___________________________

Riformatimi dhe faktorizimi i interesave mbarëshqiptare

Nga Astrit KOLA

Pavarësisht skenarëve të koordinuar të Beogradit dhe Athinës, nga ku ndërsehen qentë që ndjekin e mbysin fëmijët e shqiptarëve dhe i vrasin ato mbi urën e Ibrit, për të provokuar mbarë Kosovën bash në ditën kur NMT Mbreti Leka foli për Çamërinë dhe 35 deputetët - hartues të Projekt-rezolutës për Çeshtjen Çame, do t'u jepnin dërrmën filogrekëve të parlamentit - reaktiviteti kombëtar në mbarë hapësirën shqiptare në Ballkan, e ka kulmuar faktorizimin e aspiratave dhe interesave tona.

Edhe pse Nano, për efekte simultane antikombëtare, lëshon mesazhe nga Brati-slava (vëllezërit-sllavë), nuk mundet t'i frustrojë shqiptarët në Tiranë, Prishtinë, Mitrovicë, Shkup, Athinë, Podgoricë, Bruksel apo Nju Jork.

Nano, për t'i ndihur Koshtunicës dhe ivanoviçëve të Mitrovicës - si dikur Sllobos, guxon të përqasë Kosovën shqiptare me Austrinë, dhe Shqipërinë me Gjemaninë, për të aluduar për "Anshlus-in" dhe nacionalistëve t'u përqasë Hitlerin. Por tashmë Ai ka mbetur "Asi i fundit në mëngën" e bixhozxhinjve që luajnë me dëshpërim kartat antishqiptare në tryezat e poker-politikës, sepse, shqiptarët janë zgjuar, kudo ku janë.

Mbytja e Kauzës shqiptare në emër të "Stabilitetit të Ballkanit", tashmë nuk ka gjasa të ndodhë.

Në djall vaftë "Stabiliteti dhe qetësia" e Varrezës masive ku duan ta kallin Shqiptarizmën.

Vetëm politika e bashkuar me fuqinë - mund të sjellë realizimin e të drejtave tona. E Drejta pa Fuqinë është thjesht iluzion. Ndaj gabohen rëndë ata që kanë marrë përsipër të edukojnë Nano-vagabondin me moral qytetarie, sepse kjo i ngjan gjepurnajës kineze të komunistëve - që kishin marrë përsipër të edukonin Perandorin Çin të Mançukuosë me citatet e Kryetarit Mao.

Nano duhet përzënë, ndryshe, kur Ai të kthehet nga uikendet, i bie që të përzihen nëpër shtëpi shqiptarët "rrugaçë" - që enden rrugëve e shesheve duke "prishur qetësinë" e këlyshëve të Beogradit, Athinës dhe Moskës në Shqipëri.

Nanon nuk duhet ta flladisim dhe t'i fshijmë djersët e gjumit të vapës që e zë pasi kthehet nga turnetë e stërzgjatura, ku gjithmonë gjen rastin të vjellë kundër shqiptarëve - pasi përpin menytë e helmatisura të kuzhinave antishqiptare.

Nëse simbolikës së vrasjes së Ardhmërisë së shqiptarëve nëpërmjet mbytjes së fëmijëve mitrovicas, do t'i ndihim me mbytjen e shpresës për shporrjen e Nanos, atëherë antishqiptarët do të marrin revanshin, dhe rrezikon të bjerë edhe Kështjella e mbrame e Kombit, të cilën, gabimisht, e pandehim të çliruar dhe të pavarur.

Ndaj duhet ta shporrim sa më parë kryeushtarin e antishqiptarizmës, ndryshe... Pastaj, dita kur Mitrovica, Shkupi, Çamëria..., do të flasin shqip - do të afrohet...

Dhe atëherë, gjuha primordiale e qytetërimit europian, do të definojë përfundimisht kufinjtë e vërtetë të hapësirës mbarëshqiptare.

Protesta gandiste e opozitës zhvillohet nën një rrethim të ashpër policor

Tirana kthehet në një qytet-shtet policor

Kundër protestës janë angazhuar rreth 3000 policë në të gjithë vendin me qëllimin e vetëm bllokimin e vullnetit të shqiptarëve për të protestuar në sheshin "Skënderbej". Rrotull hyrjeve të Tiranës janë ngritur rreth 60 postoblloqe, megjithëse opozita ka deklaruar se është duke zhvilluar një protestë "Gandiste"

Neritan Kolgjini

"Gandistët" nën rrethim policor

Protesta paqësore e djeshme e opozitës shqiptare nën moton "Nano Ik!" ka shënuar suksesin e radhës, duke thyer kordonët policorë të vendosur nëpër kryqëzimet e rrugëve të Tiranës. Sipas burimeve të besueshme nga Ministria e Rendit, dje (dt.20 mars 2004) janë angazhuar rreth 3000 policë në të gjithë vendin me qëllimin e vetëm bllokimin e vullnetit të shqiptarëve për të protestuar në sheshin "Skënderbej". Mësohet se vetëm rrotull hyrjeve të Tiranës janë ngritur rreth 60 postoblloqe. Në njëfarë mënyre kjo u konfirmua nga disa legalistë të Burrelit, të cilët kishin ardhur nga rruga dytësore e Shkallës së Tujanit në lindje të Tiranës, me qëllim që t'i shmangeshin policisë e të ishin të pranishëm në mitingun e opozitës. Megjithëse opozita ka deklaruar në vazhdimësi se është duke zhvilluar një protestë "Gandiste", kjo nuk është përfillur nga klani policor që sundon sot vendin dhe angazhimi i të gjitha llojeve të policëve dhe mjeteve të motorizuara si furgonë e autoblinda, tregon për psikozën që sundon sot qeveritarë e Tiranës. Po ashtu për të treguar dhëmbët kundër mbështetësve të opozitës, policia ka ndaluar pas mitingut, pa asnjë shkak të ligjshëm, rreth 100 qytetarë të Tiranës gjoja për verifikim dokumentacionesh makine apo për mungesa dokumentesh identifikimi. Ndërsa burime të tjera theksojnë se "krehri" i policisë ka funksionuar në të gjithë territorin e vendit duke bllokuar paraprakisht të gjitha organizimet e mundshme të qytetarëve për të ardhur në Tiranë.

Por gjithsesi dje në shesh ishin mbledhur përsëri dhjetarë mijëra vetë, 70 mijë e më shumë protestues. Kjo u pa më qartë në kohën që ky lumë njerëzish zbriti nga sheshi Skënderbej për në bulevardin Dëshmorët e Kombit për t'u pozicionuar në pjesën përballë selisë së kryeministrisë. Ky ishte momenti më i dukshëm i fuqisë së protestës, kur një llavë e stërgjatë njerëzish shtrihej prej sheshit Këshilli i Europës deri në Hotel Rogner. Momentet e uljes në shesh përballë kryeministrisë ishin një moment kulminant i protestës e cila nuk shënoi ndonjë incident nga ana e protestuesve, megjithë provokimet e policisë. Aty ishin të pranishëm shumica e krerëveëve të opozitës Berisha, Spahiu, Mediu, Laço, Lesi, Shehi etj..

Mitingu

Në orën 12:00 të drekës, siç ishte njoftuar, ka filluar mitingu i opozitës në sheshin Skënderbej. Mes një dekori të shkëlqyeshëm pankartash, flamujsh, parrullash e portretesh mbështetësit e opozitës dhe të lëvizjes "Nano Ik", janë mbledhur në shesh duke e mbushur atë në gjithë gjerësinë e tij. Në këtë miting folën oratorë të ndryshëm politikë e nga shoqëria civile, ndërsa në podium ishin një numër i madh drejtuesish kryesorë të opozitës shqiptare dhe të shoqatave atdhetare antikomuniste. Kështu fjalimet e këtij mitingu i çeli z.Dashamir Shehi i PDRN, për t'ia lënë vendin një studiueseje të Harvardit E.Reçi. Më pas foli z.Adem Allçi i shoqatës së të Burgosurve. Pas tij Arjan Starova i PBL e me radhë z.Agim Karagjozi i Vatrës, Endira Bushati e Fakultetit Juridik, Kreshnik Çollaku i PDR, Agron Tufa, poet dhe në fund e mbylli si zakonisht Prof. Sali Berisha. Në diskutimet e oratorëve u kërkua largimi i qeverisë Nano dhe vetë atij si person. Oratorët patën edhe nota ironie për kryeministrin e famshëm si pijanik, duke i kërkuar që ai të largohej nga pushteti për të mirën e vet.

Gjithsesi ajo që mbizotëronte fjalimet e oratorëve ishte thirrja "Nano Ik". Në momentnin që ka marrë fjalën z.Sali Berisha, një numër i madh balonash janë ngritur drejt qiellit, mbas të cilave ishin të lidhura banderolëza me mbishkrimin "Nano Ik!" Një prej këtyre balonave u ngrit drejt qiellit me banderolëzë të ndezur, e cila duke u ngjitur drejt qiellit, filloi të digjte e të shpërthente një nga një të gjitha balonat e lidhura tufë.

Censura

Policia kishte deklaruar një ditë më parë se nuk do të lejonte transmetimin direkt të protestës në TV. Por pas ndërhyrjeve të opozitës dhe pas presioneve ndërkombëtare, edhe kjo protestë u arrit që të jepej drejtpërdrejt në TV. Kështu disa TV të Tiranës si TV Shijak, Tv Klan, Top Channel etj., e transmetuan "live" protestën. Por pavarësisht kësaj, qeveria e Nanos i kishte marrë masat që njerëzit mos të informoheshin në kohë reale. Ajo edhe në këtë rast përdori trukun e vjetër të ndërprerjes së energjisë elektrike. Ndërsa një rast edhe më flagrant i shkeljes së të drejtës së shtetasve për informim, është nxjerrja jashtë funksionit e përforcuesve të sinjalit apo antenave, duke u ndërprerë energjinë. Gjithsesi, shqiptarët e njëmendtë kundër qeverisë ishin në shesh dhe e treguan urrejtjen e tyre për qeverinë Nano.

Parrullat

Një prej veçorive të kësaj proteste ishte larmia e parrullave dhe mesazhi i tyre i ri. Me të drejtë një protestues tha se këta që sot janë në shesh mund të etiketohen si "nanoiksa!" Humorit të njohur tashmë me pankartat e posterat kundër korrupsionit, si dhe ato kundër Nanos personalisht, dje iu shtuan edhe mjaft batuta që vinin nga shpirti i njerëzve të revoltuar. Disa prej tyre i shënuam edhe për gazetën tonë si: "O Fatos, o hajdut, na i ke lënë policët pa bukë", "Nano ik, o qelbanik!", Nano kthehu, mezi po t'presim!", "Nano ik, Xhoana ik!", "O Fatos o zagar, ti je grek nuk je shqiptar", "O Fatos, o hajdut, dil nga vrima ku je futë", "O policë o njerëz me hall, mos i ruani këta zagarë" e mjaft të tjera.

Krerët e opozitës kanë deklaruar se protestat do të vazhdojnë në ditët në ardhshme dhe do të përhapen në të gjitha rrethet e vendit. Ndërsa Nano siç dihet ka disa ditë që ia ka mbathur në Bratislavë të Sllovakisë.

Në këtë protestë u dhanë edhe mjaft mesazhe në përkrahje të Kosovës, e cila këto ditë ka kaluar një krizë të fortë pas protestave për shkak të mbytjes së tre fëmijëve prej serbëve në lumin Ibër.

Parrullat e hedhura kundër Nanos

"O Fatos, o hajdut, na i ke lënë policët pa bukë"

"Nano ik, o qelbanik!"

"Nano kthehu, mezi po t'presim!"

"Nano ik, Xhoana ik!"

"O Fatos o zagar, ti je grek nuk je shqiptar"

"O Fatos, o hajdut, dil nga vrima ku je futë"

"O policë o njerëz me hall, mos i ruani këta zagarë".

Kosova e ka bërë luftën e saj, bashkë me aleatët e mëdhenj, NATO, SHBA, Britania e Madhe. Me këtë luftë e kemi fituar lirinë dhe tash po ndërtojmë shtetin shqiptar të Kosovës, që është drejt njohjes së pavarësisë dhe shtetësisë

OBORRI MBRETËROR SHQIPTAR

Tirana, ALBANIA

E-mail royalcourt@albaniaonline.net

Tiranë 17 mars 2004

Të dashur motra dhe vëllezër shqiptarë të Kosovës,

Ngjarja e rëndë që ndodhi në Mitrovicë, na hidhëroi zemrat tona dhe ne besojmë se fajtorët do të ndëshkohen. Shqiptarët nuk i durojnë krimet që bëhen ndaj fëmijëve dhe popullit, sepse ne jemi rritur për paqe dhe me krenarinë e shqipeve të lira.

Kosova e ka bërë luftën e saj, bashkë me aleatët e mëdhenj, NATO, SHBA, Britania e Madhe, etj. Me këtë luftë e kemi fituar lirinë dhe tash po ndërtojmë shtetin shqiptar të Kosovës, që është drejt njohjes së pavarësisë dhe shtetësisë. Kjo ka nxitur gjithmonë provokatorë të shumtë, për të krijuar vatra lufte, për të krijuar skena dhune, me dëshirën për ta ndarë Kosovën, apo për ta "kantonizuar" atë. Këtyre provokimeve u ka ikur koha. Shqiptarët e Kosovës ua kanë dhënë përgjigjen e duhur armiqve tradicionalë.

Ne mendojmë se lufta dinjitoze e shqiptarëve të Kosovës, që solli Lirinë, kërkon po të njëjtin qendrim dinjitoz për të respektuar të sotmen, për të mos lejuar që provokimet të sjellin destabilitet. Ajka e shqiptarizmit duhet të flasë me popullin dhe, së bashku, të mbajmë me dinjitet gjakftohtësinë, për t'i shërbyer vetvetes dhe Flamurit Kombëtar. Askush nuk mund të ndezë flakët e zjarrit mbi popullin e Kosovës.

Motra dhe vëllezër,

Ne jemi pranë Jush, bashkë me Ju, ndajmë dhimbjen sëbashku, por edhe qëndrojmë me dinjitet në këto momente të vështira. Ne dëshirojmë që e keqja të ndalet, sepse atë nuk e kanë nxitur shqiptarët. Por ne nuk do të lejojmë që të zbatohen plane antishqiptare, të provokuara për Mitrovicën dhe rajone të tjera. Atyre ne u përgjigjemi me qëndresën dhe dinjitetin tonë kombëtar.

Rroftë Kombi Shqiptar!

Vëllazërisht

Leka I - Mbret i shqiptarëve

Konferencë shtypi e Nënkryetarit të PLL z.Murat Basha

Koshtunica, një Sllobodan me emër tjetër

Murat Basha: Zhvillimet në Kosovë lidhen me ardhjen e Koshtunicës në pushtet me ndihmën e socialistëve të Sllobos

Ditën e enjte, më datë 18 mars 2004, nënkryetari i PLL z.Murat Basha dha një konferencë për shtyp, në të cilën, në emër të PLL, u prononcua lidhur me zhvillimet e ditëve të fundit të Mitrovicë dhe mbarë Kosovën. Në fjalën e tij para gazetarëve, z.Basha shprehu shqetësimin e thellë të PLL për bilancin tragjik të zhvillimeve të fundit në Kosovë, ku humbën jetën dhjetëra shqiptarë të pafajshëm, e për të cilat përgjegjëse janë qarqet antishqiptare të Beogradit, që provokuan një konflikt të përllogaritur, që nisi me mbytjen e qëllimshme të 3 fëmijëve shqiptarë në ujërat e lumit Ibër, pas ndjekjes me qen të tyre nga paramilitarë serbë të mbarsur me urrejtje etnike.

Z.Basha me këtë rast shprehu bindjen se zhvillimet në Kosovë janë të lidhura ngushtësisht me zhvillimet politike në Beograd, të paralajmëruara më parë nga PLL, e që interferojnë me riardhjen në fuqi të Koshtunicës dhe "instalimit të qeverisë me votat e socialistëve të Sllobos".

Më pas, nënkryetari legalist deklaroi se "PLL proteston ashpër ndaj qëndrimit të faktorëve antishqiptarë, që tolerojnë enkas paramilitarët serbë të pjesës veriore të Mitrovcës shqiptare, të cilët kanë marrë statusin e një ushtrie kazerme, pothuajse të barabartë e statusin e KFOR-it". Në vijim të prononcimit të tij, z.Basha theksoi se "PLL përkrah çdo nismë efektive për zgjidhjen paqësore të konfliktit", por, sipas tij, "rrugëzgjidhjet më të pranueshme mund të burojnë vetëm nga sigurimi përfundimtar i sovranitetit të institucioneve të shtetit të Kosovës dhe nga ruajtja e tërësisë territorialo-administrative të Kosovës".

Në fund të prononcimit të tij, z.Basha iu përgjigj pyetjeve të gazetarëve të shumtë lidhur me zhvillimet aktuale në kampin e opozitës dhe përgatitjet e saj për protestën masive të 20 Marsit, për të cilat ai u shpreh se "do të bëhen të ditura pas vendimeve kolegjiale që do të marrë Tryeza e përbashkët dhe Komisioni Koordinator i Protestës së faktorëve politikë opozitarë".

Korresp. i "Atdheu"

Deklaratë për shtyp e PLL

PLL: E papranueshme ndarja e Mitrovicës

PLL është thellësisht e shqetësuar për zhvillimet dramatike në Mitrovicën shqiptare dhe mbarë Kosovën. Ajo mendon se këto zhvillime nuk janë të rastësishme, por sipas një skenari të gatuar në kuzhinat antishqiptare.

Me tensionimin dhe shkallëzimin e konfliktit në Kosovë pikërisht pas fitores së Koshtunicës dhe instalimit të qeverisë me votat e socialistëve të Sllobos, synohet t'i jepet armë propagandës së fashistëve të Beogradit dhe miqve të tyre ndërkombëtarë që, në pamundësi për të anulluar Pavarësinë e Kosovës - pas varganit të "standarteve", të mundësojnë një rikthim të Ushtrisë dhe administratës serbe në Kosovë, dhe, në rastin më të keq, të shtyjnë në kalenda zgjidhjen pëfundimtare të Statusit të Kosovës.

PLL nuk mund të pajtohet kurrsesi me simbolet e Serbisë dhe alfabetin cirilik në Morinë dhe Urën e Ibrit, ashtu sikundër nuk mund të pranojë ndarjen faktike të Mitrovicës me karakolle paramilitarësh, nën hundët e UNMNIK-ut dhe KFOR-it.

Vrasja e së ardhmes së Kosovës me simbolikën e vrasjes së paramenduar të fëmijëve shqiptarë në Mitrovicë, kantonizimi apo enklavat e ideura nga paramilitarë serbë me mandat deputeti dhe nga prelatët e Kishës serbe në Kosovë - nuk mund të jenë kurrsesi prerogativa për zgjidhjen e Çeshtjes së Kosovës dhe të pranohen si të tilla nga shqiptarët, pavarësisht tendencave për t'i imponuar ato.

PLL proteston ashpër ndaj qëndrimit të faktorëve antishqiptarë, që tolerojnë enkas paramilitarët serbë të pjesës veriore të Mitrovcës shqiptare, të cilët kanë marrë statusin e një ushtrie kazerme, pothuajse të barabartë e statusin e KFOR-it.

PLL i konsideron të patolerueshme praktikat e ndarjes faktike ekonomike të aktiviteteve të biznesit në Mitrovicën veriore dhe minierat e saj, të cilat nuk administrohen nga qeveria e Kosovës dhe organizmat fiskalë të UNMIK-ut, por nga Beogradi dhe miqtë e tij.

PLL përkrah çdo nismë efektive për zgjidhjen paqësore të konfliktit, por duke vlerësuar me dhimbje bilancin e viktimave, gjithmonë në disfavor të shqiptarëve, e që flet shumë qartë - mendon se zgjidhjet efektive mund të burojnë vetëm nga sigurimi përfundimtar i sovranitetit të institucioneve të shtetit të Kosovës dhe nga ruajtja e tërësisë territorialo-administrative të Kosovës, për të cilin, në radhë të parë, duhet të ngarkohen TMK, KFOR-i, Qeveria e Kosovës dhe UNMIK.

Konferencë shtypi e kryetarit të PLL z.Eqerem Spahiu

Spahiu: Çështja çame e shenjtë për legalistët

Ditën e mërkurë, më datë 17 mars 2004, në sallën e Konferencave të Shtypit të Kuvendit të Shqipërisë, kryetari i PLL, z.Ekrem Spahiu, dha një konferencë për mediat e shumta të pranishme, në të cilën u prononcua lidhur me mosaprovimin nga PLL të draftit të rezolutës për Çeshtjen Çame dhe të drejtat e popullsisë çame e nështetasve shqiptarë për pronat dhe pasuritë e tyre në Greqi.

Në deklaratën e tij z.Spahiu trajtoi diferencat e theksuara midis tekstit të Projekt-rezolutës së 35 deputetëve të shtatorit të vitit të kaluar, dhe atij të hartuar e miratuar me shumicë votash në Komisionin e Jashtëm të Kuvendit.

Sipas z.Spahiu, teksti i Projekt-rezolutës së miratuar në Komisionin e Jashtëm "nuk i përmbush qëllimet e hartuesve të projekt-rezolutës së shtatorit të kaluar dhe interesat e çamëve e shqiptarëve". Dhe kjo, sipas kryelegalistit, vjen pasi "në të janë përdorur artifice që e pengojnë zgjidhjen e problemeve ndërshtetërore lidhur me të drejtat e ligjshme të shqiptarëve në përgjithësi dhe të çamëve të dëbuar në veçanti, për t'u kthyer në trojet amtare dhe për të marrë në zotërim pronat, pasuritë dhe kompensimet pasurore të fitimit të munguar, gjatë gjithë periudhës së mbajtjes së tyre nën sekuestro konservative apo dhënies me qira".

Për të argumentuar qëndrimin e legalistëve dhe hartuesve të projekt-rezolutës së depozituar në sekretarinë e Kuvendit në shtatorin e kaluar, z.Spahiu paraqiti obsionet prej 5 pikash, të cilat ishin thelbi i draftit të deputetëve, që u ndryshuan nga mungesa e vullnetit politik të poseduesve të shumicës së kartonave në mbledhjen e Komisionit të Jashtëm parlamentar të ditës së mërkurë.

Në vijim të deklaratës së tij, z.Spahiu theksoi gjithashtu mbështetjen e PLL dhe të grupit parlamentar legalist për grevën 24 orëshe të filluar prej një grupi të mbështetur nga pothuajse të gjitha shoqatat e ish të Përndjekurve dhe të Burgosurve Politikë, grevë e zhvilluar në ambjentet e brendshme të Partisë Balli Kombëtar Demokrat. Kjo grevë ka si shtysë gjendjen e mjeruar të kësaj shtrese, dhe synon sensibilizimin e opinionit publik dhe politikës për përmbushjen e kërkesave të tyre ekonomike, për kompensimin pasuror të punës së detyruar e të papaguar të tyre gjatë viteve të diktaturës, - konform Kodit Penal dhe Pafajsisë së përfituar prej tyre që në vitin 1991, dhënë nga Parlamenti pluralist i asaj kohe.

Më pas z.Spahiu e vijoi deklaratën e tij me artikulimin e qëndrimit të PLL kundër mashtrimit të qeverisë lidhur me të ashtuquajturin investim të huaj prej 90 milionë dollarësh për ndërtimin e një shërbimi transporti me tren elektrik në linjën Durrës-Tiranë-Rinas. Z.Spahiu sqaroi me këtë rast se "nuk kemi të bëjmë me investim të huaj por me një projekt të financuar me paratë e taksapaguesve shqiptarë", dhe me këtë rast i bëri thirrje qeverisë që ta përdorte këtë shumë marramendëse jo në këtë investim aspak prioritar, por në ndërtimin e rrugës Durrës-Prishtinë, që sipas kryelegalistit "lidh dy pjesët e ndara të Kombit shqiptar".

Gjatë prononcimit të tij, kryetari i PLL iu përgjigj gjithshatu edhe pyetjeve të shumta të gazetarëve të pranishëm, lidhur me marrëdhëniet ndërshtetërore Shqipëri-Greqi, dhe konsekuencat politike të projekt-rezolutës që do të shqyrtohet e miratohet në Kuvend, si edhe lidhur me zhvillimet e pritshme në kampin e opozitës, ndër të cilat gazetarët ishin të prirur të mësonin për protestën e paralajmëruar të 20 marsit, pasi PLL është ndër partitë kryesore të tryezës dhe Këshillit Koordinues.

Korresp. i "Atdheu"

Deklaratë për shtyp e PLL

PLL: Ja kërkesat tona për Çamërinë

Projekt-rezoluta për çeshtjen e popullsisë Çame, nismë e 35 deputetëve, pas 6-muajve nga depozitimi i saj - nuk kaloi në seancë plenare ashtu siç kërkonin nismëtarët, me pretendimin që të riformulohet në Komisionin e Politikës Jashtme. Sapo ka përfunduar mbledhja e Komisionit të Jashtëm, dhe tashmë mund të them se Projekt-rezoluta e ndryshuar, nuk përmbush qëllimin e synuar. Ne, nismëtarët, në draftin paraprak të depozituar, kërkonim:

1.Parlamenti grek të abrogonte Ligjin e Luftës të vitit 1940.

2. Njohjen e pronësisë së popullsisë çame, duke i kërkuar qeverisë greke ngrirjen e Ligjit nr. 2664, datë 27 nëntor 1998, që ka të bëjë me regjistrimin e pronave dhe pasurive.

3.Të revokohet akti i dhënies së shtetësisë shqiptare "i vitit 1953" për çamët e strehuar në Shqipëri pas dëbimit me dhunë nga shteti grek në vitet 1944-1945.

4.Rikthimin e çamëve në trojet e tyre.

5.Dëmshpërblimin pasuror për shfrytëzimin prej dekadash të pronave të çamëve dhe shqiptarëve të tjerë.

Për realizimin e këtyre kërkesave të tyre të mbështetura në konventat ndërkombëtare, ne kërkonim angazhimin e drejtëpërdrejtë të qeverisë dhe institucioneve të tjera shqiptare, dhe përcjelljen zyrtarisht të Rezolutës së miratuar nga ana e kryetarit të Kuvendit të Shqipërisë, - për Parlamentin dhe qeverinë e Republikës së Greqisë; Parlamentin dhe Bashkimin Europian; Kongresin dhe Senatin Amerikan dhe parlamentet e vendeve nënshkruese të Deklaratës Universale...

Mirëpo pikat e sipërthëna të nismëtarëve nuk u përfshinë tekstualisht në Projekt-rezolutën përfundimtare që do t'i paraqitet Kuvendit, dhe me anë të artificeve është shmangur thelbi dhe qëllimi i kërkesës.

Grupi parlamentar i PLL do të kërkojë në seancë plenare, që të miratohet Projekt-rezoluta e nismëtarëve, duke mos pranuar atë të hartuar nga Komisioni i Politikës Jashtme.

Sigurisht që ne nuk i kemi kartonat e duhur, por garantojmë shqiptarët dhe në veçanti vëllezërit çamë, se përpjekjet tona do të jenë maksimale, duke hyrë në kontakte me ndërkombëtarët deri në zgjidhjen përfundimtare të këtij problemi madhor për shqiptarët dhe Shqipërinë.

Përballë indiferencës së qeverisë, sot, mbi 500 ish të Burgosur dhe të Përndjekur Politikë kanë hyrë në grevë urie 24-orëshe në të gjitha rrethet e vendit. Në këtë grevë marrin pjesë me dhjetra e qindra legalistë,ndaj PLL, si pjesë organike e kësaj shtrese, mbështet fuqimisht grevën dhe kërkesat e ligjshme.

PLL i bën thirrje Kuvendit të Shqipërisë, qeverisë dhe kryeministrit Nano - të përmbushin detyrimet ligjore ndaj kësaj shtrese.

Çeshtjen e përfolur gjatë këtyre ditëve, për ndërtimin e një treni të shpejtë elektrik të linjës Tiranë-Rinas-Durrës, PLL e konsideron si një mashtrim të Qeverisë, sepse nuk bëhet fjalë për investim të huaj, por me para të taksapaguesve shqiptarë. Nga ky investim i supozuar, Kompania "General-Electric" përfiton financiarisht dhe nuk investon vetë.

Nëse kryeministri ka ndërmend që, pa pyetur askënd, të harxhojë 90 milionë dollarë për të "lidhur Durësin me Tiranën" - le të ndërtojë me këto para rrugën që lidh Durrësin me Prishtinën, pra dy pjesët kryesore të Kombit shqiptar.

Konferencë shtypi e Sekretarit të PLL për Marrëdhëniet me Publikun z.Blerim Kamberi

Qeveria, regjim policor për 20 Marsin

Ditën martë, më datë 16 mars 2004, sekretari për Marrëdhëniet me Publikun në PLL, z.Blerim Kamberi, dha një konferencë, gjatë së cilës lexoi një deklaratë në emër të PLL dhe u pronocua për mediat e shumta të pranishme.

Në thelb të deklaratës së z.Kamberi konsistonte pasqyrimi i zhvillimeve dhe zgjedhjeve në Degën e PLL Tiranë, më e madhja e vendit, që drejtohet prej tij, si dhe puna organizative e teknike e kësaj Dege në kuadër të ristrukturimit dhe riorganizimit, gjatë dhe pas fushatës së zgjedhjeve në parti.

Më pas z.Kamberi shprehu, në emër të PLL, shqetësimin lidhur me atë që ai e konsideroi "mobilizim i strukturave shtetërore për sabotimin e pjesëmarrjes së qytetarëve në Protestën e paralajmëruar të 20 marsit, në kryeqytet". Z.Kamberi argumentoi gjithashtu se "mobilizimi i Policisë së Shtetit synon vënien nën kontroll të Protestës së 20 marsit" dhe se "ky organizim policor nuk ka asgjë të përbashkët me masat e luftës kundër terrorizmit", sikundër është propaganduar nga dikasteri Blu dhe mediat proqeveritare. Me këtë rast, në emër të PLL, z.Kamberi u bëri thirrje anëtarëve dhe simpatizantëve të Legalitetit që të merrnin pjesë "masivisht në Protestën e 20 marsit, dhe të insistonin në shkallëzimin e kësaj proteste - deri në largimin e Nanos dhe pseudomaxhorancës nga pushteti, gjithmonë duke përdorur mjete demokratike. Sipas sekretarit legalist për Marrëdhëniet me Publikun dhe njëkohësisht kryetar i Degës së PLL Tiranë, "Lëvizja mbarëpopullore 'Nano ik' mbështetet në vendosmërinë e natyrshme të opozitës dhe mbarë shqiptarëve për t'u hapur rrugë zgjedhjeve të reja të parakohshme, si e vetmja alternativë për daljen nga kriza totale dhe rivendosjen e parametrave e standarteve demokratike në qeverisjen e vendit".

Korresp. i "Atdheu"

Deklaratë për shtyp e PLL

Plani ynë për "Nano Ik!"

Partia Lëvizja e Legalitetit po zhvillon me sukses procesin e zgjedhjeve, riorganizimit dhe ristrukturimit në Degët dhe nëndegët e saj.

Konferenca e PLL Dega Tiranë, nga ku u zgjodhën edhe forumet e reja drejtuese, ishte modeli i respektimit të Statutit dhe procedurave demokratike në përzgjedhje, duke u shndërruar në modelin e një demokracie të brendshme dhe krijimit të standarteve, sidomos në raport me votën e lirë.

PLL vëren me shqetësim mobilizimin e strukturave shtetërore për sabotimin e pjesëmarrjes së qytetarëve në Protestën e paralajmëruar të 20 marsit, në kryeqytet.

PLL gjykon se, këtyre përpjekjeve antidemokratike dhe okulte u shërbeu edhe mbledhja me urgjencë nga kreu i Ministrisë së Rendit të të gjithë drejtuesve të Policisë së Shtetit nëpër rrethe. Kjo mbledhje nuk mund të ketë kurrsesi asnjë synim tjetër përveçse futjes nën kontrollin e darës policore të pjesëmarrjes masive të qytetarëve të rretheve në Protestën Mbarëpopullore "Nano ik", që do të organizohet në kryeqytet.

Asnjë pretekst i "parandalimit të akteve terroriste", apo "në kuadër të masave të luftës kundër terrorizmit", nuk mund të justifikojë pengimin masiv të qytetarëve për të ardhur në Tiranë, sikundër veproi Policia e Shtetit ndaj tyre para manifestimit të Protestës paqësore të 21 shkurtit.

PLL, me rastin e ditës së Protestës së planifikuar të 20 Marsit, u bën thirrje anëtarëve dhe simpatizantëve të saj dhe gjithë qytetarëve të interesuar për fatet e vendit dhe proceset demokratike - që të marrin pjesë aktivisht në këtë Protestë Paqësore, që synon largimin nga pushteti të një klike që po i kundërvihet dita-ditës proceseve integruese dhe zhvillimeve demokratike në Shqipëri.

PLL është e vendosur për të intensifikuar me rrugë paqësore këtë protestë, deri në largimin përfundimtar të Nanos dhe pseudomaxhorancës nga pushteti, pa u larguar për asnjë çast nga sheshi - për t'u hapur rrugë zgjedhjeve të reja të parakohshme, si e vetmja alternativë për daljen nga kriza totale dhe rivendosjen e parametrave dhe standarteve demokratike në qeverisjen e vendit.

Princi Leka në Elbasan për Ditën e Verës

Në kishën "Shën Mëria" zhvillohet një meshë për nder të Familjes Mbretërore

Më 13 mars, me rastin e Ditës së Verës, Familja Mbretërore ka vizituar qytetin e Elbasanit. Në mungesë të Mbretit Leka i Parë, këtë herë i pranishëm, si përfaqësues i Familjes Mbretërore Shqiptare ka qenë Princi Leka, i shoqëruar nga përfaqësuesi i Oborrit Mbretëror, z.Fluturak Gërmenji. Fillimisht, për miqtë e nderuar, kryetari i bashkisë së qytetit të Elbasanit, z.Ardian Turku, ka rezervuar një pritje të ngrohtë, në të cilën, në emër të qytetarëve elbasanas, i ka uruar mirëseardhjen Familjes Mbretërore.

Të pranishëm në takim kanë qenë edhe nënkryetarët e bashkisë, zotërinjtë Ylli Llanaj dhe Albert Shopi, si dhe kryetari i Këshillit bashkiak të qytetit, z.Shefqet Deliallisi.

Me këtë rast, kryebashkiaku i Elbasanit i dhuroi Princit Leka librin e ri të enciklopedisë së qytetit. Princi Leka e falenderoi kryebashkiakun për mikpritjen dhe në emër të Familjes Mbretërore uroi qytetarët elbasanas për festën e Ditës së Verës.

Më pas, Princi Leka dhe personat që e shoqëronin, kanë vizituar Galerinë e Arteve të qytetit, për të vazhduar me një vizitë në lagjen "Kala", ku ndër të tjera, në Kishën "Shën Mëria", At Nikolla Marku mbajti një meshë të posaçme në nderim të Familjes Mbretërore Shqiptare.

Në vijim të vizitës së Tij, në kinema "Millenium", Princi Leka zhvilloi një bashkëbisedim me qytetarë të shumtë, të grumbulluar enkas.

Në përfundim, në mjediset e Kalasë, nga një grup simpatizantësh monarkistë u shtrua një drekë për nder të Familjes Mbretërore.

Korresp. i "Atdheu"

Spahiu, Basha, Kamberi dhe Tujani, takohen me drejtues të Shoqatave të të Përndjekurve dhe grevistët

PLL: Mbështesim fuqimisht të përndjekurit

Ditën e mërkurë paradite, kryetari i PLL z.Spahiu, nënkryetari Basha dhe sekretarët Kamberi e Tujani, shkuan në Selinë e Partisë Balli Kombëtar Demokrat për t'u takuar me drejtuesit e shoqatave të Ish të Burgosurve dhe të Përndjekurve Politikë, të cilët kishin organizuar një grevë urie 24-orëshe në ambientet e brendshme të selisë së kësaj partie, për të protestuar ndaj indiferencës së qeverisë e për të sensibilizuar opinionin publik lidhur me kërkeat ekonomike të Dëmshpërblimit të punës së detyruar dhe të papaguar të martirëve të Demokracisë dhe viktimave të Përndjekjes gjatë viteve të diktaturës komuniste.

Drejtuesit e shoqatave të tubuara dhe pjesëmarrëse në këtë grevë, zotërinjtë Adem Allçi, Tomorr Aliko, Afrim Haçi, Besim Ndregjoni, Agim Musta, zonja Lili Ndoci etj., i pritën me kënaqësi të madhe drejtuesit e lartë legalistë dhe i falenderuan thellësisht për solidaritetin e treguar vazhdimisht prej tyre. Ata shprehën vlerësime superlative për mbështetjen e vazhdueshme politike e mediatike të PLL për kërkesat e tyre të drejta e të shenjta, që janë njëkohësisht Kauza dhe thelbi i Demokracisë të cilën duam të ndërtojmë.

Në fjalën e tij përshëndetëse, në emër të lidershipit të PLL dhe mbarë legalistëve shqiptarë, z.Spahiu theksoi me modesti "detyrimin e drejtuesve dhe deputetëve të PLL për të përkrahur shtresën, pjesë organike e së cilës është edhe vetë kjo parti nacionaliste", e cila, sipas kryelegalistit, këtë qëndrim e ka "detyrim programor dhe statutor". Më pas z.Spahiu u bëri të ditur të pranishmëve përvojën e vendeve ish komuniste lidhur me rehabilitimin politik dhe ekonomik të antikomunistëve-martirë të Demokracisë, si dhe evidentoi përpjekjet e grupit parlamentar e lidershipit legalist për implementimin e akteve dhe konventave ndërkombëtare dhe ato të legjislacionit ekzistues shqiptar për "Dëmshpërblimin e kësaj shtrese, integrimin dhe rehabilitimin e saj Politik e fizik". Në vijim, lidhur me realizimin e këtyre objektivave, z.Spahiu shprehu skepticizmin e tij personal dhe të PLL "sa kohë që bijtë e ish persekutorëve të djeshëm janë në krye të pushtetit dhe me shumicën e kartonave e forcën e pushtetit sabotojnë të gjitha përpjekjet për integrimin e kësaj shtrese të martirizuar". "Por kjo nuk do të thotë se ne do të rreshtim përpjekjet dhe kursejmë energjitë tona për realizimin e këtyre objektivave politikë, ekonomikë e moralë", - u shpreh z.Spahiu.

Kryelegalisti u kërkoi gjithashtu përfaqësuesve të shoqatave dhe dhjetra ish të Burgosurve të Ndërgjegjes, të tubuar, që "të vazhdonin grevën dhe intensifikonin protestën e tyre me të gjitha mjetet demokratike, deri në realizimin e kërkesave, pasi për këtë do të kishin përkrahjen e pakursyer të të gjihë legalistëve shqiptarë". Për të ilustruar këtë mbështetje institucionale, z.Spahiu u bëri të ditur të pranishmëve edhe faktin se Kryesia e PLL kish "udhëzuar drejtuesit dhe Degët e PLL në rrethe, që të institucionalizojnë marrëdhëniet dhe të përkrahin fuqimisht grevistët e Urisë në të gjithë vendin".

Duke e përfunduar fjalën e tij, z.Spahiu i garantoi drejtuesit e shoqatave dhe grevistët e Urisë, se "do të kërkojnë me forcë që Deklarata e tyre të lexohet në seancën plenare dhe Parlamenti të detyrohet të mbajë qëndrim lidhur me Grevën kombëtare të Urisë të Ish të Burgosurve Politikë, në përmbushje të të Drejtave të tyre të shenjta e themelore". Kjo është përmbushje e detyrimit që Tempulli i Demokracisë ka për martirët e Lirisë e Demokracisë, që me luftën dhe qëndresën e paepur ndaj Diktaturës Komuniste mundësuan dhe shpejtuan ardhjen e Demokracisë dhe vendosjen e Pluralizmit Politik, të cilat për demagogji i artikulojnë e instrumentalizojnë edhe pasardhësit e baballarëve kriminelë në Kuvend dhe qeverisje", - shtoi z.Spahiu.

Më pas kryelegalisti i garantoi grevistët dhe drejtuesit e tyre se "personalisht dhe në emër të PLL" do të ntensifikonte aksionin politik e diplomatik për sensibilizimin e opinionit publik shqiptar dhe faktorëve ndërkombëtarë lidhur me kërkesat e tyre të drejta, "të aprovuara verbalisht, por të nëpërkëmbura nëpërmjet injorimit dhe zvarritjes edhe nga qeveritarët e papërgjegjshëm dhe drejtuesit e institucioneve të korruptuara të shtetit të Pseudomaxhorancës".

Më pas, drejtuesit e lartë legalistë u ndanë me grevistët e Urisë dhe drejtuesit e tyre, me premtimin e ndërsjelltë për t'u takuar sërish, për të bashkuar e institucionalizuar përpjekjet deri në realizimin kërkesave të parashtruara prej tyre.

Korresp. i "Atdheu"

Tiranë, më 17.03.2004

Shoqata Mbarëkombëtare për Integrimin e të Burgosurve dhe të Përndjekurve Politikë të Shqipërisë

Shoqata Kombëtare Antikomuniste Demokrate e Shqipërisë

Deklaratë

Sot, të Burgosurit, të Përndjekurit Politikë dhe trashëgimtarët e të pushkatuarve politikë - mbas një viti e gjysëm protestash paqësore, deklarojnë si më poshtë:

U bënë 13 vjet pluralizëm politik dhe Ne, pjesa fisnike e Kombit - Ish të Përndjekurit dhe të Burgosurit Politikë që përballuam Diktaturën më të egër në të gjithë Europën Juglindore, dhe që gjatë periudhës së tranzicionit demonstruam me moralin tonë më të lartë Tolerancën dhe Paqen - ndodhemi të paintegruar në shoqërinë shqiptare.

Sot, mbas muajve të gjatë protestash, Ne po futemi në grevë urie paralajmëruese, 24-orëshe, në të gjithë Shqipërinë, për të denoncuar mashtrimin dhe përçmimin e qeverisë shqiptare ndaj shtresës sonë.

Kërkesat tona të ligjshme ua bëjmë me dije opinionit kombëtar dhe ndërkombëtar, se po futemi në këtë grevë Urie për zbatimin e ligjeve dhe Kushtetutës.

Kërkojmë zbatimin e Kartës së të Drejtave dhe Lirive të Njeriut, të cilat, gjatë kësaj periudhe tranzicioni të shtresës sonë, nuk gjetën zbatim.

Kërkojmë zbatimin e Kushtetutës, zbatimin e Kodit Penal, zbatimin e Statusit të të Përndjekurve Politikë, që përcaktojnë në mënyrë taksative integrimin tonë në shoqërinë shqiptare.

Parlamenti shqiptar është kthyer në një vegël të qeverisë shqiptare dhe ka fiks 6 vjet që nuk po zbaton kushtetutën dhe ligjet në fuqi për të drejtat tona.

Bëjmë me dije trupin diplomatik të akredituar në Shqipëri, si dhe Këshillin e Europës, OSBE-në dhe Komitetin e Helsinkit, se ne, qëndrestarët dhe luftëtarët që i qëndruam diktaturës, që e paguam me 6.555 të pushkaktuar me gjyq e pa gjyq, me 17.500 të burgosur dhe me 22 mijë të internuar politikë, në mbrojtje të fjalës së lirë, në mbrojtje të lirisë, në mbrojtje të Paqes, në mbrojtje të Demokracisë euro-amerikane - ju kërkojmë që të detyroni qeverinë shqiptare të zbatojë kushtetutën e këtij vendi, për arsye se moszbatimi i kushtetutës e çon vendin në katastrofë.

Partive të djathta parlamentare, si dhe parlamentarëve progresistë tek Partia Socialiste, u kërkojmë të bllokojnë parlamentin derisa qeveria aktuale të zbatojë kushtetutën për integrimin tonë. Kushtetuta nuk mund të zbatohet vetëm për nomenklaturën e lartë të diktaturës komuniste dhe qeveritarët e majtë, por kushtetuta duhet të zbatohet për të gjithë qytetarët shiptarë, ndër të cilët jemi edhe ne-qytetarët fisnikë të këtij Kombi.

Presidenti i Republikës të ushtrojë kompetencat e tij për zbatimin e Kushtetutës. Mbas kësaj greve urie paralajmëruese, grevat dhe protestat tona do të jenë të papërballueshme nga kjo qeveri e papërgjegjshme.

Ne ftojmë qeverinë të reflektojë, ndryshe do të jetë vonë.

Komisioni i Grevës së Urisë

Afrim Haçi

Adem Allçi

Zhvilloi punimet konferenca VII-të e Degës së PLL Mat

Mat, rizgjidhet Besnik Murati

Eqerem Spahiu: Nano ka manipuluar 4 palë zgjedhje dhe dy referendume

Paraditen e së shtunës, më datë 13 mars 2004, në sallën e madhe të mbledhjeve në bashkinë e qytetit të Burrelit, zhvilloi punimet konferenca VII-të e Degës së PLL Mat. Në këtë konferencë, si të deleguar nga Qendra dhe të ftuar nga Dega lokale, merrnin pjesë edhe kryetari i PLL z.Spahiu, nënkryetari, z.Basha dhe sekretari i Senatit të Veteranëve legalistë, z.Seit Preni.

Punimet e konferencës i hapi nënkryetari i Degës së PLL Mat, z.Agim Selita, i cili, në emër të delegatëve dhe legalistëve matjanë, uroi për pjesëmarrjen dhe përshëndeti drejtuesit e lartë legalistë, për t'ia dhënë fjalën më pas nënkryetarit të Degës së PD Mat, z.Aqif Klosi, i cili përshëndeti konferencën në emër të demokratëve matjanë.

Në fjalën e tij z.Klosi u shpreh me tonet më të ngrohta për legalistët matjanë dhe drejtuesit e tyre, dhe në veçanti vlerësoi bashkëpunimin e frytshëm midis dy forcave politike lokale, çka sipas tij mundësoi edhe fitoren e thellë të arritur nga e Djathta matjane gjatë zgjedhjeve vendore të 12 tetorit. Gjithashtu z.Klosi vlerësoi edhe rolin e kontributin e PLL në rang kombëtar, duke e cilësuar atë si një "parti aleate të denjë në gjirin e opozitës dhe me peshë të konsiderueshme politike e morale". Përfaqësuesi i PD nuk la pa përmendur edhe trashëgiminë e shkëlqyer politike, qeverisëse e shtetformuese të PLL, duke vlerësuar me superlativa sidomos rolin e Mbretit Zog dhe rezultatet e shkëlqyera qeverisëse gjatë viteve të Mbretërisë Shqiptare, 1928-1939.

Pas z.Klosi, fjala e të cilit u prit me duartrokitje nga legalistët që kishin tejmbushur sallën, e mori fjalën për të përshëndetur konferencën kryetari i Degës së PR Mat, z.Riza Buci, i cili solli përshendetjet dhe urimet më të mira për legalistët matjanë në emër të drejtuesve lokalë republikanë dhe gjithë lidershipit të PR. Megjithë diferencat programore për formën e regjimit, z.Buci vlerësoi kontributin dhe angazhimin politik maksimal të PLL në gjirin e opozitës, duke përmendur bashkëpunimin e dy partive në nivel lokal e kombëtar "si shembull i frytshëm dhe hallkë e rëndësishme në lidhjet e fuqishme që burojnë nga programet e dy partive që aspirojnë demokracinë e vërtetë, duke bashkuar kontributet në gjirin e opozitës antikomuniste shqiptare". Edhe fjala e z.Buci ngjalli entusiazëm dhe u duartrokit nga legalistët.

Më pas z.Selita ia dha fjalën të deleguarit të Kryesisë së PLL, sekretarit të Senatit, z.Seit Preni, i cili u foli bashkëkrahinorëve me fjalët më të ngrohta dhe i uroi legalistët matjanë për rezultatet e arritura dhe punën e lavdërueshme në rritjen dhe konsolidimin e strukturave të bazës dhe mbarë Degës. Më pas z.Preni nuk la pa përmendur edhe disa nga dobësitë që ai, personalisht, kish konstatuar gjatë fushatës zgjedhore, vlerësime këto të përftuara nga kontakti i gjatë me strukturat dhe zgjedhësit, për shkak të angazhimit disajavor të tij në këtë Degë - për të dhënë ndihmë konkrete gjatë fushatës, sidomos në komunat Rukaj, Dërjan e Macukull. Z.Preni vlerësoi me nota të larta drejtuesit kryesorë të Degës, zotërinjtë Besnik Murati e Agim Selita, jo thjesht për vlerat e larta intelektuale dhe formatin politik të konsiderueshëm, por edhe për shkak të angazhimit të tyre maksimal dhe koncepteve të qarta drejtuese e organizative, që spikatën sidomos gjatë fushatës dhe që u konkretizuan me rezultatet e arritura, tashmë të njohura e të vlerësuara nga të gjithë legalistët shqiptarë dhe drejtuesit e lartë të PLL. Në fund z.Preni shprehu besimin se kjo konferencë do t'i çonte më tej arritjet në konsolidimin organizativ e strukturor të kësaj Dege dhe do të përzgjidhte drejtuesit më të mirë e më të aftë, për t'i çuar përpara arritjet e legalistëve matjanë deri në përmbushjen e objektivave politikë madhorë; fitoren e opozitës dhe restaurimin e Mbretërisë me në krye NMT Mbretin Leka i Parë.

Fjala e z.Preni u prit me kënaqësi nga legalistët matjanë dhe u duartrokit gjatë.

Më pas, z.Selita ia dha fjalën kryelegalistit matjan, z.Besnik Murati, i cili në emër të Komitetit Drejtues lexoi raportin e punës dy-vjeçare të kësaj Dege, që nga konferenca VI-të. Në qendër të këtij raporti-model për nga vizioni politik, konceptimi organizativ, tematika e gjerë dhe detajet ilustruese - ishte puna voluminoze e legalistëve matjanë dhe e forumeve drejtuese të Degës, si edhe momentet kryesore politiko-organizative të punës, sidomos pasqyrimi i saj para dhe gjatë fushatës së fundit. Në raport ishin analizuar me hollësi dhe transparencë, të metat e dobësitë, raportet politike ndërpartiake lokale dhe ato të Degës me Qendrën e partisë, si dhe shkaqet që kishin sjellë arritjen e një rezultati jo fort të kënaqshëm për legalistët matjanë gjatë zgjedhjeve të fundit. Ndonëse rezultatet zgjedhore të kësaj Dege janë më të mirat në shkallë vendi, z.Murati në raportin e tij shtjelloi mangësitë e punës dhe rezervat që legalistët matjanë kishin si objektiv për t'i eleminuar në të ardhmen, si dhe rrugët e mundësitë për arritjen e rezultateve më të larta në të ardhmen, sidomos pas krijimit të një përvoje të pasur zgjedhore.

Pas raportit u kalua në pikën pasuese të rendit të ditës - atë të pyetjeve dhe diskutimeve rreth raportit dhe për punën e Degës e strukturave drejtuese në përgjithësi. Me këtë rast e morën fjalën shumë diskutantë, të cilët bënë pyetje rreth raporteve ekzistuese midis strukturave të bazës së partisë dhe Komitetit Drejtues, si dhe rreth procedurave të ndjekura gjatë fushatës për përzgjedhjen e kandidatëve për kryetarë komunash dhe këshilltarë. Gjithashtu pati pyetje dhe diskutime rreth raporteve institucionale të vendosura midis këshilltarëve legalistë dhe atyre demokratikas e republikanë, në kuadër të kontributeve të përbashkëta opozitare dhe të luftës për shëndoshjen e punës dhe shërbimit ndaj interesave të komunitetit, zgjedhësve të djathtë dhe legalistëve në veçanti. Këto raporte u panë dhe u diskutuan sidomos në optikën e domosdoshmërisë dhe bashkëpunimit konkret gjatë fazës së konstituimit të këshillave vendore. Në fjalën e tyre, shumë diskutantë folën për problemet e brendshme organizative nëpër seksione e nëndegë, sidomos në kuadër të antarësimeve të reja dhe domosdoshmërisë së ristrukturimit dhe krijimit të raporteve të bashkëpunimit e bashkërendimit të punës dhe të llogaridhënies e lidhjeve midis strukturave të bazës dhe forumeve drejtuese të nëndegëve, deri tek Komiteti Drejtues i Degës.

Pyetjeve të sipërpërmendura u dha përgjigje konçize dhe tepër sqaruese z.Murati, i cili me zhdërvjelltësi arriti të drejtojë debatin, duke i dhënë hapësirë diskutimeve pasionante nëpërmjet fokusimit të tyre drejt tematikave kryesore dhe rendit të ditës, gjithmonë duke administruar me mjeshtëri kohën dhe produktivitetin e debatit të hapur e të sinqertë, ashtu sikundër dinë të diskutojnë legalistët matjanë.

Pasi u ezauruan të gjitha problemet dhe shqetësimet e natyrshme për punën, në mes të interesimit të pazakontë të delegatëve, z.Selita ia dha fjalën kryetarit të PLL z.Spahiu, i cili ndër të tjera, pasi përshëndeti legalistët matjanë në emër të kryesisë së PLL, shpjegoi shkaqet e daljes më vete të PLL gjatë fushatës zgjedhore të 12 tetorit.

Më pas z.Spahiu theksoi se "në rast se opozita merr pushtetin, PLL do të kërkojë nga PD dhe aleatët plotësimin e 4 shtyllave të programit të saj, si kusht për bashkëpunim, e të cilat janë: 1.Mbrojtja e interesave kombëtare dhe lufta pa kompromis për realizimin e aspiratave deri në zgjidhjen e Çeshtjes sonë Kombëtare. 2.Krijimi i kushteve dhe i infrastrukturës zgjedhore të konsoliduar, për realizimin e Referendumit për formën e Regjimit. 3.Dëmshpërblimin e Ish të Përndjekurve Politikë dhe krijimin e kushteve e të një kuadri ligjor të domosdoshëm për integrimin e tyre në shoqërinë shqiptare. 4.Kthimin fizik të pronave dhe kompensimin me troje në bregdet e sipas vlerës së tregut, të trojeve të pronarëve të ligjshëm.

Më pas z.Spahiu u shpreh me tonet më të ashpra për qeverinë Nano, duke e akuzuar atë si shkaktare të krizës totale që ka përfshirë shoqërinë shqiptare dhe vendin. Duke folur për protestën madhështore të 21 shkurtit, z.Spahiu theksoi se "zhvillimet i hodhën poshtë pretendimet" e socialistëve për gjoja "protesta të dhunshme" dhe "mbështetje të ndërkombëtarëve për qeverinë Nano".

Pasi u kujtoi të pranishmëve qëndrimet dhe deklaratat antikombëtare të kryeministrit, z.Spahiu e akuzoi atë si "prishës dhe manipulues të 4 palë zgjedhjeve dhe 2 referendumeve, që nga qershori i vitit 1997". Në vijim të fjalës së tij z.Spahiu evokoi periudhën e shkëlqyer të mbretërimit të Mbretit Zog, gjatë viteve 1928-1939, duke shtjelluar me argumenta avantazhet e Monarkisë dhe "mrekullinë shqiptare" të atyre viteve. Pastaj kryelegalisti argumentoi falsitetin e pretendimeve të pseudomaxhorancës për "reformat" dhe "politikat integruese", duke u kundërvënë atyre treguesit e rrënimit ekonomik dhe ngecjen e negociatave me BE.

Në fund të fjalës së tij, z.Spahiu foli për rëndësinë e pjesëmarrjes së qytetarëve në Protestën paqësore të 20 marsit në kryeqytet, dhe u kërkoi atyre pjesëmarrje masive - si kusht i domosdoshëm për rrëzimin e Nanos nga pushteti.

Me thirrjet: Rroftë populli i Matit; Rroftë NMT Mbreti Leka i Parë dhe "Rroftë Shqipëria Etnike", z.Spahiu e la podiumin i duartrokitur gjatë nga delegatët, për t'ia lënë radhën e përshëndetjes nënkryetarit të PLL, z.Murat Basha, i cili ndër të tjera theksoi: "Ne të gjithë kemi një detyrim të shenjtë: Organizimin e Referendumit për formën e Regjimit dhe vendosjen e Mbretit Leka në Fronin Mbretëror. Por kjo detyrë nuk mund të realizohet pa fuqizimin dhe rritjen e partisë, pa shtrirjen e saj në të gjithë skajet e vendit. Ne duhet të provojmë se dimë t'i ruajmë votat tona, pra, rrjedhimisht, edhe votat e Referendumit për Monarkinë. Ne legalistët duhet të rrezatojmë shpresë për vete dhe për mbarë shqiptarët, dhe kjo bëhet duke rritur PLL dhe rezultatet e saj. Unë nuk mund të pranoj që mundësitë tona në qytetin e Burrelit janë të tilla sa, ne, të marrim vetëm 163 vota, ndërsa Partia Republikane të marrë 171 vota, më 12 tetor.

Ju duhet t'i mbështesni forumet drejtuese dhe, në radhë të parë, z.Besnik Murati, sepse ai ka nevojë për mbështetjen tuaj. Ne duhet të fusim në të gjitha strukturat tona frymën e grupit dhe të punës në ekip, që të mundemi të shtojmë votat dhe rezultatet. Dhe kur PLL e legalistët të jenë më të fortë dhe më të shumtë, atëherë Referendumi dhe fitorja e tij do të jenë një formalitet, të cilin ne do ta firmosim për t'u kthyer shqiptarëve shpresën, prosperitetin dhe integrimin e vërtetë.

Rroftë Mbreti Leka i Parë", - e mbylli fjalën e tij, mes duartrokitjeve, nënkryetari legalist, z.Murat Basha.

Më pas u kalua në pikën e fundit të rendit të ditës, në atë të zgjedhjes së kryetarit të Degës dhe Komitetit Drejtues. Duke vlerësuar punën, rezultatet dhe kontributin e konsiderueshëm të z.Besnik Murati, delegatët, me konsensus të plotë e rizgjodhën atë kryetar të Degës së PLL Mat edhe për një mandat të ri, deri në konferencën e ardhshme. Po kështu, me konsensus, konform edhe statutit të partisë, u ra dakort që Komiteti Drejtues të zgjidhej sipas propozimeve nominale të kryesisë së Degës dhe me një përbërje prej 23 anëtarësh, nga të cilët 12 janë drejtues të nëndegëve.

Përveç drejtuesve të Senatit, Rinisë dhe Gruas, të cilët kooptohen konform statutit, delegatët zgjodhën ndërmjet 8 anëtarëve të Komitetit të ri Drejtues edhe dy intelektualë të spikatur e me moshë të re, që gëzojnë reputacion të padiskutueshëm dhe premtojnë shumë si politikanë të rinj, të aftë e me vizion.

Kjo konferencë i mbylli punimet mes entusiazmit të natyrshëm, duke shënuar një sukses të ri dhe kulmim cilësor në vazhdën e konferencave të suksesshme e model për nga niveli politik dhe shkalla e organizimit.

Korresp. i "Atdheu"

Mblidhet Komiteti Drejtues i PLL dega Tiranë

Legalistët e Tiranës, përgatitje serioze për 20 marsin

Kryetari i ri i PLL dega Tiranë z.Blerim Kamberi ka thirrur një mbledhje të Komitetit Drejtues të degës (KD) ku ka parashtruar disa detyra për mitingun e madh të së shtunës (20 mars). Kështu z.Kamberi në këtë mbledhje ka marrë aprovimin e anëtarëve të KD për mënyrën se si do të organizohet dalja në protestë dhe dekori i saj me flamuj, pankarta, portrete etj.. Në këtë mbledhje mori pjesë edhe Nënkryetari i PLL z.Murat Basha, i cili kërkoi një angazhim serioz të çdo anëtari të KD të degës Tiranë. Pas këtyre diskutimeve rreth mitingut të 20 marsit, u kalua në pikën tjetër të rendit të ditës që ishin propozimet për sekretar të degës. Pas propozimeve të bëra, u miratuan katër kandidatura për sekretar të degës: z.Xhemal Disha, zj.Gerta Toptani, z.Nevruz Ndregjoni dhe z.Neritan Kolgjini. Sipas statutit, kryesia e PLL në qendër zgjedh njërën nga këto kandidatura dhe e emëron për sekretar.

Më tej mbledhja kaloi në një raport informues për konferencën dhe për KD e ri të degës. Kryetari Kamberi i njohu të pranishmit me një platformë pune të cilën ai e ka përgatitur që para konferencës së degës, por në të cilën ai ka prezantuar një version të shkurtuar të saj. Në këtë numër gazete, më poshtë mund ta lexoni të plotë këtë platformë.

"Atdheu"

Platforma e punës e kryetarit të PLL dega Tiranë z.Blerim Kamberi

Kamberi: Skema ime për drejtimin e degës

Platforma ime është hartuar në funksion të një situate zgjedhore politike, për të rritur efiçiencën e strukturave të Degës së PLL Tiranë.

1.Puna do të përqëndrohet në krijimin e seksioneve të reja që, sëbashku me seksionet ekzistuese të mund të realizojnë objektivin që çdo qendër votimi t`i përgjigjet një seksion i PLL.

