë, bile edhe çfarë intrigonte Rusia dhe KGB-ja e saj. Në këtë Evropë kanë ekzistuar dhe shprehur hapur në mediume publike politike edhe thëniet antishqiptare që e detyroi Gjergj Fishtën ta cilësonte “...Moj Evropë, oj kurva e motit...”. Përse kështu? Sepse në mbi një shekull shqiptarët dhe personalitetet përfaqësuese të saj janë bërë dëshmitarët e pabesive që i bëheshin kombit shqiptar në emër të Evropës me duart e Greqisë e Serbisë.

Ku fshihej kjo dëshirë e mbrapshtë që është shndërruar tashmë në të vërtetat e thëna jo vetëm nga shqiptarët, por edhe personalitete të vendeve të Ballkanit dhe atyre Evropiane. Janë dashur lumenj gjaku në shumë e shumë vjet që këto të vërteta të dalin sheshit dhe të bëhen tronditëse kur i merr vesh një ditë të bukur kur gjithçka ka marrë vendin e vet. “E vërteta vonon, por nuk harron”, thotë një fjalë e urtë dhe kjo sintetizohet tek qëndrimi i një ministreje bullgare që më duket se është në linjën e të vërtetave që kanë thënë e bërë amerikanët për shqiptarët më shumë se sa evropianët. Këtë e mbështes me faktin se janë përfaqësues të shtetit amerikan që i kanë dhënë dorën këtij kombi, duke shpalosur sheshit të vërtetat mbi marrëveshjet e fshehta dhe jo të fshehta që më 1919-ën të Rusisë që ka nxitur Athinën dhe Beogradin të bëjnë spastrime etnike të paparë dhe me efekte naziskine.

Ja se si shprehet CIA në adresën web, www.infosot.com “Një raport sekret i CIA-s, që daton nga 8 prilli 1951, nxjerr në pah planin e Greqisë për ndarjen e Shqipërisë mes saj dhe ish-Jugosllavisë. Ky plan raportohet nga ambasadori i SHBA-së në atë kohë në Beograd, sipas të cilit një anëtar i Byrosë Politike jugosllave i kishte thënë si një propozim...”. Besoj nuk ka nevojë për komentet e mia se flasin faktet që janë një qind për qind të vërteta se i kemi ndjerë e përjetuar në kohën kur thureshin intrigat.

Duhet thënë se ajo që u krye në Kosovë më 1999, ishte epilogu i një realiteti që ishte paracaktuar edhe për Çamërinë në prologun e gjenocideve që ranë mbi kombin shqiptar në këto 100 vjet të shtetit shqiptar. Besoj se nuk ka shtet të dytë në këtë Evropë që të jetë intriguar kaq shumë dhe që i janë bërë kaq shumë pabesi e mbi të cilin kanë rënduar gjenocidet me spastrime etnike dhe shfarosje në masë. Para një tabloje të tillë gjithnjë shtroj pyetjen se “ku ishe ti Evropë, ti i dije këto, por përse heshtje, përse bëje protagonistin e asaj që do të ndodhte mbi një komb të lashtë, më i lashti në këtë kontinent?”.

Diplomatikisht duhet heshtur për të mos u bërë gazi i botës, por njerëzisht duhet thënë e vërteta se nuk ka se si të shërohet plaga nëse nuk thuhet se cila është diagnoza. Qëndrimet me dy standarde të Evropës që nga njëra anë i përmend Turqisë të ashtuquajturin gjenocid ndaj ermenëve dhe, nga ana tjetër, kur vjen rasti tek masakrat e tmerrshme në krahinën e Çamërisë, heshtet dhe vazhdon të heshtet, kjo nuk është as njerëzore dhe as diplomatike. Kjo është të heshtësh me dashje për një gjenocid që nuk kishte përmasat e nazizmit, por që në metoda dhe në mjetet e përdorura ishte gjenocid i pastër. Është ky fakti që në një dekorim të Presidentit Alfred Moisiu për Nuri Zane dhe Hajri Fetahu të shkruhej qartazi “Në shenjë vlerësimi të lartë dhe respekti të përhershëm për kontributin e dhënë në luftë kundër pushtuesve nazifashistë, në Krahinën e Çamërisë dhe për rezistencën e vuajtjet, si i internuar në kampin e përqendrimit të Dakaos” për të dhënë “Medaljen e Artë të Shqiponjës” dy përfaqësuesve të komunitetit çam që u kapën dhe u internuan nga Çamëria para përfundimit të Luftës II Botërore ashtu si edhe shumë e shumë të tjerë si Osman Zenel Taka që jetoi në Lushnje dhe të tjerë si në Durrës e Tiranë.

