30102002

Oborri Mbreteror e ka vleresuar si absurde, zhurmen qe po behet keto dy ditet e fundit, mbi te ashtequajturen "nenshtetesi te Nenes Mbretereshe" dhe "leje qendrimi e anetareve te familjes mbreterore". Zedhenesi i Oborrit, Fluturak Germenji, sqaron se qe me 9 korrik 2002, i eshte kerkuar zyrtarisht Bashkise se Tiranes, certifikata e gjendjes familjare te Mbretit Ahmet Zog, certifikata e marteses se tij me Mbretereshen Geraldine dhe certifikata e lindjes se Mbretit Leka. "Me 15 korrik, Bashkia e Tiranes pergjigjet se nuk disponon dokumentat e mesiperm dhe ve ne dispozicion vetem certifikaten e gjendjes familjare te Mbretit Zog, te "lagjes se jabanxhijeve nr. 140", ku jane regjistruar anetaret e familjes ne vitin 1923. Ne kete certifikate eshte vendosur edhe lajmerimi zyrtar per vdekjen e Mbretit Zog nga Departamenti i Senes i Parisit", sqaron Germenji. Lidhur me "leje qendrimin", ai shprehet se me 12 korrik 2002, i eshte derguar Drejtorise se Pergjithshme te Policise nje kerkese per zgjatjen e lejeve te qendrimit per anetaret e familjes mbreterore shqiptare per nje periudhe 1 vjecare. Sipas tij, me 30 korrik, Drejtoria e Pergjithshme e Policise eshte pergjigjur se "bazuar ne piken 11, paragrafi 6 i vendimit te Keshillit te Ministrave nr. 439, dt. 04/08/2000, "Per hyrjen, qendrimin dhe trajtimin e te huajve ne Republiken e Shqiperise", qendrimi i zoterinjeve te renditur ne vijim: Geraldina Zogu, Leka Zogu I, Suzana Zogu, Leka Zogu II, konsiderohet i ligjshem, deri ne marrjen e pergjigjes respektive per kerkesen e bere. Qartesimi i statusit te shtetesise te te interesuarve (nga ana e juaj) sjell lehtesine e mundshme ne procedimin e metejshem". Germenji sqaron se per te mbledhur dokumentat, qe cuditerisht nuk i dispononte me Bashkia e Tiranes, i'u kerkua Arkivit te Shtetit, zyrtarisht, gjetja e ketyre dokumentave dhe filloi puna per kete problem qe nga data 19 korrik 2002. "Deri tani jane gjetur kerkesa zyrtare e Mbretit Zog drejtuar Kryeministrit, per t'i paraqitur Parlamentit, sipas Statutit Themeltar, per miratimin nga Parlamenti Shqiptar te marteses se tij me konteshen Geraldina Appony. Kjo kerkese mban daten 30 janar 1938. Parlamenti i pergjigjet zyrtarisht, duke dhene miratimin zyrtar, pas votimit. Ky dokument mban daten 31 janar 1938. Dokumenti tjeter eshte Akti i Marteses me 27 prill 1938, i firmosur nga Kryetari i Parlamentit, nga Kryetari i Gjykates se Diktimit, deshmitaret dhe nga Mbreti Zog e Mbreteresha Geraldine", informon Germenji. Sipas tij, mbi bazen e ketyre dokumentave, as qe mund te shtrohet me ceshtja per nenshtetesine e Mbretereshes Geraldina. Germenji informon se nder dokumentat e tjera qe jane gjetur deri tani, jane telegramet e derguara per lindjen e trashegimtarit me 5 prill 1939, ku natyrshem del edhe nenshtetesia e Mbretit Leka I. Germenji informon se ne familjen mbreterore, disponohet edhe certifikata e marteses se Mbretit Leka me Mbretereshen Suzane ne vitin 1975 ne Bashkine e Biarritzit. "Per lindjen e princ Leka Zogut II, eshte certifikata e lindjes ne Johanesburg ne ekstraterritorialitet. Nga keto dokumenta, sipas ligjeve nderkombetare, nenshtetesia e tyre rrjedh prej trungut familjar. Te gjitha keto dokumenta do t'i paraqiten Bashkise se Tiranes, per regjistrimin e anetareve te familjes mbreterore ne zyren e gjendjes civile", thekson Germenji.