2.Dega jonë ka pasur arritje të admirueshme në institucionalizimin e veprimtarisë së saj. Tani do të përqëndrohemi në hartimin e një dokumentacioni për kontributin personal të çdo funksionari të Degës dhe kryetari nëndege, madje dhe të gjithë funksionarëve qendrorë dhe kujtdo që kontribuon për arritjet e Degës, në mënyrë që puna e kontributi i secilit të jenë të matshme. Kjo mënyrë do t'i hapë rrugën afirmimit të vlerave dhe do t'i presë rrugën pretendimeve dhe orekseve të kujtdo që synon të marrë privilegje të pamerituara.

3.Çdo anëtar i Komitetit Drejtues do të ketë të përcaktuar qartë, me shkrim, kompetencat dhe detyrat që lidhen me funksionin. Çdo anëtar i Komitetit Drejtues do të mbulojë dhe do përgjigjet për ecurinë e punëve në një pjesë territori të Degës.

4.Do të ngrihet një departament i posaçëm, me specialistë të spikatur të Degës, që do të kontrollojë, verifikojë dhe ndihmojë punën e të zgjedhurve të Degës sonë në pushtetin vendor.

5.Do të jetë përparësi e Degës puna për tërheqjen e intelektualëve. Do të synojmë parametra të tillë që Dega jonë të sigurojë kontigjente cilësore intelektualësh, për t'iu përgjigjur me dinjitet një lëvizjeje politike intelektuale të NMT Leka I.

6. Për të krijuar klimën e duhur për integrimin e intelektualëve, në Degën tonë do të krijojmë lobingjet (grupet), sipas profesioneve, si p.sh: ai i mjekëve, i juristëve, i inxhinierëve, i ekonomistëve, i arsimtarëve, i agronomëve, i artistëve etj..

7.Do të ndërtojmë marrëdhënie mirëkuptimi, bashkëpunimi dhe përkrahjeje të ndërsjelltë me grupet e interesit, si të Përndjekurit Politikë, ish Pronarët, grupet e biznesit, sindikatat, shoqatat, grupet studentore dhe OJQ-të. Në përkrahje dhe mbrojtje të interesave të tyre do të vemë në dispozicion të zgjedhurit lokalë, grupin parlamentar, konferencat e shtypit, protestat, shtypin e partisë, asistencën tonë nëpërmjet intelektualëve tanë të specializuar në fushat përkatëse etj..

8.Rinia është pjesa më vitale e shoqërisë dhe e çdo partie. Do të forcojmë prezencën tonë në universitete, nëpërmjet anëtarëve të forumet rinor legalist si Uatson Përleka në Universitetin Bujqësor, Gentian Kamberi në Fakultetin Ekonomik, Gerand Hysa e Genta Toptani në Akademin e Arteve; do të përqëndrohemi në inxhinieritë, në fakultetin e Mjekësisë dhe ato të Shkencave të Natyrës dhe Filologjik.

9.Do të aktivizojmë rininë e shkollave të mesme, si një bazë e fuqishme infrastrukturore për mitigjet e opozitës dhe për fushatat zgjedhore. Bazë për tërheqjen e tyre do të jenë aktivitetet e larmishme kulturore dhe argëtuese. Veprimtaritë rinore do të kenë si qëllim edhe promovimin e Princit trashëgimtar Leka II-të.

10.Do të siguroj projekte trainimi dhe kualifikimi të politikanëve të rinj në Institutin Demokratik Amerikan, me të cilin kam krijuar kredibilitet pasi kam kryer me rezultate të shkëlqyera kualifikimin 1-vjeçar. Do të siguroj trainime edhe në Institutin Republikan Amerikan, ku unë po vazhdoj një trainim dhe po krijoj marrëdhënie konfidenciale. Këto dy institucione janë më të famshmit në botë për kualifikimin e politikanëve të rinj.

11.Një vëmendje të posaçme do t'i kushtojmë festimit me solemnitet të datave të shënuara të Familjes Mbretërore Shqiptare dhe datave historike të Monarkisë dhe PLL-së. Do të japim maksimumin tonë që, të gjitha veprimtaritë që mund të zhvillojë NMT Leka I-rë, jo vetëm në territorin e Degës sonë, por kudo në Shqipëri - të dalin me sukses të plotë.

12.Do të gjallërojmë jetën dhe veprimtarinë e Forumit të Gruas Legaliste, duke angazhuar gra me potenciale intelektuale dhe energjike. Nuk mund të mjaftohemi vetëm me përpjekjet herë-herë mbinjerëzore të Vera Demës, Flutura Përlekës, Bardha Hoxhës, Dhurata Muratit, Jolldiz Tufinës e ndonjë tjetre.

13.Të integrohen dhe aktivizohen masivisht gra të moshës së mesme. Përsëri kemi një pikësynim strategjik që në veprimtarinë e gruas legaliste të promovojmë vlerat e Mbretëreshës Suzanë.

Tashmë kemi realizuar një lidhje me shoqata të grave, dhe në kuadër të një projekti po kualifikohen zonjat Flutura Përleka e Dhurata Murati. Në të ardhmen do ta zgjerojmë shumë rrjetin e grave që do të trajnohen e kualifikohen në fushën e politikës.

14.Do të synojmë që puna e Forumit Legalist të Veteranëve të mos mbetet barrë e rëndë vetëm për Seit Prenin e Hamit Kurtin, por të aktivizohen një masë më e madhe e veteranëve që gëzojnë shëndet të mirë dhe energji.

15.Do të vazhdojë me intensitet puna për integrimin në strukturat e P.L.L-së e komuniteteve të akomoduara në territorin e Degës sonë nga rrethet e vendit.

16.Do të ngremë një departament të posaçëm për këtë qëllim dhe do ta emërtojmë "Departamenti i Integrimit të Komuniteteve".

17.Do të punojmë për integrimin në strukturat tona të komuniteteve të shtresave shoqërore të prekura nga "Reformat e qeverisë socialiste, si Komuniteti i Ushtarakëve të Liruar nga Ministria e Mbrojtjes, nga Ministria e Rendit nga Gjyqësori etj.

18.Do të forcojmë lidhjen dhe bashkëpunimin me Degët e partive të tjera opozitare të Tiranës - pa kurfarë paragjykimi.

19.Do të punojmë për harmonizimin e brezave në P.L.L, për harmonizimin e komunitetit të Tiranës me të gjitha komunitetet e ardhura; për harmonizimin e intelektualëve e akademikëve me të gjitha pjesët përbërëse të Degës së P.L.L Tiranë.

20.Motoja e punës time do të jetë:

BASHKËPUNIM, MIRËKUPTIM, KOLEGJIALITET

Ju siguroj se do të justifikoj besimin tuaj!

Aktiv i zgjeruar i Degës së PLL Fier

Fier, tri parti monarkiste bashkohen me siglën "PLL"

Në një aktiv të zgjeruar të Degës së PLL Fier, ku morën pjesë edhe disa intelektualë me reputacion të këtij qyteti - tri Degë të partive monarkiste të Fierit u bashkuan nën siglën e PLL. Kështu, sipas informacioneve të marra nga drejtues të Degës së PLL Fier, Degët lokale të Partisë Konservatore dhe të Partisë Lëvizja Monarkiste - janë bashkuar me PLL dhe tashmë kanë pranuar të kenë për kryetar z.Rexhep Krasniqi, i cili u zgjodh në konferencën e fundit të Degës së PLL të rrethit të Fierit.

Ky unifikim i legalistëve dhe mbretërorëve fierakë, sipas burimeve tona - e ka bazën në rritjen e reputacionit të PLL e lidershipit të saj, si i vetmi formacion politik që zhvillon me konsekuencë luftën kundër neokomunizmit, që me qartësi e largpamësi politike e programore mbron kauzën e Monarkisë dhe restaurimin e saj, si dhe Çeshtjen tonë Kombëtare, ende të pazgjidhur.

Tashmë, anëtarët, militantët dhe simpatizantët e këtyre formacioneve në rrethin e Fierit, të bashkuar, e konsiderojnë të domosdoshëm unifikimin politik e programor, dhe këtej e tutje do të përmbushin sëbashku të gjitha detyrimet programore e statutore të përcaktuara nga PLL, duke bërë në të ardhmen jetë organizative brenda strukturave lokale të Degës së PLL Fier.

Me këtë akt unifikues, të nënshkruar edhe zyrtarisht në një dokument nga të tre kryetarët e degëve lokale, kapërcehen dasitë e pakuptimta të idealistëve me të njejtat synime e pikëpamje politike. Nga ana tjetër ky aksion politik është mirëpritur nga i gjithë opinioni politik e qytetar fierak, i cili sheh të mishëruara tek PLL dhe programi i saj, të gjitha aspiratat legjitime për rivendosjen e Monarkisë, zgjidhjen e Çeshtjes Kombëtare, zhvillimin e vendit dhe integrimin në të gjitha strukturat euro-atlantike.

Ky akt, i mbështetur moralisht dhe i përshëndetur nga intelektualë të shumtë, ka stimuluar një fluks të konsiderueshëm anëtarësimesh në Degën lokale të PLL, shprehje kjo e simpatisë dhe mbështetjes politike e elektorale gjithnjë në rritje për PLL dhe alternativën legaliste, në Fier dhe mbarë Shqipërinë.

Ky hap kurajoz e logjik, është mbështetur e përshëndetur gjithashtu nga të gjithë legalistët shqiptarë, të cilët shohin tek bashkimi i idealistëve dhe unifikimi i qëndrimeve - shpresën për arritjen e objektivave politiko-zgjedhorë të PLL dhe lidershipit të saj, në kuadër të Opozitës dhe të luftës pakompromis për rivendosjen e parametrave e standarteve demokratike, të nëpërkëmbura nga klika neokomuniste në pushtet.

Korresp. i "Atdheu"

Shqiptaroamerikanët, protestë para selisë së OKB

Mesazhe antikomuniste nga SHBA

Legalistët e SHBA-së kanë zhvilluar protestën e radhës kundër qeverisë neokomuniste të Fatos Nanos. Kjo protestë e shqiptarëve u zhvillua përballë selisë së OKB-së në sheshin Dag Hammarskjold Plaza të Nju Jorkut për disa orë rresht, të enjten datë 18 mars 2004. Përveç organizatorëve të Partisë së Legalitetit, kjo protestë është mbështetur nga federata panshqiptare "Vatra", nga shoqata e Shqiptaro-amerikanëve për Demokraci (që është PD e Tiranës me emër tjetër) si dhe përfaqësues të LDK-së. Spikeri i protestës ishte legalisti z.Arjan Boriçi.

Fjalën i pari e mori nënkryetari i "Vatrës" dhe kryetari i "Lidhjes Demokratike të Kosovës" z.Agim Rexha i cili, pas mitingut, u nis menjëherë për në Kosovë me rastin e trazirave atje. Pas tij fjalën e mori kryetari i Legalitetit në SHBA, z.Hakik Mena (fjalën e plotë të të cilit e keni në këtë numër gazete). Më pas mikrofonin e mori kryetari i "Shoqatës së shqiptaro-amerikanëve për demokraci" (PD) i cili tha se pa një bashkim me zemër të antikomunistëve të vërtetë nuk ka rrëzim të komunistëve...

Dr.Selaudin Velaj në fjalën e tij tha se komunistët i kanë bërë shqiptarët të tjetërsohen dhe se vitet e bukura të të parëve tanë na duken aq larg nga ana morale dhe e krenarisë kombëtare. Drejtori i televizionit të Michiganit, Bardhyl Ukcamaj u shpreh se ishte një nder për të, të merrte pjesë në një protestë që organizohet nga ajka e nacionalizmës shqiptare. Vetëm bashkëpunimi i antikomunistëve do të çojë në thyerjen e mafias se kuqe, - tha ai. Nacionalisti Luan Isufi nënvizoi nevojën e frekuencës së tubimeve të tilla për motivimin e shqiptarëve në tokën amë. Poeti Tahir Hysa, ashtu si çdo herë tjëtër, shënoi pikën kulmore të protestes me një poezi të spikatur antikomuniste. Ish kryetari i degës së PLL SHBA z.Ahmet Hoti mbylli fjalimet e protestës (të cilin e keni të plotë në këtë numër gazete).

Drejtuesi i protestës z.Arjan Boriçi, pasi i falënderoi pjesëmarrësit për angazhimin e tyre, më pas i ftoi ata të merrnin pjesë në tubimin që legalistët do të mbajnë me 11 prill tek Hilton Hotel në 42 Street në Manhattan.

Kjo protestë e radhës u zhvillua gjithashtu në kushte të këqija atmosferike (si edhe ajo para kësaj), me temperatura të ulëta, dëborë e akull, megjithatë shqiptaro-amerikanët nuk iu shmangën detyrimit të tyre për të kontribuar në rrëzimin e qeverisë neokomuniste të Nanos. Qëllimi i këtij tubimi ishte të sensibilizohen autoritetet amerikane dhe ato të OKB-së për shtypjen që ushtrohet ndaj antikomunistëve në Shqipëri, mungesën e demokracisë, mungesën e standandardeve minimale të jetesës si dhe lidhjet e qeveritarëve me organizata kriminale. Oratorët në fjalët e tyre theksuan se rrëzimi i Fatos Nanos dhe largimi i socialkomunistëve nga pushteti, është e vetmja rrugë për rregullimin e gjendjes së shqiptarëve. Në fjalët e parrullat e tyre ata kërkuan rikthimin e Mbretit Leka në fron si i vetmi personalitet që mund ta kthejë për së mbari fatin e shqiptarëve. Pas kësaj proteste, u shpërnda për mediat një deklaratë shtypi në shqip dhe anglisht. Kjo protestë u pasqyrua në mediat e shqiptaroamerikënëve dhe pati një johonë të ndjeshme. Mësohet se në ditët e ardhshme, shqiptarët e SHBA do të bëjnë një peticion për autoritetet e SHBA dhe OKB ku do të kërkohet ndërhyrja e tyre për largimin e socialkomunistëve nga pushteti në Shqipëri.

"Atdheu"

Deklaratë për shtyp e shqiptarëve të Amerikës Veriore

Denoncojmë regjimin mafioz të Nanos

Shqiptaro-amerikanët e zonës së treshtetëshit, të përfaqësuar tek Federata pan-shqiptare "Vatra", partia "Lëvizja e Legalitetit", "Forumi i shqiptaro-amerikanëve për demokraci", si dhe "Gjenerata e re shqiptaro-amerikane", së bashku me të tjerë të paangazhuar politikisht, mblidhen me 18 mars, ditën e enjte, para ndërtesës së OKB-së, në sheshin DAG HAMMARSKJOLD PLAZA (47 St./1 Ave) prej orës 11 AM deri në 3 PM që:

- të protestojnë kundër paaftësisë, ose më mirë të themi pavullnetit, të qeverisë kriminale komunisto-socialiste të Tiranës për nxjerrjen e vendit nga mjerimi, në të cilin ata së bashku me baballarët e tyre e zhytën për dekada me radhë. Ata dhe vetëm ata janë shkaku për situatën aktuale politike, ekonomike, morale dhe sociale në të cilën ndodhen shqiptarët.

-të denoncojnë korrupsionin që fatalisht e ka ngërthyer sistemin politik shqiptar. Vota tjetërsohet. Parlamenti përdhunohet. Gjykimet paguhen. Dogana vidhet. Kriminelët shëtisin lirshëm.

-të shprehin indinjatën e tyre ndaj qeverisë që nëpërmjet klaneve të veta mafioze pasurohet duke luajtur me jetën e të rinjëve shqiptar në ujrat e Adriatikut. Ngjarja e janarit është një shëmbull klasik.

-t'u bëjnë thirrje, këtu përballë godinës së OKB-së, qeverive të ndryshme të botës së qytetëruar, që, për një arsye apo tjetër, të mos bëhen mbështetëse të regjimit mafioz të Tiranës

-t'i kërkojnë popullit shqiptar t'i dali zot fatit të tij dhe të mos lejojë që një grup ish-të kuqësh të shkolluar të lërë pa të ardhme brezat që do të na pasojnë.

-të ofrojnë zgjidhje, të cilat duhet t'a kenë zanafillën tek sistemi politik. Është e vërtetë gjithçka thuhet për qeverinë sot. Por, ç'farë lejoi që kjo qeveri të rimarrë pushtetin? Ç'farë e lejon atë të mbetet në pushtet? Qeveria menjëherë duhet të jap dorëheqjen. Parlamenti duhet të shpërndahet. Të ngrihet një qeveri teknike me bazë sa më të gjerë, e cila do t'a çojë vendin, brenda vitit, në referendumin për formën e qeverisjes dhe pastaj në zgjedhjet e reja politike.

Rroftë kombi shqiptar

Fjala e kryetarit të PLL SHBA z.Hakik Mena në protestën e shqiptarëve para OKB

Qeveria Nano, qeveri kuislinge

Të dashur bashkatdhetarë!

Dëshiroj si fillim t'ju falënderoj për gjestin tuaj sa fisnik aq dhe kombëtar që keni treguar, duke marrë pjesë në këtë demostratë, të cilën e zhvillojmë në kuadër të mbështetjes së revoltës mbarë kombëtare kundrejt klikës komuniste-mafjoze e cila po këmbëngul dhe përdor çdo mënyrë për të qëndruar në pushtet. Në jemi mbledhur sot këtu perpara selisë së Kombeve të Bashkuara në sheshin Dag Hammarskjold per të denoncuar politikën antireformë, antivlerë, dhe antikombetare që ndiqet nga kjo pjellë komuniste e cila jo vetëm që po zbaton me përpikmëri direktivat e hedhura prej baballarëve të tyre të kuq, por edhe po i tejkalon parashikimet e tyre duke u shndërruar ne administrues klasikë të së keqes. Është po kjo klasë e kuqe që fatkeqësisht arriti te merrte peng situatën politike shqiptare në Mars të vitit 1997 në sajë të grykës së kallashit dhe të dirigjuar prej komiteteve terroriste të krijuara nen patronazhin ë agjenturave serbe, greke, italiane dhe shumë mafieve të ndryshme rajonale. Është po kjo klasë që terrorizoi popullin shqiptar, rrenoi dhe dogji gjithcka që kishte të bënte me institucionet shtetërore. Është po kjo klasë që mundësoi manipulimin e zgjedhjeve parlamentare dhe atë të referendumit nëpërmjet dhunës. Është kjo klasë e udhëhequr nga instiktet primitive të hakmarrjes, e cila pushoi nga puna dhe bëri presione dhe shantazhe deri në eleminimin e njerëzve që nuk i përkisnin të njëjtit ideal. Është po kjo klasë e cila vertetoi me së miri tradhtinë e saj e cila duke flirtuar me qeveritë serbe dhe greke krijoi skandalin e radhës nëpërmjet perversit Fatos Nano, i cili i dha dritën jeshile "Kasapit të Ballkanit" për të zbatuar politikën e tokës së djegur. Është po kjo klasë e udhëhequr nga kryekuislingu Fatos Nano i cili jo pa vetëdije i mëshoi edhe nji herë tezës se kryeqytet i Kosovës është Beogradi e jo Prishtina, e më vonë duke u deklaruar për një "republikë minus" për shtetin e Kosovës. Është po kjo klasë e cila do t'i kundërvihej institucioneve të Kosovës duke krijuar figura te rreme të frymëzuara prej ideologjisë së ML e duke transmetuar të njejtën metodë vëllavrasjeje si atë të luftës civile të 1944-ës e cila u zbatua prej krokodilit të kuq E.Hoxha nën përkujdesjen e D.Mugoshës e M.Popoviçit. Është po jo klasë e cila mundohet t'i bëjë karshillëk liderëve realë në Kosovë dhe që prej fillimit te luftës ka arritur të infiltrojë elementë të Shik-ut, të cilët janë përgjegjës të shumë turbullirave në Kosovë. Është po kjo klasë e cila me paturpësinë më të madhe krijoi palo-kushtetutën nën hyqmin grek dhe me arrogancën e tipit sllavo-komunist e aprovoi edhe pse numri i pjesmarrjes në votime ishte nën numrin e duhur per t'u kaluar. Është po kjo klasë kleptokratësh, e cila ka arritur kulmin e makutërisë së saj me vjedhjen e thesarit të shtetit, fenomen i cili nuk ndodhi as ne diktaturën 50 vjeçare.

Është po ky regjim kuisling, i cili me anë të premtimit të stilit të pabesë bizantin, i premtoi popullit shqiptar kthimin e parave të investuara në skemat piramidale dhe krijimin e mbi 100 mijë vendeve të punës e si përgjigjje populli mori varfërinë, skamjen, papunësinë, pasigurine, arsye këto që detyrojnë popullin tonë sot e kësaj dite të braktise atdheun e tyre në kerkim të një pergjigje për dilemën e mbijetesës. Është po kjo klase bolshevike e cila ka ardhë dhe qëndron ne pushtet në menyrën më ilegjitime duke manipuluar votën e lirë në sajë të aplikimit te formave nga më të ndryshme si për shembull; shkatërrimin e listës së zgjedhësve, ate të kodit zgjedhor e deri në kapjen flagrante të vjedhjes së kutive të votimit nga militantët e tyre të mbështetur nga policia e Shik-u. Është po kjo klasë sllavo-komuniste e cila nuk heq dorë nga mentaliteti stalinist e nuk pranon asnjë lloj rotacioni duke krijuar fenomenin me idiotesk atë të parlamentit të Dushkut gjatë zgjedhjeve parlamentare të 2001. Është po kjo klasë komuniste mafioze, e cila e udhëhequr nga padrino Fatos Nano kontrollon nje pjesë të mirë të kontrabandës së drogës, të trafikut të klandestinëve, të prostitucionit, dhe atë të kontrabandës së cigareve. Është po kjo klasë kuislinge, e cila me në krye kameleonin Fatos Nanon e ka kthyer Shqipërinë ne një shtojcë të Greqise duke i shitur kësaj te fundit pikat më nevralgjike të ekonomisë shqiptare e sidomos duke u bazuar ne faktin alarmues se kursimet e shqiptarëve janë në dore të fqinjvë tanë shovinistë, pasiqë shumica e bankave kontrollohen prej tyre. Është po kjo klasë kleptokratësh e cila i kanë vënë taksat më të larta popullit duke shndërruar në luks per ta edhe sigurimin e bukës, ujit dhe dritës. Është po kjo klasë e babëzitur që ka monopolizuar çdo biznes në mënyrën më te pandershme e të paskrupullt, dhe ka evituar çdo konkurrim të ndershëm me anë të ngritjeve të taksave, presioneve e deri eleminimit fizik të kundërshtarit te tyre, siç ishte rasti më i fundit me vrasjen e biznesmenit të Coca Colas në Fier. Është po kjo klasë e korruptuar e cila e udhëhequr nga i babezituri Nano kërkon me doemos të privatizoje disa nga pasuritë e rëndësishme shtetërore si p.sh, INSING, Albtelekom etj, para se të largohen nga pushteti. Është po kjo klasë kuislinge, e cila për të larguar vëmendjen e botës rreth demonstratave në Shqipëri dërgoi kryekuislingun e saj, politikanin më të urryer të popullit shqiptar dhe ideatorin e Kretës, për një vizitë të papritur në shtetin e Kosovës, me mision destabilizimin e situatës. Gjatë përfundimit të këtij fjalimi dje mbasdite mora lajmin e hidhur të vdekjes së një duzine shqiptarësh në Kosovë.

Duke analizuar gjendjen katastrofike që ndodhet Shqipëria ne si shqiptarë të diasporës i bëjmë thirrje popullit shqiptar të ngrihet në këmbë i madh e i vogël nga jugu në veri, derisa kjo klasë e përçudnuar komuniste mafioze, të shporret nga pushteti. Si zgjidhje e vetme të shihet bashkërendimi i të gjitha forcave reale kombëtare pse jo dhe marrjen në konsideratë të një ftese të drejtuar Mbretit Leka I për t'i ardhur në ndihmë situatës së mjerueshme duke ditur faktin që Ai është në gatishmëri të plotë ndaj kërkesës së popullit të tij. Unë besoj se është e pashmangshme dhe absolutisht e domosdoshme dorëheqja e qeverisë, krijimi i qeverisë teknike, caktimi i datës së mbajtjes së referendumit për vendosjen e qeverisjes, dhe më vonë zgjedhjet lira.

Rroftë kombi shqiptar!

Fjala e z.Ahmet Hoti, nënkryetar i PLL SHBA më mitingun para OKB

Mbreti Leka e vetmja garanci e së ardhmes

Të dashur motra dhe vëllezër!

Sa e sa herë, për dekada me radhë, kryesisht ne legalistët, kemi ardhur në këtë shesh për të kërkuar të drejtën e Kosovës si etni shqiptare. Sot mund të themi se, së bashku me shokë, disi ia dolem mbanë.

Fatkeqësisht sot kemi ardhur të shprehim neverinë me qeverinë totalisht të paaftë të Tiranës, e cila nëpërmjet koncensioneve antikombëtare kërkon t'u imponohet shqiptarëve.

Në sajë të qeverisjes së komunistëve dhe baballarëve të tyre, shqiptarët jetojnë në kushte të varfërisë morale, patriotike dhe materiale, si kurrë më parë në historinë e tyre.

Të parët tonë i kanë vërë hurin besëthyersit.

Qeveria e Tiranës po tallet me shqiptarët, po i shet ato. Ne e kemi ditur me kohë, por tani të gjithë shqiptarët e kanë kuptuar se komunistët s'kanë atdhe, prandaj duhet t'i shporrim sa nuk është vonë. Ata nuk kanë gjak shqiptari. Ata nuk duan t'ia dinë për lëvizje paqësore. Komunizmi zhduket me metoda komuniste, - ka thënë Arshi Pipa, dritë i dhashtë zoti shpirtit të tij. Të përdorura nga antikomunistët e vërtetë, - do të shtoja unë. me antikomunistë nuk kuptoj ish-komunistë antikomunistë.

Nuk është antidemokratike të përmbyset qeveria e një grupi joshqiptarësh të shkolluar të cilët kanë ardhur në pushtet me kallashnikovë, rrinë në pushtet me trafiqe droge, organesh dhe emigrantësh, e mendojnë të sigurojnë vazhdimësi nëpërmjet koncensioneve të hapura ndaj fqinjëve të jugut, koncensione të cilave shqiptarët do t'ia shohin sherrin në dekadat që pasojnë.

Tani disa fjalë për lidershipin opozitar. Nuk përmbysen komunistët duke i lajmëruar se do t'ju përmbysim. Na besoni ne, se ne ua kemi njohur të gjitha fytyrat! Ne kemi luftuar me to, ne jemi tradhtuar prej tyre, ne kemi luftuar kundër tyre, ne jemi gjykuar, vrarë, varur, burgosur dhe internuar prej tyre. Nuk përmbysen komunistët duke rënë dakord për president bunkerin, gjeneralin e Enver Hoxhës, si garant i paanshmerisë politike të shtetit. Nuk përmbysen komunistët duke i dhënë fjalën Mediut, një gjimnazisteje, apo atyre që i vunë zjarrin shtetit në 97-ën, para atij që përfaqëson ata që formuan shtetin e parë shqiptar, ata që dhanë jetën kundër sigurimsave të Enver Hoxhës me armë në dorë, atij që u burgos për 14 muaj pas pabesisë së 98-ës, vetëm dhe vetëm se Ai, Eqerem Spahija, mund të na përmendë emrin e Mbretit dhe atëherë populli do të fillojë të thërrasë për Mbretin.

Përgjigjja e socialistëve për mitingun e 21 shkurtit, nëpërmjet zëdhënësit të tyre Agasit, qe se nuk u ofruan zgjidhje. Sikur populli të kishte thirrur "Mbreti! Mbreti" atë ditë, atëherë dihet se askush nuk mund të thoshte se nuk janë ofruar zgjidhje.

Motra e vëllezër!

Mund të ketë dekada të tëra që "modernistëve" shqiptarë u jemi dukur të kaluar kohe. Sot e themi me gojën plot se zgjidhja e vetme politike është Shqipëria mbretëri kushtetuese.

Shqiptarët pikë së pari kanë nevojë për një platformë mbarëkombëtare. Atë e ofron Leka i Parë me titullin "Mbreti i Shqiptarëve".

Shqiptarët kanë nevojë t'u numërohen votat siç votojnë. Atë e ofron Mbreti.

Shqiptarët kanë nevojë për një garant të panjëanshmërisë së shtetit. Atë e ofron Mbreti.

Shqiptarët kanë nevojë për ndershmëri të gjyqësorit. Atë e ofron Mbreti.

Shqiptarët kanë nevojë për kryelartësinë dhe vlerat morale të humbura. Atë e ofron Mbreti.

Shqiptarët kanë nevojë për shpresë. Atë e ofron Mbreti.

Shqiptarët kanë nevojë për të ardhme. Atë e ofron Mbreti.

Rroftë Mbreti!

Vëllezër dhe motra!

Të lëmë mënjanë sedrën e sëmurë. Kundërshtarëve si ne ua kemi bërë hallall. Të bëhemi praktikë. Të lëmë mënjanë atë çka na udhëzojnë të huajt, qëllimet e të cilëve kurrë nuk mund t'i dimë. T'i mbështetemi asaj çka ka dhënë frute për ne shqiptarët: Mbretërisë, shpresës sonë të vetme. Të bëhemi trima, siç ishin të parët tonë dhe t'i dalim zot atdheut sa nuk është vonë. Raca jonë është e mbushur me shembuj të shkëlqyer mbijetese.

"Atdheu mbi të gjitha", - kjo duhet të jetë motoja jonë. Shpresoj të mos jetë e largët dita kur të gjithë së bashku të përshëndesim Lekën e Parë me kunorën si mbret i shqiptarëve tek kalon pragun e kësaj ndërtese që të nderohet nga të nderuarit e botës si përfaqësues i denjë i racës sonë.

Rrofshin e qofshin shqiptarët kudo që janë!

Rroftë Leka i Parë, Mbreti i Shqiptarëve!

Rroftë Kosova, kalaja e pathyer e racës sonë!

Rroftë Shqipëria Etnike!

Ndahet nga jeta Alemsha Muharrem Hudënishti

Pas një sëmundjeje të rëndë u nda nga jeta plot brenga para disa ditësh, e përndjekura politike nëna hallemadhe Alemsha Muharrem Hudënishti. Ajo lindi më 10 shkurt 1022 në fshatin Hudënisht të Pogradecit dhe ishte bijë e atdhetarit të shquar Muharrem Hudënishti. Vëllai i saj Besimi ka qenë një njeri mendjemprehtë e me mjaft reputacion në zonën e vet. Vëllai tjetër Nuriu ka qenë oficer i ushtrisë mbretërore dhe ka shërbyer me besnikëri në Gardën Mbretërore të Zogut. Dajallarët e së ndjerës kanë qenë patriotë me emër të krahinës së tyre. Pikërisht në këtë ambjent thellësisht shqiptar u lind dhe u rrit Alemshaja. Qysh në moshë të re ajo kishte fatin të dëgjonte kuvendet e burave trima e patriotë ku u edukua me frymën e atdhetarisë.

Në vitin 1942, zonja Alemsha u martua në Dobër, në një familje të lartë e atdhetare. Bashkëshorti i saj Riza Çela, ishte oficer me akademi ushtarake dhe shquhej për ndjenjat e tija patriotike. Pikërisht për shkak të këtij atdhetarizmi, këtë oficer të vyer të ushtrisë shqiptare, pushtuesit fashistë italianë e arrestojnë dhe e pushkatojnë në mënyrën më të pabesë. Ai, përveçse ishte në moshën më të bukur të jetës së tij, pati fatin e zi të pushkatohej pa mbushur 40 ditë nga martesa me Alemshanë. Në këto kushte Alemshaja kthehet në shtëpinë e prindërve, pranë vëllezërve dhe nuk u martua më kurrë në jetën e saj. Por e keqja e fati i zi nuk do të mbyllej me kaq për këtë grua fisnike e krenare. Me ardhjen në pushtet të diktaturës komuniste, asaj i pushkatuan të vëllanë Nuriun. Burgosën vëllanë tjetër Besimin me 25 vjet burg. Në vitin 1974, ajo do të pësonte edhe një tjetër goditje në zemrën e saj: komunistët i arrestojnë nipin e dashur Muharremin, (djali i Besimit) dhe e dënojnë për agjitacion e propagandë me 10 vite burg. Po atë vit, kësaj zonje të shumëvuajtur do t'i largohen nga sytë të gjithë njerëzit e vet më të dashur duke i internuar me të mëdhenj e të vegjël në "Uji i Ftohtë", Tallë dhe në Rehovë të Beratit. E mbetur e vetme dhe tashmë në një moshë të shtyrë, ajo do të detyrohej të përballej me jetën e "fshatit komunist". Ajo si "bijë armiku" nuk do të sajdisej me vizita e miqësira, sepse pushteti popullor e ndalonte një gjë të tillë. Për një periudhë 10-vjeçare ajo do të kalonte një jetë në vetmi të plotë derisa nipërit e mbesat u kthyen nga internimi. Për cilësitë e saj njerëzore, ajo nderohej nga të gjithë njerëzit duke e thirrur "Hallo". Ky emër u përgjithësua në mbarë Hudënishtin dhe respekti i kësaj krahine u tregua ditën e varrimit të saj, ku u shkulën të gjithë nga shtëpitë, për të marrë pjesë në varrimin e saj.

Në ceremoninë mortore ishin të pranishëm dhe nderuan kujtimin e kësaj nëne simbol, drejtues të ndryshëm të partive politike të Pogradecit e të Korçës si dhe të shoqatave të të persekutuarve dhe atyre atdhetare.

Arkëmorti i saj i mbuluar nga flamuri kombëtar dhe kurorat me lule, ia shtonin nderimin kësaj femre që mishëronte virtytet më të mira të racës shqiptare. Fjalimet që u mbajtën në këtë ceremoni, janë një tregues i nderimit që kanë njerëzit për figura humane të kalibrit të Hallo Alemshasë. Ajo do të kujtohet me respekt e nderim brez pas brezi për fjalët e saj të mençura, sjelljen e saj dinjitoze, si dhe mënyrën sesi i përballoi vështirësitë e disfatat e jetës.

"Atdheu"

___________________________

NMT Leka I - Mbret i Shqiptarëve prononcohet për Çështjen Çame

GREQIA TE HEQE LIGJIN E LUFTES ME SHQIPERINE

Zgjidhja e kësaj çështjeje është kthimi i popullsisë çame në pronat e tyre dhe rikthimi fizik i pronave me dëmshpërblimet përkatëse. Kërkohet që Qeveria e Greqisë të kryejë detyrimet ligjore për trajtimin e popullsisë çame

Opozita, si bartëse e përgjegjësive historike

Nga Astrit KOLA

Historia e Shqipërisë, në pjesët më të errëta të saj, është kronikë shekullore e punëve të ndyra të bukëshkalëve e qafirëve me pushtete, që kurrë nuk morën përgjegjësi mbi vete për fatet e vendit.

Të marrësh përgjegjësi mbi vete për fatet e vendit - do të thotë të vetprivohesh nga privilegjet, e të rrezikosh për të shpëtuar diçka sublime.

Përgjegjësia politike dhe misioni historik i Opozitës së sotme, është shpëtimi i vendit nga katastrofa graduale me anë të proceseve retrograde të pakthyeshme - ku po e zhyt banda e aventurierëve më të papërgjegjshëm që historia e pushteteve ka njohur deri më tash.

Grackat vdekjeprurëse të kantonizimit, helenizimit, rrënimit ekonomik dhe përjetësimit të pushteteve me anë të oligarkisë mafioze e korruptive, janë dhe do të mbeten për shumë kohë honet në buzë të të cilave shqiptarët enden si somnambuj.

Në një kohë që retrospektiva e '97-ës po rrënqeth sërish shqiptarët e lemeritur nga kokat e prera, nga haxharët dhe sëpatat e përgjakura, kasnecët e pushtetit ripërtypin përrallën e xhamit të thyer më 7 shkurt dhe fetishizojnë "etikën e munguar parlamentare", ndërkohë që Nano - sfidës mbarëpopullore i përgjigjet me trokitjen e gishtit të mesit në pupitrën e Kuvendit.

Nëse Opozita kish si qëllim vetëm t'ia "merrte në kthesë" Erionit dhe Kreshnikut, apo t'i kujtonte Karamanlisit aleancat spektrale e programore, ndërkohë që plakat e "Minoritetit" duan tabela greke nëpër udhët e Jugut - do të mbetet larg misionit dhe destinit historik.

Të mbeturit në mëshirën e humorit politik të Vangjelit andart dhe terrorit mediatik e verbal të Nikolas Gejxhit - i shërben atyre që janë në pushtet dhe jo asaj që kërkojnë shqiptarët.

Nëse ambasadori grek kërkon "harrimin e së kaluarës", ndërkohë që Harallamb Karathanos i incidentit të Himarës bën kryekëshilltarin e Kryeministrit të Greqisë, kjo nuk do të thotë se ata kanë në dorë që, me një të rënë të lapsit, të largojnë PLL dhe Ballin Kombëtar nga formacionet e Opozitës dhe nga skena aktive politike, për të squllur më pas edhe vendosmërinë e tyre në luftën pakompromis për shporrjen e pseudomaxhorancës nga pushteti dhe shpëtimin e shqiptarëve nga kthetrat e kolonizimit.

E nëse ndokush, sado i fuqishëm dhe fantazist qoftë - mendon se, me shkop magjik, do t'i shndërrojë demonstruesit e 20 Marsit në festivalistët e dikurshëm që baritnin me qemane në dorë nëpër rrugët e Gjirokastës gjatë ditëve të Festivaleve Folklorike - nxitohet dhe gabon.

Tashmë Opozita nuk mund të kthehet pas, sepse nuk ka rrugë tjetër. Ndryshe, përse na hyn në punë Opozita!!!

Eshtë herët akoma - që objektivat politikë të Opozitës të mbeten për t'u gjykuar apo nën mëshirën e Elsës, Kujtimit, Kozarës, Dianës dhe përkthyesit Pirro Mishi.

NMT Leka I - Mbret i Shqiptarëve prononcohet për Çështjen Çame

Greqia të heqë ligjin e luftës me Shqipërinë

Zgjidhja e kësaj çështjeje është kthimi i popullsisë çame në pronat e tyre dhe rikthimi fizik i pronave me dëmshpërblimet përkatëse. Kërkohet që Qeveria e Greqisë të kryejë detyrimet ligjore për trajtimin e popullsisë çame

Pas daljes nga spitali, mbas operacionit, NMT Leka I - Mbret i Shqiptarëve është prononcuar për mediat ku ka theksuar se për Çështjen Çame si hap i parë duhet arritur të hiqet ligji i luftës që mban Greqia në fuqi. Në një intervistë për një televizion të Tiranës, ai është shprehur edhe për situatën politike në vend dhe kryesisht për mënyrën se si mund të dilet nga kriza ku e kanë futur vendin socialistët në pushtet. Gjatë intervistës ai ka thënë edhe një fjali për çështjen e pronave, të cilën e ka fokusuar televizioni që ka bërë intervistën, duke anashkaluar gjërat thelbësore që ai ka thënë. Duke qenë se dy çështjet e mësipërme janë përmendur shkarazi në kronikën e dhënë, Zyra e Shtypit e Oborrit Mbretëror ka publikuar një deklaratë shtypi ku saktëson qëllimin e asaj interviste të Mbretit.

Në deklaratë theksohet se si hap i parë i zgjidhjes së Çështjes Çame është: "abrogimi i Ligjit të Luftës, i cili mbahet juridikisht në mënyrën më absurde nga Greqia. Nuk mund të realizohet zgjidhja e Çështjes Çame pa abrogimin e Ligjit të Luftës," thuhet në deklaratë. Po ashtu në deklaratë potencohet ideja se duhet "realizuar kthimi i popullsisë çame në pronat e tyre dhe rikthimi fizik i pronave me dëmshpërblimet përkatëse."

Në lidhje me situatën politike në vend deklarata thotë se duhet: "kërkuar që çdo shqiptar të votojë për të ushtruar të drejtën sovrane të shtetasit të lirë dhe të mos lejojmë manipulimin e verdiktit të popullit".

Mbreti Leka i Parë pritet që së shpejti të fillojë një aktivitet politik të plotë pas rikuperimit total të shëndetit. Operacioni që ai bëri në këmbë, shkaktoi anullimin e një konference shumë të rëndësishme shtypi në "Hotel Sheraton" e cila gjithsesi u realizua nga zyrtarët e Oborrit Mbretëror. Pas daljes nga spitali, u njoftua se Mbreti së shpejti do të aktivizohej më fort në jetën publike përmes konferencave të shtypit apo takimeve publike. Njoftime nga Oborri bëjnë të ditur se ai tani gëzon shëndet të mirë dhe fraktura e kofshës është në mbyllje e sipër. Aktivizimi i tij publik pritet të shtojë përkrahjen e publikut shqiptar për monarkinë. Pas pak ditësh janë datat historike të prillit dhe mendohet se Mbreti do t'i shfrytëzojë këto raste për të vendosur kontakte më direkte me përkrahësit e tij.

N.Kolgjini

Njoftim për shtyp i Zyrës së Oborrit Mbretëror Shqiptar

Të mbështetemi gjithmonë në Idealin Kombëtar

Në datën 7 mars është transmetuar një kronikë televizive me NMT Mbretin Leka I, e cila ka pasqyruar jetesën e Familjes Mbretërore Shqiptare. Në këtë intervistë NMT Mbreti Leka I është prononcuar edhe për disa probleme të rëndësishme, të cilat po i paraqesim në këtë njoftim për shtyp.

Për Çështjen çame:

"Trajtimi i popullsisë Çame, që përbëhet nga popullsia çame ortodokse, që jeton në Greqi dhe nga popullsia çame muslymane, që është dëbuar forcërisht nga pronat e tyre, me genocidin e njohur të Luftës së Dytë botërore, është një çështje e pazgjidhur, të cilës po i rikthehet edhe Kuvendi i Shqipërisë. Ne mendojmë se hapi i parë për zgjidhjen e Çështjes Çame është abrogimi i Ligjit të Luftës, i cili mbahet juridikisht në mënyrën më absurde nga Greqia. Nuk mund të realizohet zgjidhja e Çështjes Çame pa abrogimin e Ligjit të Luftës.

Zgjidhja e kësaj çështjeje kryhet duke realizuar kthimin e popullsisë çame në pronat e tyre dhe rikthimin fizik të pronave me dëmshpërblimet përkatëse. Nga ana tjetër, kërkohet që Qeveria e Greqisë të kryejë detyrimet ligjore për trajtimin e popullsisë çame, arvanitasve, etj., si pakica kombëtare (minoritete), që jetojnë në Greqi, sipas Konventës Europiane dhe Deklaratës Universale."

Për situatën e sotme politike:

"Ka shumë të rëndësi që të punojmë të gjithë bashkë për rimëkëmbjen e Kombit Shqiptar dhe të dinjitetit të tij me të gjitha format dhe mjetet demokratike, duke kërkuar që çdo shqiptar të votojë për të ushtruar të drejtën sovrane të shtetasit të lirë dhe të mos lejojmë manipulimin e verdiktit të popullit. Ne na duhet që të punojmë bashkërisht, mbi bazën e Idealit Kombëtar, për zgjidhjen e Çështjes Kombëtare dhe për realizimin e aspiratave të Kombit Shqiptar, duke bashkëpunuar për sigurimin e qeverisjes mbi bazën e Ligjit dhe të interesave të të gjithë shqiptarëve, për ringritjen e ekonomisë mbi bazën e pronës, si një ekonomi moderne e tregut të lirë, duke u integruar me dinjitet kombëtar."

Ju faleminderit për mirëkuptimin!

Konferencë shtypi e kryetarit të PLL, pas zhvillimeve zhgënjyese në Beograd

Spahiu: Qeveria dhe institucionet të dënojnë deklaratat e Koshtunicës

Paraditen e së hënës, më datë 08.03.2004, në sallën e Konferecave të Shtypit të Kryesisë së Kuvendit, kryetari i Partisë Lëvizja e Legalitetit e njëkohësisht anëtar i Komisionit të Politikës Jashtme të Kuvendit të Shqipërisë, z.Ekrem Spahiu, dha një konferencë ku lexoi një deklaratë për mediat e shumta të pranishme. Në qendër të prononcimit të tij, z.Spahiu kish evidentimin e gjendjes së tensionuar të krijuar në rajonin e Ballkanit pas zhvillimeve negative dhe ndryshimeve zhgënjyese në Beograd pas fitores së Koshtunicës dhe deklaratës së tij për "kantonizmin e Kosovës".

"Deklaratat e Koshtunicës për 'kantonizimin e Kosovës', shprehin në mënyrë të kamufluar objektivin e vjetër të Serbisë për mbajtjen e Kosovës nën sundimin kolonial serb", - u shpreh kreu legalist.

Në vijim të prononcimit të tij, z.Spahiu deklaroi se "Koshtunica, duke paraqitur tezat e Millosheviçit, por edhe duke pranuar të marrë mbështetjen e Partisë Socialiste serbe në Parlament - konfirmon se udhëhiqet nga mentaliteti i tij prej paramilitari veteran, pavarësisht paraqitjes me kostum prej nacionalisti të moderuar".

Më pas kryetari i PLL falenderoi dhe mbështeti reagimin dhe dënimin e menjëhershëm të deklaratave të Koshtunicës nga Komuniteti Ndërkombëtar dhe në këtë frymë u kërkoi qeverisë dhe institucioneve shqiptare që të denoncojnë e dënojnë publikisht këto deklarata të rrezikshme, të cilat sipas kreut legalist "janë në kundërshtim me investimet e Bashkëdsisë Ndërkombëtare për Paqen dhe Stabilitetin në Evropën Juglimdore dhe Ballkanin Jugperëndimor dhre me politikat integruese në BE".

Pas deklaratës, gazetarët e shumtë bënë pyetje sqaruese, të cilave z.Spahiu iu përgjigj duke shuar kureshtjen e tyre.

A.K.

Deklaratë për mediat e kryetarit të PLL Spahiu

Koshtunica paraqet tezat e Millosheviçit

Fillimisht dua t'ju uroj të gjitha nënave dhe motrave shqiptare: Gëzuar ditën e 8 Marsit, dhe që vitet e ardhshme të sjellin mbarësi, lumturi e realizim të aspiratave të tyre sublime e të meritura, si pjesa më e rëndësishme e shoqërisë dhe gjysma e saj.

Partia Lëvizja e Legalitetit dhe Grupi i saj Parlamentar, konstatojnë me shqetësim të thellë se ndryshimet politike në Beograd po sjellin një kthim prapa në politikën evjetër antishqiptare të qarqeve ultranacionaliste serbe lidhur me Kosovën dhe raportet ndërshtetërore të Serbisë me vendet fqinje.

Zëri ynë është i prerë, i fortë dhe i qartë: se vetëm Pavarësia e Kosovës është zgjidhja më e mirë për të sjellë e siguruar Paqen në rajon, dhe rruga që do të hapë perspektiva për zhvillim ekonomik.

Deklaratat e Koshtunicës për "kantonizimin e Kosovës", shprehin në mënyrë të kamufluar objektivin e vjetër të Serbisë për mbajtjen e Kosovës nën sundimin kolonial serb.

Koshtunica, duke paraqitur tezat e Millosheviçit, por edhe duke pranuar të marrë mbështetjen e Partisë Socialiste serbe në Parlament - konfirmon se udhëhiqet nga mentaliteti i tij prej paramilitari veteran, pavarësisht paraqitjes me kostum prej nacionalisti të moderuar.

Fakti që deklaratat e Koshtunicës për Kosovën u denoncuan në mënyrë të menjëhershme nga Departamenti Amerikan i Shtetit, Bashkimi Europian dhe institucione të tjera ndërkombëtare, dëshmon se politika e tij dhe e qarqeve ultranacionaliste të Beogradit shkojnë në kundërshtim me investimet e Komunitetit Ndërkombëtar për Kosovën dhe Paqen në rajon, dhe njëkohësisht edhe me politikat integruese të BE në Evropën Juglindore dhe në veçanti në Ballkanin Jugperëndimor.

Në cilësinë e anëtarit të Komisionit të Politikës Jashtme, por edhe të partisë nacionaliste që përfaqësoj, i bëj thirrje Qeverisë dhe të gjitha institucioneve të shtetit shqiptar: Të bashkohen me qëndrimet ndërkombëtare ndaj çmendurisë nacionaliste koshtunico-millosheviçiane dhe të denoncojnë menjëherë para gjithë Komunitetit Ndërkombëtar këto qëndrime që rrezikojnë Paqen dhe Stabilitetin në Ballkan.

Sekretari i Marrëdhënieve me Publikun z.Blerim Kamberi takohet me përfaqësuesit e OSBE/ODIHR-it

Kamberi: Shqipëria qeveriset nga pakica e pakicës

Ditën e mërkurë, më datë 10 mars 2004, me ftesë të Misionit të Prezencës së OSBE në Tiranë, përfaqësuesi i PLL, sekretari për Marrëdhëniet me Publikun z.Blerim Kamberi, mori pjesë në tryezën e organizuar nga Misioni i Vëzhgimit të Zgjedhjeve me partitë politike parlamentare.

Përfaqësuesit kryesorë të Misionit të ODIHR-it, z.Xherald Mishel, z.Nikolai Vulçanov (kryetar i Misionit të vëzhguesve), dhe përfaqësuesi i kreut të ODIHR-it, z.Andreas Bruz, pasi përshëndetën të ftuarit për pjesëmarrjen bënë edhe një ekspoze të zhvillimit të zgjedhjeve në Shqipëri, ku folën edhe për ndihmesën që ka dhënë ODIHR-i në uljen e tensioneve politike dhe në asistencën për monitorimin e fushatës zgjedhore - ku janë konstatuar probleme të rënda në zhvillimin e procesit zgjedhor, të shprehura qartë në raportin përfundimtar të Misionit të Vëzhgimit të Zgjedhjeve.

Përfaqësuesi i PLL, z.Kamberi, në fjalën e tij përshëndeti rolin e OSBE-ODIHR-it në krijimin e një klime normale politike, para dhe gjatë fushatës së zgjedhjeve, në asistencën e tyre për krijimin e një infrastrukture zgjedhore, si dhe kontributin pozitiv të Prezencës së Misionit të Vëzhguesve në zgjedhje, ku ata patën rastin të konstatojnë qartë probleme që PLL i kishte parashikuar që në ndërtimin e Komisionit Bipartizan. Gjithashtu z.Kamberi ritheksoi se PLL kish kundërshtuar edhe mënyrën sesi ky komision procedoi për ndërtimin e një Kodi të stisur elektoral, ku partitë parlamentare të vogla jo vetëm që nuk patën hapësirë për të kontribuar, por u trajtuan thjesht si anëtare që formalisht ekzistonin në këtë komision.

Z.Kamberi u kujtoi gjithashtu drejtuesve të lartë të OSBE/ODIHR-it, se PLL edhe gjatë fushatës ka paraqitur me shkrim vërejtje esenciale për shkelje të rënda gjatë procesit zgjedhor, dhe sot ajo (PLL), konstaton me kënaqësi se këto vërejtje janë pasqyruar edhe në raportet paraprake e më pas edhe në raportin përfundimtar të organizmave monitoruese për zgjedhjet e 12 tetorit.

Në fjalën e tij z.Kamberi theksoi edhe denoncimin nga PLL të manipulimit të listave zgjedhore, njëanshmërinë e theksuar në mënyrën e ndërtimit të administratës zgjedhore në të gjitha nivelet, si dhe shumë probleme të tjera, që nxitën mungesën e pjesëmarrjes së qytetarëve në votime, duke përfshirë këtu edhe manipulimet gjatë procesit të votimit dhe numërimit të votave.

Duke komentuar masakrën zgjedhore, z.Kamberi shtoi se "... tashmë rezulton se Shqipëria qeveriset nga pakica e pakicës, ngaqë rezultatet e votimeve s'kanë asgjë të ngjashme me parimet për krijimin një qeverisjeje demokratike - pra në respektimin e vullnetit të shumicës".

Për këtë argument, z.Kamberi solli përpara përfaqësuesve më të lartë të Misionit të Vëzhguesve vërejtjet dhe sugjerimet e PLL, që konsistojnë:

1.Në ndryshimin e sistemit elektoral të parashikuar në Kushtetutë, në një sistem të pastër proporcional, ku do të shprehet në mënyrë të qartë vullneti i qytetarëve dhe do të identifikohet hapur forca e çdo subjekti politik në Shqipëri.

2.Në balancimin e Komisionit Qendror të Zgjedhjeve (KQZ)

3.Në pjesëmarrjen në administratën zgjedhore të të gjitha niveleve - të 7 partive të para për nga rezultatet.

4.Rishikimi i listave të votuesve dhe krijimi i Regjistrit Zgjedhor Kombëtar.

Në fund të fjalës së tij, përfaqësuesi legalist përshëndeti Misionin e Vëzhguesve të OSBE/ODIHR-it dhe shprehu me këtë rast besimin në rolin dhe ndikimin e tyre tek partitë parlametare shqiptare - për krijimin e standarteve demokratike zgjedhore, nga ku burojnë institucione të ligjshme e demokratike, që do ta afronin realisht Shqipërinë me standartet evropiane.

Fjala e këshilltarit legalist, z.Murat Basha, në mbledhjen e Këshillit bashkiak të kryeqytetit

Basha: Investime dhe taksa për banesa për të përndjekurit

Ditën e mërkurë, më datë 10 mars 2004, në Këshillin bashkiak të Tiranës u diskutua buxheti i bashkisë. Fjalën e plotë që nënkryetari i PLL z.Murat Basha, mbajti në këtë mbledhje, po e paraqesim më poshtë.

I nderuar z.kryetar i Këshillit bashkiak!

I nderuar z.kryetar i Bashkisë!

Të nderuar kolegë!

Meqenëse nga profesioni nuk jam ekonomist, fillimisht do t'ju kërkoj ndjesë për inkompetencën time në fushën e ekonomisë dhe, për këtë arsye, nuk jam futur në labirinthet e shifrave që ka ky buxhet voluminoz. Por unë dua t'i qëndroj strikt programit politik të PLL, si dhe angazhimit tim qytetar në të mirë të komunitetit, sepse ne legalistët primar kemi interesin e vendit, pastaj interesin e komunitetit dhe në fund kemi interesin e PLL.

Nisur nga këto parime, meqenëse ne të dy, z.kryetar i Bashkisë, kemi një eksperiencë jetese disavjeçare në Francë, dhe meqenëse ju dikur keni përmendur banesat popullore (me çmime blerjeje dhe qira të ulta), të cilat fatkeqësisht unë nuk i pashë më të përfshira në buxhetin tuaj, po sugjeroj disa mendime që besoj se i vlejnë këtij qëllimi, pra lehtësimit të barrës së strehimit.

Mos harroni z.kryetar dhe të nderuar kolegë se, përveç atyre që humbën shtëpitë në piramida, ka edhe shtresa të tjera që kanë nevojë për strehim, siç janë ata që banojnë në shtëpitë e pronarëve - të grabitura nga komunizmi pas Nëntorit 1944. Por çka është më e rëndësishmja, dhe që mua më shqetëson realisht, është problemi i të Përndjekurve Politikë - që vazhdojnë të jetojnë në kushte mizerabël. Këtë shtresë unë kam nderin ta përfaqësoj në këtë këshill dhe t'i përkas gjenetikisht e realisht, ndonëse fatmirësisht nuk banoj në kushtet e tyre.

Nisur nga ky fakt, unë ju propozoj që të përdoren fondet prej 10 milionë dollarësh që përmendi z.Blerim Çela - për ndërtimin e apartamenteve për të Përndjekurit, ku ata të konsiderohen primarë për t'u strehuar. Nëse për ndërtimin e apartamenteve për të Përndjekurit politikë nuk ka troje të lira, sikundër ju pretendoni, atëherë ju sugjeroj që të shfrytëzojmë përvojën e vendeve më të zhvilluara dhe konkretisht të Zyrihut të Zvicrës, ku unë besoj se shumë prej jush kanë qenë, ku do të vëreni se në qendër të Zyrihut, mbi lumin Linat janë ngritur parkingje të improvizuara, me pagesë e kosto të lirë për makinat.

Unë nuk e di se kush është plani i studios franceze për lumin e Lanës, por do t'ju sugjeroja, nëse egzistojnë mundësitë, që në të dy anët e urës kryesore tek Hotel 'Dajti' dhe në distancat e saj nga ura në urë - të ngrihen parkingje me elementë metalikë dhe me dërrasa, me dy ose tre kate, në të cilat do të parkonin detyrimisht të gjitha makinat që parkojnë sot në të dy anët e bulevardit të madh, si përpara dikastereve, tek ish Blloku, tek piramida etj.. Kështu, përveçse do t'i kthenim qytetarëve një qendër pa zhurmë dhe makina, e për të lëvizur lirisht, nëpërmjet taksës së parkingut bashkia do të mblidhte një shumë të konsiderueshme parash, e cila mund të shkojë deri në 1 milionë lekë në ditë.

Pikërisht këto fonde mund të përdoren për të blerë troje nga pronarët e ligjshëm dhe mbi to të ndërtohen banesa publike për të Përndjekurit e të tjerët në nevojë strehimi. Gjithashtu, të nderuar kolegë, më lejoni t'ju sugjeroj edhe diçka tjetër në lidhje me të ardhurat që mund të sigurohen prej bashkisë me destinacion ndërtimin e banesave publike osë blerjen e trojeve për të Përndjekurit.

Po t'i referohemi kohës së shkëlqyer të mendjendriturit Mbretit Zog, dhe po të hapim ligjet apo aktet nënligjore të kohës së tij, do të vërejmë se bizneset, lokalet ose shoqëritë që mbanin emra të huaj, paguanin deri 6 herë më shumë taksa sesa ata që kishin emra shqiptarë.

Duke parë se dukuria e vënies së emrave të huaj është përhapur shumë, mendoj se do të ishte një burim jo i vogël të ardhurash - vendosja e kësaj takse. Këtë e aplikon edhe Franca.

Nuk e them këtë për t'u treguar më nacionalist sesa jam në të vërtetë. Unë jam për integrimin në Evropë, duke vënë tek lokali emrin Bar Iliria dhe jo Bar Akropoli.

Ju faleminderit.

Zhvilloi punimet Konfereca III-të e Degës së PLL Librazhd

Basha: Drejtuesit pa rezultate nuk meritojnë të zgjidhen

Ditën e mërkurë, më datë 10 mars 2004, në një nga sallat e Pallatit të Kulturës së qytetit të Librazhdit zhvilloi punimet Konferenca III-të e Degës së PLL, në të cilën nga qendra ishin ftuar nënkryetari i PLL z.Murat Basha dhe sekretari për Marrëdhëniet Ekonomike, z.Artan Tujani.

Konferencën e hapi kryetari i Degës së PLL Librazhd, z.Liman Mënalla, i cili pasi përshëndeti drejtuesit e lartë të partisë, miqtë e pranishëm dhe delegatët-përfaqësues të legalistëve librazhdas, në emër të Komitetit Drejtues lexoi raportin e punës dy-vjeçare të Degës, që nga konferenca e kaluar.

Në fjalën e tij, z.Mënalla theksoi: "E zhvillojmë këtë konferencë për të bërë bilancin e punës së Degës për periudhën dy-vjeçare midis dy konferencave. Situata aktuale në vend karakterizohet nga kriza politike, varfëria e korrupsioni, dhe kleptokracia qeveritare po bën kërdinë. Taksat janë 2-3fish më të larta se në çdo vend të Evropës, ndërkohë që 2/3 e tyre vidhen nga qeveritarët, të cilët po e bëjnë të padurueshëm qëndrimin në Shqipëri të rinisë, që po e braktis vendin me e pa viza, me gomoine e skafe, duke mos marrë parasysh edhe vdekjen, si në rastin e tragjedisë së 9 Janarit. Po ikin nga Atdheu profesorë, inxhinierë, pensionistë, njerëz të profesioneve të ndryshme.

Po përse vallë bijtë e shqipes po e baktisin folenë e tyre? Kush përgjigjet për këtë zezonë? Kush është shkaku u këtij eksodi mitik?

Emri i tij është Qorr-ferman. Ai është arkitekti i fatkeqësisë së shqiptarëve, prandaj duhet të themi njëzëri "Nano ik". Kjo lëvizje duhet të shporrë nga vendi këtë horr, këtë diktator liliput që tallet me fatkeqësinë e shqiptarëve dhe punon kundër Kombit. Idetë e tij pasqyrojnë qartë strategjinë që ai ka në kokë - për ta bërë Shqipërinë si Qipro. Megjithë mjerimin, shumë shqiptarë e duan me gjithë shpirt vendin e tyre dhe duan ta bëjnë atë.

E Djathta është garancia e vetme politike për ta nxjerrë vendin nga katastrofa nanoiste. Tashmë bashkimi i së Djathtës është imperativ i kohës. Ka ardhur koha që populli të rikthejë vëmendjen tek Monarkia. Në kohën kur vendin e ka pushtuar errësira dhe mjegulla komuniste, Monarkia është e vetmja dritë dhe rreze shprese. Për të mbajtur gjallë këtë shpresë e këtë alternativë, në skenën politike shqiptare PLL po luan një rol të rëndësishëm dhe po kthehet në bartëse e shpresës për rilindje kombëtare. Ne jemi optimistë se një ditë shqiptarët do të votojnë njëzëri Monarkinë dhe kushtet për këtë po piqen me shpejtësi.