Pohimet e diplomacisë bullgare dhe asaj amerikane në rastet konkrete në lidhje me spastrimet etnike në Kosovë, nuk mund të jenë të shkëputura nga ato spastrime etnike që u bënë në Çamëri në 1944-1945 mbi një popullsi të pafajshme e të paarmatosur. Sjelljet antishqiptare të herëpas-hershme të Greqisë dhe Serbisë detyrimisht që kanë marrë edhe miratimin në heshtje edhe të diplomacisë evropiane, derisa për to heshtet dhe sot në veriun e Kosovës ende veprohet si me përkëdheli ndaj këtyre shteteve që vetëm i kanë treguar dhëmbët një kombi autokton dhe që asnjëherë nuk ka kryer asnjë akt armiqësor ndaj tyre. Heshtja edhe përkëdhelia, mosveprimi dhe mosdënimi i veprimeve gjenocidiste duket se janë motivet që kanë frymëzuar Greqinë dhe Serbinë që duket sikur kanë marrë miratimin me dorashka për të bërë spastrimet në këtë vend, ndaj dhe me të drejtë do të pyesja unë dhe çdo shqiptar i këtij kombi se kush e zbuloi dhe kush e tha se do të zbatohej një plan për spastrim etnik të Çamërisë që të vihej dorë e të mos ndodhte? Plani dihej, por u hesht dhe ndodhi ajo që dihet dhe nuk ndëshkohet prej më shumë se 67 vjetësh.

Kreu i PD Berat: Topalli kandidate per Presidente

SULO GOZHINA

24/01/2012 Intervistë me kreun e PD-së Arenc Berati: Çfarë kemi ndryshuar. Jozefina Topalli, pse jo Presidente

Berati, jo më një bastion i së majtës në vend

BERAT – Viti 2012 është për degën e PD-s në Berat, viti i përsosjes të strukturave, shtimit të radhëve me elementë të rinj dhe intelektualë të mirëfilltë e profesionistë jo vetëm në politikë por dhe në punën e përditshme. Kështu është shprehur që në fillim të kësaj interviste kryetari i degës të PD-s të rrethit të Beratit Z. Arenc Berati. Për të arsyetuar rreth këtij problemi si dhe për rritjen që kjo degë ka pasur në këta dy vjet të fundit por dhe për probleme të tjera politike në Qarkun e Beratit dhe më gjerë, si problemi i zgjidhjes të Presidentit, koalicionit “Aleanca për Qytetarin”, etj, kreut të kësaj dege të rrethit Beratit e më gjerë i morëm këtë intervistë...

Ku konsistojnë fitoret e degës të PD-s të Beratit pas ardhjes tuaj në krye të saj në mars të vitit 2009?

