Tiranë

Edi Rama, pasi është bindur se votat e shumicës së kryeqytetasve janë hedhur në favorin e tij, ka dhënë konferencën e parë të shtypit si kryebashkiak i rikonfirmuar i Tiranës.

Pasi ka kaluar tërë ditën në selinë e Partisë Socialiste i veshur sportiv dhe gjithë sy e veshë për rezultatet dhe problemet nga KZQV-të, pasdite në një lok ndryshe me kostum e kollare, për herë të parë pas ditëve të gjata të fushatës, ka falenderuar votuesit e tij të fitores. Rama i ka bërë thirrje rivalit të tij demokrat Spartak Ngjela dhe liderit të PD-së, Sali Berisha, që “të pranojnë humbjen si burrat”. Me tone humori, por pa e fshehur lodhjen e këtyre ditëve, Rama ka shtuar se “rivali im humbi mandatin e deputetit, por fitoi një biçikletë, gjë që unë nuk e kam”.

Premtimet
Duke deklaruar fitoren e tij, të cilën nuk e ka cilësuar një fitore surprizë, Rama premtoi se do të çojë përpara projektet e nisura 3 vjet më parë, për realizimin e ëndrrës për një Tiranë evropiane. Ai u ndal kryesisht te zgjidhja e problemit të ujit të pijshëm, por edhe për projekte të tjera. Megjithëse akoma nuk ka marrë publikisht urimin e Kryeministrit dhe kreut të PS-së, Fatos Nano, Rama pranoi se ka komunikuar me të vazhdimisht. Ai vlerësoi votën e zgjedhësve, duke u angazhuar se do të punojë edhe me më shumë ritëm për ndryshimet e nisura në kryeqytetin e vendit. Rama siguroi të gjithë qytetarët e Tiranës, pavarësisht se për kë votuan, “do të gjejnë te kryetari i Bashkisë, mbrojtësin e interesave të tyre legjitime”. Kryebashkiaku vlerësoi votën e marrë si nga veteranët ashtu edhe nga të përndjekurit politikë, të rinjve kryeqytetas, që i cilësoi si gjenerata e mbështetjes natyrale për ndryshimet në Tiranë, si dhe socialistëve, që e mbështetën gjatë fushatës së tij elektorale. Rama rikonfirmoi se dy prioritetet kryesore të punës së tij, do të jenë zgjidhja e problemit për furnizimin me ujë të kryeqytetit dhe zhvillimi i infrastrukturës parauniversitare. Ai siguroi se nga këshilli i ri bashkiak, që do të krijohet, do të vendosë një komunikim edhe më intensiv dhe të drejtpërdrejtë me qytetarët e Tiranës për problemet e tyre.

Komisionerët
Procesi i votimit në kryeqytet është deklaruar i bllokuar për shkak të tërheqjes së disa komisionerëve demokratë dhe mosfirmosjes prej tyre të procesverbaleve të votimit. Kështu fitorja e Ramës vazhdon të mbetet peng i këtyre problemeve. Kreu i PS-së së Tiranës, Musa Ulqini, dekaroi dje se në njësinë numër 4, në Allias, komisionerët e PD-së kanë braktisur procesin në disa qendra votimi dhe se kryetari i KZQV-së ka dhënë dorëheqjen. Ulqini ndërkohë deklaroi fitoren e shumicës së minibashkive dhe një përqindje të madhe të këshilltarëve. Sipas tij, në 11 njësitë bashkiake të kryeqytetit, kandidatët e PS-së kanë fituar në 9 prej tyre. PS pranon humbjen e saj në 2 njësitë e tjera, në njësinë nr.8 dhe 11 të kryeqytetit. Ndërkohë, ai vuri në dukje se nga informacionet paraprake të tyre, rezultati fitues i kryetarit të Bashkisë, Rama, varion nga 56 në 62 për qind. KQZ-ja konfirmon se për Tiranën ka shumë probleme. Kryetari i KQZ-së, Ilirjan Celibashi, pohoi se në 5 njësi bashkiake, ka patur disa probleme me funksionimin e disa qendrave të votimit. Sipas Celibashit, disa nga anëtarët e komisionit të qendrave të votimit janë larguar, duke mos firmosur procesverbalet e rezultatit të zgjedhjeve. PD-ja dekalroi orët e vona të mbrëmjes se nuk do ta bllokojë procesin dhe se do të zëvendësojë kryetarin e KZQV-së.

