INTERVISTA E MBRETIT LEKA I,

REALIZUAR ME TELEVIZIONIN NESËR TV.

-Realizuar nga gazetari Çlirim Peka, 23 qershor 2004-

Gazetari: Përshëndetje, emisionin e sotëm e kam spostuar në rezidencën e Mbretit Leka I. NALTMADHËRIA JUAJ, Mirë se ju gjej dhe ju falenderoj për kohën që po i kushtoni televizionin Nesër Tv.

Mbreti: Mirëse erdhet, gëzohem shumë t’ju kem këtu në rezidencën tonë.

Gazetari: Dukeni në formë shumë të mirë.

Mbreti: Jam shumë mirë, kam ende shqetësimin e thyerjes së këmbës, por është një gjë që po kalon.

Gazetari: NALTMADHËRIA JUAJ, kur keni marrë inisiativën për Lëvizjen për Zhvillim Kombëtar, a keni patur parasysh brishtësinë e institucioneve shqiptare ose, më saktë, interesimi i opinionit ka të bëjë me ato që janë themelet e shtetit, të cilat janë institucionet.

Mbreti; I kam marrë parasysh, prandaj kam heshtur për një kohë të gjatë. E thashë, që kur erdha në Shqipëri, se nuk do të merrem me çështje të politikës së partive e të grupeve parlamentare të kuvendit, por do të merrem me çështje që janë të rëndësishme për kombin.

Por tani e kemi përfunduar analizën e plotë për situatën, për këta dy vjet që jemi  këtu, në Atdhe. E kam parë që është i nevojshëm një ndryshim i fuqishëm për ndërgjegjësimin e qeverisë dhe të popullit shqiptar.

Shumë nga çështjet kryesore që kërkon një popull, që është i njohur për kryelartësinë e besnikërinë e tij, po na humbasin nga varfëria, nga hallet e shumta që kanë shqiptarët.

Atëhere, p.sh., unë nuk shoh, se qeveria e sotme po punon që të ndihmojë popullin apo bizneset e tregtitë e vogla, qoftshin ato fshatare apo dhe qytetare. Ata ngarkohen më rëndë me tatime, duke ua bërë jetën edhe më të rëndë edhe më të vështirë. Unë po shoh se edhe tregtarët, diçka më të mëdhenj, që me djersën e tyre drejtojnë biznese dhe punësojnë shumë njerëz, nuk po kalojnë në investime të reja, sepse e kanë këtë presion nga tatimet. Pse?

Vetkuptohet që duhet një zgjidhje. Është e nevojshme që qeveria të jetë e aftë e të drejtohet nga njerëz të pastër, që nuk janë të korruptuar dhe që duhet të kuptojnë detyrimin që kanë ndaj kombit të tyre.

Këtu mund të them se vlerësoj qëndrimin e kryetarit të shtetit, Gjen. Alfred Moisiut. E kam parë si ka reaguar për çështjen e Bishtit të Pallës ose duke mbledhur Këshillin e Sigurisë Kombëtare për t’ju dhënë disa udhëzime.

Kjo është e nevojshme, pasi pa ligj, pa rregulla nuk mund të ecë përpara Shqipëria. As populli nuk ndihet i sigurt, as tregëtia nuk ndihet e sigurt.

Duhet të kuptojmë se edhe çështja e pronave është e pazgjidhur. Falë Zotit, kryetari i shtetit ia ktheu parlamentit për rishqyrtim, pasi ligji që kishin pregatitur ishte vetëm në favor të dy partive të mëdha, jo në favor të popullit. Ky është një turp.

Unë personalisht e uroj edhe për inisiativën për ligjin e zgjedhjeve, pasi edhe ai që po pregatitet sot, është në favor të dy partive të mëdha, dy partive që, mos harrojmë, kanë dalë nga i njëjti gji.

Gazetari: Jemi tek institucionet, vlerësuat rolin e kryetarit të shtetit, vlerësuat kthimin për rishqyrtim në parlament të ligjit për pronat, gjithashtu ju shprehët shqetësimin tuaj për zgjedhjet e ardhshme. Për garantimin që mund t’i bëhet votës së popullit, sa besim keni, Madhëri, se kreu i shtetit ka mundësi për të siguruar një proces zgjedhor të ndershëm e të lirë?

Mbreti: Në rast se përdor fuqinë që ka në këtë statut (kushtetutë), që është gjysmak dhe, po të kërkojë përkrahjen e disa shteteve të tjera, mund të ndikojë shumë, por, vetkuptohet, duhet që të kujdeset, pasi është detyra e tij dhe është detyrë kombëtare.