Që në fillim po e them se pa dashur të hedh poshtë edhe punën kolosale që kanë bërë paraardhësit e mi në krye të kësaj dege, puna jonë ka ecur falë besimit që kemi arritur të fitojmë te simpatizantët anëtarët dhe të gjithë qytetarët e këtij rrethi dhe më gjerë në gjithë Qarkun e Beratit. Ana tjetër e fitores sonë konsiston në shtimin e radhëve me simpatizantë e anëtarë të kësaj dege si dhe përsosjen e strukturave në bazë rajoni, lagje, komune, fshati apo dhe si i themi ne në bazë të strukturave të ngritura sipas qendrave të votimit. Po kështu fitorja jonë ka konsistuar edhe në gjallërimin e jetës politike që kemi mundur të mbajmë falë një bashkëpunimi apo dhe punës në grup që bëjmë brenda strukturave të degëve dhe nëndegëve të partisë demokratike në bazë. Gjithë kjo punë kolosale i dha frytet e veta vetëm tre muaj pas ardhjes time në krye të kësaj dege nga marsi i 2009-s deri në qershor të po atij vit, kështu me punën tonë këmbëngulëse ne arritëm të marrim tre deputet në zgjedhjet e përgjithshme parlamentare nga një deputet që ishim përfaqësuar në zgjedhjet e mëparshme. Ndërsa më pas puna jonë vijoi krahas problemeve të tjera paralelisht eci dhe për përgatitjen e strukturave për t’u përballur me opozitën në zgjedhjet lokale të vitit që sapo lamë pas.

Po në këto zgjedhje cilat janë rezultatet e arritura dhe si mundët ti arrinit këto?

Fryma pozitive vazhdoi edhe për këto zgjedhje, madje një nga arsyet e cituara si kyçi i fitores është dhe mënyra e organizimit që përsosej çdo ditë e më shumë. Po kështu një tjetër sukses ishte se në mandatet e pushtetit vendor ne mundëm të përzgjedhim si “Aleanca për Qytetarin”, kandidatura nga më të mirat të papërlyera dhe të cilësuara si të suksesshme në mandatin e parë siç është kandidatura e Justi Zykës në komunën Cukalat. Ndërsa në komunat ku kishte fituar më parë opozita vendosëm kandidatura të spikatura, kështu ne fituam në komunën Velabisht falë këtij bashkëpunimi në koalicion me kandidaturën e LSI-së Kastriot Rrapaj, në komunën Perondi dhe komunën Kozare mundëm të fitonim me kandidaturat e vendosura nga PD dhe pikërisht në Perondi fitoi kanditatura e Rexhep Hadërit dhe në komunën Kozare Myslim Haxhia po e PD-s ashtu si fituam dhe në Bashkinë Çorovodë me kandidaturën e LSI-së Nesmi Spahiu, në komunën e Bogovës Fadil Kapllani, po kështu morëm komunën e Vëndreshës me Sulejmën Dervishin dhe atë të Çepanit me Besnik Osmeni. I rreshtoj këto suksese si të koalicionit “Aleanca për Qytetarin”, pasi ashtu si dhe fola pak më lartë ne punojmë së bashku në grup pa cenuar asgjë nga marrëveshjet në koalicionin në fjalë. Po kështu arritja të tjera më të mëdha në këtë Qark që së bashku në koalicion janë, arritja e balancimit të anëtarëve të këshillit të bashkisë më të madhe në Qark siç është këshilli i bashkisë Berat si dhe marrja e 4 këshilltarëve nga ky këshill për në këshillin e Qarkut ku ky rezultat ndikoi ndjeshëm edhe në marrjen më pas të kreut të këshillit të qarkut, këtu falë dhe kandidaturës të spikatur nga LSI të Petrit Sinës. Ose marrja e kreut të këshillit të bashkisë të Urës Vajgurore në një kohë që shumicën e kishte PS e koalicioni i saj. Së fundmi dua të them se edhe kandidatët tanë në komuna të tjera u ndanë vetëm me disa vota, kështu unë mund të përmend se në komunën Poshnje kandidatura jonë e Kujtim Pelivanit u nda nga kandidatura tjetër vetëm me dy vota, po kështu dhe në komunën tjetër si ajo e Mondi Hodos në Tërpani etj. Përfundimisht mund të them se me këto arritje, ka përfunduar njëherë e përgjithmonë mentaliteti që Berati është bastion i së majtës. Dikur flitej se në Berat mjafton të varësh xhaketën dhe i ke të fituara votat.