Armando META

______________________________________________________

Pretendenti për fron nuk ka bërë asnjë "hap" për t'u pajisur me pasaportë dhe nënshtetësi shqiptare

Skadon leja e qëndrimit për Leka Zogun

Mbetet pezull statusi ligjor i familjes së Zogut. Pengohen dekorimet dhe nderimet për Geraldinën

Ened Janina
TIRANË- Familja e Leka Zogut nuk kryen procedurat për të marrë pasaportë dhe nënshtetësi shqiptare. Drejtuesit e policisë së kryeqytetit i kanë kërkuar pretendentit për fron dhe familjes së tij të fillojë këto procedura, por asnjëri prej pjesëtarëve të saj nuk ka kryer asnjë veprim, për t'u pajisur me pasaportë shqiptare. Madje mësohet se familjes së Leka Zogut i ka skaduar edhe leja e qëndrimit në territorin e Republikës së Shqipërisë. Për këtë gjë është njoftuar edhe këshilltari i pretendentit për fron, Fluturak Gërmenji, cili nuk ka kryer asnjë veprim dhe as ka kontaktuar me zyrtarët e policisë. Kjo gjë ka penguar edhe Presidencën, në dhënien e dekoratave dhe nderimeve për Geraldinën, e cila vdiq pak ditë më parë në spitalin Ushtarak.
Rikthimi
Pretendenti për fronin mbretëror, Leka Zogu dhe familja e tij kanë hyrë në territorin e Republikës së Shqipërisë më datë 28 qershor të këtij viti. Ata kanë ardhur nga aeroporti "Nënë Tereza" i Rinasit duke shkaktuar bujë të madhe për 11 arka me armë dhe municione të ndryshme luftarake që kishin me vete. Pas bllokimit të armëve, Drejtoria Qëndrore e Policisë Kufitare, i pajisi pjesëtarët e familjes së Leka Zogut me leje-qëndrimi provizore. Sipas burimeve pranë policisë kufitare, ata u pajisën me leje qëndrimi provizore pasi nuk kishin paraqitur asnjë dokument identifikimi. Kjo leje qëndrimi kishte afat njëmujor. Ndërkohë, së bashku me këtë familje në territorin e Republikës së Shqipërisë hynë edhe pesë persona me shtetësi të huaj, të cilët u justifikuan duke thënë se ishin shoqëruesit e familjes mbretërore. Davie Flmo Hamilton, Amanda Julie Sehur, Eddie Samson Magagula dhe Klou Bongani Catter ishin të pajisur me pasaportë me shtetësi afrikano-jugore. Ndërkohë së bashku me ta ishte edhe shtetasi pakistanez, Mushtaq Hussai Muhammad. Të gjithë këta persona janë pajisur me vizë të rregullt nga Ministria e Punëve të Jashtme. Burime të këtij institucioni pohuan se procedurat e pajisjes së tyre me leje-qëndrimi janë bërë konform ligjeve në fuqi. Ndërkohë problem ende i pazgjidhur mbetet përcaktimi i statusit ligjor të familjes së Leka Zogut. Megjithëse institucionet përkatëse kanë bërë të gjitha veprimet që rekomandon ligji aktual për shtetasit e huaj ose pa shtetësi, përsëri problemi nuk ka gjetur zgjidhje përfundimtare. Mungesa e statusit ligjor të familjes së Leka Zogut ka penguar edhe presidencën për të ndërmarrë veprime të mëtejshme për nderimin e kësaj familjeje. Sipas ligjit në fuqi, ajo nuk mund të dekorojë me titullin "Nderi i Kombit", askënd që nuk është qytetar shqiptar, duke përfshirë këtu edhe familjen e Zogut, së cilës i mungon leja e rregullt e qëndrimit në Shqipëri. Sot pritet që në presidencë të diskutohet në lidhje me këtë problem. Presidenti i Republikës ka bërë gati gjithçka për dekorimin e Geraldinës, por "avaritë" ligjore kanë lënë gjithçka pezull.