Ai vetë vjen nga një familje e nderuar ushatrake. Ushtaraku nuk hyn në ushtri për t’u pasuruar. Ai hyn për t’i shërbyer kombit të vet. E di mirë këtë pasi jam ushtar i Kombit edhe unë.

Gazetari: Madhëri, Presidenti Moisiu, kur mori përsipër të jetë ushtar i kombit e t’i shërbejë kombit nëpërmjet institucionit të presdidentit, kaloi një provë të madhe siç ishin zgjedhjet e tetorit, pra një provë, ku Presidenti Moisiu mund të tregonte që mund të ishte një ushtar i mirë i kombit. Flasim për zgjedhjet, megjithatë zgjedhjet locale të tetorit janë kundërshtuar nga të gjitha palët, përjashto partinë socialiste, ndërsa partitë e tjera, madje edhe në koalicion me partinë socialiste, e kanë kontestuar dhe kanë akuzuar institucionet, si institucioni i presidencës dhe OSBE. Duke pasur parasysh përvojën e tetorit ku Z. Moisiu, President i Republikës, ushtar i kombit kishte mundësinë t’i shërbente kombit, a mendoni se Presidenti Moisiu është garant në këtë proçes?

Mbreti: Nuk mund t’u them, pasi do ta tregojë veten në këtë situatë, por ligji me të cilin janë bërë ato zgjedhje ishte një ligj favorizues për dy partitë kryesore.

E dyta, popullit shqiptar i ka ardhur në majë të hundës. E dinë shumë mirë edhe dëgjuesit, e dinë shumë mirë, sepse një pjesë e madhe e popullit nuk shkon as në votime, pasi e dinë se votat e tyre nuk mund të bëjnë ndonjë ndryshim, pasi janë manipuluar. Atëher, Ligji i Zgjedhjeve duhet të jetë për të garantuar se nuk mund të ketë manipulime.

Unë besoj se duhet të kishte një përfaqësim të fuqishëm në KQZ, jo vetëm nga dy palët që janë, por edhe nga partitë të tjera. Unë besoj, se kur të numërohen votat, ato të bëhen në publik, para kamerave, medias. Kështu që nuk kanë aq mundësi për të bërë ndryshime dhe manipulime. Vetkuptohet, do të ketë ndonjë gjë të vogël, por kjo ndodh në çdo vend të botës. Por që të arrijnë të bëjnë një manipulim aq të madh, siç ka ndodhur, do të jetë shumë e vështirë, nëse populli del e voton për cilëndo parti që dëshiron.

Gazetari; Naltmadhëria Juaj, një tjetër institucion i rëndësishëm madje kryesor është ekzekutivi ose qeveria, e cila ka në përbërje forcat e armatosura, të rendit e shumë instrumenta të tjerë shtetërorë. Cili është komenti juaj për ekzekutivin e sotëm, pra për këtë institucion jetik dhe si e mendon Naltmadhëria Juaj në konceptin e tij?

Mbreti: Le të marrim një herë forcat policore. Këtu ka lloj - lloj policie. Janë aq të ndryshme, me detyra të ndryshme, sa ka shumë mundësi për të bërë gabime edhe pa dashur. Bashkë me administratën nga varen këto lloje të shumta policie e komplikojnë situatën sepse është edhe korrupsioni. Atëhere, vetkuptohet, që nuk ecën puna.

Unë do të këshilloja se Shqipëria ka nevojë për një xhandarmari që të mbulojë të gjithë Shqipërinë, të mbulojë të gjithë llojet policore, duke përjashtuar ato bashki, që kanë mundësi për të mbajtur një polici bashkiake të tyren, në teritorin e bashkisë.

Bashkia ka policinë e vet, por kur ka nevojë për një ndërhyrje më të madhe se sa ajo e policisë bashkiake, atëhere, vetëkuptohet që ndërhyn xhandarmëria.

Kjo është për policinë, ndërsa për ushtrinë jam shumë i shqetësuar, pasi të dyja, si policët, ashtu edhe ushtarakët nuk kanë një jetesë të mjaftueshme, nuk kanë mundësi për të ushqyer familjet e tyre. Në mënyrë njerëzore, po të flasim kështu, ata vetë nuk kanë siguri. Të gjitha këto ndikojnë tek ushtaraku dhe tek polici.