Kontestime

• Në minibashkinë numër 3, komisionerët e opozitës kanë vërejtur parregullsi në lista, prandaj dhe nuk kanë pranuar të firmosin procesverbalet
• Në minibashkinë numër 7, fletët e votimit për kandidatin kryesor të Bashkisë janë hedhur në kutinë ku duhej të hidheshin fletët e kandidatëve për minibashki, komisionerët e opozitës kanë bllokuar numërimin e votave
• Në minibashkinë numër 9, sërish komisionerët e opozitës kanë konstatuar parregullsi në lista dhe mungesa të gjata të emrave të elektoratit për të votuar kanë vendosur që të mos i firmosin procesverbalet
• Në minibashkinë numër 4 kryetari i KZQV-së, Sokol Mulosmani ka dhënë dorëheqjen. Mulosmani ka sqaruar se ka pasur mungesa në lista

“Do të çoj të vërtetën deri në fund”
Kandidati Ngjela: Unë jam fitues në Tiranë

Kandidati i PD për Bashkinë e Tiranës, Spartak Ngjela, deklaroi dje se Tirana do të njohë vetëm një fitore, atë të Partisë Demokratike. “Duke filluar nga deklaratat e lëshuara nga Partia Socialiste, sipas së cilës kandidati i tyre ka fituar në Tiranë, unë kam filluar betejën legale, ose fushatën legale me anë të së cilës do të dokumentoj parregullsitë. Askush nuk ka dyshim se jam unë fitimtar”, tha Ngjela. Ai kërkoi nga kundërshtarët e tij që të lënë përpjekjet për manipulime. “Nuk më falet në qoftë se nuk e çoj të vërtetën deri në fund, atë të vërtetimit se Tirana tashmë ka një fitues, kandidatin e PD-së. Unë nuk pranoj humbjen, pasi kam sakrifikuar gjithçka për qytetarët e kryeqytetit, sikurse do të mbroj vullnetin e tyre”, tha kandidati i selisë blu. Pasi theksoi se opozita tashmë tregoi se është shumicë, pas zgjedhjeve të 12 tetorit, nuk do të lejojë që kjo shumicë të mos pranohet në Tiranë, qytet i cili përherë ka treguar se është për të mbrojtur dhe zhvilluar vlerat demokratike. “Ne do t´u japim shqiptarëve votën e lirë, të cilën po mundohen disa të na e rrënmbejnë. Beteja ka filluar dhe ripërsëris se atë e kam fituar unë”, shtoi ai. Kandidati demokrat tha se fitorja e tij është tashmë e faktuar si në procesverbalet e zgjedhjeve, ndonëse bandat socialiste u munduan t’i manipulojnë, sikurse edhe në faktimin e mijëra personave të lënë jashtë listave zgjedhore.

BASHKIA TIRANE
EDI RAMA (PS) 58 %

BASHKIA KAMEZ
Agim Cani (PD)

BASHKIA VORE
Fiqri Ismaili (PD)

MINIBASHKIA 1
Anita Zaimi (PS)

MINIBASHKIA 2
P. Bodinaku (PS)

MINIBASHKIA 3
Ilir Kokona (PS)

MINIBASHKIA 4
Vaid Kalaja (PS)

MINIBASHKIA 5
Jeta Seitaj (PS)

MINIBASHKIA 6
Irfan Dashi (PS)

MINIBASHKIA 7
Pandeli Sara (PS)

MINIBASHKIA 8
Arben Tafaj (PD)

MINIBASHKIA 9
Luan Zhegu (PS)

MINIBASHKIA 10
Mira Veizi (PS)

MINIBASHKIA 11
Haki Mustafa (PD)

Tiranë

Kreu i Shtetit ka bërë vlerësimet dhe vërejtjet e tij një ditë pas përfundimit të procesit zgjedhor në të gjithë vendin. Kështu, Presidenti Alfred Moisiu, ka konstatuar se policia ka vepruar sipas ligjit dhe nuk është bërë protagoniste e ndonjë incidenti gjatë zgjedhjeve.

Vlerësimin e tij, Moisiu ia ka përcjellë ministrit të Rendit Publik, Luan Rama, drejtorit të Përgjithshëm të Policisë, Bajram Ibraj dhe nëndrejtorit të SHISH-it, Ylli Alushi. Por, Presidenti duket se nuk ka dalë shumë i kënaqur nga problemet e hasura në këtë proces dhe debatet që kanë nisur mes dy forcave politike kryesore në vend. Shqetësimin e tij ia ka përcjellë dy liderëve kyesorë, atij të PS-së, Fatos Nano dhe të PD-së, Sali Berisha, të cilëve u ka kërkuar të ndjekin rrugët ligjore për zgjidhjen e kontradiktave.