Leje-qëndrimi
Fillimisht familja e pretendentit për fron, Leka Zogu, është përpjekur që të pajiset me një leje qëndrimi të rregullt por më pas e ka "harruar" fare këtë gjë. Sipas burimeve nga policia e kryeqytetit, në datën 15 korrik përfaqësuesi i familjes mbretërore, Fluturak Gërmenji, i ka adresuar një letër Drejtorit të Përgjithshëm të Policisë së Shtetit të asaj kohe, Bilbil Mema. Në këtë letër kërkohej zgjatja e leje-qëndrimit për katër anëtarët e familjes së Leka Zogut dhe për dy nga shoqëruesit e saj. Nga ana e saj, policia pasi mori në shqyrtim këtë kërkesë, e aprovoi, dhe filloi procedurat për miratim. Që nga ajo ditë e deri dje, askush nuk është kujtuar më për zgjatjen e afateve të leje-qëndrimit ose pajisjen e familjes së Leka Zogut me pasaportë. Burimet pohuan se përfaqësuesit e kësaj familjeje ose ndonjë nga anëtarët e saj nuk është paraqitur më në polici. Në datën 29 korrik përfunduan afatet e lejueshme për qëndrimin e familjes së Leka Zogut në Shqipëri dhe për këtë gjë u lajmërua zyrtarisht këshilltari i familjes së Zogut, Fluturak Gërmenji. Atij iu kërkua nga ana e Drejtorisë së Policisë së Qarkut Tiranë që të paraqitej për të kryer veprimet e mëtejshme për zgjatjen e lejes. Por deri dje, asnjë përfaqësues i kësaj familjeje nuk është paraqitur në drejtorinë e Policisë së Tiranës, për t'u pajisur me leje-qëndrimi dhe pasaportë shqiptare.
Armët
Pretendenti për fron, Leka Zogu, mbërriti me bujë në Shqipëri. Por zhurma më e madhe u bë për shkak të 11 arkave me armë dhe municione të ndryshme luftarake, të cilat ai solli me vete. Zogu i deklaroi këto armë me të shkelur në tokën shqiptare. Menjëherë u njoftua prokuroria e rrethit Tiranë, e cila urdhëroi sekuestrimin e këtyre armëve. Armët ndodhen ende të bllokuara në mjediset e Drejtorisë së Policisë së kryeqytetit. Ndërsa kjo çështje i shtohet problemeve të pazgjidhura në tokën shqiptare të Leka Zogut dhe familjes së tij. Në bazë të legjislacionit shqiptar nuk lejohet që individë, shtetas shqiptarë ose të huaj, të disponojnë, qoftë edhe me leje, sasira dhe lloje armësh që gjenden në koleksionin e shtetasit Leka Zogu. Sipas burimeve zyrtare, Zogu kishte me vete edhe armë luftarake si kallashnikovë dhe kundratank. Aktualisht organi i akuzës së kryeqytetit e ka pushuar ndjekjen penale në ngarkim të tij. Ajo ia ka deleguar çështjen Gjykatës së Rrethit Tiranë. Tashmë është kompetencë e këtij institucioni zgjidhja e çështjes së armëve. Ndërkohë, specialistët e Policisë së Shtetit po punojnë për të përcaktuar procedurat ligjore në kushtet e një vendimi të gjykatës për disponimin e armëve nga Leka Zogu.