Por për ushtrinë ka probleme të rënda. Këtu, në Shqipëri, po ndryshojnë doktrinat, po ndryshojnë doktrinat e lindjes dhe po shkohet tek doktrinat e perëndimit. Është një problem i madh, se oficerët e vjetër, që janë mësuar me doktrinën e lindjes e kanë problem për të mësuar doktrinën perëndimore.

E dyta, nuk është e lehtë për të bërë ndryshime cilësore ushtarake edhe në stadin aktual, siç po bëhet tani.

Çdo shtet, kudo qoftë, ka doktrinën e tij ushtarake. Edhe po të jenë të njëjta doktrinat si ajo e Nato-s, të cilën ne tentojmë ta sjellim në Shqipëri. Kjo doktrinë e Nato-s, nuk është e njejtë në çdo shtet, pasi çdo shtet ka mënyrën e tij të stërvitjes, mënyrën e vet të pregatitjes, mënyrën e vet të parashikimit, pasi terreni të bëjë shumë në fushën ushtarake, ashtu si edhe tek ne.

Nuk mund të presim veprime të njëjta luftarake nga të gjitha ushtritë. Kështu, p.sh. do të veprojë ndryshe një ushtri që lufton ose do të ketë rastin të luftojë në malësi, siç kemi ne, dhe këtë nuk dëshiroj që të ndodhë, apo në një xhungël, si ato të Vietnamit apo të Afrikës. Prandaj ndryshojnë doktrinat.

Çdo shtet duhet të ketë doktrinën e vet. Këtu po na ndodh që një palë formacionesh apo shërbimesh kanë këshilltarë amerikanë, të tjerë kanë gjermanë apo grekë, etj. Këto janë doktrina të ndryshme, të shteteve që nuk i përshtaten Shqipërisë. Në madhësi ndoshta, por në terren është një pikëpyetje.

Kjo duhet studiuar me hollësi. Nuk është e mjaftueshme të mbyllet vetëm me një studim. Pasi studimi është një gjë e përgjithshme. Kur vjen tek optika kryesore, atëhere duhet parë terreni, ku parashikohet që kjo ushtri do të veprojë.

Ushtria jonë sot nuk është në një gjendje të mrekullueshme. Kjo vjen se ka pasoja të mendimit dhe organizimit ushtarak, si dhe të ndryshimit të doktrinave lindje – perëndim.

Nga niveli aktual i jetesës që ka ushtaraku, nuk ka si të ketë një moral të lartë për të qenë i gatshëm për t’i bërë ballë të gjitha atyre problemeve jetike që ka siguria kombëtare.

Gazetari: Një tjetër hallkë e shtetit është institucioni i drejtësisë, koncepti juaj?

Mbreti: Shikoni, gjoja jemi në një shtet demokratik. Thashë gjoja, pasi unë nuk njoh ndonjë shtet demokratik në botë, që nuk ka një drejtësi të pavarur. Drejtësia duhet të jetë e pavarur por edhe e drejtë. Kështu, që ligjet të zbatohen vetëm në mënyrë të drejtë.

Kur populli e sheh që këto po bëhen, vetë populli do të fillojë të ketë besim tek ligjet, tek drejtësia. Sot për sot, korrupsioni ka hyrë edhe atje. Atëhere po u them se drejtësia duhet të jetë e pavarur. Kjo mund të rregullojë shumë nga problemet që kemi si hakmarrja e gjakmarrja. Vrasjet po bëhen gjithnjë e më kriminale: tashmë kanë filluar edhe vrasjet familjare.

Këto kanë qenë jashtë konceptit të shqiptarit, pra është edhe një arsye më tepër për Lëvizjen për Zhvillim Kombëtar, për t’i kthyer besimin popullit shqiptar.

Por që të ketë besim populli, duhet të ketë besim të flasë haptazi me avokatin e vet, me gjyqtarin e vet për njeriun që ka në burg për ta mbrojtur.

Të drejtat e qytetarëve në statutin (Kushtetutën) e vitit 1928 janë të plota në këtë drejtim. Mund t’i shikoni apo t’i lexoni.

Gazetari:NALTMADHËRIA JUAJ, në traditën e shteteve demokratike njihet edhe një pushtet tjetër, pushteti i katërt, apo fuqia mediatike, sipas konceptit të Mbretit si duhet të jetë ky pushtet në Shqipëri?

Mbreti: Pushetti mediatik ka nevojë të ndërgjegjësohet. Unë po ua them haptazi: po përsëri para një përfaqësuesi të medias, ka nevojë të ndërgjegjësohet.