PLL, si parti parlamentare po rritet e konsolidohet politikisht dhe organizativisht çdo ditë - me strukturat e saj të shtrira në të gjithë vendin. Në radhët dhe forumet drejtuese të saj, militojnë intelektualë të shquar dhe me reputacion, që dinë ta përfaqësojnë dhe mbrojnë alternativën legaliste.

Në këtë linjë progresi, edhe Dega jonë, nga konferenca në konferencë ka patur rritje. Ne tashmë kemi 355 anëtarë të regjistruar dhe nëndegë në të gjitha komunat. Në Qendër, nëndega drejtohet nga z.Luan Buza. Në qytet, nga z.Gëzim Xhufa; në Hotolisht nga z.D.Qyra. Në Lunik nga z.I.Gega. Në Orenjë nga z.Selim Baboçi; në Prrenjas nga z.Fidai Skëndri; në Polis nga z.Ahmet Muzhaqi; në Rajcë nga z.Nazmi Zito; në Qukës nga z.Lefter Kryeziu dhe në Steblevë nga z.Estref Tupja. Po kështu, seksione kemi në të gjitha fshatrat e rrethit.

Kemi 21 anëtarë me arsim të lartë. Me arsim të mesëm kemi 13 anëtarë, ndërsa të tjerët janë me arsim 8-vjeçar. Gjithsej në Degën tonë militojnë 11 femra dhe 202 anëtarë janë nën 25 vjeç.

Pranë Degës sonë militon edhe Forumi Rinor legalist, me kryetar z.Gentian Rama dhe me sekretar z.Paqësor Meshka. Forumi i Veteranëve legalistë (Senati), drejtohet nga z.Seit Dosku, i cili meriton përgëzimet dhe respekt të veçantë për kontributin e tij për Degën dhe Legalitetin, megjithëse ka mbi supe 86 vjet.

Dega jonë e priti me shumë entusiazëm rikthimin e Familjes Mbretërore në Atdhe dhe për këtë krijuam një grup për pritjen e organizuar në Rinas më 28 Qershor 2002. Gjithashtu, një grup prej afro 20 legalistësh librazhdas bënë një takim të paharruar me NMT Mbretin Leka. Po kështu, legalistët tanë ishin prezentë edhe në Ceremoninë e Lamtumirës së Nënës Mbretëreshë Geraldinë

Fushata zgjedhore e 12 tetorit 2003 për pushtetin vendor, ishte sprovë dhe sfidë e vështirë, por njëkohësisht edhe dinjitoze, pasi PLL vendosi me të drejtë të dalë më vete.

Personalisht mendoj dhe jam i bindur se për nga organizimi, menaxhimi e propaganda, kjo fushatë ishte e përkryer, e krahasueshme denjësisht me atë të partive të mëdha.

Dega jonë e vlerësoi maksimalisht fushatën dhe krijoi shtabin zgjedhor, në krye të të cilit ishte kryesia dhe Komiteti Drejtues. Fillimisht morëm një zyrë me qira, dhe pastaj filluam me përzgjedhjen e kandidaturave për kryetarë të komunave, të cilët ishin ndër intelektualët më të spikatur të rrethit. Kandidatët tanë karizmatikë e cilësorë, u sulmuan nga të dy krahët dhe u vunë mes dy zjarresh.

Pas takimit entuziast për prezantimin e tyre, në të cilin një ndihmë të madhe dha prania dhe ndihma e drejtëpërdrejtë e kryetarit të PLL z.Spahiu - filluam punën për prezantimin e tyre me zgjedhësit.

Si Degë synuam të fitonim komunat Lunik e Qendër, ndërsa në komunat e tjera dhe në bashki vumë si objektiv të nxirrnim nga 2-3 këshilltarë, por dorëheqja në momentet e fundit e disa kandidatëve për shkak të presionit - na dëmtoi rëndë.

Dua të veçoj punën e mirë gjatë fushatës të zotërinjve L.Buza dhe D.Qyra, të cilët bënë punë të lavdërueshme për plotësimin e dokumentacionit. Po kështu, mjaft mirë punuan zotërinjtë I.Gega, S.Baboçi, F.Skënderi, Sh.Mënalla, B.Kojka dhe të rinjtë legalistë, por megjithatë rezultati i arritur ishte larg atij që ne dëshironim dhe parashikonim. Megjithatë, kjo fushatë e cila na evidentoi si parti nacionaliste e vlerave më të mira, e ngriti lart edhe prestigjin e Degës sonë para zgjedhësve.

Ndër shkaqet e humbjes do të rendisja:

1.Mungesa e përvojës zgjedhore, ngaqë ne konkurronim për herë të parë në nivel lokal.

2.Mungesa e komisionerëve në QV-të

3.Mungesa e theksuar e fondeve.

4.Presioni i gjithanshëm dhe terrori verbal ndaj kandidatëve dhe aktivistëve.

5.Mungesa e impenjimit të disa anëtarëve të Komitetit Drejtues dhe niveli i pamjaftueshëm i propagandës zgjedhore.

Por edhe puna ime si kryetar nuk ka qenë në nivelin e duhur. Kjo kryesisht për shkak edhe të ngarkesës sime të punës si mjek.

Sigurisht që përgjegjësia për këtë rezultat të dobët bie mbi çdo anëtar të Komitetit Drejtues, por në radhë të parë bie mbi mua. Unë para jush rrefehem si para Zotit.

E pranoj përgjegjësinë time dhe jam i hapur ndaj vërejtjeve dhe kritikave tuaja.

Unë parashtroj sot para jush dorëheqjen time të parevokueshme nga posti i kryetarit, si refleksion i përgjegjësisë për rezultatet e dobëta. Unë jam i mendimit se rotacioni i drejtuesve freskon partinë, përgatit drejtues të rinj dhe shton radhët e intelektualëve.

Unë pas dorëheqjes do të qëndroj në parti e do të punoj me përkushtim, duke ndihmuar drejtuesit e rinj. Monarkia është ideali im. Do të punoj e luftoj që NMT Leka I-rë të kthehet në Fronin që i takon, për të mirën e shqiptarëve dhe Kombit.

Ne legalistët do të arrijmë ta thyejmë konceptin e atyre që ende nuk e kanë kuptuar një gjë të tillë, megjithëse e dimë maksimën e famshme të Ainshtajnit se "më lehtë është të thërmosh një atom sesa të thyesh një mentalitet".

***

Pas z.Mënalla e mori fjalën për të përshëndetur konferencën - nënkryetari i Degës së PR Librazhd, z.Qemal Roçi, i cili pasi përshëndeti drejtuesit e lartë të PLL, ata lokalë dhe delegatët e pranishëm, theksoi: "Ju uroj suksese legalistëve librazhdas dhe kësaj konference, që mendojmë se do të nxjerrë drejtuesit më të mirë, e që do ta çojnë drejt suksesve në rritje Degën tuaj, me të cilën në rrethin tonë, ne republikanët kemi bashkëpunuar mjaft mirë në të kaluarën.

Baza jonë kërkon me insistim që këtë bashkëpunim ta ruajmë e forcojmë, madje ta shtrijmë në të gjitha nivelet, deri në ato më të lartat e lidershipit, për të mirën e të Djathtës - sepse edhe populli tashmë e ka kuptuar se me socialistët dhe aleatët e tyre në pushtet, ky vend nuk ka të ardhme", - e mbylli përshëndetjen e tij z.Roçi.

Pas fjalës së përfaqësuesit të PR, e morën fjalën diskutantë të shumtë, të cilët folën për problemet, vështirësitë dhe mangësitë e vërejtura kryesisht gjatë fushatës. Thelbi i diskutimeve konsistonte në faktin se mjerimi dhe detyrimi për të ushqyer familjet, e kishin zbehur aktivizimin e militantëve dhe anëtarësisë së partisë, ndonëse të gjithë shprehën gatishmërinë për të forcuar pjesëmarrjen në Lëvizjen mbarëpopullore "Nano ik". Njëkohësisht, të gjithë dskutantët theksuan domosdoshmërinë e forcimit organizativ të PLL dhe rritjen e anëtarësimeve me të rinj dhe femra, duke u krijuar mundësi forumeve përkatëse që të punojnë për rritjen cilësore të tyre.

Të gjithë diskutantët-delegatë, në emër të anëtarësisë u angazhuan se do të punonin sëbashku me forumet e zgjedhura për të rritur radhët dhe objektivat politiko-zgjedhorë të Degës dhe se në qendër të vëmendjes do të kishin forcimin e bashkëpunimit me njëri-tjetrin e forcimin e punës me njerëzit.

Më pas e mori fjalën sekretari për Marrëdhëniet Ekonomike pranë PLL, z.Artan Tujani, i cili ndër të tjera, duke folur me gjuhën e shifrave, bëri të ditur numrin e anëtarësisë dhe rezultatet zgjedhore të kësaj Dege, shifra këto që flisnin shumë dhe sugjeronin edhe objektivat që duheshin vënë nga forumet drejtuese që do të zgjidheshin nga konferenca. Më pas z.Tujani vazhdoi: "Dega juaj ka 53 seksione të raportuara me 355 anëtarë, dhe në zgjedhjet e fundit ju keni marrë vetëm 220 vota.

Nga 4 kandidatë për kryetarë komunash, ju keni marrë më shumë vota sesa nga 7 lista këshilltarësh të komunave. Kjo tregon se individët me reputacion thithin më shumë vota për partinë.

Dobësitë e evidentuara në raport, do të jenë padyshim objekt i punës suaj në të ardhmen - për përmirësimin e gjendjes nga ana e strukturave të reja drejtuese.

Unë kam besim se shumë shpejt ju do të dini të riparoni të metat dhe ta fusni punën organizative në shina të shëndosha e rezultative", - e mbylli fjalën e tij z.Tujani, pas të cilit e mori fjalën nënkryetari i PLL z.Basha, i cili ndër të tjera tha: "Rezultati i Degës suaj është i dobët dhe kjo u pasqyua edhe në raport. Personalisht mendoj se fiktiviteti dhe formalizmi kanë qenë shkaqet kryesore të këtyre rezultateve të dobëta, sepse ju nuk keni punuar sa duhet.

Në politikë luftohet jo vetëm me rezultate por edhe me alternativa mobilizuese - që thithin pjesëmarrje dhe shtojnë simpatizantët. Në këtë kuptim do të thoja se avantazhet programore të PLL janë tepër të spikatura brenda spektrit të Djathtë. PLL zotëron një pasuri të paçmueshme, që është trashëgimia shtetformuese, programore e qeverisëse që ne kemi që nga koha e lavdishme e mbretërimit të Mbretit Zog.

Ne legalistët jemi idealistë konstruktivë afatgjatë dhe këtë vizion po e paguajmë politikisht, pasi elektorati e ka të vështirë të kapë e kuptojë dimensionet e kësaj filozofie.

Pragmatistët e paduruar, me të cilët është mbushur politika, nuk janë në gjendje të sendërtojnë politika zhvillimi me themele të shëndosha dhe me efekte perspektive, pasi turren nga rezultatet e çastit. Për këtë arsye neve na presin sfida shumë të mëdha. Mjerimi deri në zgrip të ekzistencës është armiku më i madh i filozofisë tonë dhe Çeshtjes Kombëtare për të cilën ne luftojmë dhe ofrojmë zgjidhje.

Ne duhet të marrim në duar fatet tona, pra të ardhmen e Shqipërisë dhe të fëmijëve tanë. Në plan të ngushtë partiak kjo do të thotë të forcojmë partinë dhe ta shtrijmë atë në të gjitha njësitë zgjedhore, sipas motos "Një seksion për çdo qendër votimi".

Duhet të ndryshojmë stilin e punës aty ku nuk ka rezultuar i efektshëm dhe t'u ofrojmë bazës së partisë e zgjedhësve - filozofinë tonë, që është arma më e fuqishme e luftës politike. Pikërisht kjo kërkohet nga Komiteti i ri Drejtues dhe strukturat e tjera drejtuese në rrethin tuaj. E mirëkuptoj dorëheqjen e parevokueshme të z.Mënalla, dhe le të shërbejë kjo për të kuptuar se nuk mund të pranohet ambientimi me rezultate të dobëta dhe dështimi i atyre drejtuesve që akoma nuk e kanë kuptuar se duhet hapur rruga më të aftëve, sidomos aty ku mungojnë rezultatet. Megjithëse jam i bindur se z.Mënalla do të vazhdojë të kontribuojë dhe të japë ndihmesën e tij duke qenë në kryesi dhe Komitetin e ri drejtues", - e mbylli fjalën e tij nënkryetari legalist.

***

Më pas, konform rendit të ditës u kalua në zgjedhjen e kryetarit të ri të Degës dhe Komitetit Drejtues, ku për arsye të konsensusit të plotë të të gjithë delegatëve - si kryetar i Degës u zgjodh unanimisht mjeku i talentuar z.Dashamir Qyra, ndërsa nënkryetarë u zgjodhën z.Fidai Skënderi (kryetar i nëndegës së Prrenjasit), si dhe ish kryetari i Degës, z.Liman Mënalla.

Po kështu, me konsensus të plotë u procedua edhe për Komitetin Drejtues, i cili pasi mori miratimin e delegatëve, në mbledhjen e parë të tij, brenda në sallë, i propozoi kryesisë së partisë për sekretar të Degës së PLL Librazhd - aktivistin e palodhur e të dalluar të saj, z.Luan Buzi.

Kështu, konferenca III-të e Degës së PLL Librazhd, shënoi edhe një arritje të re në vazhdën e konferencave model që Degët e PLL kanë zhvilluar kohët e fundit - në kuadër të fushatës së zgjedhjeve të reja në parti, nga ku janë përzgjedhur forume tejet cilësore dhe drejtues të spikatur e me reputacion në radhët e legalistëve.

Korresp. i "Atdheu"

Zhvilloi punimet konferenca VI-të e Degës PLL Elbasan

Elbasani zgjedh prapë z.Bujar Çala

Paraditen e së djelës, në një nga sallat luksoze të Hotel Turizmit "Skampa" të Elbasanit, në një sallë të tejmbushur me dhjetëra delegatë të strukturave të Degës PLL të këtij rrethi, kryetarë të Degëve të partive të djathta të ftuara, si dhe simpatizantë të shumtë - u zhvillua konferenca VI-të e Degës, me praninë edhe të drejtuesve më të lartë të PLL; kryetarit të saj zotit Spahiu, nënkryetarit, zotit Basha, dhe kryetarit të Këshillit Kombëtar, zotit Nebi Ganellari.

Konferencën e hapi kryetarja e Forumit Rinor të Degës, e cila pasi falenderoi të pranishmit dhe sidomos drejtuesit e lartë të partisë, duke proceduar sipas rendit të ditës ia dha fjalën sekretarit të Degës, zotit Zenel Musollari, i cili, në emër të Komitetit Drejtues mbajti raportin e punës dhe të aktivitetit dyvjeçar të kësaj Dege, që nga konferenca V-të.

Në këtë raport zoti Musollari, me një sens të theksuar politik dhe me argumenta të karakterit tekniko-organizativ trajtoi të gjithë veprimtarinë e Degës gjatë periudhës në analizë, trajtesë kjo që krijoi një tablo të qartë për punën e legalistëve elbasanas dhe strukturave drejtuese.

Në raportin e punës vendin kryesor e zinte periudha e gjashtëmujorit të dytë të vitit të kaluar, që përkonte në kohë me vendimin e rëndësishëm të PLL për të dalë më vete në zgjedhjet vendore të 12 tetorit, vendim ky i marrë në Këshillin Kombëtar dhe i miratuar nga të gjitha strukturat drejtuese dhe Degët e rretheve. Pasi analizoi me imtësi punën e kujdesshme organizative të kësaj Dege për përgatitjen e dokumentacionit zgjedhor, përzgjedhjen e kandidaturave, parashtrimin dhe miratimin e tyre që nga baza e deri në Komitetin Drejtues - zoti Musollari u ndal në vështirësitë e mëdha që u ndeshën gjatë kësaj fushate, vështirësi këto të natyrave subjektive e objektive, nga brenda e nga jashtë Degës së PLL.

Më pas, sekretari i Degës konkludoi se "... dalja më vete e PLL në zgjedhje dhe rezultati zgjedhor i arritur, mundësuan futjen e pesë këshilltarëve legalistë elbasanas në këshillat e komunave dhe të një këshilltari në bashkinë e qytetit - kryetarin e Degës së PLL, zotin Bujar Çala.

***

Pas raportit u kalua në pikën e dytë të rendit të ditës, në përshëndetjet e drejtuesve më të lartë lokalë të partive të djathta, duke filluar nga kryetari i Degës së PD Elbasan, zoti Aurel Bylykbashi, i cili në fjalën e tij u shpreh: "Është kënaqësi e madhe të marrësh pjesë në këtë eveniment të rëndësishëm të një partie aleate, sikundër është konferenca VI-të e Degës së PLL Elbasan. Kjo kënaqësi buron nga fakti se PLL është një parti e djathtë e traditës historike, parti nacionaliste me përvojë të çmuar - që nga shtetformimi e deri tek drejtimi i shkëlqyer i shtetit shqiptar gjatë periudhës 1924-1939, drejtim që kulmoi sidomos gjatë periudhës së mbretërimit të Mbretit Zog I-rë.

PLL e ka treguar veten si një parti e vendosur dhe luftëtare pa kompromis në luftën kundër komunizmit e neokomunizmit - që në themelimin e saj e deri më sot në opozitë, ku militon denjësisht krahas PD dhe partive të tjera të spektrit opozitar, sidomos duke kontribuar fuqimisht në organizimin dhe drejtimin e Lëvizjes së Protestave mbarëpopullore nën moton "Nano ik".

PLL është një parti e traditës qytetare, e cila ka simpatizantë të shumtë dhe shtrirje të konsiderueshme në të gjithë vendin, sikundër edhe në rrethin tonë.

Dega e PD Elbasan e konsideron Degën tuaj të PLL aleate të rëndësishme dhe, në këtë kuptim, do të bashkërendojë me të punën dhe aksionin politik në të ardhmen - deri në rrëzimin e kësaj pseudomazhorance nga pushteti dhe fitoren e së djathtës, që tashmë është më e afërt se kurrë. Në emër të demokratëve elbasanas i uroj kësaj konference suksese dhe nxjerrjen e drejtuesve më të spikatur, të cilët do ta forcojnë Degën tuaj dhe do të bashkëpunojnë me ne në të mirë të së Djathtës opozitare", - e mbylli fjalën e tij kreu i Degës së PD Elbasan, zoti Bylykbashi, për t'ia lënë radhën kryerepublikanit elbasanas dhe njëkohësisht nënkryetar i bashkisë së këtij qyteti, zotit Albert Shopi, i cili në fjalën e tij përshëndetëse, ndër të tjera, theksoi: "I uroj suksese konferencës VI-të të Degës së PLL Elbasan, si edhe kryetarit të ri dhe drejtuesve që ju do të zgjidhni. Në emër të PR ju bëj thirrje që të forcojmë bashkëpunimin tonë në kuadër të së Djathtës, sepse mazhoranca e sotme nuk mund të largohet nga pushteti pa unifikimin e opozitës së djathtë antikomuniste".

***

"Partia 'Balli Kombëtar' dhe PLL janë dy parti nacionaliste të traditës sonë politike e historike, të cilat jo vetëm që janë ndër më të vjetrat, por edhe kanë mbajtur barrën e rëndë të luftës kundër komunizmit dhe neokomunizmit", - u shpreh kryetari i Degës lokale të PBK, zoti Gëzim Meçe në fjalën e tij përshëndetëse, për të vijuar "dy partitë tona janë parti të cilat e kanë të shenjtë Çeshtjen Kombëtare dhe e kanë shtyllë të programit të tyre. Gjatë diktaturës, ballistët dhe legalistët kanë luftuar bashkë, kanë vuajtur bashkë, kanë ditur të rezistojnë bashkë e të vdesin bashkë në emër të Atdheut, Kombit dhe Lirisë. Edhe sot na kërkohet që të jemi përsëri bashkë, deri në rrëzimin e klikës së kriminelëve neokomunistë në pushtet.

Ju uroj suksese dhe punë të mbarë për të mirën e opozitës, së Djathtës, Shqipërisë dhe Kombit shqiptar", - e mbylli fjalën e tij zoti Meçe.

***

"PLL është parti nacionaliste që ka luftuar e lufton për Kombin", - u shpreh në fjalën e tij sekretari i Partisë 'Bashkimi Liberal' për Degën e Elbasanit, zoti Ismet Llapushi, duke vijuar "ju uroj suksese legalistëve elbasanas dhe kësaj konference në luftën për konsolidimin e Degës suaj dhe për fitoren e shpejtë të së Djathtës".

Pas zotit Llapushi e mori fjalën për të përshëndetur konferencën sekretari i Degës së Partisë Demokristiane për rrethin e Elbasanit, zoti Nedai Kambo, i cili, ndër të tjera, në përshëndetjen e tij theksoi: "PLL është parti për Kombin dhe ka rrënjë të thella në Shqipëri. Ashtu siç dëgjohet zëri dinjitoz dhe qëndrimi i paepur i kryetarit tuaj, zotit Spahiu në parlament, uroj që po kështu të dëgjohet edhe zëri i legalistëve në të gjithë Shqipërinë. Ju uroj suksese në këtë konferencë dhe suksese PLL në të gjithë vendin, sepse kjo është në të mirë të kontributit dhe luftës sonë të përbashkët për rrëzimin e klikës së Fatos Nanos", - e mbylli përshëndetjen e tij kryedemokristiani lokal, zoti Kambo.

***

Më pas u kalua në pikën e tretë të rendit të ditës, në atë të pyetjeve dhe diskutimeve.

Për të nderuar delegatët, miqtë, drejtuesit e partive aleate dhe simpatizantët që kishin mbushur sallën, e mori fjalën kryetari i PLL, zoti Spahiu, i cili në fjaën e tij, ndër të tjera, theksoi: "I nderuar zoti Çala, të nderuar delegatë e të ftuar, të nderuar zotërinj drejtues të partive aleate të rrethit të Elbasanit. Konferenca VI-të e Degës së PLL Elbasan dëshmon më së miri se partia jonë tashmë është konsoliduar dhe bën jetë aktive organizative. Në vazhdën e traditës së krijuar ju bëj me dije se edhe konferenca e Degës së PLL Tiranë, që i zhvilloi dje punimet, ishte model për nga niveli i organizimit, nga fryma e debatit dhe e demokracisë së brendëshme brenda saj. Konferenca juaj mendoj se duhet të përqëndrohet kryesisht në analizën e punës dhe rezultateve të zgjedhjeve vendore".

Pasi argumentoi në mënyrë të detajuar arsyet e daljes më vete të PLL, zoti Spahiu u rikujtoi të pranishmëve kontributet e përbashkëta të PLL dhe PD në kuadër të luftës kundër neokomunizmit të restauruar, pas rebelimit të vitit 1997, duke përmendur faktin se "PLL e mbështeti PD në vitet e zeza të sundimit të socialistëve, që erdhën në pushtet me grykën e pushkës, sidomos në periudhën 1997-98, kur PD-në e braktisën edhe shumë nga drejtuesit e saj". Zoti Spahiu, më pas, solli në kujtesën e të pranishmëve faktin se PLL ishte një nga partitë kryesore të "Bashkimi për Demokraci" në vitin 2000, dhe "Bashkimi për Fitore" të vitit 2001, formacione opozitare këto që u krijuan si koalicione parazgjedhore për zgjedhjet vendore (2000), dhe zgjedhjet parlamentare (2001).

Më pas, pasi analizoi me hollësi mungesat, vështirësitë dhe dobësitë e fushatës së legalistëve shqiptarë e atyre elbasanas, me tone kritike të theksuara z.Spahiu deklaroi se "rezultatet tuaja do të ishin shumë më të larta nëse disa nga drejtuesit tuaj nuk do të luanin politikisht për interesa personale, duke iu kundërvënë interesave të partisë. Por në analizën tonë rezulton se shmangia nga përgjegjësitë politike, mosaktivizimi dhe, aq më keq, braktisja e partisë pikërisht në kulmin e fushatës nga disa anëtarë të Komitetit Drejtues të Degës suaj, i ngarkon ata me përgjegjësi të rëndë dhe ju faturon rezultatet e dobëta që ju arritët në zgjedhjet vendore të 12 tetorit.

Për ne është i papranueshëm fakti që në rrethin tuaj nuk u vunë kandidatë për kryetarë komunash në asnjërën nga 23 komunat e rrethit. Madje përgjegjësia juaj rritet edhe për faktin se ju, në shumicën e komunave, nuk vutë kandidatura as për këshilltarë. Kjo situatë dhe këto rezultate ju ngarkojnë të gjithëve ju legalistëve elbasanas me përgjegjësi, por kryesisht kryetarin e Degës suaj zotin Bujar Çala, i cili megjithëse kandidoi për kryetar bashkie në qytetin e Elbasanit, dy ditë para garës zgjedhore, të premten pasdite, deklaroi në TV Klan tërheqjen e tij nga gara, pikërisht në momentet kur mbaronte afati kohor i regjistrimit, dhe ne nuk kishim mundësi ta zëvendësonim atë. Kjo dorëheqje e befasishme mendoj se ka shkaqet e veta të thella! Por ajo që është më e rënda dhe më e papranueshmja - është efekti dhe pasoja negative që ky veprim solli në shkallë vendi, sepse u trumbetua dhe u përdor si dorëheqje nga gara, që, sipas rivalëve tanë, 'kryesoi dorëheqjet e kandidatëve legalistë në të gjithë Shqipërinë'. Kjo shpifje solli si rezultat dekurajimin e legalistëve në mbarë vendin dhe u reflektua në rezultatin e përgjithshëm të PLL në zgjedhjet e 12 tetorit. Në një kohë që kronistëve të TV Klan-it as që u binte ndërmend për Degën e PLL Elbasan, dhe as që e njihnin zotin Çala, për skupe mediatike e qëllime të tjera, ditën e deklarimit të dorëheqjes së tij u gjetën kamerat ku u fokusua zoti Çala me deklaratën e tij të tërheqjes nga gara. Kjo kronikë në mënyrë të menjëhershme u transmetua direkt e më pas edhe disa herë të tjera në lajmet e pasdites të së premtes së 10 tetorit.

PLL është parti që ka kultivuar dhe stimulon demokraci të gjerë brenda radhëve të saj. Por, mbi të gjitha, ajo shquhet për disiplinë të fortë dhe, në këtë drejtim, nuk bën e s'do të bëjë asnjë lëshim. PLL nuk është parti liberale. Ajo është parti konservatore dhe si e tillë, konform statutit e vendimeve të strukturave më të larta, ka marrë dhe do të marrë sanksione dhe masa ndëshkimore për të gjithë ata që shkelin statutin, programin dhe vendimet kolegjiale të partisë. Dega juaj, e cila ka sjellë në qendër shifrën prej 474 anëtarësh, më 12 tetor mori vetëm 1309 vota. Veteranët tuaj janë nderi dhe krenaria jonë e përbashkët. Ata janë bartësit e gjallë të amaneteve të të rënëve për Atdheun dhe Kombin. Por po aq të rëndësishëm janë për PLL edhe intelektualët, të cilët janë mendja dhe bartësit e vizioneve shtetformuese e qeverisëse të legalistëve e mbretërorëve. Intelektualët, të rinjtë dhe gratë legaliste - janë e tashmja dhe e ardhshmja e Legalitetit.

Ne jemi krenarë që legalistët tanë të Diasporës së Vjetër dhe të Re, në Bruksel e Nju Jork - u ngritën në krye të protestave kundër qeverisë Nano. Ne shpresojmë dhe jemi të bindur se kjo qeveri i ka ditët e numëruara. Qeveria e Përkohëshme që mendojmë se do të krijohet, do të ketë këto prioritete: kodin zgjedhor, listat zgjedhore, ndarjen territoriale, shqyrtimin dhe miratimin e ligjeve për Pronat dhe Dëmshpërblimin e të Përndjekurve Politikë.

Këtë maxhorancë që ka ardhur në pushtet me rrugë ilegjitime - shqiptarët dhe Opozita do ta rrëzojnë me vota.

Për socialistët 'pushteti buron nga gryka e pushkës'. Por pushteti shpesh këmbehet edhe nga dobësia e qeverisësve, apo fuqia e Opozitës. PS dhe aleatët e saj janë kundërshtarë shumë të dobët. PLL, si aleate e PD, do të këmbëngulë për realizimin e prioriteteve programore të saj. Të gjithë e pranojnë se në Shqipëri ka qenë instaluar diktatura më e egër e komunizmit Lindor, por harrojnë se barrën e Përndjekjes e kanë mbajtur të Përndjekurit - të cilët sot janë në gjendje të mjerueshme dhe pa mjete jetese, ngaqë maxhoranca nuk denjon t'i dëmshpërblejë për punën e papaguar në burgje dhe kampe.

Po në këtë gjendje të mjeruar ndodhen sot edhe Pronarët Legjitimë - sepse pronat e tyre u tjetërsuan dhe ata, sot, thjesht po mbijetojnë. PLL është për kthimin pa kushte të pronave dhe kundër Ligjit komunist Nr. 7501, i cili duhet abroguar sa më parë.

Legalistët kërkojnë Referendumin për formën e regjimit - sepse Referendumi i vitit 1997 u zhvillua nën grykën e kallashëve të bandave të rebelimit dhe, për pasojë, rezultatet e tij u manipuluan, megjithëse opcioni Monarkist fitoi.

Një nga kërkesat prioritare të PLL do të jetë mbrojtja me konsekuencë e interesave Kombëtarë - deri në zgjidhjen e plotë të Çeshtjes sonë kombëtare.

Karta e nacionalizmit jo vetëm që nuk e pengon, por i hap rrugën Shqipërisë për në Europë, sepse integrimi ynë në strukturat euro-atlantike mund të bëhet vetëm si Komb, dhe jo kështu, të copëtuar në pesë shtete. Në kuadër të zgjidhjes së Çeshtjes Kombëtare, PLL do të mbështesë me të gjitha forcat Çeshtjen e drejtë Çame, deri në fund dhe pavarësisht nga kosto politike e kohëzgjatja".

Më pas, në konteksin e raporteve midis aleatëve opozitarë, z.Spahiu theksoi se "PLL nuk ka hyrë në politikë për të qenë vasale brenda së Djathtës. Ajo do të pranojë vetëm partneritet - sepse PLL nuk është parti anonime, por parti që ka bërë historinë e Shqipërisë moderne, dhe që ka krijuar e para traditën e shtetformimit që ne trashëgojmë". "Të përgatitemi për 20 Marsin, për një pjesëmarrje sa më masive në Protestën që do të zhvillohet në kryeqytet dhe që do të shënojë fillimin e përmbysjes së qeversië Nano", - e mbylli fjalën e tij kreu legalist.

***

Më pas vijuan pyetje-përgjigjet dhe diskutimet, të cilat evidentuan dobësitë, mangësitë, problemet ekzistuese dhe kontributet personale e kolektive të legalistëve elbasanas.

Në diskutimin e tij, në përgjigje të kritikave, zoti Shpëtim Myftaraj deklaroi se nuk e pranonte akuzën se kish bërë fushatë për socialistin Hysen Domi. "Në PLL kam aderuar dhe kontribuar me dëshirë, nuk kam përfituar asgjë dhe as kam synuar për përfitime personale", u shpreh Myftaraj.

Në diskutimin e tij, i përndjekuri politik Mentor Cako, kërkoi "përkushtim dhe sakrifica për forcimin e Degës dhe rritjen e rezultateve".

Pas zotit Cako, diskutanti Osman Dauti theksoi: "Kemi punuar aq sa kemi patur mundësi, dhe fushata jonë ka qenë e vështirë kryesisht për shkak të mungesës së fondeve". "Ata drejtues që nuk kanë punuar e kontribuar, nuk kanë të drejtë të kandidojnë e të zgjidhen në forumet drejtuese, çka do të thotë se duhen zgjedhur vetëm ata që punojnë", - e mbylli diskutimin e tij zoti Dauti.

Në diskutimin që pasoi, sekretari i Marrëdhënieve me Publikun në Degën e PLL Elbasan, zoti Selman Çili, ndër të tjera, theksoi: "Pas zgjedhjeve të kaluara, të konferencës V-të, ku kryetar doli zoti Çala, fillimisht patëm mirëkuptim, por më pas filluan mosmarrëveshjet dhe vetëkënaqësia, deri në spostime të drejtuesve. Personalisht, gjatë fushatës kam kontribuar në komunat Labinot dhe Shirgjan. Rezultatet e dobëta janë pasojë e moskoordinimit të punës midis nesh. Shpresoj që kjo konferencë ta ndryshojë gjendjen, dhe drejtuesit e zgjedhur prej saj të vihen në pozita pune", - e mbylli fjalën e tij zoti Çili.

Në diskutimin e tij, kryetari i seksionit Labinot-Fushë, zoti Mehmet Murati, theksoi se përveç zonës së tij kish punuar në Labinot-Mal dhe Shmil. "Në Godolesh-Mengel mora mbi 200 vota", - theksoi ndër të tjera z.Murati, duke ia lënë radhën për diskutim veteranit legalist Xhemal Berisha, i cili theksoi se "... në Degë ekzistojnë probleme që duhen tejkaluar e kapërcyer". "Në punën time si kryetar i Senatit të Degës, kam synuar që jo vetëm të kontribuoj për zgjedhjet, por edhe të hedh bazat për struktura sa më të forta dhe rezultate sa më tëë larta në të ardhmen".

***

"Rezultatet janë pasqyrë për punën e dobët që kemi bërë", - tha në fjalën e tij legalisti i njohur elbasanas, zoti Gazmir Mehmeti.

Më pas e mori fjalën anëtari i Komitetit Drejtues, intelektuali legalist dhe ish-sekretari i Degës së PLL, zoti Dashamir Qorri, i cili nënvizoi se "dobësitë në këtë Degë vijnë nga drejtimi pa cilësi e vizion, si edhe nga monopolizimi i kompetencave dhe i punës". "Neve i anashkalojmë dobësitë, të metat dhe frymën e kritikës. Raporti ishte i dobët dhe nuk e pasqyroi gjithë veprimtarinë e partisë, sidomos në dy vitet e para. Komiteti ynë Drejtues nuk ka ditur të bëjë analiza dhe të nxjerrë konkluzione. Fryma e komunikimit midis nesh, stili dhe metoda e punës - janë tejet të dobëta dhe jo rezultative. Raportet tona me intelektualët, Rininë dhe Gruan - janë gjithashtu të dobëta dhe të zbehta", - e mbylli fjalën e tij zoti Qorri, për t'ia lënë radhën e diskutimit anëtarit të Komitetit Drejtues, zotit Agim Shabani, i cili mbështeti diskutimin e parafolësit dhe theksoi se "në shumë raste interesat personale, egoja dhe ambicjet, janë vënë mbi interesat e partisë, dhe kjo ka ndikuar negativisht në rezultate". "Ne jemi shkëputur nga baza dhe për këtë arsye kemi shkatërruar rezultatet e punës", - e mbylli diskutimin e tij zoti Shabani.

***

Pas z.Agim Shabani e mori fjalën nënkryetari i PLL zoti Murat Basha, i cili theksoi: "Kam qenë i ngarkuar nga kryesia e partisë për të mbuluar Degën tuaj dhe për këtë arsye kam ardhur kaq shpesh sa e ndjeja veten pjesë e juaja. Rezultati prej 1309 votash që ju morët në zgjedhjet e 12 tetorit, është më i mirë se rezultatet e kësaj Dege në të kaluarën por, megjithatë, ky rezultat duhet vlerësuar si i dobët. Para se çdokush prej nesh t'u kërkojë llogari të tjerëve, duhet të fillojë nga vetja. Analiza ka vlerë vetëm kur fillon nga vetja. Neve nuk na takon t'u shmangemi vështirësive dhe të vërtetave. Askush nga diskutantët parafolës nuk tha sesi duhet punuar për të afruar në PLL gratë, rininë e intelektualët, si dhe për të shtuar radhët e anëtarëve dhe simpatizantëve.

Sherret largojnë njerëzit. Idealet dhe parimet shëndrijnë më shumë aty ku mungojnë.

Me rezultatet që kemi arritur, jemi larg idealeve. Ne kemi heronj dhe martirë që na kërkojnë llogari për idealet e tyre të mbetura në mes, dhe ne duhet t'u përgjigjemi atyre dhe veprës që na lanë pas duke u shërbyer idealeve. Kandidatët duhet të dalin sot, para jush, me platforma konkrete dhe afate, pra me objektiva kohorë dhe rezultate të përcaktuara qartë.

Ka ardhur momenti që, të gjithë, duhet të shtrydhim rezervat e të shfrytëzojmë maksimalisht kapacitetet intelektuale, drejtuese e menaxhuese - për të servirur zgjidhje dhe vizione që i shërbejnë së ardhmes.

Alternativat dhe idetë duhet të jenë konkrete dhe t'i përngjajnë një kontrate me elektoratin. PLL është e vetmja parti shqiptare që ka parime të rrepta konservatore e që mbi gjithçka vë Atdheun, Kombin, traditën zakonore e shtetformuese - që fokusohen tek njeriu shqiptar dhe familja. Prandaj puna për idealet legaliste dhe alternativën mbretërore do të kurorëzohen me sukses - sepse është punë dhe kontribut për ju dhe familjet tuaja", - e mbylli diskutimin e tij nënkryetari legalist.

***

Pas z.Basha e mori fjalën kryetari i Këshillit Kombëtar dhe njëkohësisht kryetar i Degës së PLL Korçë zoti Nebi Ganellari, i cili theksoi: "Ju legalistët elbasanas jeni bij të familjeve më të shkëlqyera nacionaliste të kësaj treve. Problemet tuaja nuk janë vetëm tek ju. Askujt nga ne nuk i lejohet të thotë 'duhet', por të tregojë me shembullin e tij sesi bëhet dhe të bëjë atë që thotë. Unë e di se puna në bazë është e vështirë.

Demokracia e brendshme dhe disiplina e kufizojnë njëra-tjetrën, dhe ashtu, në drejtpeshim, e forcojnë partinë. Disiplina duhet të nënkuptojë detyrimet statutore, dhe ato nuk duhen injoruar kurrsesi. Elbasani është trevë me tradita të shkollimit dhe me kapacitete të larta intelektuale.

Këtu në Elbasan ekziston një copëz Çamërie e një copëz Kosove, që barten nga komunitetet çame e kosovare dhe nga idealet nacionaliste të legalistëve e antikomunistëve, të cilët kanë në zemër Flamurin dhe Kombin.

Pikë kyçe e garancisë për struktura të forta dhe rezultate të larta, është cilësia e Komitetit Drejtues që ju do të zgjidhni, e ku duhet të përzgjidhen elementët më të mirë. Një parti politike nuk mund të ketë fuqi pa intelektualë, pa të rinj dhe pa pjesëmarrje masive të gruas.

Ne kemi të drejtë morale, si e djathtë historike e bashkëkohore brenda së Djathtës, dhe kjo është garanci për rikthimin e shpresës tek shqiptarët", - e mbylli fjalën e tij zoti Ganellari.

***

Më pas u kalua në pikën e fundit të rendit të ditës - që ishin zgjedhjet për kryetarin e Degës dhe Komitetin Drejtues. Fillimisht, si kandidatë për kryetar të Degës paraqitën platformat e tyre dhe kandiduan zotërinjtë Bujar Çala, Selman Çili dhe Muhamet Xhemalollari.

Pas zgjedhjes nga salla të komisionit të votimeve, të përbërë prej pesë vetësh, kandidati Muhamet Xhemalollari u tërhoq, duke lënë në garë zotërinjtë Çili e Çala.

Pas votimit të 61 delegatëve, komisioni i votimeve konkludoi dhe shpalli fitues zotin Bujar Çala me 53 vota, përkundrejt 8 votave të kandidatit alternativ zotit Selman Çili. (46 - 7).

Ndërsa lidhur me përzgjedhjen e Komitetit Drejtues, për vetë specifikat lokale, numrin e madh të komunave (nëndegëve) dhe shtrirjen e theksuar territoriale - u vendos që numri i anëtarëve të jetë sa më i madh dhe përzgjedhja e tyre të bëhej me konsensus, konform një liste të hartuar e miratuar më parë në mbledhjen përgatitore që Komiteti Drejtues kish bërë për konferencën. Kjo listë u miratua njëzëri nga delegatët konform statutit, dhe kështu, me konsensus të plotë u zgjodh Komiteti i ri Drejtues.

Menjëherë pas miratimit të Komitetit Drejtues, u zhvillua mbledhja e parë e tij nën drejtimin e zotit Bujar Çala, nga ku u propozuan dhe u miratuan dy nënkryetarët e Degës ... si dhe sekretari i Marrëdhënieve me Mediat dhe Publikun, zoti Muhamet Xhemalollari.

Komiteti Drejtues ra njëzëri në konsensus edhe për kandidaturën për sekretar të Degës, duke i propozuar kryesisë së partisë zotin Zenel Musollari, i cili gëzon të gjitha aftësitë dhe përvojën për ta kryer këtë detyrë (të cilën e kish kryer me përkushtim dhe cilësi edhe gjatë mandatit të kaluar".

Kjo konferencë shënoi suksesin e radhës të PLL - si konferencë model për nga niveli i debatit, shkalla e organizimit, platformat dhe vizioni i kandidatëve, si dhe për nga cilësia e Komitetit Drejtues dhe e strukturave të tjera drejtuese.

Korresp. i "Atdheu"

Përpjekjet e polakëve për të rikthyer kujtimin e lavdishëm të mbretërve të tyre

Polonia: kujtime mbretërore në zemër të Europës

Adam Zamoyski

Nëse propozimi i monarkisë kushtetuese i periudhës së Iluminizmit do të kishte qenë pranuar, i gjithë kursi historik i Europës do të kishte qenë ndryshe

Kur komunistët morën pushtetin në Poloni fill pas Luftës së Dytë Botërore, ata ishin të dëshiruar për çfarëdo copëze legjitimiteti. Si përfundim, ata shkuan prapa deri në shekullin e dhjetë, te dinastia e parë e Polonisë, Piastët, për të marrë një simbol atdheu dhe kombësie, rreth të cilit të ngrinin republikën e tyre popullore.

Eshtë shumë e habitshme, por Polonia është formuar dhe është vendosur në hartën e Kristianitetit prej Piastëve në vitin 966. Mbretëria ishte copëtuar disa herë, dhe mund ta kishte gëlltituar Bohemia ose ndonjëri prej shteteve gjermane, nëse nuk do të kishte qenë në fuqi ajo dinasti. Nën të fundmin e Piastëve, Kazimierz i Madh (1333-1370), vendi lulëzoi si asnjëherë më përpara dhe rrallë ndonjëherë deri më sot.

Pas këtij momenti, Polonia u bë pjesë e një bashkimi dinastik nën Jagiellons-ët e Lituanisë, të cilët e rritën si përmasa më tepër se dyfishin e saj dhe po ashtu edhe në pikëpamje të forcës. Por dinastia Jagiellon u zhduk dy shekuj më vonë, dhe polakët u detyruan të fillonin me i zgjedhë mbretërit e tyre.

Kjo monarki e zgjedhur, e cila zgjati në 1572-1795, ishte në fakt një sistem presidencial. Ai kishte avantazhet e tij, por ato zhvlerësoheshin e humbnin peshë nga konsekuencat negative të tij. Ai nuk siguronte vazhdimësi dhe stabilitet, të cilat ishin esenciale për shkak të strukturës së Polonisë e cila ishte multietnike dhe multifetare, dhe po ashtu nuk siguronte liri të gjerë qytetare. Shumica e mbretërve nuk bënin ndonjë gjë më tepër sesa ushtronin pushtetin që kishin, dhe pak prej tyre mendonin të investonin fonde dhe kohë në projekte afatgjata ose zhvilluese për të ardhmen. Polonia u bë një shtet me një politikë të pafuqishme.

Në tentativë të fundit për të shpëtuar shtetin, një grup aristokratësh të iluminuar dhe patriotë, hartuan një kushtetutë të re liberale më 1791, e cila ishte përshëndetur botërisht si një frut i madh i Iluminizmit. Ajo ishte e bazuar në rikthimin e një monarkie të fortë të përcaktuar në kushtetutë dhe të trashëgueshme sipas modelit anglez. Duke iu frikësuar një rilindjeje të Polonisë, Rusia, Prusia dhe Austria dërguan ushtritë e tyre dhe e ndanë tokën e Polonisë ndërmjet veti.

Nëse ajo kushtetutë do të lejohej të merrte jetë, s'ka asnjë dyshim se në shekullin e 19, Polonia do ishte bërë një avanpost (vend i përparuar) i liberalizmit dhe progresit ekonomik në Europën Qendrore. Ajo do ta kishte bërë të pamundur për Rusinë cariste kundërshtimin e reformave, dhe brenda gjasave do të bënte që Prusia kurrë mos ta fitonte atë superioritet që pati në Gjermani. Historia e të gjithë regjionit, (dhe prandaj e gjithë botës), do të kishte qenë totalisht e ndryshme.

Ndërmjet kujtimit dhe dëshirës

Polakët nuk janë shumë të respektueshëm si natyrë. Ata kanë treguar gjithmonë instinkte agresive barazitiste. Përveç faktit që nuk ka kandidatë të mundshëm, në Poloninë e sotme nuk mund të shtrohet më çështja e rivendosjes së monarkisë. Por megjithatë, ata ende vazhdojnë të mendojnë për vendin e tyre dhe të shkuarën e tij në lidhje me ata që kanë mbretëruar aty. Periudha historike dhe stile jete janë të përcaktuara prej sundimtarësh të veçantë, mbretër dhe mbretëresha dalin në pah ndërmjet heronjve të tyre kombëtare dhe përdoren nëpër emra cigaresh apo pijesh. Mauzoleumi i Krakow-ës vizitohet masivisht. Dhe kur më së fundi, paraja komuniste u ndërrua më 1990-ën, vetëm mbretër dolën nëpër kartëmonedhat e reja.

Dhe diçka më tepër për këtë pikë: shumica e polakëve e kanë të qartë se rrënimi i stabilitetit edhe unitetit kombëtar, të cilët çuan në ndarjen dhe gjithë fatkeqësitë e mëpasme, ishin rezultati i drejtpërdrejtë i mungesës së një pushteti të fortë monarkik, dhe jo për shkak të një soditjeje të shkurtër që iu bë modelit anglez.

Publikuar në "openDemocracy Ltd." në vitin 2003.

Marrë nga www.opendemocracy.net

Përktheu: Neritan Kolgjini

Një tjetër botim shkencor për jetën dhe aktivitetin e Mbretit Zog i Parë

Jason Tomes: Ju tregoj për Mbretin e shqiptarëve

"Mbaj mend se historia që paraqitej në Muzeun Historik Kombëtar në Tiranë, kërcente me të shpejtë nga viti 1912 në vitin 1941. Nuk kishte as edhe një imazh të vetëm të Mbretit Zog, edhe pse sheshi 'Skënderbej' ku ngrihej Muzeu, ishte ndërtuar pikërisht në kohën e tij"

Edhe një tjetër botim i cilësisë së lartë për jetën dhe aktivitetin e Mbretit Zog. Para disa ditësh, historiani britanik Jason Tomes ka nxjerrë në dritë një prej veprave më autoritative për Mbretin Zog. Kjo vepër, tashmë, është futur në fondin kryesor të studiuesve perëndimorë për Shqipërinë e Monarkinë Shqiptare e posaçërisht për Mbretin Zog. Vepra është konceptuar pikërisht për t'iu drejtuar një auditori të tillë të huaj dhe këtë e pohon vetë autori i cili shprehet në një intervistë të botuar në revistën "Klan" (21 shkurt 2004) se doja të bëja "një përmbledhje të lexueshme për karrierën e tij të pazakontë, të përçoja diçka nga atmosfera e mbretërisë së paraluftës dhe t'i tregoja lexuesit anglishtfolës edhe një tjetër histori, veç asaj që ata njohin nga Shqipëria...". Më tej ai thekson se "Në Shqipëri, një kërkim thelbësor për epokën e Zogut, është ende në fazën fillestare. Ka kaq shumë gjëra që nuk janë zbuluar. Unë jam anglez dhe një nga qëllimet e librit tim ishte padyshim ta bëja Shqipërinë parakomuniste, të pranueshme dhe të kuptueshme për të huajt."

Si nxitje për këtë libër kishte shërbyer një ide e tija për të shkruar për disa udhëheqës të vendeve të Europës Juglindore. Ai shprehet se "kur nisa kërkimet mbi Zogun, me idenë për të shkruar një kapitull për të, zbulova se sa e vështirë ishte të gjej informacion të vërtetë për historinë shqiptare. Mjaft libra për Ballkanin, në mënyrë të dukshme e kishin injoruar Shqipërinë, të tjerë akoma bënin një përshkrim të përciptë dhe të pastudiuar mirë. Pse ndodhte kjo? Ishte një hendek i dukshëm që duhej mbushur," shprehet Tomes në intervistë. Dhe kështu, duke kërkuar për mbretin e Shqiptarëve, në vend të një kapitulli, doli një libër më vete, i cili u botua para disa javësh nga New York University Press. "Një libër 300 faqesh ku ishte mjat e vështirë të fusja gjithë çfarë doja të thoja", shprehet Jason Tomes.

Në intervistën për revistën "Klan" z.Tomes tregon se ka vizituar mes njëqind vështirësish shtetin shqiptar të kohës së komunizmit në fillim të viteve '80. Ai shprehet se "Jeta kulturore ishte e kufizuar në ekstrem. Mbaj mend edhe se historia që paraqitej në Muzeun Historik Kombëtar në Tiranë, kërcente me të shpejtë nga viti 1912 në vitin 1941. Nuk kishte as edhe një imazh të vetëm të Mbretit Zog, edhe pse sheshi 'Skënderbej' ku ngrihej Muzeu, ishte ndërtuar pikërisht në kohën e tij."

Pyetjes së ç'vend zë Zogu në historinë e Shqipërisë historiani Tomes i përgjigjet: "Padyshim ai ishte një nga themeluesit e shtetit modern shqiptar.... Si Ahmet Zogolli ai bëri një punë shumë të çmueshme në postin e Ministrit të Brendshëm në Qeverinë Provizore që i ktheu Shqipërisë pavarësinë në vitin 1920. Në rolin e kreut të shtetit, nga viti 1925 deri në vitin 1939, arritja e tij thelbësore ishte ruajtja e kombit brenda kufijve shtetërorë. U desh një kohë e gjatë për të bindur komunitetin ndërkombëtar se shqiptarët kishin të drejtën të formonin shtet. Mbrojtja kombëtare nuk ishte detyrë e lehtë!" thotë Tomes.

Në fund të intervistës ai shprehet se "Pas 5 vjetësh që kam punuar për Zogun, nuk besoj se do të mund ta humb ndonjëherë interesin për vendin e tij të jashtëzakonshëm".

Autori z.Jason Tomes ka lindur në Swanage, Dorset, në bregun jugor të Anglisë në vitin 1966. Në universitetin e Oxford-it ai studioi për politikë, filozofi dhe më pas ekonomi në Merton College dhe e përfundoi doktoraturën për marrëdhëniet ndërkombëtare në Neuffield College. Ka dhënë mësim në universitetet e Polonisë dhe për dy vjet ka ndihmuar në botimin e një përmbledhjeje me fjalime të Margaret Thatcher.

N.K.

Ju tregoj Greqinë dhe PASOK-un (3)

Aktet e dukshme të antiamerikanizmit të Papandreut

Robert D. Kaplan

Vijon nga numri i kaluar

Gjithmonë më kanë magjepsur lidhjet e ngushta e vëllazërore të Papandreut me këtë takëm kriminelësh me kollaro, të cilët kishin pirë dhe këmbyer gjak me njëri-tjetrin, dhe mes të cilëve Andrea ishte personi më i sofistikuar.

Papandreu kërkonte t'i thureshin lavde dhe, në njëfarë mënyre i kish merituar ato nëpërmjet një aftësie të rrallë për të depërtuar, për të dominuar e manipuluar mjedise sociale thellësisht të ndryshme.

Pas zgjedhjes së Papandreut si kryeministër, më 1981, ai mori përgëzime për njohjen e Lëvizjes Komuniste të Rezistencës gjatë LDB dhe për lejen që u dha ish-guerrilasve komunistë të Luftës Civile greke për t'u kthyer në atdhe pas ekzilit të gjatë.

Në vitin 1982, i plotfuqishmi kuazi-diktator, Andreas Papandreu, e ndërpreu plotësisht ndjekjen e sesioneve të parlamentit, dhe pasi pushoi nga puna një numër ministrash të pakënaqur nga metodat dhe harbutëria e tij e drejtimit - i shtoi stafit të vet personal afro 80 këshilltarë. Këto veprime e shkëputën atë nga qeveria dhe baza e PASOK-ut. Tani asgjë nuk mund ta pengonte Andreas-in të sundonte me grusht të hekurt përmes rrethit të vet të ngushtë.

Në vitet që i paraprinë sundimit absolut të tij, Papandreu kishte spastruar qindra anëtarë të PASOK-ut nga partia - nën pretekstin se kishin "devijuar". Cilido që vinte në dyshim gjykimin e tij për çfarëdolloj gjëje, përjashtohej.

Kur Papandreu u zgjodh për herë të parë, shumë anëtarë të PASOK-ut menduan se kjo parti do të drejtohej demokratikisht, por kjo nuk ndodhi.

Kur Aristidh Bulukos, deputet i PASOK-ut, e kundërshtoi Papandreun për një dekret lidhur me reformën zgjedhore - u përjashtua me shkelma nga PASOK-u.

Kur Stathis Panagulis (zëvendës-ministër i Brendshëm), e kritikoi Papandreun se "nuk i kishte mbajtur disa prej premtimeve të bëra në fushatën zgjedhore", edhe ai u përjashtua zyrtarisht nga partia. Më pas Papandreu e akuzoi Panagulis-in publikisht për "tradhti dhe konspiracion". Televizioni dhe radio shtetërore, në mënyrë të përsëritur transmetonin vetëm akuzat e Papandreut dhe injoronin përgjigjet e Panagulis-it.

Kritikët e politikave të tij personale cilësoheshin "heretikë", thënë ndryshe, "apostatë" - term që vinte nga mesjeta bizantine, ku perandorët që pretendonin se sundonin mbi bazën e së Drejtës Hyjnore - i etiketonin "apostatë" kundërshtarët e tyre.

Përjashtimet vazhduan gjatë gjithë viteve të sundimit të Papandreut, dhe mënyra ishte gjithmonë e njejtë. Pas përjashtimit të ndonjë anëtari - mediat pro dhe ato të PASOK-ut fillonin linçimin e viktimave të radhës.

Në vitin 1983, mediat zyrtare akuzuan për "mashtrim dhe evazion fiskal" Jorgo Cacos-in, drejtor ekzekutiv i njërës nga kompanitë e prodhimit të Çimentos (eksportuesja më e suksesshme e Greqisë). Duke përdorur si pretekst njoftimet e shtypit, qeveria e Papandreut e shtetëzoi këtë kompani. Brenda tre vjetësh, nën administrimin e papandreistëve, kompania humbi 52 milionë dollarë, ndërkohë që gjatë viteve që paraprinë këtë shtetëzim, kjo kompani e kishte 25 milionë $ fitimin vjetor të regjistruar.

Nën Papandreun lajmet televizive u kthyen në paradë fjalimesh, inagurimesh dhe prerjesh të shiritave me gërshërët e Shefit të Madh e të plotfuqishëm.

Terroristët-guerrilas, që nga kontrasët nikaraguajanë e deri tek genocidistët komunistë afrikanë, portretizoheshin nga Andrea dhe mediat e tij si "luftëtarë të lirisë".

Kur një oficer i marinës amerikane u vra në Athinë nga atentatorë terroristë, gazetat e PASOK e etiketuan vrasjen si një "konspiracion të CIA-s", duke akuzuar se ajo e vrau vetë njeriun e vet "në një përpjekje të llogaritur mirë në kohë, për të krijuar ndjenja anti-greke në SHBA".

Në mitingjet që transmetoheshin edhe nga televizioni, Papandreu deklaronte se "Amerika është metropoli i imperializmit" dhe se "bazat amerikane në Greqi ishin baza vdekjeje".

Asokohe Papandreu udhëtonte në vendet e Bllokut Komunist Lindor - si në shtëpinë e vet. Gjatë një vizite në Poloni, Papandreu e cilësoi "Solidarnost"-in si "të rrezikshëm dhe antikushtetues".

Në kohën e sundimit të tij, kompanitë shtetërore greke u shisnin armë palëve ndërluftuese gjatë konfliktit Iran-Irak dhe Ruanda-Burundi.

Kur në Athinë zhvilloheshin simpoziume kushtuar Paqes, Papandreu gjente rastin të vizitonte Çausheskun dhe të diskutonte me të një "Plan të Përbashkët Paqeje për Europën".

Kur Papandreu erdhi në fuqi, me urdhër të veçantë e shkriu njësinë e posaçme anti-terror të policisë, e cila merrej me hetimin e grupit terrorist "17 Nëntori". Ky grup, gjatë gjithë sundimit të Papandreut mbeti organizata terroriste më enigmatike dhe më e pamundur për t'u hetuar. Ky stimulim indirekt e trimëroi grupin që, natën e Krishtlindjeve të vitit 1975, vrau me atentat shefin e zyrës së CIA-s në Greqi, Riçard Uelsh. Terroristët e këtij grupi e pranuan autorësinë dhe deklaruan shprehimisht se "me këtë akt synonin të ndëshkonin amerikanët për qëndrimet e tyre imperialiste kundër Greqisë". Vrasja e Uelsh-it përcaktoi modelin e atentateve ndaj viktimave të radhës. Kështu e pësoi edhe një oficer i marinës ushtarake amerikane në nëntor të vitit 1983, atentati kundër të cilit përkonte me 10-vjetorin e krijimit të organizatës "17 Nëntori".

Në marsin e vitit 1984 u masakrua me atentat nëpunësi i ambasadës angleze Kenet Uajt, sëbashku me ndihmësin e tij grek.

Asokohe, terroristët libianë shoqëroheshin me eskorta të policisë greke gjatë marshimeve në Athinë dhe mbanin hapur pistoleta dhe bomba në brez.

Këta vrasës eleminuan në të gjithë Greqinë dhjetëra disidentë libianë që ishin kundër Gedafit dhe gjithmonë dosjet e atentateve mbylleshin nga policia greke me arsyetimin "larje hesapesh personale". Terroristët sirianë filluan të vrasin anëtarë të OÇP dhe grupi terrorist "Abu Nidal" kishte hapur kompaninë e eksport-importit "Al noor" në Athinë, prej nga realizoheshin operacionet e trafikut të armëve në të gjithë Mesdheun.

Kur në vitin 1983 zbulimi amerikan dhe ai britanik identifikuan një terrorist arab, agjenti amerikan që merrej me hetimin u përzu nga Greqia, ndërsa terroristi u muar nën mbrojtje nga policia. Administratës së Reganit iu desh të djersinte për ta bindur Papandreun që të forconte masat e sigurimit në aeroportin e Athinës dhe luftën kundër terroristëve.

Në fund të vitit 1985, terroristë arabë të armatosur rrëmbyen një avion të linjës Egypt-Air, të nisur nga Athina dhe e detyruan të ulej në Maltë, ku vranë 60 pasagjerë të pafajshëm.

Më 1986, në Athinë shpërthyen njëzet bomba, katër prej të cilave u morën përsipër nga "17 Nëntori", që kish filluar të vriste jo vetëm amerikanë por edhe figura politike dhe biznesmenë të shquar grekë. Përveç "17 Nëntorit", armata e terroristëve grekë brenda një kohe të shkurtër u plotësua me grupe që kishin emra të çuditshëm, si "Rosat e egra të qytetit"; "Grupi Anarkist i nihilistëve ikonoklastë" dhe "Lufta Revolucionare".

Më 28 qershor 1988 u vra me autobombë atasheu ushtarak amerikan Uilliam Nord. Trembëdhjetë ditë më pas terroristët vranë 9 turistë dhe plagosën 80 të tjerë gjatë një sulmi kundër tragetit grek "Qyteti i Poros".

Me këtë rast, zëdhënësi i Papandreut, Sotiris Kostopulos, lëshoi akuzën se "ky sulm ishte pjesë e një komploti amerikan që synonte t'i bënte presion Greqisë për të firmosur marrëveshjen për zgjatjen e afatit të qëndrimit të bazave amerikane në territorin grek". Po atë vit, qeveria greke nxori nga burgu terroristin Osama Al Zomar, autor i atentatit me bomba dhe kallashnikovë në një sinagogë të Romës, ku gjeti vdekjen një fëmijë dyvjeçar dhe u plagosën tridhjeteshtatë të tjerë. Ministri i Drejtësisë i Papandreut, Sotiris Rotis, doli menjëherë në mbrojtje të Zomarit.

Zbuluesit dhe gazetarët perëndimorë asokohe arritën të zbulonin pikat e takimit midis terroristëve majtistë grekë dhe grupeve terroriste të PASOK-ut.

Gjatë tërmetit të 13 shtatorit të vitit 1986, gjatë të cilit në Kallamata gjetën vdekjen 20 persona dhe u plagosën treqind të tjerë, Papandreu nuk shkoi në vendngjarje - duke pretenduar se ishte "tepër i zënë me punë". Siç u muar vesh më vonë, kryeministri 68-vjeçar kishte qenë për një shëtitje tre-ditore, me jaht, sëbashku me një stjuardesë të kompanisë ajrore "Olympic", bukuroshen Dhimitra Liani, asokohe e martuar me një udhëheqës të lartë të Partisë Komuniste-Revolucionare Maoiste të Greqisë. Andreas-in e kishin parë të lahej e të vallëzonte bashkë me Lianin në kohën kur kombi grek jetonte ditë zie.