Reagimi i Moisiut
Sipas një njoftimi për shtyp nga Presidenca, bëhet e ditur se, gjatë ditës së djeshme, Presidenti i Republikës, Alfred Moisiu, ka kryer disa biseda telefonike me ministrin e Rendit Publik, Luan Rama, drejtorin e Përgjithshëm të Policisë, Bajram Ibraj dhe nëndrejtorin e SHISH-it, Ylli Alushi. Gjatë bisedës me këta funskionarë, ai “i përgëzoi forcat e policisë dhe të shërbimit informativ për qëndrimin korrekt dhe në përputhje me ligjin, duke garantuar kështu një proces zgjedhor të qetë”. Çështja e pjesëmarrjes së policisë në procesin zgjedhor, u bë një shkak debati politik dhe konflikti të hapur mes institucioneve kryesore në vend. Opozita e kundërshtoi aktin normativ të qeverisë për këtë gjë, i cili u votua në parlament me votën e socialistëve. Presidenti Moisiu tentoi ta kthente mbrapsht, por hasi në rezufimin e kreut të Kuvendit, Servet Pëllumbi.

Procesi zgjedhor
Presidenti ka kërkuar zgjidhjen e problemeve të zgjedhjeve në rrugë ligjore. Sipas zyrës së shtypit pranë tij, Moisiu zhvilloi dje biseda telefonike me kryetarin e Partisë Socialiste, Fatos Nano dhe me kryetarin e Partisë Demokratike, Sali Berisha, të cilët i përshëndeti për fushatën e qytetëruar, zhvillimin normal të procesit zgjedhor dhe arritjet e forcave politike, që ata drejtojnë, duke treguar përpara opinionit të brendshëm dhe atij ndërkombëtar se, shqiptarët dinë të bëjnë zgjedhje. Sipas këtij njoftimi, gjatë bisedës u përmend edhe ndonjë problem i evidentuar në procesin zgjedhor, ndjekja e të cilit duhet bërë vetëm brenda kuadrit ligjor.

Reagimi i monitoruesve
Vëzhguesit vendës: Listat, problemi kryesor

Problemet që u hasën gjatë së dielës me listat e zgjedhësve, janë konstatuar dhe nga qindra vëzhgues vendës, sipas të cilëve ishte një nga pengesat kryesore për zhvillimin e një procesi tërësisht të qetë. Çoroditja e listave, ku zgjedhësit nuk gjenin dot emrin e tyre, ishte një çështje problematike që kanë raportuar këta vëzhgues një ditë pas zgjedhjeve. Sipas Komitetit të Helsinkit, asnjë votues nuk ishte njoftuar nga KQZV-të për ndryshimin e qendrës së votimit. Po ashtu, një tjetër problem ka qenë mbushja e kutive të votimit, gjë që kishte penguar procesin, duke lënë njerëzit pa votuar. Përfaqësues të Komitetit Shqiptar të Helsinkit, theksuan se kjo organizatë ka monitoruar zgjedhjet në rrethet Tiranë, Durrës, Fier, Vlorë, Shkodër, Elbasan, Korçë, Gjirokastër dhe Kukës. Lidhur me ecurinë e procesit të votimit, vëzhguesit e KSHH-së vlerësojnë se, përgjithësisht situata ka qenë e qetë dhe pa incidente në zonat e vëzhguara. Në ngritjen e qendrave të votimit dhe vendndodhjes së tyre, në përgjithësi është respektuar ligji dhe tërheqja e bazës materiale është bërë në kohë. Sipas vëzhguesve, ka pasur tejmbushje të kutive votimit, por që kjo nuk ka sjellë pamundësinë e votimit të zgjedhësve. Sipas vëzhguesve, edhe procesi i numërimit të votave është zhvilluar normalisht, por janë konstatur vetëm disa vonesa për arsye të ndryshme. Përsa i përket rolit të policisë gjatë procesit të votimit, vëzhguesit nuk kanë raportuar ndonjë rast të ndërhyrjes së policisë në qendrat votimit. Zgjedhjet e qeverisjes vendore në Shqipëri u monitoruan nga 2050 vëzhgues, prej të cilëve 1858 ishin vëzhgues vendës dhe 200 vëzhgues të huaj. Gjatë ditës së sotme pritet që të japë një raport të hollësishëm mbi procesin zgjedhor dhe problemet e hasura gjatë tij, Misioni Vëzhgues i OSBE-së dhe ODIHR-it. Deklarimi i tyre do të jetë një ogur për ecurinë e procesit të integrimit të vendit tonë në strukturat euroatlantike.