Shpesh ndodh në Shqipëri që ato media, të cilat quhen të pavarura, nuk janë të pavarura, pasi janë të ndërvarura në një anë apo në një tjetër.

Media duhet të tregojë të vërtetën, të mos e lejojë veten për të shpifur apo për të share. Atëhere humbet besimi i popullit tek media.

Media duhet të jetë një prej elementeve kryesorë të një shteti, por duhet të jetë edhe e pastër, e pakorruptuar, e ndërgjegëjsuar. A jam i qartë?

Gazetari:Urojmë. NALTMADHËRIA JUAJ, që televizioni i ynë dhe Lëvizja juaj për Zhvillim Kombëtar, e cila ka filluar në përvjetorin e Kongresit të Lushnjes, pak a shumë me të njëjtën jetëgjatësi si NTV. Uroj që jetëgjatësia edhe e televizionit edhe e Lëvizjes për Zhvillim Kombëtar të jenë sa më jetëgjatë. Unë po flas për televizionin, pasi jam i sigurtë që do ta ketë jetë të gjatë, pyetja ime ka të bëjë me jetëgjatësinë e e Lëvizjes për Zhvillim Kombëtar. Sa i sigurtë është Mbreti që kjo lëvizje do të ketë sukses?

Mbreti: Mbreti nuk ka zakon të lëvizë, por kur fillon, e ka vendosur që rrugën që do ta kryejë deri në fund.

Unë e di: shumë rreziqe kam përpara. E kuptoj shumë mirë shqetësimin që mund të ketë populli, por kjo lëvizje është e hapur për të gjithë njerëzit që janë të ndërgjegjshëm edhe janë kombëtarë.

Kjo lëvizje nuk do të lejojë që të merret me befasi nga një palë apo një tjetër, apo nga elementë të dyshimtë. Kjo lëvizje do të mbetet një lëvizje kombëtare dhe do të punojë për popullin. Këtë mund t’ua siguroj.

Gazetari: NALTMADHËRIA JUAJ, Shqipëria gjatë viteve 20 – 30 ka krijuar në traditë, që është respektimi i një personaliteti si ai i Mbretit Zog. Në periudhën e komunizmit, me dëshirë apo me forcë, ka pasur një respekt ndaj diktatorit Hoxha. Pra, një herë me dëshirë, një herë me dhunë, në Shqipëri është krijuar tradita e respektit të një individi. Në rastin konkret, pra Mbreti Leka I, respektin e ka të siguruar, ka një trashëgimi historike të jashtëzakonshme. Problemi qëndron dhe dyshimi i opinionit qëndron tek individët, që do të përbëjnë këtë Lëvizje, pra që do të mbushin këtë lëvizje? Kam parasysh që në vitet 90, lëvizja për rrëzimin e komunizmit, pra që drejtohej nga opozita e sotme, ishte një lëvizje, jo forcë politike, por kjo lëvizje u copëtua në 10 pjesë. Ju duhet të jeni në dijeni se institucioni famkeq i sigurimit të shtetit e bëri punën e tij, pra arriti të futej tek lëvizja e 90-ës, arriti ta copëtojë e ta devijojë atë nga qëllimi i krijimit të saj. Naltmadhëri, sa i sigurtë jeni se edhe lëvizja juaj nuk do të infektohet nga ai “institut” që për rreth 50 vjet është munduar të mbjellë një urrejtje të jashtëzakonshme edhe ndaj Mbretit Zog?

Mbreti: Shikoni, kur vdiq baba, Mbreti Zog në vitin 1961, unë u betova para asamblesë që ishte krijuar në mërgim dhe shqiptarëve, që kishin ardhur në varrimin e babës, duke pasur parasysh pa asnjë dyshim se do të kem shumë pengesa për t’ia arritur qëllimit.

Që nga viti ‘61 deri më sot, jo vetëm sigurimi shqiptar, tani SHISH, por të gjitha zbulimet e botës kanë provuar të kenë ndikim ndaj meje. Kam arritur të mbroj veten nga të gjithë. Kjo ka qenë edhe nga mësimi i gjatë i babes, Mbretit Zog, por ka qenë edhe përvoja ime.

Në rastet kur e gjykoja se ishte e vlefshme, ku kishte mundësi e ishte në interes kombëtar, unë provoja për t’i përdorur. Ata, vetëkuptohet, provonin për të më përdorur, por shpesh hasnin në një problem… Unë mund të përdorem… por vetëm po të jetë në interes kombëtar.