Pas çeshtjes "Liani", aty nga fundi i vitit 1988 i erdhi radha "skandalit Koskotas", që mori emrin e bankierit që ndihmoi Papandreun për të vjedhur dhe kanalizuar në fondet e heshtura të PASOK-ut mbi 200 milionë dollarë të koorporatave shtetërore. Paratë e pista të PASOK-ut përdoreshin për të blerë mediat që kritikonin Papandreun; për të mbyllur gojën e grave të divorcuara prej tij dhe fëmijëve të lënë rrugëve, si edhe për të shpërblyer zyrtarë e qeveritarë për punët e pista që kryenin.

Me urdhër të Andreas, shërbimet sekrete filluan të përgjonin telefonat e armiqve politikë të kryeministrit. Kur zyrtarë të lartë u akuzuan për vepra penale gjatë të cilave rezultoi se Papandreu ishte bashkëfajtor me ta, ky nuk pranoi të dëshmonte në gjyq dhe akuzat i quajti "komplot nga forcat e errëta të reaksionit dhe nga qarqe të huaja që synonin të destabilizonin Greqinë".

"I vetmi regjim i suksesshëm fashist i Greqisë, ka qënë ai i Andreas Papandreut", - shkruante studiuesi greko-amerikan Aristidh Karacas në vitin 1990. Sipas tij "as regjimi ushtarak i Jorgo Metaksa (1936-1941), apo Junta Ushtarake (1967-1974), nuk kishin bërë kaq krime dhe zullume sa Papandreu dhe njerëzit e tij".

***

Papandreu ka qenë fantazma më origjinale e Ballkanit, e cila lëvrinte diku në thellësitë e së kaluarës më të errët.

Kurrë nuk do t'i harroj momentet kur Papandreu ulërinte hipur mbi podium, para përkrahësve të vet histerikë, me duart e shtrira përpara - si të ishte vetë Jezu Krishti.

Fund

Ju tregoj Greqinë dhe PASOK-un (3)

Aktet e dukshme të antiamerikanizmit të Papandreut

Robert D. Kaplan

Kur Papandreu erdhi në fuqi, me urdhër të veçantë e shkriu njësinë e posaçme anti-terror të policisë, e cila merrej me hetimin e grupit terrorist "17 Nëntori". Ky stimulim indirekt e trimëroi grupin që, natën e Krishtlindjeve të vitit 1975, vrau me atentat shefin e zyrës së CIA-s në Greqi, Riçard Uelsh. Terroristët e këtij grupi e pranuan autorësinë dhe deklaruan shprehimisht se "me këtë akt synonin të ndëshkonin amerikanët për qëndrimet e tyre imperialiste kundër Greqisë".

Vijon nga numri i kaluar

Gjithmonë më kanë magjepsur lidhjet e ngushta e vëllazërore të Papandreut me këtë takëm kriminelësh me kollaro, të cilët kishin pirë dhe këmbyer gjak me njëri-tjetrin, dhe mes të cilëve Andrea ishte personi më i sofistikuar.

Papandreu kërkonte t'i thureshin lavde dhe, në njëfarë mënyre i kish merituar ato nëpërmjet një aftësie të rrallë për të depërtuar, për të dominuar e manipuluar mjedise sociale thellësisht të ndryshme.

Pas zgjedhjes së Papandreut si kryeministër, më 1981, ai mori përgëzime për njohjen e Lëvizjes Komuniste të Rezistencës gjatë LDB dhe për lejen që u dha ish-guerrilasve komunistë të Luftës Civile greke për t'u kthyer në atdhe pas ekzilit të gjatë.

Në vitin 1982, i plotfuqishmi kuazi-diktator, Andreas Papandreu, e ndërpreu plotësisht ndjekjen e sesioneve të parlamentit, dhe pasi pushoi nga puna një numër ministrash të pakënaqur nga metodat dhe harbutëria e tij e drejtimit - i shtoi stafit të vet personal afro 80 këshilltarë. Këto veprime e shkëputën atë nga qeveria dhe baza e PASOK-ut. Tani asgjë nuk mund ta pengonte Andreas-in të sundonte me grusht të hekurt përmes rrethit të vet të ngushtë.

Në vitet që i paraprinë sundimit absolut të tij, Papandreu kishte spastruar qindra anëtarë të PASOK-ut nga partia - nën pretekstin se kishin "devijuar". Cilido që vinte në dyshim gjykimin e tij për çfarëdolloj gjëje, përjashtohej.

Kur Papandreu u zgjodh për herë të parë, shumë anëtarë të PASOK-ut menduan se kjo parti do të drejtohej demokratikisht, por kjo nuk ndodhi.

Kur Aristidh Bulukos, deputet i PASOK-ut, e kundërshtoi Papandreun për një dekret lidhur me reformën zgjedhore - u përjashtua me shkelma nga PASOK-u.

Kur Stathis Panagulis (zëvendës-ministër i Brendshëm), e kritikoi Papandreun se "nuk i kishte mbajtur disa prej premtimeve të bëra në fushatën zgjedhore", edhe ai u përjashtua zyrtarisht nga partia. Më pas Papandreu e akuzoi Panagulis-in publikisht për "tradhti dhe konspiracion". Televizioni dhe radio shtetërore, në mënyrë të përsëritur transmetonin vetëm akuzat e Papandreut dhe injoronin përgjigjet e Panagulis-it.

Kritikët e politikave të tij personale cilësoheshin "heretikë", thënë ndryshe, "apostatë" - term që vinte nga mesjeta bizantine, ku perandorët që pretendonin se sundonin mbi bazën e së Drejtës Hyjnore - i etiketonin "apostatë" kundërshtarët e tyre.

Përjashtimet vazhduan gjatë gjithë viteve të sundimit të Papandreut, dhe mënyra ishte gjithmonë e njejtë. Pas përjashtimit të ndonjë anëtari - mediat pro dhe ato të PASOK-ut fillonin linçimin e viktimave të radhës.

Në vitin 1983, mediat zyrtare akuzuan për "mashtrim dhe evazion fiskal" Jorgo Cacos-in, drejtor ekzekutiv i njërës nga kompanitë e prodhimit të Çimentos (eksportuesja më e suksesshme e Greqisë). Duke përdorur si pretekst njoftimet e shtypit, qeveria e Papandreut e shtetëzoi këtë kompani. Brenda tre vjetësh, nën administrimin e papandreistëve, kompania humbi 52 milionë dollarë, ndërkohë që gjatë viteve që paraprinë këtë shtetëzim, kjo kompani e kishte 25 milionë $ fitimin vjetor të regjistruar.

Nën Papandreun lajmet televizive u kthyen në paradë fjalimesh, inagurimesh dhe prerjesh të shiritave me gërshërët e Shefit të Madh e të plotfuqishëm.

Terroristët-guerrilas, që nga kontrasët nikaraguajanë e deri tek genocidistët komunistë afrikanë, portretizoheshin nga Andrea dhe mediat e tij si "luftëtarë të lirisë".

Kur një oficer i marinës amerikane u vra në Athinë nga atentatorë terroristë, gazetat e PASOK e etiketuan vrasjen si një "konspiracion të CIA-s", duke akuzuar se ajo e vrau vetë njeriun e vet "në një përpjekje të llogaritur mirë në kohë, për të krijuar ndjenja anti-greke në SHBA".

Në mitingjet që transmetoheshin edhe nga televizioni, Papandreu deklaronte se "Amerika është metropoli i imperializmit" dhe se "bazat amerikane në Greqi ishin baza vdekjeje".

Asokohe Papandreu udhëtonte në vendet e Bllokut Komunist Lindor - si në shtëpinë e vet. Gjatë një vizite në Poloni, Papandreu e cilësoi "Solidarnost"-in si "të rrezikshëm dhe antikushtetues".

Në kohën e sundimit të tij, kompanitë shtetërore greke u shisnin armë palëve ndërluftuese gjatë konfliktit Iran-Irak dhe Ruanda-Burundi.

Kur në Athinë zhvilloheshin simpoziume kushtuar Paqes, Papandreu gjente rastin të vizitonte Çausheskun dhe të diskutonte me të një "Plan të Përbashkët Paqeje për Europën".

Kur Papandreu erdhi në fuqi, me urdhër të veçantë e shkriu njësinë e posaçme anti-terror të policisë, e cila merrej me hetimin e grupit terrorist "17 Nëntori". Ky grup, gjatë gjithë sundimit të Papandreut mbeti organizata terroriste më enigmatike dhe më e pamundur për t'u hetuar. Ky stimulim indirekt e trimëroi grupin që, natën e Krishtlindjeve të vitit 1975, vrau me atentat shefin e zyrës së CIA-s në Greqi, Riçard Uelsh. Terroristët e këtij grupi e pranuan autorësinë dhe deklaruan shprehimisht se "me këtë akt synonin të ndëshkonin amerikanët për qëndrimet e tyre imperialiste kundër Greqisë". Vrasja e Uelsh-it përcaktoi modelin e atentateve ndaj viktimave të radhës. Kështu e pësoi edhe një oficer i marinës ushtarake amerikane në nëntor të vitit 1983, atentati kundër të cilit përkonte me 10-vjetorin e krijimit të organizatës "17 Nëntori".

Në marsin e vitit 1984 u masakrua me atentat nëpunësi i ambasadës angleze Kenet Uajt, sëbashku me ndihmësin e tij grek.

Asokohe, terroristët libianë shoqëroheshin me eskorta të policisë greke gjatë marshimeve në Athinë dhe mbanin hapur pistoleta dhe bomba në brez.

Këta vrasës eleminuan në të gjithë Greqinë dhjetëra disidentë libianë që ishin kundër Gedafit dhe gjithmonë dosjet e atentateve mbylleshin nga policia greke me arsyetimin "larje hesapesh personale". Terroristët sirianë filluan të vrasin anëtarë të OÇP dhe grupi terrorist "Abu Nidal" kishte hapur kompaninë e eksport-importit "Al noor" në Athinë, prej nga realizoheshin operacionet e trafikut të armëve në të gjithë Mesdheun.

Kur në vitin 1983 zbulimi amerikan dhe ai britanik identifikuan një terrorist arab, agjenti amerikan që merrej me hetimin u përzu nga Greqia, ndërsa terroristi u muar nën mbrojtje nga policia. Administratës së Reganit iu desh të djersinte për ta bindur Papandreun që të forconte masat e sigurimit në aeroportin e Athinës dhe luftën kundër terroristëve.

Në fund të vitit 1985, terroristë arabë të armatosur rrëmbyen një avion të linjës Egypt-Air, të nisur nga Athina dhe e detyruan të ulej në Maltë, ku vranë 60 pasagjerë të pafajshëm.

Më 1986, në Athinë shpërthyen njëzet bomba, katër prej të cilave u morën përsipër nga "17 Nëntori", që kish filluar të vriste jo vetëm amerikanë por edhe figura politike dhe biznesmenë të shquar grekë. Përveç "17 Nëntorit", armata e terroristëve grekë brenda një kohe të shkurtër u plotësua me grupe që kishin emra të çuditshëm, si "Rosat e egra të qytetit"; "Grupi Anarkist i nihilistëve ikonoklastë" dhe "Lufta Revolucionare".

Më 28 qershor 1988 u vra me autobombë atasheu ushtarak amerikan Uilliam Nord. Trembëdhjetë ditë më pas terroristët vranë 9 turistë dhe plagosën 80 të tjerë gjatë një sulmi kundër tragetit grek "Qyteti i Poros".

Me këtë rast, zëdhënësi i Papandreut, Sotiris Kostopulos, lëshoi akuzën se "ky sulm ishte pjesë e një komploti amerikan që synonte t'i bënte presion Greqisë për të firmosur marrëveshjen për zgjatjen e afatit të qëndrimit të bazave amerikane në territorin grek". Po atë vit, qeveria greke nxori nga burgu terroristin Osama Al Zomar, autor i atentatit me bomba dhe kallashnikovë në një sinagogë të Romës, ku gjeti vdekjen një fëmijë dyvjeçar dhe u plagosën tridhjeteshtatë të tjerë. Ministri i Drejtësisë i Papandreut, Sotiris Rotis, doli menjëherë në mbrojtje të Zomarit.

Zbuluesit dhe gazetarët perëndimorë asokohe arritën të zbulonin pikat e takimit midis terroristëve majtistë grekë dhe grupeve terroriste të PASOK-ut.

Gjatë tërmetit të 13 shtatorit të vitit 1986, gjatë të cilit në Kallamata gjetën vdekjen 20 persona dhe u plagosën treqind të tjerë, Papandreu nuk shkoi në vendngjarje - duke pretenduar se ishte "tepër i zënë me punë". Siç u muar vesh më vonë, kryeministri 68-vjeçar kishte qenë për një shëtitje tre-ditore, me jaht, sëbashku me një stjuardesë të kompanisë ajrore "Olympic", bukuroshen Dhimitra Liani, asokohe e martuar me një udhëheqës të lartë të Partisë Komuniste-Revolucionare Maoiste të Greqisë. Andreas-in e kishin parë të lahej e të vallëzonte bashkë me Lianin në kohën kur kombi grek jetonte ditë zie.

Pas çeshtjes "Liani", aty nga fundi i vitit 1988 i erdhi radha "skandalit Koskotas", që mori emrin e bankierit që ndihmoi Papandreun për të vjedhur dhe kanalizuar në fondet e heshtura të PASOK-ut mbi 200 milionë dollarë të koorporatave shtetërore. Paratë e pista të PASOK-ut përdoreshin për të blerë mediat që kritikonin Papandreun; për të mbyllur gojën e grave të divorcuara prej tij dhe fëmijëve të lënë rrugëve, si edhe për të shpërblyer zyrtarë e qeveritarë për punët e pista që kryenin.

Me urdhër të Andreas, shërbimet sekrete filluan të përgjonin telefonat e armiqve politikë të kryeministrit. Kur zyrtarë të lartë u akuzuan për vepra penale gjatë të cilave rezultoi se Papandreu ishte bashkëfajtor me ta, ky nuk pranoi të dëshmonte në gjyq dhe akuzat i quajti "komplot nga forcat e errëta të reaksionit dhe nga qarqe të huaja që synonin të destabilizonin Greqinë".

"I vetmi regjim i suksesshëm fashist i Greqisë, ka qënë ai i Andreas Papandreut", - shkruante studiuesi greko-amerikan Aristidh Karacas në vitin 1990. Sipas tij "as regjimi ushtarak i Jorgo Metaksa (1936-1941), apo Junta Ushtarake (1967-1974), nuk kishin bërë kaq krime dhe zullume sa Papandreu dhe njerëzit e tij".

***

Papandreu ka qenë fantazma më origjinale e Ballkanit, e cila lëvrinte diku në thellësitë e së kaluarës më të errët.

Kurrë nuk do t'i harroj momentet kur Papandreu ulërinte hipur mbi podium, para përkrahësve të vet histerikë, me duart e shtrira përpara - si të ishte vetë Jezu Krishti.

Fund

___________________________

Opozita vazhdon përgatitjet për mitingun në sheshin "Skënderbej"

20 marsi, karton i kuq për Nanon

Krerët opozitarë kanë ndërmarrë një fushatë denoncimesh kundër qeverisë Nano në ambjentet diplomatike. Këto ditë ata kanë zhvilluar takime edhe me Prodin, Shvimerin, Liponnenin Xhefrin e të tjerë

Alternativa e Opozitës dhe pushteti i dështuar

Nga Astrit Kola

Pasi kanë dështuar që prej 7-vjetësh, dhe si "alternativë" të vetme zhvillimi paraqesin "Integrimin" e lakuar në të gjitha rasat - pushtetarët po akuzojnë opozitën për "mungesë alternative".

Duke përmendur natë e ditë "reformat", maxhoranca mundohet të justifikojë dështimet me "koston e natyrshme të reformave". Por "reformatorët" e vetshpallur të tillë që nga 97-ta, nuk janë në gjendje të argumentojnë sesi mundet që reformat e sugjeruara dhe monitoruara edhe nga ndërkombëtarët - të pjellin vetëm rrënim ekonomik!!!

Tashmë pushteti i dështuar, në mungesë të sukseseve konkrete, paraqet si sukses të tij arritjet e disa kompanive private, duke përvetësuar kësisoj meritat e iniciativës së lirë në ekonominë e tregut. Nëse i takon të mburret për ndonjë sukses të tillë, pushteti aktual mund të mburret vetëm me suksesin e monopoleve të qeveritarëve apo të ndoca kompanive private të cilat favorizohen në kurriz të pronës shtetërore dhe publike, "suksese" që bazohen në ligje të miratuara enkas për këto biznese, që gjithmonë figurojnë e janë të lidhura me pushtetin dhe shpërblimet klienteliste.

Pikërisht në këtë klimë paradoksale dështimesh dhe mjerimi, kasnecët e pushtetit akuzojnë Opozitën për "mungesë alternativash".

Ftesave të vazhdueshme të pushtetit për "bashkëpunim për thellimin e reformave" - opozita i është përgjigjur me paraqitjen e pakteve dhe drafteve për "Rendin"; "Privatizimin"; "Reformën e sistemit fiskal"; "Reformën e sistemit financiar" në përgjithësi dhe "bankar" në veçanti; "Reformën zgjedhore" etj., por gjithmonë Pozita ka qenë refraktare dhe, me dhunën e kartonave të Dushkut i ka hedhur poshtë të gjitha opcionet e Opozitës. Madje, nga zelli i tepruar për t'i thyer hundët opozitës dhe për të ruajtur të paprekura privilegjet e ligjëruara - maxhoranca ka bërë edhe marrëzira të padëgjuara, duke arritur të votojë edhe parimet universale të gjithëpranuara ( që janë tabu dhe thelbi i Demokracisë), e deri tek nenet e Kushtetutës!!!

Opozita jo vetëm që i ka të gatshme draftet-alternativa për reformat dhe nxjerrjen e vendit nga kolapsi total, por në përballjen e asaj kohe me "ekspertët" e pushtetit - korri sukses të plotë.

Thjesht duke u fokusuar në krizën e thellë ekonomike (shkaktare të mjerimit), Opozita ka të gatshëm draftin e dikurshëm të paraqitur nga Sekretari i Përgjithshëm i PD, z.Bode, për "përgjysmimin e barrës fiskale", që, po të aplikohet - mund ta ringjallte ekonominë dhe biznesin dhe, brenda një kohe shumë të shkurtër do të sillte uljen e çmimeve, pa cënuar arkëtimet e planifikuara në buxhet (natyrisht, nëse pushtetaro-biznesmenët nuk do të bënin evazion fiskal).

Ka ardhur koha që opozita të shpalosë Programet e gatshme Antikrizë dhe të shkatërrojë çdo pseudo-alternativë të eminëve nanoistë, të cilët nuk janë në gjendje të shpjegojnë përse "Reformat 7-vjeçare" nuk sjellin zhvillim dhe akses për iniciativën e lirë, por po na kthejnë tek teza komuniste e neokomunistëve në pushtet, se "kapitalizmi është një sistem ekonomik i dështuar", dhe se "në kapitalizëm ndodh varfërimi relativ dhe absolut i proletariatit dhe masave të thjeshta punonjëse".

Nga tezat e dikurshme të Institutit M-L të drejtuar prej tij, Nano po vërteton vetëm ato të "polarizimit të tejskajshëm të shoqërisë" dhe "...përdorimin e pushtetit për krijimin e oligarkisë".

Zhvilloi punimet Konferenca e shtatë e PLL dega Tiranë

Garë e fortë për kryetar. Fiton Kamberi

Konferenca e degës së Tiranës zhvilloi punimet në sallën e Konferencave të Hotel Dajtit ku në përfundim të votimeve, doli kryetar z.Blerim Kamberi dhe u zgjodhën me votë direkte tetë anëtarë të Komitetit Drejtues të ri, si dhe u konstituua gjithë struktura e këtij forumi sipas skemës së kooptimit të anëtarëve nga nëndegët. Në këtë konferencë ishin të pranishëm figurat kryesore të PLL, kryetari Spahiu, Nënkryetari Basha, Sekretari për çeshtjet Ekonomike z.Artan Tujani, kryetari i Senatit z.Ali Ohrit, kryetari i Këshillit Kombëtar z.Nebi Ganellari, dhe zyrtarë të tjerë të partisë.

Konferencën e nderuan me praninë dhe përshëndetjet e tyre kryetari i PD Tiranë z.Vili Minarolli, Sekretari i Përgjithshëm i Partisë Balli Kombëtar z.Arben Hoxha, kryetari i Partisë Konservatore z.Armando Ruço, kryetari i Shoqatës së ish-të Përndjekurve politikë z.Kurt Kola, kryetari i shoqatës së ish-të Burgosurve dhe të Përndjekurve Politikë Antikomunistë z.Afrim Haçi, sekretari i përgjithshëm i Shoqatës Mbarëkombëtare për Integrimin e ish të Përndjekruve z.Besim Ndregjoni, Sekretari i Përgjithshëm i shoqatës Atdhetare "Çamëria" z.Qani Biraçi e të tjerë.

Siç ishte përcaktuar nga mbledhja paraprake e Komitetit Drejtues të degës, këtë konferencë e drejtoi ish-Nënkryetari i Degës z.Neritan Kolgjini, ndërsa raportin në emër të degës e mbajti Nënkryetari tjetër z.Hamit Kurti. (Raportin e plotë i cili përfshin një periudhë mbi dy-vjeçare të degës, mund ta lexoni të plotë në këtë numër gazete).

Para leximit të raportit, drejtuesi i konferencës z.Kolgjini kërkoi që të mbahej një minutë heshtje në nderim të "të gjithë dëshmorëve të kombit shqiptar, në nderim të të gjitha viktimave të indiferencës qeveritare dhe në nderim të të gjithë legalistëve tiranas që nuk janë më midis nesh".

Më pas u kalua në përshëndetjet e të ftuarve. I pari foli z.Qani Biraçi i cili ndërmjet të tjerash tha: "përshëndes konferencën e PLL Tiranë dhe në veçanti dua të përshëndes këtu mikun tim, kryetarin e PLL z.Eqerem Spahiu pë përpjekjet që ai bën për të kaluar Rezolutën për çështjen çame në parlamentin shqiptar". Më pas ai do të shprehte indinjatën e tij ndaj qendrimit të qeverisë shqiptare për heshtjen e saj për çeshtjen çame. Z.Biraçi u shpreh: "Si mund të heshtë shteti shqiptar për gjithë tragjedinë çame?! Si është e mundur që kanë frikë të kalojnë një Rezolutë për çeshtjen çame në parlamentin shqiptar?!" Më pas ai do të vlerësonte PLL dhe kryetarin e saj për kontributin parlamentar për çeshtjen çame. Fjala e z.Qani Biraçi u duartrokit nxehtësisht nga delegatët.

Minarolli (PD): Na bashkojnë interesa ekzistenciale

Kryetari i PD Tiranë, Prof.Vili Minarolli, deputet i PD në fjalën e tij theksoi se "Të dy palët, ne demokratët e Tiranës dhe ju legalistët e Tiranës jemi pjesë e rëndësishme e partive tona. Aleanca jonë nuk është e nuk duhet të jetë fluide apo konjukturale. Ajo është dhe duhet të jetë një aleancë organike, e natyrshme që rrjedh nga qendrimet tona programore." Më tej z.Minarolli tha se "Ajo që na ndan i kalon përmasat e vullneteve politike të lidershipeve tona dhe është një çeshtje mbarëkombëtare, por PDSH tashmë ka dhënë prova të qarta se i respektojmë këto vullnete dhe duhet të punojmë së bashku në përmbushjen e tyre. Ato që na bashkojnë është gjithçka që lidhet me ekzistencën tonë si parti e spektrit politik shqiptar, që përcaktojnë fizionominë e partive tona si parti të djathta e të qendrës së djathtë."

Më tej z.Minarolli do tërhiqte vemendjen rreth hapave të opozitës në kuadër të Lëvizjes Nano Ik. Ai u shpreh se "Jemi përfshirë në një lëvizje që shumë shpejt ka marrë përmasat e një lëvizjeje mbarëkombëtare. Përpara partive të opozitës del domosdoshmëri e padiskutueshme administrimi politik i lëvizjes dhe unë mendoj se deri tani po ecën në rrugë të mbarë."

Në fund z.Minarolli kërkoi që bashkëpunimi i parë në vitin 2001 ndërmjet degëve respektive të të dy partive, të rivendoset e të zgjerohet më tej. Në fund ai i uroi punime të mbara konferencës.

Arben Hoxha (PBK): "Në PLL ndihem si në shtëpinë time"

Sekretari i Përgjithshëm i PBK z.Arben Hoxha do të shprehej që në fillim të fjalës së tij se "Në mes të legalistëve ndihem si në shtëpinë time". Ai u shpreh me një stil të shkathët oratorik se kjo afërsi "vjen për shkak të historisë së përbashkët të vuajtjeve nën regjimin komunist që kanë këto dy parti". Më tej z.Hoxha tha se bashkëpunimi ynë si parti nacionaliste ka qenë i mirë deri më sot, por është domosdoshmëri që të forcohet e shtrihet më tej. Z.Arben Hoxha tha gjithashtu se të gjitha partitë e djathta kanë të njëjtin kundërshtar politik e për këtë arsye duhet të jenë sa më pranë njëra-tjetrës e të bashkuara me qëllim që ta largojnë të majtën nga pushti. Ai tregoi për eksperiencën e pasur që kanë dy partitë Balli e PLL në bashkëpunimin e tyre në këto vite pluralizëm. Më pas ai bëri një apel të sinqertë për PLL duke thënë se si parti motra duhet të kuptojmë që të mirën dhe të keqen e kemi të përbashkët. Në fund ai i uroi konferencës punime të mbara dhe suksese.

Në të njëjtën linjë diskutimi ishte edhe kryetari i Partisë Konservatore z.Armando Ruço i cili tha se "ne si parti kemi dalë nga PLL dhe si të tilla janë shumë pak gjëra që na dallojnë. Ne besojmë se dy partitë tona mund të bëjnë më shumë për rritjen e interesit të shqiptarëve për monarkinë. Në fund ai uroi nxehtësisht konferencën e degës së Tiranës ndërsa si përgjigje mori duartrokitjet e sinqerta të legalistëve.

Kurt Kola: Të kërkoni referendum për Monarkinë

Kurt Kola kryetar i shoqatës së ish-të Përndjekurve politikë tha në përshëndetjen e tij se PLL është në rrrugë të mbarë dhe suksesi i saj do të jetë i garantuar. Më pas si theksoi se "Ju duhet të krijoni kushtet që në Shqipëri të bëhet referendumi për formën e regjimit Monarki apo Republikë. Ju jeni një parti monarkiste dhe duhet të punoni fort që monarkia të triumfojë në Shqipëri." Më pas ai falenderoi kryetarin e PLL për ndihmën e dhënë në parlament për dëmshpërblimin e të burgosurve politikë.

Ndërsa z.Afrim Haçi kryetar i Shoqatës së ish të Përndjekurve Antikomunistë do të shprehej se "ne duam që e djathta të vijë në pushtet dhe Shqipëria të qeveriset nga një e djathtë reale." Ai tha se PLL është mishëruesja i idealizmit të djathtë dhe se ajo ka një barrë morale para shqiptarëve që të luajë rolin politik që i takon në kuadër të së djathtës. Në fund z.Haçi uroi me fjalë të zgjedhura konferencën ndërsa legalistët e duartrokitën nxehtësisht përshëndetjen e tij.

Besim Ndregjoni: Ne mbështesim PLL-në!

"Ne kemi mbështetur PLL në votimet e fundit" deklaroi z.Besim Ndregjoni në fjalën e tij përshëndetëse në emër të shoqatës Mbarëkombëtare për Integrimin e ish të Burgosurve Politikë. Në fjalët e tij të zgjedhura z.Ndregjoni do të theksonte bashkëpunimin e frytshëm që ka pasur shoqata që ai drejton me PLL-në dhe premtoi se ky bashkëpunim i sinqertë do të vazhdonte në të ardhmen. Më pas ai do të sulmonte qeverinë e Nanos për injorimin që po u bën ish të burgosurve duke mos u dhënë të drejtën e tyre për dëmshpërblimin e viteve të burgut. Më pas z.Ndregjoni kërkoi nga legalistët që të ishin të gjithë në protestë kundër qeverisë Nano më 20 mars në sheshin "Skënderbej". Ai tha se duhet të "jemi të bashkuar për datën 20 mars por edhe më mbrapa deri në largimin e Fatos Nanos!". Urimet e tij në fund për PLL dhe Mbretin Leka si dhe fjalët inkurajuese për konferencën, morën si shpërblim një duartrokitje të zgjatur të delegatëve tiranas.

Pas përshëndetjeve z.Kolgjini u kërkoi mediave dhe të ftuarve që të lejonin konferencën të zhvillonte punimet sipas programit "me dyer të mbyllura".

Spahiu: Falenderoj degën e PLL Tiranë

Kryelegalisti Spahiu, duke marrë fjalën, bëri një rezyme të aktivitetit të PLL Tiranë, duke çmuar lart shpirtin e sakrificës dhe idealizmin e shumë prej drejtuesve e anëtarëve të kësaj dege. Më tej ai vuri në pah se dega e Tiranës është dega më e madhe e vendit dhe si e tillë rëndësia e saj është e padiskutueshme për PLL-në. Ai më tej u ndal në punën e drejtuesve të degës së Tiranës duke çmuar se ajo ka qenë një punë mjaft cilësore dhe profesionale. Ai tha se pritja e bërë Familjes Mbretërore në Rinas ka qenë madhështore dhe kjo i dedikohet kryesisht aktivitetit të legalistëve tiranas. Më pas ai u shpreh se kjo degë ka merita të padiskutueshme edhe në ceremoninë e përcjelljes për në banesën e fundit, të Nënës Mbretëreshë Geraldina.

Spahiu analizoi edhe aktivitetin politik e elektoral të kësaj dege duke theksuar se ajo ka përballuar me sukses disa fushata elektorale siç ishin ato të vitit 2001 dhe të vitit 2003. Ai u shpreh se kandidatët legalistë në zgjedhjet e fundit lokale kanë qenë mjaft cilësore dhe për këtë merita u takon drejtuesve të kësaj dege. Më pas kryelegalisti u ndal në rezultatet e këtyre zgjedhjeve duke bërë një bilanc në rang vendi si dhe për rrethin e Tiranës.

Në fund të fjalimit z.Spahiu u kërkoi strukturave të degës së Tiranës që të angazhohen maksimalisht për protestën e 20 marsit. Ai tha se "Lëvizja Nano Ik" është një kushtrim për të gjithë shqiptarët. Në fund z.Spahiu i uroi konferencës punime të mbara dhe stafit të ri drejtures që do të dalë nga konferenca suksese të mëtejshme.

Pas përshëndetjes së kryetarit të PLL konferenca kaloi në fazën e pyetje përgjigjeve e cila nuk zgjati shumë. Ndërsa ato pak pyetje që u bënë, u fokusuan rreth qendrimit të tre deputetëve të sanksionuar nga Këshilli Kombëtar Balla, Kollçaku dhe Fezollari. Në këtë konferencë, megjithëse ishte kërkuar të vinte ish-kryetari i degës së Tiranës z.Sadedin Balla, ai nuk erdhi. Po ashtu edhe diskutimet ishin të shkurtra dhe kryesisht rreth procedurave të konferencës.

Si u zgjodhën kandidatët

Pas leximit të curriculum-eve të kandidatëve nga ana e drejtuesit të seancës z.Neritan Kolgjini, të dy kandidatët e shpallur z.Faruk Borova dhe z.Blerim Kamberi mbajtën nga një fjalim ku treguan se si e shikonin ata të ardhmen e degës së Tiranës në rast se do të zgjidheshin.

Në fjalën e tij para delegatëve, kandidati për kryetar i Degës së PLL Tiranë, aktualisht Drejtor i Departamentit të Marrëdhënieve me Jashtë të PLL, z.Faruk Borova, ndër të tjera theksoi: "Mendoj se Dega e Tiranës, si në aspektin sasior ashtu edhe në atë cilësor - duhet të formojë bërthamën e PLL. Ideja e kryetarit të PLL, z.Spahiu - për angazhimin masiv të intelektualëve tiranas autoktonë dhe me reputacion, si dhe marrja prej tyre e drejtimit të Degës së PLL, kanë qenë shtysa për kandidimin tim për kryetar të saj. Ky angazhim, që mbi të gjitha është barrë dhe detyrim, nuk ka asnjë motiv tjetër përveçse dëshirës për të kontribuar për rritjen e formatit politik dhe intelektual të Degës dhe partisë.

Mendoj se mund të vë në dispozicion të partisë njohuritë e mia në diplomaci, ekonomi, gjuhët e huaja, njohjet e mia në ambientet qytetare dhe intelektuale tiranase, e mbi të gjitha përvojën time shumë të gjatë organizative, administrative e teknike.

Për shkak të njohurive të thella rreth historisë dhe rrugëve të realizimit të aspiratës sonë kombëtare, që përbën edhe boshtin kryesor të programit të PLL, mendoj se kontributi im për partinë dhe strukturat drejtuese të saj do të jetë maksimal.

Koncepti im dhe aftësitë e kultivuara për të punuar në grup, mendoj se janë arsye të mjaftueshme për të merituar respektin dhe votën tuaj për detyrën e rëndësishme të kryetarit të Degës së PLL Tiranë.

Në platformën time të punës si kryetar i Tiranës (gjithmonë nëse zgjidhem), si kollona kryesore kam vlerësuar afrimin e intelektualëve dhe hapjen e dyerve të partisë për ta, gjithmonë brenda frymës së programit dhe përqasjes me alternativën legaliste të zhvillimit të vendit dhe objektivave politikë prioritarë dhe perspektivë", - e mbylli fjalën e tij z.Borova.

Ndërsa kandidati tjetër z.Blerim Kamberi theksoi se ai ishte në korent të të gjitha zhvillimeve në PLL dhe për këtë arsye kishte një vizion mjaft të qartë për të ardhmen e saj. Kamberi theksoi se ai e dinte se ku duhej punuar më tepër dhe se çfarë kishte nevojë dega e Tiranës që të rriste rezultatet e saj.

Ai premtoi se nëse do të zgjidhej kryetar, do të bënte një punë të diferencuar e më cilësore me rininë dhe forumet e tjera të degës. Ai paraqiti para delegatëve një platformë ku theksi vihej në punën sistematike e të dokumentuar. Kamberi tha se do të evidentojmë çdo burim potencial që mund të rrisë cilësinë e degës së PLL. Ai më tej tha se do të krijonte mundësitë që të rinjtë e kësaj dege të mund të ndiqnin kurset specializuese në kuadër të iniciativës për politikanë të rinj në Institutin Demokratik Amerikan dhe në atë Republikan.

Në fund z.Kamberi kërkoi nga legalistët mbështetjen pa rezerva të tyre në rast se ai zgjidhej kryetar.

Komisioni i votimit dhe rezultatet

Pas këtij prezantimi, u propozua komisioni i votimit i cili pas përzgjedhjes u aprovua me këtë përbërje: Artan Tujani (kryetar) dhe Sami Hasrama e Muhamet Isa (anëtarë).

U lexua edhe lista e kandidatëve për në komitetin e ardhshëm drejtues prej 22 vetësh nga të cilët do të fitonin vetëm tetë prej tyre.

Procedurat e votimit ishin miratuar paraprakisht nga komiteti drejtues i degës dhe gjithë kjo fazë kaloi pa probleme.

Pas katër orësh nga fillimi i konferencës, kryetari i komisionit të votimit shpalli rezultatet për kryetar të degës dhe më pas edhe tetë emrat fitues për në Komitetin e ri drejtues.

Për kryetar, fitorja i buzëqeshi z.Blerim Kamberi i cili mori 60 vota nga 100 gjithsej. Ndërsa rivali i tij z.Borova mori 38 vota. Dy vota dolën të pavlefshme (shihni faksimilen e procesverbalit).

Në këtë konferencë numri i përgjithshëm i delegatëve ishte mbi 130, ndërsa vetëm 100 morën pjesë në votim.

Për Komitetin drejtues tetë fituesit ishin: Hamit Kurti, Flutura Përleka, Neritan Kolgjini, Astrit Kola, Xhemal Disha, Gerta Toptani, Petrit Kaziu dhe Luan Kaceli.

Pas shpalljes së rezultateve dy rivalët i dhanë dorën njëri tjetrit dhe z.Borova i uroi suksese kryetarit të zgjedhur z.Kamberi.

Mblidhet Komiteti Drejtues i degës së Tiranës

Në fund të konferencës, po në atë sallë, u zhvillua menjëherë një mbledhje e parë e komitetit të ri drejtues, e cila u mbikëqyr nga Kryetari e Nënkryetari i partisë, kryetari e sekretari i Senatit dhe nga kryetari i Këshillit Kombëtar. Në këtë mbledhje u shpall lista e re të Komitetit drejtues prej mbi 30 vetësh ku përveç të zgjedhurve me votë direkte, ishin të kooptuar të gjithë kryetarët e nëndegëve në bashki, minibashki e komuna.

Në mbledhje u zgjodhën me konsensus, pas disa propozimeve, dy nënkryetarë të degës së Tiranës të cilët ishin: Faruk Borova (i propozuar nga kryetari Kamberi) dhe z.Hamit Kurti (i propozuar nga z.Kolgjini).

Mbledhja përcaktoi disa detyra për të ardhmen dhe u la që mbledhja e ardhshme të zhvillohej ditën e shtunë (dt.13 mars) ku do të formalizohej edhe pjesa tjetër e komitetit drejtues, e cila do të përcaktonte kandidaturat për sekretar të degës dhe drejtuesit e departamenteve si dhe kalendarin për zgjedhjet në Nëndegët ku nuk janë zhvilluar ende zgjedhjet.

Kjo mbledhje në fund të konferencës ishte një sukses i parë i drejtuesve të rinj të saj dhe një ogur i mbarë për legalistët e Tiranës. Si konferenca ashtu edhe mbledhja e KD shkoi mjaft mirë dhe pa as më të voglin problem.

Korresp. "Atdheu"

Raport i Komitetit Drejtues të Degës PLL Tiranë mbajtur nga z.Hamit Kurti

PLL Tiranë, puna jonë në 3 vite

Të nderuar drejtues të PLL

Të nderuar miq e të ftuar

Të nderuar delegatë të Konferencës

Zonja dhe zotërinj

Legalistët tiranas vijnë sot në këtë konferencë me një bilanc më të pasur punësh, ngjarjesh e rezultatesh se çdo herë tjetër. Dy-vjetëshi që ka kaluar, që nga zhvillimi i konferencës së fundit, ka qenë i mbushur plot e përplot me evenimente të paharrueshme për legalistët e degës së Tiranës ku më e rëndësishmja ka qenë pritja e Familjes Mbretërore në Rinas më 28 qershor 2002. Por gjithashtu ky interval kohor ka qenë i ngarkuar edhe me ngjarje elektorale të rëndësishme siç kanë qenë zgjedhjet parlamentare të vitit 2001 (të cilat përfshihen në bilancin e kësaj konference zgjedhore) si dhe zgjedhjet lokale të vitit 2003.

Ne si degë Tirane, kemi rastin të tregojmë sot punën tonë të mirë e aktivitetin tonë për këtë periudhë mbi 2-vjeçare, duke shënuar njëkohësisht edhe mangësitë e mosrealizimet tona. Kjo konferencë që zhvillohet sot në pragun e datave përkujtimore të Prillit të Monarkisë shqiptare, kemi bindjen e thellë se do të arrijë të bëjë bilancin e duhur të punëve duke i dhënë gjithsekuj atë që i takon. Atij që ka punuar mirë e ka dhënë kontribut për forcimin e PLL, do t'i jepen meritat, ndërsa atij që nuk ka punuar siç duhet, do t'i thuhen ndershmërisht të metat.

Zonja dhe zotërinj!

Dega e PLL Tiranë, duke qenë përfaqësuesja e idesë monarkiste në një ambjent siç është kryeqyteti, Tirana, ka synuar që të krijojë një imazh publik sa më cilësor e me nivel të dallueshëm intelektual. Për këtë arsye deri më sot është kërkuar që drejtuesit kryesorë të kësaj dege të jenë njerëz me aftësi të dallueshme intelektuale dhe personalitete edhe në aspektin moral. Dega e PLL Tiranë ka punuar që të vendosë marrëdhënie partneriteti me të gjitha degët e partive opozitare të Tiranës, dhe deri në njëfarë mase kjo ka pasur rezultat. Kjo është dukur më mirë gjatë fushatave elektorale si dhe në raste festash apo datash përkujtimore.

Dega e PLL Tiranë ka mbajtur herë pas herë qendrimet e saj politike në përputhje të plotë me politikën e Partisë sa herë që ka qenë rasti për t'u shprehur në një sens të tillë. Drejtuesit e kësaj dege kanë bërë deklaratat e duhura në kohën e duhur, për çdo problem politik të rrafshit lokal sidomos kur janë diskutuar problemet e zgjedhjeve apo problemet e koalicioneve me partitë e tjera. Legalistët e degës së Tiranës, nuk u janë shmangur asnjëherë detyrimeve të tyre politike apo angazhimeve të tyre elektorale.

Duke qenë se kjo degë përfaqëson një rreth shumë të madh siç është rrethi i Tiranës, është e kuptueshme se ajo ka mbi shpinë një volum pune më të madh se ai i çdo dege tjetër. Për këtë arsye, kjo degë ka adoptuar deri më sot një skemë pune e cila e ka parcializuar aparatin drejtues sipas njësive administrative vendore nëpër Nëndegë, e njëkohësisht duke i nxitur drejtuesit e nëndegëve nëpërmjet kooptimit në Komitetin Drejtues të Degës. Kjo skemë mund të themi me plot gojën se ka funksionuar në pjesën më të madhe të saj, prandaj është një eksperiencë që vlen të çohet më tej e të përsoset.

Që nga konferenca e fundit zgjedhore, dega e PLL Tiranë ka pasur një rritje të ndjeshme në aspektin cilësor të drejtuesve të saj. Rreth 60 për qind e Komitetit Drejtues të dalë nga konferenca e zhvilluar në janar të vitit 2001 kanë qenë me arsim të lartë. Pas këtij hopi cilësor në aparatin kryesor drejtues të degës, u punua që kjo frymë të shtrihej, me sa ishte e mundur, edhe nëpër nëndegë. Sot mund të themi se kemi një bilanc mjaft pozitiv, pasi në nëndegët e minibashkive të Tiranës, shumica dërrmuese e kryetarëve të këtyre nëndegëve janë me arsim të lartë e të kualifikuar.

Por përveç aspektit cilësor, dega jonë ka pasur rritje edhe në numrin e anëtarëve të saj. Ajo që është për t'u shënuar në këtë aspekt është fakti se anëtarët e rinj janë të moshave të ndryshme por sigurisht pjesa më e madhe janë të rinjtë. Deri më sot është bërë një punë sistematike që të dokumentohet me të dhënat e duhura dhe me saktësinë maksimale çdo anëtar i degës, dhe është punuar që emrat e këtyre anëtarëve të kompjuterizohen, proces i cili pret të përfundohet në të ardhmen.

Zonja dhe zotërinj delegatë!

Siç e cekëm në fillim, kjo konferencë vjen pas dy palë zgjedhjesh, ato të vitit 2001, dhe këto të fundit për pushtetin lokal. Eshtë për ta thënë që në fillim se dega e PLL Tiranë ka qenë në krye të punëve që i takonin asaj për të bërë dhe mund të themi se ajo e ka kryer me nder detyrën e saj përballë elektoratit legalist e simpatizantëve të monarkisë. Dega e Tiranës ka qenë dhe është dega prej ku vilet numri më i madh i votave për PLL-në. Edhe në zgjedhjet e fundit, që ne garuam më vete si parti, arritëm të dalim përsëri dega me numrin më të lartë të votave në shkallë kombëtare.

Vlen për të përmendur se në zgjedhjet e vitit 2001, ne si degë kemi marrë pjesë me mish e me shpirt në të gjitha aktivitetet e opozitës dhe kjo është parë e vlerësuar qoftë nga drejtuesit e PLL, ashtu edhe nga krerët e partive të tjera. Flamuri ngjyrë floriri i PLL, ka shkëlqyer në çdo takim e miting të "Bashkimit për Fitore". Po ashtu edhe në të gjitha protestat që ka organizuar opozita për manipulimet zgjedhore, dega e PLL Tiranë ka qenë gjithmonë e gatshme të kontribojë me resurset e saj njerëzore në mbarëvajtjen e suksesin e çdo tubimi.

Por gjithsesi zgjedhjet e vitit 2001 kanë qenë më të lehta për t'u përballuar në krahasim me ato të fundit për pushtetin lokal që u zhvilluan ndërmjet 12 tetorit dhe 28 dhjetorit 2003.

Në këto zgjedhje të fundit, dega jonë arriti një rezultat, i cili, i krahasuar me të shkuarën, është shumë herë më i lartë, ndërsa i përballur me synimet që kishim ne si degë, nuk është në shkallën që ne kërkonim. Me pak fjalë mund të themi se ky rezultat nuk i kënaqi legalistët e Tiranës, dhe nuk i justifikoi shpenzimet e bëra dhe energjitë e harxhuara. Gjithsesi, rezultati i marrë ku pesëfishuam këshilltarët komunalë dhe arritëm të fusim edhe disa këshilltarë bashkiakë, është një rezultat që nuk mund të injorohet. Si qershia mbi tortë vjen edhe fakti që ne kemi sot këshilltar edhe në Këshillin Bashkiak të Bashkisë së madhe Tiranë. Njëkohësisht kemi disa këshilltarë në bashkitë e Vorës dhe të Kamzës. Kemi edhe këshilltarë nëpër minibashki dhe nëpër komuna.

Ne kemi bindjen se ky rezultat do të ishte disafish më i lartë nëse socialistët nuk do të kishin manipuluar listat e votimit. Manipulimi me listat ishte pjesa më e theksuar, pasi ishte një "risi", një "novitet" socialist, por nga ana tjetër u përdorën edhe marifetet e vjetra të votëvjedhjes në këto zgjedhje, siç janë mbushja e kutive të votimit me fletë të parapërgatitura, apo blerja fizike, e drejtpërdrejtë dhe e paskrupullt e votës. Këto manipulime janë pasqyruar edhe në raportet e ndërkombëtarëve të OSBE/ODIHR etj.. Por gjithsesi difektet e mungesës së njerëzve tanë në lista, duhet bërë çmos që të shmangen në të ardhmen dhe secili duhet të përpiqet maksimalisht t'ia arrijë të shënojë emrin nëpër listat e votimit. Një problem tjetër që doli në këto zgjedhje ishin komisionet e qendrave të votimit dhe ato të nivelit të dytë KZQV, në të cilat siç dihet, ne nuk kishim anëtarë, për shkak të vendimit të padrejtë të Kolegjit Zgjedhor të Gjykatës së Apelit, e cila na e hoqi të drejtën e anëtarit që e gëzonim me marrëveshjen e bërë në kuadër të Bashkimit për Demokraci të vitit 2000. Mënyra se si dolën rezultatet dhe se si u prapësuan këto rezultate, duke zhvilluar një raund të dytë zgjedhjesh më 28 dhjetor 2003, tregon më së miri manipulimin e atij procesi zgjedhjesh.

Një handikap tjetër i atyre zgjedhjeve kanë qenë mungesa akute e fondeve. Siç ka thënë Napoloni: "Paraja bën luftën!" Lufta jonë politike e elektorale ishte shumë e zorshme të fitohej pa financime. Por të paktën ne kemi faqen e bardhë e nuk jemi përzier e as do të përzihemi ndonjëherë me financime të dyshimta apo të zeza siç shohim se bëjnë partitë e tjera në pushtet apo në opozitë.

Gjithashtu një fenomen tjetër negativ në këto zgjedhje ka qenë presioni nga partitë që i konsiderojmë aleate, të cilat nuk e panë me sy të mirë garimin më vete të PLL. Për këtë shkak kandidatët tanë nëpër bashki, minibashki e komuna janë atakuar fort pikërisht nga partitë aleate. Ky fenomen është i dokumentuar dhe i njohur nga të gjithë tashmë. Nuk po shkojmë më tej në analizën e këtij fenomeni, por mund të themi se kjo është një lojë e pandershme politike që tregon, në fund të fundit, se partitë e opozitës nuk janë aq të pjekura demokratikisht saç duan të hiqen.

Por sot nuk jemi këtu vetëm për të parë sulmet e padrejtësitë që na kanë bërë të tjerët. Kemi edhe ne kusuret tona që mund t'i themi sot hapur në këtë konferencë. Eshtë vënë re që ka anëtarë të degës, funksionarë apo anëtarë forumesh të larta të PLL që në momente të rëndësishme u shmangen detyrimeve të tyre statutore. Nuk po i përmendim me emër, sepse nuk është në qëllimin e kësaj konference të merret me ta, por disa prej atyre emrave janë mjaft të njohur për inaktivitetin e indiferencën e tyre. Jo vetëm kaq, por shkojnë deri atje sa të sulmojnë herë herë edhe hapur PLL dhe politikën e saj. Ky fenomen destruktiv duhet të marrë fund, pasi këta njerëz janë të njohur dhe, për këtë aktivitet, vjen dita dhe mund ta paguajnë rëndë faturën e tyre. Ne ruajmë bindjen se këta njerëz, të cilët njihen për legalistë dhe janë anëtarë forumesh të larta të Partisë, nëse nuk angazhohen në degën e Tiranës, atëherë ata nuk meritojnë të mbajnë në xhep më tej teserën e PLL.

Të nderuar zonja dhe zotërinj

Dega e PLL Tiranë, përveç detyrimeve të saj politike e elektorale, ka pasur fatin të organizojë takime të tilla siç janë për shembull pritja e Familjes Mbretërore në Rinas, apo ceremonia e varrimit të Nënës Mbretëreshë Geraldina. Të gjithë duhet të kujtojmë ato çaste të rralla kur Mbreti dhe Familja Mbretërore zbritën në tokën shqiptare në Rinas dhe sheshi i aeroportit "Nënë Tereza" ishte i mbushur plot simpatizantë të Monarkisë. Ai entuziazëm dhe ai sfond flamujsh e pankartash nuk ishte gjë tjetër, veçse puna dhe mundi i degës së PLL Tiranë dhe askush nuk mund ta mohojë këtë. Ajo pritje madhështore u organizua në detaje nga drejtuesit e PLL në bashkëpunim me aktivistët më me peshë të degës së Tiranës.

Po ashtu edhe ceremonia funebre e Nënës Mbretërshë Geraldina ka qenë, në pjesën më të madhe të saj, kontribut i legalistëve të degës së Tiranës. Që në momentet e homazheve e përgatitjet në sallonin zyrtar të Shtëpinë së Ushtarakëve, më pas në Katedralen Katolike, e deri në varrezat e Sharrës, - legalistët tiranas janë ata që kanë shoqëruar kortezhin mortor dhe i kanë bërë nderimet e duhura Nënës së Kombit.

Dega jonë ka dhënë shembuj angazhimi, sakrifice e vetmohimi, të cilat janë të njohura nga të gjithë dhe nuk ka nevojë që ne të zgjatemi më tej.

Rroftë Nalt Madhnia e Tij Leka i Parë - Mbret i Shqiptarëve!

Të nderuar legalistë

Një ndër problemet më të mprehta për çdo parti dhe degë partie, është çështja e organizimit dhe strukturave kapilare. Ne kemi synuar gjatë periudhës së kaluar dy-vjeçare, të ngrejmë seksionet sipas parimit "një seksion për çdo qendër votimi". Për hir të së vërtetës duhet thënë se ne nuk ia kemi arritur ende kësaj dhe ky duhet të jetë një ndër objektivat kryesorë të punës së ardhshme të degës.

Një punë më e efektshme është dashur të bëhet me elementin rinor dhe me forumin e Gruas. Përpjekjeve spontane dhe rastësore u duhet shtuar një angazhim serioz i strukturave drejtuese të degës, që këto dy forume të formësohen e strukturohet në detaje.

Ndërsa është më ndryshe puna me veteranët e senatin e degës, të cilët janë një strukturë solide dhe gjithmonë e gatshme në detyrat që ka sipas statutit. Ky forum "pleqsh të urtë" ka dhënë një ndihmesë të pakursyer gjatë fushatave elektorale dhe ka shërbyer në mjaft raste si filtri kryesor për politikën e përcaktimit të kandidaturave.

Në aspektin organizativ në rang dege, është e drejtë e ligjshme e jona të themi se kemi ecur mjaft mirë, megjithëse ka ende mjaft vend për përmirësime sidomos në disa nëndegë ku puna nuk ka qenë cilësore e sistematike. Ende janë disa komuna ku nuk ka seksione siç është rasti i Pezës apo ndonjë tjetër më flagrant.

Por kryesor qëndron fakti se dega e PLL Tiranë është një organizëm i gjallë e vital dhe tashmë ajo është kthyer në një makinë që nuk ndalet, pavarësisht pengesave e vështirësive që mund të hasë.

Ne legalistët e Tiranës kemi një barrë mjaft të rëndë mbi shpinë, dhe me punën tonë kemi treguar e do të tregojmë që jemi të aftë ta çojmë përpara e ta finalizojmë idealin zogist me rikthimin e Monarkisë me në krye NMT Leka I-rë - Mbret i Shqiptarëve.

Kjo konferencë ka elementët e duhur për të shtruar bazat që na çojnë drejt qëllimesh të mëdha politike. Anëtarësia e sotme e PLL përbëhet prej njerëzish të kualifikuar: juristë, mjekë, arsimtarë, ekonomistë, financiarë, inxhinierë e të tjerë. Gjithë puna jonë duhet të përqendrohet në këta elementë që ta bëjnë të pavdekshëm idealin zogist e ëndrrën e Shqipërisë Etnike.

Ne jemi në thelb antikomunistë e nacionalistë dhe kjo duhet të kuptohet nga të gjithë shqiptarët e interesuar për politikën. Legalistët e Tiranës kanë qenë e do të jenë në ballë të protestave kundër qeverisë Nano e çdo qeverie të dalë nga klanet ish-komuniste, sot me emër tjetër. Shqiptarët janë një komb fisnik e nuk meritojnë të nëpërkëmben kështu siç po bën klani qeverisës në fuqi.

Kjo konferencë ka rastin të përçojë mesazhet e duhura edhe për ndërkombëtarët, të cilët duhet të vlerësojnë seriozisht protestën e shqiptarëve ndaj qeverisë.

Si përfundim, apeli ynë u drejtohet të gjitha shtresave të shoqërisë shqiptare që të kthejnë sytë nga PLL, sepse ajo përfaqëson idealet më të mira të ngritjes e fuqizimit të kombit shqiptar.

Rroftë NMT Leka I-rë - Mbret i Shqiptarëve!

Rroftë kombi shqiptar e Shqipnia Etnike!

Ju faleminderit

Drejtuesit e opozitës zhvilluan takimin e radhës me intelektualët dhe qytetarët lushnjarë

Spahiu: Karton të kuq Nanos deri në zgjedhjet e fitores

Ditën e mërkurë, më datën 3 mars 2004, drejtuesit e Opozitës; Berisha, Spahiu, Mediu, Laço, Ngjela e Alimadhi, ishin të ftuar nga intelektualët dhe qytetarët lushnjarë në një takim madhështor, i cili u zhvillua në sallën e Pallatit të Kulturës "Vaçe Zela" të qytetit të Lushnjes.

Në këtë takim folën biznesmenë, intelektualë të fushave të ndryshme dhe politikanët-drejtues të opozitës - të ardhur enkas nga Tirana.

Ky takim i radhës i panelit drejtues opozitar me intelektualët dhe qytetarët lushnjarë, u karakterizua nga një bashkëbisedim i ngrohtë, i cili konfirmoi rezonancën e mendimit intelektual të elitës qytetare dhe intelektuale lushnjare me opsionet dhe vizionin e opozitës për thellimin e mëtejshëm të objektivave politike në kuadër të Lëvizjes mbarëpopullore "Nano ik". Në emër të intelektualëve dhe qytetarëve lushnjarë në takim përshëndeti mjeku Vangjel Stambolliu, i cili i ftoi bashkëqytetarët të shkunden nga indiferenca dhe të marrin pjesë në votimet e pritshme që do të shënojnë fitoren e Opozitës. Po në këtë frymë, juristi Arens Çela i ftoi të rinjtë lushnjarë të përfshihen në këtë lëvizje qytetare, "qëllimet politike të së cilës përplotësojnë idealet dhe interesat e gjithë rinisë shqiptare". "Edhe Kushtetuta na e jep të drejtën ta ndryshojmë këtë realitet tragjik", - e përfundoi fjalën e tij zoti Çela.

Edhe shkrimtari Halil Jaçellari në fjalën e tij dënoi ashpër keqqeverisjen e vendit dhe, si shembull kuptimplotë, solli hakmarrjen politike të qeverisë ndaj Lushnjës, që "ia shtoi orët e errësirës qytetit - sapo lushnjarët i thyen hundët PS duke votuar për kandidatin e PD, si kryetar të bashkisë Lushnjë".

***

Në fjalën e tij, kryetari i PLL z.Ekrem Spahiu, ndër të tjera tha: "Pakënaqësia e madhe e qytetarëve shqiptarë ndaj qeverisë socialiste dhe kryeministrit Nano, nuk mund të kufizohet në këtë sallë të vogël, sado e madhe që është, por ju jeni përfaqësuesit e qytetarëve të Lushnjes që keni arritur të hyni në këtë sallë të tejmbushur, që është dëshmi e dëshirës së madhe të njerëzve për të marrë pjesë në këtë takim. Me kartonat e kuq që mbani në duar, që janë simbolikë kuptimplote për Nanon dhe kabinetin e tij, ju qytetarët lushnjarë dëshmoni se jeni përfshirë totalisht në Lëvizjen mbarëshqiptare 'Nano ik'".

Më tej z.Spahiu vazhdoi: "Kësaj Lëvizjeje i janë bashkëngjitur shumica e intelektualëve dhe shqiptarëve, pa dallim bindjeje partiake, sepse i ka bashkuar papunësia, mungesa e dritave, taksat e larta, ngritja e çmimeve të bukës, telefonisë, energjisë elektrike, karburanteve etj., që e kanë varfëruar skajshëm jetën e mbarë shqiptarëve. Ata janë bashkuar për të protestuar kundër korrupsionit, trafiqeve dhe kontrabandës qeveritare. Ata janë të bashkuar sepse me qeverisjen socialiste tragjeditë e tyre s'kanë të sosur. Vetëm gjatë këtyre dy muajve, kemi përjetuar tragjedinë e 9 Janarit, tragjedinë e Selenicës, përmbytjen e Shqipërisë nga reshjet, megjithëse për sigurimin e rrjetit të kullimit, kanalizimit dhe hidrovoreve, janë financuar dhe shpenzuar 120 milionë $ nga buxheti i shtetit".

Duke e mbyllur fjalën e tij, z.Spahiu vijoi: "Këto tragjedi dhe gjithë ky mjerim, nuk vijnë se Perëndia e ka ndëshkuar Shqipërinë dhe shqiptarët, por sepse na ka ndëshkuar qeveria socialiste dhe kryeministri Fatos Nano, prandaj shqiptarët janë të bashkuar dhe shprehin pakënaqësinë e tyre ndaj Nanos dhe qeverisë së tij. Unë kam bindjen se Kartoni i Kuq që ju mbani sot, do të qëndrojë i ngritur lart deri në largimin e kryeministrit Nano dhe krijimin e një qeverie të Përkohshme - që do ta çojë vendin drejt zgjedhjeve të parakohshme, të lira dhe të ndershme".

Fjala e z.Spahiu u prit, u shoqërua dhe përfundoi me duartrokitje e aprovim nga të pranishmit.

Korresp. i "Atdheu"

Delegacioni i lartë i KE i kryesuar nga z.Shvimer, takohet me drejtuesit e Opozitës

Opozita: Do t'i shkojmë deri në fund Lëvizjes "Nano ik"

Sekretari i Përgjithshëm i Këshillit të Evropës (KE), z.Valter Shvimer dhe anëtarët e delegacionit që ai kryeson, zhvilluan takime me drejtuesit e Opozitës; Berisha, Spahiu, Mediu, Laço dhe Ndoka

Ditën e enjte, më datë 4 mars 2004, erdhi për një vizitë zyrtare në vendin tonë Sekretari i Përgjithshëm i Këshillit të Evropës, z.Valter Shvimer, i shoqëruar nga Drejtori i Përgjithshëm për Çeshtjet Politike të KE, nga zëvendës/Drejtori i Kabinetit, nga përfaqësuesi i Zyrës së KE në Tiranë, etj..