Të vegjlit optimistë pas zgjedhjeve
Disa parti pretendojnë për vendin e tretë

• Partia Demokrate e re 3 komuna
• Partia Legalitetit 5 komuna
• Partia Demokristiane 5 komuna
• Partia Liberaldemokrate 1 bashki
• PBDNJ 3 bashki disa komuna

Pothuaj të gjitha partitë politike, përjashtuar dy forcat më të mëdha, PS-PD, janë deklaruar për një rritje të rezultatit, krahasuar me zgjedhjet e mëparshme vendore. “Në bazë të rezultateve paraprake, PDR-ja ka ruajtur vendin e saj si forcë e tretë në rang vendi, duke siguruar pjesëmarrjen me këshilltarë në të gjithë këshillat vendore. Po ashtu, ne kemi fituar në komunat Lopez, Tepelenë dhe Fierzë Pukë, ndërsa në një numër shumë të madh të komunave kemi dalë forcë e dytë politike”, tha kreu reformator Pollo. Edhe Partia Lëvizja e Legalitetit shprehet për një rezultat më të lartë. Nga informacioni që disponojmë deri tani, rezulton se PLL-ja ka arritur të fitojë në 5 komuna; Lis, Rukaj e Dërjan të rrethit Mat, në komunën Bushtricë të rrethit Kukës dhe në komunën Bujan të rrethit Tropojë. Po ashtu në në raport me zgjedhjet e tetorit të vitit 2000, PLL-ja ka katërfishuar numrin e këshilltarëve dhe, tashmë PLL-ja përfaqësohet në të gjitha bashkitë e komunat e vendit me këshilltarët e saj, ndërsa në shumë bashki dhe komuna del partia e dytë. Edhe Partia Demokristiane është deklaruar si forcë kryesore në jetën politike pas rezultatit në zgjedhjet lokale. “Kemi fituar në pësë komuna të vendit; Velipojë, Dajç, Fierzë, Kukur dhe Kelmend, ndërsa presim fitore edhe në komuna të tjera të vendit”, u shpreh kreu demokristian Nikollë Lesi. Edhe Partia Bashkimi Liberaldemokrat u shpreh me nota optimiste për rezultatin e saj në zgjedhje, pasi ka arritur të fitojë Bashkinë e Rubikut, sikurse ka fituar këshilltarë në më shumë se 20 bashki e komuna të vendit. Ndonëse rezultati përfundimar nuk është shpallur edhe PBDNJ-ja është deklaruar për një fitore, e cila e rendit atë ndër partitë kryesore pas PS-PD. “Kemi fituar dy bashki, Himarën dhe Poliçanit, sikurse edhe disa komuna, ndërkohë që presim edhe të tjera”, u shpreh kryetari i kësaj partie, Vangjel Dule. Po ashtu, për fitore në disa komuna të vendit janë shprehur edhe socialdemokratët.

HIMARE

Incidenti i një dite më parë në Himarë, duket se ka imponuar një qetësi të mefshtë. Askush nuk pipëtin, gjithçka duket e qetë, ndërkohë që acarimet për procesin zgjedhor, kanë vazhduar të vlojnë nga brenda.

Pikërisht në këtë zonë janë shënuar një sërë incidentesh të cilat nuk kanë kaluar pa u vënë re nga ana e të palëve. Fatmirësisht, është gjetur konsesusi dhe me KQZV-në e Bashkisë së Himarës, e cila ka arritur që të japë një zgjidhje të favorshme për të dyja palët. Simbas burimeve nga Komisioni Zgjedhor i Himarës, një kuti votim është vjedhur dhe si pasojë komisioni ka rënë dakort që të mos pranohet më kjo kuti votimi edhe në rast se gjendet. Gjithashtu komisioni ka rënë dakort të mos marrë parasysh një kuti që është mbushur me forcë me fletë votimi nga persona të panjohur. Incidentet kanë vazhduar në fshatin Dhërmi, ku mungonte proces verbali i një kutie votimi. Me konsensus të plotë komisioni vendosi të bëjë një proces verbal me shkrim dhe u firmos nga të gjithë antarët e komisionit. Përfundimisht, KZQV e Bashkisë ka vendosur të njohë rezultatin e konstatuar dhe numëruar nga kutitë e votimit. Të gjithë procesverbalet janë të firmosura dhe sot duke u gdhirë ato kanë udhëtuar drejt Tiranës. Mësohet se numri i votuesve të regjistruar në lista ka qenë 9150. Nga këto kanë votuar 2500 votues, nga të cilët 1310 kanë votuar për PDNJ-në dhe vetëm 800 i kanë dhënë votën Partisë Socialiste.