Më ka ndodhur nëj herë me një mik shumë të ngushte që më tha: “Madhëri, çdo njeri në botë ka çmimin e tij. Edhe ju duhet të keni çmimin tuaj.” Unë i thashë se po edhe unë kam një çmim, por ju nuk jeni në gjendje për të ma plotësuar. Më tha: “A mund ta di cili është çmimi?”. Unë i thashë se është kombi shqiptar, si një shtet komb, me të gjithë të drejtat, brenda e jashtë kufinjve. Ky është çmimi im. Thjesht.

Gazetari: NALTMADHËRIA JUAJ. Lëvizja për Zhvillim Kombëtar ka marrë formë. Nuk është një forcë politike. Është një grupim , një koalicion. Deri në momentet që ne po flasim, në rast se nuk është ndonjë sekret, sa është numëri i forcave politike që kanë hyrë në këtë koalicion?

Mbreti:Tashti për tashti unë po e lë këtë përgjigje për vetë ata që do të dalin e të flasin në emër të Lëvizjes, se situata ndryshon çdo ditë. Unë sot do t’u them se sa janë. Ka disa forca politike që po marrin pjesë pa kushte, por janë disa që kërkojnë kushte dhe ato do të shqyrtohen në se janë të pranueshme, për sa i takon kombit shqiptar dhe jo mbretërisë.

Qëllimi i kësaj Lëvizjeje është të bëjmë këtë ndryshim, që kërkon populli në vitin 2005, pastaj a do të bëhet Shqipëria Mbretëri, a do të  vazhdojë Republikë, kjo do të jetë në dorë të popullit shqiptar. Detyra ime është ndaj popullit e unë kam një barrë shumë të rëndë në këtë lëvizje. I di shumë mirë rreziqet para meje.

Gazetari:Detyra e një gazetari është të bëjë pyetje për opinionin që po na ndjek. Ka një pyetje, pasi ambjentet ku gazetarët rrinë kanë një opinion, të djathtët, pjesa e opozitës sot ndihet pak e frikësuar, s’kemi pse ta fshehim. Unë kam pasur të ftuar të shumët në studio, eksponentë të së djathtës, që ma kanë evituar shumë këtë pyetje për Lëvizjen për Zhvillim Kombëtar, madje ka edhe aludime se është guri i fundit që kryeministri Nano mund të luajë për të penguar opozitën.

Mbreti: Mua më çudit që mund të ekzistiojë një mendim i tillë, pasi merrni parasysh që Statusi i Familjes Mbretërore, është miratuar me Ligj nga Kuvendi, është miratuar nga Kryetari i Shtetit. Si mund të jetë Mbreti në mbështetje ndaj një partie apo të një tjetre? A do të dëmtohet koalicioni i djathtë? Mundet. Por besoj se ka njerëz kombëtarë edhe në anën e majtë. Kështu që mund të dëmtohen edhe ata. Por unë nuk po shkoj në luftë me partitë. Unë shikoj të ardhmen e Shqipërisë interesin e kombit tonë. Kushdo qoftë, që ka mundësi për të dhënë kontributin e tij dhe është i pastër, është i pranuar në këtë lëvizje. Mua nuk më intereson të prish interesat e Z. Berisha apo të Z. Nano. Unë kam qëllim që kjo lëvizje të marrë pushtetin e të bëjë ndryshimet e nevojshme në politikën shqiptare, për popullin e kombin.

Gazetari:NALTMADHËRIA JUAJ, përsa i përket ligjit për Familjen Mbretërore, është një ligj që është miratuar nga parlamenti, megjithatë nuk duket se po gjen zbatim. Një rast është konfiskimi i koleksioni të armëve të Familjes Mbretërore.

Mbreti: Ai ligj është miratuar nga parlamenti, nga kryetari i shtetit dhe nuk po vihet në zbatim pasi duan të më mbajnë peng. Unë nuk mbahem peng me pronat e mia apo me gjëra të tilla. 

Janë shumë ligje që miratohen sot por asnjë prej tyre nuk vihet në zbatim.

Gazetari: A keni kontaktuar, a keni kërkuar rikthimin e koleksionit të armëve?

Mbreti: Po jo vetëm që e kam kërkuar zyrtarisht por e di, nga miq të përbashkët, që gjen. Moisiu ka folur vetë zyrtarisht me Z. Namik Dokle, dy here, dhe i ka thënë të zbatojë Ligjin. Dhe ende s’është bërë gjë. Çdo me thënë kjo?