Në takimin e panelit drejtues opozitar me zotin Shvimer dhe delegacionin e KE, të realizuar në mjediset e Kryesisë së Kuvendit, përfaqësuesi i lartë evropian shprehu se "shqetësimi ynë kryesor janë zgjedhjet e ardhshme në Shqipëri, të cilat duhet të jenë të lira, të ndershme dhe transparente". Duke vazhduar më tej, zoti Shvimer u bëri të ditur drejtuesve të opozitës se në takimin e tij me përfaqësues të Qeverisë - temë e bisedës kish qenë e drejta e opozitës në parlament dhe problemet e saj me qeverinë dhe maxhorancën. Zoti Shvimer u deklaroi krerëve të opozitës se "... personalisht jam i interesuar për çdo lloj demonstrimi paqësor, por edhe për një dialog konstruktiv dhe pozitiv midis palëve, për të kërkuar alternativa".

Duke e marrë fjalën në emër të drejtuesve të Opozitës, kryetari i PD, zoti Berisha, vlerësoi rëndësinë, seriozitetin dhe nivelin e këtij takimi dhe e shfrytëzoi kohën e tij të fjalës për t'i bërë të ditur delegacionit të KE dhe zotit Shvimer motivet e lëvizjes opozitare, "Nano ik". Sipas zotit Berisha "motivet janë të shumta, por sëpari qëndron dhunimi sistematik i zgjedhjeve dhe shkatërrimi i procesit zgjedhor që nga viti 1997 e deri më sot". "Së dyti - është korrupsioni dhe lidhjet e qeveritarëve me trafiqet kriminale dhe kontrabandën", që, sipas kreut të opozitës "sistetizoheshin në rehabilitimin dhe rikthimin në qeveri të simboleve të damkosur nga vetë Nano, të tipit Baçi e Naçi. Së treti - është bllokimi sistemtatik i punës së komisioneve parlamentare dhe i së drejtës kushtetuese të opozitës për investigim, sidomos e vërejtur kjo pas tragjedive të fundit që vendi ka kaluar. por edhe pas bllokimit të ngritjes së Komisionit parlamentar kërkuar nga opozita për aksidentin e Shkallnuerit", - i cili sipas shefit të opozitës "u fsheh".

Zoti Berisha e garantoi zotin Shvimer dhe delegacionin e KE se Lëvizja "Nanon ik" synonte restaurimin e procesit zgjedhor në Shqipëri drejt parametrave dhe standarteve europiane për zgjedhje të lira dhe të ndershme. Gjithashtu, z.Berisha e siguroi Sekretarin e Përgjithshëm të KE se "opozita në parlament do të votojë të gjitha ligjet dhe procedurat e nevojshme për të shpejtuar procesin e integrimit të vendit". Në këtë kuadër, në emër të opozitës zoti Berisha, i kërkoi zotit Shvimer ndihmë konkrete për zgjedhjet e ardhshme në Shqipëri, për çka edhe iu sigurua një premtim i sinqertë nga përfaqësuesit e lartë europianë, krahas ndihmës që do të japë edhe misioni i prezencës së OSBE-ODIHR-it.

Zoti Shvimer mori garanci të plota nga të gjithë krerët e opozitës për një "Lëvizje gandiste-paqësore".

Ky takim u mbyll pas një bashkëbisedimi konstruktiv dhe mirëkuptimi reciprok lidhur me aksionin politik të opozitës në kuadër të Lëvizjes mbarëshqiptare "Nanon ik", si dhe të pranisë e të ndihmës institucionale të KE për një ecuri normale të proceseve të reformave në Shqipëri dhe për zgjidhjen me mjete politike të krizës aktuale - ndërmjet të cilave spikat mekanizmi i "dialogut dypalësh", i propozuar nga përfaqësuesit e lartë europianë, dhe i pranur nga drejtuesit e opozitës - "vetëm në rastet kur ky dialog do t'i shërbente zgjidhjeve adekuate për të dalë nga kriza totale dhe jo si instrument për të zgjatur ditët e një qeverie ndaj së cilës qëndrimi i opozitës dhe i mbarë shqiptarëve po bëhet çdo ditë e më i qartë".

Korresp. i "Atdheu"

Spahiu: T'u paraprijmë zhvillimeve dhe të përgatitemi për zgjedhje

Konferenca zgjodhi si kryetar z.Enver Kaloshi, dy nënkryetarët z.Ramazan Kupi dhe z.Gëzim Kaçiu, si dhe z.Ahmet Duka si sekretar

Ditën e diel, më datë 29 shkurt 2004, në qytetin e Krujës, Dega e PLL e këtij rrethi zhvilloi punimet e Konferencës VI-të. Në këtë konferencë merrnin pjesë, si të deleguar nga kryesia e PLL, edhe kryetari i saj z.Ekrem Spahiu; nënkryetari, z.Murat Basha dhe anëtari i kryesisë së Senatit dhe njëkohësisht nënkryetar i Degës së PLL Tiranë, z.Hamit Kurti.

Punimet e konferencës i hapi anëtari i Senatit të PLL rrethi Krujë, z.Gani Vogli, i cili pasi u uroi mirëseardhjen krerëve legalistë dhe delegatëve, dhe pasi foli shkurtimisht për rëndësinë e këtij aktiviteti, ia dha fjalën kryetarit të Degës z.Enver Kaloshi, i cili mbajti raportin në emër të Komitetit Drejtues për punën e legalistëve krutanë gjatë periudhës dy-vjeçare që nga konferenca V-të.

Në raportin e tij z.Kaloshi u përqëndrua kryesisht në problemet organizative të ristrukturimit dhe zgjerimit të shtrirjes së Degës, si edhe në disa probleme të natyrës politike - që dolën në pah sidomos gjatë fushatës së zgjedhjeve vendore të 12 tetorit. Sipas z.Kaloshi "aktivi i nëndegës Krujë, që i zhvilloi punimet disa muaj pas konferencës V-të, evidentoi dukuri negative, që na ndoqën gjatë gjithë periudhës dy-vjeçare. Kështu, dy anëtarë të Komitetit Drejtues, zotërinjtë Përparim Hoxha dhe Agim Maja - kundërshtuan zgjedhjen e z.Ramazan Kupi si kryetar i kësaj nëndege, ndërkohë që ai u zgjodh me votim të fshehtë në një garë serioze ku kandiduan 4 anëtarë cilësorë. Këta zotërinj, të ndihmuar nga jashtë nga Shkëlqim Shani, penguan sistematikisht riorganizimin kësaj nëndege, derisa gjatë fushatës së zgjedhjeve dolën hapur kundër kandidatit Ramazan Kupi dhe partisë, çka la pasoja dhe u reflektua edhe në rezultatin përfundimtar të zgjedhjeve të 12 tetorit në bashkinë Krujë, ku ne morëm minimumin e mundshëm të votave. Këtë qëndrim ata e mbajnë edhe sot në këtë konferencë. Por megjithë pengesat artificiale, para dhe gjatë fushatës, të gjitha nëndegët u mobilizuan për të arritur rezultate të larta në zgjedhje dhe për të përmbushur e dorëzuar në kohë dokumentacionin pranë komisioneve zgjedhore, si dhe për të kompjuterizuar të gjithë dokumentacionin e partisë për arkivim në Degë dhe në qendër.

Gjatë gjithë periudhës dy-vjeçare, problemet e brendshme i kemi analizuar në kohë dhe me seriozitet, duke lejuar debat të lirë, duke forcuar frymën e demokracisë së brendshme nëpër struktura dhe duke stimuluar shprehjen e mendimit të lirë. Por kjo u shfrytëzua për sulme të paprincipta nga ata që mbi interesat e partisë vendosën ambicjet personale - deri në kandidimin e tyre për subjekte të tjera dhe fushatë kundër PLL. Gjithashtu Komiteti Drejtues ka bashkëpunuar vazhdimisht me forumet partnere si Senati dhe Rinia legaliste, të cilat kanë funksionuar dhe punuar me përkushtim. Fjalët më të mira mund të themi për drejtuesit e Senatit, zotërinjtë Fadil Kupi, Ramazan Hasani dhe Qemal Mali, si dhe për kryetarin e Forumit rinor z.Muharrem Xhixha. Po kështu mund të flasim edhe për zotërinjtë e nderuar Bajram Dollaku (nënkryetar i Degës) dhe Atdhe Hoxha. Z.Hoxha është një biznesmen që ka kontribuar financiarisht në shumë aktivtetete, ndër të cilat ato për organizimin e pritjes së Familjes Mbretërore dhe për Ceremoninë Mortore organizuar për dhënien e lamtumirës Nënës Mbretëreshë Geraldinë. Në këtë raport nuk mund të lëmë pa përmendur edhe punën e kontributin e zotërinjve Murat Stafuka (kryetar i nëndegës Cudhi-Kamp), ku ne arritëm të fitojmë një këshilltar në komunën që mbulon kjo nëndegë. Po kështu, mjaft mirë kanë punuar edhe zotërinjtë Sali Xheka, Ali Gdheli e Prengë Prenga në drejtimin e nëndegës Thumanë, punë nga e cila u arrit që z.Gdheli të zgjidhej këshilltar në këshillin e komunës Thumanë.

Gjatë kësaj periudhe, megjithë ndihmën e pakët, një punë të lavdërueshme ka bërë edhe kryetari i nëndegës Nikël, i përndjekuri politik, z.Adem Çangu...

Përfundimisht, në shkallë rrethi arritëm rezultatin 3.7 % dhe fituam 3 këshilltarë - nga 2 që kishim zgjedhjet e kaluara...", - e mbylli fjalën e tij z.Kaloshi, për t'ia lënë radhën pyetjeve dhe diskutimeve rreth raportit, për të cilin u bënë mjaft pyetje që kërkonin sqarime për momente të shumta të punës dy-vjeçare të strukturave drejtuese dhe atyre të bazës.

Pas përgjigjeve të pyetjeve dhe sqarimeve konkrete, u kalua në diskutime.

Në diskutimin e tij z.Gëzim Hoxha e konsderoi "të dobët" rezultatin në shkallë Dege dhe pasi shprehu kritika për z.Kaloshi u shpreh se "votat e legalistëve krutanë kaluan djathtas (!!!)...".

"Të lemë pas krahëve të kaluarën dhe t'i shtrijmë dorën njëri-tjetrit. Nuk kemi punuar mirë, ndërkohë që na kërkohet të japim shumë më tepër. Ata që janë larguar nga PLL të lejohen të kthehen, por jo të marrin funksione drejtuese", - u shpreh në fjalën e tij z.Xhaferr Topçiu, për t'ia lënë radhën z.Petrit Bani, i cili foli për domosdoshmërinë e mirëkuptimit dhe afrimin e të rinjve që, sipas tij "ishin të sinqertë dhe nuk bartnin probleme hatëresh e keqkuptimesh që pengojnë punën".

Në diskutimin e tij z.Agim Maja bëri shumë kritika, por nuk i shpjegoi qëndrimet e tij në kundërshtim me interesat e partisë, për të cilat u kritikua edhe në raport.

"Unë në punën time jam përqëndruar në afrimin e njerëzve me vlera në PLL", - u shpreh njëri nga aktivistët kryesorë të Degës, intelektuali Ahmet Duka. "Nuk arrij ta kuptoj mosmbështetjen e z.Kupi në Krujë dhe qëndrimin ndaj tij të disa legalistëve", - vazhdoi z.Duka, duke shprehur njëkohësisht edhe kritika për punën e kryetarit të Degës, z.Kaloshi, vërejtje të cilat i theksoi në diskutimin e tij edhe Shkëlqim Shani, i cili pretendoi se z.Kaloshi nuk e kish mbështetur në punën e tij si këshilltar i këshillit bashkiak të qytetit të Krujës gjatë mandatit të kaluar!!!

Me frymë kritike e analizoi rezultatin e arritur në Fushë Krujë edhe z.Skënder Bami në diskutimin e tij, duke theksuar se "ka patur dhe ka shumë rezerva në këtë nëndegë për rezultate më të mira".

"Punët i kemi ndarë me shumë përgjegjësi nëpër struktura", - tha në diskutimin e tij z.Sali Xaka, duke vazhduar: "90 % e fshatrave të komunës Thumanë i kemi mbuluar me seksione, të cilat bëjnë jetë aktive, që e kemi shtrirë edhe në nëndegë, duke shmangur formalizmin". "Ndaj atyre që iu kundërvunë vendimeve të partisë duhej të merreshin masa të menjëhershme nga Komitetit Drejtues, por kjo nuk u bë", - e mbylli diskutimin e tij z.Xaka.

Në fjalën e tij, ish kandidati për kryetar bashkie në qytetin e Krujës, z.Ramazan Kupi, shprehu keqardhjen për mbështetjen e pakët nga legalistët gjatë fushatës.

Ndërsa këshilltari i komunës Thumanë z.Ali Gdheli, në fjalën e tij kërkoi me vendosmëri që "Komiteti i ri Drejtues që do të dalë nga zgjedhjet në konferencë - të respektohet dhe të mbështetet deri në fund në punën e tij", - gjë e cila u aprovua nga delegatët.

***

Në diskutimin e tij të përshëndetjes së kësaj konference, anëtari i kryesisë së Senatit të PLL dhe njëkohësisht nënkryetar i Degës së Tiranës, z.Hamit Kurti, pasi i uroi drejtuesit e Degës së PLL Krujë dhe delegatët për zhvillimin e kësaj konference serioze dhe për "mendimet konstruktive të shoqëruara me kritikë të hapur", shprehu bindjen se në të ardhmen drejtuesit e rinj të Degës do t'i rrisnin "rezultatet dhe do ta përmirësonin cilësisht punën organizative dhe politike". Gjithashtu, zoti Kurti shprehu bindjen se anëtarësimet në këtë Degë ku PLL ka traditë të pasur atdhetare dhe mbështetje politike e sociale - do të rriten në të ardhmen, duke u shoqëruar njëkohësisht edhe me rritje elektorale që, sipas tij, "është garanci për rezultate të larta në zgjedhjet e ardhshme".

Pas zotit Kurti e mori fjalën nënkryetari legalist, zoti Murat Basha, i cili në fjalën e tij u përqëndrua kryesisht në vendosjen e punës politike të partisë në një shtrat konceptual të bazuar në ide për zhvillimin e zonës dhe për pasurimin e traditës ideore të partisë, të cilën, sipas tij, "kjo Degë e ka edhe si detyrim për shkak të trashëgimisë së shkëlqyer legaliste, për të qenë në lartësinë e mendimit politik dhe kontributit atdhetar të birit të lavdishëm kësaj treve, rithemeluesit të Legalizmës shqiptare, gjeneral Abaz Kupit". Më pas, zoti Basha shprehu bindjen se strukturat e reja drejtuese që do të dilnin nga kjo konferencë do të ishin me nivel të lartë intelektual dhe me përvojë të mjaftueshme politike e organizative, "në funksion të përmbushjes së objektivave të kësaj Dege që", - sipas tij, - "detyrimisht duhet dhe do të jenë shumë më të larta në të ardhmen".

***

Në fund të diskutimeve e mori fjalën kryetari i PLL, z.Ekrem Spahiu, i cili fillimisht i uroi legalistët krutanë dhe delegatët e konferencës për zhvillimin cilësor të këtij aktiviteti të rëndësishëm, duke sjellë në vëmendjen e tyre faktin se "PLL është parti serioze dhe ju si Degë po kështu, në këtë vazhdë, që nga viti 1998 keni zhvilluar 3 konferenca të suksesshme dhe do të analizoni sot punën tuaj që nga konferenca e kaluar e deri në zgjedhjet e 12 tetorit, për të ardhur deri më tash".

Më pas z.Spahiu ritheksoi arsyet e daljes më vete të PLL në zgjedhjet vendore, dhe tha se "... ne legalistët zhvilluam një fushatë të vlerësuar edhe nga institucionet ndërkombëtare të atashuara në Shqipëri, si prezenca e ODIHR/OSBE-së". "Kjo fushatë serioze dhe përkushtimi idealist i legalistëve dhe mbretërorëve solli si rezultat fitoren në 4 komuna dhe të 160 këshilltarëve, si dhe disa kryetarë këshillash, sekretarë bashkie e komunash - e deri tek zëvendëskryetar qarku. Por rezultati do të ishte më i mirë nëse në këtë fushatë ne do të kishim anëtarë në komisionet zgjedhore; financa të mjaftueshme; angazhim të plotë të deputetëve e anëtarëve të Këshillit Kombëtar; nëse nuk do të na hiqeshin emrat e legalistëve dhe mbretërorëve nga listat zgjedhore; nëse nuk do të sulmoheshim padrejtësisht dhe pa arsye nga partitë rivale, etj.".

"Por pavarësisht vështirësive dhe padrejtësive ne fituam shumë nga këto zgjedhje. Sëpari e mbi të gjitha fituam përvojë zgjedhore dhe rezultatet që megjithëse nuk janë të kënaqshme - janë pikënisje e rëndësishme për të ardhmen. Si parti serioze dhe me synime e objektiva politiko-zgjedhorë në rritje, ne pas zgjedhjeve kemi zhvilluar analiza të vazhdueshme të rezultateve në të gjitha nivelet, duke filluar nga lart-poshtë. Fillimisht analizën e nisëm nga kryesia e partisë, e vazhduam në Komitetin Drejtues e më pas në Këshillin Kombëtar, duke e shtrirë nëpër Degë, Komitetet Drejtuese të tyre e deri në bazën e partisë, ku kemi shkuar të gjithë anëtarët e Kryesisë. Këto analiza janë bashkërenduar edhe me sqarimin e situatave aktuale politike, për t'u paraprirë atyre dhe mobilizuar partinë. Në qëndrimet tona kemi kritikuar ashpër plagët shoqërore që burojnë nga qeverisja e papërgjegjshme si papunësia, korrupsioni, kontrabanda, trafiqet kriminale, manipulimi i zgjedhjeve dhe evidentimi i kritikave të faktorëve ndërkombëtarë, shoqëruar këto edhe me informimin e vazhdueshëm të opinionit publik, anëtarësisë së partisë dhe elektoratit nëpërmjet mediave dhe gazetës "Atdheu". Aktualisht PLL është një nga partitë kryesore në drejtimin e Lëvizjes politiko-qytetare 'Nano ik', deri në rrëzimin e regjimit të pseudomaxhorancës së Dushkut dhe realizimin e zgjedheve të parakohshme, të lira dhe të ndershme. Puna jonë synon përgatitjen e partisë në të gjitha nivelet dhe strukturat për zgjedhjet e reja që po afrohen, prandaj kërkojmë dhe synojmë zhvillimin e analizave serioze nëpër konferencë, sikundër edhe sot", - e mbylli fjalën e tij z.Spahiu.

***

Më pas u kalua në votimin për kryetar të Degës dhe anëtarë të Komitetit Drejtues të Degës, ku votuan 67 delegatë. Pas numërimit të fletëve të votimit nga komisioni i zgjedhjeve të konferencës, rezultoi se z.Enver Kaloshi mori 35 vota, z.Gëzim Kaçiu mori 27 vota, z.Ahmet Duka mori 4 vota, ndërsa 1 votë rezultoi e pavlefshme. Kësisoj, z.Enver Kaloshi u rizgjodh kryetar i Degës.

Menjëherë pas shpalljes së rezultatit u mblodh Komiteti i ri Drejtures, i cili me propozim të kryetarit të rimandatuar z.Kaloshi, zgjodhi dy nënkryetarët e Degës, përkatësisht z.Ramazan Kupi dhe z.Gëzim Kaçiu, si dhe z.Ahmet Duka si sekretar.

Korresp. i "Atdheu"

Zhvilloi punimet Konferenca e Degës së PLL Peqin

Basha: PLL, tribunë debati e jo thashethemesh

Konferenca konfirmoi edhe njëherë në krye të degës z.Bardhyl Bica me vota maksimale

Ditën e shtunë, më datë 28 shkurt 2004 zhvilloi punimet Konferenca e radhës e Degës së PLL Peqin. Në këtë konferencë ishin të pranishëm delegatë nga të gjitha komunat e këtij rrethi. Ata, në diskutimet e tyre bënë bilancin e punës së Degës në përgjithësi dhe analizuan rezultatet e zgjedhjeve vendore të 12 tetorit, në veçanti. Të deleguar nga kryesia e PLL në këtë konferencë, ishin nënkryetari i Partisë z.Murat Basha dhe sekretari i Marrëdhënieve ekonomike, z.Artan Tujani.

Në emër të Komitetit Drejtues të kësaj Dege, raportin e mbajti kryetari i saj z.Bardhyl Bica. Në raport ai theksoi se "kthimi i Familjes Mbretërore në Atdhe i kishte dhënë një gjallëri dhe entusiazëm më të madh të të gjithë legalistëve shqiptarë, për të shumëfishar punën dhe përpjekjet në funksion të përmbushjes së objektivave që burojnë nga programi politik i PLL". Në fjalën e tij ai u përqëndrua gjithashtu edhe në punën e bërë midis dy konferencave për shtrirjen dhe përsosjen e strukturave bazë të partisë. "Aktualisht, sot, Dega e PLL Peqin është e shtrirë në 49 fshatra, nga 56 gjithsej që ka rrethi"- theksoi z. Bica. "Në strukturat e tyre numërohen 277 anëtarë, nga të cilët 11% janë me arsim të lartë".

Gjatë kohëve të fundit kjo Degë ka bërë organizimin e ri në komunat Pajovë dhe Përparim, dhe po vazhdon punën për realizimin e objektivit "një seksion për çdo qendër votimi". Z.Bica lavdëroi për punë të mirë nëndegën Gjocaj, dhe theksoi se "kjo punë u pasqyrua edhe në rezultatet e zgjedhjeve".

Duke u ndalur në analizën e rezultatit zgjedhor, zBica vuri në dukje se legalistët peqinas e kishin pritur me entusiazëm vendimin e Këshillit Kombëtar për të dalë më vete në zgjedhjet e tetorit dhe kishin bërë të gjitha përpjekjet për të arritur rezultate sa më të larta. Ai përmendi të gjitha kontributet historike që kjo Degë ka dhënë në të kaluarën, në kuadër të koalicioneve të djathta, pa harruar të shtojë se "dalja më vete hera-herës ishte pritur me xhelozi të pajustifikuar nga ana e forcave të tjera të djathta" të këtij rrethi. Duke iu referuar këtyre forcave, ai shprehu qëndrimin e prerë se "PLL-ja në këtë rreth duhet të trajtohet si partner serioz dhe i vlefshëm". "Reputacioni që gëzojnë legalistët peqinas në mjedisin lokal politik, por edhe më gjerë, është i pasqyruar më së miri në detyrën e sekretarit të këshillit bashkiak të qytetit të Peqinit", që aktualisht ushtrohet nga z.Bardhyl Bica dhe i pretendimeve serioze për fitimin e postit të kryetarit të këshillit të komunës Gjocaj.

Hapësirë të konsiderueshme në raport kishte edhe trajtimi i çeshjeve që kishin të bënin me detyrat e ardhshme, që shtroheshin ndaj kësaj Dege kryesisht në shtimin e punës dhe gjetjen e metodave sa më efikase për pasurimin e mëtejshëm të anëtarësisë me elementë të rinj si nga rinia, intelektualët, gratë etj.

Ajo çka ra në sy ishte edhe fakti se - jo të gjithë anëtarët e vjetër të Komitetit Drejtues kishin kontribute të vlerësuara - sepse disa prej tyre, gjatë fushatës ose kishin ndenjur indiferentë, ose nuk ishin aktivizuar ashtu siç duhej. Kështu, për punë të mirë u përgëzuan zotërinjtë Robert Bullari, B.Kadiu, F.Ballhysa, M.Llaci, etj., ndërsa u kritikua z.K.Hokja dhe ndonjë tjetër.

Pas leximit të raportit delegatët bënë pyetje të ndryshme, të cilat kishin të bënin me situatën aktuale politike, komponentin financiar të fushatës, apo me qëndrimet e mëvonshme të Legalitetit. Këto pyetje morën përgjigje të drejtpërdrejtë nga të deleguarit e Kryesisë së Partisë.

Më vonë u kalua në pikën e dytë të rendit të ditës, e cila ishte parashikuar për diskutime. Diskutuesit në këtë konferencë ishin të shumtë dhe përfaqësonin të gjithë hartën gjeografike të këtij rrethi. Ata që e morën fjalën diskutuan me ndjenjë të lartë përgjegjësie, duke treguar më së pari për kontributin e tyre gjatë fushatës dhe duke u ndalur në vijim në detyrat që dalin në të ardhmen për përmirësimin e mëtejshëm të punës. Ata nuk harruan të përmendnin kontributin e dhënë pranë kësaj Dege gjatë fushatës - përkatësisht nga Kryetari i PLL z.Ekrem Spahiu dhe N/kryetari i saj z.Murat Basha.

Në diskutimin e tij z.Musa Bici theksoi se "dhunës verbale nga ana e partive të tjera gjatë fushatës, i janë shtuar edhe disa të meta që vetë legalistët peqinas i kanë manifestuar". "Sidoqoftë, - theksoi ai, - klima politike është mjaft e përshtatshme, çka premton për një rol gjithnjë e më të madh të Legalitetit në këtë rreth".

Robert Bullari, këshilltar i komunës Gjocaj, theksoi se përvoja e parë elektorale kishte qenë mjaft e frytshme për të, sepse ai dhe të gjithë pjestarët e tjerë të shtabit elektoral kishin fituar një përvojë të vyer. Si pengesë në zgjedhjet e kaluara z.Bullari përmendi mungesën e komisionerëve dhe theksoi se "nuk duhen mbivlerësuar mangësitë në mjetet financiare". Si këshilltar i PLL, ai dha sigurinë se "si përfaqësues i popullit dhe i alternativës legaliste në qeverisjen vendore, do të punonte maksimalisht, në bashkëpunim edhe me këshilltarët e djathtë, që "komuna Gjocaj të qeverisej me dinjitet". "Pozicioni që kanë këshilltarët duhet shfrytëzuar në mënyrë maksimale në kontaktet me njerëzit, në mënyrë që ata të kuptojnë se përfaqësuesit e PLL janë të ndershëm dhe dinjitozë", - tha z.Bullari.

Ndërsa z.Musa Llaci, në diskutimin e tij u përqëndrua në nevojën dhe përpjekjet që duhen bërë me qëllim që Dega e PLL Peqin të freskohet me anëtarë nga brezi i ri. Me bujari, z.Llaci premtoi solemnisht se i ofronte Degës një zyrë nga prona e tij.

I riu Florian Ballhysa tregoi për punën propaganduese që bënte me moshtarët e brezit të tij. Ai tha se "shtrembërimi i historisë gjatë komunizmit ka qenë shumë i madh" dhe se "sot, shumica e të rinjve nuk është e fomuar si duhet, ose është e formuar fare pak me kontributet e Mbretërisë gjatë periudhës së mbretërimit të Mbretit Zog I-rë në historinë e shtetit shqiptar". Ai sugjeroi se "edhe partia në qendër duhet të bëjë më shumë në drejtim të propagandës për arritjet e epokës së lavdishme të mbretërimit të Mbretit Zog I-rë".

I riu tjetër Gramoz Bullari, solli si shembull përvojën e tij të punës në grupe me të rinjtë dhe të shfrytëzimit të lidhjeve rinore, çka sipas tij kish dhënë rezultat konkret në zgjedhjet e komunës Gjocaj.

Në të njejtat linja diskutimi ishin edhe diskutuesit e tjerë si Eduard Xhahysa, Dervish Dushku, etj.

***

Pas përfundimit të diskutimeve e mori fjalën nënkryetari i PLL z.Murat Basha. Ai vlerësoi me superlativa zhvillimin e kësaj konference, duke shprehur kënaqësinë për problematikën e gjerë të trajtimit të problemeve. Më tej z.Basha vlerësoi punën e legalistëve peqinas që, megjithëse kishin punuar në kushte të vështura, në zgjedhjet e 12 tetorit kishin arritur rezultate të vlerësuara. "Por rezultatet e deritanishme duhen çuar më tej", - theksoi z.Basha.

"Ne jemi parti moderne dhe e hapur. Jemi parti me histori të lavdishme dhe të papërlyer, çka duhet ta shfrytëzojmë për rritjen sasiore dhe cilësore të saj", - theksoi nënkryetari legalist duke u treguar më pas delegatëve për rolin gjithnjë e në rritje të PLL në politikën shqiptare - rol që sipas tij kishte ardhur si "rezultat i qëndrimeve parimore të mbajtura vazhdimisht nga PLL".

Duke u ndalur në problemet organizative, z.Basha theksoi se "duhet kthyer sa më shpejt në realitet objektivi një seksion për çdo qendër votimi, në mënyrë që në zgjedhjet e ardhshme vota legaliste të mos mbetet jetime". Z.Basha theksoi më tej se "ne kemi hapësira dhe duhet të shtrihemi kudo" dhe se "duhet shfrytëzuar shansi që, nëpërmjet këshilltarëve, të rrisim reputacionin e PLL".

Z.Basha gjithashtu nënvizoi rëndësinë e punës me "njerëzit, rininë, intelektualët dhe biznesmenët", dhe pastaj në vijim të fjalës së tij, në mënyrë të veçantë ai u ndal tek intelektualët, duke theksuar se "ndaj tyre duhet të krijojmë hapësirën dhe ngrohtësinë e nevojshme". "PLL duhet të bëhet tribunë e debatit konstruktiv dhe jo e thashethemeve. Ne jemi parti e idealeve të mëdha dhe jo e interesave personale", theksoi zBasha që më pas u ndal fort në misionin historik të PLL dhe foli gjatë për vlerat historike të Monarkisë gjatë viteve 1928-1939. Ai u ndal gjithashtu edhe në qëndrimin e PLL ndaj Çeshtjes së Pronave dhe dëmshpërblimit ndaj Ish të Burgosurve Politikë. Në fund të fjalës së tij, z.Basha u dha tre këshilla legalistëve peqinas, të cilat ishin: Punë, punë, punë. "Me këto këshilla, - tha z,Basha, - çdo gjë është e mundur".

Duke vlerësuar konkurrencën përmes votimit, z.Basha e vlerësoi këtë proces si një "garë" dhe se "pas shpalljes së fituesve partitë e djathta e kanë në traditë që të veprojnë sipas hierarkisë dhe linjës vertikale".

***

Pas fjalës së nënkryetarit të PLL, z.Murat Basha, u kalua në procesin e votimit. Për postin e kryetarit të Degës së PLL Peqin, kandidonin zotërinjtë Bardhyl Bica dhe Kujtim Gjevori. Në përfundim të votimit, me shumicë votash fitues u shpall z.Bardhyl Bica. Gjithashtu, po nga votimi dolën fitues për në Komitetin e ri Drejtues zotërinjtë Robert Bullari, Bedri Kadiu, Gazmend Kadiu, Dervish Dushku, Kujtim Gjevori, Ymer Mehmeti, Tomorr Ballhysa dhe Abaz Hyra.

Korresp. i "Atdheu"

Legalistët kurbinas në prag të konferencës

Ditën e diel, më datë 29 shkurt, u mblodh Komiteti Drejtues i Degës së PLL Kurbin. Në zbatim të udhëzimeve që janë hartuar nga Qendra - për të cilat legalistët janë në dijeni, punimet e kësaj mbledhjeje i ndoqën, si të deleguar, Sekretari i Senatit z.Seit Preni dhe Sekretari i Marrëdhënieve Ekonomike z.Artan Tujani.

Rendi i ditës së kësaj mbledhjeje konsistonte kryesisht në ndarjen e detyrave dhe punës për përfundimin me sukses të Fushatës së Zgjedhjeve të reja në PLL. Në funksion të këtij qëllimi ishte edhe raporti që paraqiti para të pranishmëve kryetari i kësaj Dege z.Esat Cakoni.

Në raport i ishte kushtuar pak hapësirë analizës së rezultatit dhe punës së bërë në Zgjedhjet e 12 tetorit - me pretendimin se "një analizë e thelluar për këto çeshtje do të bëhet në aktivet e nëndegëve dhe, së fundi, në Konferencë".

Duke qenë të njohur me problematikën e kësaj Dege, të deleguarit, por edhe një pjesë e anëtarëve të Komitetit Drejtues, këmbëngulën që në këtë mbledhje t'i kushtohej një hapësirë e konsiderueshme edhe trajtimit të këtyre çeshtjeve, gjë që u muar në konsideratë.

Nga diskutimet e bëra u vërejt tendenca e disa individëve për t'i anashkaluar problemet e për të diskutuar në përgjithësi, me synimin e qartë për t'iu shmangur përgjegjësisë. Për këtë arsye, të deleguarit e Kryesisë së PLL reaguan disa herë, çka bëri që diskutimet të hyjnë në një tematikë më konkrete.

Shqetësimet realiste i bënë më të ndjeshme diskutimet e z.Halit Pepmarku, Gj. Doda, LL. Kola dhe M. Vuksani.

Në këtë mbledhje u caktuan detyra dhe afate konkrete për zbatimin e tyre. Kështu, deri më datë 20 mars 2004 do të përfundojë procesi i zgjedhjes nëpër sëksione. Gjatë ditëve ndërmjet datave 20 dhe 25 mars, do të përfundojnë aktivet e nëndegëve, ku do të zgjidhen strukturat e reja drejtuese të tyre, si dhe emrat e delegatëve në konferencë. Në këtë drejtim u vendos që, të gjitha këto veprime të monitoroheshin nga anëtarë të Komitetit Drejtues dhe për to të mbahej dokumentacion i rregullt.

Në këtë mbledhje u caktua edhe numri i delegatëve sipas nëndegëve, dhe u vendos që konferenca e radhës e Degës së PLL Kurbin të mbahet ditën e diel, më datë 3 prill 2004.

Korresp. i "Atdheu"

Mblidhet Komiteti Drejtues i Degës së PLL Korçë

Legalistët korçarë strukturojnë degën

Më datë 28 shkurt 2004, u zhvillua mbledhja e parë e Komitetit Drejtues të Degës së PLL Korçë, pas konferencës V-të, që u zhvillua më datë 19 shkurt 2004. Rendi i ditës i kësaj mbledhjeje pune, ishte:

1.Konkluzione dhe vlerësime për zhvillimin e Konferencës, pas takimit me kryesinë e PLL në Tiranë për këtë problem - të kryetarit të Degës, z.Nebi Ganellari.

2.Zgjedhja e nënkryetarëve të Degës dhe propozimet për sekretar të Degës.

3.Disa masa disiplinore ndaj atyre që kanë shkelur vendimet dhe disiplinën e partisë.

4.Qëndrimi politik i Degës së PLL Korçë lidhur me situatën aktuale politike.

***

Në fillim të takimit, kryetari i Degës z.Nebi Ganellari, bëri një përmbledhje të zhvillimit të Konferencës dhe, njëkohësisht, përcolli vlerësimet e kryesisë së PLL dhe të kryetarit të saj z.Spahiu për zhvillimin e konferencës dhe rezultatet e saj.

Pavarësisht nga tendencat e disa elementëve që, për motive personale apo të induktuara nga faktorë jashtë PLL, konferenca u zhvillua normalisht, dhe me frymë demokratike të debateve e diskutimeve evidentoi arritjet dhe mosarritjet, shkaqet objektive dhe subjektive, përgjegjësitë konkrete, si dhe përcaktoi synimet dhe rrugët për intensifikimin e punës në të ardhmen.

Arritja më e rëndësishme në këtë konferencë ishte nxjerrja e Komitetit Drejtues të ri të Degës - si një strukturë e përbërë nga njerëz të aftë e të ndershëm, të arsimuar dhe në shumicë me moshë të re, me origjinë nga familje fisnike dhe nacionaliste - që me aftësitë dhe përkushtimin e tyre do t'i çojnë më tej rezultatet e kësaj Dege.

Më pas u kalua në zgjedhjen e nënkryetarit të Degës. Për këtë u vendos që të zgjidheshin dy nënkryetarë. Me votim të hapur, nënkryetar i Degës u zgjodh z.Përparim Kutrolli - ish anëtar i Komitetit Drejtues dhe i kryesisë së Degës, i cili ka dhënë një kontribut të konsiderueshëm në aktivitetet e ndryshme që ka zhvilluar Dega. Nënkryetar tjetër u zgjodh z.Pavli Naçe, i cili u vlerësua për aktivitetin dhe angazhimin veçanërisht gjatë fushatës zgjedhore të 12 tetorit, si dhe për përkushtimin e përgjegjshmërinë - reflektim këto edhe të origjinës së tij nga një familje me tradita qytetare dhe atdhetare.

Gjithashtu u bënë edhe tre propozime për sekretar të Degës, që konkretisht ishin për zotërinjtë Petrit Kreka, Arjan Demçe dhe Fredi Kalemi. Këto propozime konform statutit, iu dërguan kryesisë së PLL, e cila do të bëjë edhe përzgjedhjen përfundimtare për sekretar të Degës.

Në vijim të mbledhjes, duke analizuar qëndrimet e disa anëtarëve të PLL, shkeljen prej tyre të vendimeve të organeve vendim-marrëse të partisë, shkeljet statutore të përsëritura, braktisjen e fushatës zgjedhore, qëndrimin e papërgjegjshëm dhe të qëllimshëm për shkaqe dhe interesa personale apo të nxitura nga faktorë të tjerë të jashtëm e me synimin për të përçarë Degën, të shfaqura këto publikisht edhe në konferencën e fundit - me miratimin e të gjithë anëtarëve të pranishëm të Komitetit drejtues dhe në konsultim paraprak me Senatin e Veteranëve të Degës, u vendos:

1.Përjashtimi nga PLL i Entela Bllaçotit

2.Me miratimin e anëtarëve të Komitetit Drejtues të pranishëm në takim (një votë kundër) - me propozim të kryesisë së PLL Tiranë dhe të Këshillit Kombëtar mbledhja vendosi përjashtimin nga të gjitha funksionet në PLL të ish nënkryetarit të Degës dhe anëtarit të Këshillit Kombëtar të PLL, z.Vangjush Kostandini.

Gjithashtu u diskutua edhe për qëndrimin e papërgjegjshëm të z.Ylber Merdani - në veçanti gjatë fushatës zgjedhore të 12 tetorit si dhe në konferencën e PLL. Për qëndrimin ndaj z.Merdani - nga anëtarët e Komitetit Drejtues u vendos që të diskutohej në takimin e radhës të këtij komiteti.

Pas takimit u zhvillua një konferencë shtypi, me praninë e të gjitha mediave lokale. Në këtë konferencë, kryetari i Degës dhe kryetari i Këshillit Kombëtar, pas leximit të deklaratës për shtyp iu përgjigj pyetjeve të ndryshme të gazetarëve, dhe njëkohësisht shprehu qëndrimin e PLL, e në veçanti atë të Degës së PLL Korçë - për situatën politike në vend dhe detyrat që i dalin PLL si parti me peshë të konsiderueshme politike dhe protagoniste e qëndrimeve konsekuente e konstruktive në gjirin e Opozitës dhe si bartëse e vlerave të qenësishme opozitare e demokratike ndaj çdo neodiktature.

Korresp. "Atdheu"

Ju tregoj Greqinë dhe PASOK-un (2)

Papandreu: A jemi marksistw apo jo?!

Robert D. Kaplan

Vijon nga numri i kaluar

***

Ajo që më ka munduar më shumë gjatë 7 vjetëve të qëndrimit në Greqi, kanë qenë konsideratat idioteske të korrespondentëve të huaj, të cilët marrëzitë dhe turbullirat e politikës greke i shpjegonin me fraza të tilla si "Në fund të fundit grekët kanë zbuluar teatrin!!!" dhe "Jo vetëm DEMOKRACIA por edhe ANARKIA - janë fjalë greke!!!". Pastaj pasonin referencat qesharake për "tragjedinë greke" dhe "komedinë greke".

Edhe unë, në një periudhë dembelizmi, njëherë iu referova "teatrit dhe maskave të lashta greke" për të shpjeguar politikën moderne greke.

Njoftimet e mediave - në vend që të shpjegonin Greqinë moderne - nuk bënin gjë tjetër veçse hidhnin dritë mbi Injorancën e Perëndimit për të kaluarën e këtij kombi.

Qëndrimi im në Athinë (1982-1989), përkoi me pozicionin e Andrea Papandreut si kryeministër. Si gjithmonë - për shkak të të qenit vend i vogël kompleksiv dhe i rrethuar nga vende "armiq" - politika greke ka qenë, është e do të jetë shumë më intensive sesa politika e vendeve perëndimore. Politika greke gjatë udhëheqjes së Andreas - ishte haptas antiamerikane. Trashëgimia antiamerikane e sundimit të tij shpjegon edhe Greqinë e viteve '90-të, ashtu sikurse trashëgimia komuniste ndihmon për të shpjeguar vendet e tjera ballkanike.

Kronika e epokës së Papandreut është pasqyra më thelbësore që shërben për të kuptuar Greqinë e sotme. Pas ndërhyrjes direkte të presidentit amerikan Lindon Xhonson, për ta liruar nga burgu i Papadopullos-it, Andrea Papandreu në fillim shkoi në Suedi dhe më pas në Kanada, ku organizoi atë që më vonë u quajt "Lëvizja Socialiste Panhelenike", akronimi grek i së cilës është PASOK.

"Gabimet e Justinianit kanë qenë aq të shumta sa edhe vetë pafundësia nuk do të mjaftonte për t'i treguar. Për mua do të mjaftonte të nxirrja dhe të paraqisja vetëm disa syresh nga lista, për të nxjerrë lakuriq karakterin e tij në sytë e njerëzve që ende nuk kanë lindur...", - shkruan Prokopi tek "Historia sekrete" - një raport ky i pacensuruar, rreth sundimit të Justinianit dhe gruas së tij Teodora (një ish-prostitutë) në shekullin e VI-të.

"Ata ose duan të sundojnë sikur të ishin Zoti vetë, ose nuk pranojnë fare të qeverisin", - shkruan Mikhael Psellus te "Kronografia", kur bën fjalë për 14 perandorët bizantinë të shekujve X-XI-të, përshkrim që vlerësohet si "... tepër realist dhe si memuari më i famshëm i mesjetës".

Këto histori komplekse për nga kulmimet e pasionit, grykësisë, egërsisë dhe ambicjes personale - janë e vetmja pasqyrë e vlefshme historike për të kuptuar politikën greke në të gjitha kohërat.

Përveç aspekteve të dyshimit dhe intrigës levantine, rrëfimet mesjetare të Psellus-it dhe Prokopit, preknin në mënyrë të mrekullueshme diçka tjetër në lidhje me jetën politike greke. Preknin faktin që politika në Greqi është EROTIKE.

Shtypi bulevardesk në Greqi, ndryshe nga ai në Amerikë, nuk merret me jetën personale të politikanëve, sepse grekët nuk janë puritanë. Atyre nuk u bën përshtypje dhe nuk shokohen nga asgjë, pothuajse nga asgjë. Shtypi grek shkruan thjesht dhe vetëm për politikën.

***

Që nga rrënjët e tij, PASOK-u kurrë nuk ka qenë parti, siç ishin grupimet e tjera politike në Greqinë e pas'Juntës.

Për të shpjeguar kahjen e bindjeve politike të Andreas Papandreut, mjafton të kujtosh ato që deklaroi ai në vitin 1977: "A jemi Marksistë, po apo jo?! ... ne duhet të themi PO - me plot gojën".

PASOK-u nuk kishte kushtetutë dhe nënligje të dala prej saj. Nuk kishte kurrfarë lidhjeje me Demokracinë. PASOK-u ishte Papandreu - emër i cili në Greqinë e pas'Juntës përdorej për t'iu referuar Andreas dhe jo të jatit - Jorgos, i cili kish vdekur që në vitin 1968, në moshën 80-vjeçare. Adhurimi i shefave politikë - që përputhej me kultin e individit, ka qenë fenomen i rëndomtë në Greqinë e shek XX-të. Vetë Jorgo Papandreu dikur, themeloi dhe kryesoi një parti politike të quajtur "Partia Jorgo Papandreu".

Grekët e Qendrës dhe ata të së Majtës u bashkuan me PASOK-un, sepse e shihnin atë si pasuesen e natyrshme të trashëgimisë politike të Jorgo Papandreut.

Jorgo prirej më tepër nga Qendra sesa nga e Majta. Budallallëku, më shumë se ideologjia ose krenaria e plagosur, ishte ajo çka motivoi veprimet e tij në mesin e viteve 60-të. Partia e tij ishte ai vetë - për shkak të natyrës paternaliste të politikës greke, që bëhej në mejhanet e asaj kohe. Grupet e njerëzve në Greqi, bashkoheshin politikisht rreth personaliteteve të fuqishme.

Andreas Papandreu trashëgoi pothuajse gjithçka nga i ati, mbi të gjitha miqtë dhe fuqinë. Por ai ishte shumë më i komplikuar. Andreas mbante në zyrë fotografitë e Fidel Kastros, Ç'e Guevarës dhe Titos, dhe e shikonte Jugosllavinë komuniste të "Paangazhuar" të Marshallit - si modelin ideal për Greqinë.

PASOK-u i farkëtoi lidhjet e veta të hershme me partinë siriane terroristo-majtiste BAATH, "mbështetur në pozitat tona të përbashkëta ideo-politike", - shpjegonte Papandreu në vitin 1975.

Në shkurt të vitit 1977, tetë muaj pas rrëmbimit të një avioni të kompanisë "Air-France", mbushur plot me pasagjerë izraelitë, që udhëtonin nga Tel-Avivi në Entebe të Ugandës, Andreas i thuri lavde udhëheqësit terrorist të Ugandës, Idi Amin-it: "Ai është luftëtar kundër qendrave metropole të Perëndimit, prandaj është vënë në shënjestër të tyre. Kjo vetvetiu e vendos atë në fushën e shahut botëror-në grupin e forcave anti-imperialiste". Më vonë, më 1977, Andreas Papandreu fluturoi për tek Mohamer Gedafi i Libisë, për regjimin e të cilit ai deklaroi se "... nuk ishte diktaturë ushtarake. E kundërta është e vërtetë. Ai qeveris sipas modelit të Athinasve të vjetër.".

Raporte që pajtoheshin me njëri-tjetrin, si në shtypin grek ashtu edhe në atë perëndimor, thonin se Gedafi kishte ndihmuar në financimin e fushatës së suksesshme të PASOK-ut në vitin 1981, nga ku Papandreu u zgjodh kryeministër.

Në vitin 1984, duke iu drejtuar publikisht Papandreut në Athinë, majori Abdel Salam Jalud, i dyti në hierarkinë e Gedafit, tha: "Vëlla Papandreu, ne ju kemi ndjekur dhe analizuar me kujdes, ju kemi provuar dhe ju besojmë. Ne jemi të vendosur të bëjmë gjithçka që kemi mundësi dhe që është në dorën tonë, për të forcuar pozitën tuaj, sepse është në interesin tonë që ju të mbeteni në pushtet".

***

Mënyra sesi punonte makineria e brendshme e PASOK-ut, tregonte për një stil totalitar, të paprecedent në Greqi, të ngjashëm si dy pika uji vetëm me lëvizjen komuniste guerrilje.

PASOK-u bashkonte tre grupe të mëdha militantësh: Grupi i parë përbëhej nga majtistë të rafinuar, të kulturuar e të sofistikuar. Grupi i dytë përbëhej nga intelektualë të rinj të shkolluar në Perëndim, të cilët u kthyen në Greqi pas rënies së Juntës. Disa prej tyre ishin teknokratë të kualifikuar, të cilët përballë dilemës së fortë për të zgjedhur ndërmjet së Djathtës të stilit të vjetër dhe një të Majte marksisto-revolucionare, parapëlqyen këtë të fundit, ngaqë e Djathta ishte diskretituar nga Junta.

Kostas Simitis (Kostaqi i sotëm që dha dorëheqjen nën trysninë e Jorgaqit-birit kryeneç të Andreas), asokohe ministër i Ekonomisë së qeverisë së PASOK-ut, pasi u shkarkua me ceremoni dhe u poshtërua publikisht prej Andreas Papandreut, bashkë me disa të tjerë si Antonis Tricis (ish-ministër i PASOK-ut për Mjedisin, gjithashtu i shkarkuar), bënin pjesë në grupimin e dytë. Mëkati i vetëm i Tricis-it ishte se ligjet për mbrojtjen e Mjedisit i zbatoi njëlloj, si për bisnesmenët e së Djathtës, ashtu edhe për ata të së Majtës. Por shumica e intelektualëve të rinj të grupimit të dytë nuk ishin teknokratë. Ata ishin pajisur me disa dije sipërfaqësore në shkollat perëndimore - çka ishte e mjaftueshme për të fituar një dozë të lehtë sofistikimi dhe një krenari të fryrë e false. Duke iu referuar kësaj kategorie njerëzish, Naipol i konsideron ata "njerëz të vegjël, gjysëm të formuar, të cilët mendojnë se i kanë kokat të mbushura me ide të mëdha - në të vërtetë të turbullta dhe me një qasje natyrore të gabuar për t'i zbatuar...".

PASOK-u ishte i tejmbushur me kësi mjeranësh, të cilët të shtypur nën peshën e urrejtjeve të akumuluara - shfrynin me tërbim qëndrime agresive dhe kriminale. Prej këtij takëmi dolën dhunuesit ideologjikë, që dërgoheshin nga Papandreu nëpër ambasadat greke të Perëndimit për të ruajtur dhe spiunuar diplomatët e karrierës.

Në grupimin e tretë futeshin njerëzit më të rëndësishëm të PASOK-ut. Në këtë takëm ishin të rrallë ata që dinin apo flisnin ndonjë gjuhë të huaj përveç greqishtes. Këta vinin nga fshati ose nga lagjet punëtore. Kishin një fjalor vulgar dhe harbutëllëku u lexohej në ballë. Këta, në rrethana të tjera mund të kishin punuar fare mirë edhe me Juntën, ashtu siç mund të kishin qenë edhe kundër saj, pa kurrfarë vështirësie. Ky grupim bënte be e rrufe për Papandreun, i cili ndjehej në mes tyre si në shtëpinë e vet. Këta ushqenin një besnikëri klanore ndaj Andreas. Por kur Papandreu mallkonte dhe hakmerrej, njerëz të këtij takëmi, sikundër Agamemnon Kucogiorgas (njeriu i dytë më i fuqishëm pas Papandreut gjatë të gjithë viteve të sundimit të tij), dikur e panë veten prapa hekurave. Kucogiorgas e rrasën në qelitë e të njejtit burg të Pireut, ku ishte izoluar edhe shefi i Juntës, Papadopullos - duke mbajtur kësisoj si byzylykë prangat, çelësat e të cilëve i kish Andreas. Papandreu gjithmonë e kish mbajtur këtë njeri në stafin drejtues të ministrisë së Jashtme, ku priste koka dhe parfumohej e krekosej duke marrë poza intelektuali.

Vijon në numrin e ardhshëm

Kjo kronikë-analizë publicistike është një nga perlat botërore të publicistikës, që e radhit autorin tek analistët dhe njohësit më të shkëlqyer të Greqisë bashkëkohore.

Nëpërmjet saj, lexuesit njihen me thelbin e këtij kombi me origjinë të ngatërruar e të dyshimtë, çka ndihmon për të kuptuar e shpjeguar edhe bizantinizmin e zhvillimeve ballkanike dhe të sjelljes së klasave politike të rajonit. Këto klasa politike - për shkak të komplekseve ndaj të kaluarës antike të kombit aktual grek (shpesh e supozuar dhe e pathemeltë) - janë tejet të ndikuara dhe shpesh i ngjajnë modelit grek sikundër pikat e ujit njëra-tjetrës. Por, fatkeqësisht, edhe Perëndimi i zhvilluar e vuan dominancën shtypëse të një imazhi virtual të Mrekullisë dhe Demokracisë që rrezaton e trashëgohet nga Antikiteti "grek", i cili qoftë në kronologji, qoftë në thelb dhe madhështi, është shekuj shpejtësi drite larg me kombin që aktualisht popullon Greqinë dhe që kundrohet si pretendent i asaj origjine.

Në analizën e tij, autori i bën një autopsi PASOK-ut grek dhe liderit të saj legjendar Andrea Papandreu, nga ku jo vetëm rezulton se ato e meritojnë njëri-tjetrin dhe janë në bashkëlidhje e marrëdhënie ekzistenciale biunivoke, por edhe sepse raportet e tyre të ndërsjella me Perëndimin dhe Demokracinë - janë nga më absurdet.

Ky shkrim që vijon, synon të përqasë tek lexuesit portretet e PASOK dhe Papandreut, si dhe ngjashmërinë e zhvillimeve dhe karaktereve politike të politikave dhe lidershipeve përkatëse, greke dhe shqiptare.

Ju, të nderuar lexues, do të shokoheni nga ngjashmëria dhe do të pandehni se modelet shqiptare të zhvillimeve dhe lidershipit janë imituar enkas me besnikëri apo janë transferuar me imponim - nga realiteti grek në atë shqiptar!

"ATDHEU"

__________________________

___________________________

Nga Astrit KOLA

Që Nano ka bërë gati valixhet, këtë askush nuk e vë më në dyshim. Dhe ta bësh këtë kur mijëra të uritur dhe qytetarë që nuk kanë nevojë të tërhiqen prej hundësh nga "mjaft-istët" e kërkojnë largimin duke rrezikuar edhe jetën - është veprimi më i arsyeshëm edhe për një burrë të zakonshëm shteti, e jo më për një ikanak recidivist, që gjithmonë ka çarë ferrën kur ia ka ndjerë..., apo kur i është tekur të rrokëllijë ndonjë gastare në dhe të huaj.

Por protesta e djeshme e opozitarëve ka vlerë madhore, sepse dëshmoi para së gjithash se opozita disponon akoma vizion dhe vendosmëri për t'i paraprirë ndryshimeve të cilat nuk mund të jenë kurrsesi thjesht "civile", apo të ideuara e drejtuara nga "civilistët e shoqërizuar", të cilët kishin vendosur t'i thonin "Mjaft" Nanos por jo Maxhorancës tashmë të diskretituar.

Protesta e djeshme ka pamundësuar përfundimisht ndërrimin e "kuajve" socialistë në "vaun" e Lumit të Rrëmbyer të Urrejtjes Mbarëpopullore. Kështuqë kuajt e ngordhur të Pseudomaxhorancës ilegjitime të tipit "Majko" apo Lakrori e Islami, e kanë humbur përfundimisht shpresën për të këmbyer gërdallën-Nano në mes të "vaut".

Protesta e djeshme i dha fund iluzioneve për vazhdimësinë e eksperimenteve me kabinete llapushësh dështakë, të cilët konsumuan prej 7 vjetësh të gjithë arsenalin e kokave të fandaksura të soc-ëve që shihnin ëndrra me udhëheqës e ministra.

"Kur vret veten, askush nuk ta ka gjakun borxh", - thotë populli. Por këta nuk pyesin për popull. Këta e kanë mendjen t'i thonë popullit dhe opozitës që "... të mos bëjë politikë me tragjeditë dhe mjerimin" sa herë ju vjen veza..., sepse ndryshe nuk arrijnë t'u shpjegojnë fëmijëve të tyre se "çfarë donte ajo gruaja e veshur me të zeza në Parlament, kur i dërgoi një qiri të ndezur" Kryetarit të Madh që po recitonte në pupitër vjershën e radhës, stisur nga bejtexhinjë e zyrave të qeverisë!!!

Po çfarë të bëjmë me tragjeditë e shkaktuara nga banditët qeveritarë more shoku soc - të bëjmë ekonomi, kulturë, apo transport!!!

Natyrisht që politikë do të bëjmë shoku soc-kongresmeno-deputet.

Që opozita dëshmoi se di të bëjë politikë dhe të menaxhojë protestën mbarëpopullore, këtë e vërtetuan plumbat dhe bombat me gaz lotsjellës që policët e pushtetit derdhën mbi protestuesit.

Vetëm politika mund të japë zgjidhje - dhe nuk ka zgjidhje tjetër për krizën totale shqiptare përveçse zgjidhjes politike. Shqipëria nuk ka patur dhe për shumë kohë nuk do të ketë nevojë për zgjidhje "mjaft-iste" apo të ideuara dhe drejtuara nga zyra shëtitëse-ndërqytetëse, që përveçse protestës kundër marrëzive të pushtetit nuk ofrojnë kurrfarë zgjidhjesh për ta shpëtuar këtë vend nga katastrofa.

E ku tjetër mund të gjenden zgjidhjet përveçse tek opozita e organizuar politikisht - mos vallë tek Pseudomaxhoranca që konsumoi në çmenduri dhe limonti idioteske 7 vjet sundimi retrograd?!

Askush nuk i pengon "mjaft-istët" që të mbajnë hazër shpatat në millet e dhuruara, për t'i nxjerrë ato sërish nëse nevoja e lyp në të ardhmen, sepse dritat, uji e buka do të mungojnë edhe për shumë kohë - sepse pushtetarët aktualë rrënuan çdo gjë.

Por opozita lipset të menaxhojë me kujdes mllefin popullor - që provokatorët dhe agjenturat e huaja të mos e shfrytëzojnë për destabilizim dhe terror. Sepse kjo opozitë nuk ka kurrfarë lidhjeje me ideologjitë dhe revolucionet e pseudomaxhorancës, të cilat këtij vendi i kanë sjellë veçse shkatërrim.

Ky vend dhe ky popull nuk mund të suportojnë më shkatërrime të paramenduara në vigjilje të ndërrimit të pushteteve, ndryshe - një situatë e dalë jashtë kontrolli do t'i hiqte përgjithmonë të drejtën opozitës aktuale për të marrë në duar fatet e vendit.

Menaxhimi i suksesshëm i protestës është konfirmim i aftësive të opozitës për të menaxhuar fitoren e sigurtë - që duhet të rezultojë doemos shpëtimtare për Shqipërinë dhe shqiptarët.

Ka ardhur koha kur edhe shqiptarët socialistë e kanë kuptuar se ky pushtet nuk e meriton të kalërojë më mbi këtë vend. Rrotacioni i pushtetit i konvenon edhe atyre, sepse 7 ekipet qeverisëse që ata ndërruan për 7 vjet, dëshmuan paaftësi kriminale për ta drejtuar këtë vend.

Shqiptarët duhet të mësohen të largojnë nga zverku çdo forcë politike apo koalicion qeverisës që nuk përmbush premtimet për bukën e fëmijëve, për shkollat, për dritat, për punësimin, strehimin dhe zhvillimin.

Qeverisja e Pseudomaxhorancës dështoi në të gjitha këto objektiva të premtuara 7 vjet më parë, dhe kjo periudhë është shumë e gjatë për t'u toleruar.

Banditët e pushtetit gjatë këtyre 7 vjetëve patën në duar afro 10 miliardë $ nga buxhetet e shtetit, por askush nuk di të thotë se në cilat vrima të zeza përfunduan ato.

Prandaj këta duhet të ikin sa më parë nga pushteti, por jo të lejohen të ikin nga Shqipëria megjithë valixhet, pasaportat e soj-sorrollopin e tyre.

Ora e zgjedhjeve të reja ka ardhur. Opozita duhet të përgatisë Ligjin e Ri zgjedhor dhe të realizojë zgjedhje të ndershme, që do të sjellin në pushtet qeverisje të ndershme dhe luajale ndaj këtij populli, ndryshe...

Mjaft më me kopukë dhe psikodelirantë të papërgjegjshëm, që ngatërrojnë shtetin me pushtetin dhe abuzojnë me ta. Mjaft më me "civilistë të shoqërizuar" që nuk kanë dëshmuar kurrfarë përgjegjësie për këtë vend, përveçse kanë numëruar prostitutat dhe drogmenët e këtij vendi; që kanë mësuar fshatarët e Ostrenit e Sllovës sesi t'i mbjellin patatet dhe barinjë e Korabit sesi t'i mjelin delet.

Tani e kanë radhën intelektualët dhe qytetarët idealistë, të cilët opozita i ka me shumicë.

Politika është vizion dhe aftësi për menaxhimin e burimeve njerëzore e materiale të një vendi e të një shoqërie të civilizuar që aspiron demokraci, dhe jo trampolinë për pushtete abuzive.

"Litari këputet nga të holluarit, ndërsa zullumi këputet nga të trashurit", - thotë populli.

Dhe zullumi i tepërt rrezikon të gjenerojë konfrontime të rrezikshme e destabilizuese - ndaj opozitës i lipset më shumë se kurrë qartësi dhe vendosmëri për ta çuar deri në fund aksionin politik, pasi dhuna e iniciuar së fundmi ishte thjesht një sprovë e dështuar.

Askush nuk e rrezikon kokën për pushtetet dhe valixhet e këtyre që, për herë të fundit, po përshëndoshen me pushtetin.

NMT Mbreti Leka I-rë del nga spitali, pas operacionit të suksesshëm në këmbë

Ditët e Mbretit Leka në spital

Mbreti Leka I-rë ka ndenjur plot 8 ditë në spitalin ku iu nënshtrua dy operacioneve në këmbë. Pikërisht të martën e kaluar, datë 3 shkurt, në orën 14:30 padite, NMT la klinikën e doktor Petrelës, dhe me ambulancën e posaçme kthehet në rezidencën mbretërore aktuale, në jug të qytetit të Tiranës. Gjatë këtyre ditëve Mbretin e kanë vizituar përveç njerëzve të Oborrit Mbretëror e krerëve legalistë, edhe politikanë e personalitete të ndryshme. Mësohet se ndër këta ka qenë Arbër Xhaferri, ambasadori anglez, zv.kryeministri Dokle, ministri Solis ish kryeministri Ilir Meta e të tjerë. Në këto vizita ata i kanë uruar Mbretit Leka shërim të shpejtë e rikthim në jetën normale.