Vlorë
Edhe në Vlorë, socialistë e demokratë i kanë pranuar votimet. Njëra palë fituese dhe tjetra humbëse, kanë dalë në konferenca për shtyp, ku kanë dhënë vlerësimet e tyre për këtë proces zgjedhor. Kristaq Bisholla, kandidati demokrat për bashkinë e Vlorës, është shprehur se e pranoj humbjen, por parregullësitë kanë qenë shumë të mëdha në të gjitha zonat. Nga ana tjetër, kandidati socialist Shpëtim Gjika, i cili tashmë është fitues, është shprehur se unë e meritoja fitoren dhe do të bëj ç’është e mundur për të qeverisur në favor të qytetarëve të Vlorës. Situata postelektorale në qytet ka qenë krejtësisht e qetë. Asnjë incident nuk është shënuar, ndërkohë që forcat e policisë kanë vazhduar patrullimet e tyre, duke siguruar rendin dhe qetësinë publike.

Sipas KZQV

BASHKIA Vlorë

• Shpetim gjika (PS) 53 %
• Kristaq bisholla (PD) 40 %
• KANDIDATE TE TJERE Dule Arizaj (PSD) 6 %

BASHKIA Himarë

• Gjergji Goro (PS) 32 %
• Vasil Bollano (PBDNJ -PD) 52 %

FIER
Demokratët: Na vodhën

FIER – Që në mëngjesin e djeshëm zgjedhjet në rrethin e Fierit, demokratët i kanë cilësuar si të manipuluara. Sipas kryetarit të PD-së Ligor Pove, zgjedhjet kanë qenë krejtësisht të manipuluara nga ana e socialistëve. Por Pove një vërejtje të tillë, e ka shprehur vetëm në bashkitë apo komunat ku kanë fituar socialistët. Në bashkinë e Fierit, ishin të regjistruar gjithsej 56.580 persona. Nga këto kanë kanë votuar 18 642, duke shënuar një pjesëmarrja 32.95 përqind. Në këtë pjesmarrje të ulët kandidatin Zeqo votuan 10.786 persona ose 59.68 përqind. Ndërkohë që që për Viktor Gjinin votuan 6373 votues ose 35.26 përqind.Si subjekt, Partia Socialiste mori 9351 vota ose 51,73 përqind dhe nga ana tjetër Partia Demokratike mori 5356 vota ose 29,63 përqind. Ajo që vlen për t’u përmendur është mbarëvajtja gjatë gjithë procesit dhe puna e mirë e forcave të rendit, që siguruan një proces të saktë zgjedhor. i.m

Bashkia Patos

• Votues gjithsej 22160
• Morën pjesë 33,63 %
• PS Andon Bita 45,96%
• PD, Çelnik Velmishi 33,25%

PS fitoi 23 njësi vendore, ndërsa PD vetëm 4
Berati dhe rrethinat, bastionet e përhershme të socialistëve

Bashkia Berat

• 31.983 zgjedhës gjithsej
• 13.983 zgjedhës votuan
• 6194 vota për kandidatin e PS-së
• 5366 vota për kandidatin e PD-së
• 2423 vota për forcat e tjera

BERAT – Partia Socialiste fiton përsëri bashkitë dhe komunat e qarkut të Beratit. Ajo ka arritur që pas votimit të rifitojë përsëri 4 bashkitë dhe pjesën më të madhe të komunave të qarkun e Beratit. Sipas të dhënave në rang qarku, janë 29 njësi vendore, 23 prej të cilave janë fituar nga PS, 4 njësi nga PD, një njësi nga PBDNJ dhe një tjetër nga PR. Burime nga kampi rozë pohojnë se kanë qenë vetëm për Bashkinë e Beratit rreth 31.983 votues, ndër të cilët kanë votuar vetëm 13.983 votues, ose 35 për qind. Në garën për postin e kryebashkiakut, procesi i votimit ka përfunduar me 6194 vota për kandidatin e PS-së, Fadil Nasufi dhe 5366 për atë të PD-së, Mehmet Xheka. Ndërsa 2423 vota janë ndarë midis të pavarurve dhe kandidatëve të partive të tjera politike. Dhe në Kuçovë ka fituar PS me 70 për qind me kandidatin e saj, Artur Kurti, ndërsa Skrapari me 52 për qind i ka dhënë votën kandidatit socialist Artur Kurti, ashtu si dhe në Urën Vajgurore, ku ka fituar Agim Bregu. E veçantë, por e pritshme ka qenë fitoja e kandidatit të PBDNJ-së, Adriatik Zotkaj. Pas përfundimit të rezultateve paraprake, përfaqësues të PD-së kanë deklaruar se ka pasur mangësi, sidomos në mungesën e emrave në listat e zgjedhësve, ku kanë munguar rreth 1300 vetë. Por, sipas sekretarit të PS-së, Bashkim Çela, zgjedhjet kanë qenë normale. “Probleme me listat ka pasur, por listat ishin shpallur rreth 1 muaj më parë dhe të gjithë qytetarët mund të interesoheshin për gjetjen e emrave”, pohon ai. Ndërkohë, kryebashkiaku i ri, Fadil Nasufi pohoi se, “zgjedhjet u zhvilluan të qeta, pasi nuk është më koha e bastionëve, gjë e cila po na çon drejt ekuilibrave. Fitorja ime si kryetar bashkie, më obligon të shtoj forcat dhe tashmë të punoj për realizimin e premtimeve që u bënë gjatë fushatës”, tha ai. dh.rr