Pak ditë më parë festuat dhe vitin e 21-të të krijimit të degës së Partisë Demokratike të rrethit të Beratit, si e kujtoni këtë ditë?

Që në fillim po e them se tashmë kjo ftesë në Qarkun e Beratit është kthyer në festë popullore edhe pse të ftuarit e parë të kësaj feste janë themeluesit e saj. Kjo për arsye se në këtë festë vijnë gjithmonë drejtues të PDSH-së dhe këtu jepet më shumë mundësia për bashkëbisedim. Në këto vite përkujtimore kanë ardhur nga drejtuesit më të larët të Partisë Demokratike deri tek lideri saj Z. Sali Berisha e deri deputet, anëtarë të kryesisë etj. Këtë vit patëm mes tonë nën Kryetaren e PDSH-s Jozefina Topallin njëkohësisht Kryetaren e Parlamentit Shqiptar. Me ftesë personale znj. Topalli premtoi se do të merrte pjesë dhe do të përshëndeste strukturat, simpatizantët, anëtarët dhe qytetarë të Beratit. Në këtë takim znj. Topalli përshëndeti të gjitha strukturat e PDSH-së por dhe të koalicionit të “Aleanca për Qytetarin” që arritën të marrin këto rezultate në këto dy vjet, vërtet mundet të përmend se kjo ditë u kthye në ditë feste.

Çështja e zgjedhjes së Presidentit është në vëmendje të debateve të këtokohshme. Cilat janë mendimet tuaja duke qenë se ju jeni me profesion jurist?

Në këtë rast mundet të them se Kushtetuta është shprehur qartë për presidentin në nenin 87 të saj. Në këtë nen shprehet qartë mënyra e votimit pra presidenti zgjidhet së paku me 3 / 5 në votim, pra nuk është objekti i cilësuar nën këtë nen, por vetëm votimi. Dhe pavlefshmëria shprehet shprehimisht në Kushtetutën e Shqipërisë. Në rregulloren e Kuvendit është përcaktuar qartë se vlefshmëria e hapjes së seancës parlamentare të presidentit parashikohet se mund të quhen votime dhe kur s’ka kandidat atëherë nuk ka vend për diskutim.

Opozita kërkon një President konsensual, cili është mendimi juaj ?

Kushtetuta është ajo që tregon rrugën e zgjedhjes të Presidentit, ku në kushtetutë nuk është parashikuar fjala konsensual! Ka qenë kjo opozitë e cila ka kërkuar miratimin e ndryshimeve në kushtetutë duke menduar se në zgjedhjet parlamentare të vitit 2009 do të ishte fituese, pra është po kjo opozitë që ka parashikuar edhe zgjedhjen e Presidentit siç dhe e parashikon kjo kushtetutë me këto ndryshime që vetë opozita me mazhorancën e sotme parlamentare i bëri para zgjedhjeve të 2009-s. Opozita pretendon që interpretimin e zgjedhjeve të presidentit ta dërgojë në gjykatën kushtetuese, duke bërë në këtë rast dhe një analogji me çështjen e zgjedhjes të presidentit.

Po për atë Kosovës, cili është mendimi juaj ?

Përsa i përket këtyre dy pyetjeve të shkrira në një unë mundet tju përgjigjem duke i ndarë në dy citime. Së pari përsa i përket interpretimit të mënyrës së zgjedhjes të presidentit sipas kushtetutës hedh poshtë çka kërkon opozita, ndonëse presidenti pas zgjedhjes kthehet vetiu konsesual. Por ajo që dua të them në këtë rast është se secili individ apo subjekt privat ka të drejtë t’i drejtohet Gjykatës Kushtetuese, por para se të realizohet kjo kërkesë palët duhet të jenë para një konflikti të mundshëm ekzistues, konflikt i cili nuk ekziston, kështu ndaj gjykatës edhe kërkesa nuk qëndron pasi nuk është ky moment përcaktues, pasi nuk ka konflikt në nenin 87 të kushtetutës dhe kjo nuk mundet të qëndrojë pa u shprehur më parë institucioni.