Ditën e daljes së Mbretit nga spitali, stafi mjekësor i spitalit, i kryesuar nga doktor Petrela, dha një konferencë shtypi ku e cilësoi "të suksesshme" ndërhyrjen kirurgjikale në këmbën e Mbretit. Sipas tyre, "ecuria e kësaj ndërhyrjeje ka qenë mjaft e mirë", pasi NMT ka arritur të rikuperohet për 4 ditë. Ndërsa normalisht kërkohet 1 javë kohë. Sipas Dr. Petrelës, "klinikat ortopedike shqiptare janë me emër dhe përveç Mbretit në to janë operuar edhe personalitete të tjera të vendit dhe nga trojet etnike".

Në këtë konferencë të stafit mjekësor, ku u folën fjalët më të mira për Profesor Pëllumb Karagjozin, i cili bëri operacionin, ishte i pranishëm edhe kreu i Zyrës së Oborrit Mbretëror z.Fluturak Gërmenji.

Në një prononcim për mediat z.Gërmenji deklaroi se "Mbreti së shpejti do të ketë një aktivitet më publik dhe do ta bëjë së shpejti konferencën e shtypit të paralajmëruar ditën që NMT u shtrua në spital, më 26 janar të këtij viti".

Mbreti Leka, në një prononcim për mediat deklaroi se "Mesazhi Im tashmë është bërë i ditur. Por Unë do të kem një takim të dytë për të thënë fjalën time, sapo ta ndjej veten mirë. Ndoshta pas dy javësh". Këtë periudhë pushimi e konfirmoi indirekt edhe z.Gërmenji, i cili tha se "nuk kemi të përcaktuar një datë konkrete, pasi duhet të shihet koha e rikuperimit të shëndetit të Mbretit, por gjithsesi ajo do të jetë pas dy javëve të ardhshme".

Siç dihet, Mbreti Leka u aksidentua të dielën e datës 25 janar, në një shtresë akulli mbi pllakat e ngrira të oborrit të vilës së banimit. Në këtë rrëshqitje Mbreti Leka I-rë pësoi një frakturë të kockës femorale të këmbës së djathtë. Pas aksidentimit, ekipi i mjekëve përgatiti sallën e kirurgjisë së QSUT "Nënë Tereza", në Spitalin Nr. 5 të Neurologjisë. Kështu, ditën e hënë, më 26 janar, Mbreti u fut në sallën e kirurgjisë, ku u operua nga Prof. Dr. Pëllumb Karagjozi, nën asistencën e Prof. Dr. Mentor Petrelës; Dr. Leka Hoxhës; mjekut të Familjes Mbretërore z.Yllson Ibrahimllari dhe mjekut reanimator z.Kliti Pilika.

Operacioni u realizua me anestezi lokale dhe konfirmoi diagnozën e vendosur nga mjekët pas radiografisë preoperacionale pra: Fractura comunitive trochanteris (thyerje e kockës së kofshës në rrëzë të kokës së saj (trochanter), që artikulon me gropën e baçinit).

Megjithëse e thyer në një zonë delikate, e cila i nënshtrohet tensioneve të mëdha, ndërhyrja e suksesshme e ekipit mjekësor siguroi palëvizshmërinë dhe mundësinë e rigjenerimit të indit kockor brenda një kohe të shkurtër. Për të siguruar imobilizimin e plotë e më pas rigjenerimin, mjekët vendosën dy pllaka metalike prej materiali shumë të kushtueshëm, të cilat fiksoheshin me afro 8 vida. Operacioni zgjati afro dy orë. Pas operacionit gjendja shëndetësore e NMT Mbretit Leka ishte mjaft e mirë. Por dy ditë më pas u konstatua se Mbreti kishte pasur një lëvizje të lehtë të kockës, çka i detyroi mjekët të bënin ndërhyrjen e dytë. Kjo ndërhyrje ishte më delikate, por gjithsesi rezultoi mjaft e suksesshme. Mjekët konfirmuan në një konferencë shtypi se "ndërhyrja ishte mjaft e suksesshme".

"Kjo ndërhyrje kirurgjikale është e para pas kaq vitesh jetë të NMT", - konfirmuan burime pranë Oborrit Mbretëror. Mbreti ka gëzuar gjithmonë një shëndet të fortë dhe ka bërë një jetë mjaft aktive. Këto ditë të operacionit, e bllokuan NMT Mbretin Leka në regjim të detyruar shtrati dhe ia ndryshuan disi regjimin ditor.

Gjithsesi rikuperimi i shëndetit të Mbretit ishte mjaft i shpejtë, dhe ky është një ogur mjaft i mirë për të gjithë shqiptarët, e sidomos për legalistët dhe mbretërorët në veçanti.

"Atdheu"

Legalistët tiranas, të gjithë në protesta

Në një konferencë shtypi, dy krerët kryesorë të PLL Dega Tiranë, u bënë thirrje të gjithë legalistëve e mbretërorëve shqiptarë të dilnin në protesat për të rrëzuar qeverinë dhe klikën "Nano". Kështu, të premten e shkuar, z.Hamit Kurti - nënkryetar i Degës së PLL Tiranë dhe z.Blerim Kamberi - sekretar i kësaj Dege, përçuan para qytetarëve tiranas dhe mbarë shqiptarëve mesazhin e protestës ndaj qeverisë socialiste. Në këtë konferencë shtypi, deklaratën e lexoi veterani aktiv i Degës së PLL Tiranë z.Kurti, i cili dilte për herë të parë para kamerave e gazetarëve.

Në fjalët e tij z.Kurti kërkoi mbështetjen e protestave të datës 7 shkurt "... për t'ia shkurtuar ditët qeverisë Nano".

Kurti tha se kjo Degë është "përgatitur seriozisht për mitingun e opozitës" dhe ka vënë në "lëvizje të gjitha strukturat e nëndegëve, për një pjesëmarrje sa më masive". Kurti tha gjithashtu se "është në detyrimin e çdo legalisti, antikomunisti, e të Përndjekuri nga regjimi komunist - të dalë në shesh e të thërrasë: Nano largohu!"

Ndërsa sekretari i Degës z.Kamberi, shpjegoi se "vetë fakti që ne po japim një konferencë shtypi, tregon rëndësinë që i kemi kushtuar protestës së ditës së shtunë". Ai tha se "kemi angazhuar të gjithë njerëzit nëpër strukturat tona në Tiranë, që të sensibilizojnë tiranasit për të dalë në protesta".

Kjo konferencë shtypi e zhvilluar nga dy drejtuesit kryesorë të Degës së Tiranës, u zhvillua në selinë qendrore të PLL. Siç dihet, Dega e Tiranës është në një proces zgjedhjesh nëpër seksione e nëndegë, dhe më pas do të zhvillojë konferencën e radhës, ku do të zgjidhet kryetari i ri i Degës dhe Komiteti i ri Drejtues. Ish-kryetari i kësaj dege z.Sadedin Balla është përjashtuar nga strukturat e PLL në mbledhjen e fundit të Këshillit Kombëtar. Drejtuesit e Degës së Tiranës, z.z.Kurti e Kamberi u shprehën optimistë për ecurinë e këtij procesi selektiv në gjirin e kësaj Dege.

"Atdheu"

Deklaratë për mediat e Partisë Lëvizja e Legalitetit

PLL: Duhet dëbuar klika Nano

Partia Lëvizja e Legalitetit, e shqetësuar për zhvillimet politike në vend dhe sidomos për keq-qeverisjen e partisë në pushtet, me pasojë rëndimin e skajshëm të jetës së shqiptarëve, mendon se sot është domosdoshmëri kombëtare dhe rrugëzgjidhje e vetme, largimi i kësaj force politike nga sundimi. Sistemi antihuman që ka instaluar klika e socialistëve, reflektohet në të gjitha rrafshet e jetës sonë siç janë, gjendja e mjerueshme ekonomike, mungesa e sigurisë për jetën, mungesa e të drejtave elementare njerëzore, apo dhe thjesht zhdukja e mundësisë për të ndërtuar jetën në këtë vend.

Treguesit negativë të këtij sistemi qeverisës shihen në rritjen abuzive të çmimeve në treg, taksat shkatërruese për biznesin, tarifat çnjerëzore të energjisë e telefonisë, për të vazhduar me rritjen e kriminalitetit të organizuar, ku po bëjnë emër bijtë e pushtetarëve apo të afërmit e tyre, si dhe shtimi i dukshëm i kontrabandës, trafiqeve të drogës e qenieve njerëzore. Këto fakte të njohura nga të gjithë denoncojnë drejtpërdrejt në rastin më të mirë: - mungesën e vullnetit politik të klanit në pushtet për të dalë nga kjo gjendje kaotike, ose, në rastin më të keq, - qëllimin e tyre demoniak për ta shkretuar këtë vend.

Klani sundues i partisë në pushtet tregoi qartë në këto vite "qeverisëse" se në vend të paqes dhe "sigurisë sociale" që trumpetoi, solli më shumë varfëri, më shumë mjerim, më shumë pasiguri, duke vrarë keqas shpresën e shqiptarëve se mund të jetojnë të qetë në vendin e tyre. Rasti më i fundit, ngjarja tragjike e 9 janarit është një fakt kuptimplotë i stilit qeverisës të këtij klani.

Në këto kushte Partia Lëvizja e Legalitetit u bën thirrje aktivistëve dhe simpatizantëve të saj t'i bashkohen protestës së 7 shkurtit si e vetmja rrugë dhe e vetmja mundësi që qytetarët shqiptarë të synojnë të marrin në dorë fatin e së ardhmes së tyre.

Dega e Partisë Lëvizja e Legalitetit në Tiranë, ka marrë të gjitha masat që nesër të jenë në shesh të gjithë legalistët, simpatizantët e Legalitetit e Monarkisë, të gjithë nacionalistët, antikomunistët, të përndjekurit dhe çdo qytetar i Tiranës, i cili nuk e duron më këtë qeveri mbi kurriz.

Gjithashtu ritheksojmë se Partia Lëvizja e Legalitetit sheh si zgjidhje të vetme, krijimin e një qeverie teknike që do të përgatisë infrastrukturën e zgjedhjeve të reja të parakohshme, të cilat do t'u japin mundësinë shqiptarëve të jetojnë një jetë normale.

Tiranë, më 06 shkurt 2004

Opozita e bashkuar në sheshin "Skënderbej" udhëheq protestat mbarëpopullore

Po bie regjimi i Nano-maxhorancës

Qeveria: plumba, gaz lotsjellës, tela me gjemba dhe mjete të forta mbi demonstruesit. Toska në krye të shikasve dhe reparteve speciale të Sampistëve e Briskut.

Nga Neritan Kolgjini

Nano dhe telat me gjemba

Në mitingun e zhvilluar nga opozita të shtunën, datë 7 shkurt në sheshin "Skënderbej", forcat e policisë dhe të Gardës kanë qëlluar me armë zjarri dhe kanë përdorur gazin lotsjellës. Në kohën kur demonstruesit e irrituar kanë protestuar para selisë së Kryeministrisë, janë dëgjuar të shtëna të shumta me breshëri dhe është dëgjuar shpërthimi i bombave që përmbanin gazin lotsjellës. Këto metoda të forta të forcave të Rendit kanë shkaktuar irritim në radhët e demonstruesve, të cilët deri në ato momente po protestonin në mënyrë normale. Plumbat e shkrehur nga armët e forcave speciale dhe atyre të Gardës, nuk kanë shkaktuar ndonjë pasojë, ndërsa gazi i përdorur mbi demonstruesit bëri që një pjesë e të moshuarve dhe e të vegjëlve - të humbin ndjenjat përkohësisht dhe të kishin dhimbje të forta në sytë dhe në grykë.

Pas këtij reagimi të papritur të policisë së drejtuar personalisht nga Igli Toska, qytetarët protestues kanë filluar të shtrëngojnë radhët e të qëllojnë mbi fasadat e Kryeministrisë, ku si rezultat janë thyer xhamat e derës kryesore me pamje nga shëtitorja "Dëshmorët e Kombit".

Njoftohet se gjatë këtyre përplasjeve, qenka plagosur brenda në ambjentet e kryeministrisë, komandanti i gardës Arben Çuko, i cili thuhet se "u godit nga ciflat e xhamave të thyer".

Rreth e rrotull selisë kryeministrore ishin vendosur disa gardhe me policë, trupa speciale, ushtarë të gardës me mbështetje edhe nga njerëz të SHISH-it. Ndërsa nëpër taracat e kryeministrisë dhe ish Komitetit Qendror të PPSH, ishin vendosur përforcime me automatikësa dhe snajperë.

Nëpër radhët e protestuesve dhe në ambjentet zyrtare, përflitet se kishte një numër të konsiderueshëm agjentësh të SHISH-it. Një risi e masave mbrojtëse të forcave qeveritare ishin gardhet me tela me gjemba, të cilat irrituan protestuesit më shumë sesa armët e bëra gati për zjarr. Gjate konfrontimit te protestuesve me trupat speciale, keta te fundit kane perdorur shkopinjte e gomes dhe armet automatike etj., si mjete te forta kunder demostruesve paqesore e te paarmatosur.

Mësohet gjithashtu se gjatë kohës së zhvillimit të mitingut, shumica e lagjeve të Tiranës nuk ka pasur energji elektrike. Si pasojë qytetarët e Tiranës jo-pjesëmarrës në miting, nuk kanë mundur ta ndjekin atë përmes televizioneve që e transmetonin drejtpërdrejt.

Mitingu

Rreth dy orë ka zgjatur protesta e djeshme (e shtunë 7 shkurt) e qytetarëve të Tiranës, të cilët kanë mbushur si rrallëherë sheshin kryesor të kryeqytetit. Që në orën 12:00, dhjetëra mijë protestues kishin dalë në shesh me parrulla, pankarta, flamuj e simbole të tjera, për të shprehur mllefin e tyre ndaj qeverisë së socialistëve dhe personalisht ndaj kryeministrit Nano. Lajtmotiv i këtij tubimi ka qenë thirrja "Nano ik!", e cila sa herë që përmendej nga oratorët e ndryshëm, shkaktonte një valë reagimi, dhe kori gjigant i protestuesve bënte të tundej sheshi "Skënderbej".

Në këtë miting të zhvilluar në nderim të viktimave të tragjedisë së 9-10 janarit në detin e Vlorës, morën pjesë krerët kryesorë të opozitës, si dhe përfaqësues të partive parlamentare e shoqatave të ndryshme. Kështu në podium përveç kryetarëve të partive opozitare si Sali Berisha, Ekrem Spahiu, Nikollë Lesi, Arben Imami, Hysen Selfo, Adriatik Alimadhi, Teodor Laço etj., ishin edhe mjaft deputetë e përfaqësues shoqatash politike e atdhetare. Kështu psh., ishin deputetët e opozitës si Ridvan Bode, Pjeter Arbnori, Maks Begeja, Edi Paloka, Preç Zogaj, Neritan Alibali, Vili Minarolli e personalitete si Prof. Dr. Ylli Pango e shumë të tjerë.

Ndërsa nga PLL, përveç kryetarit Spahiu në këtë miting morën pjesë edhe zyrtarë të tjerë të kësaj partie si z.Murat Basha, z.Artan Tujani, z.Nebi Ganellari, z.Blerim Kamberi, deputeti Sadedin Balla, z.Hamit Kurti, z.Seit Preni, z.Nevruz Ndregjoni e plot aktivistë të tjerë të kësaj partie në kryeqytet.

Binte në sy prania e mjaft portreteve të Mbretit Leka dhe të flamujve të verdhë të Legalitetit me simbolin monarkist.

Mitingun e hapi kryetari i PD-së së Tiranës z.Vili Minarolli, i cili u bëri thirrje mbarë qytetarëve të bashkohen me protestën për të kërkuar rrëzimin e qeverisë Nano.

Pas tij fjalën e mori kryetari i shoqatave të Tiranës z.Arben Tafaj, njëkohësisht kryetar i Minibashkisë 3 në kryeqytet, i cili me tone të forta ka akuzuar qeverinë si shkaktare e mjerimit të tiranasve dhe gjithë shqiptarëve.

Po ashtu, mjaft i ashpër ka qenë në fjalën e tij edhe z.Sali Berisha, i cili mes duartrokitjeve të pjesmarrësve ka hedhur akuza të rënda ndaj kryeministrit Nano, duke e etiketuar atë edhe si shkaktar të varfërisë që po kanos dita-ditës vendin dhe shqiptarët.

Spahiu: Ja përse po protestojmë sot

Kryetari i PLL Spahiu u ka bërë thirrje shqiptarëve të mbështesin masivisht protestat, pasi ato janë rruga e duhur për shporrjen e klikës së Fatos Nanos. Në fjalën e tij të mbajtur në emër të partive parlamentare të opozitës, z.Spahiu tha se "Sot jemi të bashkuar të gjitha partitë e vërteta opozitare, për të protestuar kundër qeverisë socialiste dhe kryeministrit Fatos Nano. Qeveria socialiste dhe Fatos Nano e kanë damkosur Shqipërinë si vendin e trafiqeve të zeza, ku vetëm gjatë vitit 2003 kanë qarkulluar rreth 2 miliardë dollarë para të pista droge e trafiqesh të tjera. Ne protestojmë të gjithë sëbashku - demokratë, legalistë, republikanë, ballistë, liberalë e demokristianë, sepse qeveria Nano i kthyer shqiptarët refugjatë në vendin e tyre!"

Më pas Spahiu ka denoncuar politikën e qeverisë Nano, e cila i ka varfëruar skajshmërisht shqiptarët. Spahiu përmendi rritjen e çmimeve të bukës, ujit e telefonisë, si dhe rritjen e taksave e kontrabandës - që kanë sjellë uljen drastike të sandardit të jetesës së shqiptarëve.

Spahiu tha se "protesojmë të gjithë sëbashku sepse qeveria po i detyron shqiptarët të arratisen nga vendi i tyre. Ngjarja tragjike e 9 janarit nuk është spontane, por veçse krimi qeveritar i radhës. Djemtë tanë vdesin në dëborë duke kaluar malet për në Greqi; vriten në kufirin maqedonas e poshtërohen nga autoritetet greke. Ne protestojmë sëbashku sepse kryeministri Nano nuk lejon zgjedhje të lira në Shqipëri, sepse ka frikë se i ikën pushteti. Ne protestojmë për t'u rikthyer shqiptarëve nderin e dinjitetin, zhvillimin dhe prosperimin. Me protestën tonë ne synojmë integrimin e Shqipërisë në strukturat euro-atlanike, sepse ky integrim arrihet vetëm me largimin e qeverisë aktuale dhe të kryeministrit Nano, duke u hapur udhë zgjedhjeve të parakohshme." Fjalën e tij, z.Spahiu e mbylli me një thirrje për fitoren e opozitës në zgjedhjet e afërta.

Marshimi para Kryeministrisë

Pas fjalimeve të oratorëve të ndryshëm në sheshin "Skënderbej", dhe pasi z.Berisha deklaroi mbylljen e mitingut, demostruesit paqësorë u drejtuan instiktivisht drejt selisë së Kryeministrisë. Me thirrjet "Nano ik, Nano ik!", "O Fatos o zagar, ti je grek nuk je shqiptar", "O Fatos o hajdut, paret tona ku i ke fut!" e mjaft të tjera te njohura, demonstruesit u derdhën si një llavë njerëzore në gjithë gjerësinë e shëtitores "Dëshmorët e Kombit", për t'u pozicionuar ndërmjet vilës qeveritare të Nanos dhe selisë së tij kryeministrore. Kjo masë njerëzish ishte vërtet impresionuese, pasi në kohën që kreu i turmës kishte mbërritur te Kryeministria, në sheshin e vogël pas monumentit të Skënderbeut, njerëzit ende vazhdonin të vinin radhazi për te selia e Nanos. Kjo prostestë masive ishte ndër më të mëdhatë në pikëpamje të pjesëmarrjes dhe, sipas vlerësimeve të njerëzve me eksperiencë, aty duhet të kenë qenë disa dhjetëra mijëra. Pas dy orësh proteste, dhe pas përplasjes me forcat e Rendit, njerëzit u kthyen para oborrit të PD-së, ku z.Berisha u mbajti edhe një fjalim tjetër.

Mësohet se këto protesta do të vazhdojnë edhe në ditët e ardhshme. Konkretisht, një datë e përfolur është edhe data 9 shkurt, ku do të bëhen homazhe për viktimat e detit të Vlorës, ndërsa etapa tjetër e protestave do të jetë data 20 shkurt - përvjetori i ditës së rrëzimit të monumentit të diktatorit Enver Hoxha.

Protesta e zhvilluar të shtunën ka krijuar një panik të dukshëm në radhët e qeveritarëve, të cilët menjëherë pas kësaj i bënë thirrje z.Sali Berisha, përmes një deklarate, që të distancohej nga protestuesit "menjëherë dhe publikisht"; nga ata që, sipas qeverisë, janë "dhunuesit e institucioneve të shtetit".

Në deklaratën e qeverisë ndihej nervozizmi, thjesht edhe nga mënyra sesi janë përdorur tonet kërcënuese. Ndërmjet të tjerash në deklaratë thuhej se "Qeveria e Republikës së Shqipërisë deklaron se është e vendosur të godasë pa asnjë hezitim cilindo që kërkon të dhunojë ligjin, institucionet dhe rendin publik. Qeveria do të kërkojë menjëherë raportim ligjor nga të gjitha strukturat e shtetit dhe do të aktivizojë gjithë masat goditëse ligjore ndaj atyre që dhunshëm përpiqen e do të përpiqen të destabilizojnë vendin dhe rajonin. Qeveria garanton opinionin publik dhe partnerët ndërkombëtarë se është e vendosur të sigurojë dhe të mbrojë rendin kushtetues në shërbim të stabilitetit. Njëherësh ne (pra pushtetarët - shën. i Red.), i kërkojmë komunitetit ndërkombëtar të investigojë tejkalimin nga protesta paqësore në dhunë kundër institucioneve."

Këto deklarata kërcënuese të kujtojnë kohën e regjimit komunist. Edhe qeveria e Nanos sot është kthyer krejtësisht në formë e përmbajtje në një sistem autoritar e despotik, i cili kërkon të qëndrojë me dhunë në pushtet.

Nderkohe zërat opozitarë, të bashkuar e të forcuar kohët e fundit, duket se kësaj radhe do ta përmbysin këtë regjim komunistësh e narkotrafikantësh.

Fieri zgjedh drejtuesit e rinj

Spahiu në konferencën e PLL Fier: Afrimi i idealistëve, intelektualëve, të rinjve dhe elementit femëror, sigurisht që do ta forcojnë PLL-në

Fier - Dega e PLL zhvilloi konferencën të dielën e shkuar, ku u zgjodhën kryetari i Degës dhe Komiteti i ri Drejtues. Në këtë konferencë mori pjesë edhe kryetari i PLL z.Ekrem Spahiu.

Në konferencë u bë analiza e punës për periudhën 2-vjeçare, analiza e zgjedhjeve të 12 tetorit, si dhe votimet për kryetar Dege e anëtarët e rinj të Komitetit Drejtues. Në fund të votimit, kryetar i Degës u zgjodh z.Rexhep Krasniqi, një prej anëtarëve më të hershëm të kësaj Dege.

Konferencën e PLL e përshëndetën edhe drejtuesit lokalë të partive të djathta dhe të shoqatave antikomuniste.

Si u zhvillua konferenca

Sikurse kishte vendosur Komitetit Drejtues i Degës së PLL Fier, më datë 1 shkurt 2004, ditën e Kurban-Bajramit, zhvilloi punimet konferenca e PLL së kësaj Dege. Në konferencë merrnin pjesë delegatët në një raport përfaqësimi nga të gjitha nëndegët e rrethit të Fierit.

Raportin në emër të Komitetit Drejtues e mbajti kryetari i Degës z.Bilbil Saliu. Në raport, z.Bilbil Saliu i bëri një analizë punëve të kryera nga drejtuesit e Degës si dhe paraqiti një pasqyrë financiare të shpenzimeve të bëra. Por, në pjesën më të madhe, raporti ishte përqëndruar në zgjedhjet lokale, ku z.Saliu vlerësoi arritjet e PLL duke thënë se "për herë të parë mbas 13 vjetësh pluralizëm, PLL ka këshilltarët e vet në disa komuna". Në raport u përmendëm për punë të mirë edhe disa kryetarë nëndegësh nëpër komuna, sidomos përsa i përket rezultatit të tyre të mirë në zgjedhjet e fundit. Fjalë të mira z.Saliu tha edhe në drejtim të Kryesisë së PLL, e cila, sipas tij, "e kishte ndihmuar pa kursim Degën, në të gjithë punën e bërë deri më sot". Ai u shpreh se "gjatë fushatës një ndihmesë të madhe ka dhënë edhe Kryesia qendrore dhe sidomos kryetari i Partisë z.Ekrem Spahiu. Ai është treguar i gatshëm të vijë në çdo rast që kemi bërë tubime me elektoratin", u shpreh z.Saliu. Në fund fjalën e tij z.Saliu e mbylli me urime për Familjen Mbretërore e për NMT Leka I - Mbret i Shqiptarëve.

Mbas raportit dhe pyetjeve e morën fjalën diskutuesit e shumtë.

Z.Malush Kastrati - kryetar i Nëndegës Levan, fillimisht kërkoi 1 minutë heshtje për viktimat e tragjedisë së 9 janarit 2004. Ai vlerësoi rezultatin e Nëndegës së tij, ku PLL mori 303 vota dhe fitoi një këshilltar, z.Koçi Gega, i cili është dhe këshilltar i qarkut të Fierit. Më tej z.Kastrati u shpreh se "... kjo qeveri i ka ditët të numëruara. Shqiptarët nuk kanë çfarë presin prej saj, por ne kemi një shpresë të madhe - kthimin e Mbretit në pushtet, i cili do ta ndryshojë përgjithmonë jetën e qytetarëve shqiptarë.

Ndërsa z.Bajram Bajrami (kryetar i Nëndegës Patos), tha se "nuk jam aspak i kënaqur me rezultatin e nëndegës dhe jo vetëm për dobësinë e punës sime, por edhe të anëtareve të tjerë drejtues të Nëndegës".

Në fjalën e tyre zotërinjtë Sulejman Gashi, (Nëndega Ndërmenas), Jani Omeri (Nëndega Portëz), Tomor Buzi (Nëndega Mbrostar), Asllan Veliu e Aleksandër Ogiçi (Nëndega Topojë), Koçi Gega (Levan), Petrit Llanaj (Cakran), Spartan Vaca, Nikolla Veizi, Kudret Zhupani e të tjerë, evidentuan arritjet e Degës së PLL Fier, por edhe nxorën në pah mangësitë e vërejtura në zgjedhjet e 12 tetorit.

Spahiu: Të afrohen idealistët

Pas diskutimeve e mori fjalën kryetari i PLL z.Ekrem Spahiu, i cili fillimisht u uroi të pranishmëve festën e Kurban Bajramit, (sepse zhvillimi i kësaj konference përkoi pikërisht me këtë festë). Z.Spahiu vazhdoi më tej fjalën e tij duke falenderuar delegatët dhe duke i uruar punë të mbarë konferencës, "... e cila jo vetëm që po bën bilancin e punëve 2-vjeçare, por edhe do të zgjedhë kryetarin dhe strukturat drejtuese për dy vitet e ardhshme, çka përkon edhe me zgjedhjet e ardhshme parlamentare, e që priten me mjaft interes nga shqiptarët".

Z.Spahiu në fillim të fjalës së tij informoi të pranishmit rreth shëndetit të Mbretit Leka I, i cili para disa ditësh pësoi një frakturë në këmbë dhe iu nënshtrua një operacioni të detyrueshëm.

Pasi foli për gjendjen politike në vend, z.Spahiu u përqëndrua në zgjedhjet vendore të 12 tetorit ku PLL arriti një rezultat pozitiv dhe, më pas kaloi në analizën e rezultatit zgjedhor të Degës së PLL Fier, e cila për herë të parë arriti të ketë këshilltarët e saj në 7 njësi vendore.

Këshilltarët e PLL janë: Sulejman Gashi (Komuna Ndërmenas), Koçi Gega (Komuna Levan), Tomorr Buzi (Komuna Mbrostar), Jani Omeri (Komuna Portëz), Skënder Malaj (Komuna Qendër-Çlirim), Shpëtim Ymeraj (Komuna Ruzhdije), Aleksandër Ogiçi (Komuna Topojë).

"Këshilltarët e PLL të dalë nga njësitë vendore, duhet të luajnë një rol mjaft aktiv në mbështetje të elektoratit legalist në veçanti, si dhe të komunitetit të tyre, që të ndikojnë me autoritetin dhe fjalën e tyre në mbarëvajtjen e punëve në këto këshilla vendore.

Sigurisht ky rezultat nuk justifikon mundin dhe djersën e legalistëve të Degës së Fierit, për arsye objektive dhe subjektive, por e rëndësishme është dalja më vete, evidentimi i mangësive dhe përvoja e fituar, të cilat bashkë me rezultatin e marrë do të jenë baza e punës suaj për të ardhmen", - theksoi z.Spahiu.

Më pas z.Spahiu kërkoi që "... Dega të ketë si prioritet në të ardhmen afrimin e idealistëve, intelektualëve, të rinjve dhe elementit femëror, të cilët për një arsye apo tjetër nuk kanë qenë të angazhuar deri më sot në PLL, por që sigurisht afrimi i tyre do të jetë një bazë e shëndoshë për të thithur elektoratin dhe për të afirmuar më fort PLL në të ardhmen".

Gara: si fitoi z.Rexhep Krasniqi

Më pas u kalua në pikën e fundit të rendit të ditës, për zgjedhjen e kryetarit dhe Komitetit të ri Drejtues.

Konkurruan për kryetar të Degës: 1.Bilbil Saliu; 2.Malush Kastrati; 3.Jani Omeri; 4.Rexhep Krasniqi.

Pas votimit, komisioni shpalli fitues z.Rexhep Krasniqi, si dhe anëtarët e Komitetit të ri Drejtues, i cili përbëhet prej 19 vetësh.

Komiteti i ri Drejtues zhvilloi mbledhjen e parë të tij në këtë konferencë dhe zgjodhi strukturën e re drejtuese si më poshtë:

Nënkryetar: 1.Bilbil Saliu, 2.Koçi Gega, 3.Bajram Bajrami.

Sekretar Organizativ: Jani Omeri,

Sekretar i Marrëdhënieve me Publikun: Malush Kastrati

Shef i departamenteve: Asllan Veliu.

Gjithashtu KD i propozoi qendrës kandidaturat për sekretar të Përgjithshëm të Degës, ndërmjet të cilëve edhe sekretarin e mëparshëm z.Tomorr Buzi.

Në fund të këtyre zgjedhjeve, kryetari i PLL z.Spahiu, u uroi punë të mbarë kryetarit të porsazgjedhur të Degës dhe anëtarëve të Komitetit Drejtues të ri të Degës së PLL Fier.

Korresp. "Atdheu"

Dega e PLL Shijak zhvilloi mbledhjen e Komitetit Drejtues

Legalistët shijakas përgatiten për konferencën

Ditën e premte, më datë 23 janar 2004, u zhvillua mbledhja e radhës e Komitetit Drejtues të Degës së PLL Shijak, nën drejtimin e kryetarit të saj z.Bajram Rubjeka. Në këtë mbledhje, si të deleguar të qendrës ishin zotërinjtë Murat Basha e Seit Preni.

Ra në sy mungesa e pajustifikuar e anëtarëve të Komitetit Drejtues të nëndegëve Rrashbull e Gjepalaj, ndonëse ishin lajmëruar. Që në fillim të mbledhjes, të pranishmit mbajtën një minutë heshtje në nderim të aktivistit të PLL, z.Jaho Smoqi, ndarë nga jeta para disa ditësh. Në raportin e z.Rubjeka u kritikua si mjaft i dobët rezultati prej 500 votash në shkallë Dege, marrë gjatë zgjedhjeve vendore të 12 tetorit, për të cilin justifikimi kryesor ishin manipulimet e theksuara, si pasojë edhe e mungesës së anëtarëve në KQV-të. Në raport u theksua ndihma e qendrës, sidomos e z.Seit Preni.

Diskutantët u shprehën me tone të ashpra ndaj Ideal Deliallisit dhe Xhavit Xhetanit, të cilët jo vetëm ishin larguar si të pakënaqur nga renditja në listat e këshilltarëve, por edhe i ishin kundërvënë partisë dhe kishin penguar fushatën.

U theksua se, gjatë fushatës përveç komunës Maminas, të gjitha njësitë zgjedhore ishin mbuluar me kandidatë dhe lista zgjedhore. Kandidatura për kryetar të bashkisë e vendosur në Shijak, u konsiderua "jo e goditur", çka sipas diskutantëve ishte reflektuar edhe në rezultat.

Nga diskutimet doli gjithshtu se, në shumë familje e fise legalistësh e mbretërorësh nuk ishin marrë votat e pritshme dhe se në listat për këshilltarë kish patur subjektivizëm, që kish sjellë rezultat të dobët.

Në diskutimin e tij z.Xhemal Keçi theksoi se "... një nga shkaqet e dobësive ishte edhe niveli arsimor i pamjaftueshëm i drejtuesve në kryesinë e Degës, si dhe mungesa e mbështetjes së drejtuesve kryesorë, të cilët do të duhej të ishin shijakas autoktonë".

Ndërsa z.Medi Braçe në fjalën e tij theksoi se "dobësitë e punës ishin shfaqur edhe në mungesën e lidhjeve me familjet e shumta zogiste në Shijak, të cilat nuk mbështetën sa duhet PLL-në", ndaj ai kërkoi që në krye të forumeve të afroheshin "intelektualë dhe njerëz me bindje të palëkundshme e besnikë ndaj idealeve legaliste".

Ndërsa z.Hasan Allushi evidentoi mungesën e mirëkuptimit dhe unitetit të mendimit e veprimit të drejtuesve të Degës, si dhe mungesën e strukturave dhe dobësitë në shtrirjen e partisë në bazë.

Z.Elidon Porja, kryetar i Forumit Rinor, theksoi se ky forum ka vështirësi për shkak të indiferencës së të rinjëve shijakas ndaj politikës dhe dobësive të punës të mbartura ndër vite. Z.Porja i konsideroi këto dobësi si një difekt i rëndë i punës së partisë, të cilat sipas tij "kërkojnë një punë intensive për të përmbysur gjendjen".

Në diskutimin e tij z.Zyhdi Deliallisi theksoi se, për shkak të moshës, megjithë përpjekjet nuk kish mundur ta kryente si duhet detyrën e nënkryetarit të Degës, ndaj kërkoi zëvendësimin e tij në këtë detyrë delikate. Z.Deliallisi bëri thirrje për afrimin e të rinjve në parti dhe aktivizimin e tyre, "duke u dhënë përgjegjësi konkrete dhe duke i zgjedhur në drejtim".

Ndërsa z.Kadri Libohova në diskutimin e tij kritikoi ashpër formalizmin dhe fiktivitetin e punës së forumeve drejtuese dhe strukturave, duke kërkuar ndryshimin e drejtuesve dhe metodës së punës.

Në diskutimin e tij, sekretari i Degës z.Sefer Çipi, pasi pranoi punën e dobët të tij dhe z.Rubjeka, theksoi se "një grup brenda partisë po e dëmton rëndë atë duke mbjellë përçarje", dhe si rrugëzgjidhje për këtë situatë kërkoi; ose bashkimin e Degës me Degën e PLL Durrës, ose afrimin sa më parë të intelektualëve shijakas, me aftësi dhe mbështetje, pasi sipas tij kjo ishte edhe kërkesë e shijakasve autoktonë.

Pas z.Çipi e mori fjalën i deleguari i qendrës, sekretari i Senatit z.Seit Preni, i cili në fjalën e tij pasi kritikoi drejtuesit lokalë për rezultatin e dobët, sugjeroi afrimin e të rinjve dhe intelektualëve si domosdoshmëri për shëndoshjen e gjendjes. Gjithashtu z.Preni kritikoi edhe tendencat e indiferentizmit dhe apatisë së veteranëve legalistë, duke kërkuar prej tyre më shumë idealizëm, përkushtim e sakrifica.

Në fund të takimit e mori fjalën nënkryetari i PLL z.Basha, i cili në fjalën e tij ishte tepër kritik për rezultatet dhe punën e dobët të Degës, ndonëse sipas tij "... duke qenë afër qendrës, ndihma jo vetëm që nuk kish munguar por kish qenë shumë më e madhe sesa në Degë të tjera që ishin dalluar për rezultate të mira".

Duke miratuar shumë nga mendimet e diskutantëve për përmirësimin e punës në të ardhmen, z.Basha në vijim të fjalës u bëri thirrje anëtarëve të forumeve që të alternonin "përvojën e militantizmin idealist të veteranëve me frymën e re bashkëkohore të intelektualëve, duke harmonizuar kontributet e brezave", që "jo vetëm e mbajnë partinë në shinat konservative të trashëguara por i japin asaj edhe tipare bashkëkohore dhe freski ideshë, alternativash e origjinalitet". Gjithashtu z.Basha premtoi se "ndihma e kryesisë do të jetë e vazhdueshme" dhe se "në qendër ekziston besimi se legalistët shijakas do të dijnë t'i kapërcejnë dasitë e dobësitë e vërejtura, duke i konsumuar energjitë vetëm për forcimin e partisë dhe shtrirjen e saj në të gjithë skajet e rrethit".

Më tej z.Basha porositi që "drejtuesit t'i kushtojnë vëmendje dokumentacionit, zbatimit të statutit dhe punës organizative për përgatitjen e konferencës së Degës".

Në fund u ndanë detyra specifike për të gjithë anëtarët e Komitetit Drejtues, të cilët u zotuan se do të mobilizohen për t'i zbatuar ato brenda afateve!

Korresp. i "Atdheu"-t

Logjika e qeverisjes monarkike

J. A. Crisp II

www.romaniankingdom.com

monarkia kushtetuese është zgjedhja më e qartë për një qeverisje, e cila mund të kënaqë pjesën dërrmuese të njerëzve, dhe kësisoj të sigurojë stabilitetin. Ajo ka aftësinë të përfaqësojë gjëra të ndryshme për njerëz të ndryshëm, qoftë si ikonë kombëtare në vend të një ideologjie politike apo thjesht ca principesh të vagullta. Një monark nuk e pengon lirinë e një kombi; ai e mbron atë prej politikanëve të paskrupullt dhe zullumqarë.

Shumë njerëz e argumentojnë çeshtjen e monarkisë nga një këndvështrim emocional ose fetar, ashtu siç kam bërë edhe unë shpesh herë në të shkuarën. Por kjo mënyrë mund të injoronte aspektet racionale dhe më të qarta të asaj se përse monarkia është një formë qeverisjeje më e mirë sesa republika. Para së gjithash, të gjithë shtetet e botës mund të kategorizohen ose si republika, ose si monarki, qyshse, për definicion, një republikë është çdo gjë që nuk është monarki.

Zvicra mund të jetë një konfederatë ndërsa SHBA një republikë federale, por të dyja nuk janë monarki dhe sidoqoftë të dyja janë republika. Një republikë, po ashtu edhe një monarki, mund të jetë autoritare ose demokratike dhe përsëri të quhet republikë ose monarki. Le të marrim si shembull dy republika si Franca dhe Kuba, ose dy monarki si Hollanda dhe Katari. Gjithsesi edhe në terma të përgjithshëm, monarkia rezulton gjithmonë superiore ndaj republikës në pothuaj çdo shtet.

Në rastet e tiranive kundrejt demokracisë nuk është monarkia në vetvete një faktor vendimtar. Anglia për shembull ka pasë prej kohësh një monarki të kufizuar, ndërsa shtete si Kuvajti dhe Arabia Saudite janë natyrshëm monarki absolute, të cilat u përshtaten bindjeve të tyre fondamentaliste. Monarkia në format e saj të ndryshme është e dobiprurëse për secilën palë. Në çdo monarki absolute që është sot në fuqi, ka një arsye kulturore e fetare për të, ata shtete nuk kanë qenë kurrë demokraci dhe në disa raste monarku është i pajisur me një status divin prej fesë së tyre specifike. Në këtë mënyrë, vetëm një monark mund ta sundonte një shtet, i cili është i bazuar në parime, të cilat nuk pranojnë gjë tjetër veçse monarkinë absolute.

Monarkia kushtetuese është qeverisja, e cila është provuar të ketë qenë më e mira e të gjitha sistemeve (të qeverisjes). Kërkimet kanë treguar se (në ato shtete) pasuria është e shpërndarë më ndershmërisht, besimi ndërveti është më i lartë, respekti për qeverinë është më i madh dhe demokracia është më e arrirë nëpër monarkitë sesa në republikat. Përveçse në SHBA dhe Zvicër, republikat nuk kanë lënë kund ndonjë kujtim të mirë. Republika franceze u zëvendësua me Perandorinë Franceze, e cila u zëvendësua me mbretërinë, të cilës ia zuri vendin një republikë tjetër, që u zëvendësua nga një perandori e dytë dhe kjo nga një republikë e tretë e kështu me radhë. Republika Gjermane ishte kaq e dobët dhe jopopullore saqë lejoi Hitlerin të kapte pushtetin ndërsa Republika kineze është përmbysur herë pas here nga çdo "zotëri i luftës" deri sa erdhi në fuqi regjimi totalitar shtypës e gjakatar i komunistëve. Ndërsa Perandoria japoneze ka të njëjtën dinasti të pandryshuar (Yamato) që prej themelimit të saj 660 vjet para Krishtit, çka i bën ata monarkia më e vjetër në botë.

Argumenti i vjetër republikan se monarkia u jep pozitë atyre që nuk e meritojnë, do të kishte mbështetje, veçse në rast se ata (republikanët) nuk do ta kishin të njëjtin problem. Gjithsesi "garën nuk e fiton gjithmonë më i shpejti, dhe betejën më i forti" siç na e ka treguar herë pas here politika. Në një republikë, më i forti dhe jo më i miri merr pushtetin; ose mashtruesi më i mirë, jo lideri më i mirë, shkon e zgjidhet në krye. Në SHBA presidencën nuk e merr lideri më i mirë, por politikani më i mirë, njeriu që është gënjeshtari më i sofistikuar, që ka më shumë para për fushatën dhe reklamat, dhe që mund t'u tregojë njerëzve atë që ata kanë qejf të dëgjojnë. Në një monarki, siç është pranuar kjo në vitet e shkuara, monarku i ardhshëm është stërvitur gjithmonë qysh prej lindjes së tij për rolin që ai/ajo do të trashëgonin një ditë. Një monark është i prirur të bëjë më të mirën e mundshme, duke e ditur se një djalë apo një vajzë e tij një ditë do ta pasojë atë. Një politikan shpesh qëllimisht lë gracka të ngrehura për pasardhësit e tij, të cilët zakonisht janë opozitarë.

Një monark është gjithashtu më i ndershëm dhe i paanshëm, përderisa ai nuk ia ka borxh postin asnjërit. Asnjë parti nuk i ka vendosur ata në fron kështuqë ata janë të aftë të qendrojnë përmbi kufijtë partiakë dhe të gjejnë atë që është më e mira për kombin. Në të njëjtën mënyrë një monark është pandryshueshmërisht më shumë popullor, përderisa ai s'është as konservator as liberal, por nga ana tjetër bashkëpunon me secilin grup të zgjedhur në pushtet nga populli. Kur e Drejta Hyjnore e Mbretërve zbatohej me përpikmëri, monarku edhe qeveriste, ndërsa sot monarkët vetëm mbretërojnë por nuk qeverisin. Peshkopi francez Jacques Bossuet ka shkruar se pushteti mbretëror duhet të jetë absolut, përndryshe monarku nuk do të jetë i aftë të bëjë gjëra të mira ose të shtypë të këqijat.

Në fakt kjo ka ndodhur dhe sot shumica e monarkëve kanë dy të drejta dhe detyrime: të këshillojnë e të këshillohen dhe të paralajmërojnë. Duke u nisur nga fakti që monarkët posedojnë një eksperiencë publike shumë të gjatë, kjo mund të jetë shumë shumë e vlefshme. Është gjithashtu e rëndësishme të kujtojmë se duke zgjedhur një lider në një republikë, ne nuk kemi asnjë garanci. Askush nuk di të thotë se si do ta drejtojë shtetin një njeri, deri në momentin që ai të hipë në karrige. Sidoqoftë, virtualisht është e pamundur të zgjedhësh kandidatin më të mirë çdo herë, thjesht për shkak se maxhoranca beson se ai është kandidati ideal.

Megjithatë është e nevojshme thjesht të ndajmë se cila formë qeverisjeje ka lënë kujtimin që ka punuar më mirë dhe ka mbështetur idetë në të cilat beson një komb. Natyrisht kjo do të ishte qeverisja mbretërore, përderisa studime të panumërta kanë nxjerrë në pah monarkitë mbi të gjitha, si vendet më të begatshme në botë. Në fakt ka më shumë monarki demokratike në botë sesa republika demokratike. Një monarki kushtetuese është e aftë të mbajë kulturën dhe traditat e një kombi dhe njëkohësisht të lejojë një shkallë më të lartë të lirisë personale dhe të përfaqësimit. Qeverisja monarkiste parlamentare është ajo që promovon një shumicë partish politike, ndërsa republika shpesh ka dy ose edhe vetëm një parti të gjithëpushtetshme. Duke pasë parasysh këto përfitime, përkulja e kokës apo thyerja e gjunjve, duket një çmim fare i vogël për t'u paguar. Çfarë është shfaqja e pak nënshtrimi & nderimi, krahasuar me begatinë kombëtare?

Për më tepër, ne duhet të përpiqemi të luftojmë përshtypjen false të mbrojtur shpesh nga republikanët kundrejt monarkisë si sistem. Shumica e monarkive nuk janë më absolute; ato u janë përshtatur në një mënyrë apo në një tjetër lëvizjeve shoqërore majtiste. Në vendet ku njerëzit nuk pranuan të punojnë brenda këtij sistemi dhe të mbanin kurorën si një forcë stabilizuese, gjërat shkuan shumë keq. Revolucioni brutal Rus dhe vrasja e Carit Nikolla II s'bëri asgjë më shumë sesa konvertimin e Rusisë nga tirania e së djathtës në tiraninë e së majtës. Në fakt Cari kishte ndërmarrë disa hapa për ta bërë Rusinë një shtet demokratik kur ai u shtrëngua të abdikojë.

Një tiran s'ka nevojë të mbajë një kurorë mbi kokë që të jetë shtypës. Le të marrim shembullin e Kinës Komuniste, lideri i tyre nuk e ka titullin Biri i Qiellit ose Lordi i 10,000 Vjetëve, por ata megjithatë provuan se janë brutalë dhe shtypës kundrejt popullit të vet. Përveçse humbën shumë njerëz, ata humbën gjithashtu edhe një pjesë të kulturës së tyre.

Njerëzit mund të jetojnë në një shoqëri shumë më paqësore nën mbretërimin e një monarku. Demokratët i gëzohen formës demokratike të përfaqësimit zgjedhor, ndërkohë që konservatorët mund të ngushëllohen me faktin se monarkia është ende aty për të mbretëruar, edhe pse nuk qeveris, dhe të flenë gjumë natën duke e ditur se dinastia po vazhdon jetën e saj.

Alexander Hamilton ka shkruar se "Nëse qeverisja është në duar të pak vetëve, ata do të tiranizonin shumicën; nëse është në duart e shumicës, ata do të tiranizonin pakicën. Prandaj duhet të jetë në duart e të dyja palëve, veç e veç... ata kanë nevojë për një siguresë të përbashkët. Kjo siguresë është monarku."

Në Britaninë e Madhe qeverisja është një monarki kushtetuese, megjithëse monarku ka deleguar pothuaj të gjitha pushtetet e tija kushtetuese që ai mban, te zyrtarët e zgjedhur, të cilët veprojnë në emër të tij. Kjo është më demokratike dhe garanton që publiku të mbetet i kënaqur dhe ta mbajë monarkinë në vendin e saj, megjithëse në raste krizash të mëdha monarku mund të përdorë autoritetin e tij për të shkarkuar zyrtarët e kurruptuar dhe të bëjë zgjedhje të reja.

Me pak fjalë monarkia kushtetuese është zgjedhja më e qartë për një qeverisje, e cila mund të kënaqë pjesën dërrmuese të njerëzve, dhe kësisoj të sigurojë stabilitetin. Ajo ka aftësinë të përfaqësojë gjëra të ndryshme për njerëz të ndryshëm, qoftë si ikonë kombëtare në vend të një ideologjie politike apo thjesht ca principesh të vagullta. Një monark nuk e pengon lirinë e një kombi; ai e mbron atë prej politikanëve të paskrupullt dhe zullumqarë. Vetëm në një monarki, me një kurorë të pavarur nga politika e partive, të trashëgueshme dhe dinjitare, është e mundshme për një shtet të jetë njëkohësisht i mirë dhe i dashur.

Publikuar më 2001

Marrë nga www.romaniankingdom.com

Nga New York mesazhe kundër regjimit komunisto-mafioz të Tiranës

Shqiptaro-amerikanët: "Të shporret Nano nga Shqipëria"

Nga Beqir SINA

New York (SHBA)

Njëzëri shqiptarët të bashkuar në një protestë përpara Misionit Diplomatik Shqiptar pranë OKB-së në NY kanë kërkuar largimin e asaj që ata e quajtën regjimi socialisto-stalinist i Tiranës apo klika mafioze e Nanos&Co. "Stop përgjithmonë vrasjeve politike dhe vdekjes së shqiptarëve në Jon apo Adriatik!" ishte lajtmotivi i protestës së tyre. Një orë e më parë Nano duhet t'u hiqet qafe shqiptarëve pasi po i mbyt dhe nuk po i lë të marrin frymë lirisht, - u shprehën oratorë të ndryshëm në tubimin e datës 4 shkurt 2004.

Dr. Gjon Buçaj, nenkryetar i "Vatrës" ka drejtuar këtë protestë dhe falënderuar gjithë pjesëmarrësit. Ai propozoi që protesta e shqiptaro-amerikanëve në NY të nisë me një minutë heshtje për gjithë viktimat e klikave sllavo-komuniste që qeverisin shqiptarët, si dhe në veçanti për viktimat me të fundit të tragjedisë së Karaburunit.

Kanë qenë 7 (shtatë) organizata shqiptare të "Trishtetëshit) Nju Jork, Nju Xhersi e Konektikat të cilët nën udhëheqjen e "Vatrës" përfaqësueses më të madhe të diasporës shqiptare kanë bërë thirrje për bashkim mbarëkombëtar për të shporrur qeverinë e Nanos, e cila është konsideruar si fajtorja kryesore për gjendjen e mjeruar të shqiptarëve.

Kryetari i "Vatrës" ing. Agim Karagjozi që në fillim të fjalës se tij u shpreh së kurrë kjo shoqatë nuk e ka njohur qeverinë e Tiranes, madje e ka konsideruar atë si kriminale dhe një të zezë për shqiptarët si në Shqipëri, Kosovë e gjetkë. Ndaj ai bëri thirrje për bashkim të të gjithëve, pa dallim feje, krahine apo ideje që të marrin pjesë dhe të protestojnë kundër gjendjes së krijuar në Shqipëri. "Kurrë nuk do të kishim dëshirë që të protestonim pranë një misioni shqiptar në Amerikë, por konstatojmë se edhe ky mision eshtë pjesë e asaj qeverie", -u shpreh zoti Karagjozi.

Teza kryesore e mesazhit të përhershëm, të demonstratave antikomuniste në Amerikë, zhvilluar nga nacionalistët, patriotët e demokratët shqiptaro - amerikanë, kanë qenë disa nga shtyllat e çështjes kombëtare; Kosova, shqiptarët në trojet etnike, çështja Çame, rrëzimi i Qeverisë së Tiranës. Mesazhi i tyre u është drejtuar si gjithmonë Qeverisë amerikane, kongresit, senatit dhe popullit të SHBA-ve, në përpjekje për të ndihmuar në të gjitha aspektet çështjen shqiptare në Ballkan, si dhe demokratizimin e Shqipërisë. Në këtë aspekt roli historik i nacionalistëve, patriotëve dhe demokratëve shqiptarë në SHBA-ës, qëndron, pikërisht në luftën kundër Qeverisë komuniste të Tiranës, kuslingëve dhe mafies politike.

Këtë kanë dashur të shprehin krerët e organizatave pjesëmarrëse në proteste si Federata Pan-Shqiptare "Vatra", Partia Lëvizja e Legalitetit, Partia e Ballit Kombëtar, Organizata Shqiptaro-Amerikane për Demokraci, Blloku Kombëtar Indipendent, Partia Bashkimi Demokrat Shqiptar dhe shoqata "Gjenerata e Re Shqiptare".

Omari: Po dekorohen xhelatët!

"A e meritojnë shqiptarët një qeverisje të tillë?!" Me këtë thirrje kreu i organizatës së shqiptaro-amerikanëve për demokraci (degë e PD), z. Muhamet Omari kerkoi që të nxisë disi frymën e protestës kundër atij regjimi që vazhdon të vrasë e të grabisë shqiptarët. Gjithashtu në emër të bashkimit z. Omari kërkoi që me protesta mbarë kombëtare të çlirojmë familjet tona të cilave po u meret fryma nën atë gjendje të skajshme të mjerimit që ka pllakosur ne Shqipëri.

"Kemi dalë të protestojmë edhe kundër presidentit të Shqipërisë, -deklaroi z. Omari, - që dekretoi ministra të korruptuar, dekoroi Fehmi Avdiun një ish-gjykatës i tmerrshëm i cili ka dhënë 17 dënime me vdekje dhe 879 vite burg vetëm për motive politike". Gjithashtu ai i bëri thirrje Tiranës, Shkodrës së martirizuar, Vlorës së familjeve të mëdha atdhetare e antikomuniste, i bëri thirrje Korçës, Gjirokastrës, Elbasanit, Fierit, Lushnjes, Durrësit, Kukësit, Peshkopisë dhe gjithë shqiptarëve intelektualë dhe demokratë të ndërgjegjësohen për rolin qe kanë.

Hakik Mena: Stop vrasjeve politike

Në protestë e mori fjalën edhe kryetari i Partisë Lëvizja e Legalitetit për Trishteteshin z. Hakik Mena i cili u shpreh se për shqiptarët ishte fatkeqësi ardhja e ish-komunistëve në pushtet të cilët që në fillim nisën me vrasjen e Arben Brocit duke treguar se nuk mund të pajtohen me një Shqipëri të lirë dhe demokratike. "Komunisto-mafiozet, - u shpreh z. Mena, - filluan shantazhet dhe presionet me krijimin e organizatës famëkeqe "Hakmarrja për Drejtësi" dhe vrasjen e nacionalistit dhe demokratit të flaktë Kolonel Bujar Kaloshit. Këto presione kulmuan me vrasjen e liderit të demokracisë Azem Hajdarit dhe Ministrit të Mbrojtjes së Kosovës Kolonel Ahmet Krasniqit. Ata krijuan me anë të grekëve kushtetutën anti shqiptare. Ata sabotuan luftën e Kosovës duke mohuar liderët e vërtetë deri në provokim të luftës civile në Kosovë e Shqipëri".

Z. Mena u shpreh se e vetmja zgjidhje për kombin shqiptar në këto momente të vështira dhe shpëtimi i shqiptarve nga zgjedha komuniste është Mbreti i të gjithë shqiptarve NMT Leka I Mbret i shqiptarëve. Me parrullat mbretërore "Atdheu mbi të gjitha" dhe Paqe, Vllaznim Bashkim" kreu i legalistëve të Treshteshit, e mbylli përshëndetjen e tij.

Nano thike pas shpinë Kosovës

Në përshëndetjen e tij nënkryetari i "Vatres" Z. Agim Rexha u shpreh se qeveria e sotme e Tiranes është po aq e izoluar sa edhe ajo e Enver Hoxhes dhe Ramiz Alise, pasi kurrë Nano nuk ka marrë ndonjë ftesë zyrtare nga Administrata Amerikane. "Nano, -tha ai, -ia ka ngulur thikën pas shpine Kosovës. Nano ishte ai qe u takua me Milosheviçin dhe tradhtoi interesat shqiptare duke konsideruar Beogradin si kryeqytet të shqiptarëve të Kosovës". Ai shtroi pyetjen se sa herë Nano ka vizituar Kosovën?! Në mbyllje të fjalës së tij z. Rexha deklaroi se shqiptaro amerikanët, duke pasur paravetes një vend demokratik, si SHBA, nuk mund ta pranojnë një qeveri të korruptuar dhe të lidhur me vrasje politike si ato të Ahmet Krasniqit dhe Azem Hajdarit.

Një familje demokratësh shkodran, Sydki Diçi dhe Engjellushe Lici, i tha gazetës kombëtare "Bota Sot" se: "Kur do të ngopet Nano me Shkodrën? Mos don të hapë edhe digat e Vaut të Dejes e të mbysë gjithë Shkodrën!?!"

Para protestuesve foli edhe z.Lek Miraka ish i burgosur i diktaturës.

Ndërsa me tundjen e pankartave dhe valëvitjen e flamujve shqiptare dhe amerikanë, thirrjeve të fuqishme "Poshtë qeveria Nano" dhe "USA, USA, USA" dhe me interesin e shumë kalimtarëve njujorkezë kjo protestë u mbyll duke demonstruar një kulture te lartë protestuese.

Si konkluzion themi se kjo demostratë politike paqësore tregoi se është në vazhdën e protestave që shqiptaro-amerikanët bëjnë për më se gjysëm shekulli përtej oqeanit, kundra neokomunistëve sot në pushtet në Shqipëri dhe veglave të tyre.

Si u pasqyrua protesta në Mediat shqiptaro - amerikane

Gazetat, televizioni lokal, radio lokale i bënë jehonë të madhe demostratës së zhvilluar në kryeqendrën e botës New York. Gazeta kombëtare "Bota sot", më e madhja në botën shqiptare i ka kushtuar vend të veçantë reportazhit nga New York. Gazeta, i bëri zë demostratës një ditë më parë me një editorial i cili u vlerësua dhe përshëndet nga të gjithë lexuesit e kësaj gazete. "Bota sot" shkruan se : "Teza kryesore e mesazhit të perhershëm, të demostratave antikomuniste në Amerikë, zhvilluar nga nacionalistët, patriotët e demokratët shqiptaro - amerikan, kanë qenë disa nga shtyllat e çështjes kombëtare: Kosova, shqiptarët në trojet etnike, çështja Çame, rrëzimi i Qeverisë së Tiranës."

Edhe gazetat e tjera si "Illyria" e gazeta më të vogla e kanë pasqyruar gjerësisht këtë protestë të shqiptaro-amerikanëve.