Durrës

“Zgjedhjet në Durrës janë manipuluar”. Të këtij mendimi dhe me mjaft forcë, kandidati PDR-së Ferdinand Xhaferri dhe deputeti durrsak i PD-së Sokol Olldashi, kanë kërkuar që këto zgjedhje të përsëriten urgjentisht.

Një kërkesë të tillë ata e kanë parashtruar në konferenca respektive për shtyp. Ndërkohë që më e reja nga KZQV e Bashkisë, është se janë ulur ndjeshëm përqindjet e fitores dhe të humbjes së dy rivalëve durrsakë. Lefter Koka i PS-së ka shkuar në nivelin e 53 përqind, ndërkohë që Hoxha ka arritur të kapë 38.5 përqind.

Kandidati i Partisë Demokrate të Re, Ferdinat Xhaferri, kërkoi dje ripërsëritjen e zgjedhjeve për Bashkinë e Durrësit, kërkesë kjo tashmë e bërë edhe nga Partia Demokratike. “Ftoj ndërkombëtarët që monitoruan në Durrës si edhe KQZ-në që e ndeshën fenomenin e ndarjes së familjeve, në shkallë të madhe në çdo qendër votimi, të kërkojnë ribërjen e zgjedhjeve në Durres”, tha ai. Sipas tij, përqindja e votuesve në Durrës që u shmangën me apo pa qëllim nga e drejta për të votuar është në një përqindje të atillë që jo vetëm nuk mund të injorohet, por edhe ndikon ndjeshëm në rezultatin final të votimit. “Në morinë e problemeve që u shfaqën në zgjedhje, problemi që ka patur një ndikim të drejtpërdrejtë në rezultatin përfundimtar të votimit, ishte ndarja në shkalle të madhe e familjeve durrsake për të votuar në qendra të ndryshme votimi”, tha kandidati reformator. Xhaferri shtoi se në zgjedhjet e vitit 2000, u përdorën kryesisht grupet e bandave për të ndikuar në rezultatin e votimit, sikurse familje durrsake u ndanë në qendra të ndryshme, çka përbën edhe një model të ri të manipulimit. “Çështja nuk shtrohet në i pranon Xhaferri zgjedhjet apo jo. Çështja nuk shtrohet në humbi apo nuk humbi opozita në Durres. Çështja shtrohet që bazuar në standardet minimale të demokracisë, ajo që ndodhi në Durrës është shumë larg së qeni jo vetëm e lirë dhe e ndershme, por edhe minimalisht e pranueshme”, tha ai. Kandidati reformator, njëkohësisht edhe nënkryetar i PDR-së, kërkoi nga komuniteti ndërkombëtar një angazhim më të madh dhe moslejim të manipulimeve zgjedhore, sikurse ndodhi në zgjedhjet e vitit 2000 dhe 2001. “Ndaj kërkesës për ripërsëritjen e zgjedhjeve në Durres e kërkoj, pasi kjo do të sillte humbjen e besimit tek institucioni i zgjedhjeve nga votuesit durrsakë”, tha Xhaferri. Sipas tij, nëse ajo që ka ndodhur më 12 tetor në Durres do të tolerohet, atëhere besimi i tronditur te qytetarët e Durrësit për zgjedhje të lira dhe të ndershme, do të shkatërrohet rëndë dhe do të duhet shumë kohë për ta rikuperuar, besim që është tronditur edhe në bashki e komuna të tjera të vendit.