Së dyti dua të shprehem se ligji në fjalë në Shqipëri e ndalon analogjinë dhe nuk merret për bazë dhe shqyrtimi pasi mbi të gjitha nuk kemi pse ti referohemi Gjykatës Kushtetuese të një gjykimi tjetër pasi nuk mundet të jemi përball të njëjtave shkaqeve ose nuk mundet të gjenden të njëjtat shkaqe në të dy objektet apo çështje të ndryshme. Por opozita kërkon si në rastin e miratimit të ligjeve me 3 / 5 dhe në këtë rast kërkohet të pengohet mazhoranca në përgatitjen e saj thelbësore për integrimin e Shqipërisë në Bashkimin Evropian. Çdo ditë e më tepër në sytë e shqiptarëve po pasqyrohet shumë qartë vullneti i kësaj mazhorance për të bashkëpunuar me opozitën në mënyrë që të përmbushen të 12 pikat e vendosura nga BE me qëllimin e vetëm që Shqipëria të realizojë këto standarde të vendosura dhe t’i hapet rruga drejt këtij bashkimi dhe nga ana tjetër shqiptarët po shikojnë se është kjo opozitë që po minon nga dita në ditë marrëveshjet me mazhorancën me qëllimin e vetëm që Shqipëria të mos përfitojë statusin gjë e cila është vërtet për t’u ardhur keq pasi në asnjë vend të BE-së nuk ndodh që opozita të minojë të ardhmen pozitive të popullit të vetë.

Së fundmi pas disa shfaqjes të disa krerëve të PD-s në qendër për një nga kandidaturat e mundshme për president mundet të jetë edhe kryetarja e Parlamentit Shqiptar, Jozefina Topalli cili është mendimi juaj ?

PDSH, ka figura të vlefshme për president dhe se ky president do të zgjidhet sipas kushtetutës, pa tjetër që një nga kandidaturat është për mua dhe duhet të jetë Kryetarja e Parlamentit, njëkohësisht dhe nënkryetare e Partisë Demokratike të Shqipërisë e cila përmbush të gjitha kriteret morale, politike dhe kushtetuese. Do të ishte një veçanti pasi për nga mënyra zonjat janë të prirura për të respektuar të drejtat ligjore dhe për të qenë një simbol unik kombëtar.

Kongresi i Lushnjës, zgjedhja e senatorëve, qeverisë

20/01/2012 Britania interes në ndjekjen e vendimeve prej mbledhjes së jashtëzakonshme

Sekretar i përkohshëm u zgjodh Ferid Vokopola

Ndërsa Irfan bej Ohri, Qazim Kokoshi, Kostaq Kota, Fasli Frashri dhe Adem Peqini si anëtar të komisionit për zgjedhjet në Kongresin e Lushnjës

Xhavit Leskoviku ka mbajtur referimin e parë në emër të grupit nismëtar, ku u theksua dhe arsyet e thirrjes së kongresit.

Aqif Pashë Elbasani - kryetar, Sotir Peci - nënkryetar Kostaq Kota dhe Ferid Vokopola zgjidhen sekretarë.

Mbledhja e parë e kongresit u ndërpre në nder të Abdyl bej Ypit, i vrarë gjatë rrugës për të marrë pjesë në Kongres.

Kongresi nisi më datën 29. Ndërsa Sotir Peci ka lexuar urdhrin e ditës

1. Bisedimi mbi përmasat qi duhen marrë kundër vendimit të trië fuqievet t’Ententës për coptimin e Shqipniës, simbas paktit të Londërs 1915

2. Bisedimi përmbi sjelljen e qeveriës në pikpamje politike të mbrendshme e të jashtme, si mbas programit të dhanën prej Mbledhjes Kombtare të Durrsit.