KOMENTI

Pse po protestojmë para ambasades shqiptare

Hakik Mena

Kryetari i PLL USA

Jemi mbledhur sot ketu perpara nderteses se ambasades shqiptare, fatkeqesisht sot e gjendur ne duart e qeverise komuniste mafioze te Tiranes, per te protestuar ndaj gjendjes katastrofike te krijuar ne vendin tone; gjendje kjo e cila imponon çdo dite vellezerit tone shqiptar te braktisin atdheun e tyre te dashur ne kerkimim te nje pergjigje per dilemen e mbijeteses. Edhe pse te vetedijshem per kurthin e kesaj dileme, ata vazhdimisht perplasen me ujerat e shpreses se rreme per nje jete te bukur drejt tokes se huaj duke perfunduar ne tragjedira. Te tilla tragjedirave tashme gjithnje e te pashmangshme per vellezerit tane iu bashkangjit edhe kjo e fundit, tragjedia e Karaburunit, e cila edhe nje here vertetoi qarte politiken regresiste, antikombetare komunisto-mafioze qe ndiqet nga klika vasale e Athines dhe e Beogradit e udhehequr nga perversi Fatos Nano. Kjo klike komuniste-mafioze e zhveshur nga çdo virtyt njerezor dhe kombetar eshte duke punuar ne menyre te organizuar dhe konstante dita-dites ne kundershtim te çeshtjes tone kombetare. Kjo suite e degjeneruar antikombetare ne menyre te qete dhe te vetedijshme eshte e angazhuar deri ne fund ne degradimin e çdo gjeje pozitive kombetare qe ka mundur te mbijetoje tek shqiptaret. Kjo klase, e cila nuk eshte veçse produkt me origjine fillestare e dale nga sajesa sllave nen kujdesin e Dushan Mugoshes e Miladin Popoviçit ecin nen udhezimin e drejtimin e baballareve te tyre te kuq te cilet pushkatuan, internuan burgosen me mijera patriote, intelektuale dhe shqiptare te pafajshem duke e zevendesuar ndergjegjen kombetare me njeriun e shperlare socialist. Eshte po e njejta klase komunisto-mafioze e cila me renien e komunismit e detyruar nga rrethanat nderkombetare nderroi emrin nga PPSH ne PPS, ndonese vizioni i saj regresist mbeti i njejte. Kjo klase e percudnuar qe ne fillimet e ardhjes se demokracise se brishte ne Shqiperi u kujdes per te eleminuar dhe menjanuar me te gjitha menyrat me skenat dhe prapaskenat e tyre bizantine elementin e paster kombetar si pershembull vrasja e Arben Brocit ne Shkoder ne 2 Prill te 1991. Ata u krijuan kushte komode oficerave te tyre te Sigurimit ne depertimin e te gjitha partive dhe organizatave te ndryshme politike gje qe ndikoi ne pengimin e lulezimin e demokracise shqiptare. Me ardhjen e demokracise ne Shqiperi dhe largimin e tyre nga pushteti ata nuk e pranuan kurrsesi veten e tyre opozite. Por perkundrazi u hodhen ne sulm duke krijuar organizaten terroriste "Hakmarrja per drejtesi" dhe tashme te qete filluan te godisnin njerezit te cilet u bene pengese e realizimeve te programeve te tyre kriminale, mafjoze dhe antikombetare si p.sh. vrasja barbare e Kolonelit Bujar Kaloshit i cili lindi dhe u rrit ne vendet me te egra te internimit dhe rridhte nga nji familje nacionaliste. Kjo klase tashme ishte ne perpjekje e siper ne organizimin e rebelimit te armatosur qe ndodhi ne Shqiperi ne 1997-en, si shkak i humbjeve te parave ne skemat piramidale edhe keto te kontrolluara nga ish-sigurimsat, per te marre ne çdo menyre pushtetin qofte edhe me çmim te larte siç qe fillimi i luftes civile. Me te vertete ishte fatkeqesi kombetare riardhja e tyre ne pushtet, gje te cilen e ata e arriten duke djegur, rrenuar, shkaterruar Shqiperine ne saje te ndihmes te klaneve shoviniste greke e serbe dhe mafieve te ndryshme rajonale. Ato erdhen ne pushtet ne menyre jolegjitime duke manipuluar voten e lire ne saje te grykes se pushkes dhe terrorit duke u vene ne krye te bandave ordinere. Keto bolshevike trathtare mbasi siguruan manipulimin e votes parlamentare ne menyre emergjente iu kthyen manipulimit te rezultateve te referendumi. Riardhja ne pushtet e komunisto- mafiozeve eshte moment tragjike dhe tashme kombi yne eshte duke kaluar ne regres te plote. Komunisto mafiozet fillojne shantazhet presionet arrestimet dhe kulmojne me vrasjen e liderit te demokracise Azem Hajdarit. Ata krijojne me ane te grekeve kushtetuten antishqiptare dhe e aprovojne, edhe pse pjesmarrsit ishin ne numer te paperfillshem. Ata sabotojne luften ne Kosove duke prodhuar figura artificiale dhe duke mohuar lideret dhe luftetaret e vertete deri ne provokimin e luftes civile. Nuk mund te harrohen slloganet e Fatos Nanos mbas takimit me Millosheviçin se ai qe di te beje luften ben edhe paqen, ose e Rexhep Meidanit se Millosheviçi eshte e keqja me e vogel. Insistimi i tyre per te qendruar ne pushtet vazhdon me manipulimin perseri te votes se lire me zgjedhjet lokale te vitit 2000, zgjedhjet parlamentare te 2001, e deri tek lokalet e mevonshme te vitit 2003. Ky manipulim u arrit nepermjet blerjes se medias, pareve te pista te investuara ne Shqiperi, te mafies se droges, prostitucionit, te trafikut te klandestineve, armeve, dhe kontrabandes se cigareve. Si perfundin komunisto-mafjozet kane monopolizuar te gjitha bizneset dhe ne te njejten kohe kane shitur tek shovinistet greke pikat me nevralgjike te ekonomise tone. Duke analizuar gjendjen e mjerueshme ne te cilen eshte katandisur vendi yne nuk ka rruge tjeter veçse bashkimi i te gjitha forcave reale kombetare te udhehequra nen moton e thenies se Mbretit Ahmet Zog ... "Atdheu mbi te gjitha" dhe parullen e gjetur te trashegimtarit te tij, Mbretit Leka i Pare: "Paqe, Vllaznim, Bashkim" per ta shpetuar kombin shqiptar nga ky ngerç komunisto-mafjoz qe e ka mberthyer keqazi Nenen tone Shqiperi. Si perfundimm do te thoja se eshte domosdoshmeri emergjente shporrja e kesaje fare sllavo komuniste mafioze, krijimi i nji qeverie te perkohshme teknike, caktimi i dites se zgjedhjeve te parakohshme njekohsishte mbajtjen e referendumit per caktimin e formes se regjimit.

Fjalim i mbajtur ne tubimin para Misionit Diplomatik Shqiptar ne SHBA me date 4 shkurt 2004

Kush i rrëmbeu pronat e Seminajve në Fier

Nga Besnik Shaqiri

Të habit sjellja indiferente dhe mospërfillëse e gjykatave, institucioneve përkatëse etj., si dhe qëndrimet e tyre neglizhuese ndaj pretendimeve të qytetarëve, sa herë që ata parashtrojnë ankesat e tyre me fakte e argumente lidhur me shkeljet ligjore dhe cënimin e dukshëm të së Drejtës së Shenjtë mbi Pronën

Gjykatës së Lartë nuk i mungojnë aftësitë profesionale, shkalla e njohjes, disponibiliteti, etj., veçanërisht kur dokumentohen faktet dhe kur argumentet janë të pakundërshtueshëm. Por fatkeqësisht, shpesh herë kjo gjykatë po toleron vendime formaliste, konformiste apo stereotipe, siç janë "kthim çështjeje për rigjykim", duke mos i ndihur kësisoj, si instanca më e lartë gjyqësore, dhënies fund të konflikteve pronësore, shpesh banale, midis qytetarëve

Në filozofi dallojmë postulatin "Vërtetimi i hollësive vërteton tërësinë e përgjithshme". Vështruar kësisoj, është e natyrshme që të parashtrojmë dhe të vërtetojmë fakte e argumente të hollësishme, për të konkretizuar qëndrimet e padrejta e spekulative, dhe pse jo edhe mashtruese e korruptive - të gjykatave dhe disa institucioneve shtetërore për rastet e çështjeve që kanë të bëjnë me pronat dhe pasurinë e qytetarëve.

Disponohen shumë fakte, dokumente dhe argumente që vërtetojnë shpesh herë qëndrime antiligjore, dhe të tëra këto në kurriz të pronarëve legjitimë, që kanë çuar në vendime të padrejta, përvetësime dhe rrëmbime të pronave të tjetërkujt, dhe ku për realizimin e tyre shpesh herë është përdorur ortakëria me gjykatat apo komisionet e ndarjes së pronave.

Për të vërtetuar këtë do të mjaftonte thjesht shqyrtimi i konfliktit gjyqësor 6-vjeçar, ende i pazgjidhur, midis familjes Semini në Fier (që disponon gjithë dokumentacionin përkatës zyrtar si pronare legjitime) dhe qytetarit Igli Sinani, i cili nëpërmjet një "Akt Dhurimi" të vitit 1993, të zhvlefësuar me vendim gjykate, pretendon të drejtën e pronësisë për tokën me sipërfaqe 3.7 ha të një sere dhe të tre objekteve të ndërtuara nga ish - NB "Çlirimi" në Sheqin e Vogël të Fierit.

Kalvari i gjyqeve të pafundme të familjes Semini, përqas si tipike "gjykime" ku gjenden me hollësi të gjithë elementët që vërtetojnë padrejtësitë e qëndrimeve dhe gjykimeve ndaj këtyre pronarëve të ligjshëm.

Pikërisht tek "Akt Dhurimi" qëndron edhe absurdi i pretendimeve të z.Igli Sinani. Prej këtu marrin udhë edhe të gjitha dritë-hijet e gjykimit apo të proces-verbaleve të Zyrës së Përmbarimit të Prefekturës Fier.

Pas "Akt Dhurimit" janë përhapur thashethemnajat që vënë në dyshim drejtësinë e gjykatave apo proces-verbalet e përmbaruesve të rrethit të Fierit. (Madje thuhet edhe "se janë shpërndarë zarfe të majme"). Pikërisht këtu shpaloset grotesku që, me një "Akt Dhurimi" kërkohet të rrëmbehet prona legjitime e familjes Semini në Fier.

Të habit qëndrimi indiferent dhe mospërfillës i organeve shtetërore dhe pushtetarëve, kudo ku familja Semini ka paraqitur kërkesat e saj. Absurditeti i qëndrimeve indiferente e mospërfillëse qëndron në faktin që këto organe e pushtetarë asnjëherë nuk e shqyrtuan dokumentacionin e paraqitur nga familja Semini, i cili shpalos jo vetëm të Drejtën e Shenjtë të Pronësisë por edhe shkeljet ligjore dhe cënimin e dukshëm të Ligjshmërisë.

Prejardhja e "Akt Dhurimit" të z.Igli Sinani

Më 1 shkurt 1994, Agjensia e Ristrukturimit dhe Privatizimit të NB-ve Fier, i shet ish-specialistit të NB "Çlirimi", z.Arben Malaj (jo ministrit) Serën nr. 5 në Sheqin e Vogël. Kontrata e shitjes më vonë shpallet fiktive. Përse?

Z.Arben Malaj, pasi ka derdhur 15 % të detyrimit, mëson në Ministrinë e Bujqësisë se Sera që ai pretendon të blejë është pronë legjitime e familjes Semini, kësisoj z.Malaj tërhiqet nga blerja e saj.

Çuditërisht, 10 ditë pasi ka nënshkruar kontratën me ARP - Fier, dhe pikërisht më 11 shkurt 1994, nëpërmjet një "Akt Dhurimi" z.Malaj i dhuron (?!) z.Igli Sinani pronën e "blerë".

Kësisoj, z.Igli Sinani shpallet Person Juridik në objektin e "dhuruar" dhe si i tillë bëhet përdorues (pronar) i fermës, duke lënë me gisht në gojë pronarët legjitimë.

Mirëpo Gjykata e Shkallës Parë - Fier, me vendim gjyqësor i ka shpallur "të pavlefshëm" si "Akt Shitje"-n ashtu edhe "Akt Dhurimi"-n.

Absurdi i gjykimeve të pafundme qëndron në faktin se z.Igli Sinani, duke tundur një "Akt Dhurimi" fiktiv e të zhvleftësuar ligjërisht nga Gjykata - kërkon habitshëm:

1.Anullimin e Vendimit të Komisionit të Kthimit dhe Kompensimit të Pronave të Prefekturës Fier, sipas të cilit janë shpallur pronarë 12 pjestarët e familjes Semini.

2.Igli Sinani kërkon shpalljen e tij nga gjykata si "pronar i ligjshëm dhe posedues i pronës" që ligjërisht i takon familjes Semini.

Pretendime të tilla absurde, madje groteske, ndeshim në plot raste, por të habit fakti sesi gjykatat tona pranojnë të hyjnë në "lodërza" të këtilla, madje që prej 6-vjetësh, duke mbështetur hapur dhe fshehur pretendimet e z.Sinani.

Ministria e Drejtësisë dhe Këshilli Lartë i Drejtësisë, gjer më tani kanë treguar se i zgjidhin bukur këto raste dhe, natyrshëm, shpresa për një zgjidhje ligjore të rastit në fjalë, akoma nuk është shuar.

Dokumentacioni zyrtar i 12 trashëgimtarëve të të ndjerit Petro Semini

1. Vërtetim pronësie, lëshuar nga Zyra e Hipotekave - Fier, ku në bazë të notës së transkriptimit të datës 27 gusht 1934 vërtetohet pronësia e të ndjerit Petro Spiro Semini, i cili ka në posedim tokë arë me një sipërfaqe prej 3.7 ha, në Sheqin e Vogël të Fierit.

2. Vendimi nr. 2 datë 7 shtator 2001, i Komisionit të Kthimit e Kompensimit të Pronave të Prefekturës - Fier, njeh si pronar të ndjerin Petro Semini dhe rrjedhimisht edhe 12 trashëgimtarët e tij - mbi sipërfaqen bujqësore prej 3.7 hektarë në Sheqin e Vogël dhe, sipas ligjeve e VKM-ve, ia kthen këtë sipërfaqe familjes Semini dhe 12 trashëgimtarëve legjitimë.

3. Proces-verbalin e Entit të Urbanistikës - Fier, ku sipas verifikimit të bërë në vend nga specialistët dhe inspektorët e këtij enti, legalizohen kufijtë e pronës së familjes Semini, që kufizojnë sipërfaqen prej 3.7 hektarë në Sheqin e Vogël, brenda së cilës aktualisht ndodhen tre objekte ndërtimore dhe Serat me xham.

4. Kontratë-shitjeje sëbashku me akt-dorëzimet, të mbajtura nga përfaqësuesit e DARP Fier dhe blerësit, z.Harilla Semini (përfaqësues i familjes Semini), për blerjen e Serës nr. 5; të dhomave të punëtorëve, të menxës së sektorit dhe të depove e hangarëve - të gjitha këto të ndërtuara para vitit 1990 në tokën-truall, pronë e familjes Semini në Sheqin e Vogël.

5. Dokument hipotekor i lëshuar nga Zyra e Regjistrimit të Pasurive të Paluajtshme - Fier, ku familja Semini figuron pronare e pasurisë së patundshme të sipërthënë.

6. Vendimi nr. 149 i Gjykatës së Shkallës Parë - Fier dhe Vendimi nr. 342 i Gjykatës së Apelit - Vlorë, që deklarojnë "të pavlefshme" kontratën e shitjes midis ARP të NB-ve Fier dhe shtetasit Arben Malaj, sëbashku me Urdhër-ekzekutimin nr. 11 të vendimit civil.

Këto janë dokumentat që familja Semini ka paraqitur në të gjitha shkallët e Gjykimit të çështjes dhe në organet shtetërore e pushtetarët tek të cilët është ankuar - në mbrojtje të pronës së ligjshme, dhunuar e tjetërsuar padrejtësisht.

Po z.Igli Sinani, çfarë dokumentash paraqet?

Dokumentacioni i z.Igli Sinani

1. Akt-Dhurimi i datës 11 shkurt 1994, sipas të cilit "... z.Arben Malaj i dhuron z.Igli Sinani objektet e blera nga ARP e NB-ve Fier, që ndodhen në Sheqin e Vogël", në sipërfaqen e tokës-pronë të familjes Semini. (Sikundër theksuam më lart, Akt-blerja dhe Akt-Dhurimi janë zhvleftësuar me vendim të Gjykatës së Shkallës Parë - Fier).

***

Të habit fakti i vendimeve të kundërta të të njejtave gjykata për të njejtat çështje, për të njejtat fakte dhe dokumenta të paraqitura nga palët.

Metamorfoza e përmbajtjes së vendimeve nga të njejtat gjykata

1. Gjykata e Shkallës Parë e rrethit Fier, me Vendim nr. 611 të datës 27 shkurt 1999, deklaron "të pavlefshme" kontratën e shitjes së pronës së familjes Semini në favor të blerësit Arben Malaj, dhe njëhësisht edhe pavlefshmërinë e Akt-Dhurimit të kësaj prone në favor të përfituesit Igli Sinani. Kjo gjykatë në arsyetimin e Vendimit konkludon se "Sera nr. 5 dhe objektet e tjera të ndërtuara e tashmë ekzistuese në truallin e familjes Semini, i takojnë kësaj familjeje dhe trashëgimtarëve të ligjshëm të saj".

2. Çeshtja kalon për rigjykim në Gjykatën Apelit - Vlorë, e cila me Vendimin nr. 342 të saj lë në fuqi Vendimin nr. 611 të Gjykatës së Shkallës Parë - Fier.

3. Qytetari Igli Sinani, i pakënaqur nga vendimet e dy gjykatave të sipërthëna, e apelon çështjen në Gjykatën e Lartë.

Ndonëse kësaj gjykate nuk i mungojnë aftësitë profesionale, shkalla e njohjes së ligjshmërisë dhe precedentëve të këtij lloji - megjithë faktet, argumentet dhe dokumentet e paraqitura nga palët, përsëri Ajo nuk i jep zgjidhje konfliktit gjyqësor Semini-Sinani, por me Vendimin nr. 1227 datë 23.12.1999 e dërgon çështjen në fjalë për "rishqyrtim" në Gjykatën e Apelit - Vlorë, duke kërkuar "... një tjetër trup gjykues!!?".

4. Gjykata e Apelit - Vlorë, pas "rigjykimit" të çështjes, me Vendim nr. 250 datë 12 maj 2000, lë në fuqi Vendimin nr. 611 të Gjykatës së Shkallës Parë - Fier, që zhvleftëson Akt-shitjen dhe Akt-Dhurimin midis zotërinjve Malaj e Sinani - me shtesën e shkruar në arsyetimin e Vendimit "Kthimin e palëve në gjendjen e mëparshme?!".

Finalizimi i sorollatjeve gjyqësore për një çështje tejet të qartë e të lexueshme - sikundër është e Drejta e ligjshme e Pronësisë së familjes Semini - nëse përfundimi do të trajtohej me humor, të kujton thënien e njohur "Më rruajtje, të rruajta - brisku i berberit".

***

Me dokumentacionin disponibël, me verifikimet në vend të çështjes, pas këtyre marrëzive në vendimet e enteve shtetërore dhe gjykatave, evidentohet qartë zvarritja, hatëret dhe korrupsioni - nëpëmjet mohimit të së Drejtës së Shenjtë të Pronësisë së Ligjshme.

Papërgjegjshmëritë në interpretimin e së Drejtës ligjore, habitshëm të çojnë deri në shtrembërimin banal të vendimeve gjyqësore.

Kështu p.sh. për çështjen në fjalë, z.Faik Memushi, drejtor i DPU - Fier, u drejtohet palëve në konflikt; z.I. Sinani dhe z,H. Semini, më datë 31 maj 2000, me shkresën nr. 135, ku ndër të tjera shprehet: "... zoti Igli Sinani, jeni bërë pronar me anë të blerjes së objektit Sera nr. 5 dhe objekteve brenda saj..."!!!

Qëndrime të tilla nuk kanë nevojë për koment!

Zgjidhje origjinale të Përmbarimit të Prefekturës Fier

Më datë 26 shtator 2003, me urdhër të drejtorit të Policisë së Qarkut Fier, z.Hasan Rama, forca të Grupit të Gatshëm të Komisariatatit të Fierit, në shoqërim të dy përmbaruesve, z.Ylli Sula dhe z.Bardhyl Lila, shkojnë në pronat e ligjshme të familjes Semini në Sheqin e Vogël - për të nxjerrë forcërisht prej saj pronarët legjitimë.

Pas këtij veprimi bëhet mjaft kuptimplotë qëndrimi indiferent i përfaqësuesve të Rendit dhe atyre të Ligjit në çastin kur z.Perlat Sinani (vëllai i z.Igli Sinani), godet zonjën Dhoksi Semini (njëra nga pronaret), goditje që solli si pasojë shtrimin e saj për disa ditë në repartin e Reanimacionit të spitalit të Fierit.

Përfundimisht, z.Nasip Naço - Drejtor i Përgjithshëm i Përmbarimit, në shkresën e tij me nr. prot. 1050/1 datë 26.06.2003, drejtuar Zyrës së Përmbarimit - Fier, lëshon udhëzimin: "... Duke iu referuar vendimeve të mësipërme, për ekzekutimin e vendimeve gjyqësore... për kthimin e palëve në gjendjen e mëparshme, nga ana jonë udhëzojmë Zyrën e Përmbarimit - Fier: Çdo kundërvlerë e inkasuar nga palët në Drejtorinë e Bujqësisë - Fier, t'ju kthehet palëve nga kjo drejtori, në të njejtën kohë duke marrë në dorëzim pasuritë objekt gjykimi"?!

Sado i sofistikuar të jetë udhëzimi i z.Nasip Naço (dhe nuk kuptohet përse?), të habit zgjidhja origjinale e dy përmbaruesve të Fierit, zotërinjve Ylli Sula dhe Bardhyl Lila, në proces-verbalin e datës 19 shtator 2003 të të cilëve lexojmë shënimin: "Ju dorëzuan z.Igli Sinani sobjektet e mësipërme

1. Menxë e punëtorëve

2. Depo hangar

3. Dhoma e punëtorëve

Më tej z.Uan Hila, përfaqësues i Drejtorisë së Përgjithshme të Ushqimit - Fier, i dorëzohen 3 hektarë Sera"?!!

Natyrshëm lind pyetja: Po pronarët legjitimë çfarë muarën?

Aktualisht, z.Igli Sinani, posedues i një "Akt Dhurimi" të zhvleftësuar me vendim gjykate, vazhdon të shfrytëzojë pronën e familjes Semini, ndërsa trashëgimtarët e ligjshëm vazhdojnë të shtërngojnë në gji dokumentacionin që i përcakton si Pronarë të Ligjshëm.

Kjo i ngjan fabulës së njohur ku "Macja hëngri peshqit", ndërkohë që poseduesi i "peshqve" mban në xhep "recetën e gatimit".

Republika e kriminelëve në përvjetorët e vdekjes së shqiptarëve

Nga Astrit Kola

Sot mbushen plot 58-vjet nga 11 Janari i vitit të mallkuar 1946, kohë kur, bandat e kriminelëve të zbritur nga mali, pasi vranë me mijëra nacionalistë në luftën e përgjakshme civile dhe pasi vodhën votat e shqiptarëve në votimet farsë të 2 Dhjetorit të vitit 1945, u mblodhën për të shpallur "Republikën Popullore të Shqipërisë", alias Republikën e Shtatë të Jugosllavisë së Titos.

Republikanët komunistë, pasi fituan kundër nacionalistëve në zgjedhjet të cilat vëzhguesit anglo-aemerikanë dhe të tjerë i konsideruan të manipuluara, për të kremtuar si gjithmonë me gjak fitoren, filluan të bëjnë kurban afro 300 nacionalistë matjanë e himarjotë, të cilët i mposhtën sllavokomunistët në komunat e Himarës dhe Dërjanit të Matit.

Pas një viti republikanizëm të shuguruar nga Tito dhe Stalini, komunistët morën zemër dhe masakruan edhe deputetët "armiq" përfaqësues të popullit, të inkuadruar në "Grupin e deputetëve të Opozitës Demokratike", me në krye nacionalistët Shefqet Beja, Riza Dani, Gjergj Kokoshi, Sami Qeribashi etj, gjithsej 17 syresh. Dhe këta kurbanë u flijuan në Altarin e Lirisë, për të gjakosur Panteonin e Republikanizmit Komunist, i cili u servir si shpikje e djallit për të zëvendësuar me gjak Monarkinë që kish sjellë veçse prosperitet, dhe që kish evituar gjakderdhjen pavarësisht rebelimeve të republikanëve gjatë gjithë periudhës 15-vjeçare të qeverimit të legalistëve dhe mbretërorëve shqiptarë.

Ndryshe nga Mbreti Zog - që kundërshtarët i bënte ministra; atentatorët i dërgonte nëpër shkolla perëndimore për t'u arsimuar e hequr dorë nga terrorizimi individual; pas amnistive të panumërta e nga të cilat përfituan faljen e jetës dhe lirisë mijëra vetë - Enver Hoxha shkoi thikë gjithë kundërshtarët, të cilët i faleshin Atdheut dhe jo Titos e Stalinit.

Më pas, bilanci tragjik i republikanëve në pushtet, komunistë e demokratë, liston afro 50 mijë shqiptarë të vdekur në biruca burgjesh, kampe përqëndrimi, klone kufiri, sheshe qytetesh pas '90-ës, mbytur në det e vrarë gjatë dekadës së fundit, për të kulmuar me kasaphanën e '97-ës e për të vazhduar me mijëra të tjerë deri në katastrofën e djeshme.

Kur mëson se trafikun vdekjeprurës të radhës janë janë implikuar fëmijët e funksionarëve të lartë të Policisë së Shtetit, e kupton fare qartë arsyen dhe qëllimin e dizinformimit të gazetës së pushtetit "Zëri i Popullit" që në numrin e djeshëm shkruante se "... në dy gomonet nuk ka patur klandestinë por vetëm drogë" dhe "... nuk ka familjarë që kërkojnë të afërmit".

Por mjaftonte alarmi i qeveritarëve dhe shtabet paralele ngritur në Ministrinë e Mbrojtjes dhe Ministrinë e Rendit, për të kuptuar se ata, si organizatorë të trafikut që shkaktoi tragjedinë, i kish zënë paniku dhe kërkonin të minimizonin numrin e viktimave e bashkë me të edhe përgjegjësinë, duke larë duart me "angazhimin e gjithë shtetit për të shpëtuar...".

Të gjithë e dinë se emrat e shefave të vërtetë nuk do të zbulohen kurrë dhe se kjo nuk është punë e bijve të oficerëve të Policisë, pavarësisht nga gradat e postet, por është punë qeveritarësh të lartë, që për të hedhur lumin do të gjejnë disa "koka turku".

Por trafiqet nuk do të ndalen sepse, ndryshe, si do të gjenden paratë për të paguar zijafetet përrallore të kryeministrit, që është kthyer në guvernator me korrespondencë të këtij vendi që dergjet në mjerim e uri!!!

Ky është bilanci i Republikanizmit të papërgjegjshëm, që armiqtë e këtij Kombi na e blatuan si formë regjimi e mënyrë qeverimi për ta varrosur këtë vend dhe popullin e tij.

Vetëm Monarkia mund ta shtypë krimin dhe rikthejë normalitetin e prosperitetin. Dhe këtë e dinë mirë politikanët republikanë, por kjo nuk u intereson, sepse ndryshe si do të pasurohen ato dhe si do t'i realizojnë skemat e shkatërrimit në favor të padronëve-armiq historikë të shqiptarëve!?

Tragjeditë inagurojnë përvjetorët e republikanizmit të përgjakur shqiptar, si shenjë e Apokalipsit që duhet ta evitojmë për të shpëtuar nga mallkimi i braktisjes së rrugës së Zotit, që përzgjodhi e shenjoi mbretërit për udhëhequr popujt që në agun e njerëzimit.

Autoritetet shqiptare konfirmojnë vdekjen e 21 emigrantëve në gomone

Kronika e vdekjes - hap pas hapi

Autoritetet shqiptare konfirmojnë vdekjen e 21 personave në ngjarjen e djeshme, ku emigrantë të hipur në gomone u bllokuan në det të hapur, në përpjekje për të shkuar ilegalisht në Itali.

Në orën 14.15, në Sazan kanë mbërritur trupat e pajetë të 21 vetëve, mes tyre ishin edhe tre femra, të gjithë me moshë nga rreth 25 deri në 40 vjeç.

Konfirmohet se numri i përgjithshëm i të mbijetuarve është 11, mes tyre dy skafistë të dyshuar, Artur Rrokaj, djali e nipi i dy drejtuesve të policisë në Shkodër e Vlorë, përkatësisht, Bardhul Rrokaj, babai i tij, shef antiterrori në këtë rreth si dhe xhaxhai i tij, Ilir Rrokaj, inspektor qarkullimi në Vlorë. Gjithashtu është ndaluar i dyshuari tjetër si skafist, Albert Alliaj.

Personat e tjerë të mbijetuar, janë Miri Guri, Paulin Pjetri, Lulëzim Rexha, Edmir Sykaj (24 vjeç nga fshati Grizhë i Malësisë së Madhe), Fatbardh Pepnikaj, Gentian Kurtmetaj dhe Aleks Guraziu.

Ndërkohë, nuk bëhet i ditur identiteti i dy të mbijetuarve të tjerë. Të gjithë te mbijetuarit janë kryesisht nga Laçi i Vaut të Dejës dhe Malësia e Madhe. Të 11 të mbijetuarit e tragjedisë, ndërmjet të cilëve edhe dy drejtuesit e gomones, ndodhen nën kujdesin e mjekëve në spitalet e Vlorës dhe Tiranës dhe gjendja e tyre është jashtë rrezikut për jetën. Të mbijetuarit e tragjedisë fillimisht kanë mbërritur në spitalin e qytetit të Vlorës për të marrë ndihmën e nevojshme mjekësore. Gjendja e tyre shëndetësore është e ndryshme. Disa prej tyre janë transportuar me barrelë në spital, për shkak të dëmtime të lëkurës, gjendjes së shokut dhe disa kanë paralizim të pjesshëm të trupit

Ja si u zbuluan gomonet

Forcat ushtarake shqiptare në bashkëpunim me ato të NATO-s dhe të vendeve fqinjë arritën në orët e para të mëngjesit të së Shtunës identifikimin e një gomoneje dhe deklaruan se kanë gjetur edhe një të dytë, secila me nga rreth 15 vetë në bord.

Identifikimi i gomones së parë është bërë në një largësi prej 7.5 milje larg Gjirit të Ariut, në jug të Karaburunit, nga helikopteri i NATOs-, pasi mjeti lundrues që nga pasditja e djeshme ndodhej në rrezik mbytjeje afër brigjeve, mes Dhërmiut dhe Karaburunit.

Komandanti i Grupit të 28-të Detar, i Marinës ushtarake italiane të dislokuar në Portin e Durrësit, Ivano Baschieri, tha se janë gjetur fillimisht tetë persona të gjallë, ndërsa kanë vazhduar kërkimet.

Ndërkohë, rreth orës 09.30, helikopteri i NATO-s sapo ka zbuluar në det një gomone të dytë me 15 persona në bord.

Sipas të dhënave, ende nuk mund të flitet për një numër më të saktë të njerëzve. Bëhet e ditur se, deri tani, nga personat e nxjerrë, vetëm dy prej tyre janë në gjendje disi më të rëndë, ndërsa të tjerët janë mirë.

Sakaq janë pyetur edhe të mbijetuarit që po mbërrijnë drejt spitalit rajonal të Vlorës me motovedetën CP-407. Sipas dëshmive të tyre, kanë qenë dy gomone me nga 15 vetë në bord, dhe ata janë nisur të Premten nga brigjet e Vlorës.

Reagimet e politikës

PD akuzoi dje policinë dhe shtetin shqiptar për "mosveprim në kohën e duhur për shmangien e tragjedisë së Karaburunit". Zëdhënësi i PD-së, Edi Paloka deklaroi se "po ushtrohet dhunë ndaj mediave, që të mos marrin në kohë informacionin lidhur me këtë ngjarje, duke i dërguar trupat e viktimave në ishullin e Sazanit dhe duke i lënë familjarët e tyre në ankth". Sipas Palokës, "policia shqiptare nisi të reagojë vetëm pasi lajmi u bë i ditur në një nga televizionet, përmes telefonatës së një klandestini". "Minisitri i Rendit, Igli Toska, u tha gazetarëve se po përhapnin lajm të rremë. Qeveritarët më pas përhapën lajmin se në gomone ndodheshin vetëm dy skafistë, me një sasi hashashi, e më pas nuk bënë publikë as emrat e të ndaluarve", - tha Paloka.

Shkaqet e vdekjes së viktimave

Sipas kapitenit të Guardia di Financës, Santareli, "shkaku i vdekjes së 21 personave ka qenë rënia në ujë". Nga të dhënat mësohet se viktimat janë 18 meshkuj e 3 femra. Kontakti me ujin tepër të ftohtë ka shkaktuar vdekjen e menjëhershme të tyre. Kapiteni tha se "gomonia ishte 12 metra e gjatë dhe me 2 motorë të fuqishëm". Sipas tij, "shkaku i tragjedisë mund të ketë qenë një avari në motor, ndoshta nga kushtet tepër të vështira të motit. Në gomone u gjetën edhe valixhet që klandestinët kishin marrë me vete. Trupat e viktimave tani do t'u kalojnë autoriteteve shqiptare të policisë, për të vazhduar me procedurat. Ndërkaq, vazhdojnë kërkimet për gomonet e dytë, të zhdukur në det. Ndërkaq, burimet italiane të marinës njoftojnë se gomonia ku ndodhen viktimat e tragjedisë po mbushet me ujë dhe rrezikohet të humbin trupat e gjetur.

10 të mbijetuar jashtë rrezikut, një në gjendje të rëndë

Ministri i Shëndetësisë Leonard Solis, deklaroi se "10 nga të mbijetuarit e tragjedisë ndodhen jashtë rrezikut për jetën" dhe se "... vetëm gjendja shëndetësore e njerit prej tyre është e vështirë. "Ai është transportuar me helikopter në Qendrën Spitalore Universitare të Tiranës, për shkak të djegieve të mëdha nga karburanti qe ndodhej në gomone. Ministria e Shëndetësisë ka marrë të gjitha masat për përmirësimin e gjendjes së të mbijetuarve, dhe në spitalin e Vlorës është dërguar edhe një grup specialistësh nga Tirana. Klandestinët kanë qenë nga Shkodra, Lezha, Laçi, etj.. Familjarët e personave që ndodheshin në gomone janë grumbulluar në spitalin e Vlorës dhe kërkojnë më shumë informacion për ta. Ata bllokuan për disa minuta makinën e Drejtorit të Përgjithshëm të Policisë, Bajram Ibraj.

Ndalohen dy funksionarë të policisë për bashkëpunim me skafistët

Po përforcohet gjithnjë e më shumë ideja e bashkëpunimit të trafikantëve të gomones me funksionarë të lartë të policisë. Mes të arrestuarve janë edhe dy skafistë, që po marrin mjekim në spitalin e Vlorës. Artur Rrokaj dhe Albert Aliaj. Policia ka arrestuar shefin e antiterrorit të Shkodrës, Bardhyl Rrokaj (i ati i Arturit) dhe inspektorin e qarkullimit të Vlorës, Ilir Rrokaj (xhaxhai i Arturit). Ndërkaq, zëdhënësi i ministrisë së Rendit, Florian Serjani, gjatë një konference për shtyp deklaroi se "trafikantët dhe bashkëpunëtorët e tyre të implikuar në tragjedinë e sotme do të akuzohen dhe gjykohen për vrasje". Sipas tij "Policia e vlerëson ngjarjen si përpjekje të elementëve kriminalë për të kthyer trafiqet e vjetra".

Ndërkohë mësohet se kryetari i PDK Nikollë Lesi, ka kërkuar që në nderim të viktimave të shpallet ditë zie.

Ja çfarë shkruante "Z.P" të shtunën për tragjedinë

"Zëri i popullit": Gomone me drogë, jo me njerëz

"Asnjë gjurmë e gomoneve në det. Edhe pse kërkimi i katër anijeve dhe dy helikopterëve është shtrirë rreth vendngjarjes - asnjë gjurmë e gomoneve nuk është kapur.

Këtë situatë të paqartë duket se e zbardh pak fakti që, pavarësisht se ngjarja është ndjekur përreth 5 orë rresht nga e gjithë media publike dhe private me një alarm të jashtëzakonshëm, asnjë familjar nuk është drejtuar qoftë në media, por qoftë edhe në stacionet e policisë për të shprehur shqetësimin e tij për ndonjë prej familjarëve që e kish nisur drejt Vlorës për në Itali. Burime të policisë thanë se 'e gjithë policia e shtetit ka kërkuar informacion në çdo rreth të vendit dhe ka mbajtur sportelet hapur për orë të tëra në pritje të shqetësimeve, por askush nuk është paraqitur për të kërkuar të afërmit e tij'.

Ndërkohë, ministri i Rendit Publik e ka kaluar policinë në gadishmëri të lartë, për të përballuar çdo ngjarje tjetër që mund të fshihej pas incidentit të Vlorës. Gjithnjë nën dyshimin se ajo mund të mbulonte një tjetër veprim, veçanërisht në kryeqytetin Tiranë.

Kanë vijuar ethshëm hetimet në Vlorë, për të zbardhur gjithë ngjarjen. Policia deklaron se ka identifikuar tashmë pronarët e skafeve, skafistët, shoqëruesit si dhe lidhjet e tyre. Policia deklaron se ka identifikuar dhe nën kërkim edhe personin që komunikonte në celularin 0692070266, dhe është hedhur e gjitha në veprim.

Ndërkohë, ky hetim ka përfshirë edhe të gjitha veprimet e policisë, që nga momenti i parë i shfaqjes së gomoneve. Pikërisht nga ky hetim rezulton se radari i policisë në Dhërmi ka identifikuar gomonen diku rreth orës 18.00, por vetëm me ngarkesë hashashi dhe jo me njerëz. Megjithatë, gjithçka mbetet për t'u verifikuar gjatë ditës në vazhdim.

Telefonuesi në TV, pronari që fliste nga toka - jo nga gomonia

Duket se çmenduria e trafikantëve nuk njeh kufi, kur mbrëmjen e djeshme dhe pikërisht rreth orës 18.30 të mbrëmjes, një gomone me rreth 30 klandestinë në bord, numër ky i konfirmuar, është nisur nga brigjet shkëmbore e të shkreta prapa Karaburunit, pranë plazhit të Qezarit, që ndodhet në Palasë. Në momentin e nisjes drejt aventurës italiane, moti ka qenë krejt i papërshtatshëm, ku deti ngrinte dallgët 5-7 ballë, situatë kjo e papërballueshme për anijet e rënda e jo më për gomone. Kjo situatë ka bërë që gomonja ta kishte të vështirë që të çante dallgët, dhe kjo ka bërë që ajo të pësonte difekt në motora e të stopohej në mes të detit të errët, mes mëshirës së dallgëve dhe të ftohtit të acartë. Në këto kushte, njëri nga shoqëruesit e klandestinëve në njërën prej gomoneve, ka njoftuar përmes telefonit celular policinë e Vlorës e më pas kapitenerinë e portit të Vlorës për rrezikun që u kanosej. Menjëherë policia e Vlorës dhe forcat e ushtrisë së bazës së Vlorës, u angazhuan totalisht për t'u ardhur në ndihmë klandestinëve që ndodheshin në dy gomonet e mbetura në mëshirën e dallgëve. Forca të kufirit të ushtrisë dhe "Delta Forca", janë vënë menjëherë në lëvizje, por deti nuk e lejonte përparimin e tyre. Në këtë situatë i është kërkuar ndihmë Bazës Ushtarako-Detare të Pashalimanit, anijet e së cilës kanë kaluar ngushticën midis Sazanit dhe Karaburunit dhe janë drejtuar për tek vendi i identifikuar, gati 3-5 milje larg bregdetit të plazhit të Qezarit, poshtë pjesës jugore të Llogarasë. Po kështu, janë nisur drejt vendit të ngjarjes edhe anije të misionit të Guarda di Finanza, të dislokuara në ishullin e Sazanit. Ndërkohë një tjetër person, rreth orës 20.00, ka telefonuar në TOP ALBANIA RADIO duke kërkuar ndihmë. Më tej, edhe në TOP CHANNEL. Personi që nuk identifikohej, përdorte telefonin me kontratë e numër 0692070266 dhe dallohej qartë që nuk fliste nga vendngjarja e që nuk ishte në rrezik. Policia dyshonte se ai ishte në tokë dhe mund të qe pronari i mjetit-gomones.

Ndërkohë, gjithë ngjarja dhe reagimi ndaj saj është mbikqyrur dhe drejtuar nga Ministri i Rendit e Drejtori i Përgjithshëm i Policisë së Shtetit. Agravimi i situatës ka bërë që zv.Kryeministri Dokle të ngrinte e drejtonte një shtab emergjence me ministrat Toska, Majko, Xhafa, Solis e Angjeli. Shqetësimi ka bashkuar dhe të tjerë - për të ndjekur operacionin e shpëtimit.

Shtabi i Përgjithshëm i Ushtrisë dhe gjeneral Qazimi, i janë bashkuar drejtimit të operacionit në det e në ajër.

4 anije të mëdha, të afta për të përballuar 6 ballë det, dy helikopterë të bazës së NATO-s në Durrës, një tjetër anije e nisur nga Korfuzi dhe një tjetër helikopter shpëtimi i nisur nga Brindizi, i janë drejtuar vendit të supozuar të ngjarjes. I gjithë operacioni është kryer natën, nën një det 6-7 ballë dhe nën shi.

Rreth orës 23 e 45 minuta, të gjitha këto mjete të tre shteteve kanë mbërritur në vendin e identifikuar si vendngjarje dhe kanë nisur operacionin e kërkim-shpëtimit. Por lajmet që vinin prej tyre, 5 milje larg bregut të Palasës ishin negative. As gomone as njerëz nuk identifikoheshin në atë natë.

Në drejtim të vendit ku mendohet të jetë gomonia, ka shkuar edhe komandanti i PKK Dhërmi me një grup policesh, të cilët gjetën në Dhrale, në afërsi të bregut, një automjet tip "Pezho", me targa italiane, e braktisur, si dhe disa bidone karburanti bosh.

Legalistët i kërkojnë partive politike dhe institucioneve shqiptare që të bashkojnë zërin dhe qëndrimet në sintoni me lidershipin e Kosovës për Pavarësimin e saj, dhe njëkohësisht i kërkojnë Bashkësisë Ndërkombëtare që të vlerësojë përmbushjen e standarteve të kërkuara në Kosovë dhe paskëtaj rrjedhimisht të përcaktojë Statusin përfundimtar - Kosova Shtet i Pavarur

Ditën e enjte, më datë më 8 janar 2004, në sallën e konferencave të shtypit të Kuvendit të Shqipërisë, në cilësinë e anëtarit të Komisionit të Politikës së Jashtme të Parlamentit, Kryetari i PLL z. Ekrem Spahiu, dha një deklaratë për mediat në konferencën e parë të shtypit pas fillimit të Vitit të Ri 2004. Në këtë konferencë, z. Spahiu u prononcua lidhur me zhvillimet e fundit paszgjedhore në Serbi, zhvillime të cilat në optikën e forcës politike parlamentare që ai kryeson - janë tejet shqetësuese. Kryelegalisti Spahiu i konsideroi këto zhvillime si "të rrezikshme dhe me reperkusione të menjëhershme në të gjithë rajonin, çka sipas tij manifestohej edhe nga reagimet e menjëhershme dhe nervoze të përfaqësuesve kryesorë të institucioneve dhe Komunitetit Ndërkombëtar në përgjithësi. Në prononcimin tij të qartë dhe pa asnjë ekuivok, z. Spahiu, në cilësinë e anëtarit të Komisionit të Jashtëm të Parlamentit, qortoi politikat e nxituara të qeverisë shqiptare për hapje të pazakontë dhe të paargumentuar me Serbinë, pas gjoja "demokratizimit" të saj pas rrëzimit të regjimit të Millosheviçit dhe fitores së koalicionit opozitar dhe "epokës Xhinxhiç", që kulmoi me qeverinë e tij. Në vazhdim të idesë së tij, z. Spahiu i kërkoi qeverisë që "... tash e tutje duhet të ecim e veprojmë me kujdes e maturi, larg emocioneve e entusiazmit të pabazuar, larg protagonizmit, konformizmit e oportunizmit, politikave servile e dritëshkurtëra". Në këtë kontekst, z. Spahiu e zhvilloi idenë e tij duke theksuar se "PLL dhe grupi i saj parlamentar i kërkon maxhorancës dhe qeverisë që të rishikojnë e riformatojnë marrëdhëniet me Serbinë e të konsultohen për të gjitha hapat në këtë drejtim me Parlamentin, e sidomos me Komisionin e Jashtëm të tij, sepse, sipas z. Spahiu - Parlamenti është institucioni bartës i sovranitetit, që ka detyrimin dhe atributet për hartimin dhe ndjekjen e zbatimit të politikës së Jashtme të shtetit shqiptar".

Kreshendoja e artikulimit politik të z. Spahiu në këtë konferencë ishte kërkesa e prerë e PLL ndaj faktorëve politikë shqiptarë dhe Bashkësisë Ndërkombëtare për njohjen e Pavarësisë së Kosovës dhe konstituimin e Shtetit të Kosovës si shtet i Pavaruar, veprim ky që në këndvështrimin politik dhe disponimin nacionalist të PLL është hapi i parë dhe më i fuqishëm i zgjidhjes së Çeshtjes sonë Kombëtare. Kjo deklaratë e z. Spahiu është kërkesa e parë e publike e një partie parlamentare për Pavarësimin e Kosovës pas vlerësimit të përmbushjes së standarteve të vendosura nga Komuniteti Ndërkombëtar. Konferenca e shtypit u ndoq nga një numër i madh gazetarësh, tejet të interesuar për prononcimin intrigues të z. Spahiu, qoftë për tematikën e rrallë dhe artikulimin e guximshëm, qoftë edhe për skak të urisë për lajme të forta, për shkak të përgjumjes së politikës pas gjumit dimëror të filluar për shkak të festave e pushimeve të fundvitit të kaluar dhe Vitit të Ri 2004, të nxitur nga gadishmëria e z. Spahiu, ata bënë shumë pyetje rreth problemeve politike të ditës, të cilave kryelegalisti iu përgjigj me finesë, duke sjellë risi në prononcimet standarte të opozitës.

A.K.

Deklaratë për mediat

PLL shpreh shqetësimin e saj të thellë për zhvillimet e fundit paszgjedhore në Serbi, ku votimet rikonfirmuan mbështetjen për partitë ultranacionaliste të Sheshelit dhe Millosheviçit, dikur në pushtet dhe drejtpërsëdrejti përgjegjëse për zhvillimet e përgjakshme të dekadës së kaluar në ish-Jugosllavi dhe masakrat e genocidin mbi shqiptarët e Kosovës. Tashmë, Partia Radikale e Sheshelit dhe Partia Socialiste e Sllobos janë shndërruar minimalisht në pakicë bllokuese, e aftë për të sabotuar reformat dhe proceset e demokratizimit të Serbisë.

Qeveria "Xhinxhiç" dhe ajo që e pasoi, me artikulimet e qëndrimet refraktare, e shprehën hapur dhe qartë disponimin negativ ndaj Kosovës dhe shqiptarëve, por gjallërimi aktual dhe revanshi politik i segmenteve ekstremiste të ultranacionalizmit serbomadh, janë prova dhe argumenta të reja, tejet domethënëse.

Ndonëse skeptikë ndaj të gjithë faktorëve politikë në Serbi, ne vlerësojmë se zhvillimet e fundit minuan përpjekjet e Bashkësisë Ndërkombëtare për demokratizim të Serbisë, të raporteve ndëretnike e marrëdhënieve ndërshtetërore, me pasoja në të ardhmen e rajonit.

PLL bazuar në programin e saj si parti politike e nacionalizmit historik dhe bashkëkohor, vlerëson se ka të drejtën politike dhe morale për t'i kontribuar maksimalisht zgjidhjes së Çështjes Kombëtare me mjete politike dhe institucionale.

Në cilësinë edhe të anëtarit të Komisionit të Politikës së Jashtme të Kuvendit të Shqipërisë, i kërkojmë qeverisë shqiptare të evitojë politikat dhe praktikat e patronatit ndaj Kosovës dhe klasës së saj politike në raportet me ta dhe në tryezat e përfaqësimit me faktorët ndërkombëtarë. Klasa politike përfaqësuese e shqiptarëve të Kosovës gëzon pjekuri të plotë dhe të gjitha atributet për ta përfaqësuar edhe në të ardhmen popullin shqiptar të Kosovës në të gjitha tryezat ku ajo deri tani ka definuar qartë dhe prerë kërkesën për Pavarësinë e Kosovës dhe konstituimin e shtetit të Kosovës.

Politikës dhe institucioneve të Shqipërisë u duhet të ecin e veprojnë me kujdes e maturi, larg emocioneve, politikave servile e dritëshkurtëra, që sjellin veçse zhgënjime, të ngjashme me ato që sot përjetojnë të gjithë shqiptarët, e bashkë me ta edhe Bashkësia Ndërkombëtare.

Duke vlerësuar raportet e reja politike në Serbi, pavarësisht kompozimeve nga ku do të dalë qeveria e re serbe, PLL i kërkon Kuvendit, qeverisë dhe të gjitha partive politike që të bashkojmë zërin dhe qëndrimet për pavarësimin e Kosovës, në sintoni me lidershipin e Kosovës.

Së fundi, PLL kërkon nga Bashkësia Ndërkombëtare që të vlerësojë ecurinë e deritanishme të procesit të përmbushjes së standardeve dhe në bazë të tyre të përshpejtojë përcaktimin e Statusit përfundimtar të Kosovës si Shtet i Pavarur.

PLL: Qeveria po i shtyn shqiptarët e uritur drejt vdekjes

Ditën e shtunë, më datë 10 Janar 2004, në selinë e PLL, sekretari i Marrëdhënieve me Publikun dhe sekretari i Marrëdhënieve Ekonomike të kësaj partie, zotërinjtë Blerim Kamberi dhe Artan Tujani, dhanë një konferencë për shtyp lidhur me tragjedinë e fundit të mbytjes së klandestinëve pranë Gadishullit të Karaburunit. Në prononcimin e tyre drejtuesit legalistë shprehën dhimbjen e pamatë të PLL, njëkohësisht edhe të mbarë legalistëve e mbretërorëve shqiptarë për këtë tragjedi, për të cilën fajësuan qeverinë dhe segmentet kriminale në pushtet - të lidhura me mafien dhe trafikun e klandestinëve. Ata theksuan ndër të tjera se gazeta "Atdheu", organ i PLL, dy javë më parë kish lajmëruar në një shkrim special për mundësinë e përdorimit të Porto Palermos si pistë nisjeje të trafikut të klandestinëve drejt brigjeve italiane, e konfirmuar kjo edhe nga prononcimi i Shefit të Shtabit të Përgjithshëm të Ushtrisë, gjeneral Pëllumb Qazimi.

Kjo pistë e përdorur nga trafikantë kriminelë të klandestinëve dhe drogës, ka favorizuar trafikun për shkak të pamundësisë së kontrollit nga radarët të kësaj pike strategike. . . dhe pasojat dihen tashmë. Më tej, në prononcimin e tyre drejtuesit legalistë Kamberi e Tujani, akuzuan qeverinë si shkaktare të mjerimit dhe urisë së shqiptarëve, dhe njëkohësisht suportuese e trafikantëve-përzgjedhës të gjahut në radhët e mjeranëve që kërkojnë largimin nga Atdheu për të siguruar bukën e gojës. Ndryshe nuk ka si shpjegohet lehtësia dhe favorizimi i trafiqeve, ndërkohë që qeveria pretendon se i ka dhënë fund atyre dhe i ka bllokuar të gjitha skafet e gomonet, ndonëse skafistët dhe pronarët ndërtojnë parajsën me paratë përgjakura të krimit.

Ata akuzuan ashpër papërgjegjshmërinë e qeverisë dhe personalisht të kryeministrit Nano, për të cilin u shprehën se ". . . ndërkohë që shqiptarët mbyten në ujërat e ftohta të Adriatikut e Jonit, të shtyrë nga mjerimi dhe uria, kryeministri shqiptar Fatos Nano vazhdon uikendet në plazhet e ngrohta të planetit. "

Kjo konferencë u ndoq me vëmendje nga gazetarët e shumtë, që nëpërmjet pyetjeve ritheksuan shqetësimin e mbarë mediave për këtë tragjedi dhe që njëkohësisht e konsideruan prononcimin e drejtuesve legalistë si një apel drejtuar mbarë politikës dhe shoqërisë për ndëshkimin e kriminelëve dhe ndërprerjen përfundimtare të trafiqeve vdekjeprurëse.

A.K.

Deklaratë për mediat

Sipas burimeve të ndryshme informative, natën e mbrëmshme në brigjet e Karaburunit njoftohet se ndodhi tragjedia e tmerrshme e radhës. Ashtu sikundër gazeta jonë paralajmëroi dy javë më parë dhe sipas konfirmimeve indirekte të Shefit të Shtabit të Përgjithshëm, mendohet se pikënisja e gomoneve është zona e Porto Palermos.

PLL shpreh shqetësimin e saj të thellë për këtë ngjarje tragjike, që u shoqërua nga një numër shumë madh viktimash njerëzore, midis të cilëve edhe gra e fëmijë.

PLL akuzon qeverinë si fajtoren e vetme për tragjedinë e mbrëmshme, jo vetëm sepse ajo me politikat e saj të dështuara dhe pa shpresë po vazhdon ta bëjë këtë vend të pabanueshëm për shtetasit shqptarë, por edhe sepse po i detyron ata që të marrin në sy vdekjen, vetëm e vetëm të largohen nga Atdheu në kërkim të mbijetesës.

Kjo ngjarje e dhimbshme dëshmon se mburrjet për bllokimin e trafikut të gomoneve kanë qenë demagogji që, herët a vonë, do t'i dilte boja dhe se shefat e trafiqeve kriminale e vdekjeprurëse - janë pushtetarë të lartë, të aftë për të paralizuar edhe goditjet e Policisë së Shtetit.

PLL kërkon gjetjen e menjëhershme dhe ndëshkimin më të ashpër ndaj kriminelëve, pavarësisht nga rangu dhe pozita shtetërore. Legalistët vlerësojnë se kjo qeveri me në krye politikanin më të papërgjegjshëm, duhet të japë sa më parë dorëheqjen.

Ndërkohë që shqiptarët mbyten në ujërat e ftohta të Adriatikut e Jonit, të shtyrë nga mjerimi dhe uria, kryeministri shqiptar Fatos Nano vazhdon uikendet në plazhet e ngrohta të planetit.

PLL i kërkon partive politike të opozitës në Parlament, që ta ngrenë zërin e protestës e ta bashkojnë atë me zërin e të gjithë opozitës, duke u përgatitur për zgjedhjet e reja pas dorëheqjes së merituar të kësaj qeverie të korruptuar, gjeneruese e koperturë e krimit të organizuar.

Komenti

Magjari lavdëron magjarin

(Asinus asinum fricat) latine

Nga Neritan Kolgjini

Kur pashë zv.kryeministrin Dokle të puthej "rusçe" me ministrin e Rrugëve dhe Telekomunikacioneve Poçi, në momentin e dekorimit të këtij të fundit, për dreq m'u kujtua shprehja e vjetër latine "gomari fërkon gomarin". Duke parë absurdin e këtij dekorimi, unë mora zemër që këtë shprehje të lashtë ta stilizoj pak duke e dhënë në formën "magjari lavdëron magjarin" (e cila është kuptimisht më afër proverbës latine sesa shprehja e njohur që dhamë më sipër). Sepse nuk mund ta konsiderosh ndryshe atë dekorim përveçse si një shërbim që i bëjnë njëri-tjetrit dy qeveritarët e stanit "Nano".

Në fakt, shumëçka mund të guxonin qeveritarët tanë, porse të dekoroheshin për "merita në punë", si ministri Spartak Poçi, kjo është përtej fantazisë normale. Të dekorosh ministrin e rrugëve në Shqipëri "për merita në punë" është një tallje brutale me 95 për qind të njerëzve "madhorë dhe me aftësi për të gjykuar". Ministri Poçi mund të ishte dekoruar për shumë arsye të tjera, por vetëm për merita në punë, JO! Sepse ai është ministër i rrugëve, hekurudhave, transportit e postë-telekomunikacionit, të cilat dihet se janë ndër gangrenat më të rënda të jetës së shqiptarëve. Si mund të pretendohet që ministri, i cili ka në varësi postën dhe telefoninë, të marrë një dekoratë, kur dihet se këto dy shërbime të rëndësishme janë në standarte katastrofike?! Si merr guximin kreu i shtetit dhe firmos dekoratën për një ministër me të tillë tregues negativë në punën e tij?!

Gjithsesi ky dekorim ka një anë "pozitive". Ai tregon se këta sundimtarë nuk i druhen më asgjëje që mund të sjellë reagimin e nënshtetasve të tyre. Eksperienca na tregon se këto fenomene ndodhin vetëm kur qeveritarët kapërcejnë çdo lidhje me realitetin dhe jetojnë në një hapësirë virtuale. Njëlloj si në kohën e komunizmit kur propagandohej "baçja me lule" ndërkohë që ishim kthyer në një "baçe me bunkerë".

Në fakt këto dekorime, ku "magjari lavdëron magjarin", të kujtojnë fort "kohën e bunkerëve". Jo pse shtetari kryesor i vendit është i lidhur pazgjidhshmërisht me marrëzinë e bunkerëve, por sidomos sepse, pas dekorimit të ministrit të rrugëve dhe telefonave, erdhi dekorimi i radhës "për merita në punë" i xhelatit të kohës së Enver Hoxhës, pseudojuristit Fehmi Abdiu. Me ç'duket krerët e stanit "Nano" kanë vendosur ta rikthejnë edhe në simbolikë regjimin komunist. Ndërsa është e njohur që simbolet veprojnë në vetëdijen dhe nënvetëdijen e njerëzve në mënyrë permanente.

Eshtë me vend të thuhet se pas dekorimeve, Abdiu & Poçi, ra perdja e fundit e hipokrizisë shtetërore në lidhje me kursin që ka ndërmarrë sot klani qeverisës Nano. Shkurt llafi, ata po u thonë shqiptarëve se: ne, ish komunistët e djeshëm, jemi po aq të fortë sa ç'ishim në kohën e diktaturës së proletariatit e të Enverit. Ne s'pyesim për të drejtën, për ligjet, për moralin e të tjera gjëra si këto.

I vetmi rregull që funksionon në një shtet të tillë është: "ligj dhe e drejtë quhet vetëm ajo që më intereson mua!" Në përputhje me këtë logjikë thjesht komuniste, kreu i shtetit, kryeministri dhe krerë më të vegjël të shtetit nëpër gjykata e institucione të tjera, po u kujtojnë shqiptarëve orë e çast se sot është kthyer "koha e Enverit." Prandaj ndodhin qyfyre të tilla, që meritojnë proverbin "magjari lavdëron magjarin!"

Dega e PLL Shijak vazhdon fazën e dytë të procesit të analizës e të riorganizimit

Analizë me përgjegjësi për rezultatet zgjedhore në Shijak

Legalistët e Degës së Shijakut kanë filluar një proces të thellë analize e organizimi. Pas zgjedhjeve të pushtetit lokal të tetorit, në bazë të udhëzimeve të dhëna nga Këshilli Kombëtar i PLL, drejtuesit e kësaj Dege kanë bërë një punë intensive në zbatim të tyre. Pas mbledhjes së Komitetit Drejtues të Degës, drejtuesit e kësaj Dege dhe grupet e punës po punojnë sipas një grafiku të përcaktuar në atë mbledhje.

Sipas kreut të kësaj Dege z. Rubjeka, grupet e punës janë shpërndarë e po punojnë në bashkinë e Shijakut, në komunat Xhafzotaj, Rrashbull, Maminas dhe Gjepalaj. Këto grupe në njësitë vendore të sipërthëna, po zhvillojnë një aktivitet në sensin analizues dhe organizativ, ku diskutohen në hollësi e shqyrtohen rezultatet e zgjedhjeve vendore të 12 tetorit, si dhe përgatitet procesi për zgjedhjet e nëndegëve, prej të cilave do të dalin delegatët e konferencës së ardhshme.

Sipas kreut lokal, z. Rubjeka, një punë cilësore kanë zhvilluar në këtë drejtim zotërinjtë: Sefer Çipi (sekretar i Degës), Mehdi Braçe (sekretar për Organizimin), Ruzhdi Kau (sekretar për Marrëdhëniet me Publikun), si dhe Zyhdi Deliallisi (Nënkryetar i Degës).

Z. Rubjeka tha se "është përcaktuar mbledhja e radhës e Komitetit Drejtues" të kësaj Dege, e cila do të zhvillohet më 23 janar, e ku do të vendoset për numrin e delegatëve që do të ketë çdo nëndegë për në konferencë. Skema që do të përdoret për këtë qëllim bazohet në statutin e PLL dhe në udhëzimet e dhëna në mbledhjen e Këshillit Kombëtar. Llogaritja e delegatëve do të bëhet duke nxjerrë një koefiçient në bazë të numrit të anëtarëve të çdo njësie, si dhe rezultatin e dalë nga zgjedhjet e fundit vendore.

Z. Rubjeka thotë se Dega e Shijakut është në përfundim të procesit analizues të zgjedhjeve të fundit vendore, ku rezultatet nuk ishin ato që priteshin. Po ashtu, z. Rubjeka tha se "në këtë moment ne jemi duke freskuar, forcuar e ringritur seksionet apo nëndegët që kanë probleme, sipas udhëzimeve të Këshillit Kombëtar të cilat quhen si faza e dytë". Gjithashtu, z. Rubjeka shtoi se është optimist se kjo Degë do të zhvillojë një konferencë mjaft cilësore, në të cilën do të dalin drejtuesit e rinj të kësaj Dege për mandatin e ardhshëm".

G.B.

Me rastin e një përvjetori

79-Vjetori i "Triumfit të Legalitetit"

Data historike e 28 Nandorit të 1912-ës, shënon ditën e ngritjes së Flamurit në Vlonë dhe shkëputjen e vendit tonë prej vargojve të sundimit shekullor turko-osman, ndërsa 24 Dhjetori i 1924-ës shënon për vendin tonë krijimin e vërtetë të Shtetit Shqiptar, të Kushtetutës dhe të Ligjeve të saj moderne; bashkimin e fiseve në nji shtet të njoftun prej botës mbarë.

Fan Noli, gjatë kohës së qeverisjes nuk qe në gjendje as të realizonte premtimet e tij me anën e reformave dhe as të bajë zgjedhje për nji parlament të ri, përkundrazi, e futi vendin në nji qorrsokak politik, në anarshi dhe kaos të plotë. Me të drejtë Konica e qorton ma vonë tuj i thanë: "Atë që s'qe i aftë ta bëje ti, e bëri Zogu".

Kthimi i Zogut në këtë kohë kaq kritike për vendin, qe nji eveniment i madh politik e historik.

Dr. Kristo Floqi, i frymëzuem prej kësaj ngjarjeje të madhe, shkruen:

"Shpëtimtar ty të qofshim falë"

Çdo shqiptar për ty Hyun e lutë

Se në kaq furtuna e valë

Syni yt as u tremb as u tut

Ti qi sot e shpëtove Shqipninë

Brez mbas brezi kujtim je për ne

Merr kunorën me lule e dafinë

Si i dyti e i vërtetë Skanderbe

Anmiqt e kombit shqiptar dhe të Zogut, hikën si mijt, kush në Greqi e kush në Itali, për t'u kthye mbas 15 vjetësh si "çlirimtarë" me bajonetat e fashistëve të Duçes, në luftanijet e Gjeneral Guzzonit më 7 prill 1939. Dhe andrra e Duçes, që qe shfaq në artikullin e tij "L'amarissimo", u realizue e italianët jo vetëm që morën Vlorën, por okupuan tërë Shqipninë.