Nga ana e tij, deputeti durrsak i Partisë Demokratike Sokol Olldashi përveç se ka kërkuar me forcë që të përsëriten zgjedhjet, ka bërë të ditur se janë konstatuar procesverbale që nuk janë firmosur nga komisionerët demokratë. Për herë të fundit, Olldashi është shfaqur në konferencë për shtyp rreth orës 20.00 ku ka kërkuar sërish me forcë përsëritjen e zgjedhjeve.

KORÇË

Atmosfera pas zgjedhore ka vazhduar dhe gjatë ditës së djeshme në qytetin e Korçës. Por nëse një ditë më parë, ishin të dy palët që festonin, dje kanë qenë vetëm demokratër që kanë uruar njëri-tjetrin.

Socialistët kanë dalë të zhgënjyer nga këto zgjedhje, ndonëse shpresat për një fitore të dytë të kryebashkiakut aktual, ishte mjaft e mundshme. Dhjetë mijë votues më pak se zgjedhjet e tetorit të vitit 2000 janë regjistruar të dielën në qarkun e Korçës. KZQV-ja e rrethit ka konfirmiuar se nga 62.650 votuesit e regjistruar, kanë marrë pjesë vetëm 21324, ose 34.5 për qind. Po nga burime të këtij komisioni, konfirmohet se, Robert Damo i PD-së ka marrë 748 vota më tepër se Gjergj Duro i PS-së, i cili ka mbajtur mandatin e shkuar si kryebashkiak i Korçës. Damo ka arritur që të sigurojë klasifikimin me 10.248 vota, ndërsa për Duron kanë votuar 9500 zgjedhës. Këshilli bashkiak do të përfaqësohet vetëm nga tre forca politike. Nga 19 subjekte që hynë në garë, vetëm PD, PS dhe PBDNJ morën këshilltarë për Bashkinë e Korçës, ndërsa subjektet e tjera nuk mundën të kalonin 3 për qind. PD ka fituar si subjekt 43.5 për qind, PS 37 për qind dhe PBDNJ 3.4 për qind, çka ka bërë që ajo të përfaqësohet me një këshilltar, Arben Miçinatin, i cili garoi dhe për kryetar Bashkie. Ndërsa 34 anëtarët e tjerë të Këshillit Bashkiak janë nga dy forcat kryesore politike, nga Partia Demokratike dhe ajo Socialiste.

Ja ç’tregojnë dy kandidatët rivalë se si e kanë pritur përfundimin e zgjedhjeve.

Flet zv/rektori Robert Damo

Tashmë u dha konfirmimi se ju do të drejtoni Bashkinë e Korçës. Si po e përjetoni këtë çast?
Unë gjej rastin për të falenderuar të gjithë ata që më kanë mbështetur, falenderoj qytetarët e Korçës, të cilët më votuan për ndryshimin. Unë e kisha të siguruar fitoren dhe e përjetoj këë çast si një fitues i merituar.

A do t´i mbani premtimet që i keni dhënë elektoratit?
Qëllimi im është që të mbështes dhe përkrah çdo intelektual, qytetar të Korçës, pavarësisht nga bindjet, të cilat kanë potenciale dhe japin alternativa që i shërbejnë zhvillimit rrënjësor të qytetit. Unë e kam thënë dhe më parë që fitoren do të mundohem ta menaxhoj në dobi të komunitetit.

Jeni fitues dhe si subjekt dhe në parlamentin bashkiak keni më shumë anëtarë. Si e vlerësoni këtë?
Ne dje arritëm tri fitore. Fituam Bashkinë, fituam Këshillin Bashkiak dhe fitorja e tretë është se kemi fituar dhe qarkun. Ne do të tregojmë vlerat tona se dimë të drejtojmë ndryshe.

Kryebashkiaku Gjergji Duro

Nuk arritët të rimerrni mandat të ri. Si e pritët?
Unë nuk jam i humbur. Kam punuar tre vjet për këtë qytet. Respektoj vullnetin e sovranit. Unë jam i humbur nëse humbasin projektet që kemi zbatuar për Korçën dhe ato që do të bënim.

Si e shpjegoni humbjen?
Unë nuk humba për shkak të qytetarëve korçarë, por përsëris që respektoj vullnetin e sovranit.

Keni ndërmend të largoheni nga Korça?
Unë këtu do të rri e do të vazhdoj të punoj për qytetin, siç kam bërë deri tani. E përsëris, unë nuk jam i humbur.

PD fiton komunat

KORÇË – Nga 14 komuna që ka Korça, në 7 prej tyre kanë fituar kandidatët demokratë, në 6 ata socialistë dhe në një PBDNJ-ka. Komunat që ka fituar PD-ja janë Pojani, Vreshtasi, Pirku, Voskopi, Voskopoja, Bulgareci, Drenova, ndërsa PS-ja ka fituar në Moglicë, Lekas, Vithkuq, Gore. Kandidati i PBDNJ-së, Fredi Xhomo, ka fituar në komunën e Mollajt.