3. Regjimi qi do të ketë Përkohësisht shteti shqiptar kombëtar tek qeverija e përkohëshme.

4. Zgjidhjet e Auktoritetevet simbas vendimit qi të jepet.

Mbas shum bisedimesh mbi nyen e parë t’urdhnit të ditës i cili përmban mbasat që duhen marrë kundër vendimit të trië fuqive t’entantës për copëtimin e Shqipnies, simbas Paktit të Londrës 1915 u vendos të bahen protestime të rrepta e për me gatitë këto protestime u zgjodhën një komision prej 10 vetash. Mbasi u zgjdh komisioni, u leçit prej nënkryetarit.

Nyj i dytë i urdhnit të ditës, që përmban sjelljen e qeveriës në pikëpamje të përmbrendshme dhe të jashtme simbas programit të dhanë prej mbledhjes kombtare të Durrsit nga bisedimet e fjalët qi u mbajtën u provuan sheshazi se:

1 Qeveria ka veprue jashtë tagrit e programit që asht dhanë prej Kongresit të Durrsit

2 Qeverija ka pu pengime në mbështjelljen e Senatit të vendosun prej Kongresit të Durrsit.

3 Me administratë të keqe të sajë ka shkaktue anarqië në të gjithë anët e Shqipniës

4 Tue u mbështetun në politika të veçanta shtini në një acuasion të keq gjendjen politike të Shqipniës

5 e tue përdor gjithfarqë intrigasg u mundue me ç’do mënyrë qi të ndalë mbledhjen kombtare, qi kishte për qëllim shpëtimin e Atdheut nga rreziqet e kërcënueme.

Nga kjo e tjera vepra kombëtare u vendos rrëzimi i qeverië me 45 vota kundër 6 që lypshin të thirret ma parë qeverija për spjegim. Mbas rrëzimit të qeveriës me zane të përbashkta u zgjodh delegacioni pranë konferencës së Paqit prej z Imzot Bumçit, Mehmet Konitza, dr. Turtulli, e kryesija e delegacionit u la të zgjedhet midis tyne. Mbas kësajë zgjedhje u vendos me u lajmërue për një herë delegasioni telegrafisht e të zgjedhunit e kabinetit për të nesëret.

Mbledhja e datës 30

Kuvendi u hap më 9 para darke, mbasi u kontrollua e u sigurua shumica e delegatëve. Në këtë mbledhje veç diskutimit mbi shkresën që do t’i dërgohej konferencës së Paqes u vendos dhe që veç senatit (Kabineti i Këshillës Kombëtare) të miratohej dhe një këshill i lartë i përbërë prej 4 anëtarësh.

Për kabinetin u propozuan emrat e Sulejman bey Delvina, Iliaz bej Vrijoni, Ahmet bej Zogolli, sotir Peci, Ndoc Çoba, Mehmet bej Konica.

Por për shkak se Iliaz Bei Vrioni për shkaqe personale nuk pranoi të jetë pjesë e kabinetit në vend të tij u pranua Hoxha Kadri.

Pas kësaj zgjedhje delegatët bënë betimin

“Mbledhja Kombëtare jep fjalën e nderit dhe besën shqiptare duke u betue n’emën të perëndisë se deri sa Këshilla e nalt vepron mbas lidhet të shtetit tuj ruejtun indipendencën e plotë të shqinis, me mis e me shpirtë do të jetë mprojtës e përkraës i gjithëhershëm i kësaj këshille”

Betimi i këshillës

Betohem n’emën të perëndis, tue dhanë besën shqiptare e fjalën e nderit përpara mbledhjes së kombit se do t’i shërbej popullit dhe shtetit shqiptar drejtësisht dhe mproj ligjët dhe indipendencën e plotë të atdheut tshenjtë.