Ku do të ndodhej vendi ynë dhe populli ynë, i infektuar sot me sëmundjet e drogës, të prostitucionit, të rryshfetit apo korrupsionit; urrejtjes e të nëpërkambjes së krenarisë kombëtare?

Zogu jo vetëm e bashkoi vendin në nji shtet, por bani atë që qe andrra e rilindasve tanë: krijoi ndërgjegjen e përbashkët kombëtare, bani qi shqiptari kudo qi flitej - ta quente vehten krenar që ishte shqiptar dhe kjo mund të quhet merita ma e madhe e tij.

Periudha historike që kaloi vendi ynë gjatë viteve 1924-1939, le të thonë si të duen historianët kalemxhij, të molepsur prej ideve bolshevike të Enver Hoxhës, asht dhe do të mbetet periudha ma e ndritun dhe ma e begatë e këtij vendi dhe faqja më e lavdishme dhe e shkëlqyer e historisë sonë kombëtare. Këtë e dëshmojnë korifejtë e artit e të kulturës qi lulëzuan në këtë periudhë: Fishta, Poradeci, Butka, Paskali, Çabej, Xhuvani e Konica.

Ajo periudhë qe pranvera e vendit tonë dhe ky vend u mbush plot me lule, si asnjiherë.

Ahmet Zogu qe nji mjeshtër i përkryem, që e njifte mirë mentalitetin e këtij populli dhe dinte, me urtësinë e largpamësinë e tij, ta çonte drejt përparimit, drejt bashkimit dhe dashunisë për njëni - tjetnin dhe për Atdhe. Parrulla e tij qe e mbetet: "Atdheu mbi të gjitha"!

Korçë, 21 dhjetor 2003

Enver Hasa

Me rastin e përvjetorit të vdekjes së gjeneral Abaz Kupit

Abaz Kupi, njeriu i traditave

Nga Dr. Athanas Gegaj

Abaz Kupi, i njoftun edhe me emnin Bazi i Canës, na la, por nga ana tjetër, na la edhe shembullin e njeriut të zakoneve tona ma të bukura.

Abaz Aga, siç e kishin zakon ta thërrasin miqtë e ngushtë, qysh nga rinija u ba nji legjendë në anën veriore të Shqipnisë. Vepra e tij shkoi tue u shtue, tue u zmadhue, saqë u muer nëpër goj herë mbas here tue lartësue luftat e këtij burri deri sa u banë legjendë dhe hynë në kangë kreshnike, n'ato kangë që në mesjetë u njoftën nën emnin Chansons des Gestes.

Nga akti i tij në Krue, ku vrau ate që guxoi të ulë flamurin nga kështjella e Skënderbeut, deri në rezistencën heroike në Durrës, Abaz Kupi shkroi nji histori legjendash, që e shoqnoi të tanë jetën e tij. Kjo histori që nuk mund të shkruhet, por kalon nga nji brezni në tjetrën, tue u stolisë nga kallximet popullore, që krijojnë legjendën e tij.

E tanë veprimtaria e Abaz Kupit kuptohet vetëm atëherë kur të mendojmë se ai ishte kruetan, i lindun dhe i rritun në Krue të Skënderbeut, krue ase gurrë e traditave tona ma të shenjta; djepi i heroizmit shqiptar, ku Kanuni e Legjenda ishin vëlla e motër. Gjatë pesë shekujsh, në Krue e rrethe zotnoi fytyra heroike e fatosit tonë, Skënderbeut. Nga djepi në varr, nga kodrat e malet e Arbnit, nga jehona e kangëve kreshnike e nga krisma e pushkëve, qe përherë i gjallë Skënderbeu, që nuk u nda kurrë nga populli arbnor.

Këtu lindi e veproi Abaz Kupi. Ai nuk mund t'ishte tjetër gja përveç vazhdimit të këtyne traditave. Abazi e filloi jetën me çeta e me çeta e vazhdoi, tue marrë për shembull Skënderbeun, i cili me çetat e tij formoi ate ushtri kapidanash e ushtarësh trima, që shkruen epopenë ma të shkëlqyeshme në Evropë gjatë të pesëmbëdhjetit shekull.

Abaz Kupi qe njeriu i Kanunit, i traditave tona, njeriu i pushkës dhe i besës.

Në shumë rrethana e kam njoftun Abazin dhe kurr nuk më ra rasti ta shifsha të dalun nga udha e urtisë, nga sjelljet fisnike, që e bajshin të nderohej e të respektohej nga të gjithë. Ai nuk qe njeriu i kultit personal, harronte çka kishte veprue në luftë dhe kërkoi përherë bashkimin e mërgatës shqiptare. Ishte i pari me pri dhe me ndigjue.

Abaz Kupi nuk qe kuvendar, por dijti me i drejtue çetat e tija me kurajë e shembull që e diftoi kurdoherë në jetë.

Edhe gjatë jetës mërgimtare, sadoqë u konsiderue përherë si kryetar nga të gjithë, u diftue i urtë sa na jepet me besue se ai kishte përvetësue atë shprehje të Fishtës:

Por i urti kurr nuk ngutet

Prej burrnije, jo prej tutet.

Abaz Kupi qe njeri detyre, jo fjalësh të kota. Ku e thirrte detyra, aty ishte i pari. E kjo shpjegon, se sadoqë ishte i shtymë në moshë, qe përherë i pari për udhëtime e bisedime me Mbretin dhe me njerëzit e mërgatës, që kërkojshin të bajnë bashkimin shqiptar. Në Misir e ma vonë në Madrid, Abaz Kupi gjeti ngrohje e respekt pranë Familjes Mbretnore, ku ai ishte në shtëpinë e vet.

NMT Mbreti Leka I-rë e stolisi me dekoratën ma të lartë të Mbretnisë Shqiptare; e qe gjesti ma i bukur që mund t'i vehej në qafë dhe në parzm nji burri legjendar.

Gjatë jetës në botën perëndimore, Abaz Kupi udhëtoi nga nji shtet në tjetrin, dhe u diftue guximtar, sepse nuk njifte asnji gjuhë të huej. Dokumentet e tij ishin sytë e pafrigshëm, nji V. I. P. dhe patllakja që mbante në brez.

Abaz Kupi na la por nuk na la pa pasë dhanë shembull në çdo rast të jetës. E kjo asht gjaja ma e bukur që do ta ruejmë si kujtim të tij.

(Fjalim i mbajtun me rastin e ceremonisë së vorrimit të Abaz Kupit në janar 1976).

Kuvendi i Qershizës, kuvend bese dhe mobilizimi në luftën për mbrojtje të atdheut

Ahmet Zogu në vitet 1912-1913

Nga Ferit Këputa

Vera dhe vjeshta e vitit 1912 shënuan pikën kulmore të kryengritjes shqiptare. Në fillim të Korrikut kishin plasur kryengritjet e Kosovës, ndërsa në Mat, që në muajin Prill 1912, Komisioni i të dyzetëve me forcat e veta kish përzënë turqit nga krahina. Shqiptarët kudo luftonin për Shqipërinë Etnike.

Ne Gushtin e vitit 1912, Qeveria Turke njoftonte se i pranonte kërkesat e shqiptarëve për autonominë e 4 vilajeteve, por kjo nuk u plotësua, sepse megjithë largimin e administratës turke dhe çlirimin e disa qyteteve kryengritësit shqiptarë nuk arritën të marrin pushtetin. Pas kësaj u pa një ulje tensioni shqiptaro-turke dhe disa gjeneralë e prefektë shprehën vullnetin për të ndihmuar çështjen shqiptare, si Hasan Riza Pasha në Shkodër, prefekti i Dibrës etj..

Në këtë kohë, aty nga fundi i verës, Ahmet Zogu kishte ardhur nga Stambolli për të kaluar pushimet në sarajet e tij në Burgajet. Atë e pritën me nderime që në Dibër, ku takoi Prefektin, i cili gëzonte simpati të madhe për djaloshin Zogu. Aty ata biseduan edhe për situatën. Në Burgajet Zogu i ri u prit e u vizitua nga e gjithë paria e Matit. Në bisedat me ta Ai u frymëzoi atdhetarizmin, duke i njohur edhe me ngjarjet e kohës.

Në Gusht, kur Qeveria Turke u prononcua në favor të kërkesave dhe të drejtave të shqiptarëve, shtetet shoviniste të Ballkanit filluan luftën kundër trojeve etnike shqiptare. Ata formuan aleancën e fshehtë ballkanike, në të cilën merrnin pjesë Serbia, Mali i Zi, Bullgaria dhe Greqia, që kërkonin të zbatonin planet e tyre ekspansioniste për të coptuar Shqipërinë Etnike midis tyre.

Ushtritë ballkanike, ndonëse kishin filluar veprimet luftarake në Kosovë dhe kundër Shkodrës, më 2 tetor 1912 i shpallën luftë zyrtarisht Turqisë. Që në veprimet e para, ushtritë e Ballkanit shpartalluan shumë reparte turke në të gjithë zonat. Sipas planit të tyre: Mali i zi synonte Shkodrën, Serbia synonte daljen në Adriatik nëpërmjet 3 grykave Matit, Drinit e Shkumbinit, ndërsa Greqia synonte Jugun e Shqipërisë. Luginën e Matit nuk mundi ta shkelte asnjëherë, as Serbia, as Bullgaria dhe as Mali i Zi.

Ahmet Zogu i kuptoi planet e ballkanasve dhe kur malazezët rrethuan Shkodrën ai u organizua me shpejtësi për t'i shkuar në ndihmë.

Për organizimin e matjanëve në luftë, Ahmet Zogu vendosi të marrë masa për armë dhe për mobilizimin me vetëdashje, duke lëshuar kushtrimin në të gjithë krahinën e Matit. Ai, duke shfrytëzuar edhe miqësinë e shoqërinë që kishte në Stamboll, sidomos me prefektin e Dibrës, kërkoi armë.

Dhe populli këndoi:

Në Stamboll shkruen fermani

Po lyp armë Ahmet bej Mati

Ka lyp armë e i don sak

Don me u nis në Karadak

Për Karadak e Mal të Zi...

Me Kurt Agën u ka pri

(Visaret e kombit Tiranë. Biblioteka kombëtare, botim 1930)

Ahmet Zogu i çon urgjent një telegram Prefektit të Dibrës me anën e të cilit e lajmëron se ai po mblidhte një fuqi prej 2000 matjanësh dhe se do të nisej në krye të kësaj fuqie kundër armikut në mbrojtje të Shkodrës, nëqoftëse Qeveria turke, e sidomos ai, Prefekti, do të çonte armë e municione. Këtu Zogu shfrytëzonte edhe njohjen e miqësinë qe kishte pasë gjyshi i tij Xhelal Pasha e babai i tij Xhemali me Prefektin dhe shumë nëpunës turq.

Ahmet Zogu i kishte menduar mirë punët. Ai donte të dilte para ushtrisë serbo-malazeze, që ta ndalonte të mos shkelte tokat shqiptare dhe njëkohësisht mendonte të ftonte të gjithë patriotët më të cilët kishte pasë takim që në Stamboll, si Ismail Qemalin etj., dhe duke shpallur vetëqeverisjen e Shkodrës e të krahinave përreth, të shpallte vetëqeverisjen e të ngrinte flamurin e Pavarësisë, çka u realizua më vonë, më 28 Nëntor 1912, në Vlorë.

Prefekti i Dibrës, i cili e njihte mirë djaloshin Zogu, ra dakord dhe pa humbur kohë e lajmëroi telegrafisht se armët e municionet i kishte gati. Të nesërmen, një grup trimash, me Kurt Agë Kadiun në krye, u nisën për në Dibër dhe më 3 Tetor, 1400 pushkë turke të prodhimit gjerman dhe municione përkatëse u gjendën në Burgajet. Në të katër anët e Matit ishin nisur me kohë lajmëtarët, si Malë Bozholi, Hysen Gjestila e shumë të tjerë, të cilët me kushtrim thirrnin vetëdashës (vullnetarë për t'u organizuar për luftë). Kështu, më 4 Tetor 1912 u drejtuan për në Burgajet mijëra luftëtarë. Ja si e përshkruan historiani i kohës, Kristo Dako, grumbullimin për në kuvend: "Trimat e maleve të Matit me pleqësitë e tyre në krye, takoheshin në Saraje e pastaj grumbulloheshin në një lëndinë të bukur mes pyllit, afër Sarajeve të Zogut. (Aty, në Qershizë, vinin burra nga Lura, Selita, Prelli, Katër Grykët, Rranxa, Kurdaria, Semtet e Klosit, Çela e Bozhiqi, nga gjithë krahinat e Matit. - F.K.)

Ishte një nga mbledhjet më madhështore që kishte parë Mati. Midis trimave të tij, në moshën e shërbimit ushtarak ishin shumë burra, që e kishin kaluar gjysmën e jetës. Të gjithë ishin mbledhur porsi bleta rreth e qark një djali të ri që nuk i kishte kapërcyer të 17-tat, dhe e dëgjonin me vëmendje".

Për dy tre ditë me radhë u bënë shpjegime për përdorimin e armës, pasi kishte ndër ta që nuk kishin përdorur pushkë të tilla. Tregojnë se një i ri, i fortë, i vuri këmbën për të tërhequr shulin e një pushke dhe e këputi. Ahmet Zogu mori në dorë një pushkë dhe u shpjegoi të gjithëve sesi ta përdorin pushkën.

Mbasi kolonel Zogu u bind se trimat ishin gati për marshim, urdhëroi për rreshtim të menjëhershëm nëpër 5 batalione (tabore) të 2000 matjanëve. U shpërndanë armët e municionet dhe u bënë gati të nisen në fushën e betejës me parrullën "Ja të vdesim, ja të mbrojmë trojet tona". Në krye të kollonave të rreshtuara, dalloheshin shumë udhëheqës të shquar popullorë si: Ibrahim Gjoçi, Bib Doçi nga Lura, Adem Cara, Hazis Sula nga Selita, Ali Xhetani, Ismail Terziu, Kurt agë Kadiu, Ahmet Shabani, Sulë Kurti, Hazis Brahilika nga krahina e Prellit, Sali Katuçi e Hamit Lezi nga Gurra, Hysë Dikë Hysa nga Karica, Kros Cakoni nga Bazi, Selim Allamani nga Kurdaria, Lim Beg Çela e Miftar Bozhiqi nga Klosi e shumë të tjerë, që ishin mbështetja kryesore e Prijësit 17 vjeçar Ahmet Zogu.

Me bindje të patundur në fitore, me sy të patrembur, të 2000 matjanëve trima (në krye të të cilëve printe Bajraku i Lurës), duke patur edhe urimin e popullit dhe të Nënës Sadie, A.Zogu me pushkë në dorë niset bashkë me ushtrinë për në fushën e betejës.

Me një qëllim të lartë e largpamës, i frymëzuar nga atdhedashuria e si një patriot i flaktë, Ahmet Zogu kërkonte të mbronte tokën amtare. Pushtimi i tokave shqiptare ishte një rrezik i madh për pavarësinë e Shqipërisë. Zogu, me cilësitë dhe mendjemprehtësinë që e karakterizonte, u përpoq të paralizonte elementin kërcënues ballkanas, duke u treguar fuqive të mëdha se Shqipëria nuk mposhtet dhe se ato duhej ta pranonin programin e tij politik.

Armiqtë ballkanas arritën t'i përçanin forcat shqiptare. Kështu ndodhi edhe kur forcat matjane po kalonin nëpër Mirditë drejt Shkodrës, ku u dalin para forcat mercenare të Preng Pashë Mirditës dhe kërkojnë me çdo kusht që matjanët të ktheheshin mbrapsht. Zogu, për të mos shkaktuar vëllavrasje, u kthye prapa dhe vazhdoi rrugën nga zonat e Krujës e ra në Milot. Kruja e ndihmoi Zogun edhe me armë, dhe nga Miloti matjanët u nisën për në Shkodër. Kjo vonesë u dha rast malazezëve të merrnin vesh planin luftarak të Ahmet Zogut dhe arritën të zënë pritë në Kakarriq të Lezhës.

Matjanët hynë befasisht në betejë dhe ajo u zhvillua shumë e ashpër. Tregojnë se, kur u mbaruan fishekët taborrit të parë, ata u hodhën në luftë trup me trup kundër malazezëve. Armiku pësoi humbje të mëdha, por atij i erdhën përforcime nga ata që ishin në rrethimin e Shkodrës, dhe kështu matjanët u gjendën të rrethuar. Malazezët kërkonin që forcat matjane të dorëzoheshin pa kushte, por matjanët nuk ishin mundur asnjëherë. Ata kanë qenë gjithmonë krenarë e fitimtarë në beteja, që nga koha e Skënderbeut. Në këto momente, kolonel Zogu e kuptoi që ishte punë e kotë sulmi me fuqinë e tij të vogël. Kështu Ai u propozoi marrëveshje malazezëve. Ai kërkoi të takonte krerët e tye. Kur krerët malazezë u paraqiten në takim, Zogu me guximin e tij të jashtëzakonshëm i shtrëngoi ata që të hapnin rrugën që matjanët të largoheshin drejt maleve.

Pas pak ditësh Zogu u kthye përsëri dhe, në disa beteja, i shkatërroi mbeturinat malazeze deri në prag të Shkodrës.

Në këtë betejë nga forcat matjane dhanë jetën në fushën e nderit dhjetra luftëtarë, ndër të cilët Hysë Dika nga Karica; - Asllan Hoxha, Hajredin Qerimi, Sali Hysa, Isuf Doda nga Derjani; - Abdi Gjasta, Hasan Migla, Hasan Ndreu; - Ali Vuka, Hazis Abdia, Osman Heta, Dalip Ruçi, Hazis Stafasani nga Burgajeti; - Ali Xhokola nga Gjoçaj; - Demir Xhokola nga Barbullej; - Sulejman Allamani - komandant tabori; Zenel Hajri; Hazis Mellani; Hysen Misha; Mollë Salia; Sadik Duka; Beqir Fiza nga Kurdaria; - Ali Kadiu; Sadik Demleka nga Lisi; - Dush Sala nga Shoshaj; - Lim Beg Çela - komandant taborri nga Patini; - Miftar Bozhiqi nga Klos Katundi; - Rustem Uka nga Selita e të tjerë.

Vetëm nga Bajraku i Lurës ranë mbi 40 vetë dëshmorë. Të plagosur ishin shumë, ndër to edhe Hysen Gjestila, me flamurin në dorë. Sejdin Avduli megjithëse mori 4 plagë, u ngrit dhe kur kalonin lumin Fan, shpëtoi disa shokë nga mbytja. Ndërsa Sulë Kurti i ri, ndonëse i plagosur, luftonte në këmbë me heroizëm të pashoq. Në këto luftime u vranë 87 matjanë dhe u mbytën në lumë 13 të tjerë. Kjo qe një humbje jo e vogël, që erdhi si rezultat i tradhtisë, por matjanët nuk u ligështuan. Ata e vazhduan luftën dhe bënë plane për të çarë rrethimin e Shkodrës, por kjo nuk u arrit, sepse armata serbe pasi pushtoi Prishtinën, Prizrenin e Gjakovën, kaloi nëpër luginën e Drinit, pushtoi Dibrën, Mirditën, Lurën dhe po i afrohej Matit. Kështu, duke parë se krahina e Matit rrezikohej nga pushtimi serb, Ahmet Zogu me forcat vullnetare të mbetura nga beteja, u kthye në Mat. Edhe gjatë kthimit pati shumë përpjekje me forcat serbe, por matjanët u kthyen në Mat triumfues dhe filluan mbrojtjen e Matit nga divizionet serbe. Gjatë muajve dhjetor - janar 1912-1913. Këtë luftë heroike të matjanëve me Ahmet Zogun 17-vjeçar në krye, populli e ka përjetësuar në këngë:

Ahmet Zogu asht hazrue

Me Karadakun me luftue.

Ahmet Zogu beg i ri

Të tanë Matën mbledhi hazbi

U jep mauzer me gjithë sevxhi

Në grykë të Shëngjinit me u gri

***

Selim begu u ka pri

Selim begu i Allamanit

Tuj ba luftë me din-dushmanin

Çaj Hysë Dika nji trim-drague

Selim begun e ka pagjue

***

Ahmet begu ashte hazrue

Me Karadakun me luftue

Se tanë Shqipnia asht me mue.

Ahmet Zogu, sapo u kthye në Mat, organizoi me shpejtësi mbrojtjen e tij nga sulmet serbe, dhe në krye të 25 luftëtarëve, ndër ta Kurt Agë Kadiu, Riza Beg Çela e të tjerë, i ftuar nga Ismail Qemali arriti në Vlorë. Ismail Qemali e përqafoi Ahmet Zogun 17-vjeçar, dhe duke e përshëndetur i tha: "Mirëserdhe biri im, se për këtë punë që bëjmë sot, vite më parë kemi pasur për mësues gjyshin tënd".

Më 16 dhjetor 1912, përfaqësuesit e Matit me Ahmet Zogun e Dom Nikoll Kaçorrin në krye, si dhe të ata të Mirditës, Dibrës, Pukës, Kthellës, Malësisë së Lezhës, Dukagjinit, Breg-Matit, Kurbinit e Zadrimës, të mbledhur në Orosh, njohën dhe përshëndetën flamurin e Shqipërisë dhe Pavarësinë të shpallur në Vlorë, duke i dhanë besën Qeverisë së Përkohshme të saj. Në Mat, flamuri ishte ngritur që me 5 dhjetor 1912.

Kuvendi i Qershizës ishte rasti i parë historik i matjanëve dhe një nga veçoritë kryesore historike kombëtare.

Nga Qershiza historike, në kuvendin e 4 Tetorit 1912, Ahmet Zogu nisi marshimin historik dhe arriti ta bëjë kombin shtet.

--------------------------------------------------

faqe 7 dhe 8

Një vështrim mbi debatin monarki-republikë(1)

Monarchia përballë Republikës

Nga Otto von Habsburg

Kemi të bëjmë këtu me aspektin formal të shtetit - çështjen, monarkia përballë republikës - për të cilën më së shumti diskutohet nga një këndvështrim shumë më tepër emocional sesa racional. Debati procedon me argumente ad hominem (mbi personin). Radhiten disa njerëz të padenjë që zënë fronet mbretërore dhe pastaj na paraqiten si shembuj për monarkinë. Edhe mbrojtësit e monarkisë nuk sillen më ndryshe. Ata përqendrohen te disa politikanë profesonistë e të korruptuar, prej të cilëve ekziston gjithandej një numër i mjaftueshëm, dhe pretendojnë se kjo është konsekuenca thelbësore e një sistemi republikan. Asnjëri nuk është një argument racional. Ka pasur monarki të mira dhe të këqija - republika të mira (si në Zvicër) dhe të tjera të cilat janë shumë larg prej këtij standardi.

Çdo institucion njerëzor, në fund të fundit, ka anët e tij të mira e të këqija. Për sa kohë që kjo botë të banohet prej njerëzish e jo prej engjëjsh, krime dhe gabime do të vazhdojnë të ndodhin. . . Republikanët kanë qejf të mbrojnë idenë se një regjim monarkik do të thotë sundim i aristokracisë. Monarkistët, nga ana tjetër, përqendrohen të vështirësitë ekonomike, barrën e taksave, ndërhyrjet e shtetit në jetën private siç ndodh në republikat e sotme, dhe e krahasojnë këtë gjendje me lirinë dhe rehatinë ekonomike që ka qenë në monarkitë e para 1914-ës. Të dy argumentet nuk janë bindës. Ato përdorin trukun e vjetër propagandistik duke krahasuar rezultatet që vijnë prej dy shkaqeve krejtësisht të ndryshme. Çdokush që është i ndershëm do të krahasonte monarkitë e sotme me republikat e sotme. Kështu do të dilte qartë se aristokracia e lindur (trashëguese) nuk zen ndonjë pozicion drejtues më të madh në vendet monarkike sesa në ato republikane, dhe se, të gjitha shtetet, çfarëdo forme qeverisëse të kenë, janë njësoj të prekur nga problemt serioze të ditëve të sotme.

Republikanët shpesh pretendojnë, për më tepër, se monarkia është një formë qeverisjeje që i përket të shkuarës, ndërsa republikanizmi i përket të ardhmes. Edhe një njohje e lehtë e historisë do të ishte e mjaftë ta hidhte poshtë këtë. Të dyja format kanë ekzistuar qysh prej kohëve më të hershme (ndërkaq periudha monarkike zakonisht ka zgjatur shumë më tepër se ajo republikane). Në çdo rast, është e gabuar ta quajmë një institucion të cilin e gjejmë qysh në Greqinë e lashtë, Romë dhe Kartagjenë si formën qeverisëse të së ardhmes.

Në çdo diskutim objektiv ne duhet ta bëjmë këtë pyetje dhe t'i japim vendin e duhur në hierarkinë tonë të vlerave. Nuk është një rastësi që ne flasim për "formë" të qeverisjes. Ka një ndryshim të madh ndërmjet "formës" dhe "përmbajtjes" - ose qëllimit - të shtetit. Kjo e fundit është arsyeja e tij thelbësore "raison d'etre" thelbi i tij i vërtetë. Të parat u korrespondojnë formave trupore të një qenieje të gjallë. Sigurisht njëra s'mund të jetojë pa tjetrën; por në hierarkinë e shëndoshë të vlerave, shpirti zen një vend më të lartë se trupi.

Qëllimi thelbësor i shtetit, "përmbajtja" e tij, i ka rrënjët në ligjin natyral. Shteti nuk është një qëllim në vetvete; ai ekziston për të mirën e qytetarëve të tij. Kështuqë ai nuk është burimi i të gjitha ligjeve (një pohim i cili është pranuar gjerësisht sot), dhe as mund të jetë i plotfuqishëm. Autoriteti i tij kufizohet nga e drejta e qytetarëve të tij. Ai është i lirë të veprojë vetëm në ato fusha që janë jashtë veprimit të tyre të lirë. Shteti sidoqoftë është, në të gjitha kohët, një shërbëtor i ligjit natyral. Detyra e tij është t'i japë një efekt praktik këtij ligji, asgjë më tepër.

Nëse misioni i shtetit është realizimi praktik i ligjit natyral, forma e qeverisjes është një mjet përmes së cilit komuniteti synon të arrijë qëllimet e veta. Por nuk është një qëllim në vetvete. Kjo shpjegon rëndësinë relative dytësore të të gjithë kësaj pyetjeje. Padyshim ka një rëndësi shumë të madhe zgjedhja e mjeteve më të mira, përderisa kjo zgjedhje do të jetë përcaktuese nëse do t'ia arrijmë qëllimit apo jo. Por ajo që është e përhershme në jetën politike është veçse ligji natyral. Tentativa për ta realizuar këtë ligj në praktikë gjithmonë duhet të llogarisë edhe gjendjen aktuale. Të flasësh për një formë të vlefshme qeverisjeje të përjetshme, dhe për të gjitha rrethanat e zhvillimet, tregon injorancë dhe paragjykim. Prej kësaj duket se duhet të pranojmë që është e pafrutshme të përpiqemi të përcaktojmë - më së shumti prej premisave të gabuara filozofike - vlerën objektive të njërës apo tjetrës formë të qeverisjes. Diskutimi do të bëhej fare i pafrutshëm nëse mbajmë parasysh qëllimin për të cilin secila formë duhet të shërbejë. Ndërsa nuk është një çështje që duhet ta ngrejmë se për çfarë vlerash ne jemi të lidhur me monarkinë apo me republikën si të tilla. Ajo që ne duhet t'i kërkojmë vetvetes është se cila formë qeverisëse na ofron shanset më të mira në mbrojtje të ligjit natyral nën kushtet e sotme.

Monarkia, republika - demokracia

Mbasi ta kemi sqaruar këtë pikë, ne mund të kalojmë në dy problemet e tjera, të cilët janë tërhequr shpeshherë në këtë diskutim dhe kërcënojnë të helmojnë gjithë situatën. Ka një debat konstant rreth lidhjeve ndërmjet monarkizmit, republikanizmit dhe demokracisë. Ne ndeshemi këtu edhe një herë me mendimin e mjegullt karakteristik të kohës sonë të propagandës dhe të slloganeve. Koncepti i demokracisë është bërë pafundësisht elastik. Në Rusi ky është kompatibël (i pajtueshëm) me shfarosjet në masë, policinë sekrete dhe kampet e internimit. Në Amerikë, nga ana tjetër - dhe rastësisht në Europë - edhe teoricienë politikë janë shpeshherë ta paaftë të bëjnë dallimin ndërmjet republikanizmit dhe demokracisë. Për më tepër të dyja fjalët përdoren për të përcaktuar koncepte dhe karakteristika që shkojnë përtej fushës politike, dhe që i përkasin sferës ekonomike dhe asaj shoqërore. Prandaj duhet thënë qartazi se, përgjithësisht, demokraci do të thotë e drejta e popullit për të marrë pjesë në përcaktimin e zhvillimit dhe të së ardhmes së vet.

Nëse ne e pranojmë këtë përcaktim (definicion) ne do të shohim se asnjëra prej dy formave klasike të qeverisjes nuk është e lidhur me demokracinë në mënyrë natyrale. Demokracia ekziston nën të dyja format, ashtu siç ekzistojnë republika autoritare apo monarki të tilla. Monarkistët, në fakt, pretendojnë se demokracia funksionon më mirë nën një monarki sesa nën një republikë. Nëse ne i hedhim një vështrim Europës së sotme, sigurisht që ka diçka të vërtetë në këtë argument, megjithëse vlershmëria e tij është e kufizuar nga koha dhe hapësira. Në të njëjtën kohë është e nevojshme të përmendim se në shtete të vegjël, të cilët janë thellësisht të bazuar në traditat e tyre, si Zvicra, demokracia dhe republikanizmi mund të bashkëjetojnë me sukses.

Vijon në numrin e ardhshëm

Përktheu nga anglishtja:

Neritan Kolgjini

--------------------------------

Prona, sfidat e saj, zgjidhjet dhe Stabiliteti në Shqipëri

nga Prof. As. Gëzim N. Boçari

Populli shqiptar, veçanërisht ai i zonave turistike bregdetare dhe ai i zonës Tiranë Durrës, ka mëse një dekadë debate, përplasje dhe luftë për të hequr arbitraritetin dhe dhunën e pushtetit mbi pronën e trashëguar dhe, pavarësisht nga këto, e megjithë përpjekjet e mëdha të bëra, kemi përshtypjen se ndonëse asnjë problem nuk është aq madhor, po aq është neglizhuar dhe po aq mbetet i paatakuar publikisht ashtu siç duhet.

Partitë e mëdha ose prononcohen me ambiguitete, sikundër PD, ose kanë marrë një qëndrim refraktar si PS.

E ndërkaq, zhvillime pozitive dhe negative kanë ndodhur, dhe interpretimi i tyre ka sjellë pasoja për zgjidhjen e kësaj çështjeje.

Ndaj qëllimi i këtij shkrimi është në veçanti rishikimi dhe ekspozimi ndaj publikut i kësaj çështjeje të rëndësishme, aq më tepër në prag të miratimit të ligjit të ri, qe u hartua nën kujdesin e OSBE së.

Në themel të diskutimit tonë qëndron parimi dhe bindja e shoqatës Kombëtare "Pronësi me Drejtësi", e mbështetur dhe prej të gjitha shoqatave të tjera të të shpronësuarve. Një nga kyçet e shumë "sëmundjeve" të tranzicionit, pa dyshim të gjatë e tejet të vështirë të Shqipërisë, është moszgjidhja siç duhet e problemit të pronës, i cili po qe se nuk zgjidhet do të vazhdojë të prodhojë andralla të stërzgjatura për ekonominë, stabilitetin dhe popullin shqiptar, por jo vetëm kaq.

Ku është Shqipëria në kthimin e pronës në krahasim me vendet e tjera ish socialiste ?

Mbase kjo pyetje duhej bërë më parë, por ne po e shtrojmë përsëri. Mos vallë vendet e tjera ish socialiste kanë zbatuar ndonjë formulë jo të ngjajshme me Shqipërinë? Apo përsëri "Shqipëria është një rast i veçantë"!

Duhet pranuar se vërtet Shqipëria i ka bërë një zgjidhje sa të ndryshme aq edhe të gabuar problemit të pronës. Kështu, legjislacioni shqiptar i periudhës postkomuniste për kthimin e pronës, që u hartua me shumë xhepa, lejoi që ta klasifikonte pronën në disa kategori, si: tokë bujqësore dhe tokë truall; kullota dhe livadhe; pyje; toka turistike dhe jo turistike, etj. Ky legjislacion nuk bëri enkas dallimin e domosdoshëm të pronave që i përkisnin shtetit dhe pronave që ishin grabitur nga shteti i mëparshëm i diktaturës.

Për të intriguar procesin e kthimit, ai u përzie me kompensimin. Komisionet e krijuara mund të të njihnin pronën, por nuk e kthenin atë. Dhe rezultati ishte një pështjellim. Një fqinj i juaji mund të merrte kullotën, por ti s'mund të merrje tokën bujqësore që e kishe ngjitur me të, pasi ti jetoje në qytet (!!). Një pronari mund t'i njihej toka, por nuk mund t'i kthehej, pasi dikush tjetër qe kompensuar nga Komisioni i Kthimit të Pronave në tokën e tij, etj. Në zonat turistike, pushteti mund të të ngjiste një "person të stimuluar" pikërisht në pronën tënde, dhe ti duhet të presësh si lëmoshë vendimin për kompensim. . . , e kështu mund të vazhdojmë gjatë.

Por le te kthehemi tek toka bujqësore, ku politika shqiptare i dha Shqipërisë një zgjidhje arbitrare alla shqiptarçe problemit më themelor të ekonomisë së tregut dhe të të Drejtave të Njeriut, atij të pronës private.

Asnjë nga politikanët vendas apo të huaj, nuk ka thënë troç e hapur se, Shqipëria është vendi i vetëm ish- komunist, që nuk ka respektuar titujt e pronësisë për pronarët e ligjshëm, por me artifice juridiko-formale ka organizuar transferimin e paligjshëm të pasurive të paluajtshme, që mund ta quajmë "piramida e pronave". Të gjitha vendet e tjera ish socialiste e kanë patur këtë problem në fokus dhe ju kanë kthyer pronarëve pronat e tyre. Vetëm pas kësaj janë dhënë edhe opsione të tjera. Kjo është e vërtetë për Bullgarinë,

Republikën Çeke, Hungarinë, Letoninë, Lituaninë, Poloninë..., përveç Shqipërisë. Ka edhe një vend fqinj, që fillimisht e zgjidhi problemin e pronave duke mos ua kthyer pronarëve të ligjshëm - Maqedonia.

Ndërsa në të tërë këto shtete kthimi dhe reforma e tokës është bërë mbi bazën e pronave të ligjshme kthyer ish

pronarëve, i vetmi vend që e ka shpërndarë tokën për frymë të popullsisë është Shqipëria!!!

A mund të bëhej ndryshe??

Një përgjigje që u vjen ndërmend të huajve për Shqipërinë, është se kjo zgjidhje e bërë nga qeveritë dhe ligjvënësit shqiptarë ishte e kondicionuar. E thënë thjesht: nuk kishte rrugë tjetër.

Ajo që duhet rithënë është se Shqipëria ka 1/2 e territorit me pyje, 1/4 me tokë bujqësore dhe nga kjo e fundit 50% është transformuar në të tillë gjatë viteve të socializmit. Pra gjatë 50-vjetëve u krijua edhe rreth 300. 000 hektarë tokë e re bujqësore, krahasuar me atë qe ekzistonte e regjistruar në vitin 1945.

Me këtë del e qartë se ata që hartuan ligjet për shpërndarjen e pronave e kishin tepër të lehtë të ndanin atë që i përkiste shtetit nga ajo që u përkiste të shpronësuarve dhe kështu t'u kthenin të zotërve pronën e marrë padrejtësisht, duke respektuar titujt e mirëfilltë të pronësisë.

Natyrisht që për 50 vjet popullsia u shtua dhe veçanërisht në fshat, por kthimi i pronave tek pronari i ligjshëm, që duhej të ishte ndër veprimet e para të qeverisë demokratike pas vitit 1991, do ta kish shlyer detyrimin kushtetues dhe do të kishte kënaqur ata 87% shqiptarë (dhe pasardhësit e tyre), që qenë zotër në 1945. Natyrisht mbetja e tokës bujqësore (dhe jo pak por 52% e sipërfaqes), do të kënaqte shtresat pa prona, apo në pjesën më të madhe pa burime të kënaqshme.

A ka vlerë kjo logjikë tani, do të pyesë dikush?!. Ka vlerë për të argumentuar se ata që bënë atë zgjidhje nuk mund të argumentojnë sot se e bënë atë për shkaqe sociale. Pra do të thotë se e kanë bërë për shkaqe të tjera.

Arsyeja e kësaj pjese të shkrimit është thënia e Aristotelit që, para 2300 vjetëve, thoshte se "pabarazia politike sjell në të gjitha rastet instabilitet politik".

Nuk duhet mohuar se legjislacioni pasdiktatorial u ktheu disa pronarëve pronat e tyre, pavarësisht se ua ktheu pas shumë vështirësive. Fakt është se në qytete u rikthyen disa prona, u kthyen edhe pyjet e kullotat, (ndonëse duhet thënë se këto janë vetëm 5% e fondit pyjor të Shqipërisë).

Në 1996, shteti shqiptar ka miratuar ligjin që u njeh të drejtën qytetarëve shqiptarë të SHBA që të rimarrin pronat. Veç kësaj, në favor të tyre u paguan edhe reparacionet e mosshfrytëzimit për 45 vjetët e sundimit socialist.

Janë bërë përpjekje për të rikthyer pronat e komuniteteve fetare, ndonëse shumë nga dokumentacionet kanë humbur???

Shoqatat e pronarëve i përshëndesin këto vendime të marra nga cilado qeveri, pasi ato mendojnë dhe kërkojnë të venë në vend të drejtat e mohuara më parë. Por, nga ana tjetër, të tëra këto përligjin tezën tonë se shteti shqiptar ka dy kute, ka dy qëndrime, të cilat pa dyshim kanë pasoja dhe kosto. Kjo sepse pronarët e tjerë kanë të drejtë të pyesin: po për të tjerët, d. m. th, për shumicën e pronarëve, pse ky qëndrim i dyfishtë?

Arsyetimet dhe justifikimet shterpe të pushtetarëve

Zyrtarët shqiptarë janë munduar të fshehin kokën si struci para faktit se ata janë të vetmit në Evropë që kanë

zbatuar parimin: pronën tuaj e shpërndajmë ne dhe juve do të kompensoheni! Disa zyrtarë i justifikojnë veprimet e bëra veçanërisht me tokën bujqësore, me të ashtuquajturën Reformë Agrare, duke harruar se reforma agrare shërben e bëhet vetëm në vënde me disproporcione të mëdha të pronësisë dhe raporte krejt të

ndryshme midis popullsisë së varfër dhe pronarëve të mëdhenj. Zërat që propagandojnë se me tokat u bë Reformë Agrare, me siguri që edhe vetë nuk janë të bindur për ato që thonë. Ata harrojnë se Reforma Agrare reflekton tensione sociale të mprehta, që nuk kanë ekzistuar në Shqipëri edhe kur 90% e popullsisë ka qenë në fshat e jo më pas vitit 1991, kur drejtuesit e dinin se zhvillimi i ekonomisë së tregut do të lëvizte një pjesë të mirë të popullatës nga fshati për në qytet. Mjaftojn të kujtojmë se, në vitin 1945 latifondistët përbënin vetëm 3. 7% të popullsisë, ndërsa pronarët e mesëm dhe të vegjël rreth 70% të saj.

Një arsyetim tjetër në modë, po ashtu sa për justifikim, është se "shumica e popullsisë e pëlqen ligjin 7501 dhe po qe se 70% e pëlqen, atëhere ligji është demokratik". Një shtet nuk është kurrë demokratik nëse nuk kënaq edhe interesat e pakicës, duke dyshuar kurdoherë në shifrat e "të kënaqurve".

Eshtë mendimi ynë se "pa u kthyer prona tek i zoti, përparimi ekonomik mbahet i frenuar dhe Shqipëria nuk ka rrugë të lehtë përpara". Fshatarët thonë: "Prona haram nuk bëhet hallall", ose "nuk duam pronë me bela nga pas tërë jetën". Aq e vërtetë është kjo psikologji sa, në shumicën e Shqipërisë, toka e marrë me ligjin 7501 edhe mund të përdoret, por asnjëherë nuk mund të shitet.

Është e vërtetë se në pjesën më të madhe të rretheve të Veriut të vendit, (natyrisht për këtë s'ka të dhëna zyrtare), toka është shpërndarë në 100 % sipas pronësisë së vjetër, pa krijuar probleme sociale. Shumica e politikanëve, qoftë në nivel lokal apo qëndror, kanë si argument themelor "përshtjellimin që do të vijë po t'u

kthehet prona të zotërve". Nuk do shumë mend të nxirret përfundimi se atyre u pëlqen dhe u intereson pështjellimi aktual.

A mund të ndryshohet ligji 7501! A ekziston vërtet kjo dëshirë? "Gjërat e mëdha janë të thjeshta".

Ata që na udhëhoqën në ndryshimet e fillimviteve '90, besoj se e kanë ditur se ajo që kërkonin të gjithë qe një ndarje parimore me të kaluarën, duke filluar me më themeloren; pra kthim në pronën private dhe i të gjitha të drejtave të tjera të mohuara gjatë socializmit, si alternativë e imponuar nga dështimet e një sistemi që dëshironim ta linim pas.

Implikimet e këtij qëndrimi ndaj pronës

Pasoja e parë (që nuk do shumë mend të shihet, por shpesh nuk bëhet lidhja), është niveli i ulët i investimeve në Shqipëri. Ndonëse është e vështire të bëhen vlerësime të sakta për këtë problem, të dhënat që kemi tregojnë se Shqipëria kishte një nivel investimesh direkte të huaja (FDI) rreth US$ 30/frymë, në krahasim me rreth US$ 700 të Hungarisë, US$ 300 të Sllovenisë apo US$ 300 të Estonisë. Mjafton të themi se jeminë bisht të tërë vëndeve të Europës. Askush nuk do të afrohet pët të investuar, nëse pushteti do të vazhdojë arbitraritetin dhe dhunën mbi pronën private dhe do të ketë dy palë pronarë, dy morale dhe dy qëndrime për pronën. Dhe këtu flasim për investime dhe investitorë seriozë. Kthimi i pronës tek i zoti nuk duhet kuptuar si "rëndësi" por si "parakusht". Askush nuk do të investojë nëse nuk kemi ligje të qarta si në të gjitha vendet europiane, çka presupozon - pronësi të qëndrueshme. E kjo do të thotë se nuk mund të shkohet në Europë me mentalitetin se "nuk jemi as Lindje as Perëndim", ose "jemi vend i veçantë".

Pasiguria për pronësinë e dhënë nga shteti postkomunist, do të vazhdojë sa kohë që do të ketë probleme me pronarët e ligjshëm.

Gazeta amerikane "Neë York Times", në kohën e trazirave të vitit 1997, në një artikull të saj u kujtoi të gjithëve se "ata që mbrojtën territorin e Koka Kolës qenë pronarët legjitimë".

Gjatë viteve të tranzicionit janë "zhdukur rreth 70% e pemëve frutore, përfshirë këtu edhe ato shekullore sikundër ulliri", dhe kjo masakër u bë me një qëllim të caktuar: tjetërsimin e pronës.

Vetëm ullinj janë zhdukur rreth 2. 2 milionë rrënjë, nga 5. 8 milionë rrënjë të inventarizuara në vitin 1990.

Fakti që rreth 50% e çeshtjeve gjyqësore në Shqipëri kanë si objekt konflikte pronësie, reflekton padrejtësitë ligjore dhe anarkinë institucionale. Këto absurditete e mbajnë peng Shqipërinë, dhe prej kësaj gjendjeje do të mund të dilet vetëm kur të shkojë "haka tek i zoti".

"Consensus juris et utilitatis communio". Kjo shprehje latinisht, që është përdorur nga Ciceroni, do të thotë "që institucionet politike arrijnë të reflektojnë Konsensusin Moral dhe Interesin e Përbashkët", dhe kjo është e domosdoshme për një shoqëri komplekse. Me këtë duam të themi se besimi i shumicës së njerëzve është që: pa shkuar prona tek pronari, Shqipëria nuk mund të bëhet".

Zvarritja e kthimit të pronave punon kundër qëndrueshmërisë së Shqipërisë, sepse vepron kundër ligjeve të pranuara nga bota dhe kundër interesave të shoqërisë.

Për këto qëndrime ka vetëm një shpjegim: në rastin më të mirë është paaftësia për të zbatuar detyrimet kushtetuese dhe të Drejtat e Njeriut, dhe në rastin më të keq është shpërdorimi i pushtetit dhe korrupsioni. Kushtetuta e re, e aprovuar në vitin 1998, pohon pa ekuivoke se, "prona fitohet me dhurim, me trashëgimi, me blerje dhe me çdo mënyrë tjetër klasike të parashikuar në Kodin Civil ". Kjo do të thotë se shteti nuk ka të drejtë të shpërndajë tokën e të tjerëve sipas dëshirës së tij, përjashtuar këtu raste ekstreme apo për interesa publike, të përshkruara qartë në legjislacionin shqiptar. (shih ligjin Nr. 8561, datë 22 dhjetor 1999, neni 8 pika a). Nëse zbatohet Kushtetuta, e drejta e pronësisë i përket atij që pronën e ka: "... të blerë, të dhuruar ose të trashëguar". E keqja është se edhe pas datës 28 Nëntor 1998, veprimet shtetërore kanë shkelur Kushtetutën dhe për këtë asnjë nga institucionet drejtuese të shtetit nuk ka marrë masat e duhura.

Korrupsioni dhe prona

Tranzicioni vazhdon të jetë vërtet një periudhë që pjell vezë të arta për politikanët. Le të shihet se cilit i përkisnin trojet dhe pronat në bregdet, cili dhe si i ka marrë ato pas vitit 1991. Mjafton të shohësh bregdetin e veçanërisht zonën Vlorë - Sarandë, të parashikuar për zhvillimin e turizmit elitar dhe të të kujtohet ajo që gazeta "Zëri i Popullit" në vitet 2001 - 2002 e cilësonte "banda e tokave". Nuk dimë se cili e bëri të heshtë "Zërin", por dihet që bregdeti Vlorë - Sarandë u ka prishur gjumin e natës oligarkisë së pushtetarëve. Ata kanë vepruar përmes kryepleqve xhahilë dhe mafiozë, punonjësve cinikë dhe të paskrupullt të kadastrave. Peshkaqenët që nga qendra e deri tek kryepleqtë e komanduar të fshatrave, presin vetëm shënjën, që si hienat të shqyejnë edhe ishullin e mbetur deri tani të pacënuar nga ligji 7501, në bregdet. E për cinizëm kanë arritur që t'i japin një kapteri pronën e famijes së Drejtorit të CIA s, një shqiptaro amerikani me zë, si për t'i bërë karshillëk Shteteve të Bashkuara të Amerikës.

Pushteti hesht! Kujt i intereson kjo situatë? Bregdetasit nuk e kanë harruar ose braktisur pronën. Kanë lënë përkohësisht vëndin për t'u kthyer sërish, dhe do të kthehen.

Ç'thonë të huajt

Në negociatat e bëra me Bashkimin Europian, ky i fundit i bëri të ditur Shqipërisë 30 pikat ku duhet të përqëndrohet puna e qeverisë për t'u asociuar, ku nuk është lënë pas dore edhe kapitulli i pronësisë mbi tokën. Mesazhi është i qartë. Parlamenti Europian në rezolutën e aprovuar për Shqipërinë në vitin 2002, thotë se inkurajon "vënien në jetë të dispozitave kushtetuese të lidhura me krijimin e tregut të pasurisë së paluajtshme dhe regjistrimit të saj, si dhe veprimet në favor të rikthimit të pasurisë".

OSBE në raportin e saj në Vjenë, në Maj 2003, thotë ". . . se Qeveria çfaqi dëshirën për të kaluar një ligj pa konsensus. Presenca (d. m. th. OSBE ja), bëri përpjekje, e mbështetur nga Komisioni Europian dhe Ambasada Amerikane, për të bindur qeverinë për të mos marrë këtë qëndrim". "Guida Tregtare" e SHBA, e cila është baza për investitorët amerikanë, thotë se "Shqipëria nuk i ka zgjidhur plotësisht pretendimet e pronësisë që kanë ardhur si pasojë e konfiskimit të kohës së komunizmit të tokës bujqësore. . . Një numër qytetarësh amerikanë dhe rezidentë, kanë paditur në gjyq qeverinë për çështje që kanë të bëjnë me kthimin e pasurisë.

Shumë investitorë të huaj, janë kthyer mbrapsht porsa kanë mësuar të vërtetën se tokat turistike në bregdet akoma nuk u janë kthyer të zotërve.

Komisioni Europian, përmes z. Reinhard Preibe, i shkruan shoqatës "Pronësi me Drejtësi" se "Komisioni është në dijeni të detyrimit kushtetues të Shqipërisë për të nxjerrë dhe zbatuar ligje që respektojnë të drejtën e pronës, sidomos lidhur me kthimin. . . ". Po ashtu, Komisioni "thekson se adoptimi i një legjislacioni mbi pronësinë dhe kthimin e saj, që synon zbatimin më të mirë të të drejtave të pronësisë në Shqipëri, duhet të jetë një prioritet maksimal i qeverisë Shqiptare".

Nuk po themi këtu se ç'deklaroi z. Forbes pak kohë më parë, por mjafton të themi se për Forbes "Pronësia në Shqipëri ka nisur para vitit 1945" dhe se "Shqipëria ka bllokuar rreth 10 miliardë dollarë investime me këto qëndrime.

Konkluzion.

Pronësia në Shqipëri zgjidhet shumë thjesht. Kjo kërkon vullnet politik. Të gjithë sëbashku mund të bëjmë të lëvizin edhe shkëmbinjtë. Nëse pyetjes: A jemi shqiptarë dhe a dëshirojmë ta fusim ekonominë dhe popullin në rrugën e zhvillimit të demokracisë së mirëfilltë, politikanët i përgjigjen PO, atëhere problemi i kthimit të pronës zgjidhet vetëm me dy nene: Neni i parë të thotë "Prona u kthehet atyre që e kanë patur para vitit 1945. Nuk kthehen por kompensohen ato prona që kanë qenë objekt i investimeve me interes publik dhe trojet e tjetërsuara para vitit 1991 për godina banimi".

Neni i dytë të thotë: "Ky vendim hyn në fuqi menjëherë. ". Kaq thjesht.

Pas kësaj, pa kërkuar fonde kolosale të rendit miliarda dollarë, siç është kërkuar nga disa politikanë, pushteti mund të zgjidhë edhe problemin e kompensimit për pronat e tjetërsuara për nevoja publike.

Mendime për vëllimin poetik "ZËRAT E BRIGJEVE TË MIA" i autorit Namik Selmani

Të sjellësh në një libër shpirtin e paepur çam

Nga Muhamet Vrioni

Botimet për Çamërinë janë më tepër se një sihariq për lexuesit shqiptarë, kudo ku ndodhen . Kjo sofër e afërt dhe po kaq e largët, i ngjan një ode të madhe burrash, ku secili duhet të flasë me zërin e tij, të ngrejë dollinë, të hapë një portë të re, ku secili nga ne të shohë me artin e fjalës të kaluarën e të ardhmen e kësaj Zane të Jonit, të shohë virgjërinë e shpirtit e të plagës së saj ende të patharë.

E kur je përpara një libri të plotë për fatin e Çamërisë, çdo lexues çam dhe çdo dashamirës i kësaj treve bëhet fare natyrshëm pjestar i një feste të vërtetë. Se edhe një poezi e re për të, edhe një tregim, një pikturë, një film dokumentar që bëhet për këtë pjesë tragjike të kombit shqiptar, është një festë e një lloji krejt të veçantë.

***

Tashmë emri i autorit Namik Selmani ka vendin e vet të pazëvendësueshëm në trajtimin e temës gurrëfreskët çame. Që para 13 vjetësh, kur shtypi çam hidhte hapat e tij të para, apo edhe në organe të tjera të shtypit kombëtar e lokal, pena e Namikut tërhoqi vemendjen e lexuesve për larminë e llojeve letrare, për freskinë e motiveve të trajtuara me këtë temë, duke e bërë atë një ZË të veçantë.

Skicat, portretet e reportazhet në ngulmimet çame, brenda e jashtë vendit, qëndronin pranë poezive të bukura, të shkruara prej tij si gurët e një kështjelle e që kishin mesazhin e fuqishëm të MBIJETESËS ÇAME, ku vetë autori ishte e mbetet një nga gurët e rëndë të saj.

Në vitin 2000, publiku artdashës mori në duar vëllimin e tij të parë "VATRA E MALLIT", e këto ditë edhe vëllimin e dytë me poezi "ZËRAT E BRIGJEVE TË MIA".

Bashkë me to, në vitet e fundit ai ka lëvruar e vazhdon të "flasë" edhe me artin e bukur të fotografisë artistike, me temën çame. Publikimi i mjaft fotove të portreteve të nënave çame, të valleve, të shpirtit të këtyre njerëzve në ekspozitat kombëtare në Shqipëri, në ekspozitat individuale në Itali e Prizren, i bëjnë nder jo vetëm atij por edhe historisë së re të Çamërisë, para së cilës mbetemi përherë borxhlinj.

***

Vëllimi "Zërat...", kërkon të krijojë një zinxhir të fuqishëm të brezave të Çamërisë, që nga ata që nuk jetojnë më e deri te ata që ende nuk kanë lindur e që do të kenë fatin të bëhen pjesëtarë të një ëndrre tragjike për të parë e prekur tokën e të parëve të tyre. Këtë zinxhir e mbajnë fort dy metafora, që mendoj se përbëjnë tharmin poetik të vëllimit të tij: ZËRI e BRIGJET. Nga vargu i parë e deri në fund, të dyja të shtojnë drithërimën për fatin e saj tragjik në historinë e kombit, të mbjellin krenarinë për lirizmin e papërsëritshëm të shpirtit të saj, të mbjellin në kujtesë e në zemër një protestë herë të heshtur e herë klithëse, për të nesërmen e saj.

Edhe vetë poeti, mes këtij mesazhi kompleks thotë:

Zëra të brigjevë të mia,

Për ju mora kurorë dafine

Kur varret ishin në prag të Harrimit të Zi

***

Poeti Namik Selmani e njeh këngën dhe vallen e bukur çame jo si njeri tribunash, por si më i moshuari e më i riu i saj, që kurrë nuk i harron, por që i ka si pjesë të pazëvendësueshme të jetës.

Meditimi poetik mbi këto perla, me një varg që të kujton aq saktësisht këngët lirike e epike të kësaj krahine, kthehen njëherësh në një simbolikë të fuqishme, ku dalin dashuria për truallin e gjyshërve, besa, sakrifica e brezave për çdo gjë të bukur... Poezitë "Ulu mal të shoh Kastrinë", "Tanë, moj Tanë"; "Kush ma shkruan amanetin", etj., të ndezin përfytërimin dhe shpirtin e qëndresës. Brenda këtyre sinorëve, poeti qëmton leksikun çam, për të cilin Kryepoeti Naim Frashëri para 120 vjetësh thoshte i emocionuar

Eni vjen prej Çamërie?

Me këtë gluhë Perëndie...

Fjalë të tilla si: çipllak, vuvosen, klumushtore, dhioli, buhar, çepele, manure, bulurimë, etj., i japin një kolorit të veçantë mendimit poetik.

Poezia 'Eksod Çamërie", ndonëse merr shkas nga një ngjarje konkrete - siç është qershori e korriku i vitit 1945, kur e gjithë popullsia çame u dëbua tragjikisht nga trojet e tyre amtare, në mënyrë të natyrshme bëhet pjesë e mbijetesës shqiptare, duke u përsëritur shumë vitë më vonë edhe në Kosovë.

Sado trishtuese të jenë pamje të tilla, ato janë njëherësh klithmë, protestë, kujtesë historie, monument dhimbjeje, sepse drama të tilla vështirë se mund të përfytërohen në kohët moderne.

Në ç'kacek ta fus

Piskamën e heshtur të burrit

Që edhe palcën e dheut më dysh e ndan?

Me se ta shuaj këtë flakë murdare

Që buharin e gjyshit

Në hi të nxehtë po e kthen?

Përballë kësaj dhimbjeje e trishtimi, poeti gjen forcën e optimizmin:

Nata s'e mbyste

Një ortek të qarash të një të porsalinduri.

E më tej ai thotë

Veç shqiponja mbi flamur

Fjalën ma ktheu në sokëllimë

***

Herë pas here poeti e bashkon fatin tragjik me atë të Kosovës, ashtu siç ka bërë edhe në vëllimin e parë. Kjo del te poezitë "Kosovë-Çamëri"; "Monolog"; "Lulja e Kosovës"; "Kosovë-1999", etj..

Na jepet rasti që të vlerësojmë edhe paraqitjen grafike të librit. Kopertina e tij është gjetur mjaft e goditur. Ajo është një ftesë miqësorë për ta lexuar atë që shpreh piktura e bukur e piktores Liliana Çefa "Me flamur në zemër". Po kështu, fotografia e qytetit të Pargës, vendlindja e historianes me origjinë nga ky qytet, Dora D'Istria, e plotëson më së miri këtë mendim.

Natyrisht, krijimi më i mirë i vëllimit mbetet poema "Zëri i vendlindjes". Nëse poezia me këtë temë e ka gjetur rrugën e vet të paktën në këta 13 vjet, poemat për Çamërinë kanë qenë aq të pakta sa mund të numërohen me gishtat e një dore. Është kjo poemë frut i një pune disavjeçare. Jo thjesht për këtë fakt, por edhe nga lloji i vargut që poeti përdor, nga ai qëmtim i kujdesshëm e i harmonizuar i motiveve, i detajeve, i asaj gjuhe metaforike e simbolike - të shoqëruara me një lirizëm të ndjerë - e bëjnë këtë poemë një krijim me vlera antologjike.

Këtu, metaforat Zë e Breg kthehen në simotra të vërteta. Pas brigjeve të Çamërisë, të larë me dritën e mallit e të dashurisë së brezave, me urimin gjuhëmbël të Perëndisë e me dritën e diellit, të shfaqen brigjet e zemrave te brezat e kësaj toke, që edhe varret e të parëve të tyre nuk mund t'i shohin e prekin. Fare natyrshëm kjo përcillet edhe në zemrat e të gjithë bashkëkombasve tanë.

E do t'i lidh brigjet me litarë malli

Qiellin e kaltër do ta ndez si zjarri

E do mbush sofranë me vaj e me mjaltë

Do të shkoj te varret porsi një manar..., thotë poeti që në fillimet e kësaj poeme, duke i dhënë kështu jetë një ëndrre nga më të bukurat e më tragjiket që mund të ketë një shqiptar në kohët moderne. Në hapësirat poetike mjaft të gjëra, ku mbahet gjithmonë një ritëm i lartë i rrëfimit artistik, historia e gjeografia, folklori e etnografia, gjuha e arkitektura tashmë e rrënuar, besimi te Zoti e protesta ndaj shkaktarëve të tragjedisë, krijojnë në këtë poemë një kurorë ylberesh të shumëngjyrtë që të ngazëllejnë. Zana e Jonit, Filati, Paramithia, Bozhuri, Mali i Sulit, Osman Taka, Motra Tanë..., ta nxisin përfytyrimin e të krijojnë një atmosferë noliane me atë marshim biblik të çamëve në 100 vitet e fundit të historisë së tyre.

Përkrah shushurimës së lumit Kalama dëgjon shushurimën e Osumit, të Shkumbinit, të Vjosës...

***

Shpirti im është varkë-Çamëria-skela

Mal të bëhet dallga, kurrë s'i ulet vela

Në ma djegshin fletën do t'ia them çdo zemre

Të ngrejë Monument me shumë amanete.

Edhe në dy ciklet e tjera të vëllimit "Gur, mos u shkrij nga malli" e "Dritaret e Ankonës", autori e ruan linjën e mesazhit artistik të mbarë vëllimit. Ai rrugëtim poetik në mjedise të ndryshme, është në një farë mënyre edhe jeta e këtij komuniteti në këto hapësira kohore. Te poezia "Mëngjezi i së nesërmes", ai thotë:

Kam në sy agimin e nesërm

Kam arkitekturën e një hapi të panjohur

Të dorës që prek librin

Flamurin, fëmijën, bukën.

***

Pasi e lexon dhe e rilexon librin "Zërat e brigjeve të mia", së pari të lind dëshira për ta falenderuar për vlerat interesante që ai sjell. Një falanderim të veçantë do t'ia jepnim edhe redaktorit të këtij libri, poetit Balil Gjini, që ka punuar për një botim sa më cilësor. Ky urim bashkohet me dëshirën e sinqertë që të kemi sa më shumë vepra të tilla cilësore jo vetëm nga ky autor por edhe nga autorë të tjerë që e lëvrojnë këtë temë.