GJIROKASTER

Vetëm pak orë pas konfirmimit nga ana e KZQV-ve të rezultateve të zgjedhjeve të djeshme në kampin rozë filloi festa e cila ka zgjatur thuajse gjatë gjithë natës së mbrëmshme e deri në orët e para të mëngjesit. Nga ana tjetër, në selinë blu ka mbizotëruar heshtja. Të dhënat flasin për një fitore të subjektit politik të PS-së në 23 njësi të qeverisjes vendore në shkallë qarku. Subjekti PD ka fituar 8 njësi ndërsa PBDNJ 1 njësi (zonën e Pogonit).

Kryetari i PS-së lokale të Gjirokastrës, ka deklaruar dje një fitore bindëse me diferenca të dukshme në bashkinë e Gjirokastrës dhe të Libohovës, si dhe në 7 komuna. Sipas tij për rezultatet e deritanishme nuk ka patur kontestime nga asnjë forcë politike ndërkohë që kandidati Bime në Gjirokastër ka fituar me një diferencë të ndjeshme ndaj kandidatit demokrat. Ndërkaq zëdhënësi i PD-së Vasil Muka i ka cilësuar zgjedhjet si të qeta, por ka dënuar presionin që sipas tij është ushtruar në disa lagje ndaj votuesve demokratë. Problemi i mungesave në listat e votimit nuk ka kaluar pa u ndjerë dhe në Gjirokastër, ku sipas Mukës, pjesa më e madhe ishin demokratë. Ndërkaq zëdhënësi i shtypit në drejtorinë e policisë së qarkut Xhaferr Kuka ka theksuar se duke përjashtuar incidentin e ndodhur një ditë më parë në qytetin e Tepelenës kur u grindën dy persona 50 metra larg qendrës së votimit e ku dëgjuan krisma, nuk ka përmendur asnjë lloj prishje të rendit apo të qetësisë publike. Nga 23.943 që ishte numri i zgjedhësve në bashkinë e Gjirokastrës votuan 9845 zgjedhës ose 41 përqind. Prej tyre të vlefshme ishin 9460 ose 96 përqind e votave dhe të pavlefshme 385 vota ose 4 përqind. Ndryshe nga herët e tjera kësaj radhe siç dhe doli nga zgjedhjet këshillat bashkiake dhe ato të komunave do të jenë më pluraliste. Kështu në Këshillin Bashkiak të Gjirokastrës, Tepelenës e Përmetit, veç PS-së dhe PD-së e PSD-së do të marrin pjesë edhe këshilltarë të partive të tjera politike.

BASHKIA GJIROKASTER

• Flamur Bime (PS) 55 %
• Ylli Asllani (PD) 37 %
• KANDIDATE TE TJERE Bashkim Tola (PSD) 5%

Lazarati, votime të qeta

GJIROKASTER - Edhe në komunën e Lazaratit, votimi është zhvilluar i qetë. Edhe kryetari lokal socialist Çobani është prononcuar se kjo fushatë ka dëshmuar pjekuri dhe maturi nga ana e forcave politike, pavarësisht se në këtë fshat është votuar në një përqindje të konsiderueshme kandidati demokrat për kryetar komune Dashnor Aliko.

Fiton në Përmet, Tepelenë dhe Libohovë
PS firmos dhe në Qark

GJIROKASTER - Fitorja e PS-së është konfirmuar edhe në Bashkitë e Libohovës, Tepelenës dhe Përmetit. Kreu i PS-së lokale për qytetin e Gjirokastrës në një deklarim për mediat ka pohuar suksesin e tij edhe në Bashkinë e Libohovës. Subjekti politik PS ka kapur 44,3 përqind të votave, ndërsa kandidati Ladi Hide ka fituar më thellë me 53,8 përqind. Mësohet se PD-së ka kapur vetë 31,6 përqind dhe kandidatit i saj Arben Isufati 45 përqind. Kurse në Bashkinë e Përmetit mësohet se “kandidati i PS-së Petrit Bregasi ka fituar 44 përqind kundrejt kundërshtarëve. Edhe në Bashkinë e Tepelenës zyrtarisht konfirmohet se ka fituar PS-së si subjekt politik me 39,8 përqind dhe kandidati i saj Xhaferr Ruçi me 56,1 përqind kundrjet 23 përqind të PD-së dhe 39,9 përqind të kandidatit të saj Arben Culli.