Séance e datës 31

Eshref bej Frashëri. Duke theksuar lajmet që vinin nga Kavaja shton se Durrësi ka mbetur pa qeveri. Iliaz bej Vrioni tërheq vëmendjen për faktin se shumë prej ministrave të zgjedhur nuk janë në mbledhje. Për të mos u ndodhur para një krize të përfaqësimit të ministrave u propozuan që zëvendës ministri Hysen bej Vrioni. Drejtues i përgjithshëm për punë botore Eshref Frashëri e për postë-telegrafët Idhomene Kosturi. Pas kësaj zgjedhje u vendos

Kryeministër Sulejman Delvina

Zëvendës Eshref Frashëri

Ministër i P. P. të Mbrendshme Ahmet Zogolli

Ministër i Jashtëm Mehmet Konitza

Ministër Arsimi Sotir Peci

Ministër i Drejtësisë Hoxha Kadri

Zëvendës Hysen bej Vrioni

Ministër Finance Ndoc Çoba

Zëvendës Idhomen Kosturi

Kongresi Vendosi që Korça, Vlora, Berati, Elbasani, Durrësi, Drini dhe Shkodra të kenë nga katër senatorë, ndërsa Mati, Hasi, Krasniqi dhe Leshi të kenë 2-1 senatorë. Po ashtu nga Xhaferr Ypi, delegate i Durrësit u propozua dhe Lushnja si vend organizator të ketë një senator. Por Sheh Ibrahim Karbunara theksoi se organizimin Lushnja nuk e ka bërë për të përfituar, por si detyrë për të shpëtuar vendin. Me këtë rast kongresi miratoi një letër falënderimi për Lushnjën.

Berati

Hysen Vrioni, Llambi Goxhamani, Bektash Cakrani dhe Pilo Papa.

Gjirokastra

Beqir Rusi, Kiço Koço, Dhimitri Kacombro, Neki Ruli

Korçë

Qani Dëshnica, Kostaq Kota, Sejfi Balamasi, Thimi Gikozi

Elbasan

Shefqet Verlaci, Arkimandrit Xhuvani, Adem Peqini, Qazim Durmishi

Drini

Dine Dema, Dine Meqellari, Ramiz Daçi, Osman Mustafa Lita,

Durrësi

Muteseim Tirana, Umer Shjaku, Veli Kraja

Vlona

Qazim Koculi, Spiro Koleka, Saddullah Tepelena

Mat, Has e Krasniqe

Abdurrahman Krahasi, Helim Çela dhe Bajram Curri

Duke qenë se delegatët e Shkodrës dhe Leshit nuk mundën të ishin në mbledhje, u vendos që delegatët të zgjidhen në prefekturat përkatëse.

Pas kësaj salla u mbush nga duartrokitjet e bujshme dhe thirrjet “ Rroftë Shqipnija Indipendente!”, “Rrnoftë këshilla e naltë!”, “Rrënoftë Qeverija!”

Marrë nga dokumente të historisë kombëtare

Përfaqësimi diplomatik

Në mbledhje kanë marrë pjesë dhe anëtarë të vendeve të huaja, siç ishte dhe përfaqësuesi i Britanisë së Madhe. I akredituar për të ndjekur punimet ishte Morton. F. Eden.

Berisha: Të rikthehen eshtrat e Zogut, të ngrihet përmendore

13/01/2012 Del logoja e 100-vjetorit

Komiteti Ndërministror i ngritur nga qeveria për 100-vjetorin e Pavarësisë miratoi logon e përvjetorit. Fitues u shpall kuratori dhe dizenjuesi nga Kosova Zeni Ballazhi, i cili sjell një stilizim të shqiponjës dykrenore në formën e një flake jubilare, që i përngjan një trofeu.