Gazetari:Duket se do të keni një betejë të ashpër përpara, një klasë politike që nuk e ka mirëpritur me shumë dëshirë lëvizjen për zhvillim kombëtar të promovuar nga Leka I.

Mbreti: Ajo vetkuptohet.

Gazetari: NALTMADHËRIA JUAJ krimi i organizuar, gjakmarrja, janë dy fenomene që kanë hyrë në realitetin shqiptar. Ju si mendoni se mund t’i luftoni këto dy fenomene?

Mbreti: Është një pyetje specifike që duhet ndarë në dy mënyra: Së pari të marrim çështjen e krimeve, trafikut të organeve, drogave, trafikut të femrave e çdo lloj kontrabande që po bëhet. Është e nevojshme që organet policore apo xhandarmëria të ndërgjegjësohen. Ata duhet të kenë rroga të mjaftueshme që të mos blihen për 5 lekë, por të ndërgjegjësohen e të veprojnë brenda ligjeve që janë. E dyta duhet që të jetë gjykata e pavarur. Po ua përsëris, duhet të jetë drejtësia e plotë. Kjo është kryesore. Për gjakmarrjen. Kjo është një pjesë që lidhet me kuptimin e të drejtës kanunore shqiptare prej kohësh. Atëhere, siç e ka bërë edhe Mbreti Zog, i ka thirrur familjet që ishin në gjak me njëri - tjetrin e u ka thënë: “Zotërinj sipas kanunit pajtim! Kur arrihet pajtimi hyn në zbatim ligji. I pari që e shkel do t’i përgjigjet gjykatës edhe po ta çojë deri tek litari. Le ta çojë.”

Gazetari: Çështja e fundit ka të bëjë me një problem kombëtar. Para pak kohësh ka zënë vend edhe në Tiranën zyrtare çështja çame. Kryeministri Nano ka bërë një vizitë në Athinë dhe është shprehur se e ka rrahur këtë problem edhe me kryeministrin grek. Nga ana tjetër Athina zyrtare e ka përgënjeshtruar, megjithatë opinioni ka një interesim të veçantë të dijë mendimin tuaj për zgjidhjen e këtij problemi.

Mbreti: Mendimi im është ky: Së pari është një problem i vështirë se duhet që qeveria shqiptare të veprojë. Për momentin nuk jam anëtar i qeverisë shqiptare por   jam Mbret i Shqiptarëve, atëhere vetkuptohet që kam një gjykim për problemin çam. Në fillim, ligji i luftës ndërmjet Shqipërisë e Greqisë duhet abroguar. Sipas tij del se se çdo qytetar Grek në Shqipëri është një pushtues. Kjo është e para. E dyta, duhet të hyjmë në marrëveshje me qeverinë greke në mënyrë diplomatike, politike me interesa të përbashkëta, kështu që siç kemi qenë në kohën e babës tim, në Kohën e Mbretërisë, Shqiptarët të kenë mundësi të kalojnë në Greqi pa viza e grekët të hyjnë në Shqipëri pa viza. Kjo është normale.

Përsa u përket çamve është një çështje e detyrueshem për t’u zgjidhur, pasi Greqia është pjesë e Bashkimit Europian. Ka ligje për minoritetet etnike. Ne në Greqi kemi 650.000 shqiptarë që punojnë atje si hamenj për t’u dërguar bukë familjeve të tyre, kemi arvanitasit, kemi edhe çamët ortodoksë e myslimanë. Pse të mos kenë ata të drejtë për t’i kërkuar pronat e tyre e dëmshpërblimet përkatëse. Është një kërkesë legjitime që duhet marrë parasysh jo vetëm nga ne, si ta vëmë në rrugën e zgjidhjes, por edhe nga qeveria greke. Në rast nevoje edhe nga Parlamenti Europian, pasi në tjetër mënyrë do të vazhdojë kërdia.

Gazetari:; NALTMADHËRIA JUAJ faleminderit.

Mbreti: Unë ju falenderoj që më dhatë mundësinë për të thënë disa fjalë të nevojshme. Shpresoj në të ardhmen, në biseda të ndryshme, që do të dalin me ju e me televizione të tjerë, do të keni edhe disa zotërinj intelektualë, që bëjnë pjesë në këtë Lëvizje e që mund të flasin më mirë për secilën fushë.

Gazetari:Edhe një herë ju falenderoj.