Në mbledhjen e Komitetit u bënë disa ndërhyrje lidhur me tekstin që shoqëron logon në pjesën e poshtme. Teksti mbeti ende i papërcaktuar. Kryeministri tha se do të vendoset nëse do të jetë thjeshtë “Pavarësi” ose “100 vjet Pavarësi e Shqipërisë”. Ndër të tjera Kryeministri tha se në këtë 100-vjetor veç aktiviteteve të tjera do të bëhet dhe rivlerësimi i disa figurave të historisë. Kryeministri kërkoi që në këtë 100-vjetor të ngrihet në Tiranë përmendorja në nderim të figurës së Ahmet Zogut dhe të bëhet e mundur sjellja e eshtrave të tij në atdhe. Veç shtatores së tij Kryeministri propozoi dhe ringritjen e varrezës mbretërore atje ku ka qenë, e cila u shkatërrua pas luftës nga komunistët me dinamit. Gjithashtu, sipas Kryeministrit, në Tiranë do të ngrihen dhe përmendorja e Ismail Qemalit dhe Hasan Prishtinës dhe Monumenti i Pavarësisë. Gjithashtu në mbledhjen e djeshme u lajmëruan dhe një sërë aktivitetesh të tjera, që kanë si për shembull një konkurs mbarëkombëtar mes shkollave, nga ku do të dalë dhe çmimi i pavarësisë. Një porosi të veçantë Kryeministri la dhe për Ministrinë e Kulturës dhe të Sporteve, ku kërkoi organizimin e Kupës së Pavarësisë “Ky eveniment duhet të përfshijë të gjitha skuadrat nga Mitrovica në Gjirokastër dhe Maqedoni. Pra, të gjitha trevat ku ka ekipe të kategorizuara shqiptare”, - u shpreh Kryeministri. Berisha kërkoi nga Komiteti Ndërministror që kremtimet për 100-vjetorin e Pavarësisë të synojmë që të prekin zemrat e qytetarëve. “Ky 100-vjetor t’u shërbejë shqiptarëve për të vlerësuar dhe më shumë vendin e tyre. Ky 100-vjetor t’u shërbejë shqiptarëve për të vërtetat më të rëndësishme të veprave të vendit të tyre”, - vlerësoi Berisha gjatë kësaj mbledhje. Në vlerësimin e kreut të qeverisë trajtimi mbarëkombëtar është detyrim për të nderuar ata që kontribuan dhe për këtë arsye duhet të ruhet sensi mbarëkombëtar duke përfshirë dhe diasporën. “Duhet të jemi aktiv në të gjitha fushat. Në këtë 100-vjetor Ministria e Brendshme të kontaktojë me vendorët që të angazhohen për të organizuar festime në të gjithë vendin”, - u shpreh Berisha. Në këto festime Berisha theksoi si të rëndësishëm faktin që “tashmë festohet me Kosovën e pavarur”.

Deklarata

“Ky 100-vjetor t’u shërbejë shqiptarëve për t’u njohur me të vërtetën më të rëndësishme të vendit dhe të kombit të tyre. Ky 100-vjetor t’u shërbejë shqiptarëve jo si një parullë për të shkuarën, por si një shpresë e besim për të ardhmen. Duhet të ruajmë sensin e realizmit, vlerësimin e figurave të historisë sonë kombëtare, por dhe rëndësinë e ngjarjeve, të cilat nuk mund të mos kenë edhe dritën e aktualitetit”, - u shpreh Berisha

Kupa e Pavarësisë

Gjithashtu në mbledhjen e djeshme Kryeministri Sali Berisha la një porosi të veçantë për Ministrinë e Kulturës dhe të Sporteve, ku kërkoi organizimin e Kupës së Pavarësisë “Ky eveniment duhet të përfshijë të gjitha skuadrat nga Mitrovica në Gjirokastër dhe Maqedoni. Pra, të gjitha trevat ku ka ekipe të kategorizuara shqiptare”, - u shpreh Kryeministri. Një ide e tillë vjen në një kohë kur është kërkuar dhe bashkimi i kampionatit shqiptar me atë kosovar.